Te ‵Tou Tofi Gali —E Pefea Tena Tāua ki a Koe?
“O‵mai, i a koutou ko oti ne fakamanuiagina ne toku Tamana, ke fai mō koutou a te malo ne fakatoka mō koutou mai te kamataga o te lalolagi.”—MATAIO 25:34.
1. Ne a vaegā mea e maua sāle ne tino mai i nisi tino?
E ISI ne mea kolā ne tuku atu ki tino katoa E tofu a tino katoa mo mea kolā ne maua ne latou mai i nisi tino. Kāti ne maua ne nisi tino se olaga e tai pāpā ‵lei. Kae ko nisi tino ne maua fua se olaga mativa. I nisi taimi, ne tuku mai fua ne nisi kautama mua te takalialia ki nisi tino, ona ko mea kolā ne ‵tupu ki a latou io me ne lagona ne latou. Kae e tasi te mea ne maua ne tatou katoa. Ne maua ne tatou katoa te agasala mai i te tagata muamua, ko Atamu. A te taui fakamuli o te mea tenā ko te mate.—Failauga 9:2, 10; Loma 5:12.
2, 3. Se a te mea gali telā ne ofo atu muamua ne Ieova ki tama‵liki a Atamu mo Eva, kae kaia seki maua ei ne latou te mea tenā?
2 Ne ofo mai muamua ne Ieova, e pelā me se Tamana alofa i te lagi, se mea e kese ‵ki—ko te ola se-gata-mai i tulaga ‵lei katoatoa i te Palataiso. Ne maua ne ‵tou mātua muamua, ko Atamu mo Eva, se kamataga ‵lei katoatoa e aunoa mo se agasala. Ne tuku mai ne Ieova te Atua te lalolagi ki tino e pelā me se meaalofa. (Salamo 115:16) Ne tuku mai ne ia te fatoaga ko Etena e pelā me se tamā ata o mea e mafai o maua i te lalolagi kātoa kae ne tuku atu foki ne ‵tou mātua muamua se galuega gali kae fakaofoofogia. Ne ‵tau mo laua o fai lā tama, tausi ki te lalolagi fakatasi mo lakau kese‵kese katoa mo manu katoa i ei, kae ke fakalasi aka te Palataiso ke oko atu ki te lalolagi kātoa. (Kenese 1:28; 2:8, 9, 15) Ne ‵tau o ‵kau atu lā fanau ki te faiga tenā. E pefea te fakaofoofogia o mea kolā ne mafai o tuku atu ki a latou!
3 Ne ‵tau o ‵lei te va o latou mo te Atua ko te mea ke maua ne Atamu, Eva, mo lā fanau a mea katoa konā. Ne ‵tau o a‵lofa kae faka‵logo foki latou ki a Ieova. Kae ne seki fakatāua ne Atamu mo Eva a mea kolā ne tuku atu ne te Atua ki a laua kae ne seki faka‵logo laua ki tena fakatonuga. Ne galo i a laua te lā Palataiso penā foki loa mo fakamoemoega ‵gali kolā ne tuku mai ne te Atua mō laua. Tela la, ne seki mafai ne laua o tuku atu a mea konā ki lā tama‵liki.—Kenese 2:16, 17; 3:1-24.
4. E mafai pefea ne tatou o maua te mea gali telā ne galo i a Atamu?
4 Ona ko tena alofa, ne fakatoka ne Ieova se avanoaga mō tama‵liki a Atamu mo Eva ke maua a mea ‵gali kolā ne ‵galo i a Atamu. E pefea? I te taimi tonu o te Atua, ne tuku mai ne tena Tama, ko Iesu Keliso, a tena ola e pelā me se tino ‵lei katoatoa ke aogā ki tama‵liki a Atamu. I te auala tenā, ne ‵togi ei ne Keliso a latou katoa. Kae e se fai pelā me e maua fua ne latou a mea ‵gali konā kae e seai se lotou mea e ‵tau o fai i ei. E ‵tau o maua ne latou te taliaga a te Atua. Kae e maua ne latou te taliaga tenā mai i te fakatuanaki atu ki te malosi fakamagalo agasala o te taulaga a Iesu kae ke fakaasi atu foki te fakatuanaki tenā mai i te lotou faka‵logo. (Ioane 3:16, 36; 1 Timoteo 2:5, 6; Epelu 2:9; 5:9) E mata, e fakaasi atu ne au amioga i te olaga nei me e loto fakafetai koe e uiga ki te mea tenā?
Se Tofi Telā ne Tuku Mai e Alatu i a Apelaamo
5. Ne fakaasi atu pefea ne Apelaamo me ne fakatāua ne ia tena fesokotakiga mo Ieova?
5 Ne tu ‵kese a faifaiga a Ieova ki a Apelaamo, i te fakataunuga o tena fuafuaga mō te lalolagi nei. Ne fakatonu atu a ia ki te tagata fakamaoni tenā ke na tiakina ne ia tena fenua kae ke fanatu ki te fenua telā ka fakaasi atu ne te Atua ki a ia. Ne loto malie Apelaamo o fakalogo. I te okoatuga o Apelaamo ki konā, ne fai atu a Ieova me ka maua ne tama‵liki a Apelaamo a te fenua tenā e pelā me se tofi, kae ka se maua tonu ne Apelaamo te fenua tenā. (Kenese 12:1, 2, 7) Ne a mea ne fai ne Apelaamo i ei? Ne fia tavini atu a ia ki a Ieova i so se koga kae i so se auala ne fakatonu mai ne te Atua ko te mea ke maua ne tena fanau a te lotou tofi. Ne tavini atu Apelaamo ki a Ieova i se fenua telā e se ko tena fenua tonu i tausaga e 100, ke oko eiloa ki tena mate. (Kenese 12:4; 25:8-10) E a, ka fai ne koe se mea penā? Muna a Ieova me i a Apelaamo ko tena “taugasoa.”—Isaia 41:8.
6. (a) Se a te mea telā ne fakaasi atu ne Apelaamo me ne loto malie a ia ke fai tena tama mo fai se taulaga? (e) Se a te tofi tāua telā ne mafai o avatu ne Apelaamo ki ana tama?
6 Ne faka‵tali a Apelaamo i te fia o tausaga ke maua ei tena tama, ko Isaako, telā ne alofa fakapelepele a ia ki ei. I te taimi ko tamataene ei te tamaliki tenā, ne fakatonu atu a Ieova ki a Apelaamo ke ave ne ia tena tama kae ofo atu a ia e pelā me se taulaga. Ne seki iloa ne Apelaamo me ka fakaasi mai eiloa ne te Atua a mea kolā ka fai ne ia i te tukumaiga o tena Tama e pelā me se togiola. Ne fakalogo eiloa tou tagata, kae toeitiiti ko ofo atu ne ia Isaako e pelā me se taulaga kae ne taofi aka a ia ne te agelu a Ieova. (Kenese 22:9-14) Ko oti ne fai atu a Ieova me ka fakataunu mai ana folafolaga ki a Apelaamo e alatu i a Isaako. Tela la, e manino mai i ei me ne fakatuanaki eiloa Apelaamo me ka toe fakaola mai ne te Atua a Isaako mai te mate, māfai e ‵tau o fai penā, faitalia me ne seki fai muamua se vaegā mea penā. (Kenese 17:15-18; Epelu 11:17-19) Me ne seki taofi aka ne Apelaamo a tena tama, ne fai atu a Ieova penei: “Mai i tau fanau ka fakamanuia ei ne atufenua katoa i te lalolagi a latou eiloa.” (Kenese 22:15-18, NW) Ne fakasino mai i ei me i te Fanau telā ne taku mai i te Kenese 3:15, ko te Mesia fakaola, ka oko mai eiloa i te gafa o Apelaamo. Ko tafaga la te gali o te tofi tenā ne mafai o tuku atu ne ia ki ana tama!
7. Ne fakaasi atu pefea ne Apelaamo, Isaako, mo Iakopo me ne fakatāua ne latou te lotou tofi?
7 Ne seki malamalama Apelaamo i te uiga tāua o mea kolā ne fai ne Ieova, kae ne seki maina foki i ei tena tama ko Isaako, penā foki loa mo tena mokopuna ko Iakopo, kolā “ne maua foki ne laua te folafolaga tena mai te Atua.” Kae ne fakatuanaki latou katoa ki a Ieova. Ne seki ‵kau atu latou ki so se fakai tu tokotasi i te fenua tenā me ne fakamoe‵moe latou ki se mea telā e sili atu i tena ‵lei—“se fenua e sili atu, . . . i te mea ko oti ne fakatoka ne ia a te fa‵kai mō latou.” (Epelu 11:8-10, 13-16) Kae e se ko tamaliki katoa a Apelaamo kolā ne fakatāua ne latou te tofi telā ne tuku mai e alatu i a Apelaamo.
Ne Manatu Māmā Nisi Tino ki te Tofi
8. Ne fakaasi atu pefea ne Esau me ne seki fakatāua ne ia tena tofi?
8 Ne seki fakatāua ne Esau, te toekimua a Isaako, a tena tofi e pelā me ko te uluaki. Ne seki fakatāua ne ia a mea ‵malu. Tela la, e tasi te aso ne fiakai ei Esau kae ne ‵togi atu ne ia tena tofi e pelā me ko te toekimua ki tena taina ko Iakopo. Mo a la? Ke maua ei ne ia se ‵kaiga o falaoa mo supu! (Kenese 25:29-34; Epelu 12:14-17) A te fenua telā ne fakataunu mai i ei a folafolaga a te Atua ki a Apelaamo ne tupu mai eiloa i a Iakopo, telā ne fuli ne te Atua tena igoa ki a Isalaelu. Ne a avanoaga ne ‵tala mai i ei ki a latou?
9. Ona ko te lotou tofi faka-te-agaga, se a te fakasaolotoga telā ne fai mō tamaliki a Iakopo, io me ko Isalaelu?
9 I te vaitaimi o te oge, ne olo atu ei a Iakopo mo tena kāiga ke ‵nofo latou i Aikupito. I kona loa ne gasolo o tokouke latou, kae ne fai foki latou mo fai ne pologa. Kae ne seki puli i a Ieova a tena feagaiga ki a Apelaamo. I te taimi tonu o te Atua, ne fakasaoloto ne ia a tama a Isalaelu mai i te lotou ‵nofo pologa kae ne fakailoa atu foki me ka ave ne ia latou ki “se fenua e maumea kae laukele ola,” ko te fenua telā ne folafola atu ne ia ke tuku atu ki a Apelaamo.—Esoto 3:7, 8; Kenese 15:18-21.
10. I te Mauga ko Sinai, ne a nisi mea fakaofoofogia ne ‵tupu e uiga ki mea ‵gali kolā ne maua ne tama‵liki a Isalaelu?
10 I te faiga o te malaga a te kau Isalaelu ki te Fenua o te Folafolaga, ne fakamaopoopo ne Ieova a latou i te Mauga ko Sinai. Ana muna ki a latou i konā: “Nei la, kafai e faka‵logo mai koutou ki a au kae tausi taku feagaiga, ka fai koutou mo oku tino tonu eiloa. A te lalolagi katoa e o oku, ka ko koutou ko oku tino filifilia, ko tino kola ko tuku katoatoa mai olotou olaga ki a au, kae ka tavini mai koutou ki a au e pela mo ne faitaulaga.” (Esoto 19:5, 6) Ko oti ne talia katoatoa mo te loto malie ne tino konā ke fai penā, kae ne avatu ne Ieova tena Tulafono ki a latou—ko te mea telā ne seki fai muamua ne ia ki so se isi fenua.—Salamo 147:19, 20.
11. Ne a nisi mea tāua e aofia i mea faka-te-agaga kolā ne tuku atu ki tama a Isalaelu?
11 Ko tafaga la te ‵gali o mea faka-te-agaga kolā ne maua ne te fenua fou tenā! Ne tapuaki atu latou ki te Atua tonu e tokotasi. Ne fakasaoloto ne ia latou mai Aikupito kae ne kilo tonu atu olotou mata ki mea fakaofoofogia i te tukumaiga o te Tulafono i te Mauga o Sinai. Ne momea aka te ‵gali o mea kolā ne maua ne latou me ne tuku atu “te muna a te Atua” ki a latou e alatu i te kau pelofeta. (Loma 3:1, 2) Ne fakaigoa ne Ieova a latou ko ana molimau. (Isaia 43:10-12) Ne ‵tau o sae mai te Fanau ko te Mesia i te lotou fenua. Ne fakaasi atu a ia ne te Tulafono ki a latou, ke iloa ne latou a ia, kae ne ‵tau o fesoasoani atu foki ki a latou ke iloa aka te pogai e ‵tau ei o maua ne latou tena fesoasoani. (Kalatia 3:19, 24) Kae ne avatu foki ki a latou te avanoaga ke tavini fakatasi mo te Fanau Faka-Mesia e pelā me se malo o faitaulaga mo se fenua tapu.—Loma 9:4, 5.
12. E tiga eiloa ne ulu atu latou ki te Fenua o te Folafolaga, se a te mea telā ne seki maua ne te kau Isalaelu? Kae kaia?
12 Ne fakataunu eiloa ne Ieova tena folafolaga, me ne takitaki atu ne ia te kau Isalaelu ki te Fenua o te Folafolaga. Kae pelā mo te fakamatalaga telā ne fai fakamuli ne te apositolo ko Paulo, ona ko te se fakatuanaki o latou, ne seki fai tonu te fenua tenā mo fai se “koga malolo.” Ne seki “malolo mo te Atua” a te tokoukega o latou me ne seki malamalama kae ola foki e ‵tusa mo te fuafuaga o te aso telā ne malolo ei te Atua. Ko te aso telā ne kamata mai tua ifo o te faitega o Atamu mo Eva.—Epelu 4:3-10.
13. Se a te mea telā ne galo i te fenua ko Isalaelu, ona ko te lotou fakata‵mala ke fakatāua te tofi faka-te-agaga telā ne tuku atu ki a latou?
13 Ne ‵tau o maua mai i tino Isalaelu faka-te-foitino a te aofaki kātoa o tino kolā ka ‵kau fakatasi mo te Mesia i tena Malo faka-te-lagi e pelā me se malo o faitaulaga penā foki loa mo se fenua tapu. Kae ne seki fakatāua ne latou a te tofi gali telā ne tuku atu ki a latou. Ne talia fua ne se tamā vaega o Isalaelu faka-te-foitino a te Mesia i tena okomaiga. Ona ko te mea tenā, e mu‵tana fua te aofaki o latou konā ne aofia i te malo o faitaulaga telā ne folafola mai. Ne ave keatea te Malo mai i Isalaelu faka-te-foitino “kae tuku atu ki se fenua tela e fakaasi mai i ei ne fua ‵lei.” (Mataio 21:43) Se a te fenua tenā?
Te Tofi i te Lagi
14, 15. (a) Ko oti ne mate Iesu, kae ne kamata pefea ne fenua o fakamanuia ne latou a latou eiloa e alatu i “te fanau” a Apelaamo? (e) Se a te tofi telā e maua ne tino i “te Isalaelu a te Atua”?
14 A te fenua telā ne tuku atu ki ei te Malo ko “te Isalaelu a te Atua,” ko te Isalaelu faka-te-agaga, telā e aofia i ei a soko e toko 144,000 o Iesu Keliso kolā e fakaekegina ki te agaga. (Kalatia 6:16; Fakaasiga 5:9, 10; 14:1-3) A nisi tino i te toko 144,000 ko tino Iutaia faka-te-foitino, kae ko te tokoukega o tino i ei ko tino mai i Fenua Fakaa‵tea. I te auala eiloa tenā ne kamata ei o fakataunu te folafolaga a Ieova ki a Apelaamo me ka manuia a fenua katoa e alatu i tena “fanau.” (Galuega 3:25, 26; Kalatia 3:8, 9) I te fakataunuga muamua, ne ‵tofi aka a tino o fenua valevale ne te agaga tapu kae ne puke ne Ieova te Atua a latou e pelā me ne ana tama faka-te-agaga, ko taina o Iesu Keliso. Ne fai foki latou mo fai te lua o vaega o “te fanau” tenā.—Kalatia 3:28, 29.
15 A koi tuai o mate a Iesu, ne fakaasi atu ne ia ki nisi tino Iutaia kolā kāti ka fai mo fai ne vaega o te fenua fou tenā a te feagaiga fou, telā ne fakamaoni aka i tena toto. Ona ko te lotou fakatuanaki ki te taulaga aogā tenā, “ko fakakatoatoa ne ia ki te se gata mai” a tino kolā ko talia ki loto i te feagaiga tenā. (Epelu 10:14-18) Ko oti ‘ne faka‵lei latou mo te Atua’ kae ko magalo olotou agasala. (1 Kolinito 6:11) Tela la, i te feitu tenā ko tai ‵pau latou mo Atamu a koi tuai o agasala a ia. Kae ka se ‵nofo atu a tino konā i te lalolagi palataiso. Ne fai atu a Iesu me ka fakatoka ne ia se koga mō latou i te lagi. (Ioane 14:2, 3) Ka tiakina ne latou olotou fakamoemoega ke ola i te lalolagi nei ko te mea ke maua te tofi “i te lagi” mō latou. (1 Petelu 1:4) Ne a olotou mea ka fai i konā? Muna a Iesu: “E pela eiloa mo te tukumaiga ne toku Tamana te pule ki a au, e pela foki taku feagaiga ki a koutou.”—Luka 22:29.
16. Se a te tofi gali telā e fakatali mai mo Kelisiano fakaekegina?
16 E atea mo nisi mea, ka ave keatea ne latou kolā ka pule fakatasi mo Keliso i te lagi a vaega katoa o te ‵tekeatuga ki te pulega a Ieova kolā ne fai i te lalolagi nei. (Fakaasiga 2:26, 27) E pelā me ko te lua o vaega o te fanau faka-te-agaga a Apelaamo, ka aofia latou i te aumaiga o te ola ‵lei katoatoa ki tino o fenua katoa. (Loma 8:17-21) Mā‵faga o tofi tāua ko maua ne latou!—Efeso 1:16-18.
17. Ne a vaega o te lotou tofi e maua ne Kelisiano fakaekegina a koi ‵nofo mai latou i te lalolagi nei?
17 E se tuku atu fua ki soko fakaekegina o Iesu a mea ‵gali i aso mai mua nei. I se auala e seai ei sena nafa, ne fesoasoani atu Iesu ki a latou ke iloa ne latou a Ieova, te Atua tonu e tokotasi. (Mataio 11:27; Ioane 17:3, 26) I ana pati mo ana faifaiga, ne akoako atu ei ne ia ki a latou te uiga o te ‘fakatuanaki ki a Ieova’ mo mea kolā e aofia i te fakalogo ki a Ieova. (Epelu 2:13; 5:7-9) Ne avatu ne Iesu ki a latou te iloaga o te munatonu e uiga ki fuafuaga a te Atua kae ne fakatalitonu atu foki a ia me ka takitaki atu ne te agaga tapu a latou ki se mainaga e uiga ki ei telā e sili atu tena katoatoa. (Ioane 14:24-26) Ne faka‵mafa ne ia i olotou mafaufauga mo olotou loto a te tāua o te Malo o te Atua. (Mataio 6:10, 33) Ne avatu foki ne Iesu ki a latou te tofiga ke talai atu kae ke fai a tino mo fai ne soko i Ielusalema, Iutaia, Samalia, penā foki loa mo toe koga ‵mao i te lalolagi nei.—Mataio 24:14; 28:19, 20; Galuega 1:8.
Te Tofi Tāua mō te Vaitino Tokouke
18. Ko fakataunu mai pefea i aso nei te folafolaga a Ieova me ka fakamanuia ne fenua katoa a latou eiloa e alatu i “te fanau” a Apelaamo?
18 Kāti e se taumate, ko oti ne filifili aka te aofaki kātoa o tino Isalaelu faka-te-agaga, ko “te lafu foliki” o sui o te Malo. (Luka 12:32) I te fia tausaga fakamuli nei, ne fakasino atu a Ieova ki te fakamaopoopomaiga o te vaitino tokouke o nisi tino mai i fenua katoa. Tela la, ko fakataunu mai i se auala lasi ‵ki te folafolaga a Ieova ki a Apelaamo me ka fakamanuia ne fenua katoa a latou eiloa ona ko tena “fanau.” E fia‵fia eiloa a tino manuia konā ke avatu te taviniga tapu ki a Ieova kae e taku tonu atu ne latou me e fakalagolago atu te lotou fakaolataga ki te fakatuanaki ki te Tamā Mamoe a te Atua, ko Iesu Keliso. (Fakaasiga 7:9, 10) E mata, ko oti ne talia ne koe te ‵kamiga gali tenā a Ieova ke kau atu ki te potukau fiafia tenā?
19. Se a te ‵tofi telā e fakamoemoe atu ki ei a tino o fenua valevale kolā ko manuia nei?
19 Se a te tofi tāua tela e tuku atu ne Ieova ki tino kolā e se aofia i te lafu mamoe foliki? E se ko te tofi i te lagi. Kae ko te tofi telā ne ‵tau o avatu ne Atamu ki ana tama‵liki—ko te fakamoemoega ke ola ki te se-gata-mai i se tulaga ‵lei katoatoa i te palataiso telā ka gasolo o oko atu ki te lalolagi kātoa. Ko te lalolagi telā ‘ka se toe ai se mate, se fanoanoa, se tagi io me se ‵mae.’ (Fakaasiga 21:4) E fai mai penei te Muna eiloa a te Atua ki a koe: “Fakatuanaki ki [a Ieova] kae fai mea lei; ke ola lei koutou i te fenua mo te filemu. ‵Sala tou manuia ki te Aliki, kae ka avatu ne ia ki a koe te mea e manako koe ki ei. E se toe leva nei, ka galo atu ei a tino amio ma‵sei . . . ka ko latou kola e loto malalo, ka fai mo latou te fenua, kae ka maua ne latou te manuia mo te filemu katoatoa. A tino amio‵tonu ka fai mo latou te fenua, kae ka ‵nofo faeloa i ei ki te se gata mai.”—Salamo 37:3, 4, 10, 11, 29.
20. E maua pefea ne nisi “mamoe” a te lasiga o mea ‵gali i te feitu faka-te-agaga kolā e maua ne Kelisiano fakaekegina?
20 E isi se tofi o nisi “mamoe” a Iesu i te lalolagi mai lalo i te Malo faka-te-lagi. (Ioane 10:16a) E tiga eiloa ka se ‵nofo atu latou i te lagi, ka maua ne latou a te lasiga o mea ‵gali i te feitu faka-te-agaga kolā ka maua ne te kau fakaekegina. E alatu i te potukau kātoa o te kau fakaekegina, ko “te tavini fakamaoni kae poto,” ne ‵tala atu ki nisi mamoe te mainaga e uiga ki folafolaga tāua kolā e maua i te Muna a te Atua. (Mataio 24:45-47; 25:34) E iloa ne te kau fakaekegina mo nisi mamoe a te Atua tonu e tokotasi, ko Ieova, kae e tapuaki fakatasi atu ki a ia. (Ioane 17:20, 21) E fakafetai fakatasi atu latou ki te Atua ona ko te malosi o te taulaga a Iesu ke fakamagalo ei a agasala. E tavini atu fakatasi latou e pelā me se lafu mamoe e tasi mai lalo i te Tausi Mamoe, ko Iesu Keliso. (Ioane 10:16e) E aofia latou katoa i te kautaina fealofani e tasi i te lalolagi kātoa. E taulia fakatasi latou ke fai mo fai ne Molimau a Ieova mo tena Malo. E tonu, kafai ko oti ne tukugina atu kae papatiso koe pelā me se tavini a Ieova, ko aofia a mea katoa konā i mea ‵gali kolā ko maua ne koe i te feitu faka-te-agaga.
21, 22. E mafai pefea ne tatou katoa o fakaasi atu me e fakatāua ne tatou a mea faka-te-agaga kolā ko maua ne tatou?
21 E pefea te tāua o mea faka-te-agaga konā ki a koe? Ona ko te fakatāua malosi ne koe o mea konā, e mata, e fakamuamua ne koe te faiga o te loto o te Atua e pelā me ko te ‵toe mea tāua i tou olaga? E pelā me se fakamaoniga o te mea tenā, e mata, e fakalogo koe ki pati fakatonutonu mai i tena Muna mo tena fakapotopotoga ke kau atu faeloa ki fakatasiga katoa a te fakapotopotoga Kelisiano? (Epelu 10:24, 25) Ona ko te fakatāua ne koe o mea konā, e mata, e tumau loa koe i te tavini atu ki te Atua kae faitalia a mea faiga‵ta? E mata, e lava te fakatāua ne koe o mea konā ke fakamalosi atu ei ki a koe ke ‵teke atu ki so se fakaosoosoga ke fai se mea telā ka ‵galo atu i ei a mea konā?
22 Ke na fakatāua ne tatou katoa a mea faka-te-agaga kolā ko oti ne tuku mai ne te Atua ki a tatou. A koi ‵pula malosi atu ‵tou mata ki te Palataiso telā ka oko mai, ke na ‵kau katoatoa atu tatou ki galuega taulia i te feitu faka-te-agaga kolā e tuku mai ne Ieova ki a tatou. Kafai e fakavae tonu ne tatou ‵tou olaga ki te ‵tou fesokotakiga ki a Ieova, ka fakamaoni ‵tonu atu i ei ne tatou me e pefea te tāua ki a tatou a mea ‵gali kolā e tuku mai ne Ieova. Ke na aofia tatou i tino kolā e fai atu penei: “Toku Atua mo toku tupu, ka folafola atu ne au tou ‵malu; ka tuku atu taku fakafetai ki a koe e se gata mai, e se gata mai eiloa.”—Salamo 145:1.
Ka Fakamatala Mai Pefea ne Koe?
• Moi ne fakamaoni Atamu ki te Atua, se a te mea telā ne ‵tau o tuku mai ne ia ki a tatou?
• Ne a faifaiga a tama a Apelaamo ki te tofi telā ne fakaavanoa atu ki a latou?
• Ne a mea e aofia i te tofi o soko fakaekegina a Keliso?
• Se a te tofi o te vaitino tokouke, kae e mafai pefea ne latou o fakaasi atu me e fakatāua tonu ne latou te mea tenā?
[Ata i te itulau e 30]
Ne maua ne tama a Apelaamo a te folafolaga e uiga ki se tofi tāua