Fai ke ‵Goto ki Loto o Tama‵liki a te Fiafia o Faitau Kae Sukesuke

A TE faiga o taumafaiga e uke ke akoako au tama‵liki ke fai‵tau kae sukesuke se auala tāua e tasi e mafai o fai ne koe ke ‵lei olotou olaga i aso mai mua. Kae e maua ne tatou te fiafia mai mea konei! Kae e fakaataata ne nisi tama‵liki a te taimi e fai‵tau atu ei olotou mātua ki a latou i te fo‵likiga. E mafai o fai a te faitau e pelā me se mea fakafiafia, kae iku atu ki mea ‵lei. A te mea nei se mea tonu eiloa mō tavini a te Atua, me e ati aka ei se fesokotakiga ‵pili mo Ieova māfai ko suke‵suke ki te Tusi Tapu. Ne fai mai se mātua Kelisiano penei, “A mea kolā e fakatāua malosi ne tatou e isi se lotou sokoga ki te faitau mo te sukesuke.”

A te faiga o sukesukega aoga e mafai o fesoasoani atu ki au tama‵liki ke ati aka ne latou se fesokotakiga ‵pili mo te Atua. (Salamo 1:1-3, 6) E tiga eiloa e se manakogina i te ‵tou faka‵saoga a te iloa o faitau, e fakaasi mai i te Tusi Tapu me i te faitau e mafai o aumai ne ia a fakamanuiaga faka-te-agaga e uke. E pelā mo pati e fai mai i te Fakaasiga 1:3: “Amutia a te tino telā e faitau ki te tusi nei, amutia foki a latou kolā e faka‵logo ki te talaiga fakapelofeta.” E se gata i ei, a te tāua o te saga tonu atu, telā se vaega tāua o te sukesuke, ne fakaasi manino mai i te polopolokiga a te apositolo ko Paulo ki a Timoteo: “Ke fai ne koe a mea konei kae tuku katoatoa atu tou ola mō latou, ko te mea ke matea ne tino katoa tou gasolosolo ki mua.”​—1 Timoteo 4:15.

E tonu, a te iloa o faitau kae sukesuke e fakamaoni mai ei me i atamai konei ka aoga ki se tino. E tokouke a tino kolā e maua ne latou a atamai konei ko sē ‵saga o fakaaoga ne latou; kae ko fai ne latou a mea kolā e se aoga. Tela la e mafai pefea o fakamalosi aka ne mātua se manakoga ke maua ne tama‵liki a te poto telā e tāua ‵ki?

Tou Alofa mo Tau Fakaakoakoga

E mafai o fia‵fia a tama‵liki i te taimi e fai ei te akoga māfai e fai i te alofa. Ne fai mai se tauavaga Kelisiano, ko Owen mo Claudia e uiga ki la tama‵liki e tokolua, penei: “E olioli eiloa lāua ki te taimi e fai ei te akoga me e fai pelā me se vaitaimi fakapito​—e maua ei ne lāua se puipuiga mo te fiafia. Ne ‵kilo atu lāua ki te mea tenei e pelā me se faifaiga alofa.” Kafai foki ko gasolo aka o talavou a tama‵liki, ka fakatumau eiloa te akoga a te kāiga e pelā me se faifaiga alofa. Ko paenia nei a tama‵liki a Owen mo Claudia kae ko maua foki ne lāua a mea aoga mai te fia‵fia o fai‵tau kae sukesuke ki mea kolā ne faka‵goto ne mātua ki la loto.

A te fesoasoani aoga e tasi ko te fakaakoakoga e uiga ki te alofa. Ka ‵kilo atu a tama‵liki kolā e lavea faeloa ne latou a olotou mātua e fai‵tau kae sukesuke ki mea konei e pelā me se vaega masani o olotou olaga. Kae e pelā me se mātua, e mafai pefea o tuku atu ne koe se fakaakoakoga ‵lei māfai e faigata ki a koe a te faitau? E mafai o fakauiga ki te faiga o fakamafulifuliga ki mea e ‵tau o fakamuamua io me ko tau kilokiloga e uiga ki te faitau. (Loma 2:21) Kafai a te faitau se vaega tāua i tou olaga i aso katoa, ka ‵goto eiloa a mea konā ki loto o au tama‵liki. A tou atamai i te faitauga o te Tusi Tapu, fakatokaga mō fakatasiga, mo te akoga faka-te-kāiga​—ka tuku atu ei se fekau manino e uiga ki te tāua o fakatokaga konā.

Tela la, e tāua eiloa a tou alofa mo tau fakaakoakoga i te faiga ke ‵goto ki loto o tama‵liki se manakoga fia faitau. Kae ne a auala tāua e mafai o tuku atu ne koe ke fakamalosi ei latou?

Se Fiafia Telā e Kamata ki te Faitauga

Ne a nisi auala tāua ke fakaoko atu ei ki loto o tama‵liki a te fiafia o faitau? Ke ‵sala atu ki tusi kōla e mafai o faitau atu ki au tama‵liki i te taimi koi fo‵liki ei latou. E fakamalosi mai penei se toeaina Kelisiano telā ne fakamalosi aka ne ana mātua i loto i a ia a te fiafia o faitau: “Fakamasani otou tama‵liki ke iloa ne latou o fakaaoga a tusi. I te faiga tenā, ka fai a tusi e pelā me ne taugasoa kae e pelā me se vaega o olotou olaga.” E fia‵fia eiloa a tama‵liki o tauave kae fai‵tau sāle ne latou a tusi faka-te-Tusi Tapu e pelā mo Taku Tusi o Tala Mai i te Tusi Tapu. Kafai e fai‵tau fakatasi koe mo au tama‵liki ki vaegā tusi penā, e se fakaasi atu fua ne koe a te auala ke iloa o fai‵tau, kae ko fakaasi atu foki ne koe a ‘mea faka-te-agaga’ mo ‘pati faka-te-agaga.’​—1 Kolinito 2:13.

Ke faitau faeloa i se leo maluga. Ke fai ne koe se fakatokaga ke fai‵tau mo au tama‵liki i aso takitasi. A te fai penā e akoako ei latou ke faka‵leo faka‵lei ne latou a tugapati kae fakamalosi aka ei te fiafia o faitau. E tāua foki a te auala e faitau ei koe. Ke loto finafinau, kae ka fai foki latou penā. E tonu, e mafai o lavea ne koe me ka fai atu au tama‵liki ke faitau fakafia ne koe se tala. Fai te mea e ma‵nako latou ki ei! Fakamuli loa, ka ma‵nako latou o onoono ki mataupu ‵fou. Masaua ke mo a ma faimālō au tama‵liki ke fai‵tau fakatasi mo koe. Ne tuku mai ne Iesu te fakaakoakoga mai te akoako ne ia a tino fakalogo‵logo “ki te mea e mafai o malamalama latou ki ei.” (Maleko 4:33) Kafai e se faimālō ne koe au tama‵liki, ka olioli eiloa latou mo te loto finafinau ki taimi fai‵tau, kae ka fakataunu eiloa ne koe te fakamoemoega ke fakatumau te fiafia o faitau.

Fakamalosi atu ke fai tusaga, kae sau‵tala ki mea kolā e faitau ne koe. E fiafia koe ke lavea atu me ka iloa ne au tama‵liki o fakamatala, faka‵leo, kae malamalama i uiga o pati. A te sau‵tala fakatasi ki mea ne faitau ne koe ka fesoasoani atu ke gasolo malosi latou ki mua. Ka fesoasoani atu a sau‵talaga penā ki tama‵liki “ke tauloto ki pati e fai‵tau ne latou kae malamalama i ei,” ko fakamatalaga i se tusi e uiga ki te auala ke fesoasoani atu ki tama‵liki ke ‵lei olotou fai‵tau. “Mō tama‵liki kolā ko kamata o ma‵tua olotou mafaufau kae taumafai ke iloa ne latou o fai‵tau kae tusitusi,” e fakaopoopo mai te fakamatalaga tenei, “me ko te uke o taimi e fai‵pati ei latou ki mea tāua, ko te ‵lei o olotou mafaufau.”

Ke fai‵tau atu au tama‵liki ki a koe, kae fakamalosi atu ke fai olotou fesili. E mafai ne koe o ‵sili atu a fesili kolā e faigofie ke tali mai ne latou. I te faiga tenā, ka iloa ne latou me i tusi ko te auala e maua i ei a fakamatalaga kae e isi foki ne uiga o pati kolā e fai‵tau ne latou. E fesoasoani mai te auala tenei maise loa māfai e faitau ne koe a mea kolā e fakavae mai te Muna a te Atua, telā ko te ‵toe tusi tāua mai tusi katoa.​—Epelu 4:12.

Kae ke mo a ma puli me i te faitau se mea faigata. E manakogina i ei a taimi e uke ke fakamasani atu ki ei.a Tela la ke fakamalosi atu ki tama‵liki ke fakatumau te fiafia o fai‵tau kae fai atu a pati fakamālō ki a latou. A te fakamālō atu ki au tama‵liki ka fakamalosi atu ei ke fia‵fia latou o fai‵tau.

E Aoga Kae Fakafiafia

A te akoako atu o au tama‵liki ke iloa o sukesuke e fakaasi mai ei me e aoga te faitau. A te sukesuke e aofia i ei a te tauloto ki mea aoga mo te malamalama i te auala e fetaui ‵lei ei a mea konei. E manakogina i ei te atamai ke fakatoka faka‵lei, ke masaua, kae ke fakaaoga faka‵lei a fakamatalaga. Kafai ko iloa ne te tamaliki o sukesuke kae malamalama i te tāua o te mea tenā, e fai ei ke aoga kae fakafiafia atu ki a ia.​—Failauga 10:10.

Fakaasi atu a te tāua o te sukesuke. A te Tapuakiga a Kāiga i afiafi, sau‵talaga ki te tusi siki mō te aso, mo fakatokaga tai ‵pau penā e tuku mai i ei a avanoaga ke fakamasani atu a ‵tou tamaliki ke iloa ne latou o sukesuke. A te faiga o sukesukega se mea tāua ke ‵saga tonu ki ei, saga‵saga malie kae mafaufau ki se mataupu mō se taimi toetoe. E se gata i ei, e mafai ne koe o fakamalosi atu ki tau tamaliki tagata ke fakaasi atu a te auala e fetaui ei a mea ne fatoa tauloto ne ia mo mea kolā ko oti ne iloa ne ia. E fai ei ke iloa ne ia o fakatusatusa a mea. Kae e a māfai e fai atu koe ki tau tamaliki fafine ke fakatoetoe mai ne ia i ana pati eiloa a mea ne faitau ne ia? Ka fesoasoani atu te mea tenei ke malamalama kae masaua ne ia. A te ‵toe onoono, telā ko te fakafokifokiga o manatu tāua māfai ko oti ne faitau se mataupu, se fesoasoani e tasi e mafai o fakaasi atu ne koe ki a latou. E mafai o akoako atu foki a tama‵liki fo‵liki ke fakamau a manatu toe‵toe i taimi o akoga io me ko fakatasiga a te fakapotopotoga. Ko tafaga la te aoga o mea konei ke fai ei ke ‵saga tonu atu latou ki ei! A auala faigofie konei e fai ei ke fia‵fia kae aoga a te faiga o sukesukega ki a koe mo au tama‵liki.

Fakanofonofoga kolā e fai mō te ‵lei o te akoga. E faigofie ke ‵saga tonu atu māfai e e isi se matagi mo moli i te koga tenā, e se logoa kae gali. E tonu, e tāua ‵ki a te kilokiloga a mātua ki te faiga o sukesukega. E fai mai se mātua, penei: “E tāua eiloa ke tumau i te fakaavanoa faeloa ne koe a taimi ke faitau kae sukesuke. E fesoasoani atu ei ke fakatoka faka‵lei au tama‵liki. Ka iloa ei ne latou a mea kolā e ‵tau o fakatoka i te taimi tonu.” E tokouke a mātua e taofi ne latou a nisi galuega i taimi o sukesukega. E ‵tusa mo pati a se pule e tokotasi, a te auala tenei se fakamalosiga tāua i te akoakoga o tama‵liki e uiga ki te faiga o sukesukega aoga.

Faka‵mafa atu te tāua o sukesukega. Ke fesoasoani atu ke iloa ne au tama‵liki a te auala e aoga ei ke fakagalue aka ne latou a mea ne tauloto ne latou. A te fakaaogaga o fakamatalaga e tauloto ne latou e faka‵mafa mai ei te tāua o sukesukega. E fai mai se taina talavou: “Kafai e seki lavea ne au te tāua o mea e tauloto ne au, e taumafai malosi au o sukesuke ki ei. Kae kafai e mafai o fakagalue ne au, e fai ei ke manako malosi au ke malamalama i ei.” Kafai ko lavea ne talavou me i te faiga o sukesukega e maua i ei a ikuga ‵lei, ka fakatumau eiloa ne latou. Ka kamata eiloa o fia‵fia latou o suke‵suke, e pelā mo te taimi ne fia‵fia ei latou o fai‵tau.

Te ‵Toe Taui ‵Lei

E uke atu a manatu aoga e uiga ki te fakamalosi aka ne tatou a te fia‵fia o tama‵liki o fai‵tau. A fakamanuiaga e maua mai i te akoga, i te galuega, i fesokotakiga mo tino, mea ‵tupu i te lalolagi, mo te atiakaga o te alofa i te va o te mātua mo te tamaliki ne nāi mea aoga fua kolā e maua ne tatou mai te fai‵tau mo te suke‵suke.

Mai mea katoa, a te fiafia o sukesuke e mafai o fesoasoani atu ki au tama‵liki ke fai pelā me ne tino kolā e ma‵taku ki te Atua. A te fiafia o sukesuke ko te kī e ‵tala ei olotou mafaufau mo loto ke iloa “te lauefa, te loa, te maluga mo te ‵poko” o te munatonu faka-te-Tusi Tapu. (Efeso 3:18) E tonu, e uke ‵ki a mea e ‵tau o akoako atu ne mātua Kelisiano ki olotou tama‵liki. Kafai e fakaaoga ne mātua olotou taimi kae ‵saga tonu atu ki olotou tama‵liki kae fai a mea katoa ke mafai o kamata se olaga ‵lei mō latou, e fakamoe‵moe eiloa latou me ka fai fakamuli olotou tama‵liki e pelā me ne tino tapuaki ki a Ieova. A te akoako atu o tama‵liki ke fai a sukesukega aoga e fesoasoani atu ke ati aka kae fakatumau ne latou se fesokotakiga ‵lei mo te Atua. Kae mai mea katoa, ke ‵talo atu ki a Ieova ke fakamanuia mai au taumafaiga ke faka‵goto ifo ki loto o au tama‵liki a te fiafia o faitau kae sukesuke.​—Faataoto 22:6.

[Fakamatalaga fakaopoopo]

[Ata i te itulau e 21]

Faitau  . . .

• Ke ‵sala atu ki tusi kolā e mafai o faitau ki tama‵liki

• Faitau faeloa i se leo maluga

• Fakamalosi atu ke fai tusaga

• Sau‵tala ki mea kolā ne faitau ne koe

• Ke fai‵tau atu au tama‵liki ki a koe

• Fakamalosi atu ke fai olotou fesili

Sukesuke . . .

• E ‵tau o tuku atu ne mātua se fakaakoakoga ‵lei

• Fakamasani au tama‵liki ke . . .

○ ‵saga tonu

○ fakatusatusa a mea

○ fakatoetoe

○ toe onoono

○ fakamau a manatu toe‵toe

• Fai a fakanofonofoga kolā e fai mō te ‵lei o te akoga

• Faka‵mafa atu te tāua o sukesukega