Te Malosi ke ‵Teke Atu ki Fakaosoosoga Kae Fa‵ki i te Loto Vāivāi

“Ka faka‵fonugina koutou i te ‵mana manafai e oko atu ki luga i a koutou a te agaga tapu.”—GALUEGA 1:8.

1, 2. Se a te fesoasoani ne tauto atu a Iesu ki ana soko me ka maua ne latou, kae kaia e ma‵nako ei latou ki ei?

NE ILOA ne Iesu me e se mafai ne ana soko, i te lotou malosi eiloa, o tau‵tali ki mea katoa ne fakatonu atu ne ia. Kafai e mafau‵fau tatou ki te lasi o te lotou galuega talai, te ma‵losi o ‵tekeatuga, mo te vāivāi o te foitino, e mautinoa eiloa me ne ma‵nako latou ki se malosi telā e sili atu i te malosi masani. Tela la, mai mua malie o fanaka a ia ki te lagi, ne fakatalitonu atu a Iesu ki ana soko: “Ka faka‵fonugina koutou i te ‵mana manafai e oko atu ki luga i a koutou a te agaga tapu. Ka fai foki koutou mo molimau ki a au i Ielusalema, i Iutaia kātoa mo Samalia, ke oko eiloa ki kapakapalagi o te lalolagi.”​​—Galuega 1:8.

² Ne kamata o fakataunu a te tautoga tenā i te Penetekoso i te 33 T.A. i te taimi ne fakamalosi aka ei a soko o Iesu Keliso ne te agaga tapu ke faka‵fonu a Ielusalema ki te lotou talaiga. E seai se ‵tekemaiga ne mafai o taofi aka ei olotou taumafaiga. (Galuega 4:​20) “Ke oko eiloa ki te gataga o te lalolagi” ka ma‵nako malosi foki a soko fakamaoni o Iesu, e aofia i ei tatou, ki te malosi tenei mai te Atua.​​—Mataio 28:20.

3. (a) Fakamatala mai a te ‵kese o te agaga tapu mo te ‵mana. (e) Ne a mea e mafai o fai ne tatou ona ko te ‵mana mai i a Ieova?

³ Ne tauto atu a Iesu ki ana soko me ‘ka faka‵fonu latou ki te ‵mana manafai e oko atu ki luga i a latou a te agaga tapu.’ E tai ‵kese eiloa a uiga o te avā pati konei, te “‵mana” mo te “agaga.” A te agaga o te Atua, telā ko tena malosi galue, e fakamatala mai e pelā me ko te malosi telā e tuku atu io me e fakaaoga ki luga i tino io me ne mea ke fakataunu ei te loto o te Atua. A ko te ‵mana, e mafai o fakamatala atu e pelā me ko te “atamai ke fai io me ke fakamafua aka ei se mea.” E mafai o se lavea atu i se tino io me i se mea ke oko ki te taimi ko maua ei se ikuga. Tela la, e mafai o fakatusa a te agaga tapu ki te iti telā e fakamalosi aka i ei se patule, kae ko te ‵mana e tai ‵pau mo te malosi telā ne fāulu atu ki loto i te patule. A te ‵mana telā e tuku atu ne Ieova ki ana tavini e auala i te agaga tapu e fai ei ke mafai ne tatou taki tokotasi o fakataunu a ‵tou tukuatuga faka-Kelisiano, kae ke ‵teke atu ki malosi ma‵sei i a tatou, māfai e mafai.​​—Faitau te Mika 3:8; Kolose 1:​29.

4. Ne a mea ka fai‵pati ki ei i te mataupu tenei, kae kaia?

⁴ Ne lavea atu pefea a te ‵mana telā ne tuku mai ki a tatou e auala i te agaga tapu? Ne a vaegā faifaiga mo kilokiloga e iku mai ona ko te fakamalosiga a te agaga tapu? I te taimi e kausaki ei tatou ke tavini atu ki te Atua mo te fakamaoni, e fe‵paki tatou mo fakalavelave kese‵kese kolā e pogai mai i a Satani, io me ko tena fakanofonofoga masei tenei, io me ko ‵tou tulaga sē ‵lei katoatoa. E tāua ‵ki eiloa ke manumalo tatou i vaegā fakalavelave penā ko te mea ke tumau tatou i te fai e pelā me ne Kelisiano, ke ‵kau faeloa ki te galuega talai, kae fakatumau se fesokotakiga ‵lei mo Ieova. Ke na mafau‵fau nei tatou ki auala e fesoasoani mai ei te agaga tapu ke taua atu tatou ki fakaosoosoga kae kufaki i te fi‵ta mo te loto vāivāi.

Te Malosi ke ‵Teke Atu ki Fakaosoosoga

5. E fakamalosi aka pefea tatou ne te ‵talo?

⁵ Ne akoako ne Iesu ana soko ke ‵talo, penei: “Kae sa takitakigina matou ki se tofotofoga, kae faka‵sao mai matou mai te tino masei.” (Mataio 6:​13, Tusi Paia, Samoa) Ka se tiaki ne Ieova ana tavini fakamaoni kolā e fai atu ne latou a te fakamolemole tenei. I se taimi e tasi, ne fai atu a Iesu me ‘ka tuku atu ne te Tamana i te lagi a te agaga tapu ki tino kolā e fakamolemole atu ki a ia.’ (Luka 11:13) Ko oko eiloa i te fakamalosi mai a te tautoga a Ieova ke tuku mai ne ia ki a tatou a te malosi tenei ke fai ne tatou a te amiotonu! E tonu, e se fakauiga i ei me ka puipui ne Ieova tatou mai fakaosoosoga. (1 Kolinito 10:13) Kae kafai ko fe‵paki tatou mo tofotofoga, tenā eiloa te taimi ke ‵talo atu tatou mo te loto malosi.​​—Mataio 26:42.

6. Se a te mea ne fakavae ki ei a tali a Iesu ki fakaosoosoga a Satani?

⁶ I tena tali ki fakaosoosoga a te Tiapolo, ne siki atu ne Iesu a tusi siki. Ne malamalama ‵lei eiloa a Iesu i te Muna a te Atua i te taimi ne tali atu ei a ia: “Muna a te Tusi . . . Kae ne muna mai foki a te Tusi . . . Fano keatea e Satani! Muna a te Tusi, ‘Tapuaki ki te Aliki tou Atua, me ko ia fua e tavini koe ki ei.’ ” Ne fakamalosi aka a Iesu ne tena alofa ki a Ieova mo tena Muna ke ‵teke atu ki takolekolega kolā ne fai atu ne te tino telā ne fakaosooso ne ia a ia. (Mataio 4:​1-​10) Mai tua o te ‵tekeatuga faeloa ne Iesu a fakaosoosoga, ne tiakina ne Satani a ia.

7. E fesoasoani mai pefea te Tusi Tapu ke ‵teke atu tatou ki fakaosoosoga?

⁷ Ona ko te mea ne fakalagolago a Iesu ki te Tusi Tapu ke ‵teke atu ki fakaosoosoga a te Tiapolo, e ‵tau foki o sili atu te ‵tou fai penā! E tonu, ko te mea ke mafai ne tatou o ‵teke atu a te Tiapolo mo ana sui e ‵tau o fai ke iloa ‵lei ne tatou a tulaga o te Atua kae ke tau‵tali katoatoa i ei. E tokouke a tino ko oti ne kamata o ola e ‵tusa mo tulaga i te Tusi Tapu i te taimi e suke‵suke ei latou ki te Tusi Tapu kae ko malamalama foki i te poto o te Atua mo tena amiotonu. E tonu, e tuku mai ne te “muna a te Atua” a te ‵mana ke mafai o malamalama tatou i “manako mo mafaufauga o loto o tino.” (Epelu 4:​12) Ko te lasi o te faitau o te tino ki te Tusi Tapu kae mafaufau ‵loto e uiga ki ei, ko te lasi foki o tena malamalama i te ‘muna tonu a Ieova.’ (Tanielu 9:​13) Ona ko te ‵tonu o te mea tenā, e ‵tau o mafaufau ‵loto tatou ki tusi siki kolā e fetaui ‵lei ki ‵tou vāivāiga.

8. Ne a auala e mafai ei o maua ne tatou a te agaga tapu?

⁸ I tafa o tena malamalama i te Tusi Tapu, ne mafai o ‵teke atu ne Iesu a fakaosoosoga me ne ‘‵fonu a ia i te agaga tapu.’ (Luka 4:1) Ko te mea ke maua ne tatou te malosi mo te atamai tenā, e ‵tau o fakapili‵pili atu tatou ki a Ieova mai te fakaaoga faka‵lei o fakatokaga kolā ne fai ne ia ke faka‵fonu ei tatou ki tena agaga. (Iakopo 4:​7, 8) E aofia i mea konei ko akoga faka-te-Tusi Tapu, ‵talo, mo te ‵kau fakatasi mo taina tali‵tonu. E loto fia‵fia a tino e tokouke ki mea aoga e maua ne latou mai te tumau i se fakasologa tumau o mea faka-te-agaga, telā e fesoasoani atu ke ‵saga tonu faeloa olotou mafaufau ki mea faka-te-agaga.

9, 10. (a) Ne a tofotofoga e masani o lavea atu i te koga e ‵nofo koutou i ei? (e) E fesoasoani atu pefea a te mafaufau ‵loto mo te ‵talo ke ‵teke atu koe ki fakaosoosoga faitalia me ko fi‵ta koe?

⁹ Ne a fakaosoosoga e ‵tau o ‵teke atu ne koe? E mata, kai fakaosoosogina aka eiloa koe ke fiafai ki se tino telā e se ko tau avaga? Kafai koe seki avaga, e mata, kai maua aka eiloa ne koe se lagonaga ke fai famau koe mo se tino sē talitonu? Kafai e onoono i te televise io me e fakaaoga te Itaneti, e mafai o tofotofogina fakavave a Kelisiano ke ‵kilo atu ki se mea sē ‵ma. Kai tupu aka loa se mea penā ki a koe, kae kafai ne fai penā, ne saga atu pefea koe ki ei? Se mea poto ke mafaufau ‵loto ki te auala e mafai o takitaki atu ei koe ne se faifaiga valea ki se isi faifaiga valea kae fakamuli loa ki te faiga o se agasala matagā. (Iakopo 1:​14, 15) Mafaufau la ki te ‵mae telā e maua ne Ieova, te fakapotopotoga, mo tou kāiga ona ko te faifaiga sē fakamaoni tenā. I te suā feitu, a te tumau i te fakamaoni ki akoakoga fakavae a te Atua e maua mai i ei se loto lagona ‵ma. (Faitau te Salamo 119:37; Faataoto 22:3.) Kafai e fepaki koe mo vaegā tofotofoga penā, ke na fakaiku aka ke ‵talo atu mō te malosi ke ‵teke atu a mea konā.

¹⁰ E isi aka foki se mea e ‵tau o masaua ne tatou e uiga ki fakaosoosoga a te Tiapolo. Ne fanatu a Satani ki a Iesu mai tua o tena otiga ne fakalikiliki i aso e 40 i te koga lavaki. E mautinoa eiloa me ne manatu aka te Tiapolo me tenei eiloa te “taimi ‵lei” ke tofotofo ne ia te fakamaoni o Iesu. (Luka 4:​13, NW) E salasala foki a Satani ki se taimi ‵lei ke tofotofo ne ia te ‵tou fakamaoni. Tela la, se mea tāua foki mō tatou ke tumau i te ma‵losi i te feitu faka-te-agaga. E masani o saga atu a Satani ki se tino māfai ko iloa ne ia me ko vāivāi ‵ki a te tino tenā. Tela la kafai e lagona ne tatou a te fi‵ta mo te loto vāivāi, e ‵tau o fakamolemole atu tatou ki te fesoasoani o Ieova e pelā foki mo tena agaga tapu.​​—2 Kolinito 12:​8-​10.

Te Malosi ke Fa‵ki i te Fi‵ta mo te Loto Vāivāi

11, 12. (a) Kaia e loto vāi‵vai ei a tino e tokouke i aso nei? (e) Ne a mea e mafai o fakamalosi mai ki a tatou ke ‵teke atu ki te loto vāivāi?

¹¹ E pelā me ne tino sē ‵lei katoatoa, e loto vāi‵vai sāle tatou i nisi taimi. E mafai eiloa o tonu a te mea tenā i aso nei me ko oko eiloa i te fakafi‵ta aka o te vaitaimi tenei e ola ei tatou. Ko ‵nofo atu eiloa tatou i toe taimi faiga‵ta telā ne seki fakafesagai atu eiloa muamua ki ei a tino katoa. (2 Timoteo 3:​1-5) Ona ko te pili mai o Amaketo, ko gasolo aka ki luga a fakalavelave i mea tau tupe, mea tau lagonaga, mo nisi fakamalosiga e uke. Kae e se ‵tau o ‵poi tatou me ko gasolo eiloa o faigata ki nisi tino ke fakataunu olotou tiute ke tausi atu ki olotou kāiga i te feitu faka-te-foitino. E fi‵ta latou, e ‵mafa olotou mafaufau, e vāi‵vai ke oko loa ki te ‵fiu. Kafai e tenā eiloa te mea e tupu ki a koe, e mafai pefea o kufaki koe i fakalavelave konā?

¹² Ke masaua me ne fakatalitonu atu a Iesu ki ana soko me ka tuku atu ne ia ki a latou se fesoasoani​​—ko te agaga tapu o te Atua. (Faitau te Ioane 14:​16, 17.) Tenei eiloa te ‵toe ‵mana malosi i te lagi mo te lalolagi. Mai te malosi tenei, e mafai ne Ieova telā “e mafai ne ia o fai a mea katoa” o tuku mai ki a tatou a te malosi telā e manakogina ke fakafesagai atu tatou ki so se mea faigata. (Efeso 3:​20) Ne fai mai te apositolo ko Paulo me kafai e fakalagolago ki ei, ka maua ne tatou a te “malosi telā e sili atu i te malosi masani,” faitalia me “ko logofio‵fio eiloa tatou i puapuaga kese‵kese.” (2 Kolinito 4:​7, 8, NW) E se tauto mai a Ieova me ka ave keatea ne ia te manavase, kae e fakatalitonu mai a ia ki a tatou me e auala i tena agaga, ka tuku mai eiloa ne ia te malosi ke fakafesagai atu ki ei.​​—Filipi 4:​13.

13. (a) Ne fakamalosi atu pefea ki se tamaliki ke fa‵ki i te tulaga faigata ne oko a ia ki ei? (e) E mata, e isi ne fakaakoakoga tai ‵pau e iloa ne koe?

¹³ Mafaufau la ki te fakaakoakoga o Stephanie, se paenia tumau telā ko 19 ana tausaga. I te taimi ko 12 ei ana tausaga, ne ‵mate tena foitino kae ne maua atu ei me kenisa tena mafaufau. I te taimi tenā, ne ‵tipi a ia fakalua taimi, maua ne ia nisi togafiti, kae ne toe ‵mate a ia i te fakalua, telā ne iku atu i ei ki te sē mafai ne ia o gasue ki te feitu fakamaui kae ko pelā foki me ko ‵kivi. Ne fakaaoga ne Stephanie tena malosi mō mea kolā e tāua ki a ia, e pelā mo fakatasiga faka-Kelisiano mo te galuega talai. Kae ne lagona ne ia te agaga o Ieova e fesoasoani atu ki a ia ke fa‵ki i auala e uke. Ne fakamalosi atu ki a ia a tusi faka-te-Tusi Tapu kolā e aofia i ei a tala o taina Kelisiano māfai ko loto vāivāi a ia. Ne ‵lago atu a taina mo tuagane ki a ia mai te lafo atu o tusi alofa io me e fai‵pati fakamalosi atu ki a ia i taimi mai mua io me mai tua o fakatasiga. Ne fakaasi atu foki ne nisi tino a te loto fakafetai mō mea kolā e akoako atu ne Stephanie ki a latou mai te olo atu ki tena fale ke maua ne latou ne fakatakitakiga mai te Tusi Tapu. E loto fakafetai eiloa a Stephanie ki a Ieova mō mea katoa konei. A te tusi siki telā e gali ki a ia ko te Salamo 41:​3, telā e talitonu a ia me ne fakataunu ne ia.

14. Se a te mea e ‵tau o ‵kalo keatea tatou mai i ei māfai ko loto vāi‵vai tatou, kae kaia?

¹⁴ Kafai e fi‵ta io me ko tō uke ‵tou fakalavelave, e se ‵tau o fakasakosako atu tatou me i te auala ‵lei ke fakafesagai atu ki ei ko te tiakina ne koe a fakatokaga faka-te-agaga. Tenā eiloa te ‵toe mea masei e fai ne tatou. Kaia? Me i fakatokaga e pelā mo sukesukega totino io me ko sukesukega faka-te-kāiga, galuega talai, mo fakatasiga ko auala katoa kolā e maua ei ne tatou a te agaga tapu. E aoga faeloa a fakatokaga faka-Kelisiano. (Faitau te Mataio 11:​28, 29.) E masani o fi‵ta a taina mo tuagane māfai ko olo atu ki fakatasiga, kae kafai ko ‵foki atu latou ki te fale, e foliga mai me ko oti eiloa ne fakafou aka olotou ma‵losi faka-te-agaga!

15. (a) E mata, e tauto mai a Ieova me ka fakafaigofie ne ia a olaga o Kelisiano? Fakamatala mai te kilokiloga a te Tusi Tapu. (e) Se a te mea ne tauto mai te Atua ki a tatou, kae se a te fesili e sae aka i ei?

¹⁵ E tonu, e se fakauiga te mea tenei, me e ‵mafa a te amoga a soko Kelisiano. E manakogina a taumafaiga e uke ke fai pelā me se Kelisiano fakamaoni. (Mataio 16:​24-​26; Luka 13:24) Kae e auala i te agaga tapu, e mafai ne Ieova o tuku atu a te malosi ki tino kolā e fi‵ta. Ne tusi mai te pelofeta ko Isaia: “Ka ko latou kolā e fakatuaga ki te Aliki mō se fesoasoani ka fakafougina te lotou malosi. Ka eva latou i olotou kapa‵kau e pelā me ne aeto; ka ‵tele latou kae se mafai o fi‵ta; ka sa‵sale latou kae se mafai o vāi‵vai.” (Isaia 40:​29-31) Kafai e penā eiloa, e ‵tau o fesili ifo tatou penei, Se a te pogai tonu e mafau‵fau ei tatou me i ‵tou fakatasiga faka-Kelisiano e fai pelā me se amoga ‵mafa?

16. Se a te mea e mafai ne tatou o fai ke fakaseai ei a māfuaga o te fi‵ta mo te loto vāivāi?

¹⁶ E fakamalosi mai te Muna a Ieova ki a tatou ke “filifili a te mea e sili atu i te ‵lei.” (Filipi 1:​10) Ke fakatusa ne tatou a te olaga faka-Kelisiano ki se fakatau‵telega loa, mai lalo o te fakamalosiga telā ne fai mai ne Paulo, penei: “Ke tiakina ne tatou a mea ‵mafa katoa . . . , kae ke ‵tele tatou mo te loto fai ki mua ke maua te manumalo i te fakatau‵telega tenei e takato mai i mua o tatou.” (Epelu 12:1) E faka‵mafa mai ne ia me e ‵tau o ‵kalo keatea tatou mai fakamoemoega sē aoga, amoga sē aoga, kolā ka fai ei ke fi‵ta tatou. E foliga mai me i nisi tino ko oko eiloa i te fakalavelave aka i mea o te olaga. Tela la kafai e fi‵ta faeloa koe, e mafai o maua ne koe a mea aoga mai te mafaufau ki te auala e fakaaoga ei ne koe a tou malosi ki galuega ‵togi, te aofaki o taimi e fakamāumāu ne koe mō fakafiafiaga, mo tou malosi ke kausaki atu ki tafaoga mo nisi galuega aka. E ‵tau o fakagasue‵sue aka tatou ne te loto malamalama mo te loto maulalo ke lavea atu a ‵tou tapula kae fakamu‵tana aka a galuega kolā e sē tāua malosi.

17. Kaia e loto vāi‵vai ei a nisi tino, kae se a te fakatalitonuga e tuku mai ne Ieova i te feitu tenei?

¹⁷ E foliga mai foki me e isi ne tino ko loto vāi‵vai ona ko te fui oko mai o te gataga o te olaga tenei telā ne fakamoe‵moe tatou ki ei. (Faataoto 13:12) Kae e mafai ne so se tino telā e mafaufau penei o maua ne ia a fakamalosiga mai i pati i te Sapakuka 2:3: “Tusi ki lalo, me e seki oko mai te taimi e fakataunu ei. A te taimi ka vave oko mai; a mea ne fakaasi atu ne au e taunu eiloa. E tuai o oko mai, kae faka‵tali eiloa ki ei. E oko mai eiloa, kae ka se tuai foki.” E maua ne tatou te fakatalitonuga a Ieova me ka oko mai eiloa te gataga o te olaga tenei i te taimi tonu!

18. (a) Ne a folafolaga e fakamalosi atu ki a koe? (e) Ka aoga pefea ki a tatou a te suā mataupu?

¹⁸ E tonu, e ‵nofo fakatalitali eiloa a tavini fakamaoni a Ieova mō te aso telā ka ‵galo atu ei te fi‵ta mo te loto vāivāi, māfai ko ‘toe tupu ‵lei olotou foitino kae malosi foki a tino katoa.’ (Iopu 33:25) E mafai foki eiloa o ma‵losi tatou e auala i te galuega a te agaga tapu i te taimi e aofia ei tatou i fakatasiga faka-Kelisiano aoga. (2 Kolinito 4:​16; Efeso 3:​16) Ke mo a ma talia ne koe te fi‵ta ke taofi ne ia koe mai te mauaga o fakamanuiaga se-gata-mai. A fakalavelave katoa​​—faitalia me e pogai mai i fakaosoosoga, te fi‵ta, io me ko te loto vāivāi​—ka palele atu katoa, i se taimi pili mai, i te lalolagi fou a te Atua. I te suā mataupu, ka suke‵suke tatou ki te auala e fakamalosi ei ne te agaga tapu a Kelisiano ke kufaki i fakasauaga, ke ‵teke atu ki fakamalosiga fakama‵taku mai taugasoa ma‵sei, kae ke kufaki i nisi fakalavelave.

Ka Tali Mai Pefea Koe?

• E mafai pefea o fakamalosi aka tatou ne te faitauga ki te Tusi Tapu?

• E mafai pefea o fakamalosi aka tatou ne te ‵talo mo te mafaufau ‵loto?

• E mafai pefea ne koe o fakaseai atu a māfuaga o te loto vāivāi?

[Ata i te itulau e 26]

E mafai ne fakatasiga o fakamalosi aka tatou i te feitu faka-te-agaga