‘Au Fakamasauaga e Fiafia Malosi au ki ei’

“Me i mea katoa kolā ne tusi i te Tusi, ne tusi ke akoako ei tatou.” ​​—⁠LOMA 15:⁠4.

1. E tuku mai pefea ne Ieova a fakamasauaga kae kaia e ma‵nako ei tatou ki ei?

E TUKU mai ne Ieova a fakamasauaga ke fesoasoani atu ei ki ana tino i te lotou fakafesagai atu ki fakalavelave i taimi faiga‵ta konei. E maua a nisi fakamasauaga konei i taimi e faitau ei ki te Tusi Tapu, a ko nisi fakamasauaga e ‵sae mai i manatu kolā e fai sāle i fakatasiga faka-Kelisiano. A te ukega o mea kolā e fai‵tau kae lagona ne tatou i fakatasiga penei e se ne mea ‵fou ki a tatou. E se taumate ko oti ne sau‵tala tatou ki fakamatalaga penā taluai. Ona ko te mea e puli sāle i a tatou a mea i nisi taimi, e manakogina ke masaua ne tatou a fuafuaga a Ieova, ana tulafono mo ana akoakoga. E ‵tau o maua ne tatou te loto fakafetai ki fakamasauaga a te Atua. E fakafou ei ‵tou agaga, me e fesoasoani mai ke masaua faeloa ne tatou te pogai ne fakamalosi mai ei ke ola tatou e ‵tusa mo te loto o te Atua. Tela la, ne usu atu ei te faisalamo ki a Ieova: “Au fakatonuga io me ko au fakamasauaga e fakafiafia ei au.”​​—⁠Salamo 119:⁠24.

2, 3. (a) Kaia ne tausi ei ne Ieova ke oko mai ki ‵tou aso nei a tala e uiga ki olaga o tino i te Tusi Tapu? (e) Ne a tala mai te Tusi Tapu ka sau‵tala tatou ki ei i te mataupu tenei?

² E ui eiloa ne tusi i te fia senitenali ko ‵teka, e malosi ‵ki te Muna a te Atua. (Epelu 4:12) E fakamatala mai a tala ‵tonu e uiga ki olaga o tino i loto i ei. E ui eiloa ko oti ne mafuli‵fuli malosi a tuu mo kilokiloga a tino talu mai te taimi ne tusi ei te Tusi Tapu, e tai ‵pau eiloa a fakalavelave e fe‵paki mo tatou i aso nei mo fakalavelave o tino i aso konā. A tala e uke i te Tusi Tapu kolā ne tusi mō te ‵lei o tatou e tuku mai i ei ne fakaakoakoga fakaotia loto o tino kolā ne a‵lofa ki a Ieova kae tavini fakamaoni atu ki a ia faitalia a fakalavelave faiga‵ta. E fakaasi mai i nisi tala a faifaiga kolā e takalialia ki ei te Atua. Ne aofia ne Ieova a tala o tino konei, tala ‵lei mo tala sē ‵lei, i te Tusi Tapu ke fai pelā me ne fakamasauaga ki a tatou. E pelā eiloa mo pati ne tusi ne te apositolo ko Paulo: “Me i mea katoa kolā ne tusi i te Tusi, ne tusi ke akoako ei tatou, ko te mea ke maua ne tatou a te fakamoemoega e alatu i te kufaki, mo te fakamalosiga e alatu i te Tusi.”​​—⁠Loma 15:⁠4.

³ Ke onoono aka tatou ki tala e tolu mai te Tusi Tapu: te tala e uiga ki faifaiga a Tavita ki a Saulo, te tala o Anania mo Safaila, mo te tala e uiga ki faifaiga a Iosefa ki te avaga a Potifala. E tuku mai i tala takitasi konei ne akoakoga tāua mō tatou.

Te Fakamaoni ki Fakatokaga a te Atua

4, 5. (a) Se a te tulaga ne oko ki te tupu ko Saulo mo Tavita? (e) Ne saga atu pefea a Tavita ki te kaitaua o Saulo ki a ia?

⁴ Ne seki fakamaoni a te tupu ko Saulo ki a Ieova kae ne seki ‵tau ei o pule atu a ia ki Ana tino. Tela la, ne tiaki ei ne te Atua a ia kae fakatonu atu ki te pelofeta ko Samuelu ke milimili a Tavita mo fai te tupu o Isalaelu. I te taimi ne fakaasi atu ei ne Tavita tena loto toa kae tavaegina ne tino, ne fai fili ei a Saulo ki a Tavita. Ne taumafai faeloa a Saulo o tamate tou tagata. Ne sao a Tavita i taimi katoa konā me ne fakatasi atu a Ieova ki a ia.​ ​—⁠1 Samuelu 18:​6-12, 25; 19:​10, 11.

⁵ Ne ola a Tavita e pelā me se tino maumausolo i te fia o tausaga. I te taimi ne maua ei se avanoaga ‵lei ke tamate ne ia a Saulo, ne fakamalosi atu a taugasoa o Tavita ke fai ne ia te mea tenā me ko tuku atu ne Ieova tena fili ki ona lima. Kae ne seki talia ne Tavita te mea tenā. Ona ko tena fakamaoni ki a Ieova mo tena amanaia ki te tulaga o Saulo e pelā me se tupu fakaekegina o tino o te Atua, ne fakamalosi atu ei ke fai tena ikuga tenā. E mata, e se ko Ieova telā ne fakasopo ne ia a Saulo ke fai mo tupu o Isalaelu? Ka tapale foki ne Ieova a ia i tena taimi tonu. Ne iloa ne Tavita me e seai sena fekau o fai te mea tenā. Mai tua o ana taumafaiga katoa ne fai ke faka‵noga aka ei te kaitaua o Saulo ki a ia, ne fai ei ne Tavita te fakaikuga tenei: “A Saulo e tamate eiloa ne te Aliki; manafai ko oko eiloa ki tena taimi mate io me mate i se taua. A te Aliki ke fakatapu ne ia a au, ke se taumafai au o fakapakia te tino ne fai ne ia mo tupu!”​​—⁠1 Samuelu 24:​3-​15; 26:​7-​20.

6. Kaia e tāua ei te tala o Tavita mo Saulo ki a tatou?

⁶ E maua i te tala tenei se akoakoga tāua ‵ki. E mata, ko oti ne fesili ifo koe me kaia e ‵tupu ei a nisi fakalavelave i loto i te fakapotopotoga Kelisiano? Kāti e fai penā ona ko faifaiga sē ‵lei kolā e fai ne se tino i ei. Kāti e se se mea matagā ‵ki a te mea tenā, kae e fakalavelave atu eiloa ki a koe. E ‵tau o saga atu koe pefea ki ei? Ona ko tou amanaia ki tou taina Kelisiano tenā fakatasi mo tou fakamaoni ki a Ieova, kāti ka faipati atu koe ki ei i se auala atafai mo te fakamoemoega ke faka‵lei aka te fakalavelave tenā. Kae pefea la māfai e tumau eiloa te fakalavelave tenā? Kafai ko oti ne fai ne koe a mea e mafai o fai, kāti ka manako koe ke tuku atu te fakalavelave tenā ki a Ieova. Tenā eiloa te mea ne fai ne Tavita.

7. I te fakaakoako atu ki a Tavita, e ‵tau o ‵saga atu pefea tatou ki faifaiga sē fakamaoni mo te fakailoga tino kolā e fai mai ki a tatou?

⁷ Io me kāti e fepaki koe mo fakalavelave masani sē ‵lei o te olaga io me ko mea tau lotu. Kāti e seai se mea e mafai o fai ne koe ki ei i te vaitaimi tenei. E mafai o faigatā ‵ki ke kufaki i se vaegā tulaga penā, kae ko te auala ne saga atu ei a Tavita ki faifaiga sē fakamaoni penā e tuku mai i ei se fakaakoakoga ‵lei mō tatou. E fakaotia loto ‵ki a salamo ne tusi ne Tavita e uiga ki ana ‵talo kolā ne fai mo te loto kātoa ki te Atua ke faka‵mao keatea a ia mai togafiti a Saulo, kae penā foki loa mo tena fakamaoni ki a Ieova mo tena amanaia ki te fakamalugāga o te igoa o te Atua. (Salamo 18:​1-6, 25-​27, 30-​32, 48-​50; 57:​1-11) Ne tumau eiloa a Tavita i te fakamaoni ki a Ieova e tiga eiloa te tumau o Saulo i te faiga o amioga sē ‵lei ki a ia i te fia o tausaga. E ‵tau foki o tumau faeloa tatou i te fakamaoni ki a Ieova mo tena fakapotopotoga faitalia a faifaiga sē fakamaoni kolā e logo‵mae ei tatou, e penā foki mo faifaiga e fai ne nisi tino. E mafai o tali‵tonu katoatoa tatou me e iloa ‵lei ne Ieova te tulaga tenā.​​—⁠Salamo 86:⁠2.

8. Ne ‵saga atu pefea a Molimau a Ieova i Mozambique i te taimi ne tofotofogina ei te lotou fakamaoni ki a Ieova?

⁸ E tuku mai ne Kelisiano i Mozambique se fakaakoakoga mō tatou i aso nei e uiga ki tino kolā ne tumau i te fakamaoni ki a Ieova i taimi o tofotofoga. I te 1984, ne fakamasei te lotou fa‵kai ne tino ‵teke kolā ne kaisoa, ‵sunu ne latou olotou fale kae tatino foki. E foliga mai me seai se mea ne mafai o fai ne Kelisiano ‵tonu konei ke puipui ei latou. Ne faimālōgina a tino i te kogā koga tenā ke ‵kau atu latou ki te potukau ‵teke tenā io me ‵lago atu ki ei i nisi feitu. Ne ‵kilo atu a Molimau a Ieova ki faifaiga konā me e se fetaui mo te lotou tulaga faka-Kelisiano ko te sē ‵kau ki se feitu i kinauga a tino. Ne kaitaua malosi a tino o te potukau tenā. E nofo ki se toko 30 a Molimau ne tamate i te vaitaimi o te fakalavelave tenā, kae ne seki mafai lele ne te fakamataku o te mate o lepe ne ia te fakamaoni o tino o te Atua.a E pelā mo Tavita, ne kufaki latou i faifaiga sē fakamaoni kae ne manumalo eiloa latou fakamuli.

Se Fakamasauaga ke Fakaeteete i ei

9, 10. (a) E mafai pefea o maua ne tatou a mea aogā mai nisi fakaakoakoga i te Tusi Tapu? (e) Kaia ne sē ‵lei ei a faifaiga a Anania mo Safaila?

⁹ E tuku mai ne tala o nisi tino i te Tusi Tapu a fakamasauaga ke fakaeteete tatou i te faiga o amioga kolā ne fai ne latou. E tonu, e aofia i te Tusi Tapu a tala e uke o tino, ke oko foki eiloa ki nisi tavini o te Atua, kolā ne fai mea ‵se kae ne logo‵mae latou i ei. (1 Kolinito 10:11) A te tala e tasi ko te tala o Anania mo Safaila, se tauavaga kolā ne aofia i te fakapotopotoga Kelisiano i Ielusalema i te senitenali muamua.

¹⁰ Mai tua o te Penitekoso i te 33 T.A., ne sae aka ei se manakoga ke fesoasoani atu i te feitu faka-te-foitino ki tino tali‵tonu ‵fou kolā ne ‵nofo i Ielusalema, ke maua ne latou a mea aogā mai te ‵kau fakatasi mo te kau apositolo. Ne fakatau atu ne nisi tino i te fakapotopotoga olotou kope kae vaevae olotou sene ko te mea ke seai se tino e fakaalofa. (Galuega 2:​41-45) Ne fakatau atu ne Anania mo Safaila te lā laumanafa kae ne tuku atu fua ne laua se vaega o sene ne maua mai i ei ki te kau apositolo, kae fai atu me konā katoa a sene ne maua mai te lā manafa telā ne fakatau atu. E tonu, ne mafai fua ne Anania mo Safaila o tuku te aofaki sene telā ne ma‵nako laua ki ei me uke io me mu‵tana, kae ne masei te lā kilokiloga, kae ne fai foki ne laua se faiga sē fakamaoni. Ne ma‵nako fua laua ke ‵lei te lā ata mai te faiga ke lavea me uke atu a lā galuega ne fai i lō te aofaki tonu. E auala i te galuega a te agaga tapu, ne fakasae aka ei ne Petelu te lā se fakamaoni mo te amio ‵pelo, kae ne tamate ei laua ne Ieova.​​—⁠Galuega 5:1​1-10.

11, 12. (a) Ne a nisi fakamasauaga e uiga ki te fakamaoni e fai mai i te Tusi Tapu? (e) Ne a mea aogā e maua mai te tumau i te fakamaoni?

¹¹ Kafai e tofotofogina tatou ke sē fai te mea tonu ko te mea ke fia‵fia mai fua a tino ki a tatou, ke fai faeloa a te tala o Anania mo Safaila mo fai se fakamasauaga ki a tatou. E mafai o fakaloiloi ne tatou a tino, kae e se mafai o fakavalea ne tatou a Ieova. (Epelu 4:13) E fakamalosi mai faeloa te Tusi Tapu ke fakatau fakamaoni tatou te suā tino ki te suā tino, me e seai se avanoaga o tino gutu ‵loi i te lalolagi telā ka faka‵magina mai amioga sē ‵tonu katoa. (Faataoto 14:2; Fakaasiga 21:8; 22:15) E ‵tau o manino ‵lei te pogai e fai ei penā. E māfua mai a faifaiga ‵loi katoa mai i a Satani te Tiapolo.​​—⁠Ioane 8:⁠44.

¹² A te ola i se olaga amiotonu e aumai i ei a mea aogā e uke. E aofia i ei ko te mauaga o se loto lagona ‵ma mo te fiafia telā e maua i te tali‵tonu o tino ki a koe. I kogā koga e uke, ona ko te lotou fakamaoni, ne maua ne Kelisiano olotou galuega ‵togi kae ne tumau i olotou galuega konā. A te ‵toe mea tāua i ei, ko te mauaga o se vā fakataugasoa mo te Atua Malosi Katoatoa ona ko ‵tou fakamaoni.​​—⁠Salamo 15:​1, 2. 

Te Tumau i te Amio ‵Ma

13. Se a te tulaga ne oko atu ki ei a Iosefa, kae ne saga atu pefea a ia ki ei?

¹³ Ne fakatau atu a Iosefa, te tama a te toeaina ko Iakopo, e pelā me se pologa a ko 17 fua i ei ana tausaga. Ne nofo fakamuli atu a ia i loto i te fale o Potifala, se ofisa maluga o Aikupito, kae ne fiafai ei te avaga o tena pule ki a Iosefa. Ne manako tou fafine ke moe laua mo Iosefa, telā se tamataene taulekaleka, kae i aso takitasi ne fai atu faeloa tou fafine ki a ia: “Vau ke moe tāua.” Ne nofo ‵mao ‵ki a Iosefa mai tena kāiga, kae ne nofo atu a ia i se koga telā e se iloa a ia ne tino. Se mea faigofie fua ke ‵moe laua mo te fafine tenei e aunoa mo te iloa ne nisi tino. Kae, i te taimi e tasi ne puke atu ei te avaga a Potifala ki tou tagata, ne tele ei keatea a Iosefa.​​—⁠Kenese 37:​2, 18-28; 39:​1-12.

14, 15. (a) Kaia e aogā ei te tala o Iosefa ki a tatou? (e) Kaia ne loto fakafetai ei se fafine Kelisiano me ne fakalogo a ia ki fakamasauaga a te Atua?

¹⁴ Ne puti aka a Iosefa i loto i se kāiga telā e ma‵taku ki te Atua, kae e malamalama ‵lei a ia me i faifaiga fakatauavaga kolā e fai ne tino kolā e seki avaga e se tonu. Ne fesili ifo a ia penei: “E mafai pefea ne au o fai se vaegā mea masei penā, e agasala ei au i mua o te Atua?” E se taumate ne fai tena fakaikuga e ‵tusa mo tena iloa e uiga ki tulaga o tino i mua o te Atua, telā e ‵tau fua o tokotasi te avaga. (Kenese 2:24) E mafai o maua ne tino o te Atua i aso nei a mea aogā māfai e mafau‵fau ki te auala ne saga atu ei a Iosefa ki te fakalavelave tenā. I nisi koga, a faifaiga fakatauavaga ko fai mo fai se mea masani kae ko talavou kolā e ita ma aofia i faifaiga finalalolagi e fakatauemu ne nisi talavou. A faifaiga fakatauavaga i vā o tino kolā ko oti ne a‵vaga se faifaiga masani e fai ne tino ma‵tua. Tela la, e fai eiloa te tala o Iosefa e pelā me se fakamasauaga ‵lei mō tatou i ‵tou taimi nei. E tumau eiloa te tulaga o Ieova e uiga ki te finalalolagi mo te mulilua e pelā me ne agasala. (Epelu 13:⁠4) E lotoma‵lie a tino e tokouke kolā ko oti ne ‵to atu ki loto i te fakaosoosoga ke aofia i faifaiga fakatauavaga matagā me uke ‵ki a pogai e se ‵tau ei o fai penā. E aofia i ikuga ma‵sei konā ko te māsiasi, te mauaga o se loto lagona sē ‵lei, te loto masei, te faitama, mo masaki ‵pisi kolā e māfua mai i faifaiga fakatauavaga. E pelā eiloa mo fakamasauaga mai te Tusi Tapu ki a tatou, a te tino telā e finalalolagi “e agasala ki tona foitino.”​​—⁠1 Kolinito 5:​9-12; 6:​18; Faataoto 6:​23-​29, 32.

¹⁵ Ne matea ne Tieni,b se Molimau taka a Ieova, te pogai ke fakafetai ei a ia mō fakamasauaga a Ieova. Ne fakatāgata atu ki a ia se tamataene taulekaleka telā ne ga‵lue fakatasi mo ia. I te taimi ne seki fia saga atu a Tieni ki ei, ne momea aka ei ana taumafaiga. “Ne kausaki malosi eiloa au ke tumau au i te ‵ma,” ko ana pati, “me e fakalatagofie koe māfai e isi se tagata e fiafai ki a koe.” Kae ne iloa aka ne tou fāfine me i te tagata tenā e taumafai fua ke aofia a ia i te aofaki o fafine kolā ko oti ne ‵moe mo ia. Kafai ko lagona ne ia me ko vāivāi a ia i ana taumafaiga o ‵teke atu ki ei, ne ‵talo a ia ki a Ieova mō se fesoasoani ke tumau a ia i te fakamaoni ki a Ia. Ne iloa aka ne Tieni me i mea kolā ne tauloto ne ia mai i ana sukesukega ki te Tusi Tapu mo tusi faka-te-Tusi Tapu ne fai pelā me ne fakamasauaga kolā ne fakamalosi atu ke tumau a ia i te matapulapula. E aofia i fakamasauaga konei ko te tala o Iosefa mo te avaga o Potifala. “Kafai e fakamasaua faeloa ne au ki a au eiloa a te lasi o toku alofa mō Ieova,” ko ana pati, “e se ‵tau au o mataku me ka fai ne au te mea masei lasi tenei kae agasala au ki a ia.”

Fakalogo ki Fakamasauaga a te Atua!

16. E mafai pefea o maua ne tatou a mea aogā mai te toe onoono mo te mafaufau ‵loto ki olaga o tino taki tokotasi kolā e fakaasi mai i te Tusi Tapu?

¹⁶ E mafai o momea aka ne tatou katoa a ‵tou loto fakafetai ki tulaga amio‵tonu o Ieova mai te taumafai ke malamalama tatou i te pogai ne talia ei ne ia a nāi tala ke tusi i loto i te Tusi Tapu mō tatou. Ne a mea e akoako mai ne latou? Ne a uiga io me ne kilokiloga a tino i te Tusi Tapu e ‵tau o fakaakoako ki ei io me ‵kalo keatea mai i ei? E lau i selau a tino kolā e tusi olotou tala i loto i te Muna a te Atua. A tino katoa kolā e a‵lofa ki fakatonuga a te Atua e maua ne latou a mea aogā māfai e ati aka ne latou se manakoga mō te poto telā e maua mai i ei te ola, e aofia i ei ko akoakoga kolā e mafai o tauloto ne tatou mai fakaakoakoga kolā ne tausi faka‵lei ne Ieova. E masani o ‵lomi i te mekesini tenei a tala o vaegā tino penā kolā e isi ne akoakoga aogā e maua ne tatou mai i ei. Kaia e se fakaaogā ei ne koe ne taimi ke iloilo aka a tala konei?

17. E pefea ou lagonaga e uiga ki fakamasauaga a Ieova, kae kaia?

¹⁷ E pefea te ‵lasi o ‵tou fia‵fia mō te amanaia o Ieova telā e fakaasi ne ia ki tino kolā e kausaki o fai tena loto! A tatou e se ne tino ‵lei katoatoa, e pelā eiloa mo tāgata mo fāfine kolā e fakaasi mai i te Tusi Tapu. Kae e tāua ‵ki a olotou tala kolā ne fakamau ki lalo mō tatou. Mai te faka‵logo ki fakamasauaga a Ieova, e mafai ei o ‵kalo keatea tatou mai te faiga o agasala matagā, kae e mafai o fakaakoako tatou ki fakaakoakoga ‵lei o tino kolā ne sa‵sale i auala o te amiotonu. Kafai e fai tatou penā, ka mafai ei o usu fakatasi tatou mo te faisalamo: “Amutia a latou kolā e tau‵tali i ana fakatonuga, a latou e faka‵logo mo olotou loto katoatoa ki a [Ieova]. Au e fakalogo ki au akoakoga io me ko au fakamasauaga; e fiafia au ki ei mo toku loto kātoa.”​​—⁠Salamo 119:​2, 167.

[Fakamatalaga mai lalo]

Ka Tali Mai Koe Pefea?

• Ne a mea e mafai o tauloto ne tatou mai faifaiga a Tavita ki a Saulo?

• Ne a mea e akoako mai ne te tala o Anania mo Safaila ki a tatou?

• Kaia e aogā malosi ei te tala o Iosefa ki a tatou i aso nei?

[Ata i te itulau e 14]

Kaia ne ita ei a Tavita ma tamate ne ia a Saulo?

[Ata i te itulau e 15]

Se a te mea e tauloto ne tatou mai te tala o Anania mo Safaila?

[Ata i te itulau e 16]

Se a te mea ne fai ei a Iosefa ke ‵teke atu ki taumafaiga ke finalalolagi?