Ke Gasolo Atu ki Mua Fakatasi mo te Fakapotopotoga a Ieova
“Ke tuku atu ne te Atua o te filemu ki a koutou a mea ‵lei katoa . . . ke fai ne koutou a tona loto.”—EPELU 13:20, 21.
I TE TAUSAGA ko te 1999, ne oko atu te aofaki o tino i te lalolagi ki te ono piliona! E fakaasi mai ne te World Almanac me e aofia i te aofaki tenā a tino Musilimu e toko 1,165,000,000; e toko 1,030,000,000 a tino Lotu Katolika Loma; ko tino Hinitu e toko 762,000,000; tino lotu Puta e toko 354,000,000; e toko 316,000,000 a tino Lotu Polotesano; kae e toko 214,000,000 a tino lotu Orthodox.
2 E ‵tusa mo te nofo mavae‵vae mo te ‵numi valevale o lotu i aso nei, e mata, e amio a te fia miliona o tino katoa konei e ‵tusa mo te loto o te Atua? Ikai, “me i te Atua e se se Atua o te sē tokagamalie, kae se Atua o te filemu.” (1 Kolinito 14:33, NW) I te suā feitu, e a te kautaina o tavini a Ieova i te lalolagi kātoa? (1 Petelu 2:17) E fakamaoni mai ne sukesukega kolā ne fai faka‵lei me e ‘tuku atu ne te Atua o te filemu ki a latou a mea ‵lei katoa ke fai tena loto.’—Epelu 13:20, 21.
3 A te ‵tonuga loa, e se se pogai tonu ke fakaiku aka ne te tokoukega o tino kolā e ‵kau atu ki Molimau a Ieova me e maua ne latou te taliaga a te Atua; io me e fakafiafia atu foki a aofaki ‵lasi ki te Atua. Ne seki filifili ne ia a tino Isalaelu ona ko te mea “e tokouke” atu latou i nisi malo. A latou, “ko te toe fenua foliki eiloa i te lalolagi.” (Teutelonome 7:7) Ona ko te mea ne seki fakamaoni te kau Isalaelu, i te Penitekoso i te 33 T.A. ne saga atu a Ieova ki te fakapotopotoga fou telā ne aofia i ei a soko o Iesu Keliso. Ne fakaekegina latou ki te agaga tapu kae ne olo atu mo te loto finafinau o folafola atu ki nisi tino a te munatonu e uiga ki te Atua mo Keliso.—Galuega 2:41, 42.
Ke Tumau i te Gasolo Atu ki Mua
4 I te senitenali muamua, ne tumau eiloa te fakapotopotoga Kelisiano i te gasolo atu ki mua, ne ‵tala mai i ei a koga talai ‵fou, te faiga o soko, mo te mauaga o te malamalama e sili atu i fuafuaga a te Atua. Ne tumau eiloa Kelisiano mua i te gasolo atu ki mua i te malamalama faka-te-agaga telā ne tuku mai e auala i tusi kolā ne fakaosofia ne te Atua. Ona ko fakamalosiga e auala i āsiga mai i apositolo mo nisi tino aka, ne fai ei ne latou te lotou galuega. Ne tusi faka‵lei ki lalo a te mea tenei i Tusitusiga Eleni faka-Kelisiano.—Galuega 10:21, 22; 13:46, 47; 2 Timoteo 1:13; 4:5; Epelu 6:1-3; 2 Petelu 3:17, 18.
5 E pelā eiloa mo Kelisiano mua, ko oti foki ne gasolo aka a Molimau a Ieova i aso nei mai i se kamataga foliki. (Sakalia 4:8-10) Talu mai tausaga fakaotioti o te 19 senitenali, ne lavea atu a fakamaoniga ‵tonu me ne fakatasi mai te agaga o te Atua ki tena fakapotopotoga. Ona ko te mea ne seki fakalago‵lago atu tatou ki malosi o tino, kae ki te takitakiga o te agaga tapu, ko tumau eiloa tatou i te gasolo atu ki mua i te ‵tou malamalama i te Tusi Tapu mo te faiga o te loto o te Atua. (Sakalia 4:6) Ona ko te mea e ‵nofo atu tatou i “aso fakaoti,” se mea tāua ke tumau tatou i te gasolo atu ki mua fakatasi mo te fakapotopotoga a Ieova telā e fai foki penā. (2 Timoteo 3:1-5) A te faiga penā, e fai ei tatou ke tumau i ‵tou fakamoemoega ola kae ke ‵kau atu ki te tukuatuga o se molimau e uiga ki te Malo o te Atua telā ko oti ne fakatu aka a koi tuai o oko atu ki te ‵toe fakaotiga o te fakanofonofoga tenei o mea.—Mataio 24:3-14.
6 E aofia i tino o tatou, a latou kolā ne kamata o ‵kau atu ki te fakapotopotoga a Ieova i tausaga talu mai te 1920, te 1930, mo te 1940. I tausaga konā, ko oi i a tatou e mafai o fakaataata ne ia a te gasoloakaga fakaofoofogia mo galuega e uke a te fakapotopotoga ne fai ke oko mai eiloa ki te aso tenei? Mafaufau ki mea fakaofoofogia kolā ne ‵tupu i ‵tou tala fakasolopito i aso nei! Se mea fakafiafia ‵ki i te feitu faka-te-agaga, ke mafaufau ki mea kolā ne fai ne Ieova e auala i ana tino kolā ne fakatoka faka‵lei i te auala fakaseokalatika.
7 A Tavita ne ofo malosi i te taimi ne mafaufau ei a ia ki galuega fakaofoofogia a Ieova. Ne fai mai a ia penei: “E se mafai ne au o fakalaulau atu katoa me ko tō uke!” (Salamo 40:5) E penā foki eiloa a mea kolā e se mafai ne tatou o fai. E se mafai ne tatou o fakaasi atu katoa a faifaiga ‵lasi kae ‵gali a Ieova i ‵tou aso nei. E tiga eiloa te feitu tenā, ke na mafau‵fau tatou ki auala e tolu kolā ne gasolo atu ei ki mua te fakapotopotoga a Ieova: (1) te malamalama i te feitu faka-te-agaga, (2) te ‵lei mo te fakalauefaatuga o te galuega talai, mo te (3) ‵fuliga i faifaiga a te fakapotopotoga kolā ne fai i te taimi tonu.
Ke Loto Fakafetai Ona ko te Malamalama Faka-te-agaga
8 E pelā mo te malamalama faka-te-agaga telā e gasolo atu ki mua, ne fakamaoni mai i ei te ‵tonu o te Faataoto 4:18. E fai mai i ei penei: “A te auala tela e sasale i ei a tino amiotonu e pela mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.” Ko oko eiloa te ‵tou loto fakafetai ki te malamalama faka-te-agaga ko maua ne tatou! I te fono i Cedar Point, Ohio, i te 1919, ne faka‵mafa mai i ei a te Malo o te Atua. E fakaaogā ne Ieova te Malo ke faka‵malu ei tena igoa kae ke taku ‵lei ei tena pulega. A te ‵tonuga loa, ne mafai ne tatou o iloa aka e auala i te malamalama faka-te-agaga, me mai i a Kenese ke oko ki a Fakaasiga, e fakamaoni mai ne te Tusi Tapu a te fuafuaga a Ieova ke faka‵malu tena igoa e auala i te Malo telā e pulegina ne tena Tama. I konā loa, e maua ei te fakamoemoega sili ne tino katoa kolā e fia‵fai ki te amiotonu.—Mataio 12:18, 21.
9 I te fono i te 1922 i Cedar Point, ne fakamalosi atu te failauga fakapitoa mō te fono tenā, ko J. F. Rutherford, ki tino o te Atua ke na “fakasalalau, fakasalalau, fakasalalau atu te Tupu mo tena Malo.” I te mataupu ko “Te Fanaumaiga o te Atufenua,” telā ne ‵lomi i te Watchtower i a Mati 1, 1925, ne ‵saga atu i ei ki te malamalama faka-te-agaga telā ne fakasino atu ki te fakatuga o te Malo o te Atua i te 1914. Ne fai foki pelā me i tausaga talu mai te 1920, e isi ne fakapotopotoga e lua kolā e fakatau taua—ko te fakapotopotoga a Ieova mo te fakapotopotoga a Satani. Ko fai nei te taua i te va o te avā fakapotopotoga konā, kae ka ‵nofo atu tatou i te feitu manumalo māfai e tumau faeloa tatou i te gasolo atu ki mua fakatasi mo te fakapotopotoga a Ieova.
10 Ne fesoasoani mai pefea te vaegā malamalama faka-te-agaga penā ki a tatou? Ona ko te sē fai o te Malo o te Atua mo tena Tupu ko Iesu Keliso mo fai ne vaega o te lalolagi, e se ‵tau foki o fai tatou mo fai ne vaega i ei. Mai i te tumau i te ‵vae keatea mai i te lalolagi, e fakaasi atu ei me e ‵kau atu tatou ki te feitu o te munatonu. (Ioane 17:16; 18:37) Kafai e onoono tatou ki fakalavelave faiga‵ta kolā e oko mai ki te fakanofonofoga masei tenei, ko oko eiloa i te ‵tou loto fakafetai ke se fai tatou mo fai ne vaega o te fakapotopotoga a Satani! Kae ko oko foki eiloa te ‵tou fia‵fia ke maua a te tokagamalie faka-te-agaga i loto i te fakapotopotoga a Ieova!
11 I te fono telā ne fai i Columbus, Ohio, i te 1931, ne fakagalue aka ei te Isaia 43:10-12 i se auala telā e fetaui ‵lei. Ne fakaaogā i ei ne Tino A‵koga i te Tusi Tapu a te igoa tu ‵kese, ko Molimau a Ieova. Ko tafaga la te taulia o tatou ke fakailoa atu te igoa o te Atua ko te mea ke mafai o ka‵laga atu a nisi tino ki ei ke fakaolagina ei foki latou!—Salamo 83:18; Loma 10:13.
12 Mai mua o te 1930, e tokouke a tino o te Atua ne fakalotolotolua e uiga ki te lotou fakamoemoega mō te olaga i aso mai mua. Ne mafau‵fau a nisi tino e uiga ki te olaga faka-te-lagi kae ne fia‵fia foki latou ki akoakoga a te Tusi Tapu e uiga ki se lalolagi palataiso. I te fono i Washington D.C., i te 1935, se mea fakafiafia ke iloa atu me i te vaitino tokouke telā e faipati ki ei i te Fakaasiga mataupu e 7, se potukau o tino telā e maua ne latou te fakamoemoega i te lalolagi. Talu mai te taimi tenā, ne gasolo fakavave atu ei ki mua a te fakamaopoopoga o te vaitino tokouke. E mata, e loto fakafetai tatou me ko se toe ‵numi tatou i te vaitino tokouke? A te fakamaopoopoga tonu i aofaki ‵lasi o tino mai i atufenua, matakāiga, mo ‵gana e fakaosofia ei tatou ke ga‵lue malosi kae ke tumau foki tatou i te gasolo atu ki mua fakatasi mo te fakapotopotoga a Ieova.
13 Ne faka‵mafa mai te kinauga lasi telā e ‵tau o fakatāua malosi ne tino i te fono i St. Louis, Missouri, i te 1941. Ko te kinauga e uiga ki te pulega sili i te lagi mo te lalolagi! Tenei eiloa te kinauga telā e ‵tau o fakatoka fakavave, kae ko pili ‵ki mai foki te aso lasi kae fakamataku mō te mea tenā! Ne fakaasi mai foki i te 1941 a te kinauga tai ‵pau e uiga ki te fakamaoni, telā e tuku mai i ei te avanoaga ki a tatou ke fakaasi atu te feitu telā e ‵kau atu tatou ki ei e uiga ki te pulega sili a te Atua.
14 I te fono telā ne ‵kau atu ki ei a tino mai i fenua e uke telā ne fai i te fa‵kai ko Niu Ioki, ne iloa faka‵lei atu ei a pelenise kolā e faipati ki ei i te Salamo 45:16. Ko oko eiloa i te fakapoi i te taimi ne faipati ei a te taina ko Feleti Falani ki te mea tenei kae ne fakamatala mai me e isi ne tino i a tatou kolā ka fai mo fai ne pelenise o te lalolagi fou. I te fono tenā mo nisi fono mai tua ifo i ei, ne ‵ka mai i ei a molī e uke o te mainaga faka-te-agaga. (Salamo 97:11) Ko oko eiloa i te fia‵fia o tatou me i te ‵tou auala “e pela mo te la e kamata o fanake, e gasolosolo malie eiloa o vau te mainaga”!
Ke Gasolo Atu ki Mua i te ‵Tou Galuega
15 A te lua o auala ko oti ne gasolo atu ei ki mua a te fakapotopotoga a Ieova ko te ‵tou galuega fakavae—ko te talaiatuga o te Malo mo te faiga o soko. (Mataio 28:19, 20; Maleko 13:10) Ke fakataunu te galuega tenei, ko oti ne tumau eiloa te fakapotopotoga i te faka‵mafa mai ki a tatou a te tāua o te fakalauefaatuga o ‵tou galuega. I te 1922, ne fakamalosi atu ki Kelisiano katoa ke ‵kau atu ki te galuega talai. E tuku eiloa ki tino taki tokotasi ke fakamaina atu tena mainaga kae ke kau atu a ia i te molimau atu ki te munatonu. (Mataio 5:14-16) I te 1927, ne fai a fakatokaga ke fai a te Aso Sa mo fai se aso mō te galuega talai. I a Fepuali i te 1940, ne kamata o lavea sāle atu a Molimau i te auala i fale faipisinisi e ofo atu ne latou The Watchtower (Te Faleleoleo Maluga) mo te Consolation (ko te Awake! i aso nei).
16 Ne maua eiloa se tusi fou ko te Model Study i te 1937, kae e faka‵mafa mai i ei te manakoga ke fai a toe āsiga ko te mea ke akoako atu a muna‵tonu i te Tusi Tapu ki nisi tino. I tausaga mai tua ifo i ei, ne faka‵mafa malosi mai i ei a te galuega ko te faiga o akoga faka-te-Tusi Tapu. Ne tuku atu a fakamalosiga ki te vaega tenei o te galuega i te ‵lomiga o te tusi ko te “Let God Be True” i te 1946 mo te Truth That Leads to Eternal Life i te 1968. I aso nei, e fakaaogā ne tatou te tusi ko Te Iloaga Telā e Takitaki Atu ei ki te Ola Se-Gata-Mai. A te sukesuke ki vaegā mataupu penā e tuku mai i ei se fakavae mautakitaki faka-te-Tusi Tapu mō te faiga o soko.
Ke Gasolo Atu ki Mua Fakatasi mo ‵Fuliga ‵Fou i Fakatokaga a te Fakapotopotoga
17 A te tolu o auala telā e gasolo atu ei ki mua a te fakapotopotoga a Ieova ko ‵fuliga ‵fou i fakatokaga a te fakapotopotoga. E ‵tusa mo te Isaia 60:17, ne folafola mai penei a Ieova: “Ka aumai ne au ki a koe a te aulo kae se ko te palasi, te siliva mo te palasi kae se ko te fiti mo te lakau, te fiti kae se ko te fatu. A ou tino pule ka se toe pule fakasaua ki a koe; ka fai ne au latou ke pule mo te fai mea tonu mo te filemu.” I te fakafetaui aka ki te valoaga tenei, ko oti ne fai a fakatokaga ke momea aka te ‵lei o te faiga o te galuega talai o te Malo mo te tausiga o te lafu mamoe.
18 I te 1919, ne ‵tofi aka se tino pule i te galuega talai i fakapotopotoga takitasi ke fakatoka ne latou a te galuega talai. E fakamalosi aka i ei te faiga o te ‵tou galuega talai. A te filifiliga o toeaina mo tiakono i te faiga o palota ne taofi aka i te 1932, telā ne fakailoga ei ‵tou ‵vae keatea mai i faifaiga fakatemokalatika. A te suā mea fakaofoofogia ne tupu i te 1938, ko te taimi ne momea aka ei te ‵tofiga o tavini katoa i te fakapotopotoga e ‵tusa mo fakatokaga mō te ‵tofiga fakaseokalatika i te fakapotopotoga Kelisiano mua. (Galuega 14:23; 1 Timoteo 4:14) I te 1972, ne ‵tofi aka a ovasia mo tavini fakafaifeau ke tavini atu, e pelā mo mea ne fai ne vaegā tāgata penā i Kelisiano i aso mua. I lō te ‵tofi aka se tagata fua e tokotasi ke tavini atu e pelā me ko te ovasia o se fakapotopotoga, e fakaasi mai ne te Filipi 1:1 mo nisi tusi siki me i tino kolā e fetaui ‵lei ki mea kolā e manakogina ke fai ne ovasia i te Tusi Tapu e ‵tau o aofia latou i se potukau o toeaina.—Galuega 20:28; Efeso 4:11, 12.
19 I te 1975, ne fai se fakatokaga mō komiti o te Potukau Pule o Molimau a Ieova ke tausi atu ki galuega a te fakapotopotoga a te Atua i te lalolagi kātoa. Ne ‵tofi aka a Komiti mō Ofisa Lagolago ke tausi ne latou a te galuega i fenua kolā e ‵nofo mai lalo i te lotou tausiga. Talu mai te taimi tenā, ne fakafaigofie aka te galuega i te laumua mo ofisa lagolago o te Sosaiete o te Faleleoleo Maluga ko te mea ke “filifili a te mea e sili atu i te ‵lei.” (Filipi 1:9, 10) A te tiute telā e amo aka ne tausi mamoe a Keliso e aofia i ei te faiga o te takitakiga i te galuega faka-evagelia, te akoako atu i te fakapotopotoga, mo te tausi faka‵lei atu ki te lafu mamoe a te Atua.—1 Timoteo 4:16; Epelu 13:7, 17; 1 Petelu 5:2, 3.
Te Pulega Malosi a Iesu
20 A te tumau i te fakapotopotoga a Ieova telā e gasolo atu ki mua, e manakogina i ei a te taliaga ne tatou o te tulaga o Iesu Keliso telā ne tuku atu ne te Atua e pelā me ko te “pule i te ekalesia.” (Efeso 5:22, 23) Masaua foki a te Isaia 55:4, telā e fai mai penei ki a tatou: “Ne fai ne au [ko Ieova] mo pule mo takitaki o malo, kae ne fakaasi ne au ki a latou a toku malosi e auala i a ia.” E iloa ‵lei ne Iesu a te auala ke fai ei te takitakiga. E iloa foki ne ia ana mamoe mo olotou manakoga. A te ‵tonuga loa, i te taimi ne āsi atu ei a ia ki fakapotopotoga e fitu i Asia Foliki, ne fai atu fakalima a ia penei: “E iloa ne au au mea e fai.” (Fakaasiga 2:2, 19; 3:1, 8, 15) E iloa foki ne Iesu ‵tou manakoga, e pelā foki eiloa mo te mea e iloa ne tena Tamana, ko Ieova. A koi tuai o tuku mai ne ia te ‵Talo Fakaakoako, ne fai mai penei a Iesu: “Me lavea ne te otou Tamana a mea kola e fia maua ne koutou, kae e seki fakatagi atu eiloa a koutou ki a ia.”—Mataio 6:8-13.
21 E fakaasi mai pefea a te takitakiga a Iesu? A te auala e tasi ko ovasia Kelisiano kolā e fai pelā me ne “meaalofa.” (Efeso 4:8) E fakaasi mai ne te Fakaasiga 1:16 a ovasia fakaekegina e pelā me e ‵nofo atu i te lima fakaatamai o Keliso, mai lalo i tena takitakiga. I aso nei, e takitaki ne Iesu a faifaiga a te kau toeaina, faitalia me e maua ne tāgata konā se fakamoemoega faka-te-lagi io me se fakamoemoega faka-te-lalolagi. E ‵tofi aka latou ne te agaga tapu e ‵tusa mo tulaga faka-te-Tusi Tapu, e pelā mo te fakamatalaga telā ko oti ne fakaasi mai i te suā mataupu. (1 Timoteo 3:1-7; Tito 1:5-9) I te senitenali muamua, ne aofia a toeaina ma‵tua i Ielusalema i se potukau pule telā ne tausi atu ki fakapotopotoga kātoa mo te faiga o te galuega talai o te Malo. E tau‵tali atu foki te fakapotopotoga a Ieova i aso nei ki te fakatokaga tenā.
Ke Tumau i te Gasolo Atu ki Mua!
22 Ko oti ne tuku atu a mea katoa o te Malo o te Atua i te lalolagi nei ki “te tavini poto kae fakamaoni,” telā e sui ne te Potukau Pule o Molimau a Ieova. (Mataio 24:45-47) E ‵saga malosi muamua mai a te Potukau Pule ki te tukumaiga o akoakoga mo takitakiga ki te fakapotopotoga Kelisiano i te feitu faka-te-agaga. (Galuega 6:1-6) Kafai ko pokotia a taina tapuaki i fakalavelave ‵tupu fakafuasei, e fakatonu atu te Potukau Pule ki nisi potukau ke tuku mai a fakatapūga kae ke fakafou io me e faite aka a fale mo Kingdom Halls kolā ne fakamaseigina. Kafai e fai fakamasei io me e fakasauāgina a Kelisiano, e fai ne latou a fakatokaga ke fakamalosi aka ei latou i te feitu faka-te-agaga. Kae i “aso faiga‵ta” konei, e fai so se taumafaiga ke tumau te galuega talai i te gasolo atu ki mua.—2 Timoteo 4:1, 2, NW.
23 Faitalia me ne a mea ka oko mai ki ana tino, e tumau eiloa a Ieova i te tukumaiga o mea‵kai faka-te-agaga mo takitakiga kolā e manakogina. E tuku mai foki ne te Atua a te loto malamalama mo te poto ki taina tofia ke fakatoka mō te gasolo atu ki mua mo ‵fuliga ‵fou i aso mai mua i te fakapotopotoga fakaseokalatika. (Teutelonome 34:9; Efeso 1:16, 17) Tela la, e tuku mai faeloa ne Ieova a mea kolā e ‵tau o maua ne tatou ke fai ei ‵tou galuega ko te faiga o soko kae ke fakataunu foki ‵tou galuega i te lalolagi kātoa.—2 Timoteo 4:5.
24 E loto tali‵tonu katoatoa tatou me ka se tiakina ne Ieova ana tino fakamaoni; kae ka faka‵sao ne ia a latou mai i te “fakasauaga lasi” telā ko pili mai. (Fakaasiga 7:9-14; Salamo 94:14; 2 Petelu 2:9) E maua ne tatou a pogai katoa ke tumau i te tali‵tonu telā ne maua ne tatou mai i te kamataga ke oko eiloa ki te fakaotiga. (Epelu 3:14) Tela la, ke na fakaiku aka ne tatou ke tumau i te gasolo atu ki mua fakatasi mo te fakapotopotoga a Ieova.
Ka Tali Mai Pefea ne Koe?
• Kaia e mafai ei ne tatou o fai atu me e tumau eiloa te fakapotopotoga a Ieova i te gasolo atu ki mua?
• Ne a fakamaoniga e lavea atu me e maua ne tino o te Atua se malamalama faka-te-agaga telā e gasolo atu ki mua?
• Ne gasolo aka pefea o ‵lei a te galuega faka-Kelisiano?
• Ne a ‵fuliga ko oti ne fai i te taimi tonu ki fakatokaga a te fakapotopotoga mō tavini a Ieova?
[Fesili mo te Sukesukega]
1. Se a te aofaki o tino i te lalolagi, kae e tokofia a tino e aofia i lotu kese‵kese?
2. Ne a pati e mafai o fai atu e uiga ki te tulaga o lotu i aso nei?
3. Se a te mea telā ne tupu i Ielusalema i te Penitekoso i te 33 T.A., kae kaia?
4. Kaia e mafai ei ne koe o fai atu me ne tumau eiloa a te fakapotopotoga Kelisiano mua i te gasolo atu ki mua?
5. Kaia e gasolo atu ei ki mua a te fakapotopotoga a te Atua i aso nei, kae kaia e ‵tau ei o gasolo fakatasi atu tatou ki mua?
6, 7. Ne a auala e tolu ka mafau‵fau tatou ki ei, kolā ne gasolo atu ei ki mua a te fakapotopotoga a Ieova?
8. E ‵tusa mo te Faataoto 4:18, ne a mea ne mafai o iloa ne tatou e uiga ki te Malo ona ko te malamalama faka-te-agaga?
9, 10. I tausaga talu mai te 1920, ne a mea ne tau‵loto tatou ki ei e uiga ki te Malo mo fakapotopotoga e lua kolā e fakatau taua, kae e fesoasoani mai pefea te mea tenei?
11. Se a te igoa faka-te-Tusi Tapu telā ne kamata o fakaaogā ne tino o te Atua i te 1931?
12. Se a te malamalama faka-te-agaga e uiga ki te vaitino tokouke telā ne tuku mai i te 1935?
13. Se a te kinauga lasi telā ne faka‵mafa mai i te fono i St. Louis i te 1941?
14. I te fono lasi i te 1950, se a te mea ne iloa atu e uiga ki pelenise kolā e faipati ki ei te Salamo 45:16?
15, 16. (a) Ne gasolo atu pefea tatou ki mua i te ‵tou galuega i tausaga talu mai te 1920 mo te 1930? (e) Ne a tusi ne fakamalosi atu ki te galuega faka-Kelisiano i tausaga fakamuli nei?
17. I te fakafetaui aka ki te Isaia 60:17, ne gasolo atu pefea ki mua a te fakapotopotoga a Ieova?
18, 19. Ne a ‵fuliga ‵fou i te fakatokaga a te fakapotopotoga kolā ko oti ne fai i te fia o tausaga?
20. Se a te tulaga o Iesu telā e ‵tau o talia ne tatou mai i te tumau i te gasolo atu ki mua fakatasi mo te fakapotopotoga a Ieova?
21. E fakaasi mai pefea te takitakiga a Iesu i te fakapotopotoga Kelisiano?
22. Se a te fesoasoani telā e tuku mai ne te Potukau Pule?
23, 24. Faitalia a mea kolā e oko mai ki ana tino, se a te mea telā e tuku mai faeloa ne Ieova, kae se a te mea telā e ‵tau o fai ne tatou?
[Ata i te itulau e 13]
E pelā mo Tavita, e se mafai ne tatou o lau aka a galuega fakaofoofogia katoa a Ieova
[Ata i te itulau e 14]
Ne maua ne te lafu mamoe a te Atua a mea aogā mai i ‵fuliga ‵fou i fakatokaga a te fakapotopotoga i te taimi tonu