Te Ola i se Koga Fakamataku
“E mafai o fakamataku so se mea e fai sāle ne koe i aso katoa—e aofia foki i ei a te moe.”—Te mekesini ko te Discover.
KO OTI ne fakatusa aka te olaga nei ki te sasale atu i se koga telā e uke a paula e tanu i ei. E mafai o pakia fakafuasei io me e mate fakafuasei se tino i so se taimi. E kese‵kese te fakama‵taku o nisi atufenua. E aofia i ei ko fe‵pakiga o motokā, taua, oge meakai, te SELAMETE, te ‵kenisa, te fatu vāivāi, mo te fia foki o nisi mea aka. E pelā mo te feitu ki saute o te Sahala i Afelika, e sili atu te tokouke o tino e ‵mate sāle i te SELAMETE i lō so se isi mea aka. I se tausaga e tasi fakamuli nei “e toko 2.2 miliona ne ‵mate i ei, kae e sili fakasefulu atu te aofaki tenā i lō te aofaki o tino kolā ne ‵mate atu i taua katoa i Afelika,” e pelā mo te fakamatalaga a te U.S.News & World Report.
Kae e fakamāumāu faeloa ne te lalolagi i aso nei a te fia piliona tālā i te taumafaiga ke fakaleva atu a olaga o tino kae ke fakafeoloolo aka i ei te fakama‵taku o masaki mo pa‵kiaga. E ‵lei faeloa te ukega o manatu kolā e fakasalalau sāle atu e pelā mo te manatu ke fakaeteete tatou i mea kolā e ‵kai kae inu tatou ki ei kae ke fai sāle foki ne tatou a fakamalosiga i te feitu faka-te-foitino. E isi ne mea aogā e mafai o maua i mea konā. Kae e isi aka foki se isi māfuaga o fakamatalaga e mafai o fakatuaga tatou ki ei e uiga ki vaega tāua katoa o te olaga nei kae e mafai o fesoasoani atu i ei ki a koe ke momea aka te tokagamalie o tou olaga. Ko te Tusi Tapu tenā. E
maua i ei a pati fesoasoani ki te fia o mea e manava‵se sāle tatou ki ei e uiga ki ‵tou malosi mo ‵tou manuia. E tonu, e se faipati te Tusi Tapu ki tamā fakalavelave katoa. Kae e tuku mai eiloa i ei a fakatakitakiga aogā ke puipui ei tatou i vaegā mataupu pelā mo te kai, te malosi o te foitino, kilokiloga ‵lei, faifaiga fakatauavaga, te fakaaogāga o te kava, te paka, mo vailakau fakafiafia, penā foki loa mo te fia o nisi mea aka.
E manava‵se faeloa te tokoukega o tino ki mea tau tupe. Kae e fesoasoani mai foki te Tusi Tapu i te feitu tenā. E se gata fua i te fakamalosi mai ki a tatou ke fakaeteete i te fakaaogāga o ‵tou tupe kae e fakaasi mai foki i ei me e mafai pefea o ‵lei atu a amioga a se tino e pelā me se tino galue io me se pule. A te ‵tonuga loa, e se gata fua te aogā o te Tusi Tapu i mea tau tupe mo te malosi faka-te-foitino, kae e aogā malosi foki te tusi tenā ki te olaga kātoa. E mata, e fia iloa ne koe me e pefea te lasi o te aogā o te Tusi Tapu i aso nei? Kafai e penā loa, ke na faitau koe ki nisi tala konei.