Mea Kolā ne ‵Tupu ki Fāfine Tokolua i te ‵Matega o Lā Avaga

E NOFO Sanitela, telā ko mate tena avaga, i Ausetalia. I te taimi ne mate ei tena avaga, i nai tausaga ko ‵teka atu, ne poi masei a Sanitela. “I te taimi ko iloa ei ne au me ko galo atu taku avaga telā ko toku taugasoa pele, ne fanoanoa malosi au. E se masaua fakalei ne au me ne faimalaga atu au pefea mai te fa‵kaimasaki ki toku fale mo mea foki ne fai ne au i te aso kātoa tenā. I vaiaso mai tua ifo i ei, ne fai ei toku poi ke ‵mae valevale toku foitino.”

E isi foki se taugasoa o Sanitela telā e matua atu i a ia, ko Elani. Ne mate tena avaga i te ono tausaga ko ‵teka atu. Ne tausi faka‵lei ne Elani tena avaga, ko Tavita mō masina e ono a koi tuai o mate a ia i te kenisa. Ne fanoanoa malosi a ia i te mate o tena avaga kae mai tua ifo i ei ne ‵kivi ona mata mō se vaitaimi toetoe. I te lua tausaga mai tua ifo i ei ne matapō tou fafine i te auala. E seai se masaki faka-te-foitino ne maua ne tena tokita i a ia. Kae ne iloa fakamuli ne te tokitā me ne fa‵ki fua ne Elani a tena fanoanoa, kae ne fakamalosi aka ne ia tou fafine ke fanatu ki te fale kae ke tagi malosi a ia i ei. “Ko leva ‵ki kae ne kamata o galo atu toku fanoanoa.” Ne fai mai Elani me i taimi kolā ne fanoanoa malosi a ia i te nofo tokotasi, “e masani au o fano ki te potu moe kae kofu toku ulu ki gatu o Tavita.”

E tonu, e uke ‵ki a mea kese‵kese e mafai o tupu ki te tino ona ko te mate o se avaga pele me e uke atu a mea e aofia i ei i lō te galo atu o te avaga tagata. E pelā mo Sanitela, ne seki malamalama a ia i ana lagonaga mō se vaitaimi. Ne mataku a ia kae ne manavase, e pelā mo nisi fafine e tokouke kolā ne fatoā ‵mate atu olotou avaga. Ne fai mai a Sanitela penei: “Ona ko te mea ne fai faeloa ne taku avaga a mā filifiliga, se mea fakapoi me e ‵tau mo au o fai tokotasi a vaegā filifiliga penā. Ne se ti tō sāle taku moe. Ne fi‵ta au kae vāivāi. Ne seki iloa ne au me ne a aku mea e ‵tau o fai.”

A vaegā mea kolā ne tupu ki a Sanitela mo Elani e tupu foki ki nisi fafine e tokouke i aso takitasi i te lalolagi kātoa. Ko gasolo o tokouke a fafine ko ‵mate olotou avaga ona ko masaki, mea ‵tupu fakafuasei, taua, tamatega o tino mai i nisi matakaiga mo fakasauāga.a E fa‵ki fua te tokoukega o fafine konā i te logo‵mae me e se iloa ne latou a mea kolā e ‵tau o fai. Ne a mea e mafai o fai ne olotou taugasoa mo olotou kāiga ke fesoasoani atu ki tino kolā ne fatoā ‵mate olotou avaga? E isi ne manatu aogā i te mataupu telā e soko mai ke fesoasoani atu i te feitu tenā.

[Fakamatalaga mai lalo]