Ko ‵Saga Tonu Mai a “Tino Loto ‵Lei”

“A tino loto ‵lei kolā ne mafai o maua te ola se-gata-mai ne fai pelā me ne tino tali‵tonu.” —GALUEGA 13:48, NW.

1, 2. Ne ‵saga atu pefea a Kelisiano i aso mua ki te valoaga a Iesu me ka folafola atu a te tala ‵lei ki te lalolagi kātoa?

E FAKAMATALA mai i te tusi ko Galuega i te Tusi Tapu, a tala ‵gali e uiga ki te auala ne ‵saga atu ei a Kelisiano i aso mua ki te valoaga a Iesu, me ka folafola atu a te tala ‵lei o te Malo ki te lalolagi kātoa. (Mataio 24:14) Ne tuku mai ne tino talai loto finafinau se fakaakoakoga mō tino katoa kolā ka tau‵tali atu i a latou. Ona ko te talaiga loto finafinau ne fai ne soko o Iesu i Ielusalema, ne ualolo mai se fia afe o tino e aofia i ei a ‘faitaulaga e tokouke,’ ki loto i te fakapotopotoga i te senitenali muamua.—Galuega 2:41; 4:4; 6:7.

² Ne fesoasoani atu a misionale i aso mua ki tino e tokouke ke talia ne latou a te Lotu Kelisiano. E pelā mo Filipo, ne fano a ia ki Samalia kae ne fakalogo‵logo a tino e tokouke ki ana pati. (Galuega 8:5-8) Ne faima‵laga atu a Paulo mo ana taugasoa ki koga e uke o folafola atu te fekau faka-Kelisiano i Kupelu, nisi kogā koga o Asia Foliki, Maketonia, Eleni mo Italia. I fa‵kai kolā ne talai atu a ia i ei, e tokouke a tino Iutaia mo tino Eleni ne tali‵tonu. (Galuega 14:1; 16:5; 17:4) Ne talai atu foki a Tito i Keleta. (Tito 1:5) Ne fakalavelave malosi a Petelu i Papelonia, kae i te taimi ne tusi ei ne ia tena tusi muamua, kāti i te 62-64 T.A., ko lauiloa i ei a te galuega Kelisiano i Pono, Kalatia, Kapatokia, Asia mo Pitunia. (1 Petelu 1:1; 5:13) Ma‵faga o taimi fakafia‵fia a taimi konā! Ona ko te loto finafinau o tino talai Kelisiano konā i te senitenali muamua, ne fai ei olotou fili me i a latou ne tino “fakatupu fakalavelave i koga katoa.”—Galuega 17:6; 28:22.

3. Ne a ikuga ko maua ne tino talai o te Malo i aso nei i te faiga o te lotou galuega talai, kae e pefea ou lagonaga e uiga ki ei?

³ I aso nei, ko gasolo eiloa ki mua a te fakapotopotoga Kelisiano. E mata, e se maua ne koe te loto malosi māfai ko faitau koe ki te lipoti o Molimau a Ieova i te tausaga kātoa kae ke lavea atu a ikuga o te galuega i te lalolagi kātoa? E mata, e se se mea fakafiafia ke iloa atu me ne fai ne tino talai o te Malo a akoga faka-te-Tusi Tapu e sili atu mo te ono miliona i te tausaga faka-te-taviniga ko te 2007? E se gata i ei, e fakaasi mai i te aofaki kolā ne ‵kau atu ki te Fakamanatuga o te mate o Iesu Keliso i te tausaga ko teka, me e nofo ki se sefulu miliona o tino kolā e se ne Molimau a Ieova ne fakaasi mai ne latou te fiafia ki te tala ‵lei mai te lotou ‵kau atu ki te fakamanatuga tāua tenei. E fakaasi mai i te mea tenei me koi uke ‵ki eiloa a galuega e ‵tau fai.

4. Ko oi a tino e ‵saga tonu atu ki te fekau o te Malo?

⁴ I aso nei, e pelā eiloa mo te senitenali muamua, “a tino loto ‵lei kolā ne mafai o maua te ola se-gata-mai” ko ‵saga atu nei ki te fekau o te munatonu. (Galuega 13:48, NW) Ko fakamaopoopo mai eiloa ne Ieova a vaegā tino penā ki tena fakapotopotoga. (Faitau te Hakai 2:7.) Se a te kilokiloga e ‵tau o maua ne tatou e uiga ki te galuega faka-Kelisiano, ko te mea ke fai faka‵lei te galuega ki te fakamaopoopomaiga o tino?

Talai e Aunoa mo te Fakailoga Tino

5. Ko vaegā tino pefea e maua ne latou te taliaga a Ieova?

⁵ Ne malamalama a Kelisiano i te senitenali muamua me “i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.” (Galuega 10:34, 35) E ‵tau o fakatuanaki se tino ki te taulaga togiola a Iesu ko te mea ke maua ne ia se fesokotakiga ‵lei mo Ieova. (Ioane 3:16, 36) Kae, ko te loto eiloa o Ieova ko te mea “ke ola tino katoa, ka ke iloa foki ne latou te munatonu.”—1 Timoteo 2:3, 4.

6. Se a te mea e se ‵tau o fai ne tino talai o te Malo, kae kaia?

⁶ Se mea sē ‵lei mō tino talai o te tala ‵lei ke fakamasino ne latou a tino ona ko olotou fenua, tulaga, foliga, tulaga faka-lotu io me ko nisi mea aka. Ke mafaufau aka la: E mata, e se loto fakafetai koe me ne seki fakailoga tino a te tino telā ne faipati muamua atu ki a koe e uiga ki muna‵tonu mai te Tusi Tapu? Tela la, kaia e taofi ei ne koe a te tuku atu o se fekau fakaola tino telā e mafai o fakasao ne ia se tino telā e fakalogologo mai?

7. Kaia e ‵tau ei o ‵kalo keatea tatou mai te fakamasino atu a tino kolā e talai tatou ki ei?

⁷ Ko oti ne fakasopo ne Ieova a Iesu e pelā me se Famasino; tela la, e seai se aiā o tatou ke fakamasino ne tatou a so se tino. E fetaui ‵lei te mea tenei, me e ‵kese mo Iesu—e fakamasino fua ne tatou a tino e ‵tusa mo “olotou foliga” io me “ko muna faipati a latou,” kae ko Iesu e iloa ne ia a mafaufauga o te tino mo mea i tena loto.—Isaia 11:1-5; 2 Timoteo 4:1.

8, 9. (a) A Saulo se vaegā tino pefea mai mua o fai a ia pelā me se Kelisiano? (e) Se a te mea e akoako mai ne te tala o Paulo ki a tatou?

⁸ Ko fai nei a tino mai matakāiga kese‵kese mo fai ne tavini a Ieova. Tasi o fakaakoakoga gali ko Saulo mai Taso, telā ne lauiloa fakamuli e pelā me ko te apositolo ko Paulo. Ne ‵teke malosi a Saulo, telā se Falesaio, ki Kelisiano. Ona ko tena talitonu me i tino konei e se ne tino tapuaki ‵tonu o Ieova, ne iku atu ei ki te fakasauā ne ia te fakapotopotoga Kelisiano. (Kalatia 1:13) Mai te kilokiloga a tino, kāti e se mafai o fai a ia mo fai se Kelisiano. Kae, ne lavea ne Iesu se mea ‵lei i te loto o Saulo kae ne filifili ei a ia ke fai ne ia se galuega fakapito. Ona ko te mea tenā, ne fai ei a Saulo e pelā me se tino galue malosi kae loto finafinau o te fakapotopotoga Kelisiano i te senitenali muamua.

⁹ Se a te mea e akoako mai ne te tala o te apositolo ko Paulo? Kāti e isi ne tino i ‵tou koga talai kolā e ‵teke malosi ki te fekau telā e folafola atu ne tatou. E ui eiloa e fakalotolotolua tatou ki te mafai o fai se tino i a latou e pelā me se Kelisiano tonu, e se ‵tau eiloa o ‵fiu tatou i te fakasakosako atu mo latou. I nisi taimi, e ‵saga tonu mai eiloa a tino kolā ne mafaufau koe me e se fia‵fia. E se ‵tau eiloa mo tatou o ‘fakagata’ a te ‵tou galuega ko te talai atu ki tino katoa.—Faitau te Galuega 5:42.

Fakamanuiaga e Maua ne Tino Kolā e se ‘Fakagata’ te Lotou Talai Atu

10. Kaia e se ‵tau ei o taofi aka te ‵tou talai atu ki tino kolā e foliga fakama‵taku? Fakamatala mai se tala i te koga e nofo ei koe.

¹⁰ E mafai eiloa o faka‵segina tatou ne foliga i tua. Ne kamata o sukesuke a Ignacioa ki te Tusi Tapu fakatasi mo Molimau a Ieova i te taimi koi ‵pei ei a ia ki te falepuipui i se fenua i Amelika ki Saute. Ne ma‵taku a tino ki a ia ona ko tena uiga fakasauā. Tela la, ne fakaaogā sāle ne nisi pagota kolā ne faite kae fakatau atu olotou mea ki nisi pagota, a Ignacio ke ‵tae mai ne ia a kaitalafu a nisi tino kolā ne fui ‵tina mai olotou kaitalafu. Kae, i te taimi ne gasolo ei ki mua te akoga a Ignacio kae fakagalue foki ne ia ana mea ne tauloto, ne ‵fuli a te tino fakasauā tenei ke fai pelā me se tino alofa. E seai nei se tino koi fakaaogā ne ia tou tagata ke ‵tae mai a kaitalafu mai nisi tino, kae e loto fiafia eiloa a Ignacio me ne ‵fuli ne muna‵tonu mai te Tusi Tapu fakatasi mo te agaga o te Atua a ana uiga. E loto fiafia foki a ia ona ko te se fakailoga tino o tino o te Malo kolā ne taumafai ke fai tena akoga.

11. Kaia e foki‵foki atu faeloa tatou o āsi ki nisi tino?

¹¹ A te pogai e tasi e tumau ei tatou i te foki‵foki atu o āsi ki tino kolā ko oti ne fai‵pati muamua ki ei e uiga ki te tala ‵lei, me e mafai o mafuli‵fuli olotou fakanofonofoga mo faifaiga. Talu mai te ‵toe taimi ne āsi atu tatou ki ei, kāti ne pokotia malosi a nisi tino ona ko masaki malosi, ne fakatea mai tena galuega, io me ko te galo atu o sena tino pele i te mate. (Faitau te Failauga 9:11.) E fai ne mea ‵tupu i te lalolagi ke mafau‵fau faka‵lei a tino ki olotou olaga i aso mai mua. A vaegā mea penā e mafai o fai ei se tino telā ne seki fia saga muamua mai—io me ne ‵teke malosi—ke saga tonu mai. Tela la, e se ‵tau o taofi aka ne tatou a te folafolaatuga o te tala ‵lei ki nisi tino i so se taimi.

12. E ‵tau o pefea te ‵tou kilokiloga ki tino kolā e talai atu tatou ki ei, kae kaia?

¹² A te fakavasegaga mo te fakamasino atu o nisi tino se mea masani e fai ne tino. Kae e kilo eiloa a Ieova ki tino taki tokotasi. E lavea ne ia a mea kolā e mafai o fai ne tino taki tokotasi. (Faitau te 1 Samuelu 16:7.) E ‵tau foki o kausaki tatou o fai te mea tenā i ‵tou galuega talai. E fakaasi mai i tala e uke a ikuga kolā e maua mai te mauaga o se kilokiloga ‵lei ki tino katoa kolā e talai atu tatou ki ei.

13, 14. (a) Kaia ne maua ei ne se paenia se kilokiloga sē ‵lei ki se fafine ne fetaui mo ia i te galuega talai? (e) Se a te mea e mafai o tauloto ne tatou mai te tala tenei?

¹³ Ne fanatu a Sandra, se paenia, ki te galuega talai mai fale ki fale i se fenua e tasi i te Caribbean kae fetaui i ei mo Ruth, telā ne aofia malosi i fakamanatuga fakalotu. Ne sili fakalua a Ruth i vaegā fakamanatuga penei. Ne fiafia malosi eiloa a ia ki te talaiga a Sandra, telā ne fakatoka ei ke fai se akoga faka-te-Tusi Tapu. Ne fai mai ne Sandra a mea kolā ne masaua ne ia: “I te taimi ne ulu atu ei au ki tena potu alaala, ne lavea ne au te ata lasi ‵ki o Ruth i ana togiga, e pelā foki mo failoga ne maua ne ia. Ne fakaiku aka ne au mo te ‵se me e se mafai o fiafia tonu ki te munatonu se tino telā e fiafia malosi ki vaegā fakamanatuga penā. Telā ne seki toe āsi atu eiloa au ki a ia.”

¹⁴ Fakamuli ifo, ne fanatu a Ruth ki te Kingdom Hall, kae i te otiga o te fakatasiga, ne fesili atu tou fafine ki a Sandra, “Kaia ne seki toe fanatu ei koe o fai taku akoga?” Ne fakatoese atu a Sandra kae ne fakatoka ei ke toe faka‵soko tena akoga. Ne gasolo vave eiloa a Ruth ki mua, ne ave keatea ne ia ana ata mai fakamanatuga konā, ne kamata o kau atu ki fakatokaga katoa a te fakapotopotoga, kae tuku atu tena ola ki a Ieova. E tonu, ne iloa aka ne Sandra te ‵se o tena kilokiloga i te taimi muamua.

15, 16. (a) Se a te mea ne iku mai i te talaiatuga a se tino talai ki sena kāiga? (e) Kaia e se ‵tau ei o faka‵tuka mai ki a tatou a te auala ne tupu aka ei se tino i ‵tou kāiga ke se talai atu ki a ia?

¹⁵ E isi foki ne ikuga ‵gali ne maua mai tino e tokouke kolā ne talai atu ki kāiga sē tali‵tonu, faitalia me foliga mai me se fia‵fia latou. Ke mafaufau ki te tala o Joyce, se tuagane Kelisiano i te Iunaite Sitete. Ne ‵pei fakafia te avaga a tena taina ki te falepuipui kae koi talavou a ia. “Ne fai sāle a tino me ko seai se aogā o tena olaga,” ko pati a Joyce, “me ne fakaaogā ne ia a vailakau tapu, se tino kaisoa, kae fai foki ne ia a nisi mea ma‵sei e uke. Kae ui ei, faitalia a fakalavelave e fepaki mo ia, ne tumau eiloa au i te fakaasi atu ki a ia a muna‵tonu mai te Tusi Tapu i tausaga e 37.” Ne fakamanuia eiloa ana taumafaiga kolā ne fai mo te loto kufaki ke fesoasoani atu ki tena kāiga tenā, i te taimi ne kamata ei o fai tena akoga mo Molimau a Ieova, kae fai a fakama‵fuliga ‵lasi ki tena olaga. Fakamuli fua nei, i te taimi ko 50 ei ana tausaga, ne papatiso ei te avaga a te taina o Joyce i se fono lasi telā ne fai i California, U.S.A. Ne fai mai a Joyce: “Ne tagi au mo te fiafia. Ne fiafia ‵ki au me ne seki ‵fiu eiloa au i te talai atu ki a ia!”

¹⁶ Kāti ka se fia faipati atu koe ki ou nisi kāiga e uiga ki muna‵tonu mai te Tusi Tapu ona ko te ma‵losi o aula ne ‵tupu aka ei latou. Kae, ne seki taofi aka a Joyce ne te kilokiloga tenā mai te faipati atu ki te avaga a tena taina. A te tonuga loa, e mafai pefea o iloa ne te suā tino a mea i te loto o te suā tino? Kāti e salasala malosi eiloa a te tino tenā mo te loto fakamaoni ki muna‵tonu fakalotu. Tela la, ke se fakatuai eiloa koe i te tukuatuga ki a ia a te avanoaga ke maua ne ia te mea tenā.—Faitau te Faataoto 3:27.

Se Tusi Fesoasoani Magoi

17, 18. (a) Ne a mea e fakaasi mai i lipoti i te lalolagi e uiga ki te tāua o te tusi ko te Ne a Mea e Akoako ‵Tonu Mai i te Tusi Tapu? (e) Ne a au tala fakamalosi loto e uiga ki te fakaaogāga o te tusi tenei?

¹⁷ E fakaasi mai i lipoti mai fenua kese‵kese i te lalolagi me e tokouke a tino loto ‵lei e fia‵fia ki te tusi fesoasoani faka-te-Tusi Tapu ko te Ne a Mea e Akoako ‵Tonu Mai i te Tusi Tapu? Ne kamata ne Penni, se paenia i te Iunaite Sitete, a akoga e uke mai te fakaaogāga o te tusi tenei. E tokolua mai i a latou konei ne tino ma‵tua kolā e ma‵losi ‵ki i lā lotu. Ne seki iloa ne Penni me ka ‵saga atu pefea laua ki muna‵tonu mai te Tusi Tapu kolā ne fakaasi mai i te tusi ko te Akoakoga a te Tusi Tapu. Kae ui ei, ne tusi mai tou fafine, “Ona ko te manino, te ‵tonu mo te faigofie o te auala ne tusi mai ei a fakamatalaga i ei, ne faigofie ke talia ne laua a mea kolā ne tauloto laua ki ei e pelā me ko te munatonu, e aunoa mo te kinau mai io me fanoanoa.”

¹⁸ Ne kamata ne Pat, se tino talai i Peletania, se akoga faka-te-Tusi Tapu mo se fafine telā ne aofia i tino fakaa‵lofa kolā ne aumai mai se fenua i Asia. Ne faimālō atu ki te fafine tenā ke tiakina tena fenua mai tua o te pukega o tena avaga mo ana tama tāgata ne sotia ‵teke, kae ne seki toe fetaui eiloa latou. Ne oko atu tena ola ki se tulaga fakamataku, ne ‵sunu tena fale, kae ne pukemālō foki a ia ne nisi tāgata. Ona ko mea konei, ne mafaufau tou fafine me ko seai se aogā o te olaga, kae ne taumafai fakafia tou fafine o fakamate. Kae ne maua ne ia se fakamoemoega mai tena akoga faka-te-Tusi Tapu. “Ne magoi ‵ki eiloa a te faigofie o fakamatalaga mo tala fakatusa i te tusi ko te Akoakoga a te Tusi Tapu ki a ia,” ko pati a Pat i tena tusi. Ne gasolo vave atu te tino akoga tenā ki mua, ne talia ke fai pelā me se tino talai seki papatiso, kae ne fakaasi mai foki tena loto fiafia ke papatiso i te suā fono. Ma‵faga o mea fakafiafia ke fesoasoani atu ki tino loto ‵lei ke malamalama kae loto fakafetai ki te fakamoemoega telā ne fakaasi mai i te Tusi Tapu!

Ke “se ‵Fiu Tatou i te Fai o Mea ‵Lei”

19. Kaia e tāua ‵ki ei te faiga o te galuega talai?

¹⁹ I te ‵tekaga o aso takitasi, e gasolo aka faeloa te tāua o te tiute o tatou ke talai kae fai a soko. E ‵saga atu a te fia afe o tino loto ‵lei ki ‵tou talaiga i tausaga katoa. Kae, ko “te aso fakamataku o [Ieova] ko pili – ko pili mai eiloa,” ko tena uiga ko “takasese atu eiloa ki te mate” a tino kolā e tumau i te pouliga i te feitu faka-te-agaga.—Sefanaia 1:14; Faataoto 24:11.

20. Se a te mea e ‵tau o fakaiku aka ne tatou taki tokotasi ke fai?

²⁰ Koi mafai eiloa o fesoasoani atu tatou ki vaegā tino penā. Kae ko te mea ke fai ne tatou te mea tenā, se mea tāua ke fakaakoako atu tatou ki Kelisiano i te senitenali muamua, kolā ne “se mafai eiloa o gata te lotou akoako atu kae lauga atu ki tino e uiga ki a Iesu te Keliso.” (Galuega 5:42) Tau‵tali atu i te lotou fakaakoakoga mai te kufaki i mea faiga‵ta, te ‵saga tonu atu ki tou “atamai i te akoako atu,” mo te talai atu ki tino katoa e aunoa mo te fakailoga tino. Ke “se ‵fiu tatou i te fai o mea ‵lei,” me kafai e kufaki tatou, ka tau eiloa ne tatou a fakamanuiaga e uke.—2 Timoteo 4:2; faitau te Kalatia 6:9.

[Fakamatalaga mai lalo]

Ka Tali Mai Koe Pefea?

• Ko oi e ‵saga tonu atu ki te tala ‵lei?

• Kaia e ‵tau ei o ‵kalo keatea tatou mai te fakamasino atu a tino kolā e talai atu tatou ki ei?

• Ne a ikuga e maua ne tatou ona ko te tusi ko te Ne a Mea e Akoako ‵Tonu Mai i te Tusi Tapu?

[Ata i te itulau e 17]

Ko ‵saga tonu mai a te fia afe o tino loto ‵lei

[Ata i te itulau e 19]

Ne a mea e tauloto ne tatou mai fakama‵fuliga ne fai ne te apositolo ko Paulo?

[Ata i te itulau e 20]

E se fakamasino ne tino talai o te tala ‵lei a tino