Auala Aogā ke Faka‵noga Aka ei te Manavase
“O‵mai ki a au a koutou katoa kola e fi‵ta i te ‵mafa otou amoga, me ka avatu ne au ki a koutou a te malologa.”—MATAIO 11:28.
KĀTI e ‵lago koe ki te manatu me e masei māfai ko tō uke a mea e manava‵se ki ei; e iku atu i ei ki logo‵maega. E fakaasi mai i te Tusi Tapu me e taotaomaki a tino ne fakalavelave, tela la, ko fakatali‵tali a te tokoukega o tino ki te fakaseaiga o mea e manava‵se ki ei i te olaga. (Loma 8:20-22) Kae e fakaasi mai foki i te Tusi Tapu a te auala e mafai ei o maua ne tatou a faka‵leiga e uke atu mai logo‵maega i te vaitaimi nei. E mafai o maua ne tatou a vaegā faka‵leiga penā māfai e tau‵tali atu tatou ki te fakatakitakiga mo te fakaakoakoga gali a se tagata telā ne ola i te lua afe tausaga ko ‵teka. A ia se kamuta, kae ne sili atu tena alofa ki tino i lō tena fiafia ki tena galuega. Ne otia a loto o tino i ana pati, ne tuku atu ne ia a mea kolā e ma‵nako ki ei a tino, e pelā mo te fesoasoani ki tino loto vāivāi mo te fakamafanafana atu ki tino loto fanoa‵noa. Kae e se gata fua i konā, ne fesoasoani atu foki a ia ki te tokoukega o tino ke maua ne latou a te malosi i te feitu faka-te-agaga. Ne faka‵noga aka i ei te lotou manava‵se, kae e mafai foki ne koe o fai penā.—Luka 4:16-21; 19:47, 48; Ioane 7:46.
2 A te tagata tenei, ko Iesu mai Nasaleta, ne seki tautali a ia ki akoakoga ma‵luga faka-te-lalolagi kolā e kausaki sāle ki ei a te kau Loma, Atenai mo Alexandria i aso mua. Kae ui ei, koi tumau eiloa te lauiloa o ana akoakoga. E tasi te matua o ana akoakoga konā: ko te malo telā ka pule mai ne te Atua ki te lalolagi. Ne fakamatala mai foki ne Iesu a nisi fakatakitakiga fakavae mō te olaga—ko fakatakitakiga kolā e aogā ‵tonu eiloa i aso nei. Ka mafai o maua ne latou kolā e tau‵loto kae e tau‵tali ki akoakoga a Iesu a mea aogā i te taimi eiloa tenā, kae e faka‵noga aka foki i ei te manava‵se. E fia maua ne koe a mea aogā konā, i ne?
3 Kāti e fakalotolotolua koe i te fakamatalaga tenā. ‘E mata, e mafai o aogā ki toku olaga i aso nei a te tino telā ne ola i te fia tausaga ko ‵teka atu?’ Ke na fakalogologo la ki te ‵kamiga a Iesu i ana pati ‵gali konei: “O‵mai ki a au a koutou katoa kola e fi‵ta i te ‵mafa otou amoga, me ka avatu ne au ki a koutou a te malologa. Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga. Me amogofie taku amoga, kae māmā foki.” (Mataio 11:28-30) Se a te mea ne fakauiga a ia ki ei? Ke na iloilo faka‵lei aka ne tatou a pati konā ko te mea ke iloa aka te auala ke faka‵noga aka ei te manava‵se.
4 Ne faipati atu a Iesu ki tino kolā e loto naunau ke tau‵tali ki te tulafono kae ko fi‵ta i te ‘‵mafa o olotou amoga’ me ko fai ne takitaki Iutaia a lotu e pelā me se amoga ‵mafa ki tino. (Mataio 23:4) Ne ‵saga atu latou ki te faiga o tulafono valevale mō feitu kese‵kese o te olaga. E mata, ka manavase faeloa koe māfai e fai atu “me e se ‵tau o” fai te mea tenei io me ko te mea tenā? E ‵kese mai i te faiga tenā, ne takitaki ei ne te ‵kamiga a Iesu a tino ki te munatonu, te amiotonu, ki se olaga ‵lei mai te fakalogo‵logo ki a ia. E tonu, ko te mea ke iloa ne tatou a te Atua tonu, e aofia i ei ko te ‵saga tonu atu ki a Iesu Keliso, me e auala i a ia e mafai ei o maina a tino me i a Ieova se vaegā Atua pefea. Ne fai mai a Iesu: “Ko te tino ko kilo ki a au, ko kilo foki ki te Tamana.”—Ioane 14:9.
E Mata, e Uke a Mea Faiga‵ta i Tou Olaga?
5 Kāti ko manavase malosi koe ki te feitu tenei me e se taumate, e fai tau galuega ‵togi mo te tulaga o tou kāiga mo fai se tiute ‵mafa ki a koe. Io me kāti ka fakafi‵ta atu foki ki a koe a nisi tiute. Kafai e penā loa, ko ‵pau ei koe mo tino fakaa‵lofa kolā ne fetaui mo Iesu kae ne fesoasoani atu a ia ki ei. E pelā me se fakaakoakoga, ke mafau‵fau ki te faigata o mea tau tupe i te olaga nei. E faigata ki tino e tokouke i aso nei me e se lava olotou sene, kae e penā foki eiloa a tino e tokouke i taimi o Iesu.
6 I aso konā, e galue malosi se tagata mō itula e 12 i te aso, i aso e 6 i te vaiaso, kae e masani o maua ne ia e tasi te tenali mō te aso kātoa. (Mataio 20: 2-10) E ‵pau pefea a te peofuga tenā mo tou peofuga i te vaitaimi nei io me ko peofuga o ou taugasoa? Se mea faigata ‵ki eiloa ke faka‵pau aka a peofuga o te kau i aso mua mo aso nei. A te auala e tasi ko te mafaufau ki mea kolā e mafai ne koe o ‵togi mai ki tou peofuga. E fai mai penei se tagata poto e tokotasi me i aso o Iesu a te falaoa e tasi telā e ‵fete mai i ipu falaoa e fa e ‵pau tena ‵togi mo te peofuga o te tino i te itula e tasi. Kae e fai mai foki a te suā tagata poto e tokotasi me i te ipu uaina ‵lei e ‵pau tena ‵togi mo te peofuga o te tino i itula e lua. Tela la, ko lavea ne tatou me ne ga‵lue fi‵ta a tino i aso mua mō te fia o itula ko te mea ke tausi atu ki te lotou olaga. Ne manakogina ne latou a fakamalosiga mo te tokagamalie o olotou mafaufau, e penei loa mo tatou. Kafai e maua ne koe se galuega ‵togi, kāti ko taotaomaki koe i te uke o au mea e ‵tau o fai i ei. E pelā mo te masani, e se maua sāle ne tatou a taimi ke mafau‵fau faka‵lei ki ‵tou fakaikuga. Kāti ka taku ‵tonu mai ne koe me e manako malosi koe ki se fesoasoani.
7 E manino ‵lei, me ne ‵tagi gali ‵ki a te ‵kamiga a Iesu ki a latou kolā e “fi‵ta i te ‵mafa o [olotou] amoga” ki tino fakalogo‵logo i aso konā. (Mataio 4:25; Maleko 3:7, 8) Kae ke masaua ne koe me ne toe fakaopoopo mai penei a te tautoga a Iesu, “Ka avatu ne au ki a koutou a te malologa.” E aogā foki eiloa a te tautoga tenā ki a tatou i aso nei. E mafai o aogā ki a tatou māfai ko ‘fi‵ta tatou i te ‵mafa o ‵tou amoga.’ E mafai foki o aogā ki ‵tou tino pele, kolā e tai ‵pau olotou tulaga.
8 E isi foki ne nisi mea kolā e fai pelā me ne amoga ‵mafa ki tino. A te putiakaga o tama‵liki se matugā mea faigata ‵ki eiloa. E faigata foki te olaga o tama‵liki. Ko fanaka nei ki luga te aofaki o tino mai tupulaga kese‵kese kolā e fe‵paki mo fakalavelave i feitu tau te mafaufau mo masaki. Kae e ui eiloa e mafai ne tino o ola leva, e fe‵paki a tino ma‵tua mo nisi fakalavelave kolā e oko atu ki a latou faitalia a tulaga ‵lei i mea tau vailakau.—Failauga 12:1.
Ke Amo te Amoga
9 E lavea ne koe me i pati kolā ne siki mai i te Mataio 11:28, 29 ne fai mai a Iesu, penei: “Ke amo ne koutou taku amoga, kae fakaakoako mai ki a au.” Kāti ne oko atu ki se tagata i aso mua a te lagonaga me e ‵mafa tena amoga. I aso mua, kafai e sau aka se amoga telā ne faite ki lakau ki ua o tino, e fai te mea tenā e pelā me se fakamailoga me i te tino tenā se pagota io me se pologa. (Kenese 27:40; Levitiko 26:13; Teutelonome 28:48) A te tokoukega o tino ga‵lue kolā ne fetaui mo Iesu e amo ne latou a tinā amoga i olotou tuauma. Kafai e mafau‵fau tatou ki te auala ne faite ei a te amoga, nisi taimi e se ‵mafa malosi māfai ko sau aka i te ua mo tuauma o tino, kae i nisi taimi e mafai o faka‵pasa i ei olotou ua mo tuauma. E pelā me se kamuta, e se taumate ne faite foki ne Iesu a amoga, kae kāti ne iloa foki ne ia o faite se amoga telā e “amogofie.” E se taumate ne faka‵piki ne ia a pakili o manu io me ko laugatu ki kogā koga kolā e pa‵tele ki te ua mo tuauma ko te mea ke fai ei a te amoga ke amogofie.
10 I te taimi ne fai atu i ei a Iesu, penei, “Ke amo ne koutou taku amoga,” kāti ne fakatusa ne ia a ia eiloa ki se tino telā e tuku mai ne ia a amoga kolā ne fai faka‵lei ko te mea ke amogofie i te ua mo tuauma o te tino galue. E se gata i ei, ne toe fakaopoopo mai a Iesu, penei: “Kae māmā foki [taku amoga].” E fakaasi mai i konei me e se se mea masei ke fakaaogā a te amoga, kae e se fakafi‵ta foki ki te galuega. E tonu, a te ‵kamiga a Iesu ke talia ne tino fakalogo‵logo a tena amoga, e se ko te tukuatuga ne ia ki a latou a te saolotoga mai tulaga faiga‵ta katoa i te taimi eiloa tenā. Kae ui i ei, a manatu kese‵kese kolā ne tuku mai ne ia ka mafai o maua mai ei a te matugā malōlōga ki a tatou. A te fakama‵fuliga o olotou olaga mo te auala e fai ei ne latou a mea ka tuku mai ei a mea aogā ki a latou. Kae ko te ‵toe mea tāua, a te mauaga o se fakamoemoega mautinoa ka fesoasoani mai ei ke maua se olaga sē fakafi‵ta.
E Mafai o Maua ne Koe a te Malōlōga
11 Ke masaua me e seki fai mai a Iesu me ka sui se amoga e tasi ki se isi amoga aka. Koi tumau eiloa a Loma i te takitaki atu ne ia a te lotou fenua, e pelā eiloa mo te takitakiga a malo i aso nei ki fenua kolā e ‵nofo i ei a Kelisiano. Ne fakatumau eiloa a te faiga o lafoga a te kau Loma. A masaki mo fakalavelave i mea tau tupe koi tumau eiloa i te taimi tenā. Koi maua eiloa ne tino a te tulaga sē ‵lei katoatoa ona ko te agasala. Kae e mafai eiloa o maua ne latou a te malōlōga māfai e puke ‵mau latou ki akoakoga a Iesu, e pelā eiloa mo tatou i aso nei.
12 E maina tatou i te manatu tāua telā ne fakavae ki ei te tala fakatusa a Iesu e uiga ki te amoga i te faiga o te galuega talai. E seai se fakalotolotolua i ei me i te galuega tāua a Iesu ko te akoakoatuga o nisi tino kae faka‵mafa i ei a te Malo o te Atua. (Mataio 4:23) Tela la, i te taimi ne fai atu ei a ia, “Ke amo ne koutou taku amoga,” e aofia tonu i ei a te tau‵tali atu ki a ia i te faiga o te galuega tenā. E fakaasi mai ne nisi tusitusiga faka-Evagelia me ne fakamalosi atu ne Iesu a nisi tino loto fakamaoni ke tiaki olotou galuega. Se fakamafuliga lasi ‵ki eiloa ki olaga o te tokoukega o tino. Ke masaua tena kalagaga ki a Petelu, Anitelea, Iakopo mo Ioane: “O‵mai tou olo, ke fakaakoako ne au koulua ke fai mo tino faiika ki tino.” (Maleko 1:16-20) Ne fakaasi atu ne ia ki tino faiika konei a te fakamalie loto a te faiga o te galuega telā e fakamuamua ne ia i tena olaga, kae maise ko te ga‵lue mai lalo o tena takitakiga kae e fesoasoani mai i ei a ia.
13 Ne maina a nisi tino Iutaia kolā ne fakalogo‵logo ki te mea telā ne fakauiga a ia ki ei kae ne tau‵tali atu foki ki ei. Ke mafaufau la koe ki mea kolā ne ‵tupu i te tafātai telā e fai‵tau ne tatou i te Luka 5:1-11. Ne faiika a tāgata faiika e tokofa i te po kātoa kae seai eiloa se ika e tasi ne maua ne latou. Kae ‵poi aka me ko ‵fonu te lotou tili! Ne seki tupu fakafuasei a te mea tenei, kae ne iku mai ona ko faifaiga a Iesu. I te lotou ‵kiloatuga ki te tafātai ne lavea atu ei ne latou a te vaitino telā ne fia fakalogo‵logo ki akoakoga a Iesu. Ne fesoasoani atu a te mea tenā ke maina latou i pati a Iesu ki te tokofa konei: “Mai te taimi nei o fano ki mua, ka maua ne koe ne tino.” Se a te tali a latou ki te mea tenā? “Ne soso ake ne latou a poti ki uta, tiaki ei olotou mea katoa kae tau‵tali atu i a Iesu.”
14 E se taumate, e mafai foki ne koe o fai penā. Koi tumau eiloa a te galuega ko te akoakoga o tino ki te munatonu mai te Tusi Tapu. Ko kātoa nei a te ono miliona o Molimau a Ieova i te lalolagi kātoa ko oti ne talia ne latou a te ‵kamiga a Iesu “ke amo ake a [tena] amoga” ne latou; ko te faiga e pelā me ne “tino faiika ki tino.” (Mataio 4:19) E ga‵lue tumau a nisi tino i te galuega tenei, kae e taumafai malosi a nisi tino ke fakaoti olotou mafi i te faiga o te galuega tenā i olotou taimi avanoa. E maua ne tino katoa a te tokagamalie i ei, tela la, ko se uke foki a mea e manava‵se ki ei. E aofia i ei ko te faiga o mea kolā e fia‵fia latou ki ei, te faiatuga ki nisi tino a te tala ‵lei—ko “te Tala ‵Lei o te Malo.” (Mataio 4:23) Se mea fakafiafia faeloa ke sau‵tala tatou ki se tala ‵lei kae maise eiloa ko te tala ‵lei tenei. E aofia i te Tusi Tapu a akoakoga fakavae kolā e mafai o fakaasi atu ne tatou ki tino me e mafai o takitaki atu ei olotou olaga ki se olaga telā e se uke a mea e manava‵se ki ei.—2 Timoteo 3:16, 17.
15 Ke oko foki eiloa ki tino kolā ne fatoa kamata fua o tau‵loto e uiga ki te Malo o te Atua, ko oti ne maua ne latou a mea aogā mai akoakoga a Iesu e uiga ki te auala e ‵tau o ola i ei. Ko oti ne fakaasi faka‵lei mai ne te tokoukega o tino me ne maua ne latou te tokagamalie i akoakoga a Iesu kae ‵fuli foki i ei olotou olaga. E mafai foki o fakamautinoa aka te manatu tenā mai te sukesuke faka‵lei ki fakatakitakiga e uiga ki te auala e ‵tau o ola i ei kolā e fakaasi mai i te olaga mo te galuega a Iesu, kae maise ko tala kolā ne tusi i tusi Evagelia a Mataio, Maleko, mo Luka.
Te Auala ke Maua ei te Malōlōga
16 I te ‵tau e ‵somo aka i ei a lau o lakau i te 31 T.A., ne fai ne Iesu tena lauga telā koi lauiloa eiloa i aso nei. E fakaigoa sāle ki te Lauga i Luga i te Mauga. Ne tusigina ki lalo i te Mataio mataupu e 5 ki te 7 mo te Luka mataupu e 6, kae e fakatoe‵toe mai i ei ana akoakoga e uke. E mafai foki o maua ne koe ana nisi akoakoga i nisi tusi Evagelia. A te ukega o ana mea katoa kolā ne akoako mai e faigofie fua ke mafau‵fau ki ei, kae e tai faigatā eiloa o fakagalue aka. Kaia e se fai‵tau kae mafau‵fau faka‵lei ei ki mataupu konā? Ke talia ne koe a te ma‵losi o ana akoakoga ke ga‵lue aka i tou mafaufau mo au faifaiga.
17 Se mea tonu me e mafai fua o fakatoka a akoakoga a Iesu i auala kese‵kese. Ke na tuku fakatasi ne tatou a akoakoga fakavae ko te mea ke tofu a te aso mo akoakoga takitasi i te masina, mo te fakamoemoega ke fakagalue aka ne koe i tou olaga. E pefea la? Ke se faitau fakavave aka fua ki ei. Ke masaua a te tagata maumea telā ne fesili atu ki a Iesu Keliso: “Se a te mea e ‵tau o fai ne au, ke maua ne au a te ola se gata mai?” I te taimi ne fakaasi atu ei ne Iesu a akoakoga fakavae kolā e manakogina i te Tulafono a te Atua, ne tali mai tou tagata me ko oti ne tausi ne ia a mea katoa konā. Kae ne lavea aka ne ia me e manakogina ke uke atu ana mea e fai. Ne fai atu a Iesu ki a ia ke taumafai malosi o fakagalue aka a fakatakitakiga a te Atua ke mafai o fai a ia e pelā me se soko. Kae foliga mai me ne seki toka a te tagata tenei ke fai katoa ne ia a mea konei. (Luka 18:18-23) Tela la, kafai e manako se tino ke tauloto ki akoakoga a Iesu i aso nei, e manakogina ke iloa ne ia me e isi se ‵kesega i te lotomalie ki ei mo te puke ‵mau katoatoa ki akoakoga kolā e faka‵noga aka ei a te manavase.
18 Ko te mea ke kamata o suke‵suke kae fakagalue aka ne tatou a akoakoga a Iesu, ke onoono ki te manatu 1 i te pokisi. E fakasino atu i ei ki te Mataio 5:3-9. Se mea tonu me e mafai eiloa ne tatou o fakamāumāu a te ukega o ‵tou taimi ke mafaufau ‵mafa ki pati polopoloki ‵gali kolā e ‵sae mai i fuaiupu konā. Kafai e onoono tatou ki polopolokiga katoa konā, se a te mea e fakaiku aka ne tatou e uiga ki ‵tou kilokiloga? Kafai e manako malosi koe ke ‵kalo kea‵tea mai fakalavelave kolā e iku mai ona ko te manavase i tou olaga, se a te mea ka fesoasoani mai? Ka momea aka pefea te ‵lei o tou olaga māfai e saga tonu atu koe ki mea faka-te-agaga, kae mafaufau faeloa ki ei? E mata, e isi ne mea i tou olaga kolā e se ‵tau o mafaufau ‵mafa koe ki ei, ko te mea ke mafai ne koe o saga tonu atu ki mea faka-te-agaga? Kafai e fai ne koe penā, ka fakaopoopo atu i ei ki a koe a te fiafia.
19 Nei la, e isi aka foki se isi mea e ‵tau o fai. Kaia e se sau‵tala ei koulua mo se isi tavini a te Atua ki fuaiupu konā, kāti ko tau avaga, se kaiga ‵pili, io me se taugasoa? (Faataoto 18:24; 20:5) Ke masaua me ne fesili atu a te tagata maumea ki te suā tino—ko Iesu—e uiga ki se mataupu e tai ‵pau. Ne mafai ne te tali a Iesu o fakamalosi aka tena fakamoemoega ke maua ne ia a te fiafia mo te ola-se-gata-mai. Ka se ‵pau a te tino telā ka sau‵tala fakatasi mo koe ki fuaiupu konā mo Iesu, kae e aogā eiloa a te sau‵talaga e uiga ki akoakoga a Iesu ki a koulua. Ke na taumafai o fai penā.
20 Ke ‵toe onoono ki te fakasologa i te pokisi, ko te “Akoakoga ke Fesoasoani Atu ki a Koe.” Ko oti ne fakavasega faka‵lei a akoakoga konei ko te mea ke mafai o mafaufau koe ki se akoakoga e tasi i te aso. E mafai ne koe o faitau muamua ki pati kolā ne fai ne Iesu i tusi siki kolā e siki mai. Oti ei, ke mafaufau ki pati konā. Ke mafaufau ‵loto ki te auala ka fakagalue aka i ei ne koe a mea konā i tou olaga. Kafai e manatu aka koe me ko oti ne kamata o fakagalue aka ne koe a mea konā, ke ‵toe mafaufau ki nisi mea aka foki kolā e mafai o fai ke mafai ne koe o ola e ‵tusa mo akoakoga konā mai te Atua. Ke fakagalue aka ne koe a te akoakoga tenā i te aso eiloa tenā. Kafai e tai faigata ke malamalama i ei io me ke fakagalue aka ne koe a te mea tenā, ke toe saga koe ki ei i te suā aso. Ke masaua foki la me e se ‵tau o ‵lei katoatoa koe i te feitu tenā e tasi a koi tuai o saga atu koe ki te suā akoakoga. E mafai o mafaufau koe ki te suā akoakoga i te suā aso. E mafai ne koe o iloilo aka i te fakaotiga o te vaiaso au taumafaiga i te fakagaluegaga o akoakoga a Iesu kolā e fa io me e lima. E mafai o toe fakaopoopo atu ne koe a nisi akoakoga i aso takitasi i te suā vaiaso. Ke se loto vāivāi koe māfai ne seki tautali kātoatoa atu koe ki se fakaakoakoga e tasi. Ka oko atu a te mea tenā ki Kelisiano katoa. (2 Nofoaiga Tupu 6:36; Salamo 130:3; Failauga 7:20; Iakopo 3:8) Ke fai eiloa penā i te tolu mo te fa o vaiaso.
21 Kafai ko oti te masina, kāti ko oti foki ne mafaufau ‵mafa koe ki manatu e 31. Tela la, ka pefea ou lagonaga i ei? E a, ka sili atu tou fiafia i ei, io me ko tai sili atu foki tou tokagamalie i ei? Faitalia me ne gasolo malie fua koe ki mua, kae kāti e lagona eiloa ne koe me ko tai ‵noga i ei a te manavase io me kāti ko mafai ne koe o manumalo i ei, kae ko maua ne koe i ei ne fesoasoani aogā ke fai faeloa penā. Ke se puli i a koe me e uke atu a nisi manatu ‵lei o akoakoga a Iesu kolā e se aofia i te fakasologa tenei. Se mea ‵lei ke sukesuke koe ki nisi akoakoga konā kae fakagalue aka foki a mea konā, i ne?—Filipi 3:16.
22 Ko mafai o lavea atu ne tatou me e isi eiloa se amoga telā e tuku mai ne Iesu kae e māmā fua. E māmā fua te tautali atu ki ana akoakoga kae ke fai mo fai sena soko. Ne fai mai a te apositolo ko Ioane telā ko te taugasoa pele o Iesu, kae ne fakagalue aka foki ne ia a akoakoga konā mō tausaga e 60, penei: “Me e tenei te uiga o te alofa ki te Atua: ko te fakalogo ki ana fakatonuga. Ka ko ana fakatonuga e se na ‵mafa foki mo tatou.” (1 Ioane 5:3) E mafai foki o maua ne koe a te loto talitonu tenā. E ‵tusa loa mo te leva o te taimi e fakagalue aka i ei ne koe a akoakoga a Iesu, ka lavea ne koe i ei me i mea kolā e manava‵se malosi ki ei te tokoukega o tino i aso nei ka se manavase koe ki ei. Ka lavea i ei ne koe me ko ‵noga i ei tou manavase. (Salamo 34:8) Kae e se gata i ei, e isi foki a te suā mea telā e ‵tau o mafaufau ki ei e uiga ki te amoga a Iesu telā e māmā. Ne fakaasi mai foki ne Iesu i a ia e “filemu kae loto malalo.” E aofia pefea a mea konei i te ‵tou tauloto mo te ‵tou fakaakoako atu ki a Iesu? Ka onoono tatou ki te mea tenei i te suā mataupu.—Mataio 11:29.
Se a Tau Tali?
• Kaia e ‵tau ei o ‵kilo atu tatou ki a Iesu ke iloa aka ei te auala ke faka‵noga aka ei te manavase?
• E fai pefea a te amoga mo fai se fakailoga, kae kaia?
• Kaia ne ‵kami ei ne Iesu a tino ke amo aka tena amoga?
• E mafai pefea o maua ne koe a te malōlōga faka-te-agaga?
[Fesili mo te Sukesukega]
1, 2. (a) Ne a mea e fakaasi mai i te Tusi Tapu kolā e mafai o faka‵noga ei a te manavase? (e) E aogā pefea a akoakoga a Iesu?
3. Se a te ‵kamiga aogā ne tuku mai ne Iesu?
4. Ko oi a tino ne faipati atu ki ei a Iesu, kae kaia e faigata ei ke fai ne tino kolā ne fakalogo‵logo ki ei a mea kolā ne fakamolemole atu ke fai ne latou?
5, 6. E ‵pau pefea a te tulaga o peofuga o tino i aso o Iesu mo aso nei?
7. Ne ‵saga atu pefea a tino ki te fekau a Iesu?
8. E aumai pefea ne te putiakaga o tama‵liki mo te olaga matua a te manavase?
9, 10. Ne fai pefea a te amoga mo fai se fakamailoga i aso mua, kae kaia ne ‵kami mai ei ne Iesu a tino ke amo ne latou tena amoga?
11. Kaia ne seki fakamalosi atu i ei a Iesu ke fesuiaki olotou amoga?
12, 13. Se a te mea ne faka‵mafa mai ne Iesu me ka aumai i ei a te malōlōga, kae ne ‵saga atu pefea a nisi tino ki ei?
14. (a) E mafai pefea o maua ne tatou a te malōlōga i aso nei? (e) Se a te tala ‵lei ne avatu ei a te malōlōga ki tino telā ne folafola mai ne Iesu?
15. E mafai pefea o maua ne koe a mea aogā mai akoakoga a Iesu e uiga ki te olaga?
16, 17. (a) E mafai o maua ne koe i fea a nisi akoakoga fakavae a Iesu? (e) Se a te mea e manakogina ke mafai o maua ne tatou a te malologa mai te fakagalue aka o akoakoga a Iesu?
18. Ke fakamatala mai te auala e mafai o fakaaogā faka‵lei ei ne koe a te fakasologa o manatu i te pokisi.
19. Se a te mea e mafai o fai ne koe ke sili atu tou maina mo tou malamalama?
20, 21. Se a te polokalame e ‵tau o tautali atu ki ei ke mafai o tauloto ei ki akoakoga a Iesu, kae e mafai pefea ne koe o iloilo aka tou gasolo ki mua?
22. Se a te mea e mafai o iku mai, mai te tautali atu ki akoakoga a Iesu, kae se a foki te suā mea tāua e ‵tau o suke‵suke tatou ki ei?
[Ata i te itulau e 10]
Te galuega fakaola tino mai lalo i te amoga telā ne tuku mai ne Iesu e aumai ei te malologa
[Ata i te itulau e 11]
A te tusi siki fakavae o Molimau a Ieova i te 2002 ko te: “O‵mai ki a au . . . me ka avatu ne au ki a koutou a te malologa.”—Mataio 11:28.