‵Sala Atu Ki Fakamalosiga Faka-te-agaga

“Ke amo ne koutou taku amoga . . . , e maua foki i ei ne koutou a te tokaga malie otou agaga.”​—MATAIO 11:29.

1. Se a te fakatokaga a te Atua ne fai i te Mauga o Sinai, kae kaia?

I TE taimi ne ‵tala atu ei a te feagaiga o te Tulafono i te Mauga o Sinai, ne aofia i ei a te fakatokaga o te Sapati i vaiaso katoa. E auala i tena avefekau ko Mose, ne fakatonu atu a Ieova ki te fenua o Isalaelu, penei: “E ono aso i te vaiaso e galue ei koe, ka ko te fitu o aso e malōlō ei koe, tela la, ko au pologa mo tino fakaa‵tea kolā e ga‵lue mo koe, mo au manu foki ko mafai o malō‵lo.” (Esoto 23:12) Ao, ona ko tena atafai ki tino kolā e ‵nofo mai lalo i te Tulafono, ne fakatoka ne Ieova i se auala alofa se aso malōlō ko te mea ke mafai ne ana tino o “malō‵lo.”

2. E maua pefea ne tino Isalaelu a mea aoga mai te tausiga o te Sapati?

² E mata, ne fai a te Sapati e pelā me se aso e seai se galuega e fai i ei? Ikai, ne fai eiloa e pelā me se vaega tāua o te tapuakiga a tino Isalaelu ki a Ieova. A te tausiga o te Sapati se avanoaga mō ulu o kāiga ke akoako atu a olotou kāiga ‘ke tausi a auala o Ieova ke fai te mea tonu.’ (Kenese 18:19) Ne tuku atu foki i ei se avanoaga ke maopoopo a kāiga mo taugasoa ko te mea ke mafaufau ‵loto ki faifaiga a Ieova kae ke maua i ei se fesokotakiga gali. (Isaia 58:13, 14) A ko te ‵toe mea tāua, ne fakasino atu a te valoaga e uiga ki te Sapati ki se taimi telā ka maua ei ne tatou se malōlōga tonu e auala i te Pulega a Keliso i te Afe tausaga. (Loma 8:21) Kae e a ‵tou aso nei? Tefea te koga kae maua pefea ne Kelisiano ‵tonu kolā e fia‵fia ki auala o Ieova a te vaegā fakamalosiga penā?

‵Sala Atu ki Fakamalosiga e Auala i Taugasoa Kelisiano

3. I se auala fea ne fakatau fesoasoani ei a Kelisiano i te senitenali muamua mai te suā tino ki te suā tino, kae se a te ikuga?

³ Ne fakamatala mai ne te apositolo ko Paulo a te fakapotopotoga Kelisiano e pelā me se “pou mo te lagolago o te munatonu.” (1 Timoteo 3:15) Ne maua ne Kelisiano mua a te fesoasoani lasi mai te fakamalosi atu o te suā tino ki te suā tino kae ati aka ne latou a te alofa o te suā tino ki te suā tino. (Efeso 4:11, 12, 16) I te taimi ne nofo atu ei i Efeso, ne maua ne Paulo se asiga fakamalosi loto mai tino o te fakapotopotoga i Kolinito. Mafaufau la ki te ikuga ne maua mai i ei: “Ko oko eiloa i toku fiafia i te okomaiga o Setefana, Fotunato mo Akaiko,” ko muna a Paulo, “me ne toe fakafou ne latou toku loto.” (1 Kolinito 16:17, 18) I se auala tai ‵pau, i te taimi ne fanatu ei a Tito ki Kolinito ke tavini atu ki taina i konā, ne tusi atu a Paulo ki te fakapotopotoga, i ana pati: “I te mea ne fakafilemu ne koutou katoa tona mafaufau.” (2 Kolinito 7:13) E penā foki i aso nei, e maua ne Molimau a Ieova a fakamalosiga ‵tonu e auala i te atiakaga o te va taugasoa faka-Kelisiano.

4. E fakamalosi mai pefea ki a tatou a fakatasiga a te fakapotopotoga?

⁴ E iloa ne koe me e fai a fakatasiga a te fakapotopotoga e pelā me se mafuaga o te fiafia lasi. E “fakatau fesoasoani tatou i te ‵tou fakatuanaki.” (Loma 1:12) A ‵tou taina mo tuagane Kelisiano e se ne tino kolā e fai fua e pelā me ne taugasoa masani. E fai latou e pelā me ne taugasoa ‵tonu, ko tino kolā e a‵lofa kae āva tatou ki ei. E maua ne tatou a te fiafia lasi mo te fakamafanafanaga mai te maopoopo faeloa mo latou i ‵tou fakatasiga.​—Filemoni 7.

5. E mafai pefea o fakamalosi ne tatou a nisi tino i fono i atufenua mo fono i te fenua?

⁵ A te suā mafuaga o fakamalosiga e maua mai e auala i ‵tou fono i atufenua mo fono i te fenua. I tafa o te tukuatuga o vai ola o te munatonu mai te Muna a te Atua, ko te Tusi Tapu, e maua ne tatou a te avanoaga i vaegā fakatasiga ‵lasi penā ke ‘fakalauefa atu’ a te ‵tou va fakataugasoa. (2 Kolinito 6:12, 13) Kae e a māfai e mata mā kae faigata ke fakafetaui atu tatou ki tino? A te auala e tasi ke fakamasani atu ki ‵tou taina mo tuagane ko te fesoasoani atu ki a latou i se fono. Mai tua o te fesoasoani atu i se fono i te atufenua, ne fai mai se tuagane, penei: “E masani fua au ki toku kāiga mo ne nāi taugasoa. E seki iloa ne au a tino e tokouke i konā. Kae i te taimi ne fesoasoani atu ei au ki te ‵fuluga o te koga tenā, ne fetaui au mo taina mo tuagane e tokouke! Ko oko eiloa i toku fiafia!”

6. Se a te auala e tasi e mafai ei o maua ne tatou a fakamalosiga i taimi malō‵lo?

⁶ Ne masani sāle a tino Isalaelu o faima‵laga atu ki Ielusalema mō tapuakiga e fakatolu taimi i tausaga takitasi. (Esoto 34:23) E fakauiga i ei me e tiakina ne latou olotou fatoaga mo sitoa kae faima‵laga atu mō ne aso i auala ‵pefu. Kae ko te olo atu o latou ki luga i te Faletapu ne iku atu ki “te fia‵fia lasi” me ne tuku atu ne faitaulaga a ‘tavaega ki a Ieova.’ (2 Nofoaiga Tupu 30:21) Ko oti ne iloa ne tavini a Ieova e tokouke i aso nei me i te faima‵laga fakatasi mo olotou kāiga ke āsi atu ki te Peteli, mo ofisa lagolago o Molimau a Ieova, e iku atu ki te fiafia lasi. E mata, e mafai o aofia a vaegā asiga penā i te suā malōlōga a tou kāiga?

7. (a) E mafai pefea o aoga a tamā maopoopoga? (e) Se a te mea e mafai o fakaopoopo atu ki se maopoopoga gali kae fakamalosi loto?

⁷ A te ‵kau fakatasi mo kāiga mo taugasoa mō tamā maopoopoga e mafai foki o fai e pelā me se fakamalosiga. Ne folafola mai a te tupu poto ko Solomona: “A te mea tafasili e ‵tau o fai ne te tino ko te kai, inu kae fakafiafia ki mea ko oti ne maua ne ia i ana galuega. A te mea tenā e vau foki mai i te Atua.” (Failauga 2:24) A tamā maopoopoga penā e se fakamalosi fua ne ia te tino kae ati aka ne ia te fesokotakiga alofa ki ‵tou taina Kelisiano i te taimi e fakamasani faka‵lei ei tatou mo latou. Ke fesoasoani atu ki te faiga ke gali kae fakamalosi loto a taimi penā, se mea ‵lei ke fakafoliki aka a vaegā tamā maopoopoga penā kae ke fakamautinoa aka me e isi ne tino e mafai o onoono ki ei, maise eiloa māfai e isi ne meainu ma‵losi e fakaaoga.

E Maua a Fakamalosiga Mai te Galuega Talai

8, 9. (a) E ‵kese pefea a te fekau a Iesu mai te fekau a faiakoga o te tulafono mo Falesaio. (e) E maua pefea ne tatou a mea aoga mai te fakaasiatuga o muna‵tonu mai te Tusi Tapu?

⁸ Ne loto finafinau a Iesu mō te galuega talai, kae ne fakamalosi ne ia ana soko ke fai foki penā. E fakamaoni mai a te mea tenei i ana pati: “Ko oko eiloa i te lasi o te saito e fia ‵kati, ka ko tino ga‵lue i te saito e se tokouke! Fakatagi atu ki te tino e a ia te fatoaga, ke uga mai se kau faigaluega e tai tokouke atu o fakaputu te saito.” (Mataio 9:37, 38) A te fekau tenā ne akoako atu ne Iesu se fakamalosiga tonu eiloa; se “tala ‵lei.” (Mataio 4:23; 24:14) Ne ‵kese ‵ki eiloa a te mea tenei mai tulafono ‵mafa kolā ne faimalō atu ne Falesaio ki tino.​—Faitau te Mataio 23:4, 23, 24.

⁹ Kafai e sau‵tala mo nisi tino e uiga ki te fekau o te Malo, e tuku atu ne tatou a fakamalosiga faka-te-agaga, kae i te taimi foki eiloa tenā, ka momea aka i ei a te ‵tou malamalama mo te loto fakafetai ki muna‵tonu tāua i te Tusi Tapu. Ne fai ‵tonu mai a te faisalamo: “‵Viki Atu koutou ki te Aliki! Se mea ‵lei o usu atu a vikiga ki te ‵tou Atua; e ‵lei kae tonu te ‵viki atu ki a ia.” (Salamo 147:1) E mata, e mafai o momea aka ne koe a te fiafia ko maua ne koe i te ‵viki atu ki a Ieova ki ou tuakoi?

10. E mata, e fakalagolago a te manuia o te galuega talai ki te mauaga o se tali ‵lei ki te ‵tou fekau? Fakamatala mai.

¹⁰ E tonu, me i nisi koga talai, e fia‵fia malosi atu a tino ki te tala ‵lei i lo nisi koga. (Faitau te Galuega 18:1, 5-8.) Kafai e nofo atu koe i se koga telā e se tokouke a tino e fia‵fia ki te fekau o te Malo, taumafai ke ‵saga tonu atu ki mea ‵lei ke fai ei tau galuega talai. Masaua me e se mafai eiloa o māumāu au taumafaiga ke folafola atu a te igoa o Ieova. (1 Kolinito 15:58) E se gata i ei, e se fakalagolago a te manuia o te galuega talai ki kilokiloga a tino ki te tala ‵lei. E mafai o tali‵tonu tatou me e iloa ne Ieova a tino kolā e talia ne latou a te fekau o te Malo kae tuku atu te avanoaga ke fakalogo‵logo ki ei.​—Ioane 6:44.

E Maua a Fakamalosiga i Tapuakiga a Kāiga

11. Se a te tiute ne tuku atu ne Ieova ki mātua kae e mafai pefea o fakataunu ne latou?

¹¹ E panaki mo mātua kolā e tavini ki te Atua a te akoakoga o olotou tama‵liki e uiga ki a Ieova mo ana auala. (Teutelonome 11:18, 19) Kafai koe se mātua, e mata e fakaavanoa ne koe a taimi ke akoako atu au tama‵liki e uiga ki te ‵tou Tamana alofa faka-te-lagi? Ko te mea ke fesoasoani atu ke fakataunu ne koe a te tiute tāua tenei kae tausi atu ki manakoga o tou kāiga, ko oti ne tuku mai ne Ieova a meakai ‵gali faka-te-agaga e uke e auala i tusi, mekesini, ata i vitio, mo kaseti fakalogo‵logo.

12, 13. (a) E mafai pefea o maua ne kāiga a mea aoga mai te Tapuakiga a Kāiga i afiafi? (e) E fakamautinoa aka pefea ne mātua me i te tapuakiga a te kāiga i afiafi se māfuaga o fakamalosiga?

¹² E se gata i ei, ko oti ne fai ne te tavini fakamaoni kae poto a fakatokaga mō se Tapuakiga a Kāiga i afiafi. Ne fakatoka a te afiafi tenei mō te akoga faka-te-Tusi Tapu a te kāiga i vaiaso takitasi. Ko oti ne lavea ne tino e tokouke me ne fai ne te fakatokaga tenei ke fealofani kae fakamalosi aka ei te lotou fesokotakiga mo Ieova. Kae e fakamautinoa aka pefea ne mātua me i te tapuakiga a te kāiga se māfuaga o fakamalosiga faka-te-agaga?

¹³ E se ‵tau o fai a te Tapuakiga a Kāiga i afiafi e pelā me se taimi fakafi‵ta. A te tonuga loa, e tapuaki atu tatou ki te ‘Atua fiafia,’ kae e manako a ia ke fia‵fia tatou i te ‵tou tapuakiga. (1 Timoteo 1:11; Filipi 4:4) A te fakaavanoaga o se afiafi e tasi ke sau‵tala ki muna‵tonu tāua mai te Tusi Tapu se fakamanuiaga tonu. E ‵tau o fulifuli ne mātua a te auala e akoako atu ei latou, mai te fakaaogaga o mafaufauga mo olotou atamai. E pelā me se fakaakoakoga, ne talia ne se kāiga ke fakamatala atu ne te lā tama tagata ko Brandon, telā ko sefulu ana tausaga se lipoti e fakaulutala penei “Kaia ne Fakaaoga ei ne Ieova se Gata ke Sui ne ia a Satani?” Ne fakalavelave atu a te mataupu tenei ki a Brandon me e fiafia a ia ki gata, kae ne fanoanoa a ia me e isi se lotou sokoga ki a Satani. Ko oti ne fai sāle ne nisi kāiga a tala i te Tusi Tapu, kae aofia i ei a tino katoa o te kāiga, kolā e fai‵tau olotou vaega mai te Tusi Tapu, kae fai ne latou a te koniseti o te tala tenā. E se fai fua a te auala e akoako ei tatou e pelā me se mea fakafia‵fia kae e fai ne ia ke aofia otou tama‵liki i ei, ko te mea ke ‵goto tonu ki olotou loto a fakatakitakiga i te Tusi Tapu.a

Ke ‵Kalo Keatea Mai Mea Kolā e Fakavāivāi ei Koe

14, 15. (a) Kaia ko gasolo aka ei ki luga a te manava‵se mo te sē lava o te loto talitonu i aso fakaoti konei? (e) Ne a fakalavelave fakaopoopo e mafai o fe‵paki mo tatou?

¹⁴ A te fi‵ta mo te se lava o te loto talitonu ko gasolo aka eiloa ki luga i aso fakaoti konei o te olaga masei tenei. E pokotia eiloa a te fia miliona o tino i te seai o ne galuega mo nisi fakalavelave i mea tau tupe. E tali‵tonu foki a nisi tino kolā e ga‵lue me e se taitai o lava a tupe e maua ne latou, telā e iku atu ei ki te sē lava o mea aoga e maua ne olotou kāiga. (Fakatusa ki te Hakai 1:4-6.) E se mafai ne tino fakapolitiki mo nisi takitaki o fesoasoani atu ki te fakaseaiga o amioga takafia‵toa mo nisi amioga ma‵sei. E tokouke a tino ko loto vāi‵vai ona ko olotou vāivāiga totino.​—Salamo 38:4.

¹⁵ E se ‵sao eiloa a Kelisiano ‵tonu mai fakalavelave mo fakamalosiga ma‵sei mai te lalolagi a Satani. (1 Ioane 5:19) I nisi feitu, e mafai o fe‵paki a soko o Keliso mo fakalavelave i te taimi e taumafai ei latou ke tumau a te lotou fakamaoni ki a Ieova. Ne fai mai a Iesu: “Kafai ne fakasaua mai latou ki a au, ka fakasaua foki ki a koutou.” (Ioane 15:20) Kae e tiga eiloa e “fakasauagina” tatou, kae e “se ‵mate” eiloa tatou. (2 Kolinito 4:9) Kaia e fai ei penā?

16. Se a te mea e mafai o fesoasoani mai ke fakatumau a te ‵tou fiafia?

¹⁶ Ne fai mai a Iesu: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malōlōga.” (Mataio 11:28) Mai te mauaga o te fakatuanaki katoatoa ki te fakatokaga o te togiola a Keliso, ko tuku atu ei ne tatou a tatou eiloa ki a Ieova i se auala fakatusa. I te auala tenei, e maua ne tatou a ‘te malosi telā e sili atu i te malosi masani.’ (2 Kolinito 4:7) A te agaga tapu se “fesoasoani” kae e fakamalosi ne ia te ‵tou fakatuanaki ko te mea fua ke se kufaki tatou i mea faiga‵ta mo fakalavelave e fe‵paki mo tatou kae ke tumau foki tatou i te fia‵fia.​—Ioane 14:26; Iakopo 1:2-4.

17, 18. (a) Se a te uiga e ‵tau o fakaeteete tatou i ei? (e) Se a te mea e iku mai i te fakatāua ne tatou a fakafiafiaga masani?

¹⁷ E ‵tau mo Kelisiano ‵tonu i aso nei o fakaeteete i fakamalosiga ma‵sei mai te agaga masei o te lalolagi tenei. (Faitau te Efeso 2:2-5.) Kafai e se penā, e mafai o maleigina tatou ne “manakoga agasala, ko mea e matea ne tino kae ma‵nako ki ei, mo mea katoa i te lalolagi nei kolā e fakamata‵mata ki ei a tino.” (1 Ioane 2:16) Io me e mafai o faka‵segina tatou ke tali‵tonu me i te ‵sala atu ki manakoga o te foitino ka aumai ne ia a fakamalosiga. (Loma 8:6) E pelā me se fakaakoakoga, ko oti ne ‵saga atu a nisi tino ki vailakau tapu mo te fakaaogaga ‵se o te kava, onoono ki ata ma‵sei, tafaoga fakama‵taku, io me ko vaega kese‵kese o amioga solitulafono kolā e fakafiafia atu ki a latou. Ne manako eiloa a Satani ke takitaki ne ia a tino ki “auala ma‵sei” mai te tukuatuga o se kilokiloga ‵se e uiga ki fakamalosiga.​—Efeso 6:11.

¹⁸ E tonu, e seai se mea e masei i te kai, inu, kae aofia i vaega o fakafiafiaga ‵gali māfai e fai faka‵lei. Kae ke mo a ma fakamuamua ne tatou a vaegā mea penei i ‵tou olaga. E tāua ‵ki eiloa a te paleni ‵lei mo te loto pulea, maise eiloa i te vaitaimi tenei e ola ei tatou. E mafai o fakavāivāi mai ki a tatou a manakoga totino ki te tulaga telā ko fai ei tatou ke ‘mate faka-te-agaga io me sē fua malosi ei te poto tonu e uiga ki te ‵tou Aliki ko Iesu keliso.’​—2 Petelu 1:8, NW.

19, 20. E mafai pefea o maua ne tatou a fakamalosiga ‵tonu?

¹⁹ Kafai e fakafetaui aka a ‵tou mafaufauga mo tulafono a Ieova, ka lavea ei ne tatou me i so se fakafiafiaga telā ne tuku mai ne te lalolagi tenei e oti vave fua. Ne iloa ne Mose a te mea tenā, kae e ‵tau foki o fai tatou penā. (Epelu 11:25) A te tonuga loa, a te fakamalosiga tonu, telā e aumai ne ia te fiafia tumau mo te lotomalie, e maua mai i te faiga o te loto o te ‵tou Tamana faka-te-lagi.​—Mataio 5:6.

²⁰ Ke na tumau faeloa tatou i te ‵sala atu ki fakamalosiga faka-te-agaga. Mai te faiga penā, ke ‘tiakina ne tatou a te olaga masei mo manakoga o te lalolagi . . . kae koi fakatali‵tali tatou ki te fakamoemoega manuia mo te fakaasiga o te ‵malu o te Atua sili mo te ‵tou Fakaola, ko Keliso Iesu.’ (Tito 2:12, 13) Tela la, ke na fakaiku aka ne tatou ke tumau tatou mai lalo i te amoga a Iesu mai te fakalogo ki tena pulega mo tena takitakiga. I te faiga tenā, ka maua ei ne tatou a te fiafia tonu mo fakamalosiga!

[Fakamatalaga fakaopoopo]

Ka Tali Mai Pefea ne Koe?

• E mafai pefea o maua ne tino o Ieova i aso nei a fakamalosiga?

• I te auala fea e fakamalosi mai ei a te galuega talai ki a tatou mo tino kolā e fai‵pati tatou ki ei?

• Ne a mea e mafai o fai ne ulu o kāiga ke fakamautinoa aka me e maua mai i te tapuakiga a kāiga a fakamalosiga?

• Ne a mea e fakavāivāi ei tatou i te feitu faka-te-agaga?

[Ata i te itulau e 30]

Kafai e amo ne tatou a te amoga a Iesu, e maua i ei ne tatou a pogai e uke o fakamalosiga