E Takalialia a Ieova ki Tino Ofa Feagaiga

‘Sa ofa ne tatou ‵tou feagaiga, sua tino ki sua tino.’​—MALAKI 2:⁠10.

E FIA ola koe ki te se-gata-mai? Kafai e talitonu koe ki te fakamoemoega tenā e pelā mo te mea ne folafola mai i te Tusi Tapu, kāti ka tali mai koe penei, ‘Ao.’ Kae kafai e manako koe ke talia ne te Atua ke maua ne koe te ola se-gata-mai i tena lalolagi fou, ka manakogina ke fai ne koe a mea kolā e manako ki ei a ia. (Failauga 12:13; Ioane 17:⁠3) E mata, e se mafai o fai ne tino sē ‵lei katoatoa a te mea tenā? Ikai, me ne fai mai ne Ieova te fakamatalaga fakamalosi tenei: “Au e manako ki te alofa tumau mai i a koutou, se ko taulaga manu a koutou. E sili atu toku manako ke iloa au ne oku tino i lo te fai o taulaga sunu a latou ki a au.” (Hosea 6:⁠6) Tela la, e mafai foki eiloa ne tino fai mea ‵se o fai a mea kolā e manako ki ei te Atua.

² Kae e se ko tino katoa e ma‵nako ke fai te loto o Ieova. E fakaasi mai ne Hosea me ke oko foki eiloa ki tino Isalaelu e tokouke ne seki ma‵nako o fai te loto o Ieova. E pelā me se atufenua, ne lotoma‵lie latou ke ulu atu ki loto i se feagaiga, ke faka‵logo ki tulafono a te Atua. (Esoto 24:​1-8) Kae e seki leva, ne “ofa ei ne latou te feagaiga” mai te soliga ne latou ana tulafono. Tela la, ne fai atu a Ieova me i tino Isalaelu konā ‘ne ofa ne latou te feagaiga tela ne fai ne ia.’ (Hosea 6:⁠7) Kae ne fai eiloa penā a tino e tokouke talu mai te taimi tenā. Kae e takalialia a Ieova ki tino kolā e ofa olotou feagaiga, faitalia me ne fai ‵tonu atu ki a ia io me ko tino kolā e a‵lofa kae tavini atu ki a ia.

³ A Hosea e se ko te pelofeta fua ne faka‵mafa mai ne ia te kilokiloga a te Atua e uiga ki te ofaga o feagaiga, se kilokiloga telā e ‵tau o talia ne tatou māfai e fakamoe‵moe tatou ke maua se olaga fiafia. I te mataupu mai mua atu, ne kamata ne tatou se iloiloga e uiga ki te ukega o fekau fakapelofeta a Malaki, telā e kamata mai te mataupu muamua o tena tusi. Nei la, ke ‵suke tatou ki te lua o mataupu o te tusi tenā kae ke onoono aka ki te auala e ‵tau ei o ‵saga malosi atu tatou ki te kilokiloga a te Atua e uiga ki te ofaga o feagaiga. E tiga eiloa e faipati a Malaki ki te tulaga telā ne tumau i va o tino o te Atua i te fia o tausaga mai tua o te lotou ‵fokiatuga mai te ‵nofo pologa i Papelonia, e isi foki se uiga tāua o te mataupu e lua ki a tatou i aso nei.

Faitaulaga Kolā e ‵Tau o Fakasala

⁴ E kamata te mataupu e 2 ki te ‵taku fakamaseiga ne Ieova a faitaulaga Iutaia mō te tiakinaga ne latou o Ana auala amio‵tonu. Kafai e se faka‵logo latou ki ana pati polopoloki kae faka‵tonu olotou auala, ka oko atu eiloa a ikuga matagā ki a latou. Mafaufau la ki fuaiupu muamua e lua: “Muna a te Aliki Tafasili i te Malosi ki faitaulaga, ‘A te fakatonuga tenei mō koutou: E ‵tau mo koutou o ava mai ki a au i mea a koutou e fai. Kafai e se faka‵logo koutou ki aku muna, ka fakamalaia ne au a koutou. Ka fakamalaia ne au a mea kola e maua ne koutou mō tausi otou olaga.’ ” Moi ne tumau a faitaulaga i te akoako atu o tino ki tulafono a te Atua kae faka‵logo ki ei, penei e fakamanuiagina latou. Kae ona ko te fakasēaogāga ne latou a te loto o te Atua, ka oko atu te fakamalaiaga i lō te fakamanuiaga. Kae ka ‵fuli foki te fakamanuiaga o faitaulaga ki se fakamalaiaga.

⁵ Kaia ne ‵tau ei o fakasala a faitaulaga? E tuku mai ne te fuaiupu e 7 se fakamatalaga māea: “Ko te tiute o faitaulaga o akoako atu ke iloa tonu ne tino a te Atua. E tau mo tino o olo ki ei o tauloto toku loto, me i a latou ko ave fekau a te Aliki Tafasili i te Malosi.” E sili atu i te afe tausaga mai mua atu, a tulafono a te Atua kolā ne tuku atu ki te kau Isalaelu e auala i a Mose ne fai atu me e maua ne faitaulaga te tiute ke “akoako atu ne [latou] a tino Isalaelu katoa ki tulafono kola ne tuku atu ne [Ieova].” (Levitiko 10:11) Se mea fakafanoanoa me fakamuli ifo, ne lipoti mai te tino tusitala o te 2 Nofoaiga Tupu 15:​3, penei: “Ne leva eiloa te taimi ne nofo ei a tino Isalaelu seai se Atua tonu o latou, seai ne faitaulaga o akoako latou, kae seai foki se tulafono mō fakatonutonu latou.”

⁶ I taimi o Malaki, i te lima senitenali T.L.M., ne tumau eiloa te tulaga o faitaulaga. Ne fakata‵mala latou o akoako atu te Tulafono a te Atua ki tino. Tela la, ne ‵tau eiloa o fakasala a faitaulaga konā. Mafaufau la ki pati ‵mafa kolā ne fai ‵tonu atu ne Ieova ki a latou. E folafola mai te Malaki 2:​3, penei: “Kae nani otou mata ki fekau o manu vaefa kola e ofo mai ne koutou.” Ko tafaga la te masiasi! Ne ‵tau o ave keatea a fekau o manu kolā e ofo atu mo fai a taulaga ki tua o te fa‵kai kae ‵sunu. (Levitiko 16:27) Kae i te taimi e fai atu ei a Ieova me ka nani atu a fekau o manu ki olotou mata i lō te ‵pei keatea, e fakaasi manino mai i ei me ne takalialia kae ‵teke atu a ia ki olotou taulaga, pelā foki mo tino kolā ne ofo atu ne latou a taulaga konā.

⁷ E sili atu i te afe tausaga a koi tuai o oko atu ki taimi o Malaki, ne ‵tofi aka ei ne Ieova a te kau sa Levi ke tausi ne latou te faleie kae fakamuli ifo ko te faletapu mo te taviniga tapu. E fai latou mo faiakoga i te atufenua o Isalaelu. A te faiga o te lotou tofiga e mafai ei o maua ne latou mo te atufenua a te ola mo te filemu. (Numela 3:​5-8) Kae ne galo atu i te kau Levi a te mataku ‵tau ki te Atua telā ne maua muamua ne latou. Tela la, ne fai atu a Ieova ki a latou, penei: “Koutou faitaulaga ko kalo keatea mai te auala tonu. A otou akoakoga ko mafua mai i ei te fai amioga ma‵sei o tino e tokouke. Ko oti ne ofa ne koutou taku feagaiga ne fai mo koutou . . . i a koutou e seki faka‵logo ki aku muna.” (Malaki 2:​8, 9) Ona ko te lotou fakata‵mala ke akoako atu te munatonu fakatasi mo olotou fakaakoakoga ma‵sei, ne takitaki ‵se ei ne faitaulaga a tino Isalaelu e tokouke, telā ne ‵tau eiloa o kaitaua a Ieova ki a latou.

Te Fakalogo ki Tulafono a te Atua

⁸ Ke mo a eiloa ma mafaufau pelā me e ‵tau o fakaasi atu te alofa ki faitaulaga konā kae e ‵tau o fakamagalogina latou me i a latou ne tino sē ‵lei katoatoa kae ne seki mafai o fakamoe‵moe ke faka‵logo latou ki tulafono a te Atua. A te ‵tonuga loa, e mafai ne tino o faka‵logo ki fakatonuga a te Atua, me e se fakamoemoe a Ieova ke fai ne latou a mea kolā e se mafai ne latou o fai. Kāti ne faka‵logo eiloa a nisi faitaulaga ki tulafono a te Atua, kae e seai eiloa se fakalotolotolua e uiga ki te tino telā ne fai fakamuli penā​​—⁠ko Iesu, te “Faitaulaga Pule” sili. (Epelu 3:⁠1) Ne mafai o fai ‵tonu atu e uiga ki a ia, penei: “Ne akoako atu ne [ia] te mea tonu kae se ko te mea ‵se. Ne faka‵logo latou ki a au; ne fai ne [ia] te mea tonu, se gata i ei kae fesoasoani [a ia] ki nisi tino ke fakagata olotou amioga ma‵sei.”​​—⁠Malaki 2:⁠6.

⁹ E pelā foki mo taina fakaekegina o Keliso kolā e tavini atu e pelā me se kau “faitaulaga e tapu, o ofo atu a taulaga faka te Agaga mo taulaga logomalie ki te Atua e auala i a Iesu Keliso” i ‵tou taimi nei. (1 Petelu 2:⁠5) Ko oti ne fai ne latou te takitakiga i te fakaasiatuga o te munatonu i te Tusi Tapu ki nisi tino. I te taimi ne tauloto ei koe ki muna‵tonu kolā e akoako atu ne latou, ko oti ne fakamaoni aka ne koe me e akoako atu eiloa ne latou te munatonu, i ne? Ko oti ne fesoasoani atu latou ki tino e tokouke ke ‵fuli keatea mai akoakoga ‵se a lotu, telā ko lau nei i miliona a tino i te lalolagi kātoa ko oti ne tau‵loto ki munatonu i te Tusi Tapu kae ko maua foki ne latou te fakamoemoega o te ola se-gata-mai. Ko taulia foki latou ke akoako atu a te munatonu ki te fia miliona o nisi tino.​​—⁠Ioane 10:16; Fakaasiga 7:⁠9.

Pogai ke Fakaeteete ei

¹⁰ Kae e isi se pogai ke fakaeteete ei tatou. E mafai o se malamalama tatou i akoakoga aogā kolā e fakaasi mai i te Malaki 2:​1-9. E mata, e matapula‵pula tatou, ko te mea ke mo a ma taku atu ne tatou se mea ‵se? E pelā mo ‵tou kāiga, e mata, e mafai o tali‵tonu katoatoa latou ki pati kolā e fai atu ne tatou? E mafai foki o tali‵tonu ‵tou taina mo tuagane faka-te-agaga i te fakapotopotoga ki pati e fai atu ne tatou? E faigofie o taku atu a pati kolā e foliga mai me e ‵tonu kae tela la, e fakaloiloi ne tatou te tino tenā. Io me e mafai o fakalasilasi io me e ‵funa aka ne se tino a fakamatalaga likiliki e uiga ki mea tau pisinisi. E mata, ka se lavea ne Ieova te mea tenā? Kae kafai e tau‵tali atu tatou ki vaegā faifaiga penā, e mata, ka talia ne ia a taulaga o tavaega mai ‵tou gutu?

¹¹ E ‵tau o fai a te Malaki 2:7 e pelā me se fakailoaga ke fakaeteete ei a tino kolā e taulia ke akoako atu te Muna a te Atua i fakapotopotoga i aso nei. E fai mai i ei me e ‵tau mo latou o “akoako atu ke iloa ne tino a te Atua. E tau mo tino o olo ki ei o tauloto toku loto.” E ‵mafa te tiute o vaegā faiakoga penā, me e fakaasi mai te Iakopo 3:1 me ‘ka sili atu te faigata te fakamasinoga’ o latou. E tiga eiloa e ‵tau o akoako atu latou i se auala magoi mo te loto finafinau, e ‵tau o fakavae ‵mautakitaki olotou akoakoga ki te Muna tusia a te Atua mo akoakoga kolā e tuku mai e auala i te fakapotopotoga a Ieova. I te faiga penā, ka mafai ei o fai latou e pelā mo “tino kola e mafai ne latou o akoako atu nisi tino.” Tela la, e tuku atu a pati fakatonutonu konei ki a latou: “Taumafai malosi o tuku atu koe ki te Aliki e pela mo se tino ko fakamaonia me ko ‵tau, se tino galue tela e se ‵tau mo ia o taema ki se mea, kae se tino e akoako tonu eiloa ne ia a te munatonu a te Atua.”​​—⁠2 Timoteo 2:​2, 15.

¹² Kafai e se fakaeteete tatou, e mafai o tofotofogina tatou ke fakafetaui aka ‵tou manatu totino mo ‵tou akoakoga. E sili atu te faigata o te mea tenā māfai e talitonu se tino ki ana fakaikuga totino faitalia me e fe‵paki a mea konei mo te mea telā e akoako atu ne te fakapotopotoga a Ieova. Kae e fakaasi mai ne te Malaki mataupu e 2 me e ‵tau o fakamoe‵moe a faiakoga i te fakapotopotoga ke puke ‵mau ki te iloaga mai te Atua kae e se ki manatu totino, kolā e mafai o fakavāivāi ei a mamoe. Ne fai mai a Iesu, penei: “So se tino e fai ne ia se mea ke agasala a tamaliki konei, kola e talitonu ki a au, e sili atu moi fai ne ‵sai tena ua ki se fatu kae pei ki te moana ‵poko.”​​—⁠Mataio 18:⁠6.

Te Fakaipoipo ki se Tino sē Talitonu

¹³ Mai te fuaiupu e 10 o vau ki mua, e faka‵mafa ‵tonu mai ne te Malaki mataupu e 2, a te matagā o te ofaga o feagaiga. Ne fakasino atu a Malaki ki auala tai ‵pau e lua e uiga ki te pati telā ne fakaaogā ‵soko ne ia ko te ‘ofaga o feagaiga.’ Muamua la, ke mafaufau ki te fakatomuaga ne Malaki ana pati fakatonutonu ki fesili konei: “E a, e se tasi te Tamana o tatou? E a, e seki faite tatou ne te Atua e tokotasi? Ai a la e ofa ei ne tatou ‵tou feagaiga, sua tino ki sua tino, kae ai a foki e ofa ei ne tatou te feagaiga a te Atua tela ne fai mo ‵tou tupuga?” Kae e fakaopoopo mai i te fuaiupu e 11 me i te ofaga ne tino Isalaelu a feagaiga ne ‘solisoli i ei ne latou te Faletapu.’ Ne a mea matagā kolā ne fai ne latou? E fakaasi mai ne te fuaiupu tenā se faifaiga masei e tasi: “Ne avaga [latou] ki fafine kola e tapuaki ki atua fakaatea.”

¹⁴ I nisi tugāpati, a nisi tino Isalaelu kolā ne fai mo fai ne vaega o se atufenua tukugina atu ki a Ieova, ne a‵vaga mo tino kolā ne seki tapuaki atu ki a ia. E fesoasoani mai te tala kātoa ke iloa ne tatou te pogai ne matagā ‵ki ei te mea tenā. E fai mai te fuaiupu e 10 me ne tasi eiloa te lotou tamana. E se fakauiga i ei ki a Iakopo (telā ne toe fakaigoa ki a Isalaelu) io me ko Apelaamo io me ko Atamu. E fakaasi mai ne te Malaki 1:6 me i a Ieova ko te ‘Tamana e tokotasi.’ Ne maua ne te atufenua o Isalaelu se fesokotakiga mo Ieova, kae ne ‵kau fakatasi i te feagaiga telā ne fai ne ia mo olotou tupuga. E tasi o tulafono konā i te feagaiga tenā, e fai penei: “Ke mo a eiloa e avaga koutou ki tino kona, io me talia otou tamaliki ke avaga ki a latou.”​​—⁠Teutelonome 7:⁠3.

¹⁵ E mafai o fakasako‵sako mai a nisi tino, penei: ‘Ko oko eiloa te gali o te tino telā ne fiafai au ki ei. Kāti ka talia fakamuli ne ia te tapuakiga tonu.’ E fakapa‵tonu mai ne vaegā mafaufauga penā a te fakailoaga mai te Atua ke fakaeteete i ei, penei: ‘A te loto ko te toe mea tafasili foki eiloa i te fakase tino.’ (Ielemia 17:⁠9) Ne fakaasi atu te kilokiloga a te Atua e uiga ki te avaga ki se tino sē tali‵tonu i te Malaki 2:​12, penei: “A te Aliki ke ave keatea ne ia mai te fakapotopotoga o tino Isalaelu, so se tino e fai ne ia te mea tenei.” Tela la, e fakamalosigina a Kelisiano ke a‵vaga fua ki ‘se tino Kelisiano.’ (1 Kolinito 7:39) Mai lalo i te fakatokaga faka-Kelisiano, e se “ave keatea” se tino talitonu māfai e avaga ki se tino sē talitonu. Kafai e tumau eiloa te sē talitonu o te tino sē Kelisiano, se a te mea ka tupu ki a ia māfai ko fakaoko mai ne te Atua te gataga ki te olaga masani tenei o tino ma‵sei?​—⁠Salamo 37:​37, 38.

Te Sonāfai o te Avaga

¹⁶ Ne toe taku mai ne Malaki a te suā vaegā ofaga o feagaiga: ko te sonāfaiga o te avaga, maise eiloa māfai ko ‵tala te avaga e aunoa mo se pogai ‵tau. E fai mai te fuaiupu e 14 o te mataupu e 2, penei: “Ko te mea ko iloa ne ia me ko oti ne ofa ne koe tau feagaiga ki te fafine tela ne avaga koe ki ei i te taimi koi tamataene ei koe.” Ona ko te sonāfai ne latou olotou avaga fāfine, ne fai ei ne avaga tāgata a te fatafaitaulaga a Ieova ke ‘fonu i loimata.’ (Malaki 2:13) Ne ‵tala ne tāgata konei olotou avaga i pogai sē ‵tau, mai te tiakinaga i se auala ‵se olotou avaga kolā ne a‵vaga latou ki ei i taimi koi talavou ei latou, kāti ke a‵vaga mo fāfine tai fo‵liki atu io me ko fāfine fapaupau. Kae ne talia ne faitaulaga ma‵sei a amioga konā! Kae e folafola mai te Malaki 2:⁠16, penei: “Muna a te Aliki, te Atua o Isalaelu, ‘Au e se fiafia ki te avaga mavae.’ ” Fakamuli ifo, ne fakaasi mai ne Iesu me i te mulilua ko te pogai fua e tasi e mafai ei o ‵tala te avaga telā e fakasaoloto ei a te tino sē agasala ke toe avaga.​​—⁠Mataio 19:⁠9.

¹⁷ Ke mafaufau ‵mafa ki pati a Malaki, kae ke onoono aka ki te auala e mafai ei o fakamalosi aka ne pati konā a te loto alofa mo lagonaga atafai. E fakasino atu a ia ki tena ‘soa mo te avaga fafine o tena feagaiga.’ A te tagata tenā ne avaga ki se tino tapuaki, se fafine Isalaelu, kae e filifili ne ia tou fafine e pelā me se taugasoa pele, mo se soa i te olaga kātoa. E tiga eiloa ne fai te fakaipoipoga tenā i te taimi koi fo‵liki ei laua, e se fakasēaogā ne te ‵tekaatuga o taimi mo te lotou gasolo atu o ma‵tua a te feagaiga ne fai ne laua, ko te feagaiga o te fakaipoipoga.

¹⁸ A pati polopoloki e uiga ki mataupu konā e ‵pau eiloa te lotou aogā i aso nei. Se mea fakafanoanoa me ne fakasēaogā ne nisi tino a te takitakiga a te Atua ke avaga fua i te Aliki. Kae se mea fakafanoanoa foki me ne seki tumau a nisi tino i te ga‵lue ke ma‵losi faeloa olotou fakaipoipoga. I lō te fai penā, e fai olotou fakasakoga kae kausaki atu ki te auala telā e takalialia ki ei te Atua mai te faiga ke ‵tala te avaga e aunoa mo se pogai faka-te-Tusi Tapu ko te mea fua ke avaga ki te suā tino. I te faiga o vaegā mea penā, “ne fakafi‵ta ne [latou] a te Aliki [ko Ieova].” I taimi o Malaki, a tino kolā ne fakasēaogā ne latou a pati polopoloki a te Atua ne oko atu eiloa ki te tulaga telā ko mafau‵fau ei latou me e se ‵lei a kilokiloga a Ieova. Ne iku atu eiloa ki te faimaiga o latou, penei: “Tefea te Atua tela e tau o fai te mea tonu?” Ko oko eiloa i te ‵kese o te mafaufauga tenā! Ke mo a ma ‵tō atu tatou ki te malei tenā.​​—⁠Malaki 2:⁠17.

¹⁹ Kae e fakaasi mai ne Malaki se mea ‵lei me ne isi eiloa ne avaga tāgata kolā ne seki ofa olotou feagaiga ki olotou avaga. Ne maua ne laua a fakamanuiaga mai i te “agaga” tapu o te Atua. (Fuaiupu e 15) Se mea fakafiafia, me e uke a vaegā tāgata penā i te fakapotopotoga a te Atua i aso nei kolā e ‘ava ki olotou avaga.’ (1 Petelu 3:⁠7) E se sonāfai ne latou olotou avaga i te feitu faka-te-foitino io me ki pati, e se faimālō olotou avaga ke fai a faifaiga fakatauavaga matagā, kae e āva ki olotou avaga mai te sē fakatāgata ki nisi fāfine io me e onoono atu ki ata ma‵sei i faifaiga fakatauavaga. E fakamanuiagina a te fakapotopotoga a Ieova me e maua atu i ei a avaga fāfine Kelisiano kolā e fakamaoni ki te Atua mo ana tulafono. E iloa ne vaegā tāgata mo fāfine katoa penā a mea kolā e takalialia ki ei te Atua, kae e mafau‵fau kae gasue‵sue foki latou e ‵tusa mo mea konā. Ke tumau i te fai pelā mo latou, mai te ‘faka‵logo ki te Atua’ e pelā me ko te ‵tou pule kae ke fakamanuiagina koe i se auala lasi ne tena agaga tapu.​​—⁠Galuega 5:⁠29.

²⁰ Ko pili o fakamasino ne Ieova te lalolagi kātoa. E ‵tau o tuku atu ne tino taki tokotasi katoa se tala mō ana talitonuga mo faifaiga katoa. “Ko ‵tau i a tatou takitokotasi o avatu se tala o ia ki te Atua.” (Loma 14:12) Tela la, a te fesili gali ke mafaufau nei ki ei ko te: Ko oi ka ‵sao atu i te aso o Ieova? Ka faipati a te ‵toe mataupu i te fakasologa tenei o mataupu e tolu ki te matua tenā.

E Mafai ne koe o Fakamatala Mai?

• Se a te pogai fakavae ne fakamasino ei ne Ieova a faitaulaga i Isalaelu?

• Kaia e se tō ‵mafa ei ke faka‵logo a tino ki tulafono a te Atua?

• Kaia e ‵tau ei o fakaeteete tatou i ‵tou akoakoga i aso nei?

• Ne a faifaiga e lua kolā ne taku fakamasei malosi ne Ieova?

[Fesili mo te Sukesukega]

1. Ne a mea e manako ki ei te Atua ke fai ne tatou ko te mea ke maua te ola se-gata-mai?

2. Ne ofa pefea ne tino Isalaelu e tokouke te lotou feagaiga mo Ieova?

3. Se a te iloiloga ka fai i te mataupu tenei?

4. Se a te fakailoaga ne tuku atu ne Ieova ki faitaulaga ke fakaeteete i ei?

5, 6. (a) Kaia ne ‵tau ei o fakasala a faitaulaga? (e) Ne fakaasi atu pefea ne Ieova tena takalialia ki faitaulaga?

7. Kaia ne kaitaua ei a Ieova ki faiakoga o te Tulafono?

8. E mata, e ‵tau o fakamoe‵moe ke faka‵logo a tino ki tulafono a te Atua? Fakamatala mai.

9. Ko oi ne fakamaoni i te fakaasiatuga o te munatonu ki tino i ‵tou taimi nei?

10. Kaia e ‵tau ei o fakaeteete tatou?

11. Ko oi e ‵tau eiloa o fakaeteete malosi?

12. Ne a mea kolā e ‵tau o fakaeteete i ei a faiakoga?

13, 14. Se a te auala e tasi ne ofa ei a te feagaiga telā ne faka‵mafa mai ne Malaki?

15. (a) Ne fakasakosako mai pefea a nisi tino e uiga ki te avaga ki se tino sē talitonu? (e) Ne fakaasi mai pefea ne Ieova tena kilokiloga e uiga ki te fakaipoipoga?

16, 17. Se a te feagaiga telā ne ofa ne nisi tino?

18. E fetaui pefea a pati polopoloki a Malaki e uiga ki te ofaga o feagaiga mo ‵tou olaga i aso nei?

19. E mafai pefea o maua ne avaga tāgata mo avaga fāfine a te agaga o te Atua?

20. Se a te mea ko pili o fai ki tino katoa?

[Ata i te itulau e 28]

Ne fakamasino ne Ieova a tino Isalaelu kolā ne ‵tala olotou avaga i pogai sē ‵tau kae a‵vaga ki fāfine fapaupau

[Ata i te itulau e 28]

E fakamaoni a Kelisiano i aso nei ki olotou feagaiga mō te fakaipoipoga