Ke Fakaakoako Atu ki te Faiakoga Sili

“Tela la, olo atu koutou ki fenua katoa ke fai a tino i ei mo oku soko . . . , Akoako atu foki latou ke faka‵logo ki mea katoa kola ne fakatonu atu ne au ki a koutou.”​—MATAIO 28:​19, 20.

A KOE se faiakoga? E fai tatou katoa pelā me ne faiakoga i nisi taimi. E akoako atu koe i so se taimi e fakasino atu ei ne koe a te auala tonu ki se tino telā ko ‵se tena auala, e fakaasi atu ki se tino e ga‵lue tasi mo koe a te auala e fai ei se galuega, io me e fakamatala atu ki se tamaliki a te ‵saiga o tena sulu. A te fesoasoani atu ki nisi tino i vaegā auala penā, e maua ei te fiafia tonu, i ne?

² Kafai e mafau‵fau tatou ki te faiga o akoakoga, e maua ne Kelisiano ‵tonu se tiute kese ‵ki kae tāua foki. Ne fakatonu mai ke ‘fai a tino mo soko kae akoako atu foki latou.’ (Mataio 28:​19, 20) E akoako atu foki tatou i nisi taimi i te fakapotopotoga. E ‵tofi aka a tāgata kolā e fetaui ‵lei ke tavini atu e pelā me ne ‘tino talai mo faiakoga,’ ke fakamalosi aka ei te fakapotopotoga. (Efeso 4:​11-​13) I te faiga o te lotou galuega faka-Kelisiano i aso katoa, e fai a fāfine ma‵tua e pelā me ne faiakoga “ke akoako atu ne latou a te mea ‵lei” ki tamāfine. (Tito 2:​3-5) E fakatonu mai ke fakamalosi atu tatou katoa ki taina tali‵tonu, mai te fakaaogāga o te Tusi Tapu. (1 Tesalonia 5:​11) Ko oko eiloa te ‵tou taulia ke fai mo fai ne faiakoga o te Muna a te Atua kae ke fakaasi atu a akoakoga tāua i te Tusi Tapu kolā e maua ei a mea aogā tumau!

³ E mafai la pefea o momea aka te ‵tou ma‵goi e pelā me ne faiakoga? Muamua la, mai te tau‵tali atu ki te Faiakoga Sili, ko Iesu. Kāti ka fai mai a nisi tino, penei: ‘Kae e mafai pefea o tau‵tali atu tatou ki a Iesu? A ia se tino ‵lei katoatoa.’ E tonu, e se mafai o fai tatou e pelā me ne faiakoga ‵lei katoatoa. Kae faitalia ‵tou atamai, e mafai eiloa o fai ne tatou te ‵toe mea e mafai ke tau‵tali ki te auala ne akoako atu ei a Iesu. Ke na sau‵tala aka tatou ki te auala e mafai ei o fakaaogā ne tatou a auala e fa ne akoako atu ei a ia, ko fakamatalaga faigofie, fesili ma‵goi, fakamatalaga ‵tonu, mo tala fakatusa kolā e fetaui ‵lei.

Ke Fakafaigofie Aka Tau Akoako Atu

⁴ E se faiga‵ta a muna‵tonu fakavae i te Muna a te Atua. Ne ‵talo atu a Iesu, penei: “Toku Tamana, . . . Au e fakafetai atu ki a koe me ko oti ne fakaasi ne koe ki tino e seki akoakogina a mea kola ne ‵funa ne koe mai tino ‵poto mo tino ne akoakogina.” (Mataio 11:25) Ko oti ne fakaasi atu ne Ieova ana fuafuaga ki tino loto ‵lei kae loto maulalo. (1 Kolinito 1:​26-​28) Tela la, a te akoako atu i se auala faigofie ko te auala tāua ke maina ei a tino i muna‵tonu i te Tusi Tapu.

⁵ Kafai e fai ne koe se akoga faka-te-Tusi Tapu i se fale io me ko toe āsiga ki tino fia‵fia, e mafai pefea o akoako atu koe i se auala faigofie? Ne a mea e mafai o tau‵loto ne tatou mai te Faiakoga Sili? Ke malamalama faka‵lei ana tino fakalogo‵logo kolā “e seki a‵koga” faka‵lei, ne fakaaogā ne Iesu a pati faigofie kolā e mafai o maina ‵lei latou i ei. (Galuega 4:​13) Ke akoako atu i se auala faigofie, e ‵tau o mafaufau faka‵lei ki pati e fakaaogā ne tatou. E se ‵tau o fakaaogā a pati io me ko fuaiupu ‵mafa ke fakamaoni atu ei a te munatonu i te Muna a te Atua ki nisi tino. A vaegā ‘muna ‵poto faka-te-lalolagi’ penā e mafai o fakamatakutaku atu, kae maise eiloa ki tino kolā e seki a‵koga ‵lei io me se lasi te lotou atamai. (1 Kolinito 2:​1, 2) E fakaasi mai ne te fakaakoakoga a Iesu me kafai e filifili faka‵lei aka a pati faigofie, e mafai ei o fakamatala atu a te munatonu i se auala aogā ‵ki.

⁶ Ke akoako i se auala faigofie, e ‵tau foki o fakaeteete tatou ke mo a ma tō uke a fakamatalaga e fai atu ki se akoga faka-te-Tusi Tapu. Ne maina a Iesu i mea kolā e vāi‵vāi ei ana soko. (Ioane 16:12) E ‵tau foki o mafau‵fau faka‵lei tatou ki mea kolā e iloa ne te tino akoga mai te Tusi Tapu. E pelā mo te faiga o se akoga i te tusi ko Te Iloaga Telā e Takitaki Atu ei ki te Ola Se-Gata-Mai, e se ‵tau o fakaasi atu a fakamatalaga likiliki katoa, io me e onoono fakavave ki fakamatalaga i ei, telā e foliga mai me i te ‵toe mea tāua, ko te fakaoti fakavave fua o te mataupu kātoa.a I lō te fai penā, se mea poto ke onoono ki manakoga mo te atamai o te tino akoga ke fakavae ki ei te vave o te akoga. A te ‵tou fakamoemoega ko te fesoasoani atu ki te tino akoga ke fai mo fai se soko o Keliso mo se tino tapuaki ki a Ieova. E ‵tau o fakamāumāu a taimi e uke ke fesoasoani atu ki a ia ke maina faka‵lei i mea kolā e tauloto ne ia. Tela la, e mafai o fakamalosi aka tena loto ne te munatonu ke fai a mea kolā e tauloto ne ia.​​—⁠Loma 12:⁠2.

⁷ Kafai e fai ne tatou a lauga i te fakapotopotoga, maise eiloa māfai e isi ne tino ‵fou, e mafai pefea o fakaaogā ne tatou a pati kolā e faigofie o “malamalama” i ei? (1 Kolinito 14:⁠9) Mafaufau ki manatu aogā e tolu kolā e mafai o fesoasoani mai. Muamua la, ke fakamatala atu a uiga o tugāpati ‵mafa kolā ka fakaaogā ne koe. A te ‵tou malamalama i te Muna a te Atua ne maua ei ne tatou se fakasologa o pati kolā e se masani ki ei te tokoukega o tino. Kafai e fakaaogā ne tatou a tugāpati pelā mo “te tavini fakamaoni kae poto,” “nisi mamoe,” mo “Papelonia te Sili,” kāti e ‵tau o fakaaogā a fuaiupu faigofie ke fakamatala faka‵lei atu ei olotou uiga. A te lua o mea, e ‵tau o ‵kalo keatea mai te fakaaogāga o pati e uke. Ko te uke o pati ‵mafa kolā e fakaaogā, ko te galo vave atu foki te fia fakalogologo o te tino. E mafai o manino ‵lei se mataupu māfai e se fakaaogā a pati mo fuaiupu kolā e se manakogina. A te tolu o manatu, ke mo a ma tō uke a fakamatalaga e sau‵tala ki ei. E maua a fakamatalaga ‵gali e uke māfai e fai ‵tou sukesukega totino. Kae se mea ‵lei ke fakatoka faka‵lei te mataupu ki nāi manatu tāua, mai te fakaaogāga o fakamatalaga kolā e ‵lago atu ki ei kae e mafai foki o fakaasi manino atu e ‵tusa mo te leva o te taimi.

Te Fakaaogāga o Fesili i se Auala Magoi

⁸ Masaua la me ne atamai ‵ki a Iesu i te fakaaogāga o fesili ke fakaasi mai ne ana soko a mea i olotou mafaufau kae ke fakamalosi kae akoako foki ei olotou mafaufau. E se gata i ei, ne fakaoko faka‵lei atu ne Iesu te munatonu ki olotou loto. (Mataio 16:​13, 15; Ioane 11:26) E mafai pefea o fakaaogā ne tatou a fesili i se auala magoi, e pelā mo Iesu?

⁹ Kafai e talai atu tatou mai fale ki fale, e mafai o fakaaogā ne tatou a fesili ke fakamalosi aka a te fia‵fia o tino, kae ke fakatoka foki ei se auala ke fai‵pati atu tatou e uiga ki te Malo o te Atua. E mafai pefea o filifili aka se fesili telā e fetaui ‵lei mo fakanofonofoga o te tino i te fale? Ke na matapulapula. Kafai e fanatu koe ki se fale, onoono faka‵lei atu ki te tafāfale. E mata, e isi ne mea ta‵fao i ei, kolā e fakaasi mai me e isi ne tamaliki i te fale? Kafai e penā loa, e mafai o fesili atu, penei: ‘Kai mafaufau aka loa koe ki te tulaga o te lalolagi māfai ko ma‵tua au tama‵liki?’ (Salamo 37:​10, 11) E mata, e uke a ‵loka i te mataloa? E mafai o fesili atu, penei: ‘E mata, e mafaufau koe me e isi se taimi ka se toe ma‵taku ei tatou, māfai ko ‵nofo atu i ‵tou fale mo auala?’ (Mika 4:​3, 4) E mata, e isi se nofoga fakatekateka i te fale? E mafai o fesili atu, penei: ‘E mata, e isi se taimi ka malosi ‵lei ei a tino katoa?’ (Isaia 33:24) E uke ‵ki a manatu aogā e mafai o maua i te tusi ko Te Auala e Mafai ei o Kamata Kae Faka‵soko Atu a Sau‵talaga Faka-te-Tusi Tapu.b

¹⁰ E mafai pefea o fakaaogā faka‵lei a fesili māfai ko fai a a‵koga faka-te-Tusi Tapu? E ‵kese mo Iesu, e se mafai o iloa ne tatou a mea i loto o tino. Mai te fakaaogāga o fesili kolā e fetaui ‵lei, e mafai ei o fesoasoani atu ke “aumai ki tua” a manatu mo lagonaga i te loto o te tino akoga. (Faataoto 20:⁠5) Kafai ko suke‵suke tatou ki te mataupu ko “Te Pogai e Maua ei a Fiafiaga Mai te Olaga Amio Atua,” i te tusi ko te Iloaga, e fakamatala mai i ei te kilokiloga a te Atua ki te sē fakamaoni, te finalalolagi, mo nisi mataupu aka. E mafai o taku ‵tonu mai ne te tino akoga a te tali ki fesili kolā ne ‵lomi i te tusi, kae e mata, e lotomalie a ia ki mea e tauloto ne ia? E mafai o fesili atu tatou, penei: ‘E mata, e lotomalie koe ki te kilokiloga a te Atua e uiga ki mea konā?’ ‘E mafai pefea o fakaaogā ne koe a akoakoga fakavae konei i te Tusi Tapu i tou olaga?’ Masaua faeloa o fakaasi atu te āva kae amanaia foki ki te tino akoga. E se ma‵nako tatou ke ‵sili atu a fesili kolā ka fakamā io me fakamasiasi ei a te tino akoga i te Tusi Tapu.​​—⁠Faataoto 12:⁠18.

¹¹ E mafai foki o fakaaogā ne se failauga a fesili i se auala magoi. A fesili kolā e se fakamoe‵moe tatou ke tali mai ne ‵tou tino fakalogo‵logo​—⁠e mafai o fesoasoani atu ke fakagasue‵sue aka ei olotou mafaufau. Ne fakaaogā ne Iesu i nisi taimi a vaegā fesili penā. (Mataio 11:​7-9) E se gata i ei, mai tua o pati fakatomua, e mafai o fakaaogā ne se failauga a fesili ke fakaasi mai i ei a manatu tāua ka faipati a ia ki ei. E mafai o fai atu a ia, penei, “I te lauga mō te aso nei, ka mafau‵fau tatou ki tali o fesili konei . . . ” E mafai o fakaoti tena lauga, ki te fakasino atu ki fesili konā ke faka‵foki atu ei a manatu tāua.

¹² I te āsi atu ki tino loto vāivāi, e mafai o fakaaogā ne toeaina Kelisiano a fesili ke fesoasoani atu ki ‘tino loto vāivāi,’ ke maua a fakamafanafanaga mai te Muna a Ieova. (1 Tesalonia 5:14) Ke fesoasoani atu ki se tino loto māfatia, e mafai o ‵suke se toeaina ki te Salamo 34:18. E fai mai, penei: “Te Aliki e nofo pili ki a latou kola e loto vaivai, e fakasao foki ne ia a latou kola ko seai ne olotou fakamoemoega.” Ke fakamautinoa aka me e iloa ne te tino loto vāivāi a te auala e aogā ei te tusi siki tenei ki a ia, e mafai o fesili atu a te toeaina, penei: ‘Ko oi e pili atu ki ei a Ieova? E mata, e ‘loto vāivāi’ koe i nisi taimi? Kafai e pili atu a Ieova ki vaegā tino penā, e pelā mo muna a te Tusi Tapu, e mata, e se fakauiga i ei me e pili atu foki ki a koe?’ A te fakatalitonu atu penā mo te alofa e mafai ei o fakamalosi aka se tino loto vāivāi.​​—⁠Isaia 57:⁠15.

Fakamatalaga ‵Tonu

¹³ E ma‵nako tatou ke fakaoko atu ki loto o tino i te ‵tou galuega talai, a fakamatalaga ‵lei kae ‵tonu. (Galuega 19:8; 28:​23, 24) E mata, e fakauiga i ei me e ‵tau o tau‵loto tatou ki fakamatalaga faiga‵ta ke tali‵tonu ei a nisi tino ki te munatonu i te Muna a te Atua? Ikai, e se penā loa. E se ‵tau o faiga‵ta a fakamatalaga ‵tonu. A fakamatalaga ‵tonu kolā e tuku atu i se auala faigofie e sili fakafia atu te lotou ma‵goi. Mafaufau ki se fakaakoakoga.

¹⁴ E mafai pefea o tali atu tatou ki se tino telā e fai mai me e se talitonu a ia ki se Atua telā e se mafai o lavea ne ia? E mafai o fakamatala atu ne tatou a te tulafono masani e uiga ki te māfuaga mo mea kolā e ‵tupu sāle. Kafai e lavea ne tatou se mea, ko iloa ei me e ‵tau o isi se māfuaga. E mafai o fai atu tatou, penei: ‘Kafai e fanatu koe ki te vao kae lavea ne koe se fale telā ne faite faka‵lei kae ko ‵fonu eiloa i meakai (se mea), e lotomalie katoatoa koe me e isi se tino (te māfuaga) ne faite ne ia te fale tenā kae faka‵fonu foki a sefe ki mea‵kai. E penā foki loa māfai e lavea ne tatou a mea kolā ne faite mo te uke o mea‵kai i te lalolagi (se mea), e mata, e se fakamaoni mai ei me e isi se Tino (se māfuaga) telā ne faite ne ia a mea konā?’ E tuku mai ne te Tusi Tapu se fakamatalaga manino, penei: “E tonu i fale katoa e faite ne se tino, ka ko te Atua ko ia tena ne faite ne ia a mea katoa.” (Epelu 3:⁠4) Kae faitalia eiloa te ‵lei o ‵tou fakamatalaga, e se ko tino katoa ka tali‵tonu ki ei. E fakamasaua mai te Tusi Tapu me ko tino fua kolā “ko oti ne filifilia mō te ola se gata mai” ka tali‵tonu.​​—⁠Galuega 13:48; 2 Tesalonia 3:⁠2.

¹⁵ Kafai e akoako atu tatou, faitalia me i te galuega talai io me ko te fakapotopotoga, e mafai o fakaaogā a fakamatalaga ‵tonu ke faka‵mafa atu ei a uiga mo faifaiga a Ieova. E sili atu foki te magoi o te tugāpati ko te ‘e se sili atu la,’ telā ne fakaaogā sāle ne Iesu. (Luka 11:13; 12:24) E masaua ‵lei ne tino a vaegā fakamatalaga ‵tonu konei me e fakatusatusa i ei a mea kese‵kese. Ke fakaasi faka‵sau atu te ‵se o te akoakoga ko te afi i seoli, e mafai o fai atu tatou, penei: ‘E seai eiloa se tamana alofa ka fakasala ne ia tena tamaliki ki te tuku atu o te lima o te tama ki loto i te afi. Kae e sili atu la te fakatakalialia o te manatu e uiga ki te afi i seoli ki te ‵tou Tamana alofa faka-te-lagi! (Ielemia 7:31) Ke akoako atu me i a Ieova e atafai ki ana tavini taki tokotasi, e mafai ne tatou o fai atu, penei: ‘Kafai e iloa ne Ieova a igoa o te fia piliona o fetu takitasi, e se sili atu la tena atafai ki tino kolā e a‵lofa ki a ia kae ko oti ne ‵togi ki te toto tāua o tena Tama!’ (Isaia 40:26; Galuega 20:28) Kafai e fakaaogā a fakamatalaga ‵tonu penā e mafai ei o fesoasoani mai ke fakaoko atu a fakamatalaga ki loto o tino.

Tala Fakatusa Kolā e Fetaui ‵Lei

¹⁶ E fai ne tala fakatusa ma‵goi ke gali a te auala e akoako atu ei tatou. Kaia e tāua ei a tala fakatusa i te faiga o akoakoga? E fai mai se faiakoga, penei: “A te mafaufau ki fakamatalaga e aunoa mo ata se mea faigata ‵ki ki tino.” E tuku mai ne tala fakatusa se ata manino ki ‵tou mafaufau, telā e fesoasoani mai i ei ke momea aka te katoatoa o ‵tou malamalama i manatu ‵fou. Ne tu ‵kese a Iesu i te fakaaogāga o tala fakatusa. (Maleko 4:​33, 34) Ke na mafau‵fau faka‵lei ki te auala e mafai ei o akoako atu tatou i te auala tenei.

¹⁷ Ne a mea e fai ei se tala fakatusa ke magoi? Muamua la, e ‵tau o fetaui ‵lei mo ‵tou tino fakalogo‵logo, me e fakaaogā i ei a mea e masani ki ei a tino. E masaua ne tatou me ne fakaaogā ne Iesu a mea ne fai sāle ne tino fakalogo‵logo i te ukega o ana tala fakatusa. A te lua o mea, e ‵tau o ‵pau a te tala fakatusa mo te manatu telā e faka‵mafa atu. Kafai e se fetaui ‵lei te fakatusaga, e se maina ‵tou tino fakalogologo i te pogai tāua e fai ei te tala fakatusa. A te tolu o mea, e se ‵tau o aofia a fakamatalaga e uke i se tala fakatusa. Masaua la, me ne tuku mai ne Iesu a manatu tāua kae ne seki taku mai ne ia a fakamatalaga sē aogā. A te fa o mea, kafai e fakaaogā ne tatou se tala fakatusa, e ‵tau o fakamautinoa aka me e manino ‵lei te manatu aogā i ei. Kafai e se penā, ailoga eiloa e malamalama a nisi tino i te manatu aogā tenā.

¹⁸ E mafai pefea o maua ne tatou a tala fakatusa kolā e fetaui ‵lei mo te olaga o tino? E se ‵tau o fai ne tatou a tala aveave‵loa kae faka‵numi. E mafai o ma‵goi ‵ki a tala fakatusa toe‵toe. Taumafai o mafaufau ki fakaakoakoga aogā kolā e fetaui mo te manatu telā e fakamatala atu. Kafai ko sau‵tala tatou e uiga ki te loto fakamagalo o te Atua, kae e ma‵nako tatou ke faka‵mafa atu te manatu i te Galuega 3:​19, telā e fai mai me i a Ieova e “fakamagalo” ne ia ‵tou mea ‵se. Se a te fakaakoakoga e mafai o fakaaogā ne tatou ke faka‵mafa mai i ei te manatu tenā​—⁠se ‵solo? se omomi ‵fulu tifa? E mafai ne tatou o fai atu, penei: ‘Kafai e fakamagalo ne Ieova ‵tou agasala, e ‵solo keatea a agasala konā e pelā me e fakaaogā ne ia se omomi (io me se ‵solo).’ Se mea faigofie fua ke malamalama i te manatu e fakaasi mai i se vaegā tala fakatusa faigofie penā.

¹⁹ E maua ne koe i fea a tala fakatusa kolā e fetaui ‵lei mo te olaga o tino, pelā foki mo fakaakoakoga o mea ne ‵tupu tonu i te olaga? Ke onoono ki mea kolā ne ‵tupu ki a koe io me ko olaga mo tala kese‵kese o taina tali‵tonu. E mafai foki o filifili aka a tala fakatusa mai i nisi mea aka, e aofia ei a mea ola mo mea sē ola, kope i loto i te fale, io me se fakalavelave lauiloa ne tupu i te fenua. A te auala magoi ke maua ei a tala fakatusa ‵lei ko te matapulapula, ke “matea” atu a fakanofonofoga i aso katoa i ‵tou tafa. (Galuega 17:​22, 23) E fakamatala mai se tusi fesoasoani e uiga ki te faipati atu i mua o tino, penei: “A te failauga telā e onoono ki te olaga o te tino mo ana galuega kese‵kese, e sau‵tala mo tino kese‵kese katoa, e iloilo faka‵lei ne ia a mea katoa kae ‵sili atu a fesili ke oko ki te taimi ko malamalama faka‵lei ei a ia, ka maua ne ia a mea e uke ke fakaaogā e pelā me ne tala fakatusa kae ka fesoasoani malosi atu māfai ko manako ki ei.”

²⁰ E isi foki se isi auala tāua e maua ei a tala fakatusa ma‵goi​—⁠ko Te Faleleoleo Maluga, Awake!, mo nisi tusi kolā ne ‵lomi ne Molimau a Ieova. E mafai o tauloto ne koe a mea e uke mai te onoono atu ki te auala e fakaaogā ei ne tusi konei a tala fakatusa.c Mafaufau aka ki te tala fakatusa telā ne fakaaogā i te palakalafa e 11 o te tusi ko te Iloaga, te mataupu e 17. E fakatusa i ei a te kese‵kese o uiga o tino i te fakapotopotoga ki motokā kese‵kese kolā e ‵tele atu i te auala. Kaia e magoi ei te tala fakatusa tenā? Masaua la me ne fakavae ki mea masani e ‵tupu i aso katoa, kae e ‵pau eiloa mo te manatu ne faka‵mafa mai i ei, kae e manino ‵lei foki te manatu aogā i ei. E mafai o fakaaogā a tala fakatusa kolā ko oti ne ‵lomi mai i te faiga o ‵tou akoakoga, kae kāti e ‵fuli malie aka ki manakoga o te tino akoga io me e fakafetaui aka ke fakaaogā i se lauga.

²¹ E lasi ‵ki te taui māfai e fai tatou mo fai ne faiakoga ma‵goi. I te ‵tou akoako atu, e fakaasi atu ei ki nisi tino a mea kolā ko iloa ne tatou; kae fakaaogā ne tatou a mea totino ke fesoasoani atu ki a latou. A te tuku atu o mea penā, e maua i ei te fiafia, me e fai mai te Tusi Tapu, penei: “E sili atu te manuia o te tino tela e tuku atu fua ana mea i lo o te tino tela e talia ne ia.” (Galuega 20:35) A te fiafia telā e maua ne faiakoga o te Muna a te Atua, ko te lotomalie ona ko te iloaga me e tuku atu ne tatou se mea telā e aogā tonu kae tumau​​—⁠ko te munatonu e uiga ki a Ieova. E lotoma‵lie foki tatou mai te iloaga me e fakaakoako atu tatou ki te Faiakoga Sili, ko Iesu Keliso.

[Fakamatalaga mai lalo]

E Masaua ne Koe?

• E mafai pefea o akoako atu tatou i se auala faigofie māfai e fai se akoga faka-te-Tusi Tapu i te fale? māfai e fai se lauga i te fakapotopotoga?

• E mafai pefea o fakaaogā ne tatou a fesili i se auala magoi māfai ko talai atu mai fale ki fale?

• E fakaaogā pefea ne tatou a fakamatalaga ‵tonu ke faka‵mafa atu ei a uiga mo faifaiga a Ieova?

• E maua ne tatou i fea a tala fakatusa kolā e fetaui ‵lei?

[Fesili mo te Sukesukega]

1, 2. (a) E fai pefea tatou katoa mo fai ne faiakoga i nisi taimi? (e) Kafai e mafau‵fau tatou ki te faiga o akoakoga, se a te tiute tāua telā e maua ne Kelisiano ‵tonu?

3. E mafai pefea o momea aka ‵tou ma‵goi e pelā me ne faiakoga?

4, 5. (a) Kaia e tāua ei te akoako atu o te munatonu i te Tusi Tapu i se auala faigofie? (e) Kaia e tāua ei ke mafaufau faka‵lei ki ‵tou pati e fakaaogā, ke akoako atu tatou i se auala faigofie?

6. E mafai pefea o ‵kalo keatea tatou mai te tukuatuga o fakamatalaga e uke ki se tino telā e fai tena akoga faka-te-Tusi Tapu?

7. Ne a manatu aogā e mafai o fesoasoani mai ke akoako atu i se auala faigofie māfai ko fai a lauga i te fakapotopotoga?

8, 9. E mafai pefea o filifili aka se fesili telā e fetaui ‵lei ki fakanofonofoga o te tino i te fale? Ke taku mai ne fakaakoakoga.

10. E mafai pefea o fakaaogā ne tatou a fesili ke ‘aumai ei ki tua’ a mafaufauga mo lagonaga o te tino akoga i te Tusi Tapu, kae se a te mea telā e ‵tau o masaua ne tatou?

11. Ne a auala ma‵goi e mafai ei o fakaaogā ne failauga a fesili?

12. Tuku mai se fakaakoakoga ki te auala e mafai ei o fakaaogā ne toeaina Kelisiano a fesili ke fesoasoani atu ki se taina talitonu ke maua ne ia a fakamafanafanaga mai te Muna a te Atua.

13, 14. (a) E mafai pefea o tali atu tatou ki se tino telā e fai mai me e se talitonu a ia ki se Atua telā e se mafai o lavea ne ia? (e) Kaia e se ‵tau ei o fakamoe‵moe tatou me ko tino katoa ka tali‵tonu?

15. Se a te fakamatalaga e mafai o fakaaogā ke faka‵mafa atu ei a uiga mo auala o Ieova, kae ne a fakaakoakoga e lua e mafai o fakaaogā ne tatou?

16. Kaia e tāua ei a tala fakatusa i te faiga o akoakoga?

17. Ne a mea e fa kolā e fai ei se tala fakatusa ke magoi?

18. E mafai pefea o maua ne tatou a tala fakatusa kolā e fetaui ‵lei mo te olaga o tino?

19, 20. (a) E mafai o maua ne tatou i fea a tala fakatusa ‵lei? (e) Ne a nisi fakaakoakoga o tala fakatusa ma‵goi ne ‵lomi i ‵tou tusi? (Ke onoono foki ki te pokisi.)

21. Ne a fakamanuiaga e maua ne tatou māfai e fai tatou mo fai ne faiakoga ma‵goi o te Muna a te Atua?

[Pokisi/Ata i te itulau e 31]

E Masaua ne Koe a Tala Fakatusa Konei?

E fakasolo mai lalo nei a nāi tala fakatusa ma‵goi. Kaia e se onoono ei ki te tusi e maua i ei kae mafaufau ki te auala ne fesoasoani atu a te tala fakatusa ki te faka‵mafaatuga o te manatu telā ne sau‵tala ki ei?

• E pelā me se tino telā e ‵kini ne ia te kāpa fakatasi mo se fafine leo gali telā e usu atu ne ia a pese pelā foki mo te ‵peiatuga o se pokisi ‵mafa ne se tokolua tāgata ki te suā tagata, e fakalagolago malosi eiloa a te atiakaga o se fakaipoipoga fiafia ki te mauaga o se soa telā e fetaui ‵lei.​​—⁠Te Faleleoleo Maluga, i a Iuni 1, 2001, te itulau e 11.

• A te fakaasiatuga o lagonaga ki te avaga e fai pelā mo te ‵peiatuga o se pōlo. E mafai o pei malie atu fua ne ia te pōlo ki tou tagata kae e faigofie ke sapo ne ia, io me e mafai o ‵pei ‵kini atu kae pakia tou tagata i ei.​​—⁠Te Iloaga Telā e Takitaki Atu ei ki te Ola Se-Gata-Mai, te mataupu e 15, te itulau e 144.

• A te tau‵loto ki te fakaasiatuga o te alofa e fai pelā mo te tauloto ki se ‵gana fou.​—⁠Te Faleleoleo Maluga, i a Mati 1, 1999, te itulau e 11, 15, 16.

• A te mauaga o te tulaga agasala e mafai o fakatusa ki pati e tusi i se fatu, ne ‵mautakitaki eiloa te agasala i vaega katoa o ‵tou foitino.​—⁠Te Iloaga Telā e Takitaki Atu ei ki te Ola Se-Gata-Mai, te itulau e 58.

• E fakaaogā sāle ne temoni a te faivailakau e pelā mo tino faiika e fakaaogā sāle ne latou a poa. E fakalata mai i ei a mea kolā e fia ‵po aka.​—⁠Te Iloaga Telā e Takitaki Atu ei ki te Ola Se-Gata-Mai, te itulau e 111.

• A te faka‵saoga ne Iesu o tama‵liki a Atamu e mafai o fakatusa ki se tagata maukoloa telā ne ‵togi ne ia te kaitalafu a se pisinisi (telā ne fai ne te menetia sē fakamaoni) kae ne toe fakagalue aka ne ia te pisinisi, telā ne aogā ei ki tino ga‵lue e tokouke.​—⁠Te Faleleoleo Maluga, i a Fepuali 1, 1992, te itulau e 13.

• E tumau a te tulafono a te Atua kae e se mafulifuli e pelā me se fale i luga i te kaupapa telā e maina atu i ei te moli.​—⁠Te Faleleoleo Maluga, i a Me 1, 2002, te itulau e 13.