Manatu e Tolu ki te Faka‵leiga o Tou Atamai i te Akoako Atu
1. Kaia e ‵tau ei o taumafai tatou ke faka‵lei aka ‵tou atamai i te akoako atu?
1 A faifeau Kelisiano katoa ne faiakoga. Faitalia me e fai ne tatou a te āsiga muamua, te ‵toe foki atu o ati aka a te fiafia, io me ko te faiga o se akoga faka-te-Tusi Tapu, e fakaoko atu eiloa ne tatou a fakamatalaga. Kae ko fakamatalaga e akoako atu ne tatou ne mea tāua ‵ki eiloa. E fakamaina atu ne tatou a te mainaga ki “tusitusiga tapu,” kolā e fai ei a tino ke ‘‵poto e uiga ki te fakaolataga.’ (2 Timo. 3:15) Ko se faka‵tau eiloa i te gali o te tauliaga tenei! Konei la a manatu e tolu ki te faka‵leiga o ‵tou atamai i te akoako atu.
2. E mafai pefea o akoako atu tatou i se auala faigofie?
2 Faigofie: Kafai e iloa ‵lei ne tatou se mataupu, e mafai eiloa o puli vave i a tatou a te faigata o te fakamatalaga ki se tino telā e se iloa ne ia. Tela la, kafai e fai ne tatou se akoga faka-te-Tusi Tapu, ke mo a ma aofia ne tatou a fakamatalaga kolā e se manakogina i te taimi e akoako atu ei koe. I lō te fai penā, ke faka‵mafa atu a manatu tāua. E se fakauiga loa a te faipati ‵soko ki te ‵lei o te akoako atu. (Faata. 10:19) Se mea tafasili i te ‵lei ke faitau atu fua a tusi fai‵tau tāua. Mai tua o te faitauga o se tusi faitau, ke ‵saga tonu atu fua ki te vaega telā e fetaui mo te mataupu. A te Lāuga i luga i te Mauga, telā ne fakamau i te Mataio mataupu e 5 ki te 7, e aofia i ei a muna‵tonu tāua, kae ne akoako atu ne Iesu i se auala faigofie mo nai pati foki.
3. Se a te tāua o tala fakatusa, kae ne a vaegā tala fakatusa tafasili i te ‵lei?
3 Tala Fakatusa: E fakagasuesue ne tala fakatusa a mafaufauga, lagonaga, kae fesoasoani mai ke masaua ne tatou. Ke mo a ma mafaufau koe me e ‵tau o fai koe mo fai se tino poto i te fakamatalaga o tala ke tuku atu ei ne koe a tala fakatusa ‵lei. Ne fakaaoga faeloa ne Iesu a tala fakatusa toe‵toe kae faigofie. (Mata. 7:3-5; 18:2-4) A te ‵lomiga o ata faigofie ki luga i se tamā pepa e mafai o fesoasoani malosi ‵ki. Kafai e fakatoka faka‵lei ki ei, e mafai eiloa o fakaaoga ne koe a tala fakatusa ma‵goi.
4. E mafai pefea o fakaaoga ne tatou a fesili i se auala magoi?
4 Fesili: E fai ne fesili ke mafaufau faka‵lei a tau akoga faka-te-Tusi Tapu. Tela la, ke kufaki koe i te taimi e ‵sili atu ei ne koe se fesili. Kafai e tuku fakavave atu ne koe a te tali, ka se iloa ‵lei ei ne koe a mea kolā e malamalama i ei tau akoga faka-te-Tusi Tapu. Kafai e ‵se tena tali, kāti e ‵lei atu ke takitaki atu ne koe a ia ki te tali tonu mai i te fakaaogaga o nisi fesili i lō te fakasao fakavave aka ne koe a ia. (Mata. 17:24-27) E tonu, e seai eiloa se tino i a tatou e fai mo fai se faiakoga ‵lei katoatoa. Tela la, e fakamalosi mai a te Tusi Tapu ke ‵saga tonu atu tatou ki te auala e akoako atu ei tatou. Kafai e fai tatou penā, ka maua ei ne tatou a mea aoga tumau mo latou kolā e fakalogo‵logo mai ki a tatou.—1 Timo. 4:16.