Kaia? ‘Te Atua, Kaia ne Talia ei ne Koe te Mea Tenei?’

KOI masaua eiloa ne Likato a te taimi ne faka‵tali ei laua mo tena avaga ko Malia i te fa‵kaimasaki ki te lipoti mai te tokitā.a Ne seki fia onoono laua ki te ‵toe lipoti mai te tokitā e uiga ki te masaki o Malia. Fakamuli loa, ne ‵tala ne Likato te teutusi kae fatiotio atu ki pati fakatokitā i te lipoti tenā. Ne lavea ne laua te pati ko te “kenisa” kae ne kamata o ‵tagi me ko maina ‵lei laua i te uiga o te pati tenā.

“Ne gali ‵ki a uiga o te tokitā,” ko pati a Likato, “kae ne iloa ‵lei ne ia te tulaga o te masaki me ne fai mai faeloa ‘ke tali‵tonu maua ki te Atua.’ ”

A koi tuai o fai a togafiti fakatokitā ki a Malia ne lavea atu ne te tokita me e polepole sāle tena vae fakaatamai. Fakamuli ifo, ne fakaasi mai ne iloiloga ki ei me ko oko atu a te kenisa ki tena faiai. Ne taofi aka a togafiti fakatokitā mai tua ifo o se vaiaso e tasi. Ne gasolo eiloa o masaki malosi a Malia telā ne moe palapala ei a ia kae i se lua masina mai tua ifo i ei ne mate atu ei tou fafine. “Ne fiafia au me ko gata atu ana logo‵maega,” ko pati a Likato, “kae ne manatunatu faeloa au ki a ia telā ne manako foki ei au ke na mate atu. E masani o tagi sāle atu au ki te Atua, penei: ‘Kaia ne talia ei ne koe ke tupu te mea tenei?’ ”

E ‵Sae Aka a Fesili Māfai ko Tupu se Fakalavelave

E pelā mo Likato, e fe‵paki foki a tino e tokouke i te lalolagi kātoa mo logo‵maega. I te ukega o taimi, e logo‵mae sāle a tino ‵lei. Ke mafaufau ki te fanoanoa telā e māfua mai i taua kolā e se mafai o fakagata. Io me mafaufau ki te logo‵mae telā ne māfua mai i te pukemālōga o tino, te maneaneaga o tama‵liki, te fakasauāga i loto i te kāiga, mo nisi amioga ma‵sei kolā ne fai ne tino. Talu mai te kamataga, e foliga mai me e kese‵kese a faifaiga sē fakamaoni mo logo‵maega kolā ne fakaoko atu ki tino. (Failauga 4:​1-3) E se gata i ei, ne logo‵mae foki a tino kolā ne aofia i fakalavelave ‵tupu fakafuasei io me ko masaki tau te lagonaga, te feitu faka-te-mafaufau, mo te feitu faka-te-foitino. E se tioa eiloa o fesili ifo a tino e tokouke, penei: “Kaia ne talia ei ne te Atua a vaegā logo‵maega penei?”

Ke oko foki eiloa ki tino ‵lotu, e se se mea faigofie ki a latou ke fakafesagai atu ki logo‵maega. Kāti ko mafaufau foki koe ki te pogai e talia ei ne se Atua alofa kae malosi katoatoa ke logo‵mae a tino. Se mea fakamalie loto ke maua aka a tali ki fesili faka‵numi konei, ko te mea ke maua i ei se va ‵lei kae fealofani o tatou mo te Atua. E tuku mai ne te Tusi Tapu se vaegā tali penā. Ke na mafaufau faka‵lei ki pati kolā e fakaasi mai i te Tusi Tapu i te suā mataupu.

[Fakamatalaga mai lalo]

[Ata i te itulau e 3]

Ne fai mai faeloa a te tokita ke tali‵tonu maua ki te Atua