“Ke Loto Ma‵losi Koutou! Ko Oti ne Fakatakavale ne Au te Lalolagi!”

NE KAMATA te po 14 o te masina faka-Iutaia ko Nisani i te taimi ne tō ei te mata o te la i te Aso Fa, te po 31 o Mati, i te 33 T.A.​—⁠ko te aso telā ne mate ei a Iesu. I te afiafi eiloa tenā, ne maopoopo fakatasi a Iesu mo ana apositolo i te potu tafa ki luga o se fale e tasi i Ielusalema ke fakamanatu ei ne latou te Paseka. Ko pili o ‘tuku ne ia te lalolagi nei, kae fanatu ki tena Tamana,’ kae ne fakaasi atu ne Iesu tena alofa ki ana apositolo ke oko eiloa ki te taimi ne mate ei a ia. (Ioane 13:⁠1) E pefea la? Mai i te akoako atu ki a latou a akoakoga tāua ke fakatoka ei latou mō mea kolā ka ‵tupu i aso mai mua.

Fakamuli ifo, i te po eiloa tenā, ne fai atu Iesu ki ana soko, penei: “Ke loto ma‵losi koutou! Ko oti ne fakatakavale ne au te lalolagi.” (Ioane 16:33) Se a te mea ne fakauiga a ia ki ei i ana pati fakamalosi loto konā? E aofia i ei a te mea tenei: ‘Ne seki mafai ne faifaiga ma‵sei i te lalolagi o fai ei au ke ita fakamoemoe io me taui ma sui. Ne seki talia eiloa ne au te lalolagi ke ‵fuli ne ia toku mafaufau. E mafai foki ne koutou o fai penei.’ Ka fesoasoani atu eiloa a mea kolā ne akoako ne Iesu i tena toe po i te lalolagi nei ke mafai ne ana apositolo fakamaoni o fakatakavale foki ne latou te lalolagi.

Ko lausa valevale a amioga ma‵sei i te lalolagi nei! E pefea ‵tou lagonaga e uiga ki faifaiga sē fakamaoni mo amioga fakasauā kolā ko sōnafai valevale? E mata, e fai ei tatou ke ita fakamoemoe kae taui ma sui? Ne a mea ka fai ne tatou ona ko faifaiga ma‵sei i ‵tou tafa? E atea foki mo ‵tou tulaga sē ‵lei katoatoa mo ‵tou manakoga fia fai agasala. Tenā la, e iku atu i ei ki te ‵tou taua atu ki mea e lua: ko te lalolagi masei i ‵tou tafa, penā foki loa mo ‵tou manakoga ma‵sei. E mata, e mafai fua o manumalo tatou e aunoa mo te fesoasoani o te Atua? E maua pefea ne tatou tena fesoasoani? Ne a uiga e ‵tau o maua ne tatou ke ‵teke atu ei ki manakoga o te foitino? Ke maua aka a tali ki fesili konā, ke onoono tatou ki mea ne akoako atu ne Iesu ki ana soko i tena ‵toe po i te lalolagi nei.

Ke Fakatakavale te Fakamatamata ne te Loto Maulalo

Ke mafaufau aka ki te avā uiga ma‵sei ko te fakamatamata mo te fia sili. Ne fai mai te Tusi Tapu e uiga ki mea konā, penei: “A te fakamatamata e iku ki te malaia, a te fiasili e iku ki te sē aogā.” (Faataoto 16:18) E polopoloki foki tatou ne te Tusi Tapu, penei: “Kafai se tino e taofi i a ia se tino aogā, kae telā ei e se aogā, ko fakaloiloi a ia ne ona manatu.” (Kalatia 6:⁠3) E tonu, e mafai o fakamaseigina kae takitaki‵segina tatou ona ko te fakamatamata. Se mea poto ke takalia‵lia tatou “ki te fakamatamata mo te fia sili.”​​—⁠Faataoto 8:​13.

E mata, ne fia ‵sili kae fakamata‵mata foki a apositolo o Iesu? I nisi taimi, ne fakakinau malosi latou me ko oi te tino e sili i a latou. (Maleko 9:​33-​37) Ne fakamolemole atu foki a Iakopo mo Ioane ke maua ne laua ne tulaga ma‵luga i te Malo o te Atua. (Maleko 10:​35-​45) Ne fia fesoasoani atu Iesu ki ana soko ke mo a ma fia ma‵luga latou. Tela la, i te taimi ne ‵kai ei latou i te ‵kaiga o te Paseka, ne tu aka a ia ki luga, ne sai tena solo ki tena taugasulu kae mulumulu ne ia a vae o ana soko. Ne fakaasi faka‵lei atu ne ia te mea telā ne fia akoako atu ne ia ki a latou. Ne fai atu Iesu, penei: “Ko au ko te otou Aliki mo te otou Faiakoga, kae ne fatoā oti atu eiloa ne mulumulu ne au otou vae. E ‵tau la mo koutou o fakatau mulumulu otou vae.” (Ioane 13:14) E ‵tau o sui aka te fakamatamata ki te loto maulalo.

E se se mea faigofie ke ‵fuli aka a uiga fakamatamata. I te afiafi eiloa tenā, mai tua o te taimi ne ‵tuli ei a Iuta te Isikaliota telā ne fakalata ne ia Iesu, ne fakatau kinau valevale a apositolo e toko 11. Kaia ne kinau ei latou? Me ko oi e sili atu i a latou! I lō te kotekote atu ki a latou, ne toe fakaasi faka‵lei atu ne Iesu a te tāua ke tavini atu mō nisi tino. Ne fai mai a ia, penei: “A tupu o te lalolagi nei e isi ne olotou malosi o pule ki olotou tino; ka ko pule foki konā e fakaigoa ko ‘Taugasoa o Tino.’ Kae ke se penā koutou, ko te tino telā e sili i a koutou, ke fai a ia pelā mo se tino tafa foliki, ko te tino telā e pule, ke fai a ia pelā mo se tavini.” Ne fakamasaua atu ne ia ki ana apositolo tena fakaakoakoga, ana muna: “Ka ko au nei, e i a koutou e pelā mo se tavini.”​​—⁠Luka 22:​24-​27.

E mata, ne maina te kau apositolo i ei? Ao, e se taumate ne maina eiloa latou. I te fia o tausaga fakamuli ifo, ne tusi mai te apositolo ko Petelu, penei: “E ‵tau o tasi katoa otou mafaufauga pelā foki mo otou lagonaga; ke fakatau a‵lofa koutou e pelā mo ne tautaina, ke fakatau atafai kae loto ma‵lalo foki koutou.” (1 Petelu 3:⁠8) E tāua ‵ki ke manumalo te loto maulalo i te fakamatamata! Se mea poto ke sē kausaki atu tatou ki te fia lauiloa, te fia pule, mo te fia maluga. E fai mai te Tusi Tapu, penei: “E ‵teke ne te Atua a tino fakamata‵mata, kae tuku atu ne ia a te alofa tauanoa ki tino loto ma‵lalo.” (Iakopo 4:⁠6) E isi foki se tugāpati taumua telā e aogā mō tatou: “Fakalogo ki te Aliki [ko Ieova], kae loto maulalo, kae ka maua ne koe te maumea, te fakaaloalogina mo te ola leva.”​​—⁠Faataoto 22:⁠4.

E Manumalo Pefea Tatou i te Ita Fakamoemoe?

Ke mafau‵fau ki te suā uiga telā ko lauiloa i te lalolagi nei​​—⁠ko te ita fakamoemoe. Faitalia me e māfua mai te uiga tenā i te mataku, te sē maina, te fakailoga tino, te fakasauā, te sē fakamaoni mo te loto fenua, kae ko salalau valevale eiloa te uiga tenā i ‵tou tafa. (2 Timoteo 3:​1-4) Ne lauiloa foki a te uiga ko te takalialia i aso o Iesu. Ne takalia‵lia sāle a tino Iutaia ki te kau ao lafoga. Ne seki fealofani te kau Iutaia mo te kau Samalia. (Ioane 4:⁠9) Kae ne takalia‵lia foki a te kau Iutaia ki tino mai Fenua Fakaa‵tea. Fakamuli ifo, ne fakatu aka ne Iesu te tapuakiga telā ne ‵kau fakatasi i ei a tino mai fenua katoa. (Galuega 10:​34, 35; Kalatia 3:​28) Kae ona ko tena alofa ki ana soko, ne tuku atu ei ne ia se mea fou ki a latou.

Ne folafola atu Iesu, penei: “E avatu ne au ki a koutou te poloakiga fou: ke fakatau a‵lofa koutou. E pelā mo au e alofa ki a koutou; tela la, e ‵tau mo koutou o fakatau a‵lofa.” E ‵tau o fakaasi atu ne latou te alofa tenei me ne toe fai mai a ia, penei: “Tenā te mea e iloa ei ne tino katoa ko oku soko koutou, manafai e fakatau a‵lofa koutou.” (Ioane 13:​34, 35) Ne fou ‵ki te tulafono tenā, me e uke atu a mea e aofia i ei i lō te ‘alofa fua o se tino ki tena tuakoi e pelā eiloa mo tena alofa ki a ia eiloa.’ (Levitiko 19:18) E pefea la? Ne toe fakamaina mai ne Iesu te mea tenei, ana muna: “Tenei taku poloakiga; ke fakatau a‵lofa koutou, e pelā eiloa mo au e alofa atu ki a koutou. A te alofa tafasili e ‵tau o fakaasi ne te tino, ko te tuku atu o tona ola e sui ei a ola o ona taugasoa.” (Ioane 15:​12, 13) E ‵tau o lotoma‵lie te kau soko o fakatau tuku atu olotou ola mō latou eiloa pelā foki mo nisi tino.

E mafai pefea ne tino sē ‵lei katoatoa o ‵kalo keatea mai te ita fakamoemoe? Mai i te fakaasiatuga o te alofa kaimalie. Tenā eiloa te mea e fai ne te fia miliona o tino fakamaoni kolā ne au‵mai mai fenua katoa kae e kese‵kese olotou tū mo aganū, olotou lotu mua mo faifaiga fakapolitiki. Ko ‵kau fakatasi nei latou e aunoa mo te ita fakamoemoe ki te kautaina o Molimau a Ieova i te lalolagi kātoa. E tau‵tali atu latou ki pati a te apositolo ko Ioane, penei: “So se tino e ita ki so se tino, ko tona uiga se tino tatino; kae e iloa ne koutou i te tino tatino, e se nofo i a ia te ola se gata mai.” (1 Ioane 3:​15) E se gata fua i te sē ‵kau atu o Kelisiano ‵tonu ki taua kae e ga‵lue malosi foki latou o fakatau fakaasi atu te lotou a‵lofa.

Se a la te ‵tou kilokiloga ki tino sē tali‵tonu kolā e takalia‵lia mai ki a tatou? I te taimi ne fakasataulo ei a Iesu, ne ‵talo atu a ia mō tino kolā ne tamate ne latou a ia, penei: “Toku Tamana, fakamagalo latou; me se iloa ne latou te lotou mea tenei e fai.” (Luka 23:34) I te taimi ne peipei ei a Setefano ne tāgata kolā ne takalia‵lia ki a ia, ne fai atu a ia, penei: “Te Aliki, ke fakamagalo ne koe te lotou agasala.” (Galuega 7:​60) Ne seki ma‵nako a Iesu mo Setefano ke fakasala a tino kolā ne takalia‵lia ki a laua. Ne seki ita fakamoemoe lele eiloa laua. E fakamalosi mai te Tusi Tapu ki a tatou, penei: “E ‵tau mo tatou o fai te mea ‵lei ki tino katoa.”​​—⁠Kalatia 6:​10.

‘Te Fesoasoani ki te Se Gata Mai’

I te taimi ne maopoopo ei a Iesu mo ana apositolo fakamaoni e toko 11, ne fakailoa atu ne ia i ei me ko pili o se toe ‵nofo fakatasi a ia mo latou i te feitu faka-te-foitino. (Ioane 14:28; 16:28) Kae ne fai ‵tonu atu a ia ki a latou, penei: “Ka fakatagi atu foki au ki te Tamana, ko uga mai ei ne ia ki a koutou te suā Fesoasoani, ko te Agaga o te munatonu. Ko te mea ke nofo mau i a koutou ki te se gata mai.” (Ioane 14:16) A te fesoasoani tenā ko te agaga tapu o te Atua. Ka akoako latou ne te agaga tenā ki mea kolā ne faiga‵ta o maina latou i ei mai te Tusi Tapu kae ka fakamasaua atu foki a mea katoa kolā ne akoako atu ne Iesu ki a latou i tena nofoga i te lalolagi nei.​​—⁠Ioane 14:⁠26.

E fesoasoani mai pefea a te agaga tapu ki a tatou i aso nei? Ke masaua la, a te Tusi Tapu ko te Muna a te Atua. “Ka ko te Agaga Tapu e fakatasi atu” ki tino kolā ne fai ne latou a valoaga, penā foki loa mo tino kolā ne tusi ne latou te Tusi Tapu. (2 Petelu 1:​20, 21; 2 Timoteo 3:​16) Kafai e sukesuke tatou ki te Tusi Tapu kae fakagalue foki a mea kolā ko iloa ne tatou i ei ka maua ei ne tatou a te poto, te malamalama, te atamai, te fakautauta mo mafaufauga ‵lei. Ko toka ‵lei ei tatou ke ‵teke atu ki fakaosoosoga mai te lalolagi, i ne?

Kae e fesoasoani mai foki te agaga tapu i se isi auala aka. E fakamalosi foki ne te agaga tapu o te Atua a tino ke fakaasi atu ne latou a uiga amio atua. E fai mai te Tusi Tapu, penei: “Ka ko fua o te Agaga, ko te alofa, te fiafia, te filemu, te kufaki, te mataalofa, te ‵lei, te fakamaoni, te loto malalo, mo te loto pulea.” Konei eiloa a uiga e ‵tau o maua ke manumalo ei tatou i manakoga faka-te-foitino e pelā mo te finalalolagi, te fai taua, te loto masei, te loto ita, mo nisi uiga aka, i ne?​​—⁠Kalatia 5:​19-​23.

Kafai e fakalago‵lago atu tatou ki te agaga o te Atua, e mafai foki o maua ne tatou te malosi e sili atu i te malosi masani ke ‵teke atu ei ki fakalavelave mo tofotofoga. (2 Kolinito 4:⁠7) E ui eiloa ka se ave keatea ne te agaga tapu a tofotofoga mo fakaosoosoga, ka fesoasoani mai eiloa a te agaga tenā ke kufaki tatou. (1 Kolinito 10:13) Ne tusi mai te apositolo ko Paulo, penei: “E mafai ne au o fai a mea katoa konā, ona ko te fakamalosi mai o Keliso ki a au. (Filipi 4:​13) E tuku mai ne te Atua te vaegā malosi penā e auala i tena agaga tapu. Ko tafaga la te lasi o te ‵tou loto fakafetai ona ko te agaga tapu! A te agaga tenā e maua fua ne tino kolā e a‵lofa ki a Iesu kae tausi ki ana fakatonuga.​​—⁠Ioane 14:⁠15.

“Ke Tumau la Koutou i Toku Alofa”

I tena ‵toe po i te lalolagi nei, ne toe fai atu a Iesu ki ana apositolo, penei: “So se tino e talia ne ia aku poloakiga kae tausi ki ei, ko ia tenā e alofa mai ki a au; a ia foki telā e alofa ki a au, e alofagina ne toku Tamana.” (Ioane 14:21) Ne fakamalosi atu a ia ki a latou, penei: “Ke tumau la koutou i toku alofa.” (Ioane 15:⁠9) E fesoasoani mai pefea a te tumau i te alofa o te Tamana mo te Tama ke manumalo tatou i te taua atu ki ‵tou manakoga ma‵sei, penā foki loa mo te lalolagi masei i ‵tou tafa?

E mata, e mafai o taofi aka ne tatou a manakoga ma‵sei māfai e se ma‵losi tatou? E mata, e isi foki se isi fakamalosiga e sili atu i te manakoga ke maua ne tatou se va fealofani ‵lei mo Ieova te Atua, penā foki loa mo tena Tama? E fakamatala mai ne Enasito,a se talavou telā ne taumafai malosi o ‵teke atu ki te olaga finalalolagi talu mai tena folikiga, penei: “Ne manako malosi au o fakafiafia atu ki te Atua, kae ne iloa aka ne au mai te Tusi Tapu me e se fiafia a ia ki aku amioga. Tela la, ne taumafai malosi ei au o ‵fuli toku olaga, kae ke tautali atu foki au ki fakatakitakiga a te Atua. I aso katoa e ‵teke atu faeloa au ki mafaufauga ma‵sei kolā ne oko sāle mai ki toku mafaufau. Ne manako malosi au ke manumalo i te taua tenei. Ne ‵talo faeloa au ki te Atua mō tena fesoasoani. I te lua tausaga mai tua ifo, ne manumalo ei au i mea faiga‵ta konā, faitalia eiloa me koi pule mālō au ki toku foitino.”

I te ‵tou ‵teke atu ki te lalolagi i ‵tou tafa, e aogā ke mafau‵fau tatou ki pati i te ‵talo a Iesu telā ne fai a koi tuai o tiakina ne ia te potu tafa ki luga i Ielusalema. Ne ‵talo atu a ia ki tena Tamana e uiga ki ana soko, penei: “Au e se ‵talo atu ke ave ne koe latou keatea mai te lalolagi, ka ko au e ‵talo atu ke tausi latou ne koe mai te Tino Masei. E se ne tino o te lalolagi latou, e penei foki mo au e se se tino o te lalolagi.” (Ioane 17:​15, 16) Ma‵faga o fakamalosiga aogā! E onoono faeloa a Ieova ki tino kolā e alofa a ia ki ei kae fakamalosi atu foki ki a latou ke ‵kalo keatea mai te lalolagi nei.

“Fakatuanaki ki a Ia”

Ka fesoasoani mai a te faka‵logo ki fakatonuga a Iesu ke manumalo tatou i te lalolagi masei i ‵tou tafa mo ‵tou manakoga ma‵sei. E tiga eiloa e tāua ke manumalo tatou i mea konā, e se mafai eiloa o fakaseai katoatoa atu ne ‵tou taumafaiga konā a te lalolagi masei tenei mo ‵tou vāi‵vāiga katoa. Kae e se ‵tau mo tatou o loto vai‵vai i ei.

E fai mai te Tusi Tapu, penei: “A te lalolagi mo mea katoa i ei kolā e ma‵nako ki ei a tino e palele atu katoa; ka ko te tino telā e fai ne ia a te mea e loto ki ei a te Atua e ola ki te se gata mai.” (1 Ioane 2:​17) Ne tuku atu ne Iesu tena ola ke fakasao ei “so se tino e fakatuanaki ki a ia” mai te agasala mo te mate. (Ioane 3:​16) Kafai ko gasolo aka ki mua te ‵tou iloaga e uiga ki te loto o te Atua mo ana fuafuaga, ke na faka‵logo eiloa tatou ki te fakamalosiga tenei mai i a Iesu: “Fakatuanaki ki te Atua, kae fakatuanaki mai foki ki a au.”​​—⁠Ioane 14:⁠1.

[Fakamatalaga mai lalo]

[Ata i te itulau e 7]

Ne fakamalosi atu a Iesu ki ana apositolo, penei: “Ke tumau la koutou i toku alofa”

[Ata i te itulau e 7]

Ko pili fua nei o saoloto tatou mai te agasala mo mea ma‵sei e iku mai i ei