E Maua ne Koe i Fea a Fakatakitakiga ‵Tonu i Mea Tau Lotu?
NE FAIFA‵KATA atu a Rodolphe, penei: “Kafai e fia fanatu koe o lotu i se lotu ona ko tū mo aganū a te otou kāiga, kaia e sē filifili ei ne koe te lotu fāpaupau telā ne tau‵tali atu ki ei a ‵tou tupuga i te 2,000 tausaga ko ‵teka?” Ne kata te tamaliki telā ne fakalogologo ki a ia.
Ne toe fai mai a Rodolphe, penei: “E tāua ‵ki ki a au a toku va fakataugasoa mo te Atua. E ‵teke malosi au ki te manatu me e ‵tau o tau‵tali atu tatou ki se lotu ona ko te mea ne ‵kau atu ki ei a tino o ‵tou kāiga i te fia tausaga ko ‵teka.” Ne mafaufau faka‵lei a Rodolphe ki ei; me ne seki fia talia fua ne ia te mea tāua tenā e pelā me se mea ne tuku fakasolo mai ne tena kāiga.
E ui eiloa ko sē ti faimālō atu ki tupulaga ‵fou ke tau‵tali ki lotu a olotou tupuga i aso nei, koi ‵kau atu te tokoukega o tino ki lotu a olotou kāiga. Kae, e mata, se mea ‵lei ke tautali atu faeloa ki talitonuga o ou mātua? Se a te mea e fakaasi mai i te Tusi Tapu?
Mai tua o te 40 tausaga ne ‵nofo atu ei latou i te koga lavaki, ne fakamalosi atu a Iosua, te sui o Mose, ke fai ne tino Isalaelu olotou filifiliga, penei: “Kafai e sē fia tavini koutou ki a ia [ko Ieova], filifili i te aso nei, me ko oi e fia tavini koutou ki ei, ko atua ne tapuaki sāle ki ei otou tupuga i Mesopotamia io me ko atua o tino Amoli, tenei e ‵nofo koutou i te lotou fenua. Ka ko au mo toku kāiga, e tavini eiloa matou ki te Aliki [ko Ieova].”—Iosua 24:15.
Ne fakauiga a Iosua ki se “tupuga” e tokotasi o latou ko Tala, te tamana o Apelaamo, telā ne nofo i te fa‵kai o Ulo, telā ne tu atu i te feitu ki saegālā o te vaitafe ko te Eufilate. E sē lasi te fakamatalaga i te Tusi Tapu e uiga ki a Tala i tafa o te fakamatalaga me ne tapuaki atu a ia ki atua fakaa‵tea. (Iosua 24:2) E ui eiloa ne seki maua kātoatoa ne tena tama ko Apelaamo a te iloaga tonu e uiga ki fuafuaga a te Atua, ne loto fiafia Apelaamo ke tiakina a tena fa‵kai i te taimi ne fakatonu atu ei a Ieova ke fai penā. E tonu, ne filifili ne Apelaamo a te lotu e ‵kese mai te lotu a tena tamana. Ona ko te faifaiga tenā, ne maua ei ne Apelaamo a fakamanuiaga kolā ne folafola atu ne te Atua ki a ia kae ne fai a ia mo fai te tino telā ne ‵kilo atu a tino katoa ki ei e pelā me ko te “tamana o tino fakatuanaki.”—Loma 4:11.
Ne fakamatala mai foki i te Tusi Tapu a te tala gali e uiga ki a Luta, se tupuga fafine o Iesu Keliso. A Luta, se fafine Moapi telā ne avaga ki se tino Isalaelu, kae i te taimi ne mate ei tena avaga ne ‵tau o fai ne ia se filifiliga: ke nofo i tena fenua tonu, io me ‵foki atu mo te mātua o tena avaga ki Isalaelu. Ne iloa ne Luta me e sili atu i te tāua a te tapuakiga ki a Ieova i lō te tapuakiga ki tupua kolā e tau‵tali atu ki ei ana mātua telā ne fai atu ei a ia ki te mātua o tena avaga, penei: “A tou fenua ka fai mo oku fenua, a tou Atua ka fai foki mo oku Atua.”—Luta 1:16, 17.
Ne fakaasi mai ne te tusi ko te Dictionnaire de la Bible a te tāua o te tala tenei i te Tusi Tapu. Ne fakamatala mai i ei a te tala e uiga ki “se fafine telā ne fanau i se fenua fakaatea, e ‵fonu i tino fāpaupau kolā e fai fili mo tino Isalaelu, . . . kae ona ko tena alofa ki te fenua o Ieova mo tena tapuakiga ne fai ei a ia mo fai se tupuga o te tupu ‵malu ko Tavita.” Ne seki ita a Luta ke filifili aka ne ia se lotu telā e ‵kese mai te lotu o ana mātua, kae ona ko te mea tenā ne fakamanuia ei a ia ne te Atua.
Ona ko te māea o te tala e uiga ki te taimi ne kamata ei a te lotu Kelisiano, ko maina nei tatou i te pogai ne tiakina ei ne soko o Iesu te lotu a olotou tupuga. I tena lauga gali, ne ‵kami mai ne Petelu a tino fakalogo‵logo ke ‘taumafai ke ‵sao latou mai te fakasalaga ka oko atu ki te kautama masei tenā’ mai te sala‵mo ki olotou agasala mo te papatiso foki i te igoa o Iesu Keliso. (Galuega 2:37-41) E fakaofoofogia ‵ki te fakaakoakoga a Saulo, se tino Iutaia telā ne fakasauā atu sāle ki Kelisiano. Ne lavea ne Saulo se fakaasiga e uiga ki a Keliso i te taimi ne fanatu ei a ia ki Tamaseko, telā ne ‵fuli ei a ia mo fai se Kelisiano kae ne lauiloa a ia fakamuli e pelā me ko te apositolo ko Paulo.—Galuega 9:1-9.
Ne seki ‵tupu a vaegā mea fakaofoofogia penā ki te tokoukega o Kelisiano i aso mua. Kae ui i ei, ne ‵tau o tiakina ne latou katoa a te lotu Iutaia io me ko olotou tapuakiga ki tupua fāpaupau. Ne maina a tino kolā ne talia ne latou a te lotu Kelisiano i te tulaga o Iesu e pelā me ko te Mesia me ko oti ne sau‵tala faka‵lei latou ki ei. (Galuega 8:26-40; 13:16-43; 17:22-34) Ne fakamaina atu faka‵lei ki Kelisiano konā a te tāua ke fai ne latou a ‵fuliga ki olotou olaga. Ne ‵kami a tino katoa, ko tino Iutaia mo tino e sē ne Iutaia, kae e tasi eiloa te fekau ne fakaoko atu ki a latou. Ko te mea ke fakafiafia atu te Atua, ne ‵tau o tau‵tali atu latou ki te tapuakiga fou, ko te tapuakiga faka-Kelisiano.
Te Filifiliga Telā e Pānaki Tonu mo Tatou
E ‵tau o maua ne tino a te loto malosi i aso o te kau apositolo ke ‵teke atu latou ki te lotu a olotou kāiga—te lotu Iutaia, te tapuaki atu ki tino ma‵luga io me ko tupua fāpaupau—kae ke ‵kau atu ki te lotu telā ne takalia‵lia ki ei a tino Iuta mo tino Loma. Ne iku atu te filifiliga tenei ki fakasauāga faiga‵ta. I aso nei, e ‵tau foki o maua ne tatou a te loto toa penā ke mo a ma “tosina atu tatou ke tau‵tali ki te tokoukega o tino,” ko pati a te faifeau Katolika ko Hippolyte Simon mai Clermont-Ferrand, i tena tusi ko te Vers une France païenne? (Ne ‵Fuli a Tino Falani ki te Lotu Fāpaupau?) E ‵tau foki o maua ne tino te loto malosi ke ‵kau atu ki te tamā lotu telā e takalia‵lia ki ei a nisi tino, ko Molimau a Ieova.
Ne tupu aka a Paulo, se tamataene mai Bastia, Corsica, i te lotu Katolika, kae ne kau atu sāle a ia ki faigā mea a tena lotu, e pelā mo te ‵togiatuga o keke ke maua aka ei a sene ma te lotu Katolika. Ne talia ne ia ke sau‵tala fakatasi a ia mo Molimau a Ieova ko te mea ke iloa ‵lei ne ia te Tusi Tapu. Fakamuli ifo, ne iloa aka ne ia me e aogā ‵ki eiloa a mea kolā ne tauloto ne ia. Tela la, ne talia kātoatoa ne Paulo a fakatakitakiga mai te Tusi Tapu kae fai ei a ia mo fai se Molimau a Ieova. Ne āva ana mātua ki tena filifiliga kae ne seki fakalavelave atu te mea tenā ki te va fealofani o te lotou kāiga.
E nofo atu a Amélie i te feitu ki saute o Falani. Ne fai a tino o tena kāiga mo fai ne Molimau a Ieova i kautama kese‵kese e fa. Kaia ne filifili ei ne ia a talitonuga o ana mātua? Ne fai mai tou fafine, penei: “E sē fai se tino mo fai se Molimau a Ieova ona ko ana mātua io me ko ana tupuna ne Molimau a Ieova, kae e isi eiloa se taimi ka fai ifo ei a ia penei, ‘Tenei eiloa taku lotu me konei eiloa a mea e talitonu au ki ei.’ ” E pelā mo nisi talavou Molimau, e iloa ‵lei ne Amélie me e isi se aogā o ana talitonuga fakalotu ki te olaga nei kae e maua foki i ei te fiafia tonu.
Te Pogai e ‵Tau ei o Talia a Fakatakitakiga a te Atua
E fakamalosi mai a te tusi ko te Faataoto mataupu e 6, fuaiupu e 20 ki tino kolā e fia fakafiafia ne latou te Atua, penei: “Taku tama, fai te mea ne fai atu ne tou tamana, kae sa puli a mea ne akoako atu ne tou mātua.” I lō te faka‵logo fua mo te sē iloa, e fakamalosi atu a vaegā pati polopoloki penei ki talavou ke talia ne latou a fakatakitakiga a te Atua mai te fakamalosi aka o te lotou fakatuanaki mo te tu ‵mautakitaki i te ‵lago atu ki te Atua. Ne fakamalosi atu a te apositolo ko Paulo ki ana taugasoa ke ‘iloa ne latou te kese‵kesega o te masei mo te ‵lei’ kae ke fakamautinoa aka me e fetaui ‵tonu a mea kolā e akoako atu ki a latou mo te Muna a te Atua mo Tena loto kae ke tau‵tali atu foki ki ei.—1 Tesalonia 5:21.
Faitalia me ne ‵tupu aka latou i loto i kāiga Kelisiano me ikai, ne fai eiloa ne te toko ono miliona o Molimau a Ieova, e aofia i ei a talavou mo tino ma‵tua, se vaegā filifiliga penā. E auala i te sukesuke faka‵lei ki te Tusi Tapu, ne maua ne latou a tali mautinoa ki olotou fesili e uiga ki te aogā o te olaga nei kae ke maua foki ne latou te mainaga tonu e uiga ki te fuafuaga a te Atua mō tino. Ona ko te iloaga tenei, ne talia ei ne latou a fakatakitakiga a te Atua kae fakaoti olotou mafi ke fai tena loto.
Faitalia me faitau sāle koe ki te mekesini tenei me ikai, kaia e sē talia ei ne koe te fesoasoani o Molimau a Ieova ke iloilo fakatasi ne koutou a fakatakitakiga mautinoa kolā e maua i loto i te Tusi Tapu. Kafai e fai penā, ka mafai ei o iloa ne koe a “te lasi o te aga‵lei o te Aliki” kae ka maua foki ne koe te iloaga telā ka takitaki atu ei koe ki te ola se-gata-mai māfai e tautali atu koe i ei.—Salamo 34:8; Ioane 17:3.
[Ata i te itulau e 5]
Kautama kese‵kese e fa i se kāiga Molimau a Ieova i Falani
[Ata i te itulau e 7]
Ne filifili ne Luta ke tavini atu a ia ki a Ieova i lō atua o ana tupuga