Talavou Kolā e Fakafiafia Atu ki te Loto o Ieova

Ne fakatoka eiloa a mataupu mō sukesukega konei mō talavou Molimau a Ieova. Tela la, e fakamalosi atu ki talavou ke suke‵suke faka‵lei ki mataupu konei kae ke fai olotou tali i te taimi e fai ei te Sukesukega a te fakapotopotoga ki Te Faleleoleo Maluga.

“Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.”​​—⁠FAATAOTO 27:⁠11.

KE FAKAATAATA i tou mafaufau me e fia ‵togi ne koe ne gatu ‵fou. I te taimi e onoono ei koe ki gatu i te sitoa, ne maua aka ne koe se gatu telā e foliga gali mai ki a koe. E fiafia koe ki te lanu mo foliga o te gatu, kae e ‵togi māmā foki. Ko toe onoono faka‵lei koe ki ei kae poi masei koe i te mea e matalatala te laugatu kae faivalevale foki a ‵suiga i ei. E tonu, e foliga gali mai a te gatu kae ne ‵sui fakaloiloi fua. E mata, ka fakamāumāu ne koe au sene ki se vaegā gatu sē ‵lei penā?

² Ke faka‵tusa aka te mea tenei ki se fakalavelave telā e mafai o fepaki mo koe e pelā me se talavou Kelisiano. Muamua la, kāti e foliga ‵gali mai ki a koe a mea i te lalolagi, e pelā eiloa mo te gatu gali tenā i te sitoa. Kāti e olo atu sāle ou taugasoa i te akoga ki pātī, e fakaaogā ne latou a vailakau tapu, e inu, e fai fāmau kae fai foki a faifaiga fakatauavaga kae seki a‵vaga. E mata, e tosina atu tou loto ki vaegā mea penā i nisi taimi? E mata, e manako fua koe ke tofotofo aka ki olotou faifaiga kolā e foliga ‵gali mai? Kafai e penā loa, ke sē fakaiku fakavave aka me i a koe se tino masei fua kae sē mafai o fai koe pelā me se Kelisiano tonu. A te tonuga loa, e fai mai te Tusi Tapu me e ma‵losi ‵ki a fakaosoosoga e maua ne tatou mai te lalolagi faitalia me e manako se tino o fakafiafia te Atua.​​—⁠2 Timoteo 4:​10.

³ E pelā mo tau kilo atu ki te gatu telā ne fia ‵togi ne koe, ke onoono faka‵lei aka nei koe ki fakafiafiaga o te lalolagi nei. Ke fesili ifo koe, penei: ‘E mata, a te lalolagi nei se mea fakaloiloi fua?’ E fai mai te Tusi Tapu me i “te lalolagi . . . e palele atu katoa.” (1 Ioane 2:​17) A manakoga katoa kolā e māfua mai i ei ne mea sē aogā fua. E sē gata i ei, e iku atu a amioga ma‵sei ki mea matagā. E seai se mea ‵lei e maua mai i ei. Ne fai mai se Kelisiano telā ne ‵tau o fa‵ki i “ikuga o ana amioga ma‵sei i te taimi koi talavou ei a ia,” penei: “Kāti e foliga gali mai a te lalolagi kae e uke a fakafiafiaga i ei. E fai ei ke talitonu koe me e seai ne logo‵maega e maua mai i ei. Kae e sē mafai eiloa o fai penā. Kafai ko oti ne faivalevale ne tino o te lalolagi a koe ka tuku tiaki fua ei ne latou a koe.”a Kaia fua la e fia fakamāumāu ei ne koe tou olaga ki se vaegā olaga sē aogā penā?

Ke Puipui Mai “te Tino Masei”

⁴ E taumafai a talavou Molimau a Ieova o ‵kalo keatea mai te fai taugasoa mo tino o te lalolagi, ona ko te mea e iloa ‵lei ne latou me e seai ne mea aogā e maua ne latou mai i ei. (Iakopo 4:⁠4) E mata, e aofia koe i talavou fakamaoni konei? Kafai e penā loa, mālō mo te taumafai! E tiga eiloa e se se mea faigofie ke ‵teke atu ki fakamalosiga mai ou taugasoa kae ke ‵kese foki au amioga, e isi eiloa ne tino e mafai o fesoasoani atu ki a koe.

⁵ Mai mua malie eiloa o tena mate, ne ‵talo atu a Iesu ki a Ieova ke “tausi” ne ia ana soko “mai te Tino Masei.” (Ioane 17:15) E isi eiloa se pogai ‵tau ne fai ei ne Iesu te fakamolemole tenei. Ne iloa ne ia me e se se mea faigofie ke fakamaoni faeloa ana soko faitalia me fo‵liki io me ko ma‵tua latou. Kaia? Ona ko te pogai e tasi telā ne fakaasi mai ne Iesu me ka fe‵paki ana soko mo te fili sē matea kae malosi​—⁠ko “te Tino Masei,” ko Satani te Tiapolo. E fai mai te Tusi Tapu me i te agaga masei tenei “e fanofano tele e pelā mo se leona fekai, e salasala ki te tino ke kai ne ia.”​​—⁠1 Petelu 5:⁠8.

⁶ Talu mai te kamataga, ne fiafia malosi a Satani ke fakaoko atu ne ia a toe fakasauāga matagā eiloa ki tino. Ke mafau‵fau ki fakalavelave matagā ne fakaoko atu ne Satani ki a Iopu mo tena kāiga. (Iopu 1:​13-​19; 2:⁠7) E sē taumate, e masaua ne koe a nisi tala i mea ne ‵tupu i te taimi ne ola ei koe, kolā kāti ne māfua mai i uiga fakasauā o Satani. Ko fanofano sāle te Tiapolo, kae i ana taumafaiga ke ‵poa aka ne ia a tino, e seai eiloa sena alofa ki talavou. E pelā mo te kamataga o te senitenali muamua T.A., ne fakatonu atu a Helota ke tamate katoa a tama‵liki tāgata i Peteleema kolā ko taki lua olotou tausaga io me e fo‵liki ifo. (Mataio 2:​16) E sē taumate ko Satani eiloa telā ne fakamalosi atu ki a Helota ko te mea ke tamate te tamaliki telā ne folafola mai ne te Atua me ka fai mo fai te Mesia, me ko ia tenā ka fakaoko atu fakamuli te fakasalaga a te Atua ki a Satani! (Kenese 3:​15) E fakamaoni mai i ei, me e sē alofa lele eiloa a Satani ki te kau talavou. E tasi eiloa te mea e kausaki malosi atu a Satani ki ei ko te fakamaseiga o so se tino e mafai o maua ne ia. Kae e tonu ‵kisi eiloa te mea tenei i aso nei me ko oti ne ‵pei ifo a Satani mai te lagi ki te lalolagi, “ka ko oko eiloa i te kaitaua, me iloa ne ia ko sē leva ona aso i te lalolagi.”​​—⁠Fakaasiga 12:​9, 12.

⁷ E ‵kese ‵ki a Ieova telā e “alofa ‵nau,” mo Satani telā “ko oko eiloa i te kaitaua.” (Luka 1:​78) Ko ia ko te kātoatoaga o te alofa. E fai mai te Tusi Tapu, penei: “Te Atua ko te alofa,” ona ko te mea e fakaasi mai faeloa ne ia te uiga tāua tenā. (1 Ioane 4:⁠8) Ko tafaga la te ‵kese o te atua o te lalolagi nei mo te Atua telā e taulia koe ke tapuaki atu ki ei! E tiga eiloa, ko lauiloa a Satani i te salasala atu ki tino ke kai ne ia kae ‘e sē manako a Ieova ke malaia se tino.’ (2 Petelu 3:⁠9) E fakatāua malosi ne ia a ola o tino taki tokotasi​—⁠e aofia i ei a koe. E se fia taofi io me fakataputapu ne Ieova a koe mai te fiafia i te olaga nei, i te taimi e fakamalosi mai ei i tena Muna ke sē fai a koe e pelā me se vaega o te lalolagi nei. (Ioane 15:19) E ‵kese mai i ei, e puipui ne ia koe mai te tino masei. E manako a tou Tamana i te lagi ke maua ne koe a nisi mea e sili atu i te ‵lei i lō fakafiafiaga sē aogā o te lalolagi nei. E manako a ia ke maua ne koe a “te ola tonu”​​—⁠ko te ola se-gata-mai i te lalolagi palataiso. (1 Timoteo 6:​17-​19) E manako a Ieova ke manuia a koe kae e fakamalosi ne ia koe ke kausaki atu ki te fakamoemoega tenā. (1 Timoteo 2:⁠4) E se gata i ei, e isi sou ‵kamiga fakapito mai i a Ieova. Se a te ‵kamiga tenā?

“Ka Fiafia Malosi Eiloa Au”

⁸ Kai ‵togi aka eiloa ne koe se meaalofa ma tou taugasoa pele kae onoono atu ki ana foliga i te taimi e ‵tala aka ei ne ia mo te poi a te meaalofa tenā kae lavea atu ne koe a tena loto fakafetai? E sē taumate, ne mafaufau ‵mafa koe ki te meaalofa telā ka fiafia malosi ki ei te tino tenā. Nei la, ke mafaufau aka ki te fesili tenei: Se a te vaegā meaalofa e mafai o tuku atu ne koe ki a Ieova te Atua? Kāti ka mafaufau koe ki te mea tenā e pelā me se manatu valea fua. E mata, e isi se mea ‵lei e mafai o maua ne te Atua Malosi Katoatoa mai i ana tino? E mata, e isi se mea e mafai o avatu ne koe ki a ia telā e seki faite ne ia? E tuku mai ne te Tusi Tapu a te tali i te Faataoto 27:​11, penei: “Taku tama, a koe ke atamai kae ka fiafia malosi eiloa au. Ka isi se tali e mafai o avatu ne au ki so se tino telā e fakamasei ne ia au.”

⁹ Kāti ko iloa ne koe mai tau akoga faka-te-Tusi Tapu me e fakamasei io me fakaitaita sāle ne Satani te Tiapolo a Ieova. Ne fai mai a ia me i so se tino telā e tavini atu ki te Atua e tavini atu fua ona ko ana manakoga kaiū kae sē ko te alofa. Ne fai mai foki a Satani me ka tiakina fakavave ne latou a te tapuakiga tonu māfai e fe‵paki latou mo fakalavelave faiga‵ta. Ke mafaufau aka ki pati a Satani kolā ne fai atu ki a Ieova e uiga ki te tagata fakamaoni ko Iopu: “Ne puipui faeloa ne koe a ia mo tena kāiga, mo ana mea katoa. Ne fakamanuia ne koe ana mea katoa e fai, kae ko oko foki eiloa i te uke o pulumakau ne tuku ne koe ma ia. I te taimi nei, sē taumate kafai e ave keatea ne koe ana mea katoa, e iku eiloa o muna masei ne ia a koe.”​​—⁠Iopu 1:​10, 11.

¹⁰ E pelā mo te tala i te Tusi Tapu, ne fakafesiligina ne Satani a te fakamaoni o Iopu, e pelā foki eiloa mo nisi tino kolā ne tavini atu ki te Atua​—⁠e aofia i ei a koe. Ne fai atu a Satani ki a Ieova e uiga ki tino, penei: “A te tagata [e sē ko Iopu fua kae ko so se tino] e mafai fua o tiakina ana mea katoa manafai ko manako ke ola a ia.” (Iopu 2:⁠4) E mata, e lavea ne koe tou tiute i te kinauga tāua tenei? E pelā mo te Faataoto 27:​11, e fakaasi mai i ei ne Ieova me e isi se mea telā e mafai o tuku atu ne koe ki a ia​—⁠se mea telā e mafai o fakavae ki ei tena tali ki te tino telā e fakamasei io me e fakaitaita ne ia a ia, ko Satani. Mafaufau la ki ei, e fakamolemole atu te Pule o te Lagi mo te Lalolagi ke fai ne koe se tali ki te toe fesili tāua tenā. Ma‵faga la o tiute mo tauliaga ‵gali ko maua ne koe! E mata, e mafai o fai ne koe te mea e manako a Ieova ki ei? Ne fai eiloa ne Iopu te mea tenā. (Iopu 2:​9, 10) E penā foki loa mo Iesu mo nisi tino e tokouke i tala mua, kae e aofia i ei a talavou. (Filipi 2:8; Fakaasiga 6:⁠9) E mafai foki o fai koe penā. E seai se fakalotolotolua i ei, me e ‵tau o ‵lago atu koe ki se tino e tokotasi i te kinauga tenei. Kae e fakaasi mai i au faifaiga me e ‵lago atu koe ki pati ‵loi a Satani io me ko te tali a Ieova? Se a te mea ka puke ‵mau koe ki ei?

E Atafai a Ieova ki a Koe!

¹¹ E mata, e ‵pau fua ki a Ieova a te filifiliga telā e fai ne koe? E mata, e seki lava a tino fakamaoni ke mafai ei o fai ne ia tena tali ki a Satani? Se mea tonu me ne ‵losi mai a te Tiapolo me e sē tavini atu a tino mo te a‵lofa ki a Ieova, kae ko oti ne fakamaoni aka me e ‵se fua te ‵losiga tenā. E ui i ei, koi manako eiloa a Ieova ke ‵lago atu koe ki a ia i te kinauga e uiga ki te pulega sili me e atafai mai a ia ki a koe eiloa. Ne fai mai a Iesu, penei: “E penā foki eiloa te otou Tamana i te lagi. E sē manako ke galo se tino o latou konei koi fo‵liki.”​​—⁠Mataio 18:⁠14.

¹² E mautinoa eiloa me e saga mai a Ieova ki tau filifiliga me e aofia malosi a ia i ei. E fakamaoni mai i te Tusi Tapu me e isi ne lagonaga ‵loto o Ieova māfai e fai ne tino a mea ‵lei io me ko mea ma‵sei. Ne ‵teke fakafia atu a te kau Isalaelu kae ne “faka‵mae” ei ne latou a te loto o Ieova. (Salamo 78:​40, 41) A koi tuai o poko a te Lolo i aso o Noa, “ne amio ma‵sei a tino katoa” kae ne “fanoanoa” malosi a Ieova i ei. (Kenese 6:​5, 6) Ke mafaufau ki te uiga o te mea tenei. Kafai e fai ne koe se mea masei, ka logo‵mae malosi a te Atua i ei. E se fakauiga i ei me i te Atua e seva io me e fakavae ana filifiliga ki ana lagonaga kae i lō te fai penā, e alofa mai a ia ki a koe kae atafai mai foki. I te suā feitu, kafai e fai ne koe te mea tonu, e fakafiafia ne koe a tena loto. E fiafia a ia me ko mafai o avatu ne ia se tali ki a Satani kae ka tuku atu foki ne Ia te taui ki a koe. Kae tenā eiloa te mea e manako a ia ke fai. (Epelu 11:⁠6) Ma‵faga o Tamana alofa ko Ieova te Atua!

Fakamanuiaga e Uke i Aso Nei

¹³ E isi foki ne fakamanuiaga e maua ne tatou mai i a Ieova i tafa o fakamanuiaga i aso mai mua. E maua nei ne talavou Molimau a Ieova a fakamanuiaga​—⁠ko te fiafia mo te lotomalie​—⁠ona ko pogai tāua. Ne tusi mai te faisalamo, penei: “E ‵tonu faeloa tulafono a te Aliki. E fia‵fia faeloa a latou kolā e tausi ki ei.” (Salamo 19:⁠8) Ko Ieova fua tokotasi e iloa ne ia a te mea e ‵lei mō tatou. E auala i te pelofeta ko Isaia, ne fai mai Ieova, penei: “Au ko te Aliki te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei. Moi ne faka‵logo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o ‵masa pakupaku! E penei e maua ne koutou te manumalo pelā mo galu kolā e fati ki luga i te tafatai.”​—⁠Isaia 48:​17, 18.

¹⁴ A te fakalogo ki fakatakitakiga i te Tusi Tapu e fesoasoani mai ei ke ‵kalo keatea koe mai logo‵maega mo te fanoanoa. E pelā mo te mea e fakaasi mai i te Tusi Tapu, a tino kolā e ma‵nako malosi ki tupe “ko fatifati nei olotou loto i puapuagā e uke.” (1 Timoteo 6:​9, 10) E mata, e isi ne taugasoa o koe ne fe‵paki mo te fakalavelave telā e fakaasi mai i te tusi siki tenei? Ko ‵nofo kaitalafu a nisi talavou ona ko te ma‵nako malosi ki gatu ‵fou mo vaegā mea ‵fou kese‵kese kolā e ‵togi ‵mafa, e pelā mo komupiuta, compact discs mo nisi mea aka penā. A te fakapologa ki te ‵tinaga o te kaitalafu mo te pasene lasi i ei mō se taimi leva ‵ki, se mea fakalogo‵mae!​​—⁠Faataoto 22:⁠7.

¹⁵ Ke mafaufau foki ki te finalalolagi. E fai‵tama a talavou e tokouke i tausaga takitasi i te lalolagi kātoa. E fa‵nau ne nisi talavou a tama‵liki kolā e seki ma‵nako eiloa latou ki ei io me e sē mafai ne latou o tausi. E faka‵to ne nisi tino olotou tama‵liki kae logo‵mae latou ona ko te sē ‵lei o olotou loto lagona. Kae e maua ne nisi talavou a masaki ‵pisi e pelā mo te SELAMETE. Kae ko te ‵toe mea masei eiloa mō te tino telā e iloa ne ia Ieova, ko te sē ‵lei o te lā va fakataugasoa mo Ieova.b (Kalatia 5:​19-​21) Ona ko mea katoa konā, e fai mai te Tusi Tapu, penei: “Fakagata te fina lalolagi.”​​—⁠1 Kolinito 6:​18.

Tavini Atu ki te Atua Fiafia

¹⁶ E taku mai i te Tusi Tapu me i a Ieova ko te Atua fiafia. E manako a ia ke fiafia foki koe. E fai mai a tena Muna, penei: “Tupulaga tuputupu, ke fakafiafia otou olaga i a koutou koi ‵tupu aka.” (Failauga 11:⁠9) E kilo ‵mao a Ieova kae iloa ei ne ia a mea kolā ka iku mai i amioga ‵lei mo amioga ma‵sei. Kae tenā loa te pogai ne fakamalosi mai ei a ia, penei: “Ke masaua ne koutou a te Atua telā ne faite ne ia koutou, i aso konei koi ‵tupu ake ei koutou, me kafai e oko mai aso ka toeaina ei koutou, ka fai aka ei otou muna penei, ‘Ko seai soku fiafia i te olaga tenei.’ ”​​—⁠Failauga 12:⁠1.

¹⁷ E fia‵fia malosi a talavou e tokouke ona ko te tavini atu ki a Ieova i aso nei. E pelā mo Lina telā ko 15 ana tausaga, ne fai mai a ia, penei: “E fakamatamata au ona ko aku mea ne fai i toku olaga. E malosi ‵lei toku foitino ona ko te sē ‵pusi mo te sē fakaaogāga o vailakau tapu. E maua ne au a fakatakitakiga tāua mai te fakapotopotoga kolā e fesoasoani mai ki a au ke ‵teke atu ei ki tofotofoga matagā a Satani. E fiafia faeloa au ona ko fakamalosiga e maua ne au mai te ‵kau fakatasi mo tino i te Kingdom Hall. Kae e sē gata i ei, ko maua ne au a te ‵toe fakamoemoega sili eiloa ko te ola se-gata-mai i te lalolagi.”

¹⁸ E pelā mo Lina, e fia‵fia malosi a talavou Kelisiano e tokouke o kausaki malosi atu ke tumau te malosi o te lotou fakatuanaki. Faitalia te uke o fakalavelave e fe‵paki mo latou, e iloa ne latou me e aogā ‵ki olotou olaga kae isi foki se lotou fakamoemoega mō aso mai mua. Tela la, ke na tumau koe i te tavini atu ki te Atua telā e atafai malosi ki a koe. Ke fakafiafia ne koe a tena loto kae ka fakafiafia foki ne ia a koe i aso nei ke oko eiloa ki te se-gata-mai!​​—⁠Salamo 5:​11.

[Fakamatalaga mai lalo]

Koi Masaua ne Koe?

• Ne a mea fakama‵taku e māfua mai i te “tino masei,” ko Satani?

• E mafai pefea o fakafiafia ne koe a te loto o Ieova?

• E fakaasi mai pefea ne te Tusi Tapu me e atafai atu a Ieova ki a koe?

• Ne a nisi fakamanuiaga e maua mai te tavini atu ki a Ieova?

[Fesili mo te Sukesukega]

1, 2. (a) E mata, e tonu te manatu me e sē mafai o fai koe pelā me se Kelisiano māfai e tosina atu tou loto, i nisi taimi, ki mea i te lalolagi nei? (Loma 7:​21) (e) Ne a mea ko iloa ne koe mai te fakaakoakoga a Asafo? (Ke onoono ki te pokisi, i te itulau e 9.)

3. (a) Kaia e sē aogā ei ke kausaki atu koe ki mea o te lalolagi nei? (e) Ne fakamatala mai pefea ne se Kelisiano e tokotasi a te sē aogā o mea faka-te-lalolagi?

4, 5. (a) Se a te fakamolemole ne fai ne Iesu i tena ‵talo mai mua malie eiloa o tena mate? (e) Kaia ne fetaui ‵lei ei te fakamolemole tenā?

6. E iloa pefea ne tatou me e sē alofa a Satani ki te kau talavou?

7. (a) E pefea te ‵kese o Ieova mo Satani? (e) Ne a lagonaga o Ieova e uiga ki te fiafia o koe ki te olaga nei?

8, 9. (a) Se a te meaalofa e mafai o tuku atu ne koe ki a Ieova? (e) E pelā mo te mea e fakaasi mai i te tala o Iopu, ne fakamasei io me ne fakaitaita pefea ne Satani a Ieova?

10. (a) E iloa pefea ne tatou me ne fakafesiligina ne Satani a te fakamaoni o nisi tino i tafa o Iopu? (e) E aofia pefea koe i te kinauga tenei e uiga ki te pule tafa sili i te maluga?

11, 12. E mata, e ‵pau fua ki a Ieova a te filifiliga telā e fai ne koe ke tavini atu ki a ia? Fakamatala mai.

13. E maua pefea ne tatou a fakamanuiaga a Ieova i aso nei māfai e tavini atu tatou ki a ia?

14. E fesoasoani mai pefea a fakatakitakiga i te Tusi Tapu ke ‵kalo keatea mai te logo‵mae o te nofo kaitalafu?

15. E puipui pefea koe ne fakatakitakiga i te Tusi Tapu mai logo‵maega o te finalalolagi?

16. (a) E iloa pefea ne koe me e manako a Ieova ke fia‵fia te kau talavou? (e) Kaia ne tuku mai ei ne Ieova a fakatakitakiga ke tautali koe ki ei?

17, 18. Ne fakaasi atu pefea ne se talavou Kelisiano a tena fiafia o tavini atu ki a Ieova, kae e mafai pefea o maua ne koe te fiafia tenā?

[Pokisi/Ata i te itulau e 9]

Toeitiiti ko Agasala se Tino Fakamaoni

A Asafo se tagata Levi telā ne lauiloa i te tātā pese i te faletapu o Ieova i Isalaelu, i aso mua. Ne ‵fatu foki ne ia a pese kolā ne usu sāle i te faiga o tapuakiga. Kae ui eiloa a tauliaga fakapito konā, ne tosina atu te loto o Asafo ki amioga ma‵sei a ana taugasoa kolā e sē fetaui mo tulafono a te Atua kae ne foliga mai pelā me e seai se fakasalaga e oko atu ki a latou. Fakamuli ifo, ne fai ‵tonu mai a Asafo, penei: “Toku fakatuanaki toe itiiti eiloa ko seai; a toku talitonu foki ko tai galo atu eiloa. I a au ne loto masei ki tino fia‵sili i te mateaga ne au te solosolo ‵lei o tino amio ma‵sei.”​—⁠Salamo 73:​2, 3.

Fakamuli ifo, ne fanatu a Asafo ki te faletapu o te Atua kae ne ‵talo atu e uiga ki ana lagonaga. I te taimi ne toe mafaufau faka‵lei ei a ia ki mea kolā ne talitonu a ia ki ei, ne malamalama a ia me e takalialia a Ieova ki amioga ma‵sei, kae fakamuli, ka maua eiloa ne tino ma‵sei mo tino amio‵tonu te taui o olotou mea ne fai. (Salamo 73:​17-​20; Kalatia 6:​7, 8) E tonu, e foliga mai me ko ‵tu atu nei a tino amio ma‵sei i koga mole‵mole. Kae ka ‵siga eiloa latou māfai ko fakaseai ne Ieova a te olaga masei tenei.​​—⁠Fakaasiga 21:⁠8.

[Ata i te itulau e 11]

E pefea la te ‵kese o Ieova telā e atafai malosi mai ki a koe mo Satani telā e kausaki malosi ke ‵poa ne ia koe

[Ata i te itulau e 12]

E maua ne talavou e tokouke a te fiafia lasi mai te tavini atu ki a Ieova fakatasi mo nisi Kelisiano