E Mata, E Nofo “Fakatalitali” Koe?

“Se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua. Ka koi fakatalitali koutou ki te Aso o te Atua, kae olioli eiloa ke na oko mai.”​—⁠2 PETELU 3:​11, 12.

KE FAKAATAATA i tou mafaufau se kāiga e ‵nofo fakatalitali ke oko mai olotou mālō ke ‵kai tasi latou i te afiafi tenā. Ko pilipili mai fua te taimi telā e ‵tau o oko mai ei olotou tino ‵kami. Ko fakaotioti faka‵lei ne te fafine ana kūka. E fesoasoani atu tena avaga mo lā tama‵liki ke fakamautinoa aka me ko toka ‵lei a mea katoa. Ko oko loa i te lotou fia‵fia. E tonu, e ‵nofo fakatalitali a te kāiga ki te oko mai o olotou mālō kae olioli foki ke na ‵kai ki meakai ‵gali ko oti ne fakatoka kae ke sau‵tala fakatasi mo latou.

² E ‵nofo fakatalitali foki tatou Kelisiano ki se mea telā e sili atu tena tāua. Se a te mea tenā? Ko te ‘aso o Ieova!’ Mai te taimi nei ke oko eiloa ki te aso tenā, e ‵tau o fai tatou e pelā mo te pelofeta ko Mika, telā ne fai mai, penei: “Ka ko au ko fakatalitali ki te Aliki; ka fakatalitali au mo te loto talitonu ki te Atua, telā ka fakasao ne ia au.” (Mika 7:⁠7) E mata, e fakauiga i ei me e sē ‵tau o gasue‵sue tatou? Ikai. E uke ‵ki eiloa a galuega e ‵tau o fai.

³ E fesoasoani mai a te apositolo ko Petelu ke maua ne tatou se kilokiloga ‵lei i te taimi koi fakatalitali ei tatou. Ne fai mai a ia, penei: “Se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua [“i amioga ‵malu mo faifaiga amio atua,” NW]. Ka koi fakatalitali koutou ki te Aso o te Atua, kae olioli eiloa ke na oko mai.” (2 Petelu 3:​11, 12) Ke masaua la me ne seki fakafesiligina ne Petelu io me ne fakalotolotolua a ia ki te vaegā olaga e ‵tau o ola i ei a Kelisiano, i ana pati konā ne fai. I ana tusi e lua kolā ne tusi, ne fakamatala mai ne ia a te vaegā olaga e ‵tau o ola ei a Kelisiano. Ne fakamalosi atu foki a ia ki a latou ke tumau “i amioga ‵malu mo faifaiga amio atua.” E ui eiloa ko katoa te 30 tausaga ko ‵teka talu mai te taimi ne tuku mai ei ne Iesu Keliso a fakailoga o te “gataga,” e ‵tau eiloa mo Kelisiano o tumau i te matapula‵pula. (Mataio 24:⁠3) E ‵tau eiloa o ‘fakatali‵tali koutou kae olioli’ ki te oko mai o te aso o Ieova.

⁴ A te pati Eleni telā ne ‵fuli ki te “olioli” e fakauiga tonu eiloa ki te “fakavavave.” E tonu, e se mafai o ‘fakavave’ ne tatou a te aso o Ieova. E sē mafai o fai penā me e seai se tino e ‘iloa ne ia te aso mo te taimi’ ka fakaoko atu ei ne Iesu Keliso a te fakamasinoga ki fili o tena Tamana. (Mataio 24:36; 25:13) E fai mai se fakamatalaga i se tusi e tasi me e fakauiga a te tugāpati ko te “fakavavave” ki te “ ‘ke tuli ke vave’ kae tai fetaui ‵tonu foki loa mo te ‘loto finafinau, ke gasuesue faeloa, mo te amanaia tonu ki se mea.’ ” Tela la, ne fakamalosi atu a Petelu ki ana taina tali‵tonu ke olioli malosi ki te oko mai o te aso o Ieova. E mafai o fai latou penā, mai te mafau‵fau faeloa ki ei. (2 Petelu 3:12) Ona ko te pili mai o te “aso fakamataku o te Aliki” e ‵tau foki o maua ne tatou te kilokiloga tenā.​—⁠Ioelu 2:31.

Ke Nofo Fakatalitali Mai te Faiga “Amioga ‵Malu”

⁵ E fakamaoni atu ne tatou i ‵tou “amioga ‵malu mo faifaiga amio atua” me e olioli malosi eiloa tatou ke ‵sao i te aso o Ieova. E fakamasaua mai ne te tugāpati ko te “amioga ‵malu” a te fakamalosiga a Petelu, penei: “Ke faka‵logo koutou ki te Atua, kae sa tuku atu otou olaga ke toe fai ei a manako kolā ne iai i a koutou, i aso koi va‵lea ei koutou. Ke tapu otou olaga i mea katoa e fai ne koutou, e pelā eiloa mo te Atua telā ne ana kalagagina koutou, e tapu. Me e penei a muna a te Tusi Tapu, “E ‵tau mo koutou o tapu, i te mea i au e tapu.”​—⁠1 Petelu 1:​14-16.

⁶ Ko te mea ke ‵malu tatou, e ‵tau o tumau tatou i te ‵ma i te feitu faka-te-foitino, feitu faka-te-mafaufau, mea tau amioga mo te feitu faka-te-agaga. E mata, e fakatokatoka tatou ki ‘te aso o Ieova’ mai te tumau i amioga ‵malu e pelā me ne tino kolā e tauave ne latou te igoa o Ieova? E se se mea faigofie i aso nei ke tumau tatou i te ‵ma, me ko gasolosolo ifo eiloa ki lalo a te tulaga o te lalolagi i mea tau amioga. (1 Kolinito 7:31; 2 Timoteo 3:13) E mata, e lavea ne tatou a te lasi o ‵tou tulaga i mea tau amioga mo te lalolagi? Kafai e sē penā loa, e ‵tau o manavase tatou ki ei. E mata, ko gasolo ifo ki lalo a tulaga o tatou kolā ne ‵lei atu i te lalolagi? Kafai e penā loa, e ‵tau o gasue‵sue fakavave tatou o faka‵lei aka te tulaga tenā ko te mea ke fakafiafia atu ki te Atua.

⁷ Ona ko te faigofie ke onoono se tino ki ata ma‵sei i te Internet i a ia eiloa, ko faigofie foki ki tino kolā ne se ti onoono sāle ki vaegā ata ma‵sei penā ke maua a “avanoaga e uke ki faifaiga fakatauavaga,” ko pati a se tokita e tokotasi. Kafai e ‵sala atu faeloa tatou ki vaegā ata penā i te Internet, e fakaasi mai i ei me ko sē fia ‵saga atu tatou ki te fakatonuga i te Tusi Tapu ke “sa puke se mea telā e fakalailai ne ia koutou.” (Isaia 52:11) E mata, e fakaasi atu i ei me e ‘oliloli malosi eiloa tatou ki te aso o Ieova’? Io me ko fakatuai fua ne tatou a te aso tenā i ‵tou mafaufau kae fakasakosako aka me kafai e faka‵fonu ‵tou mafaufauga ki faifaiga lai‵lai penā, koi lava eiloa te taimi ke faka‵ma aka ei ‵tou amioga? Kafai ko oti ne kamata o fai tatou penā, se mea tāua ‵ki ke na fakamolemole atu ki a Ieova ke ‘tausi mai tatou mai te ‵kilo atu ki mea sē aogā, kae ke alofa mai ki a tatou e pelā eiloa mo tena feagaiga’!​—⁠Salamo 119:37.

⁸ E puke ‵mautakitaki nei a Molimau a Ieova e tokouke, talavou mo tino ma‵tua, ki tulaga ma‵luga o amioga ‵lei a te Atua kae ‵kalo keatea mai faifaiga a te lalolagi. Me iloa ne latou te toetoe o te vaitaimi nei e pelā foki mo pati polopoloki a Petelu me i “te Aso o te Aliki e oko mai e pelā mo se tino kaisoa,” e tumau eiloa latou i te faiga o “amioga ‵malu.” (2 Petelu 3:10) E fakaasi mai ne olotou faifaiga me e ‘fakatalitali kae olioli eiloa latou ki te oko mai o te aso o Ieova.’a

Ke Fakatalitali mo te Faiga o “Faifaiga Amio Atua”

⁹ E tāua foki a “faifaiga amio atua” māfai e olioli faeloa tatou ki te aso o Ieova. E aofia i “faifaiga amio atua” a te āva ki te Atua kae fakamalosi mai i ei ke fai a mea kolā e fiafia a ia ki ei. E fakamalosi aka tatou ne te ‵tou tavini fakamaoni atu ki a Ieova ke fai a faifaiga amio atua. Ko tena loto eiloa ke “ola a tino katoa, ka ke iloa foki ne latou te munatonu.” (1 Timoteo 2:⁠4) E sē manako a te Atua ke ‘malaia se tino kae ke lava te taimi ke sala‵mo ei a tino.’ (2 Petelu 3:⁠9) Tela la, e ‵tau o fakamalosi aka tatou ne te amio atua ke uke ‵tou mea e fai i te fesoasoani atu ki nisi tino ke iloa ne latou a Ieova kae ke fakaakoako foki ki a ia.​—⁠Efeso 5:⁠1.

¹⁰ Ka ‵fonu eiloa ‵tou olaga i faifaiga amio atua māfai e ‵sala muamua faeloa tatou ki te Malo o te Atua. (Mataio 6:33) E aofia i ei ko te mauaga o se kilokiloga paleni ki kope faka-te-foitino. Ne polopoloki mai a Iesu, penei: “Ke matapula‵pula koutou, kae fakaeteete i te matakanokano, me i te olaga tonu o te tino e se fakavae i luga i te uke o ana mea!” (Luka 12:15) E ui eiloa e faigata ke fakaataata i ‵tou mafaufau me e mafai o faka‵kivi ‵tou mata ne te fiafai ki tupe, se mea ‵lei ke iloa ne tatou me i te tino telā e “fiafia malosi tona loto ki mea faka-te-olaga pelā foki mo koloa” e mafai o “ola saitia te Muna a te Atua” i a ia. (Mataio 13:22) Kāti ka faigata ke maua a mea ke tausi ei te olaga. I nisi fenua o te lalolagi, e mafau‵fau aka a nisi tino me e ‵lei atu ke olo latou ki nisi fenua tai mau‵mea ke maua se olaga ‵lei i ei, telā e mafai o iku atu i ei ki te tiakinaga o olotou kāiga mō se fia tausaga i taimi takitasi. E oko atu foki a vaegā mafaufauga penā ki nisi tino o te Atua. Kāti, kafai e olo atu latou ki nisi fenua, e mafai o maua ne olotou kāiga a nisi mea fou. Kae se a te mea e mafai o tupu ki te tulaga faka-te-agaga o olotou tino pele kolā e fakamuli mai i te lotou fenua? E aunoa mo te fakatakitakiga a te ulu o te kāiga i te fale, e mata, e mafai o maua ne latou a mea faka-te-agaga kolā e manakogina ke ‵sao ei latou i te aso o Ieova?

¹¹ Ne maua ne se tagata Filipaina telā ne faimalaga atu ki fenua kese‵kese o ‵sala galuega, a te munatonu i te Tusi Tapu mai Molimau a Ieova i Tiapani. I te taimi ne sukesuke ei a ia ki te tiute faka-Kelisiano o te ulu o te kāiga, ne iloa ne ia me e ‵tau o fesoasoani atu a ia ki tena kāiga ke fai pelā me ne tino tapuaki ki a Ieova. (1 Kolinito 11:⁠3) Ne ‵teke malosi a tena avaga, telā e nofo atu i Filipaina, ki tena lotu fou kae ne fai atu faeloa tou fafine ke aumai ne sene kae ke sē foki atu o akoako te lotou kāiga ki ana talitonuga mai te Tusi Tapu. Kae ona ko tena alofa ki ana tino pele mo te toetoe o te taimi, ne fakamalosi atu i ei ki a ia ke toe foki atu ki tena fenua. Ne maua eiloa ne ia te taui o tena kufaki i te fakafesagai atu mo te alofa ki tino i tena kāiga. Fakamuli ifo, ne ‵kau fakatasi te lotou kāiga i te tapuakiga tonu, kae ne kau atu tena avaga ki te taviniga tumau.

¹² Kāti e mafai o fakatusa ne tatou te ‵tou tulaga i te vaitaimi nei ki tino kolā e ‵nofo atu i loto i se fale e ‵ka ne te afi. E mata, se mea ‵lei ke teletele fua koe o ‵tae a kope mai te fale ‵ka telā ko pili fua o siga? I lō te fai penā, e mata, e ‵lei atu ke taumafai tatou o faka‵sao a ola o tino​—⁠ko tatou, ‵tou kāiga mo nisi tino kolā e ‵nofo i loto i te fale tenā? E tonu, ko pili fua nei o fakaseai atu te olaga masei tenei, kae ko ‵tu atu a ola o tino i se tulaga fakamataku. Ona ko te mea tenei, e ‵tau eiloa o fakamuamua ne tatou a mea faka-te-agaga kae ke ‵saga tonu atu mo te loto finafinau ki te galuega fakaola tino ko te talaiatuga o te Malo.​—⁠1 Timoteo 4:16.

E ‵Tau o “‵Ma” Tatou

¹³ I te taumafai ke faka‵mafa atu te tāua o te tumau faeloa i te ‵nofo fakatalitali, ne fai mai a Petelu, penei: “Tela la e oku taugasoa, ka koi fakatali‵tali koutou ki te Aso tenā, taumafai malosi eiloa ke ‵ma kae ‵lei koutou i mua o te Atua, ka ke ola filemu foki koutou mo ia.” (2 Petelu 3:14) E se gata fua i te fakamalosi mai ke tumau i te faiga o amioga ‵malu mo faifaiga amio atua, ne toe faka‵mafa mai ne Petelu a te tāua o te kilo mai o Ieova ki a tatou e pelā me ne tino ko oti ne faka‵ma ne Iesu ki tena toto tāua i te fakaotiga. (Fakaasiga 7:​9, 14) E fakauiga i ei, me e ‵tau o fakatuanaki te tino ki te taulaga a Iesu kae ke fai pelā me se tavini tukugina atu kae papatiso a Ieova.

¹⁴ Ne fakamalosi mai a Petelu ke kausaki malosi ko te mea ke “‵ma” faeloa tatou. E mata, e ‵ma faeloa a ‵tou gatu o amioga mo ‵tou uiga faka-Kelisiano, mai faifaiga lai‵lai a te lalolagi? Kafai e lavea ne tatou se lailaiga i ‵tou gatu, e taumafai fakavave tatou o ‵solo keatea te lailaiga tenā. Kafai e maua atu se lailaiga penā i se gatu telā e gali ‵ki ki a tatou, e taumafai malosi eiloa tatou o ‵solo keatea te lailaiga tenā. E mata, e penā foki ‵tou lagonaga māfai ko lai‵lai ‵tou gatu faka-Kelisiano ona ko ‵tou amioga mo ‵tou uiga?

¹⁵ Ne fai atu ki te kau Isalaelu ke “faite ne fele i matulimanu e fa o otou gatu kae ‵sai atu se uka ‵lanu ūsi ki fele takitasi.” Kaia ne ‵tau ei o fai penā? Ko te mea ke masaua faeloa ne latou a fakatonuga a Ieova, ke faka‵logo ki ei, kae ke “‵malu” foki latou i te lotou taviniga ki te lotou Atua. (Numela 15:​38-40 Tusi Paia, Samoa) E ‵tu ‵kese tatou, tavini a Ieova i aso nei, mai te lalolagi me e faka‵logo tatou ki tulafono mo fakatakitakiga a te Atua. E pelā mo te tumau i amioga ‵ma, te fakaasi atu a te ava ki te tāua o te toto mo te ‵kalo keatea mai te ifo ki tupua kese‵kese katoa. (Galuega 15:​28, 29) E ava a tino e tokouke ki a tatou ona ko te ‵tou tu ‵mautakitaki i te ‵kalo keatea mai amioga lai‵lai.​—⁠Iakopo 1:⁠27.

E ‵Tau o Maua te Loto “‵Lei”

¹⁶ Ne fai mai foki a Petelu me e ‵tau o “‵lei” tatou. E pefea la? E mafai fua o ‵solo keatea se lailaiga kae sē mafai o fai penā se pona. Kafai e isi se pona o se tino e fakaasi mai i ei me e isi se mea sē ‵lei i loto i a ia. Ne fakamalosi atu te apositolo ko Paulo ki ana taina Kelisiano i Filipi, penei: “Ke fai a mea katoa e aunoa mo te muimui io me ko te kinau, ko te mea ke taku koutou ne tino ‵lei kae ‵ma, ko te fanau a te Atua e ‵lei katoatoa i loto i te lalolagi fai mea pikopiko mo te kaiu. E ‵tau mo koutou o maina atu ki a latou e pelā mo ne fetu e fakamaina ne latou a te lagi.” (Filipi 2:​14, 15) Kafai e faka‵logo tatou ki pati polopoloki konā, ko ‵kalo keatea ei tatou mai te muimui mo kinauga kae ka tavini atu tatou ki te Atua mo te loto ‵ma. Ka fakamalosi aka tatou ne te ‵tou a‵lofa ki a Ieova mo ‵tou tuakoi ke folafola atu “te Tala ‵Lei tenei e uiga ki te Malo.” (Mataio 22:​35-40; 24:14) E se gata i ei, ka tumau eiloa tatou i te folafola atu o te tala ‵lei faitalia me sē maina a tino i te pogai e fakamāumāu ei ‵tou taimi ke fesoasoani atu ki nisi tino ke sukesuke e uiga ki te Atua mo tena Muna, ko te Tusi Tapu.

¹⁷ Ona ko te manakoga ke maua faeloa ne tatou te “‵lei,” e ‵tau o iloilo ne tatou a ‵tou loto i mea kolā e kausaki atu tatou ki ei. Ko oti ne tiakina ne tatou a uiga kaimanako o te lalolagi e pelā mo te kausaki atu ki koloa e uke mo te fia maluga. Kafai e kausaki tatou ki nisi tauliaga i loto i te fakapotopotoga Kelisiano, e ‵tau eiloa o fai penā mo te loto ‵lei kae e ‵tau o fakamalosi aka te mea tenā ne te alofa ki a Ieova mo nisi tino. Se mea fakamalosi loto ke lavea atu a tāgata kolā e ma‵losi ‵lei i te feitu faka-te-agaga e ‘fia fai pelā me ne takitaki o te ekalesia’ i te loto fiafia mo te loto maulalo ke tavini atu ki a Ieova e pelā foki mo olotou taina tali‵tonu. (1 Timoteo 3:1; 2 Kolinito 1:24) E tonu, a tino kolā e talia ke tavini atu e pelā me ne toeaina ‘e tausi atu ki te lafu mamoe a te Atua . . . mo te loto fiafia, me tenā te mea e manako ki ei te Atua. Fai otou galuega e sē mo te manatu fua ke maua te ‵togi kae mai te loto lagona o tavini atu mo te fakamaoni. Sa taumafai o pule fakasauā ki tino kolā ko tuku atu ke tausi ne koutou, ka ke fai koutou mo fakaakoakoga ki te lafu mamoe.’​—⁠1 Petelu 5:​1-4.

E ‵Tau o Maua te “Filemu”

¹⁸ Fakamuli ifo, ne fai mai a Petelu me e ‵tau o maua te “filemu.” Ko te mea ke ola e ‵tusa mo te fakatonuga tenei, e ‵tau o maua ne tatou se va filemu mo Ieova e pelā foki mo ‵tou tuakoi. Ne fakamalosi mai ne Petelu a te tāua ke “fakatau a‵lofa fakamaoni” kae ke maua faeloa se va filemu mo ‵tou taina Kelisiano. (1 Petelu 2:​17; 3:​10, 11; 4:8; 2 Petelu 1:​5-7) Ko te mea ke maua te filemu, e ‵tau o fakatau a‵lofa tatou. (Ioane 13:​34, 35; Efeso 4:​1, 2) E mafai o laveagofie a te ‵tou a‵lofa mo te ‵tou filemu i fono ‵lasi kolā e fai sāle. I te taimi ne fai i ei te fono lasi i Costa Rica i te 1999, ne fanoanoa malosi se tino telā e ‵togi atu sāle ana mea i te malae vakalele me ko ‵pono ne Molimau a Ieova, kolā ne olo atu o fakatali a tino kolā ne o‵mai ki te fono, ana mea kolā e ‵togi atu ki tua. I te lua o aso, ne lavea ne ia a te a‵lofa mo te filemu telā ne fakaasi atu i te talimālō ‵lei atu ki tino ‵fou konā faitalia me ne seki iloa ne Molimau i konā a latou. I te ‵toe aso eiloa, ne kau atu a te tagata tenei o fakatali a tino ‵fou kae ne fakamolemole atu foki ke fai sena akoga faka-te-Tusi Tapu.

¹⁹ E mafai o fakaasi atu i te auala e ‵nofo fakatalitali ei tatou ki te aso o Ieova mo tena lalolagi fou telā ne folafola mai i te ‵tou kausaki atu ke maua te filemu i ‵tou va mo ‵tou taina mo tuagane. (Salamo 37:11; 2 Petelu 3:13) Kāti e faigata ke maua ne tatou se va fealofani mo se taina talitonu. E mata, e mafai o ola fakatasi tatou mo ia i te Palataiso? Kafai e isi se taina telā e ita ki a koe, e ‵tau o “faka‵lei” fakavave aka te mea tenā. (Mataio 5:​23, 24) E tāua ‵ki te mea tenā māfai e fia maua ne tatou se va filemu mo Ieova.​—⁠Salamo 35:27; 1 Ioane 4:20.

²⁰ E mata, ‘e fakatali‵tali ‵tonu eiloa tatou ki te aso o Ieova, kae olioli eiloa ke na oko mai’? E fakaasi mai ne te ‵tou tumau i te faiga o amioga ‵ma i te lalolagi amio masei tenei a te ‵tou olioli ke lavea ne tatou te fakaseaiga o amioga ma‵sei. E se gata i ei, e fakaasi atu foki ne ‵tou faifaiga amio atua a te ‵tou loto naunau ke na oko mai te aso o Ieova kae ke na ola mai lalo i te pulega a te Malo. Kae e fakaasi mai ne te ‵tou kausaki atu ke maua se va filemu mo ‵tou taina tali‵tonu i te vaitaimi nei a te ‵tou fakamoemoega ke ola i te lalolagi fou kae filemu. Ona ko mea konā, e fakaasi atu i ei me e ‵nofo “fakatalitali” kae ‘olioli faeloa tatou ki te oko mai o te Aso o Ieova.’

[Fakamatalaga mai lalo]

Koi Masaua ne Koe?

• Se a te uiga o te ‘olioli faeloa ki te oko mai o te aso o Ieova’?

• E fakaasi atu pefea ne tatou i ‵tou faifaiga me ‵nofo “fakatalitali” tatou?

• Kaia e tāua ei a “faifaiga amio atua”?

• Ne a ‵tou mea e ‵tau o fai ko te mea ke ‘‵ma kae ‵lei tatou i mua o te Atua, ka ke ola filemu foki tatou mo ia’?

[Fesili mo te Sukesukega]

1, 2. E faka‵tusa aka pefea ne tatou a te ‵tou ‵nofo “fakatalitali” ki te aso o Ieova?

3. Se a te kilokiloga e ‵tau o maua ne Kelisiano e ‵tusa mo pati i te 2 Petelu 3:​11, 12?

4. Ne a mea e aofia i te ‘olioli faeloa ki te oko mai o te aso o Ieova’?

5. E fakaasi atu pefea ne tatou me e olioli malosi eiloa tatou ke na oko mai ‘te aso o Ieova’?

6. Ne a ‵tou mea e ‵tau o fai ke ‵malu tatou?

7, 8. (a) E mafai pefea o puli i a tatou a te tāua o te fai faeloa o “amioga ‵malu”? (e) Ne a fakatonutonuga e manakogina ke fai?

9. Se a te mea e fakamalosi mai ke fai ne tatou ona ko te amio atua?

10. Kaia e ‵tau ei o puipui tatou mai te malosi fakalata tino o “koloa”?

11. Ne fakaasi mai pefea ne se tagata telā ne fano o ‵sala galuega i nisi fenua kese‵kese a te tāua o faifaiga amio atua i lō koloa?

12. Kaia e ‵tau ei o fakamuamua ne tatou a mea faka-te-agaga i ‵tou olaga?

13. Se a te tulaga e ma‵nako tatou ke ‵tu i ei māfai e oko mai te aso o Ieova?

14. Ne a mea e aofia i te tumau i te “‵ma” faeloa?

15. (a) Kaia ne ‵tau ei mo tino Isalaelu o faite a fele i luga i olotou gatu? (e) Kaia e ‵tu ‵kese ei a tavini a Ieova i aso nei?

16. Ne a mea e aofia i te faiga ke maua ne tatou a te loto “‵lei”?

17. Se a te lagonaga e ‵tau o maua ne tatou māfai e kausaki atu ki tauliaga i loto i te fakapotopotoga Kelisiano?

18. Ne a uiga e lauiloa i ei a Molimau a Ieova?

19. Kaia e tāua ei ke maua se va filemu mo ‵tou taina tali‵tonu?

20. Ne a auala e fakaasi atu i ei te ‵nofo “fakatalitali”?

[Ata i te itulau e 9]

E fakaasi atu i amioga ‵malu a te ‵tou ‵nofo “fakatalitali”

[Ata i te itulau e 10]

A te talaiatuga o te Malo se galuega fakaola tino

[Ata i te itulau e 12]

Ke na taumafai ke maua se va filemu mo nisi tino i taimi e ‵nofo fakatalitali ei tatou ki te aso o Ieova