“Se Vaegā Olaga La Pefea E Fia Ola Koutou I Ei?”

“Kafai ko fakamaseigina a mea katoa penā, se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua.”​—2 PETELU 3:11.

1. Kaia ne fai ei a te lua o tusi a Petelu e pelā me se fakamalosiga ‵tau ki Kelisiano i ana aso?

ITE taimi ne tusi ei ne te apositolo ko Petelu a te lua o ana tusi fakaosofia, ko oti ne kufaki ei a te fakapotopotoga Kelisiano i fakasauaga e uke, kae ne seki fakagata i ei a te loto finafinau io me ko te gasolo ki mua o te fakapotopotoga. Tela la, ne fakaaoga ne te Tiapolo a te suā togafiti, se mea telā ne manumalo i ei a ia i taimi e uke i aso mua. E pelā mo te mea ne fakaasi mai ne Petelu, ne taumafai a Satani ke fakamasei ne ia a tino o te Atua e auala i faiakoga ‵loi kolā ne “sē ma‵nako ke ‵kilo ki se isi mea ake, na ko fafine fina lalolagi fua” mo “te kaimanako.” (2 Petelu 2:1-3, 14; Iuta 4) E ‵tusa mo te mea tenei, a te lua o tusi a Petelu se tusi fakamalosi e uiga ki te fakamaoni.

2. Se a te mea e fakasino tonu ki ei te 2 Petelu mataupu e 3, kae ne a fesili e ‵tau o fesili ifo ne tatou?

² Ne tusi mai a Petelu: “I toku manatu se mea ‵tau mo au o fakaala otou mafaufau i mea konei i aso katoa koi ola ei au. Me e iloa ne au me e tuku keatea ne au te foitino mate tenei . . . Tela la, ka fai eiloa ne au a te mea e mafai ne au o salasala se auala e masaua ei ne koutou a mea konei i taimi katoa, manafai ko mate au.” (2 Petelu 1:13-15) E tonu, ne iloa ne Petelu me ko pili o mate a ia, kae ne manako a ia ke masaua ne tino a mea kolā ne faipati a ia ki ei. E tonu, ne fai ana pati e pelā me se vaega o te Tusi Tapu, kae ko mafai o fai‵tau tatou katoa ki ei i aso nei. E tāua ‵ki eiloa ki a tatou a te mataupu e 3 i te lua o tusi a Petelu, me e fakasino tonu atu loa ki “aso fakaoti” o te olaga tenei mo te fakaseaiga o te lagi mo te lalolagi fakatusa. (2 Petelu 3:3, 7, 10) Se a te polopolokiga ne tuku mai ne Petelu mō tatou? Ka fesoasoani mai pefea a te fakagalue ne tatou tena polopolokiga ke maua ei ne tatou te taliaga a Ieova?

3, 4. (a) Se a te folafolaga ne fai ne Petelu, kae se a te fakailoaga ne tuku mai ne ia? (e) Ne a manatu e tolu kolā ka mafau‵fau tatou ki ei?

³ Mai tua o te fakaasiatuga a te fakaseaiga o te lalolagi a Satani, ne fai mai a Petelu: “Se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua.” (2 Petelu 3:11, 12) Ne iloa ne Petelu me ko tino fua kolā e fai ne latou te loto o Ieova kae fakaasi ne latou a uiga kolā e fakafiafia atu ki a Ia, ka ‵sao i te ‘aso o te fakamasinoga.’ (Isaia 61:2) Tela la, ne fakaopoopo mai te apositolo: “Ka ko koutou e oku taugasoa, ko leva ne iloa ne koutou a te mea nei. Tela la, ke matapula koutou, ke mo a e takitaki ‵se koutou ne te ‵se o tino ofa tulafono kae pa‵ku ei koutou mai otou tulaga ‵mautakitaki.”​—2 Petelu 3:17.

⁴ Mai te aofia i tino kolā ko “leva ne iloa ne [latou] a te mea nei,” ne iloa ne Petelu me i aso fakaoti, e ‵tau eiloa o fakaeteete a Kelisiano ko te mea ke tumau te lotou fakamaoni. Fakamuli, ne fakamatala manino atu ne te apositolo ko Ioane a te pogai tenei. Ne iloa ne ia me ne ‵pei ifo a Satani mai te lagi kae “ko oko eiloa i te kaitaua” ki tino kolā “e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu.” (Fakaasiga 12:9, 12, 17) Ka manumalo eiloa a tavini fakaekegina a te Atua fakatasi mo olotou taugasoa ko ‘nisi mamoe’ fakamaoni. (Ioane 10:16) Kae e a tatou taki tokotasi? E mata, ka fakatumau ne tatou a te ‵tou fakamaoni? Ka fai eiloa tatou penā māfai e taumafai tatou ke (1) ati aka a uiga o te Atua, (2) ke tumau i te ‵ma i mea tau amioga mo te feitu faka-te-agaga, kae (3) ke maua se kilokiloga tonu e uiga ki fakalavelave. Ke na onoono nei tatou ki manatu konei.

Ke Ati Aka a Uiga o te Atua

5, 6. Ne a uiga e ‵tau o taumafai tatou ke ati aka kae kaia e manakogina i ei a ‘taumafaiga e uke’?

⁵ I te kamataga o tena tusi i te lua, ne tusi atu a Petelu: “Fai te mea e mafai ne koutou o fakaopoopo te ‵lei ki te otou fakatuanaki, fakaopoopo ki te otou ‵lei a te poto; ki te otou poto fakaopoopo ki ei te loto pulea; ki te otou loto pulea, fakaopoopo ki ei te kufaki, ki te otou kufaki fakaopoopo atu ki ei te amio atua; ki te otou amio atua fakaopoopo atu ki ei te alofa fakataina; ki te otou alofa fakataina fakaopoopo atu ki ei te alofa. Konei e mea e manakogina ne koutou, kae kafai e uke a mea penei i a koutou, e fai ne latou koutou ke fai mea mafai, kae fakatupu malosi foki ei a te poto i a koutou e uiga ki te ‵tou Aliki ko Iesu Keliso.”​—2 Petelu 1:5-8.

⁶ E tonu, e manakogina a ‘taumafaiga e uke’ ke ‵kau atu ki galuega kolā e fesoasoani mai ke ati aka ei ne tatou a uiga o te Atua. E pelā me se fakaakoakoga, e manakogina a taumafaiga ke ‵kau atu ki fakatasiga faka-Kelisiano katoa, ke fai‵tau ki te Tusi Tapu i aso katoa, kae ke fakatumau se sukesukega totino aoga. Kae e manakogina i ei a te galue malosi fakatasi mo te faiga o se fakatokaga ke fai faeloa te Tapuakiga a Kāiga i afiafi i se auala gali kae aoga. Kae kafai ko tau‵tali tatou ki se fakatokaga gali penā, ka faigofie ei ke fakamasani tatou ki ei​—maise eiloa māfai ko maua ne tatou a mea aoga mai i ei.

7, 8. (a) Ne a pati a nisi tino e uiga ki te Tapuakiga a Kāiga i afiafi? (e) Ne a mea aoga e maua ne koe mai te tapuakiga a te kāiga?

⁷ E uiga ki te fakatokaga a te tapuakiga a kāiga, e tusi mai se tuagane, penei: “E fai ei ke tauloto ne matou a mataupu e uke.” E fai mai te suā fafine: “Au e fai ‵tonu atu, au e se manako ke fakagata te akoga. Ko te ‵toe fakatasiga gali ki a au. Kae nei, i te taimi e fai ei ne matou te Tapuakiga a te Kāiga i po, e iloa ne au me e iloa ‵lei ne Ieova a ‵tou manakoga mo te taimi e ma‵nako tatou ki ei.” E fai mai se ulu o te kāiga, penei: “E fesoasoani malosi mai eiloa a te tapuakiga a te kāiga ki a matou. E aoga kae lasi ‵ki te fesoasoani o te fakatasiga tenei ki ma manakoga e pelā me se tauavaga! E tali‵tonu māua me e ati aka ne māua a fuataga o te agaga tapu, kae ko sili atu foki a te ma fia‵fia i te faiga o te galuega talai.” E fai mai te suā ulu o te kāiga: “E fai eiloa ne tama‵liki a olotou sukesukega kae e uke ‵ki a mea e tauloto ne latou​—kae e fia‵fia latou ki ei. E fai ne fakatokaga konei ke tali‵tonu malosi matou me e iloa ne Ieova a mea e manava‵se matou ki ei kae e tali mai ne ia omotou ‵talo.” E mata, e ‵pau ou lagonaga e uiga ki fakatokaga ‵gali faka-te-agaga konei?

⁸ Ke mo a ma talia ne koe a tamā fakalavelave ke taofi aka ei te tapuakiga a te kāiga. Ne fai mai se tauavaga: “I Aso Fa katoa i te masina ko teka atu, ne tupu se fakalavelave i te motou kāiga telā toeitiiti ko taofi ei matou mai te faiga o te motou akoga, kae ne seki talia ne matou ke tupu a te mea tenā.” E tonu, e mafai ne koe o fai a fakamafulifuliga ki au fakatokaga. Kae e ‵tau o fakaiku aka ne koe ke mo a ma taofi aka te Tapuakiga a te Kāiga i afiafi ke mo a ma seke se vaiaso e tasi!

9. Ne fakamalosi pefea ne Ieova a Ielemia, kae ne a mea e tauloto ne tatou mai tena fakaakoakoga?

⁹ Ne fai a te pelofeta ko Ielemia e pelā me se fakaakoakoga ‵lei ki a tatou. Ne manako malosi a ia ki meakai faka-te-agaga ne maua ne ia mai i a Ieova kae ne loto fakafetai a ia ki ei. Ona ko mea‵kai faka-te-agaga ne maua ne ia, ne mafai ei o talai atu a ia mo te kufaki ki tino kolā e se fia ‵saga mai. Ne fai mai a ia: “Te Aliki . . . tau fekau ka ‵ka pelā me se afi i loto i a au.” (Ielemia 20:8, 9) Ne fesoasoani atu ke kufaki a ia i taimi faiga‵ta ke oko atu ki te fakaseaiga o Ielusalema. I aso nei, ko oti ne maua kātoa ne tatou a te Muna tusia a te Atua. Kafai e sukesuke faka‵lei tatou ki ei ke faka‵pau ‵tou kilokiloga mo te Atua, e pelā mo Ielemia, ka mafai o fia‵fia tatou i te ‵tou galuega talai, fakamaoni i taimi o fakalavelave, kae ke tumau i te ‵ma i te mea tau amioga mo te feitu faka-te-agaga.​—Iakopo 5:10.

Ke Tumau i te “‵Ma kae ‵Lei”

10, 11. Kaia e ‵tau o taumafai malosi tatou ke tumau i te “‵ma kae ‵lei,” kae se a te mea e ‵tau o fai ne tatou?

¹⁰ E pelā me ne Kelisiano, e iloa ne tatou me ko ‵nofo atu tatou i aso fakaoti. Tela la, e se ‵poi tatou me ko ‵fonu te lalolagi i mea kolā e takalialia ki ei a Ieova, e pelā mo te kaimanako, faifaiga fakatauavaga sē ‵tau, mo fakasauaga. E ‵tusa mo pati i te Fakaasiga 2:13,14, e mafai o fakamatala fakatoetoe atu a aofaga a Satani i te auala tenei: ‘Kafai e se mafai o fakamatakutaku atu a tavini a te Atua, kae kāti e mafai o fai ke se fakamaoni latou.’ Tela la, e ‵tau o mafau‵fau ‵mafa tatou ki te fakamalosiga alofa a Petelu: “Taumafai malosi eiloa ke ‵ma kae ‵lei koutou i mua o te Atua, ka ke ola filemu foki koutou mo ia.”​—2 Petelu 3:14.

¹¹ A te tugapati ko te “taumafai malosi” e tai ‵pau eiloa mo te fakamalosiga muamua a Petelu ke fai a ‘taumafaiga e uke.’ E manino ‵lei me i a Ieova​—te Tino telā ne fakaosofia ne ia a Petelu ke fakaasi atu a fakatokaga konā—⁠e iloa ne ia a ‵tou taumafaiga e fai ke tumau i te “‵ma kae ‵lei,” mai te lalolagi lailai a Satani. A te ga‵lue malosi o tatou e aofia i ei te puipuiga o ‵tou loto mai manakoga ma‵sei. (Faitau te Faataoto 4:23; Iakopo 1:14, 15.) E aofia foki i ei a te tumau i te ‵teke atu ki a latou kolā e se malamalama i ‵tou olaga faka-Kelisiano kae ‘faifai muna ki a tatou.’​—1 Petelu 4:4.

12. Se a te fakamaoniga e maua ne tatou i te Luka 11:13?

¹² Ona ko te ‵tou tulaga sē ‵lei katoatoa, se mea faigata ke fai a te mea ‵lei. (Loma 7:21-25) E mafai o fakamoe‵moe tatou ke manumalo māfai fua e ‵fuli atu tatou ki a Ieova, telā e kaimalie o tuku mai te agaga tapu ki tino kolā e fakamolemole atu ki a ia. (Luka 11:13) A ko te agaga tapu tenā, e fakamalosi ne ia ke ati aka ne tatou a uiga kolā e maua ei ne tatou te taliaga a te Atua kae fesoasoani mai ke kufaki tatou i fakaosoosoga mo fakalavelave o te olaga, kolā e gasolo aka eiloa ki luga i te taimi ko pili mai ei te aso o Ieova.

Ke Fakamalosi Koe ne Fakalavelave

13. Kafai e fe‵paki tatou mo fakalavelave o te olaga, se a te mea e fesoasoani mai ke kufaki ei tatou?

¹³ Ona ko te mea ko ola tatou i te olaga masei tenei, ka fe‵paki faeloa tatou mo fakalavelave e uke. I lo te loto vāivāi, kaia e se kilo atu koe ki fakalavelave e pelā me se avanoaga ke fakamautinoa atu tou alofa ki te Atua kae fakamalosi aka tou fakatuanaki ki a ia mo tena Muna? Ne tusi mai te soko ko Iakopo: “Oku taina, e ‵tau mo koutou o fia‵fia malosi, manafai e fetaui koutou mo tofotofoga kese‵kese, me e iloa ne koutou, ko te tofotofogina o te otou fakatuanaki, e tupu mai ei te lotomau.” (Iakopo 1:2-4) Ke masaua foki me “e iloa eiloa ne te Aliki [ko Ieova] o fakaola a tino amio atua mai i olotou tofotofoga.”​—2 Petelu 2:9.

14. E fesoasoani mai pefea a te fakaakoakoga o Iosefa ki a tatou?

¹⁴ Ke mafaufau ki te fakaakoakoga a te tama tagata a Iakopo, ko Iosefa, telā ne fakatau atu e pelā me se pologa ne ana taina. (Kenese 37:23-28; 42:21) E mata, ne galo atu te fakatuanaki o Iosefa ona ko te uiga sē alofa telā ne fakafesagai mo ia? E mata, ne seki fiafia a ia ki te Atua ona ko te taliaga ke tupu se mea masei ki a ia? A te tali manino mai te Muna a te Atua ko te ikai! Kae e se tenā fua te gataga o fakalavelave o Iosefa. Fakamuli ifo, ne ‵losi ‵se atu ki a ia ona ko taumafaiga ke pukemālō kae ne ‵pei atu ki te falepuipui. Kae ne tumau eiloa a ia i te tapuaki atu ki te Atua. (Kenese 39:9-21) I lo te fai penā, ne fakamalosi aka a ia ne fakalavelave, kae ne fakamanuia a ia ona ko te mea tenei.

15. Se a te mea e tauloto ne tatou mai te fakaakoakoga a Naomi?

¹⁵ E tonu, e mafai o fakafanoanoa io me fai ne fakalavelave ke mafatia tatou. Kāti ne penā foki a lagonaga o Iosefa i nisi taimi. Ne fai foki penā a nisi tavini fakamaoni a te Atua. Mafaufau ki a Naomi, telā ko mate tena avaga mo ana tama tagata e tokolua. Ne fai mai a ia: “Sa fakaigoa au ki a Naomi, kae fakaigoa mai au ki a Mala [e fakauiga ki a “Puapuaga”], i te mea ko ‵fonu toku ola i puapuaga mai te Atua malosi.” (Luta 1:20, 21) Ne tali atu a Naomi i se auala masani kae loto malamalama. E pelā mo Iosefa, ne seki vāivāi a ia i te feitu faka-te-agaga io me fakalotolotolua e uiga ki tena fakamaoni. Ne fakamanuia ne Ieova a te fafine tāua tenei. (Luta 4:13-17, 22) E se gata i ei, i te lalolagi Palataiso telā ko pili o oko mai, ka fakaseai atu ne ia a fakamaseiga ne fai ne Satani mo tena lalolagi masei tenei. “A mea ne ‵tupu i aso ko ‵teka ka sē toe manatua eiloa.”​—Isaia 65:17.

16. E ‵tau o pefea te ‵tou kilokiloga ki te faiga o ‵talo, kae kaia e fai ei penā?

¹⁶ Faitalia me ne a fakalavelave e fe‵paki mo tatou, e fesoasoani mai te alofa o te Atua ke tumau tatou. (Faitau te Loma 8:35-39.) E tiga eiloa ka se mafai o gata a taumafaiga a Satani ke fakavāi‵vai tatou, ka takavale eiloa a ia māfai e tumau tatou i te “kufaki” kae “ke toka foki otou loto, ko te mea ke mafai ne koutou o ‵talo.” (1 Petelu 4:7) Ne fai mai a Iesu: “Tela la, a koutou ke matapula‵pula kae ‵talo sāle, ko te mea ke maua ne koutou te malosi e ‵sao mai ei koutou i te mea faiga‵ta katoa ka oko mai, kae ‵tu atu ei foki koutou i mua o te Tama a te Tagata.” (Luka 21:36) I tena fakamalosiga ki a tatou ke ‵talo sāle, ne faka‵mafa mai ne Iesu me e tenei eiloa te taimi ke ‵saga tonu atu ki ‵tou tulaga i mua o ia mo tena Tamana. Ko tino fua kolā e ‵tu atu i se tulaga telā e taliagina ne te Atua ka maua ne latou te fakamoemoega ke ‵sao atu i te aso o Ieova.

Ke Galue Malosi i te Galuega a Ieova

17. Kafai e faigata ke talai atu i tou koga talai, e aoga pefea ki a koe a fakaakoakoga ‵lei a pelofeta mua?

¹⁷ A te aofia i fakatokaga faka-te-agaga e fakamalosi ne ia tatou. E fakamasaua mai ne te mea tenei a pati a Petelu: “Se vaegā olaga la pefea e fia ola koutou i ei? E ‵tau o faka‵malu kae fakatapu otou olaga mō te Atua!” (2 Petelu 3:11) A te ‵toe galuega tāua mai mea konei ko te folafola atu o te tala ‵lei. (Mataio 24:14) E tonu, e mafai o faigata a te galuega talai i nisi koga, kāti ona ko te sē ‵saga mai o tino, ‵tekemaiga io me ko to fakalavelave a tino i mea o te olaga i aso katoa. Ne fakafesagai atu a tavini a Ieova i aso mua ki uiga tai ‵pau penā. Kae ne seki ‵fiu vave latou kae ne tumau eiloa i te ‵foki atu “fakafia” o fakaoko atu te fekau mai te Atua. (Faitau te 2 Nofoaiga Tupu 36:15, 16; Ielemia 7:24-26) Se a te mea ne fesoasoani atu ki a latou ke kufaki? Ne fakatāua ne latou te kilokiloga a Ieova i olotou galuega, kae e se ko te lalolagi. Kae ne ‵kilo atu latou ki ei e pelā me ko te ‵toe galuega taulia ke folafola atu te igoa o te Atua.​—Ielemia 15:16.

18. Se a te kilokiloga ka maua ne tino e uiga ki te talaiatuga o te Malo i aso mai mua telā e ‵viki atu ei ki te igoa o te Atua?

¹⁸ E maua foki ne tatou te tauliaga ke fakasalalau atu te igoa o Ieova mo ana fuafuaga. Mafaufau ki te mea tenei: E pelā mo te faiga o te galuega talai, e se ‵tau o fai ne fili o te Atua se fakamasakoga māfai ko fakafesagai atu latou ki te aso lasi o te Atua. E tonu, e pelā mo te Falao i aso mua, ka iloa ne latou me ko Ieova telā e taua atu ki a latou. (Esoto 8:1, 20; 14:25) I te taimi tenā, ka fakaaloalo ne Ieova ana tavini fakamaoni mai te fakaasi manino atu me i a latou ko ana sui.​—Faitau te Esekielu 2:5; 33:33.

19. E mafai pefea o fakaasi atu me e ma‵nako tatou o fakaaoga faka‵lei a te kufaki o Ieova?

¹⁹ I te taimi ko pili ei o oti te lua o ana tusi, ne tusi atu a Petelu ki ana taina tali‵tonu: “Mafaufau ki te kufaki o te Aliki io me ko te avanoa ko tuku atu ne ia ki a koutou ke faka‵sao ei koutou.” (2 Petelu 3:15) Ao, ke tumau i te fakaaoga faka‵lei ne tatou a te kufaki o Ieova. E pefea la? Mai te atiakaga o uiga kolā e fakafiafia atu ki a ia, mai te tumau i te “‵ma kae ‵lei,” mai te mauaga o se kilokiloga ‵lei e uiga ki fakalavelave, mo te tumau i te fakalavelave i te taviniga e uiga ki te Malo. Mai te faiga penā, ka mafai ei o maua ne tatou a fakamanuiaga se-gata-mai kolā e isi se lotou sokoga ki te “lagi fou mo te lalolagi fou.”​—2 Petelu 3:13.

E Masaua ne Koe?

• E mafai pefea o ati aka ne tatou a uiga o te Atua?

• E mafai pefea o tumau tatou i te “‵ma kae ‵lei”?

• Ne a mea e tauloto ne tatou mai i a Iosefa mo Naomi?

• Kaia e fai ei a te ‵kau atu ki te galuega talai e pelā me se tauliaga tāua ‵ki?

[Ata i te itulau e 17]

Se a te mea ka fesoasoani atu ki tagata a‵vaga ke ati aka ne latou a uiga o te Atua i olotou kāiga?

[Ata i te itulau e 18]

Ne a mea e mafai o tauloto ne tatou e uiga ki te auala ne saga atu ei a Iosefa ki fakalavelave?