Ke Talitonu Katoatoa ki a Ieova

“Te Aliki, ko koe fua toku fakamoemoega, au ne fakatuanaki eiloa ki a koe mai taku folikiga.”​—⁠​SALAMO 71:⁠5.

E MALUGA atu i te iva futu a te loa o Koliata. E se tioa eiloa o ma‵taku a sotia o Isalaelu ma taua atu ki a ia! I tafataeao mo fakaafiafi o vaiaso katoa, ne kalaga atu sāle mo te fakatauemu a te toa o Filisitia ko Koliata ki te kautau o Isalaelu ke vau se toa ke taua mo ia. Fakamuli ifo, ne fanatu se talavou o taua atu ki ei, kae e se se sotia. Ne foliki ‵ki te tausi mamoe ko Tavita māfai e fakatusa ki tena fili. Kāti e ‵mafa atu foki a meatau a Koliata i a ia! Kae ne taua atu eiloa te talavou tenei ki te mafi tenā kae ne lauiloa fakamuli a ia ona ko tena loto toa.​—⁠1  Samuelu 17:​1-​51.

² Ne maua mai fea te loto toa o Tavita? Ke mafau‵fau ki nisi pati ne tusi mai ne Tavita i tausaga fakamuli ifo o tena olaga: “Te Aliki, ko koe fua toku fakamoemoega, au ne fakatuanaki eiloa ki a koe mai taku folikiga.” (Salamo 71:⁠5) E tonu, ne talitonu katoatoa a Tavita ki a Ieova talu mai te taimi koi talavou ei a ia. I te taimi ne taua atu ei ki a Koliata, ne fai atu a ia, penei: “A koe e vau mo tau pelu mo tau tao, ka ko au e fanatu i te igoa o te Aliki Malosi, te Atua o te kautau a Isalaelu, telā ne muna masei koe ki ei.” (1 Samuelu 17:45) Ne talitonu katoatoa a Koliata ki tena mafi mo ana meatau, kae ne talitonu katoatoa a Tavita ki a Ieova. Kaia fua la e ‵tau ei mo Tavita o mataku ki se tagata faitalia tena lasi mo te uke o ana meatau māfai e fakatasi atu ki a ia a te Aliki Sili o te lagi mo te lalolagi?

³ I te taimi ne faitau ei koe ki te tala o Tavita, e mata ne manako foki koe ke malosi atu tou loto talitonu ki a Ieova? Kāti e ma‵nako a tino e tokouke i a tatou ke fai penā? Ke iloilo nei ne tatou a auala e lua kolā e mafai ei o tali‵tonu katoatoa tatou ki a Ieova. Muamua la, e ‵tau o ‵kalo keatea tatou mai mea kolā e taofi aka ei te mauaga o te loto talitonu penā. Te lua o mea, e ‵tau o iloa ne tatou a mea kolā e aofia i te tali‵tonu ki a Ieova.

Te Fakaseaiga o te Fakalavelave Masani Telā e Taofi ei ‵Tou Loto Tali‵tonu ki a Ieova

⁴ Ne a mea e taofi sāle ei a tino mai te tali‵tonu ki te Atua? E masani sāle o ‵segi a tino i te pogai e ‵tupu ei a mea ma‵sei. Ko oti ne akoako atu ki tino e tokouke me ne māfua mai i te Atua a logo‵maega. Kafai e tupu se fakalavelave mataga, e fai atu sāle a faifeau me ko “kalagagina” a te tino tenā ke ‵kau fakatasi mo te Atua i te lagi. E se gata i ei, e akoako atu ne nisi takitaki lotu me ko leva ne fuafua ne te Atua a mea takitasi kolā ka ‵tupu i te lalolagi nei​—⁠e aofia i ei a fakalavelave ‵tupu fakafuasei mo mea ma‵sei katoa. Kafai e penā loa, se mea faigata ‵ki ke tali‵tonu ki se vaegā Atua sē alofa penā. E manako malosi a Satani, telā e fakapouli ne ia a mafaufauga o tino sē tali‵tonu ke fakamalosi aka “a akoakoga a temoni.”​—⁠1 Timoteo 4:1; 2 Kolinito 4:⁠4.

⁵ E manako Satani ke sē tali‵tonu a tino ki a Ieova. E se manako a te fili o te Atua tenā ke iloa ne tatou a te pogai e logo‵mae ei tatou. Kae kafai ko iloa ne tatou mai te Tusi Tapu a pogai konā, e manako Satani ke puli i a tatou a mea konā. Tela la, se mea ‵lei ke fakamasaua faeloa ne tatou i taimi katoa a pogai fakavae e tolu e maua ei ne tino a logo‵maega. Kafai e fai penā, ko fakatalitonu aka ei ne tatou i ‵tou loto me e se māfua mai i a Ieova a fakalavelave e fe‵paki mo tatou i te olaga.​—⁠Filipi 1:​9, 10.

⁶ A te pogai e tasi e logo‵mae ei a tino me e manako Satani o fakaseai te fakamaoni o tavini a Ieova. Ne taumafai a ia o fakaseai te fakamaoni o Iopu. Ne seki taunu tena fuafuaga i te taimi tenā, kae e seki ‵fiu eiloa a ia. E pelā me ko te pule o te lalolagi nei, e salasala malosi a ia ki tavini fakamaoni a Ieova ke “kai” ne ia. (1 Petelu 5:⁠8) E aofia i ei ko tatou taki tokotasi! E manako Satani o taofi aka ne ia te ‵tou tavini atu ki a Ieova. Tela la, e fakamāfua sāle aka ne ia a fakasauāga. Kae ui eiloa te logo‵mae o fakasauāga konā, e maua ne tatou mai ei a pogai ‵lei ke kufaki. Kafai e fai penā, ko fakamaoni atu ei ne tatou i a Satani se tino loi kae ka fakafiafia atu ei ki a Ieova. (Iopu 2:4; Faataoto 27:11) I te taimi e fakamalosi aka ei ne Ieova tatou ke kufaki i fakasauāga, ka gasolo foki o lasi te ‵tou loto tali‵tonu ki a ia.​—⁠Salamo 9:​9, 10.

⁷ A te lua o pogai e logo‵mae ei a tino e maua atu i te fakatakitakiga tenei: “E tau ne te tino a te fuaga ne toki ne ia.” (Kalatia 6:⁠7) I nisi taimi e toki ne tino a fuaga mai te faiga ne latou a filifiliga sē ‵lei kae tau ne latou a ikuga fakalogo‵mae o olotou mea konā. Kāti e filifili aka ne latou ke fakatele fakama‵kini olotou mea fakateletele kae iku atu i ei ki se fakalavelave. E filifili aka ne nisi tino ke ‵pusi latou kae iku atu i ei ki te fatu vāivāi io me ko te kenisa. Kae ko tino kolā e filifili aka ke aofia i faifaiga faka-tauavaga sē ‵tau ka logo‵mae i te fesokotakiga faka-te-kāiga sē ‵lei, sē amanaia ne tino, masaki ‵pisi mo tama‵liki tōsala. Kāti ka ‵losi atu a tino me ko te Atua e māfua mai i ei a logo‵maega, kae tela la, ko latou eiloa e logo‵mae i olotou fakaikuga sē ‵lei.​—⁠Faataoto 19:⁠3.

⁸ A te tolu o pogai e logo‵mae ei tatou e fakaasi mai i te Failauga 9:11: “E tasi te suā mea tenei ne iloa aka ne au, me i te lalolagi tenei, a tagata ‵tele ma‵kini e se tumau faeloa te lotou manumalo i fakatau telega, mo tino toa e se manumalo faeloa i taua. A tino poto e se tumau faeloa i te olaga ‵lei, a tino atamai e se maua katoa ne latou te maumea, mo tino fai mea mafai e se tumau faeloa te siki ki tulaga ma‵luga. A te malaia e maua ne tino katoa.” I nisi taimi, e ‵nofo atu a nisi tino i te koga ‵se i te taimi ‵se. Kae ui eiloa te ‵tou malosi io me ko ‵tou vāivāi, e mafai fua o oko fakafuasei mai a logo‵maega io me ko te mate i so se taimi. E pelā mo aso ne ola ei a Iesu, ne siga ifo se olo i Ielusalema kae ne ‵mate ei a tino e toko 18. Ne fakaasi atu ne Iesu i ei me e seki fakasala latou ne te Atua ona ko olotou agasala. (Luka 13:⁠4) Ikai, e se ‵tau o ‵losi atu a vaegā logo‵maega penā ki a Ieova.

⁹ E tāua ‵ki ke malama‵lama tatou i nisi pogai e logo‵mae ei a tino. Kae e isi se feitu o te mataupu tenei telā e faigata o malama‵lama i ei a tino e tokouke. Ko te mea tenei: Kaia ne talia ei ne Ieova te Atua a logo‵maega?

Kaia ne Talia ei ne Ieova a Logo‵maega?

¹⁰ E mafai o maina tatou i te mea tāua tenei mai se vaega o te tusi a Paulo ki te kau Loma. Ne tusi atu a Paulo, penei: “A mea katoa ne faite, ko fakatalitali fua i te fia lavea o te Atua ko fakaasi mai tena fanau. Me ko fakatakavale a mea katoa ne faite ke sē aogā, e se i tena loto eiloa, ka ko te Atua ne manako ke penā. Kae isi eiloa se fakamoemoega tenei: me ka fakasaoloto a mea katoa ne faite mai te pologa mo te iku vale, ki te ‵kau fakatasi i te saolotoga ‵malu o te fanau a te Atua. Me e iloa ne tatou i mea katoa ne faite, ne ma‵nava fi‵ta; e pelā eiloa mo te ‵mae o te fafine fanau, ke oko mai eiloa ki aso nei.”​—⁠Loma 8:​19-22.

¹¹ Ko te mea ke malamalama faka‵lei tatou i fuaiupu konei, e ‵tau o onoono muamua tatou ki nisi manatu tāua konei. E pelā mo te manatu tenei, ko oi ne fai ne ia ke sē aogā a mea katoa? E pelā mo pati a Paulo, ko te Atua ne fai ne ia te mea tenā kae isi se “fakamoemoega” ki ei. E tonu, ne tuku mai ne ia se fakamoemoega ki tino fakamaoni me ka “fakasaoloto a mea katoa ne faite mai te pologa mo te iku vale.”a

¹² Kae se a la te mea e fakauiga ki ei a “mea katoa ne faite” i te tusi siki tenei? E fai mai nisi tino me e fakauiga a “mea katoa ne faite” ki mea i te lalolagi kātoa, e aofia i ei ko manu mo lakau. Kae e mata, e maua ne manu mo lakau a te fakamoemoega ke fai pelā me ne “fanau a te Atua”? Ikai. (2 Petelu 2:12) Tela la, e fakauiga fua a “mea katoa ne faite” ki tino. Ko mea kolā e pokotia i te agasala mo te mate ona ko te ‵tekeatuga i Etena, kae e ma‵nako malosi ki se fakamoemoega.​—⁠Loma 5:12.

¹³ Se a te mea ne oko atu ki tino ona ko te ‵tekeatuga tenā? Ne fakamatala mai ne Paulo a te ikuga ki ei i pati konei: sē aogā. E ‵tusa mo te fakamatalaga i se tusi e tasi, e fakamatala mai ne te pati tenā a “te sē aogā o se mea telā ne faite mō te pogai ne faite ki ei.” Ne faite a tino ke ola ki te se-gata-mai, ke ga‵lue fakatasi e pelā me se kāiga ‵lei katoatoa i te faiga o te lalolagi ke pelā me se palataiso. I lō te fai penā, e ola latou i se olaga toetoe, fakalogo‵mae kae fakafanoanoa. E pelā mo pati a Iopu, “A tatou katoa ne fa‵nau mai e vāivāi kae seai se mea e mafai o fai.” (Iopu 14:⁠1) Ko te sē aogā eiloa tenā!

¹⁴ Nei la, ko oko atu nei tatou ki te fesili fakavae tenei: Kaia ne fai ei ne te “famasino o te lalolagi” ke maua ne tino se olaga telā e logo‵mae kae fakafanoanoa penei? (Kenese 18:25) E mata, ne fai ne ia te mea tonu? Ke masaua la te mea ne fai ne ‵tou mātua muamua. I te ‵teke atu ki te Atua, ne ‵kau fakatasi laua mo Satani telā ne ‵teke katoatoa atu ki te pulega a Ieova. Mai i a la faifaiga konā, ne ‵lago atu laua ki te manatu me e ‵lei atu ke pule ne tino a latou eiloa mai lalo i te takitakiga a te tino ‵teke e aunoa mo te fesoasoani o Ieova. I te fakasalaga ne ia a tino ‵teke konā, ne tuku atu ne Ieova a te mea telā ne ma‵nako laua ki ei. Ne talia ne ia ke pule ne tāgata a latou eiloa mai lalo i fakatakitakiga a Satani. Mai lalo o fakanofonofoga konei, se a foki la te fakaikuga e sili atu te ‵lei i tafa o te ola i se olaga sē aogā telā e isi se fakamoemoega ki ei?

¹⁵ E tonu, e se tenei eiloa te “loto” o mea katoa ne faite. Ne fa‵nau tatou e pelā me ne pologa ki te agasala mo te iku vale kae e se mafai o fai ne tatou se filifiliga ki ei. Kae ona ko te alofa fakamagalo o Ieova ne talia ei ne ia Atamu mo Eva ke tumau i te ola kae ke fai foki ne la tama‵liki. E ui eiloa ko pologa tatou, ko la tama‵liki, ki te agasala mo te mate, e maua ne tatou te avanoaga ke fai te mea telā ne seki fai ne Atamu mo Eva. E mafai o faka‵logo tatou ki a Ieova kae ke iloa foki ne tatou me e amiotonu kae ‵lei katoatoa tena pulega, kae ko tāgata kolā e fai fua olotou pulega e aunoa mo te fesoasoani o Ieova ka maua fua ne latou a logo‵maega, te fanoanoa mo te sē aogā. (Ielemia 10:23; Fakaasiga 4:​11) E fai fua ne fakatakitakiga a Satani ke ma‵sei atu a mea. E fakamaoni mai ne tala fakasolopito a te ‵tonu o mea konei.​—⁠Failauga 8:⁠9.

¹⁶ E mautinoa eiloa, me isi ne pogai tāua ne fai ei ne Ieova a tino ke ola i se olaga sē aogā. E mata, e fakauiga i ei me ne māfua mai i a Ieova a mea sē aogā mo logo‵maega kolā e pokotia i ei a tino taki tokotasi i aso nei? Ke mafaufau la ki se famasino amiotonu telā ko fakasala ne ia te tino ofa tulafono. Kāti ka logo‵mae malosi a te pagota tenā i taimi ko fakasala ei a ia, kae e mata, ka ‵losi atu a ia me ko te famasino ne māfua mai ei ana logo‵maega? E sē penā loa! E se gata i ei, e se māfua mai i a Ieova a amioga ma‵sei katoa. E fai mai te Iakopo 1:​13, penei: “I te Atua e se mafai o fakaosoosogina ne te masei, kae sē fakaosooso foki ne ia tino ki te masei.” Kae ke masaua foki la me e seki fakasala ne Ieova a tino e aunoa mo se “fakamoemoega.” Ko oti ne fai ne ia mo te alofa a fakatokaga mō tama‵liki fakamaoni a Atamu mo Eva ke lavea ne latou te gataga o te olaga sē aogā kae ke fia‵fia ki “te saolotoga ‵malu o te fanau a te Atua.” I te vaitaimi tenā, ka sē toe manavase eiloa a tino fakamaoni ki te gasolo ifo o mea katoa ne faite ki se tulaga sē aogā. A te fakatokaga ne Ieova a te mea tenei i te auala amiotonu e faka‵mautakitaki foki ei ne ia a te ‵tonu katoatoa o tena pulega ki te se-gata-mai.​—⁠Isaia 25:⁠8.

¹⁷ I te taimi e onoono ei tatou ki pogai e logo‵mae ei a tino, e mata, e lavea ne tatou se pogai e ‵tau ei o ‵losi atu me ko Ieova ne māfua mai ei a amioga ma‵sei io me ke sē tali‵tonu tatou ki a ia? E ‵kese mai i ei, a te vaegā sukesukega penei e fai ei ke lotoma‵lie tatou ki pati a Mose, konei: “A te Aliki ko te otou ‵puiga malosi, e tonu kae amiotonu i ana auala katoa; a te otou Atua e fakamaoni kae amiotonu; e fai ne ia te mea tonu kae nofogamalie.” (Teutelonome 32:⁠4) Mai te mafaufau ‵loto ki mea konei, taumafai ke malamalama faeloa tatou i ei i taimi katoa. Kafai e fai tatou penā, ka mafai o ‵teke atu tatou ki taumafaiga a Satani ke ‵toki aka a mafaufauga fakalotolotolua māfai ko fakafesagai tatou mo tofotofoga. Kae pefea la te lua o auala telā ne fakaasi mai i te kamataga? Ne a mea e aofia i te talitonu ki a Ieova?

Te Uiga o te Talitonu ki a Ieova

¹⁸ E fakamalosi mai a te Muna a te Atua ke: “Talitonu ki te Aliki mo tou loto katoa. Sa fakalagolago lele eiloa ki tou iloa. Ke masaua faeloa ne koe te Aliki i au mea katoa e fai, kae ka fakaasi atu ne ia ki a koe te auala tonu.” (Faataoto 3:​5, 6) Ko oko loa i te ‵gali kae fakamalosi mai o pati konā. E tonu, e seai se tino i te lagi mo te lalolagi kātoa e fakatuagagina e pelā mo te ‵tou Tamana alofa i te lagi. Kae ui i ei, se mea faigofie fua ke faitau ki pati i te Faataoto i lō te faiga.

¹⁹ E uke a manatu ‵se o tino e uiga ki te talitonu ki a Ieova. E mafau‵fau a nisi tino ki te talitonu tenā e pelā fua me se lagonaga fiafia telā e māfua mai i te loto. E tali‵tonu a nisi tino me i te talitonu ki te Atua e fakauiga ki te fakalagolago ki a ia ke puipui, ke faka‵lei ne ia ‵tou fakalavelave katoa i te auala telā e ma‵nako tatou ki ei! Kae e se ‵tau eiloa o maua ne tatou a manatu konā. E se fakauiga fua a te talitonu ki lagonaga kae sē ko te fakamoemoe foki ki mea kolā e se mafai eiloa o maua. Ki tino ma‵tua, a te talitonu ki se mea e aofia i ei a te faiga o fakaikuga mo te iloa tonu kae fetaui ‵lei.

²⁰ Ke toe mafaufau ki pati i te Faataoto 3:⁠5. E fakaasi mai ei a te ‵kese o te talitonu ki a Ieova mo te fakalagolago ki ‵tou iloa, kae fakaasi mai foki i ei me sē mafai o fai ne tatou a mea e lua konā. E mata, e fakauiga i ei, me e se mafai ne tatou o fakaaogā a ‵tou malamalama? Ikai, e manako Ieova ke fakaaogā ne tatou a te malamalama telā ne tuku mai ne ia ke tavini atu ei ki a ia. Kae ko oi e fakalago‵lago tatou ki ei i te faiga o ‵tou fakaikuga? Kafai e se fetaui a te auala e mafau‵fau ei tatou mo auala o Ieova, e mata, ka talia ne tatou a tena poto telā e maluga atu i ‵tou poto? (Isaia 55:​8, 9) A te talitonu ki a Ieova ko te talia ne tatou ana mafaufauga ke takitaki ne ia ‵tou mafaufauga.

²¹ E pelā me se fakaakoakoga: Ke mafaufau ki se tamaliki foliki e sagasaga i te nofoga mai tua o te motoka, kae ko ana mātua e saga‵saga mai mua. E fakatele ne tena tamana a te motoka. Kafai e tupu se fakalavelave i te taimi o te malaga​—⁠kāti ko ‵se te lotou auala io me ko masei te aso io me sē ‵lei te tulaga o te auala​—⁠ne a mea ka fai ne te tamaliki fakalogo telā e talitonu katoatoa ki ana mātua? E mata, ka fakatonutonu ne ia te auala mai tena nofoga io me fai atu ki tena tamana a te mea e ‵tau o fai? E mata, e fakalotolotolua a ia ki te fakaikuga a ona mātua io me ‵teke atu ki te fakatonuga ke sagasaga malie i te nofoga? Ikai, ka talitonu katoatoa a ia ki ana mātua faitalia me sē ‵lei katoatoa laua. A Ieova ko te ‵tou Tamana ‵lei katoatoa. E mata, ka sē tali‵tonu katoatoa tatou ki a ia, maise eiloa māfai ko fe‵paki tatou mo fakalavelave faiga‵ta?​—⁠Isaia 30:⁠21.

²² E fakaasi mai i te Faataoto 3:6 me e ‵tau mo tatou o ‘masaua faeloa Ieova i ‵tou mea katoa e fai,’ kae e se i taimi fua e fepaki ei mo fakalavelave faiga‵ta. Tela la, e ‵tau o fakaasi atu ne tatou i ‵tou fakaikuga e fai i aso takitasi me tali‵tonu tatou ki a Ieova. Kafai e sae aka se fakalavelave, e se ‵tau o fanoanoa, polepole io me ‵teke atu ki te takitakiga a Ieova e uiga ki te toe auala ‵lei ke fakafesagai atu ki te fakalavelave tenā. E ‵tau o ‵kilo atu tatou ki tofotofoga e pelā me se avanoaga ke ‵lago atu ei tatou ki te pulega a Ieova, ke fakamaoni atu i ei i a Satani se tino loi, kae ke ati aka ne tatou a nisi uiga kolā e fakafiafia atu ki a Ieova.​—⁠Epelu 5:​7, 8.

²³ E mafai o fakaasi atu ne tatou te tali‵tonu ki a Ieova faitalia a mea faiga‵ta kolā e mafai o fakamatakutaku mai ki a tatou. E fai tatou penā i ‵tou ‵talo mo ‵tou ‵kilo atu ki te Muna a Ieova mo tena fakapotopotoga ke takitaki ei tatou. Kae e mafai pefea o fakaasi atu ne tatou te ‵tou tali‵tonu ki a Ieova māfai ko fepaki mo se fakalavelave i te lalolagi i aso nei? Ka sautala tatou ki ei i te suā mataupu.

[Fakamatalaga mai lalo]

Se a Tau Tali?

• Ne fakaasi atu pefea ne Tavita a tena talitonu ki a Ieova?

• Ne a pogai e tolu e logo‵mae ei a tino i aso nei, kae kaia e ‵lei ei ke mafau‵fau faeloa ki ei?

• Se a te fakasalaga ne tuku atu ne Ieova ki tino, kae kaia e fai ei pelā me se fakasalaga tonu?

• Ne a mea e aofia i te talitonu ki a Ieova?

[Fesili mo te Sukesukega]

1. Se a te tulaga fakamataku ne fepaki mo te tausi mamoe talavou ko Tavita?

2, 3. (a) Kaia ne mafai ei ne Tavita o fakafesagai atu ki a Koliata mo te loto talitonu? (e) Ne a mea e lua ka sau‵tala tatou ki ei ko te mea ke tali‵tonu tatou ki a Ieova?

4, 5. Kaia e faigata ei ke tali‵tonu a tino e tokouke ki te Atua?

6. E fakaasi mai pefea ne te 1 Petelu 5:8 a te pogai e tasi e logo‵mae ei a tino?

7. Se a te fesoasoani e maua ne tatou i te Kalatia 6:7 ke iloa ei ne tatou a te pogai e tasi o logo‵maega?

8. E ‵tusa mo te Failauga 9:​11, kaia e logo‵mae ei a tino?

9. Se a te mea e se malama‵lama i ei a tino e tokouke e uiga ki logo‵maega?

10, 11. (a) E ‵tusa mo te Loma 8:​19-22, ne a mea ne ‵tupu ki “mea katoa ne faite”? (e) E iloa pefea ne tatou a te tino telā ne fai ne ia a mea katoa ke sē aogā?

12. Ne a mea ko ‵numi valevale i ei a tino e uiga ki te mea e fakasino atu ki ei a “mea katoa ne faite,” kae e mafai o tali atu pefea te fesili tenei?

13. Ne a mea ne maua ne tino ona ko te ‵tekeatuga i Etena?

14, 15. (a) Se a te fakamaoniga o te fai mea tonu o Ieova e lavea ne tatou mai te fakasalaga ne tuku atu ne ia ki tino? (e) Kaia ne fai atu ei a Paulo me ne fai a mea katoa ke sē aogā “e se i tena loto”?

16. (a) Kaia e tali‵tonu ei tatou me e se māfua mai i a Ieova a logo‵maega kolā e fe‵paki mo tatou i te lalolagi i aso nei? (e) Se a te fakamoemoega ko oti ne tuku mai ne Ieova mo te alofa ki tino fakamaoni?

17. E pokotia pefea tatou mai te mafaufau ki pogai e logo‵mae ei a tino i te lalolagi i aso nei?

18, 19. Ne a pati i te Tusi Tapu e fakamalosi mai ei ki a tatou ke tali‵tonu ki a Ieova, kae ne a manatu ‵se ko oti ne maua ne nisi tino?

20, 21. Ne a mea e aofia i te talitonu ki a Ieova? Ke fakamatala mai.

22, 23. (a) Kaia e ‵tau ei o tali‵tonu tatou ki a Ieova māfai ko fe‵paki mo fakalavelave, kae fai pefea ne tatou te mea tenā? (e) Ne a mea ka sau‵tala ki ei i te suā mataupu?

[Ata i te itulau e 22]

Ne talitonu a Tavita ki a Ieova

[Ata i te itulau e 24]

Ne fakaasi atu ne Iesu me e se ‵tau o ‵losi atu ki a Ieova a te fakalavelave e uiga ki te olo telā ne siga i Ielusalema