Ne a Mea e Manako ki ei a Ieova ke Fai ne Tatou?
“A te mea e manako a ia [Ieova] ke fai ne tatou tenei: ke fai ne tatou te mea tonu, ke fakaasi atu te alofa tumau, kae ola mo te loto maulalo i mua o te tou Atua.”—MIKA 6:8.
A VERA se Kelisiano fakamaoni telā ko 75 ana tausaga kae fakamasakisaki. Ne fai mai tou fafine, penei: “I nisi taimi e kilo atu ei au ki tua i te famalama kae lavea ne au a oku taina mo tuagane Kelisiano e talai mai fale ki fale. E fai sāle i ei ke tagi au ona ko toku fia ‵kau fakatasi atu ki a latou, kae ona ko toku masaki ko sē mafai o uke atu aku mea e fai i te taviniga ki a Ieova.”
2 E mata, ko oti ne maua ne koe se lagonaga penā? E tonu, e ma‵nako a tino katoa kolā e a‵lofa ki a Ieova ke tauave a tena igoa kae ke fai foki a mea kolā e manako a ia ki ei. Kae pefea la māfai ko fakamasaki‵saki tatou, ko tō ma‵tua io me ‵tau o ‵saga atu ki nisi tiute o te kāiga? Kāti ka loto vāi‵vāi tatou i nisi taimi me ko sē mafai ne tatou o fai a mea kolā e ma‵nako ‵tou loto ki ei i te taviniga ki te Atua ona ko tulaga konā. Kafai tenā loa te tulaga ko oko tatou ki ei, e fai a te Mika mataupu e 6 mo te 7 e pelā me se fakamalosiga gali ‵ki māfai e mafau‵fau faka‵lei ki ei. E fakaasi mai i mataupu konā me e aogā kae e mafai o fai a fakatonuga a Ieova.
Faifaiga a Ieova ki Ana Tino
3 Ke onoono muamua ki te Mika 6:3-5 ke iloa ei ne tatou a faifaiga a Ieova ki ana tino. Ke masaua la me ne ‵teke atu a te kau Isalaelu ki a Ieova i aso o Mika. E tiga eiloa te feitu tenā, ne faipati atu a Ieova mo te alofa ki a latou, penei, “Oku tino.” Ne fakamolemole atu a ia, penei: “Oku tino, e masaua ne koutou.” I lō te ‵losi atu mo te kaitaua ki a latou, ne taumafai ke oko ‵tonu atu a ia ki olotou loto mai te fesili atu, penei, “Se a te mea ne fai ne au ki a koutou?” Ne fakamalosi atu foki a ia ki a latou ke fai atu se “tali” ki a ia.
4 Ma‵faga o fakaakoakoga gali ne tuku mai ne Ieova ki a tatou! Ne taku ne ia mo te alofa a tino ‵teke o Isalaelu mo Iuta i aso o Mika me ko “oku tino” kae fakamolemole atu foki ki a latou. Tela la, e ‵tau foki mo tatou o fakaasi atu te alofa mo te atafai ki tino i te fakapotopotoga. E tonu, kāti se mea faigata ke fakamasani atu ki nisi tino, io me kāti e vāi‵vāi latou i te feitu faka-te-agaga. Kae kafai e a‵lofa latou ki a Ieova, e ma‵nako tatou o fesoasoani atu ki a latou kae fakaasi atu foki te alofa.
5 Ke ‵suke nei tatou ki te Mika 6:6, 7. Ne ‵sili ifo ne Mika a fesili, konei: “Se a te mea ka aumai ne au ki te Aliki, te Atua o te lagi, i te taimi e tapuaki ei au ki a ia? E a, e aumai ne au a tamā pulumakau tafasili i te ‵gali o ‵sunu mo fai a taulaga ki a ia? Mata e fiafia te Aliki manafai e avatu ne au ki a ia ne afe mo afe o mamoe, mo sinu olive e uke? E a, e ‵tau o ofo atu ne au taku toekimua, ke ‵togi ki ei aku agasala?” Ikai, e se mafai o fakafiafia ne tatou a Ieova ki “ne afe mo afe o mamoe, mo sinu olive e uke.” Kae e isi se mea telā ka fakafiafia atu ki a ia. Se a te mea tenā?
E ‵Tau o Fai ne Tatou te Mea Tonu
6 I te Mika 6:8, e fakaasi mai i ei ki a tatou a te mea telā e manako Ieova ke fai ne tatou. Ne fai atu a Mika, penei: “A te mea e manako a ia ke fai ne tatou tenei: ke fai ne tatou te mea tonu, ke fakaasi atu te alofa tumau, kae ola mo te loto maulalo i mua o te ‵tou Atua.” E aofia i mea e tolu konei a ‵tou lagonaga, te auala e mafau‵fau ei tatou mo ‵tou faifaiga. E ‵tau o fia fakaasi atu ne tatou a uiga konei, ke mafau‵fau ki te auala ke fakaasi atu i ei kae ke gasue‵sue o fakagalue aka a uiga konā. Ke onoono nei tatou ki mea takitasi e tolu konei.
7 E fakauiga a te “fai ne tatou te mea tonu” ki te faiga o fakamasinoga ‵tonu. E fakaasi mai eiloa i faifaiga a te Atua a te faiga o fakamasinoga ‵tonu. Ne seki fai ne tino i aso o Mika a te mea tonu. I auala fea? Ke mafau‵fau ki te Mika 6:10, 11. I fuaiupu e lua konā, e fakaasi mai ei me ne fakaaogā ne tino fai pisinisi a “fua ‵se” ke fua aka ei a te ‵loa mo te ‵mafa o mea. Kae i te fuaiupu e 12, e fakaasi mai ei me i a latou ne “tino ‵loi.” Tela la, ne lauiloa valevale eiloa te fakaaogāga o fua ‵se mo te pati loi i aso o Mika.
8 Ne seki gata atu fua i faifaiga fakapisinisi a faifaiga sē ‵tonu. Ne lauiloa foki te mea tenā i te faiga o fono fakamasino. E fai mai te Mika 7:3 me i “tino ma‵luga mo famasino e talia ne latou a ‵togi fa‵kolekole.” E tuku atu a ‵togi fakakolekole ki famasino ko te mea ke fai ne latou a fakasalaga ‵loi ki tino ‵lei. Kae e ‵kau atu foki a “tino gutu poto” io me ko tino ma‵losi o te fenua ki te faiga o mea ‵se. Tela la, ne fai mai a Mika me e “‵kau fakatasi” a te tino maluga, te famasino mo te tino gutu poto i te faiga o olotou faifaiga ma‵sei.
9 Ne pokotia a tino katoa i Iuta mo Isalaelu i faifaiga sē ‵tonu ne fai ne olotou takitaki ma‵sei. E fai mai te Mika 7:5 me ne iku atu a faifaiga sē ‵tonu ki te sē fakamaoni i te va o taugasoa ‵pili ke oko foki eiloa ki taki tauavaga. E fakaasi mai i te fuaiupu e 6 me ko oti ne iku atu a te mea tenei ki se tulaga telā ko takalia‵lia eiloa a tama‵liki tā‵gata ki olotou tamana mo tama‵liki fā‵fine ki olotou mātua.
10 Kae pefea la i aso nei? E mata, e lavea ne tatou a faifaiga tai ‵pau penā? E pelā mo Mika, e sio fakatamilo nei tatou ne faifaiga sē ‵tonu, te sē fakatalitonugina, mo te gasolo ifo ki lalo o te olaga masani o tino pelā foki mo te olaga faka-te-kāiga. Kae, e pelā me ne tavini a te Atua i loto i te lalolagi sē amiotonu tenei, e se talia ne tatou te agaga o te lalolagi fai mea sē ‵tonu tenei ke ulu lemū mai ki loto i te fakapotopotoga Kelisiano. I lō te fai penā, e kausaki malosi tatou o puke ‵mautakitaki ki faifaiga fakamaoni, kae ke fakaasi atu foki ne tatou i ‵tou faifaiga i aso takitasi o te olaga. E tonu, e fai faeloa ne tatou “te mea tonu i taimi katoa.” (Epelu 13:18) E a, e lotomalie koe me kafai e fai te mea tonu ka maua ne tatou a fakamanuiaga e uke ona ko te kau taina i te lalolagi kātoa kolā e fakaasi atu ne latou te loto talitonu tonu?
E Lagona Pefea ne Tino a te ‘Kalaga a Ieova’?
11 E fai mai te valoaga a Mika me faitalia eiloa a faifaiga sē ‵tonu konā, kae e maua ne tino katoa a te fakamasinoga tonu. Ne ‵valo mai te pelofeta me ka fakamaopoopo mai a tino “mai vasa ‵mao mo mauga ‵mao” ke tapuaki atu ki a Ieova. (Mika 7:12) I aso nei, i te toe fakataunuga o te valoaga tenā, ka sē maua fua ne se fenua e tasi a te fakamasinoga tonu a te Atua kae ka maua ne tino taki tokotasi mai fenua katoa. (Isaia 42:1) E lavea pefea ne tatou te ‵tonu o te mea tenei?
12 Ke maua se tali, ke mafaufau ki pati a Mika kolā ne fai atu muamua. E fai mai te Mika 6:9, penei: “A te mea sili i te ‵lei ko te mataku ki te Aliki. E kalaga a ia ki te fa‵kai.” E lagona pefea ne tino mai fenua katoa a te ‘kalaga a Ieova,’ kae e fetaui pefea te mea tenei mo te fai ne tatou a te mea tonu? E tonu, e se mafai o lagona tonu ne tino i aso nei a te leo o Ieova. Kae e auala i ‵tou galuega talai telā e fai i te lalolagi kātoa ko lagona ei ne tino i koga valevale a te kalaga a Ieova. Ko tino kolā e faka‵logo ki ei ka ‘ma‵taku ki te igoa o te Atua,’ kae ka fakaasi atu foki ne latou te āva ki ei. E fai eiloa ne tatou a faifaiga ‵tonu kae a‵lofa māfai e tavini atu tatou mo te loto finafinau e pelā me ne tino talai o te Malo. E fai ne tatou a te “mea tonu” māfai e fakailoa atu ne tatou a te igoa o te Atua ki tino katoa e aunoa mo te fakailoga tino.
E ‵Tau o Maua ne Tatou a te Alofa Tumau
13 Ka sau‵tala nei tatou ki te lua o mea e ‵tau o fai, telā e fakaasi mai i te Mika 6:8. E manako Ieova ke ‘fakaasi ne tatou te alofa tumau.’ A te pati Epelu telā ne ‵fuli ki te “alofa tumau” e fakauiga foki ki te “alofa atafai” mo te “alofa fakamaoni.” A te alofa tumau ko te saga tonu atu ki nisi tino, ko te fakaasiatuga o te alofa ki a latou. E ‵kese a te alofa tumau mai te uiga ko te alofa. E pefea la? E lauefa atu a te uiga o te alofa me e mafai o aofia i ei a mea mo mafaufauga. E pelā mo te Tusi Tapu e fakaasi mai i ei e uiga ki tino kolā e “a‵lofa . . . ki te lalolagi.” (1 Ioane 2:15) I te suā feitu, e aofia fua a tino i te fakaasiatuga o te alofa tumau kae maise ko tino kolā e tavini atu ki te Atua. E pelā mo te Mika 7:20 e fai mai i ei e uiga ki te “alofa tumau” telā ne fakaasi atu ki a Apelaamo—se tagata telā ne tavini atu ki a Ieova te Atua.
14 E ‵tusa mo te Mika 7:18, e fai mai te pelofeta me i te Atua e ‘fiafia o fakaasi mai te alofa tumau.’ I te Mika 6:8, e fai mai i ei ki a tatou ke sē fakaasi atu fua te alofa tumau kae ke fia‵fia malosi foki ki te uiga tenā. Ne a mea ko iloa ne tatou mai tusi siki konei? E fakaasi atu ne tatou a te alofa tumau mo te loto kātoa me e ma‵nako tatou ke fai penā. E pelā mo Ieova e fia‵fia tatou māfai e fakaasi atu ne tatou a te alofa tumau ki tino kolā e ma‵nako ki ei.
15 I aso nei a te alofa tumau se fakailoga o tino o te Atua. Ke mafau‵fau ki se fakaakoakoga. I a Iuni 2001, ne lofia valevale a Texas U.S.A., i se matagi malosi telā ne poko kae fakama‵sei i ei a te fia afe o fale e aofia i ei a fale o Molimau a Ieova. Ko te mea ke fesoasoani atu ki olotou taina Kelisiano, kāti e nofo ki te 10,000 a Molimau ne fakaavanoa olotou taimi mo malosi ke fesoasoani atu mo te lotoma‵lie. Ne ga‵lue malosi a volenitia konei i ao, po mo fakaotiga foki o vaiaso ke toe faite aka ei a Kingdom Halls e 8 mo fale e silia atu i te 700 a olotou taina Kelisiano. Ne tuku atu ne tino kolā e se mafai ne latou o fai a galuega konā a meakai, tupe mo nisi mea aka. Kaia ne fesoasoani atu ei te fia afe o Molimau konei ki olotou taina? Ona ko te lotou “alofa tumau.” E pefea la te fakamafanafana loto ke iloa atu me ne fakaasi atu ne ‵tou taina i te lalolagi kātoa a vaegā faifaiga penā o te alofa tumau! E tonu, a te fakaasiatuga o te “alofa tumau” e se se mea faigata kae se mea fakafiafia!
Ke Ola mo te Agamalū i Mua o te Atua
16 A te tolu o mea e ‵tau o fai telā e fakaasi mai i te Mika 6:8 ko te “ola mo te loto maulalo [io me ko te “agamalū,” NW] i mua o te Atua.” E fakauiga te mea tenei me ‵tau o iloa ne tatou a ‵tou tapulā kae ke fakalago‵lago faeloa ki a Ieova. E pelā me se fakaakoakoga: Ke fakaataata i tou mafaufau se tamaliki fafine foliki e ‵piki ‵mau ki te lima o tena tamana i te taimi e sa‵sale atu ei laua kae agi se matagi malosi. E iloa ‵lei eiloa ne te tamaliki fafine me e vāivāi fua a ia, kae e talitonu katoatoa a ia ki te puipuiga a tena tamana. E ‵tau foki o iloa ne tatou a ‵tou vāivāiga kae ke tali‵tonu katoatoa ki te ‵tou Tamana i te lagi. E fakatumau pefea ne tatou a te loto talitonu tenā? A te auala e tasi ko te masaua faeloa ne tatou a te pogai tāua e ‵tau o fakapili‵pili atu ei tatou ki te Atua. Ne fakamasaua mai ne Mika ki a tatou a mea e tolu: A Ieova ko ‵tou Fakaolataga, ko ‵tou Takitaki mo te ‵tou ‵Puiga.
17 E ‵tusa mo te Mika 6:4, 5 ne fai mai te Atua, penei: “Ne aumai ne au koutou keatea mai Aikupito.” E tonu, a Ieova ko te Fakaolataga o te kau Isalaelu. Ne toe fai atu foki a Ieova, penei: “Ne uga ne au a Mose, Alona mo Miliama ke takitaki ne latou a koutou.” Ne takitaki ne Mose mo Alona a te fenua, kae ne takitaki ne Miliama a fafine Isalaelu i te sakaga ki te pese o te lotou manumalo. (Esoto 7:1, 2; 15:1, 19-21; Teutelonome 34:10) Ne takitaki ne Ieova ana tino e auala i ana tavini. I te fuaiupu e 5, ne fakamasaua atu a Ieova ki te fenua o Isalaelu me ne puipui ne ia latou mai i a Palako mo Palaamo kae ne puipui foki ne ia a Isalaelu i te vaega fakaoti o te lotou malaga mai Akasia i Moapi ki Kilikala i te Fenua o te Folafolaga.
18 I te taimi e ola ei tatou mō te Atua, e faka‵sao ne ia tatou mai te lalolagi a Satani, e takitaki ne ia tatou e auala i tena Muna mo tena fakapotopotoga, kae puipui ne ia tatou e pelā me se potukau māfai e ‵teke mai a tino ki a tatou. Tela la, e maua ne tatou a pogai e uke ke ‵piki ‵mau ki te lima o te ‵tou Tamana i te lagi i te taimi e sa‵sale atu ei tatou i te vaega fakaoti o te ‵tou malaga ki te koga telā e sili atu tena gali i lō te Fenua o te Folafola i aso mua—ko te lalolagi fou kae amiotonu a te Atua.
19 A te mauaga o te agamalū i te ola mō te Atua e fesoasoani mai ei ke maua ne tatou se kilokiloga tonu ki te tulaga ko ola nei tatou i ei. E ‵tau eiloa o fai penā me i te agamalū ko te fakaasiatuga me e iloa ne tatou a ‵tou tapulā. A te olaga matua io me ko te fakamasakisaki e mafai o taofi aka ei te uke o ‵tou mea e fai i te taviniga ki a Ieova. I lō te talia ne tatou ke fakavāivāi mai te mea tenei, se mea ‵lei ke masaua ne tatou me e talia ne te Atua a ‵tou taumafaiga mo taulaga e ‵tusa mo ‘mea kolā e maua ne tatou.’ (2 Kolinito 8:12) E tonu e manako foki a Ieova ke tavini atu tatou mo te loto kātoa, kae ke fai ne tatou a so se mea telā e mafai o fai. (Kolose 3:23) Kafai e fai ne tatou so se mea e mafai o fai i te tavini atu ki a ia mo te loto kātoa, e fakamanuia eiloa ne te Atua tatou.—Faataoto 10:22.
E Maua a Fakamanuiaga Mai te ‵Nofo Fakatalitali
20 Ka fakamalosi aka tatou ke fai pelā mo Mika māfai e maua ne tatou a fakamanuiaga a Ieova. Ne folafola mai a ia, penei: “Ka fakatalitali au mo te loto talitonu ki te Atua, telā ka fakasao ne ia au.” (Mika 7:7) E fetaui pefea a pati konei mo te ola mo te agamalū i mua o te Atua? Ka fesoasoani mai a te ‵nofo fakatalitali, io me ko te kufaki ke ‵kalo keatea tatou mai te loto vāivāi ona ko te fui oko mai a te aso o Ieova. (Faataoto 13:12) Se mea tonu, me e ma‵nako tatou ke na oti atu te lalolagi masei tenei. Kae, i vaiaso takitasi e lau i afe a tino ko kamata o ola fakatasi mo te Atua. A te iloaga o te mea tenā e tuku mai ei se pogai ke ‵nofo fakatalitali faeloa tatou. Ne fai mai se Molimau telā ko leva ‵ki, e uiga ki te mea tenei, penei: “Kafai e mafaufau au ki te 55 tausaga ne fai ei ne au te galuega talai, e talitonu katoatoa au me ne ‵lei eiloa toku olaga ona ko te nofo fakatalitali ki a Ieova. I te suā feitu, ne seki maua ne au a mea kolā ne mafai o fakalogo‵mae mai ki a au.” E mata, ne oko atu foki ki a koe a te mea tenā?
21 E mautinoa eiloa me ka maua ne tatou a mea aogā mai te ola fakatasi mo te Atua. Kafai e fai‵tau tatou ki te Mika 7:14, e fakatusa ne Mika a tino o te Atua ki mamoe kolā e puipui faka‵lei ne te lotou tausi mamoe. I te fakataunuga lasi o te valoaga tenei i aso nei, ka maua ne te toega o te Isalaelu faka-te-agaga e pelā foki mo ‘nisi mamoe’ a te puipuiga mai te olotou Tausi Mamoe, ko Ieova. Ka ola latou i te “vao, e isi eiloa ne laukele ola i olotou tafa,” ka ‵vae keatea ei latou i te feitu faka-te-agaga mai te lalolagi telā e ‵fonu i fakalavelave mo mea fakama‵taku.—Ioane 10:16; Teutelonome 33:28; Ielemia 49:31; Kalatia 6:16.
22 Ka maua ne tino o Ieova a te manuia e pelā eiloa mo te valoaga i te Mika 7:14. Ne fai mai a Mika e uiga ki mamoe a te Atua io me ko ana tino, penei: “Tuku atu latou ke olo o kai‵kai i mouku lausiusi o Pasana mo Kileata.” Ona ko te lausiusi o mouku kolā ne ‵kai ki ei a mamoe o Pasana mo Kileata ne maua ne latou i ei te fiafia. Tela la, e maua foki ne tino o te Atua i aso nei a te fiafia i te feitu faka-te-agaga—se fakamanuiaga e tasi mō tino kolā e ola mo te agamalū fakatasi mo te Atua.—Numela 32:1; Teutelonome 32:14.
23 I te Mika 7:18, 19, ne faka‵mafa mai ne te pelofeta a te loto fiafia o Ieova o fakamagalo a tino kolā e sala‵mō. E fai mai te fuaiupu e 18 me i a Ieova e ‘fakamagalo ne ia a agasala.’ Kae e fakaasi mai i te fuaiupu e 19 i te Tusi Paia, Samoa me ka ‘‵pei ne Ieova a ‵tou agasala katoa ki te moana ‵poko.’ Se a te akoakoga e mafai o maua ne tatou mai te mea tenei? E mafai o ‵sili ifo tatou me e mata, e fakaakoako atu tatou ki a Ieova i te feitu tenei. E mata, e fakamagalo ne tatou a agasala a tino kolā ne fai mai ki a tatou? Kafai e sala‵mo a vaegā tino penā kae kausaki foki ke fai ne latou a ‵fuliga, e fia fakaasi atu ne tatou a te loto fiafia o Ieova ke fakamagalo katoatoa atu latou.
24 Ne a mea aogā ne maua ne tatou mai te sautalaga ki te valoaga a Mika? Ne fakamasaua mai ki a tatou me e tuku atu ne Ieova a te fakamoemoega tonu ki tino kolā e fakapili‵pili atu ki a ia. (Mika 2:1-13) E maua ne tatou a fakamalosiga ke fai toe mea e mafai ke ‵lago atu ei ki te tapuakiga tonu ko te mea ke ola fakatasi tatou mo te Atua ki te se-gata-mai. (Mika 4:1-5) Kae ko oti foki ne fakamaoni aka ne tatou me faitalia so se fakanofonofoga, e mafai eiloa o fai ne tatou a mea kolā e manako Ieova ke fai ne tatou. E tonu, e fakamalosi mai a te valoaga a Mika ke tauave faeloa ne tatou a te igoa o Ieova.
Ka Tali Mai Pefea ne Koe?
• E ‵tusa mo te Mika 6:8, ne a mea e manako Ieova ke fai ne tatou?
• Ne a mea e manakogina ke “fai te mea tonu”?
• E fakaasi atu pefea ne tatou a te “alofa tumau”?
• Ne a mea e aofia i te ‘ola mo te agamalū i mua o te Atua’?
[Fesili mo te Sukesukega]
1, 2. Kaia e mafai ei o loto vāi‵vāi a nisi tavini a Ieova, kae se a te mea e ‵tau o fesoasoani mai?
3. Ne a faifaiga ne fai ne Ieova ki tino Isalaelu ‵teke?
4. E mafai pefea o aogā a te fakaakoakoga o te alofa o Ieova ki a tatou?
5. Se a te manatu fakavae e fakaasi mai i te Mika 6:6, 7?
6. Ne a mea e tolu e fakaasi mai i te Mika 6:8 e manako ki ei te Atua ke fai ne tatou?
7, 8. (a) Se a te uiga o te “fai ne tatou te mea tonu”? (e) Ne a faifaiga sē ‵tonu ne lauiloa i aso o Mika?
9. E aofia pefea a Iuta mo Isalaelu i faifaiga sē ‵tonu a tino ma‵sei?
10. I aso nei, ko aso kolā e ‵fonu i faifaiga sē fakamaoni, e ‵tau o amio pefea a Kelisiano?
11. Ka fakataunu pefea te valoaga i te Mika 7:12?
12. E lagona pefea ne tino a te ‘kalaga a Ieova’ i aso nei?
13. Se a te ‵kese o te alofa tumau mo te alofa?
14, 15. E fakaasi atu pefea a te alofa tumau, kae se a te fakamaoniga telā ne fakamatala mai?
16. Se a te tala fakatusa e faka‵mafa mai i ei te tāua ke maua te agamalū i mua o te Atua?
17. Ne faka‵sao, takitaki kae puipui pefea ne Ieova ana tino i aso mua?
18. E fai pefea a Ieova e pelā me ko te ‵tou Fakaolataga, Takitaki mo te ‵tou ‵Puiga i aso nei?
19. I te feitu fea e fetaui ‵lei ei te agamalū mo ‵tou vāivāiga?
20. Se a te mea e ‵tau o iloa ne tatou ke ‵nofo fakatalitali e pelā mo Mika?
21, 22. E fakataunu pefea te Mika 7:14 i ‵tou aso nei?
23. Ne a akoakoga e mafai o maua ne tatou mai te sautalaga ki te Mika 7:18, 19?
24. Ne a mea aogā ne maua ne koe mai te valoaga a Mika?
[Ata i te itulau e 21]
Ke fai te mea tonu mai te molimau atu ki so se tino
[Ata i te itulau e 21]
Ke fakaasi atu te alofa tumau mai te saga tonu atu ki mea kolā e ma‵nako malosi a nisi tino ki ei
[Ata i te itulau e 21]
Fai so se mea e mafai o fai ne koe mo te agamalū kae ke iloa ne koe tou tapulā