Ke Fakaopoopo ki te Otou Poto te Loto Pulea

“Ki te otou poto fakaopoopo ki ei te loto pulea.”​​—⁠2 PETELU 1:​5-8.

I TE taimi ne fai ei se taumafaiga lasi o ‵teke atu ki te fakaaogāga ‵se o vailakau tapu, ne fakamalosi atu ki talavou i te Iunaite Sitete, penei: “‵Teke atu ki ei.” Kae e sili atu i te ‵lei māfai e ‵teke atu a tino katoa ki te fakaaogāga ‵se o vailakau tapu, te inu malosi, amioga faivalevale, faifaiga sē fakamaoni i mea tau pisinisi, mo “manakoga o te foitino”! (Loma 13:14) Kae e seai eiloa se tino e mafai o fai mai me e faigofie fua ke ‵teke atu ki mea konei, i ne?

² Ona ko te faigata ki tino sē ‵lei katoatoa katoa ke fakaasi atu te loto pulea, e ‵tau mo tatou o fia tauloto malosi ki auala e mafai ei o manumalo tatou i so se vāivāiga e fepaki mo tatou. E fakaasi mai ne te Tusi Tapu a tala o nisi tino i aso mua kolā ne taumafai ke tavini atu ki te Atua kae ne faigata ki a latou o ‵teke atu ki nisi faifaiga matagā. Ke masaua a Tavita mo tena agasala ne fai, ko te mulilua mo Patisepa. Ne iku atu i ei ki te mate o te lā tamaliki telā ne fakafua mai i tena mulilua, mo te mate o te avaga o Patisepa. Ne ‵mate laua konei e aunoa mo ne mea ‵se ne fai ne laua. (2 Samuelu 11:​1-​27; 12:​15-​18) Io me ke mafaufau ki te apositolo ko Paulo, telā ne fai ‵tonu mai, penei: “Me se fai ne au te ‵lei e manako au ki ei o fai, kae fai eiloa ne au te masei telā e se manako au ki ei o fai.” (Loma 7:​19) E mata, e tai penā eiloa ou lagonaga i nisi taimi? Ne toe fai mai a Paulo, penei: “Ka ko toku tinā kanoloto tonu eiloa: e fiafia ki te tulafono a te Atua. Kae e matea foki ne au te suā tulafono e galue i toku foitino, ko te tulafono telā e taua mo te tulafono e tonu ki toku mafaufau. Ko fai ne ia au e pelā mo se pagota ki te tulafono o te agasala, telā e galue i toku foitino. Ko seai la se tino malaia penei mo au! Ko oi la ka fakaola ne ia a au mai i te foitino mate tenei?” (Loma 7:​22-​24) E ‵tau o fakamalosi mai a fakaakoakoga i te Tusi Tapu ke fakaiku aka ne tatou ke mo a ma loto vāivāi vave i te ‵tou taumafai ke momea aka ‵tou loto pulea.

Te Loto Pulea, se Mea e ‵Tau o Tauloto ki ei

³ E taku mai i te 2 Petelu 1:​5-7 a te loto pulea, telā e aofia i ei te mafai o ‵teke atu ki faifaiga matagā, fakatasi mo te fakatuanaki, te ‵lei, te poto, te kufaki, te amio atua, te alofa fakataina, mo te alofa. E seki fa‵nau mai tatou mo uiga konei. E ‵tau o ‵toki aka a uiga konei. E manakogina te loto malosi mo taumafaiga ke fakaasi atu a uiga konei i se auala lasi. Tela la, e se ‵tau o fakamoe‵moe tatou me e sili atu te faigofie ke fakaasi atu te loto pulea i lō nisi uiga, i ne?

⁴ E tonu, kāti e mafau‵fau a tino e tokouke me se mea faigofie fua ke fakaasi atu ne latou te loto pulea. E ola latou e ‵tusa mo olotou manakoga, kae e fai ne latou mo te iloa tonu io me ko te sē iloa a manakoga o te foitino sē ‵lei katoatoa kae e se mafau‵fau ‵mafa latou ki ikuga sē ‵lei o olotou amioga ma‵sei​​—⁠kolā e oko atu ki a latou io me ko nisi tino. (Iuta 10) Ko momea aka nei a te sē mafai mo te sē fia ‵teke atu o tino ki faifaiga matagā i lō aso mua. A te mea tenā se fakamaoniga me ko ‵nofo nei tatou i “aso fakaoti” telā ne faipati ki ei a Paulo i te taimi ne folafola mai ei, penei: “Ka isi ne taimi faiga‵ta i aso fakaoti. Ko tino ka ma‵natu fakapito, kaima‵nako, fakamata‵mata, fia ma‵luga, pati ma‵sei, . . . e mata kaitaua.”​​—⁠2 Timoteo 3:​1-3.

⁵ E iloa ‵lei ne Molimau a Ieova a te faigata ke fakaasi atu te loto pulea. E pelā mo Paulo, e iloa ‵lei ne latou te lasi o te ‵kese o te fia fakafiafia atu ki a Ieova mai te ola e ‵tusa mo ana tulaga mo te tau‵tali atu ki manakoga o olotou foitino sē ‵lei katoatoa. Ona ko te pogai tenei, ko leva ne fia ‵saga malosi atu latou ki auala e mafai ei o manumalo i te taua tenei. I te 1916, ne fakaasi mai i se kopi mua o te mekesini tenei, a “te mea ‵lei e ‵tau o fai ne tatou ko te mea ke pule faka‵lei ifo tatou ki a tatou eiloa, ‵tou mafaufau, ‵tou pati mo ‵tou amioga.” Ne fakamalosi mai i ei ke masaua faeloa te tusi siki ko te Filipi 4:⁠8. Koi aogā eiloa te fakamalosiga mai te Atua i te tusi siki tenā, faitalia me ne tusi ki lalo a pati konā i te 2,000 tausaga ko ‵teka kae kāti ko tai faigata atu ke tau‵tali ki ei nei i lō te taimi ne tusi ei i te 1916. Kae e tiga eiloa te feitu tenā, e taumafai malosi a Kelisiano ke ‵teke atu ki manakoga o te lalolagi, me e iloa ne latou me kafai e fai latou penā, e ‵lago atu ei latou ki te lotou Atua.

⁶ E taku mai i te Kalatia 5:​22, 23 a te loto pulea e pelā me se vaega o “fua o te agaga [tapu].” Kafai e fakaasi atu ne tatou te uiga tenei fakatasi mo “te alofa, te fiafia, te filemu, te kufaki, te mataalofa, te ‵lei, te fakamaoni, [mo] te loto malalo,” ka maua ne tatou a mea aogā e uke ‵ki. Kafai e fai tatou penā, ka fesoasoani malosi mai “ke fai mea mafai” tatou i ‵tou taviniga ki te Atua. (2 Petelu 1:⁠8) Kae e se ‵tau mo tatou o loto vāivāi io me e taku fakamasei ne tatou a tatou eiloa māfai e fakata‵mala tatou o fakaasi atu a uiga konei i te auala telā e ma‵nako tatou ki ei. Kāti ko oti ne lavea ne koe i te akoga me e vave atu a te tauloto a se tamaliki e tokotasi i lō te suā tama‵liki. Io me e vave atu te tauloto a se tino e tokotasi i te galuega ki se galuega fou i lō te suā tino. E penā foki eiloa te vave o fakaasi atu ne nisi tino a uiga faka-Kelisiano i lō nisi tino. A te ‵toe mea tāua ko te tumau i te fakamalosi aka o uiga fakaatua i te ‵toe auala ‵lei e mafai o fai ne tatou. E mafai o fai ne tatou te mea tenei mai te fakaaogā katoatoa o te fesoasoani telā e tuku mai ne Ieova e auala i tena Muna mo tena fakapotopotoga. E sili atu te tumau i te taumafai ke gasolo faeloa ki mua i lō te fakava‵vave ke fakataunu a ‵tou fakamoemoega.

⁷ E tiga eiloa e taku mai te loto pulea i te fakaotiga o te fakasologa o uiga o te agaga, e se fakauiga i ei me e tāua malosi atu a nisi uiga i lō te uiga tenā. E se penā loa. E ‵tau o masaua ne tatou me e mafai o ‵teke atu ki “manako faka te foitino” māfai e maua katoatoa ne tatou te loto pulea. Kae e tosina atu a tino sē ‵lei katoatoa ki nisi “manako faka te foitino . . . , sulaitetapu, amio masei, mo faiga ma‵sei; ifo ki tupua, fai vailakau, fai fili, fai taua, loto masei, loto ita, manatu fakapito, finau valea, mo te fia fakamavaevae, kaisano.” (Kalatia 5:​19, 20) Tela la, e ‵tau mo tatou o tumau i te ‵teke atu, mai te ‵kalo keatea mai manakoga sē ‵lei i te loto mo te mafaufau.

E Sili Atu te Faigata ki Nisi Tino

⁸ E sili atu te faigata ki nisi Kelisiano ke fakaasi atu te loto pulea i lō nisi tino. Kaia? Kāti ko te auala ne puti aka ei ne olotou mātua io me ko mea ne ‵tupu ki a latou i aso ko ‵teka. Kafai e faigofie ki a tatou ke fakamalosi kae fakaasi atu te uiga ko te loto pulea, e ‵tau eiloa o fiafia tatou ki ei. Kae e ‵tau eiloa o a‵lofa kae loto malamalama tatou i ‵tou faifaiga ki tino kolā e faigata ke fakaasi atu ne latou te uiga tenā, faitalia foki eiloa me e fakaitaita mai ki a tatou te lotou fakata‵mala o fakaasi atu te loto pulea. Ona ko te ‵tou tulaga sē ‵lei katoatoa, ko oi i a tatou e maua ne ia se pogai ke fakaasi atu a uiga fia amiotonu?​​—⁠Loma 3:​23; Efeso 4:⁠2.

⁹ E pelā me se fakaakoakoga, kāti e iloa ne tatou me e isi ne ‵tou taina Kelisiano kolā ko oti ne taofi aka ne latou te ‵pusi ki paka io me ko te fakaaogāga o vailakau tapu mō “fakafiafiaga” kae kolā koi u‵miti eiloa ki ei i nisi taimi. Io me e faigata ki nisi tino ke ‵kati te lotou ‵kai io me ko te inu malosi ki meainu ma‵losi. E faigata ki nisi tino ke fakaeteete i olotou pati e fai, tela la, e masani sāle o fakaitaita atu latou ki nisi tino. E manakogina eiloa a taumafaiga e uke i te fakamalosiakaga o te loto pulea ke fakafesagai atu ei ki vāivāiga penā. Kaia? E taku ‵tonu mai penei te Iakopo 3:2: “A tatou katoa e masani o fai mea ‵se. Kafai se tino e seki fai eiloa ne ia se mea ‵se i ana pati, a ia se tino e katoatoa i te ‵lei, ko mafai foki ne ia o pulea tona foitino kātoa.” Koi ma‵nako malosi eiloa a nisi tino ke ‵kau atu latou ki te pelētupe. Io me kāti koi faigata eiloa ke taofiofi te lotou kaitaūa. Kāti e manakogina eiloa se taimi leva ke manumalo ei i te fakafesagai atu ki vāivāiga konei io me ko vāivāiga tai ‵pau. E tiga eiloa e mafai nei o gasolo atu tatou ki mua i se auala fakaofoofogia, ka ‵galo katoatoa atu a manakoga ma‵sei māfai ko oko atu tatou ki te tulaga ‵lei katoatoa. I te taimi nei, a te taumafai ke fakaasi atu te loto pulea ka fesoasoani mai ke ‵kalo keatea tatou mai te tosina atu ki se olaga fai agasala. A koi taumafai eiloa tatou, ke na fakatau fesoasoani tatou ke mo a ma ‵tuka vave ‵tou loto.​​—⁠Galuega 14:​21, 22.

¹⁰ A te suā feitu telā e faigata ki nisi tino ke fakaasi atu te loto pulea ko faifaiga fakatauavaga. E aofia a faifaiga fakatauavaga i te auala ne faite ei tatou ne Ieova te Atua. Kae ko oko eiloa i te faigata ki nisi tino ke aofia i faifaiga fakatauavaga i se auala ‵lei, e ‵tusa mo tulaga o te Atua. E mafai o sili atu te faigata ki a latou māfai ko ma‵losi ‵ki olotou manakoga fakatauavaga. E ‵nofo tatou i se lalolagi telā e fakavale‵vale ki faifaiga fakatauavaga kae fakamalosi aka foki i ei a amioga ma‵sei. E fakafaigata ei ki Kelisiano kolā e fia ‵nofo taka​​—⁠mō se vaitaimi​​—⁠ko te mea ke tavini atu latou ki te Atua e aunoa mo ne tiute kolā e ‵tau o ‵saga atu ki ei i te fakaipoipoga. (1 Kolinito 7:​32, 33, 37, 38) Kae e ‵tusa mo te fakamalosiga i te Tusi Tapu “me sili atu eiloa a te avaga i lō i te ‵tō atu ki te masei,” kāti e fakaiku aka ne latou ke a‵vaga, se faifaiga telā e ‵malu. Kae e fakaiku aka foki ne latou ke avaga eiloa ki “se tagata Kelisiano,” e ‵tusa mo pati fakatonutonu i te Tusi Tapu. (1 Kolinito 7:​9, 39) E mautinoa eiloa i a tatou me e fiafia malosi a Ieova ki te lotou manakoga ke ‵lago atu ki ana akoakoga amio‵tonu. E fia‵fia eiloa a olotou taina Kelisiano o ‵kau fakatasi mo tino tapuaki ‵tonu penā kolā e ‵lago atu ki tulaga ma‵luga i mea tau amioga kae fakamaoni.

¹¹ Kae e a māfai e seai se tino e fetaui ‵lei ke avaga mo koe? Mafaufau la ki lagonaga o se tino telā e fia avaga kae e se mafai ne ia o fai penā! Kāti e lavea ne ia ana taugasoa ko a‵vaga kae fia‵fia, i te taimi koi ‵sala ei a ia ki se avaga telā e fetaui ‵lei. I vaegā tulaga penā, kāti e fai te sōna fakamalie aka ana manakoga fakatauavaga i a ia eiloa mo fai se fakalavelave tumau. I so se fakanofonofoga, e se manako lele eiloa se Kelisiano o fakaloto vāivāi se tino telā e taumafai ke ‵mā faeloa a ia. E mafai o fakavāivāi ne tatou se tino e aunoa mo te ‵tou iloaga māfai e fai atu ne tatou a vaegā pati penei, “E avaga koe māfea?” Kāti e mafai o fai atu a pati penā e aunoa mo ne lagonaga ma‵sei, kae e sili atu eiloa te ‵lei ke fakaasi atu te loto pulea i ‵tou pati e fai! (Salamo 39:⁠1) E ‵tau eiloa o fakamālō atu tatou ki a latou kolā e tumau i te ‵mā kae koi ‵nofo taka. I lō te fai atu o pati kolā e mafai o fakavāivāi atu, e mafai eiloa o taumafai tatou ke fakamalosi atu ki a latou. E tasi te auala e mafai o fai penā, ko te taumafai ke aofia a tino ‵nofo taka māfai ko ‵kami mai ne tatou se tamā potukau o tino ma‵tua ke ‵kai fakatasi tatou io me ko taimi e ‵kau fakatasi ei a Kelisiano ki se faigāmea.

Te Loto Pulea i te Kāiga Fakaipoipo

¹² E se fakaseai ne te fakaipoipoga a te fakaasiatuga o te loto pulea i mea kolā e aofia i ei a faifaiga fakatauavaga. E pelā mo manakoga fakatauavaga o te tagata mo tena avaga e mafai o ‵kese i se auala lasi. Kāti e faigata io me ko sē mafai eiloa o fai a faifaiga fakatauavaga ona ko te sē malosi ‵lei o se tino e tokotasi. Kāti ona ko fakalavelave i aso mua, e mafai o faigata ki se tino e tokotasi ke fakalogo ki te fakatonuga tenei: “A te tagata avaga e ‵tau mo ia o fakafiafia ki tena avaga, e pelā foki mo te fafine ki tena avaga, ka ke fakatau fesoasoani foki o fakama‵lie laua takitokotasi i o lā manako.” I vaegā tulaga penā, e ‵tau mo te suā tino o fakaasi atu te loto pulea telā e sili atu. Kae e mafai o masaua ne laua tokolua te fakamalosiga alofa a Paulo ki Kelisiano a‵vaga: “Sa ‵teke te manako o te suā tino ne te suā tino, seiloga eiloa ko ma‵lie koulua ke se fai mō se vaitaimi, ko te mea ke fakaaogā olua taimi konā mō ‵talo; ka oti ake la, ko fai ei alua faiga fakatauavaga, ko te mea ke se fai te olua sē mafai o kufaki mo mea e tuku atu ei koulua ki te fakaosoosoga a Satani.”​​—⁠1 Kolinito 7:​3, 5.

¹³ E se faka‵tau eiloa i te fakafiafia māfai e taumafai a taki tauavaga o fakaasi atu te loto pulea i te ‵toe fesokotakiga pili tenei. Kae e ‵tau foki o fakaasi atu ne latou te loto malamalama ki olotou taina tapuaki kolā koi taumafai ke fakaasi atu te uiga tenei i te auala tenā. E se ‵tau eiloa o puli i a tatou ke ‵talo atu ki a Ieova ke tuku atu ki ‵tou taina te poto, te loto malosi, mo te loto toa ke tumau i te taumafai ke fakaasi atu te loto pulea kae ke fai a mea e ‵tau o fai ke manumalo ei i lagonaga se ‵tau.​​—⁠Filipi 4:​6, 7.

Ke Tumau i te Fakatau Fesoasoani

¹⁴ I nisi taimi, kāti e faigata ki a tatou ke malamalama i ‵tou taina Kelisiano kolā e taumafai ke fakaasi atu te loto pulea i se feitu telā e faigofie ki a tatou. Kae e kese‵kese a tino mo olotou uiga. E otia vave a lagonaga o nisi tino, kae e se penā nisi tino. E sili atu te faigofie ki nisi tino ke pule faka‵lei atu ki a latou, telā e fai ei te loto pulea e pelā me se mea faigofie. Kae e sili atu i te faigata ki nisi tino ke fai penā. Kae masaua la, me i te tino telā e taumafai malosi, e se se tino masei. E ma‵nako a ‵tou taina Kelisiano ke fakaasi atu ne tatou te loto malamalama mo te alofa. Ka momea aka te ‵tou fia‵fia māfai e fakaasi atu ne tatou te alofa ki tino kolā koi kausaki ke fakaasi atu ne latou te loto pulea. E mafai o lavea atu ne tatou te mea tenā i pati a Iesu kolā ne tusi ki lalo i te Mataio 5:⁠7.

¹⁵ Ke mo a eiloa ma fakamasino ‵se ne tatou se taina Kelisiano telā e mafai o fakatamala i nisi taimi ke fakaasi atu te uiga faka-Kelisiano tenei. Ko oko eiloa i te fakamalosi loto ke iloa atu me i tafa o te kilo atu ki te taimi e tasi ne fakata‵mala ei tatou, e kilo atu eiloa a Ieova ki taimi e uke ne manumalo ei tatou i te fakaasiatuga o te loto pulea, faitalia foki eiloa me e se lavea ne ‵tou taina Kelisiano a taimi katoa konā. Se mea fakamafanafana loto ke masaua faeloa a pati i te Salamo 130:3: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?”

¹⁶ Ke fakafiafia atu ki a Ieova, e ‵tau eiloa mo tatou taki tokotasi o ati aka te loto pulea, kae e mafai eiloa o tali‵tonu tatou me ka fesoasoani mai ‵tou taina Kelisiano. E tiga eiloa e ‵tau o fai ne tatou taki tokotasi a ‵tou tiute, se mea mautinoa eiloa me e fakamalosi mai foki ke fakatau fesoasoani tatou o fakafesagai atu ki ‵tou vāivāiga. (Kalatia 6:​2, 5) E mafai o fakatāua ne tatou se mātua, se takaga, io me se taugasoa telā e puipui ne ia tatou mai te olo atu ki koga kolā e se ‵tau o olo atu ki ei, te ‵kilo atu ki mea e se ‵tau o ‵kilo atu ki ei, io me ko te faiga o mea kolā e se ‵tau o fai. E fesoasoani mai eiloa te tino tenā ke fakaasi atu ne tatou te loto pulea, mo te loto malosi ke ‵teke atu ki amioga ma‵sei!

¹⁷ Kāti e tokouke a Kelisiano ko oti ne oko atu ki se tulaga ‵lei e uiga ki te loto pulea, kae e mafau‵fau latou me koi isi eiloa ne feitu e ‵tau o ga‵lue malosi ki ei. Ka ma‵nako latou ke tai momea aka eiloa te ‵lei o te fakaasiatuga o te loto pulea, ke oko atu ki te tulaga telā e mafau‵fau latou me e ‵tau o fai ne tino sē ‵lei katoatoa. E mata, e penā foki ou lagonaga? Se a la te mea e mafai o fai ne koe ke fakamalosi aka ei te vaega tenei o te fuataga o te agaga o te Atua? Kae e mafai pefea o fesoasoani atu te faiga penā ke oko atu koe ki ou fakamoemoega tumau e pelā me se Kelisiano? Ke na onoono aka tatou ki te suā mataupu.

E Masaua ne Koe?

Te Loto Pulea-Kaia e . . .

• tāua ei ke ‵toki ne Kelisiano?

• faigata malosi ei ki nisi tino?

• tāua ei i loto i te fakaipoipoga?

• fai ei pelā me se uiga telā e mafai ei o fakatau fesoasoani tatou ke ati aka?

[Fesili mo te Sukesukega]

1. Se a te mea e se mafai o fai telā e māfua mai i ei a fakalavelave e uke o tino?

2. (a) Ne a fakaakoakoga i te Tusi Tapu kolā e fakaasi mai i ei me i te faigata o ‵teke atu ki se faifaiga matagā e se se mea fou? (e) Se a te mea e ‵tau o fakamalosi mai ne fakaakoakoga konei ke fai ne tatou?

3. Fakamatala mai te pogai e se mafai ei o fakamoe‵moe tatou me e sili atu te faigofie ke fakaasi atu te loto pulea.

4. Kaia e mafau‵fau ei a tino e tokouke me se mea faigofie fua ki a latou ke fakaasi atu te loto pulea, kae se a te mea e fakaasi mai i ei?

5. Kaia e fia ‵saga malosi atu ei a Molimau a Ieova ki te mataupu ko te loto pulea, kae se a te fakamalosiga telā koi aogā eiloa?

6. Kaia e se ‵tau ei o ‵tuka vave ‵tou loto i te taimi e fakamalosi aka ei tatou o fakagalue te uiga ko te loto pulea?

7. Se a te mea e fakaasi mai i ei me e tāua te loto pulea?

8. Ne a nisi pogai e faigata ei ki nisi tino ke fakaasi atu te loto pulea?

9. Ne a nisi vāivāiga o nisi tino, kae ka manumalo katoatoa māfea tatou i vāivāiga konei?

10. (a) Kaia e faigata malosi ei ki nisi tino ke fakaasi atu te loto pulea i faifaiga fakatauavaga? (e) Se a te ‵fuliga lasi ne fai ne se taina e tokotasi? (Ke onoono ki te pokisi i te itulau e 26.)

11. E mafai pefea o fesoasoani atu tatou ki se taina io me se tuagane telā e fia avaga kae e seki maua se avanoaga ke fai penā?

12. Kaia e manakogina ei te loto pulea, ke oko foki eiloa ki tino a‵vaga?

13. Ne a mea e mafai o fai ne tatou ke fesoasoani atu ki tino kolā koi taumafai ke fakaasi atu te loto pulea?

14. Kaia e ‵tau ei o fakaasi atu ne tatou te alofa mo te loto malamalama ki ‵tou taina Kelisiano?

15. Kaia e fakamafanafana mai ei a pati i te Salamo 130:3 e uiga ki te mataupu ko te loto pulea?

16, 17. (a) E mafai pefea o fakaaogā ne tatou te Kalatia 6:​2, 5 e uiga ki te loto pulea? (e) Se a te mea ka mafau‵fau tatou ki ei i te suā mataupu e uiga ki te loto pulea?

[Pokisi/Ata i te Itulau e 26]

Ne Fakaakoako o ‵Teke Atu ki ei

E tokotasi te Molimau i Siamani ne galue e pelā me se failautusi i mea tau komupiuta. Ne aofia i tena galuega ko te onoono atu ki polokalame kese‵kese e 30 i te TV mo te letiō. Kafai e tupu se fakalavelave, e ‵tau o saga tonu atu a ia ki te polokalame ko te mea ke iloa aka ne ia te fakalavelave. E fai mai a ia: “Toeitiiti ko taimi katoa e ‵sae mai faeloa i ei a ata i mea fakasauā io me ko faifaiga fakatauavaga kae tupu i ei se fakalavelave. E foliga mai me e ‵mau eiloa a ata ma‵sei konā i toku mafaufau i te fia o aso io me ko te fia o vaiaso i nisi taimi, e pelā me se mea ko oti ne ‵lomi aka i toku mafaufau.” Ne taku ‵tonu mai ne tou tagata me ne fakavāivāi atu te mea tenei ki a ia i te feitu faka-te-agaga: “Ne mata itaita faeloa au, kae ne faigata ‵ki eiloa ke fakaasi atu ne au te loto pulea ona ko ata fakasauā kolā e lavea sāle ne au. Ne fakamāfua aka ne ata i faifaiga fakatauavaga a kinauga i te va o maua mo taku avaga. Ne taumafai au o ‵teke atu ki mea konei i aso katoa. Ko te mea ke se takavale au i te taua tenei, ne fakaiku aka ne au ke ‵sala atu ki se isi galuega fou, faitalia foki eiloa me ka foliki i ei toku ‵togi. Ne seki leva kae ne maua ne au se galuega fou. Ne fakataunu i ei oku fakamoemoega.”

[Ata i te itulau e 25]

E fesoasoani mai a te iloaga i te Tusi Tapu ke fakaasi atu ne tatou te loto pulea