E Tuku Mai ne Ieova a Mea e ‵Tau o Maua i te Aso

“Tela la, sa manava‵se . . . e iloa ne te otou Tamana, me ma‵nako foki koutou ki mea konei.”​—LUKA 12:​29, 30.

1. E tausi pefea ne Ieova a manu katoa?

KAI lavea aka loa ne koe se moa io me se manu eva e kaikai i mea kolā e foliga mai me ne lailai fua? Kāti ka mafaufau koe me ne a la ana meakai e maua i te koga tenā. I tena Lauga i te Mauga, ne fakaasi mai ne Iesu a te akoakoga e maua ne tatou mai te auala e fagai ei ne Ieova a manu eva. Ana muna: “Ke ‵kilo koutou ki manu eva; a latou e se ‵toki saito, io me kati saito, io me fakaputu i fale saito; kae fagaigina eiloa latou ne te otou Tamana telā i te lagi. E se sili la a te otou tāua i a latou?” (Mataio 6:26) E tuku mai ne Ieova i auala fakaofoofogia a meakai mō ana mea ola katoa.​—Salamo 104:​14, 21; 147:9.

2, 3. Ne a akoakoga faka-te-agaga e maua ne tatou mai te akoakoga a Iesu ke ‵talo mō ‵tou meakai i aso takitasi?

² Kaia la ne aofia ei ne Iesu i tena ‵talo fakaakoako a te fakamolemole: “Tuku mai omotou meakai e ‵tau mo te aso nei”? (Mataio 6:11) E maua ne tatou a akoakoga ‵loto mai te tamā fakamolemole tenei. Muamua la, e fakamasaua mai ki a tatou me ko Ieova eiloa e māfua mai i ei a meakai katoa kolā e manakogina ne tatou. (Salamo 145:​15, 16) E ‵toki ne tino a lakau kae ko te Atua fua e mafai o fakaola ne ia a mea i te feitu faka-te-agaga mo te feitu faka-te-foitino. (1 Kolinito 3:7) A mea kolā e inu kae kai ne tatou ne meaalofa katoa mai te Atua. (Galuega 14:17) A te fakamolemole atu ke tuku mai faeloa a mea kolā e ‵tau o maua ne tatou e fakaasi atu ei ki a ia me e se manatu ma‵ma tatou ki ana fakatokaga konā. Kae, e se fakauiga i ei me ka sē ga‵lue eiloa tatou māfai e lava te malosi.​—Efeso 4:28; 2 Tesalonia 3:10.

³ A te lua o fakamolemole ke tuku mai a “meakai e ‵tau mō te aso nei” e fakaasi mai ei me e se ‵tau o sōna manava‵se tatou ki te lumanai. Ne toe fai mai a Iesu: “Sa manava‵se koutou o fai ake pelā: ‘Ne a mea ka ‵kai ei tatou? Ne a foki mea ka inu ei tatou? Ne a foki mea ka ‵pei tatou?’ Me i mea katoa konā, e salasala ne tino o fenua fakaatea. Ko iloa ne te otou Tamana i te lagi me aogā katoa a mea konā ki a koutou. Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou. Ia, ke se manava‵se la koutou ki te aso a taeao me manavase eiloa te aso a taeao ki ana mea. Ke faitalia eiloa te aso ke nofo mo ona fakalavelave.” (Mataio 6:​31-34) A te ‵talo ke “tuku mai omotou meakai mō te aso nei” se fakaakoakoga o te ola i se olaga faigofie kae tavini atu ki te Atua mo te ‘loto malie ki mea ko mafai o maua.’​—1 Timoteo 6:​6-8.

Meakai Faka-te-Agaga i Aso Takitasi

4. Ne a mea ne ‵tupu i te olaga o Iesu mo te kau Isalaelu e fakaasi mai ei te tāua ke maua a meakai faka-te-agaga?

⁴ E ‵tau foki o fakamasaua mai a ‵tou ‵talo mō meakai i aso takitasi a te manakoga ke maua a meakai faka-te-agaga i aso katoa. E ui eiloa ne fiakai malosi i te taimi leva ne fakalikiliki ei a ia, ne ‵teke atu a Iesu ki te fakaosoosoga a Satani ke ‵fuli a fatu ke liu falaoa, i ana pati: “Muna a te Tusi, ‘E se na ko meakai fua e ola ei te tino, ka ko muna katoa kolā e ‵to mai i te gutu o te Atua.’” (Mataio 4:4) Ne siki mai ne Iesu i konei a pati a te pelofeta ko Mose telā ne fai atu ki te kau Isalaelu: “Ne fai ne [Ieova] koutou ke fia‵kai, kae oti aka, aumai foki ei ne ia te manai ke kai koutou i ei, te meakai tenā e seki kai eiloa koutou io me ko otou tupuga ki ei. Ne fai ne ia te mea tenā ke akoako ei koutou, ke iloa ne koutou me i te tagata e se ‵tau o fakalagolago fua ki meakai ke ola a ia, kae ke fakalagolago foki ki muna katoa e fai mai ne te Aliki.” (Teutelonome 8:3) A te auala ne tuku atu ei ne Ieova a te manai ki tino Isalaelu e se mo ‵kai fua latou kae ke tuku atu foki a akoakoga faka-te-agaga. E tasi mai i ei ko te fakatonuga ke “‵tae a meakai e lava ei latou i te aso tenā.” Kafai ko tō uke olotou mea ne ‵tae mō te aso, ka manogi masei a toegā meakai kae ka fa‵nau a ilo i ei. (Esoto 16:​4, 20) Kae ne seki tupu te mea tenei i te ono o aso māfai ko ‵tae ne latou a meakai mō aso e lua e aofia ei te Sapati. (Esoto 16:​5, 23, 24) Tela la, e fakamasaua atu ne te manai me e ‵tau o faka‵logo latou kae e se fakalagolago fua olotou ola ki meakai kae mai “muna katoa e fai mai ne te Aliki.”

5. E tuku mai pefea ne Ieova a meakai faka-te-agaga i aso takitasi?

⁵ E ‵tau foki o ‵kai faeloa tatou i aso katoa ki meakai faka-te-agaga kolā ne fakatoka ne Ieova e auala i tena Tama. Ona ko te mea tenei ko oti ne filifili ne Iesu te “tavini fakamaoni kae poto” ke tuku mai ne ia a “meakai i te taimi tonu” mō tino fakatuanaki katoa. (Mataio 24:45) E se tuku mai fua ne te tavini fakamaoni tenā a meakai faka-te-agaga e uke e auala i tusi faka-te-Tusi Tapu kae e fakamalosi mai foki ke fai‵tau faeloa ki te Tusi Tapu i aso katoa. (Iosua 1:8; Salamo 1:​1-3) E pelā mo Iesu, e mafai foki o maua ne tatou te malosi faka-te-agaga i aso katoa mai te taumafai malosi ke iloa kae ke fai foki ne tatou a te loto o Ieova.​—Ioane 4:34.

Te Fakamagaloga o Agasala

6. Ne a mea e fakamolemole atu tatou ke fakamagalo mai, kae se a te tulaga e mafai ei o fakamagalo ne Ieova a mea konā?

⁶ A te suā fakamolemole i te talo fakaakoako ko te: “Fakamagalo mai omotou agasala e pelā mo matou e fakamagalo atu ki tino kolā e agasala mai ki a matou.” (Mataio 6:12) E faipati a Iesu i konei ki te fakamagaloga o agasala. I te fakamatalaga a Luka e uiga ki te talo fakaakoako, e fai mai penei te fakamolemole tenā: “Fakamagalo mai ki omotou agasala, e pelā foki mo matou e fakamagalo atu ki tino kolā e ‵se mai ki a matou.” (Luka 11:4) E agasala katoa tatou. Kae e toka faeloa a te ‵tou Atua alofa o fakaseai a ‵tou agasala māfai e salamō tonu, “‵fuli atu,” kae fakamolemole mō se fakamagaloga e auala i te fakatuanaki ki te taulaga togiola a Keliso.​—Galuega 3:19; 10:43; 1 Timoteo 2:​5, 6.

7. Kaia e ‵tau ei o ‵talo mō se fakamagaloga i aso katoa?

⁷ Kae i te suā feitu, e agasala tatou māfai ko se fetaui ‵tou faifaiga mo tulaga amio‵tonu o Ieova. E auala i te agasala telā ne togi mai, e ‵se faeloa tatou i ‵tou pati, faiga, mo mafaufauga io me fakata‵mala tatou o fai a mea e ‵tau o fai. (Failauga 7:20; Loma 3:23; Iakopo 3:2; 4:17) Tela la, faitalia me iloa ne tatou a ‵tou agasala e fai i te aso me ikai, e ‵tau o aofia i ‵tou ‵talo e fai sāle i aso katoa a te fakamolemole ke fakamagalo ‵tou agasala.​—Salamo 19:12; 40:12.

8. Se a te mea e fakamalosi mai ke fai ne tatou mai te ‵talo atu ke fakamagalo a agasala, kae ne a mea aogā e maua mai i ei?

⁸ A te ‵talo mō se fakamagaloga e ‵tau o fai mai tua o se iloiloga amiotonu ki a koe eiloa, te salamō tonu, mo te fakaasi ‵tonu atu o mea ‵se kae ke fakavae ki te fakatuanaki ki te toto maligi o Iesu. (1 Ioane 1:​7-9) Ke fakamaoni aka te ‵tonu o ‵tou ‵talo, e ‵tau o ‵lago atu ki ei mai te faiga o mea kolā e “fakaasi mai me ko oti ne salamo” tatou. (Galuega 26:20) Ko mafai ei o tali‵tonu tatou me ka fakamagalo eiloa ne Ieova a ‵tou agasala. (Salamo 86:5; 103:​8-​14) Ka iku atu i ei ki te mauaga o te filemu o te mafaufau, “ko te filemu o te Atua, telā e sili atu i mea e iloa ne tatou,” telā ka “tausi faka‵lei ne ia otou loto mo otou mafaufau i a Keliso Iesu.” (Filipi 4:7) Kae e akoako mai ne te ‵talo a Keliso a mea e uke atu kolā e ‵tau o fai ke maua ei ne tatou te fakamagaloga o agasala.

Ke Fakamagalo Mai, e ‵Tau o Fakamagalo Atu

9, 10. (a) Ne a pati ne toe fai atu ne Iesu ki te ‵talo fakaakoako, kae se a te mea e faka‵mafa mai i ei? (e) Ne toe fakalauefa aka pefea ne Iesu a te manakoga ke fakamagalo atu?

⁹ Se mea tāua me i te fakamolemole ke “fakamagalo mai omotou agasala e pelā mo matou e fakamagalo atu ki tino kolā e agasala mai ki a matou” ko te vaega fua tenā o te ‵talo fakaakoako ne fai ne Iesu se fakamatalaga ki ei. I te otiga o te ‵talo tenā, ne faopoopo mai a ia: “I te mea kafai koutou e fakamagalo atu ki tino i olotou agasala, e fakamagalogina foki koutou ne te otou Tamana telā i te lagi. Kae kafai e se loto fakamagalo atu koutou ki tino i olotou agasala, e se fakamagalogina foki koutou ne te otou Tamana i otou agasala.” (Mataio 6:​14, 15) Tela la, ne taku manino mai ne Iesu me e fakalagolago a te fakamagaloga o ‵tou agasala ne Ieova ki te talia ne tatou o fakamagalo a nisi tino.​—Maleko 11:25.

¹⁰ I se taimi e tasi, ne fai ne Iesu se tala fakatusa ke fakaasi atu ei te manakoga ke fakamagalo atu māfai e ma‵nako tatou ke fakamagalo tatou ne Ieova. Ne fai ne ia se tala e uiga ki se tupu alofa telā ne fakamagalo ne ia te kaitalafu lasi ‵ki a tena tavini. Fakamuli ifo, ne fakasala ne te tupu a te tavini tenā me ne seki fakamagalo ne ia a te kaitalafu foliki fua a te suā tavini i a ia. Ne fakaoti ne Iesu tena tala fakatusa penei: “Ka penā eiloa a faiga a toku Tamana i te lagi ki a koutou katoa, manafai e se Loto fakamagalo koutou ki otou taina.” (Mataio 18:​23-​35) E manino ‵lei te akoakoga i konei: E lasi fakafia atu a te kaitalafu o agasala a tatou taki tokotasi kolā e fakamagalo ne Ieova i lō mea ‵se a nisi tino e fai ki a tatou. E se gata i ei, e fakamagalo ne Ieova tatou i aso takitasi. Tela la, e ‵tau eiloa o fakamagalo ne tatou a tamā mea ‵se e fai mai ne nisi tino ki a tatou.

11. Ne a pati fakatonutonu ne tuku mai ne te apositolo ko Paulo e ‵tau o tau‵tali ki ei māfai e fia fakamagalo tatou ne Ieova, kae ne a ikuga ‵lei ka maua mai i ei?

¹¹ Ne tusi mai te apositolo ko Paulo: “E ‵tau mo koutou o fakatau a‵lofa kae fakatau atafai; ke fakatau fakamagalo foki koutou, e pelā eiloa mo te Atua ko oti ne fakamagalo ne ia koutou i a Keliso.” (Efeso 4:32) A te fakatau fakamagalo e fakamalosi aka i ei te filemu i va o Kelisiano. Ne toe fai mai a Paulo: “A koutou ne kelisiano kolā ne alofagina kae filifilia ne te Atua mō ia, tela la e ‵tau mo koutou o taofi ‵mau ki te alofa, te kaimalie, te loto malalo, te agamalū, mo te loto kufaki. Ke fakatau fesoasoani koutou i a koutou eiloa, ke fakatau fakamagalo foki koutou i a koutou eiloa, manafai e isi se mea e se malie ei te suā tino ki te suā tino. E pelā mo te Aliki ko oti ne fakamagalo ne ia koutou, e ‵tau foki mo koutou o fakatau fakamagalo. Kae sili i mea katoa konei, taofi ‵mau koutou ki te alofa, telā e fusi fakatasi ei ne ia a mea katoa ke ‵lei.” (Kolose 3:​12-14) E maina tatou i mea katoa konei i te ‵talo telā ne fakaakoako mai ne Iesu: “Fakamagalo mai omotou agasala e pelā mo matou e fakamagalo atu ki tino kolā e agasala mai ki a matou.”

Puipuiga Mai Tofotofoga

12, 13. (a) Se a te mea e se fakauiga ki ei te suā fakamolemole i te ‵talo fakaakoako? (e) Ko oi te toe Tino Fakaosooso sili, kae se a te uiga o ‵tou ‵talo ke sa takitakigina tatou ki fakaosoosoga?

¹² A te suā fakamolemole i te ‵talo fakaakoako a Iesu, tenei: “Sa takitakigina matou ki se tofotofoga.” (Mataio 6:13) E mata, ne fakauiga Iesu me e ‵tau o fakamolemole atu ki a Ieova ke sē tofotofogina tatou? E se penā loa, me ne fakamalosi atu ki te soko ko Iakopo ke tusi mai: “Kafai e fakaosoosogina se tino, ke sa manatu ake pelā, ‘Au ko fakaosoosogina ne te Atua.’ I te Atua e se mafai o fakaosoosogina ne te masei, kae sē fakaosooso foki ne ia tino ki te masei.” (Iakopo 1:13) E se gata i ei, ne tusi mai te faisalamo: “Kafai ne tusitusi ne koe omotou agasala, ko oi la te tino ka mafai o sao mai te fakasalaga?” (Salamo 130:3) E se alamati a Ieova ki ‵tou mea ‵se katoa, kae e se fakaosooso eiloa ne ia tatou ke fai se mea ‵se. Kae se a la te mea e fakauiga ki ei te vaega o te ‵talo fakaakoako tenei?

¹³ A te tino telā e taumafai o lamalama ki a tatou, ke ‵siga i ana auala faitogafiti, kae ke folo foki ne ia tatou, ko Satani te Tiapolo. (Efeso 6:11) Ko ia ko te toe Tino Fakaosooso sili. (1 Tesalonia 3:5) A te ‵talo ke sē takitakigina tatou ki fakaosoosoga, e fakamolemole atu ei ki a Ieova ke sē talia ne ia ke ‵siga tatou māfai ko tofotofogina tatou. E fakamolemole atu tatou ki a ia ke fesoasoani mai ke ‘faka‵mao keatea Satani,’ mai i a tatou kae ke sē ‵tō atu foki ki tofotofoga. (2 Kolinito 2:11) E fai ‵tou ‵talo ko te mea ke tumau tatou i te “tausiga a Ia telā e o ia te Malosi Katoatoa,” ke maua te puipuiga faka-te-agaga telā e tuku atu fua ki tino kolā e matea ne latou te pulega a Ieova i olotou mea katoa e fai.​—Salamo 91:​1-3.

14. E fakamaoni mai pefea a te apositolo ko Paulo me e se mafai o tiakina tatou ne Ieova māfai e ‵saga atu ki a ia mai lalo i tofotofoga?

¹⁴ Kafai tenā eiloa te manakoga tonu o tatou, kae fakaasi atu foki i ‵tou ‵talo mo ‵tou faifaiga, e mautinoa eiloa me ka sē mafai o tiakina tatou ne Ieova. E fakamaoni mai te apositolo ko Paulo: “Ko fakaosoosoga katoa kolā e masani o maua ne koutou i otou auala, se mea e masani eiloa o oko mai ki tino. Me i te Atua e tausi tena folafolaga, kae sē mafai foki o talia ne ia ke fakaosoosogina koutou ke sili atu i te otou malosi o ‵teke te fakaosoosoga; kae i te taimi e fakaosoosogina ei koutou, ka tuku atu ne ia a te malosi e kufaki ei ne koutou, kae fai foki ne ia se ala e ‵sao ei koutou.”​—1 Kolinito 10:13.

“Faka‵sao Mai Matou Mai te Masei”

15. Kaia e sili atu nei te tāua ke ‵talo mō se faka‵saoga mai te tino masei?

¹⁵ E ‵tusa mo tusitusiga mua i te Tusi Tapu i te ‵gana Eleni, e fakaoti penei te ‵talo fakaakoako a Iesu: “Faka‵sao mai matou mai te [tino] masei.”a (Mataio 6:13) Ko manakogina nei se puipuiga mai i te Tiapolo mo ana temoni i te taimi tenei o te gataga. Ko taua atu nei a Satani mo ana temoni ki te toega o te kau fakaekegina, “kolā e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu,” mo olotou taugasoa ko te “vaitino tokouke.” (Fakaasiga 7:9; 12:​9, 17) Ne fakamalosi atu te apositolo ko Petelu ki Kelisiano: “Ke toka kae matapula‵pula foki koutou! Me i te otou fili, telā ko te Tiapolo, e fanofano tele e pelā mo se leona fekai, e salasala ki te tino ke kai ne ia. Ke ‵mautakitaki koutou i te otou fakatuanaki.” (1 Petelu 5:​8, 9) E manako a Satani o taofi te ‵tou galuega talai, kae e auala i ana sui i te lalolagi nei​—faitalia me ko lotu, tino fai pisinisi io me ko potukau fakapolitiki​—e taumafai a ia o fakamatakutaku tatou. Kafai e tu ‵mautakitaki tatou, ka fakasao ne Ieova tatou. Ne tusi mai te soko ko Iakopo: “Ke tuku katoatoa atu koutou ki te Atua. ‵Teke atu te Tiapolo, ko sola ei a ia keatea mai i a koutou.”​—Iakopo 4:7.

16. Ne a auala e fakaaogā ne Ieova ke fesoasoani atu ki ana tavini kolā e tofotofogina?

¹⁶ Ne talia ne Ieova ke tofotofogina tena Tama. Kae i te otiga o te ‵tekeatuga a Iesu ki te Tiapolo mai te fakaaogāga o te Muna a te Atua ke puipui ei a ia, ne uga atu ne Ieova ana agelu ke fakamalosi atu ki a ia. (Mataio 4:​1-11) E penā foki te auala e fakaaogā ei ne Ieova ana agelu ke fesoasoani mai māfai e ‵talo tatou mo te fakatuanaki kae ke fai a ia mo fai te ‵tou lafiga. (Salamo 34:7; 91:​9-11) Ne tusi mai te apositolo ko Petelu: “E iloa eiloa ne te Aliki o fakaola a tino amio atua mai i olotou tofotofoga, e iloa foki ne te Atua o tausi a tino kolā ko maua ne te fakasalaga ke oko ki te Aso Fakamasino.”​—2 Petelu 2:9.

Ko Pili Mai te Faka‵saoga Katoatoa

17. I te tukumaiga o te ‵talo fakaakoako, ne fakasolo mai pefea ne Iesu a mea i olotou tulaga ‵tonu?

¹⁷ Ne fakasolo mai ne Iesu i tena ‵talo fakaakoako a mea i olotou tulaga ‵tonu. A te mea telā e ‵tau o fakamuamua ne tatou ko te fakamalugāga o te igoa tapu o Ieova. Me i te Malo o te Atua ko te mea faigaluega telā ka fakataunu ne ia te mea tenei, e ‵talo atu loa tatou ke na oko mai ke fakaseai atu a malo sē ‵lei katoatoa o tāgata, ko te mea ke fai a mea katoa kolā e loto ki ei te Atua i te lagi e pelā foki mo te lalolagi. E fakalagolago eiloa te ‵tou fakamoemoega ke ola ki te se-gata-mai i te lalolagi palataiso ki te fakamalugāga o te igoa o Ieova mo tena pulega amiotonu i te lalolagi kātoa. Mai tua o te ‵talo mō toe mea tāua konei, ko mafai ei o ‵talo tatou mō ‵tou manakoga i aso takitasi, te fakamagaloga o agasala, mo te faka‵saoga mai tofotofoga mo auala faitogafiti o Satani te Tiapolo.

18, 19. Ne fesoasoani mai pefea a te ‵talo fakaakoako a Iesu ke tumau tatou i te matapula‵pula kae ke tumau te ‵tou fakamoemoega ke “oko ki te fakaotiga”?

¹⁸ Ko pili mai fua te ‵tou faka‵saoga mai te tino masei mo tena fakanofonofoga matagā tenei. E iloa ‵lei ne Satani me “ko sē leva ona aso” ke fakaasi atu ei tena “kaitaua” ki tino o te lalolagi, kae maise eiloa ki tavini fakamaoni a Ieova. (Fakaasiga 12:​12, 17) I vaega kese‵kese o te fakailoga e uiga ki te “gataga,” ne ‵valo mai ne Iesu a mea ‵lasi ka ‵tupu, a ko nisi mea konā koi ‵moe nei i ‵tou mua. (Mataio 24:​3, 29-​31) I te lavea atu o te fakataunuga o mea konā, ka gasolo aka ei o maina faka‵lei mai te ‵tou fakamoemoega mō te fakaolataga. Ne fai mai Iesu: “Kafai ko kamata o oko mai a mea konei, tu kae ‵kilo ki luga, me ko pili mai te otou fakaolataga.”​—Luka 21:​25-28.

¹⁹ E tuku mai ne te ‵talo fakaakoako manino a Iesu ki ana soko se fakatakitakiga aogā e uiga ki mea kolā e ‵tau o aofia i ‵tou ‵talo i te taimi tenei ko pili mai ei te gataga. Ke na tumau tatou i te tali‵tonu ke oko ki te gataga, me ka tuku mai faeloa ne Ieova a mea kolā e ma‵nako tatou ki ei i aso takitasi, i te feitu faka-te-agaga mo te feitu faka-te-foitino. A te ‵tou tumau i te ‵talo faeloa ka fai i ei ke “taofi ‵mautakitaki tatou ki te fakamaoni ki a ia telā ne iai mo tatou mai te kamataga ke oko ki te fakaotiga.”​—Epelu 3:14; 1 Petelu 4:7.

[Fakamatalaga mai lalo]

Ke Toe Onoono ki ei

• Ne a mea ko maina tatou i ei i te ‵tou

fakamolemole atu ke “tuku mai omotou meakai e ‵tau mo te aso nei”?

• Ke fakamatala mai a te uiga o te ‵talo atu ke “fakamagalo mai ki omotou agasala, e pelā foki mo matou e fakamagalo atu ki tino kolā e ‵se mai ki a matou.”

• Se a te uiga o te fakamolemole atu ki a Ieova ke sē takitakigina tatou ki fakaosoosoga?

• Kaia e ‵tau ei o ‵talo tatou ke “faka‵sao mai matou mai te masei”?

[Ata i te itulau e 21]

E ‵tau o fakamagalo ne tatou a nisi tino māfai e fia fakamagalogina tatou

[Ke fakamatalaga o ata e 19]

Lydekker