E Mata, e Pokotia Au ‵Talo i Pati a Iesu?

“I te otiga o pati a Iesu, ne ofo masei a te vaitino i ana akoakoga.”​—⁠MATAIO 7:​28.

1, 2. Kaia ne ofo masei ei a te vaitino i te auala ne akoako atu ei a Iesu?

E ‵TAU o talia ne tatou a akoakoga a te Tama e tokotasi a te Atua, ko Iesu Keliso, kae fakagalue ne tatou i ‵tou olaga. E seai eiloa se tino ne faipati e pelā mo ia. Ne ofo masei a tino i te auala ne akoako atu ei a ia i te Lauga i luga i te mauga!​​—⁠Faitau te Mataio 7:​28, 29.

2 Ne seki akoako atu a te Tama a Ieova e pelā mo faiakoga o te tulafono, kolā e fakavae olotou lauga ‵loa ki akoakoga a tino sē lei katoatoa. Ne akoako atu a Keliso “e pelā mo se tino e i a ia te pule” me i muna kolā e faipati atu ne ia e mai i te Atua. (Ioane 12:50) Tela la, ke onoono nei tatou ki te auala e mafai kae e ‵tau o pokotia foki ei a te faiga o ‵tou ‵talo i nisi akoakoga a Iesu i tena Lauga i luga i te mauga.

Ke mo a ma ‵Talo e Pelā mo Tino Fia Amio‵tonu

3. Ke fakamatala fakatoetoe mai a te ‵kano tonu o pati a Iesu kolā e maua i te Mataio 6:5.

3 A te ‵talo se vaega tāua o te tapuakiga tonu, tela la, e ‵tau o ‵talo faeloa tatou ki a Ieova. Kae e ‵tau o fakamalosi aka a ‵tou ‵talo ne akoakoga a Iesu i tena Lauga i luga i te mauga. Ne fai mai a ia: “Kae kafai koutou e ‵talo ke se fakaakoako ki tino fia amio‵tonu, me i a latou e fia ‵tu kae ‵talo i fale tapuaki mo maga auala, ko te mea ke lavea mai latou ne tino. E tonu, au e fai atu ki a koutou, e maua ne latou te lotou taui.”​​—⁠Mataio 6:⁠5.

4-6. (a) Kaia ne fia‵fia ei a te kau Falesaio o “‵tu kae ‵talo i fale tapuaki mo maga auala”? (e) Kae ne maua pefea ne tino fia amiotonu konā “te lotou taui”?

4 Ne seki ‵tau o fakaakoako a soko o Iesu ki Falesaio “fia amio‵tonu,” kolā e fakaloiloi ne latou a tino ki olotou faifaiga fakalotu. (Mataio 23:​13-​32) E ma‵nako a tino fia amio‵tonu konei ke “‵tu kae ‵talo i fale tapuaki mo maga auala.” Kaia? Ko te mea ke “lavea mai latou ne tino.” I te senitenali muamua, e masani sāle o ‵talo a tino Iutaia e pelā me se fakapotopotoga i taimi e fai ei a taulaga ‵sunu i te faletapu (e fakatautau pelā me ko te iva i te taeao mo te tolu i te fakaafiafi). E tokouke a tino i Ielusalema e ‵talo fakatasi mo te vaitino o tino tapuaki i se kogā koga i te faletapu. Kae i tua o te fa‵kai tenā, e masani o ‵talo fakalua i te aso a tino ‵lotu Iutaia, “e ‵tu kae ‵talo i fale tapuaki.”​​—⁠Fakatusa ki te Luka 18:​11, 13.

5 Ona ko te se tokouke o tino e ‵nofo pili atu ki te faletapu io me ko fale tapuaki o fai olotou ‵talo konei, kāti e ‵talo eiloa latou i so se koga e ‵nofo latou i ei i taimi konā. E ma‵nako a nisi tino ke ‵nofo tonu atu latou i “maga auala” i te taimi e fai ei a ‵talo. E ma‵nako ke “lavea mai ­latou ne tino” kolā e olo atu i maga o auala konā. E fai ne tino fia amio‵tonu konei a “‵talo ‵loa” ko te mea ke maua ne latou a tavaega mai tino kolā e maimoa atu ki a latou. (Luka 20:47) E se ‵tau ­eiloa o maua ne tatou a te kilokiloga tenā.

6 Ne fakailoa mai ne Iesu me i tino fia amio‵tonu konā ka “maua ne latou te lotou taui.” E ma‵nako malosi latou ke takutakua kae ke maua foki ne latou a tavaega mai tino​​—⁠kae tenā fua te mea ka maua ne latou. Tenā eiloa te taui ka maua ne latou, me ka se tali ne Ieova a ‵talo a tino fia amio‵tonu konā. I te suā feitu, ka tali atu eiloa te Atua ki ‵talo a soko ‵tonu o Keliso, e pelā mo te mea e fakaasi mai i pati a Iesu e uiga ki te mataupu tenei.

7. Se a te uiga o pati fakatonutonu ke ‵talo i tou “potu”?

7 “Kafai e ‵talo koe, ulu ki loto i tou potu, ‵pono te mataloa; ko fai ei tau ‵talo ki tou Tamana telā e i te koga se lavea; ka ko tou Tamana telā e lavea ne ia koe i te koga se lavea, e avatu foki ne ia a te taui ki a koe.” (Mataio 6:⁠6) Ne seki fakauiga a pati a Iesu e uiga ki te faiga o ‵talo i loto i tou potu, me ko se mafai ne se tino o sui ne ia a te fakapotopotoga i te faiga o ‵talo. Ne fai eiloa a pati fakatonutonu konei ke faka‵tuka atu ki te faiga o ‵talo i mua o tino ke maua mai i ei a ­tavaega mai nisi tino. E ‵tau o masaua ne tatou a te mea tenei māfai e maua ne tatou te tauliaga ke sui ne tatou a tino o te Atua i te faiga o ‵talo i mua o tino. Ke na tau‵tali atu foki tatou i pati fakatonutonu a Iesu e uiga ki te faiga o ‵talo.

8. E ‵tusa mo te Mataio 6:​7, se a te vaegā faiga o ‵talo e ‵tau o ‵kalo keatea tatou mai i ei?

8 “Kafai e ‵talo koutou, sa fakaukeuke [“fakafoki‵foki,” NW] otou pati, ke pelā mo te amioga a tino o fenua fakaatea, me fai mai te lotou manatu me ko te uke o muna, ko te talia tenā o te ‵talo.” (Mataio 6:⁠7) Ne fakaasi mai ne Iesu a te suā auala sē tonu i te faiga o ‵talo​​—⁠ko te fakafoki‵foki o pati. Ne seki fakauiga a ia me e se ‵tau o fakafokifoki ne tatou a ‵talo ki mea e manava‵se tatou ki ei pelā foki mo ‵talo fakafetai. I te fatoaga o Ketesemane i te po mai mua o tena mate, ne fakafokifoki faeloa ne Iesu “ana pati ko oti ne fai” i tena ‵talo.​—⁠Maleko 14:​32-​39.

9, 10. Kaia e se ‵tau ei o fakafokifoki faeloa a pati e fai i ‵tou ‵talo?

9 Se mea sē ‵lei ke fakaakoako atu tatou ki vaegā ‵talo kolā e fakafokifoki faeloa i ei a pati masani e pelā mo ‵talo “a tino o fenua fakaatea.” “Kafai e ‵talo koutou sa fakafoki‵foki” faeloa a ‵talo tauloto kolā e aofia i ei a muna sē aoga. Ne seki ai se fesoasoani ne maua ne tino tapuaki a Paala i te taimi ne ka‵laga atu ei “mai i te taeao ke oko ki te afiafi” ki te igoa o te lotou atua ‵se, i te fai atu penei: “Paala tali mai ki a matou!” (1 Tupu 18:​26,Tusi Paia, Samoa) E lau i miliona a tino i aso nei e fakaukeuke kae fakafokifoki olotou pati i olotou ‵talo mo te manatu me i te faiga tenā ko “te talia tenā o te ‵talo.” Kae ne fesoasoani mai a Iesu ke iloa ne tatou me e seai se aoga o te “uke o muna” e fakaaoga i ‵talo ‵loa kolā e fakafokifoki faeloa a pati i ei. Ne toe fai mai a Iesu:

10 “Sa fai koutou e pelā mo latou, me lavea ne te otou Tamana a mea kolā e fia maua ne koutou, kae e seki fakatagi atu eiloa a koutou ki a ia.” (Mataio 6:⁠8) Ne fai ne takitaki lotu Iutaia e tokouke a latou ke pelā mo tino o Fenua Fakaatea e auala i te fakaukeuke o pati e fai i olotou ‵talo. A ‵talo o tavaega, fakafetai mo ‵talo fakamolemole kolā e fai atu mo te loto kātoa se vaega tāua o te tapuakiga tonu. (Filipi 4:⁠6) E ui i ei, se mea sē ‵lei ke fakafokifoki ‵tou pati e fai i ‵tou ‵talo mo te mafaufau me ko puli i te Atua a ‵tou manakoga. Kafai tatou e ‵talo, e ‵tau o masaua ne tatou me e ‵talo atu eiloa tatou ki te Tino telā ko leva ne ‘lavea ne ia a mea kolā e fia maua ne tatou kae seki fakatagi atu tatou ki ei.’

11. Se a te mea e ‵tau o masaua ne tatou māfai e maua ne tatou te tauliaga ke ‵talo atu i mua o tino?

11 E ‵tau o fakamasaua mai ne pati a Iesu e uiga ki ‵talo kolā e se talia ne te Atua me e se ofo te Atua i gaugaleo mo tugapati fakapogipogi kolā e fakaaoga i ‵talo. E ‵tau o iloa ne tatou me i ‵talo kolā e fai i mua o tino e se ko te taimi e fai ei ne tatou ke ofo a tino fakalogo‵logo io me ke mafau‵fau latou me ko te taimi fea ka “Amene” ei te ‵talo. A te fakaaogaga o ‵talo ke fai a faka‵pulaga io me polopoloki atu ki tino fakalogo‵logo e se fetaui mo te agaga o pati a Iesu i tena Lauga i luga i te mauga.

Ne Akoako Mai ne Iesu ke Iloa ne Tatou o ‵Talo

12. E fakamatala mai pefea ne koe a te uiga tonu o te fakamolemole atu ke “tapu tou igoa”?

12 E tiga eiloa ne fakailoa mai ne Iesu ke se fakaaoga ‵se te tauliaga ki te faiga o ‵talo, kae ne akoako eiloa ne ia ana soko ke iloa ne latou o ‵talo. (Faitau te Mataio 6:​9-​13.) E se ‵tau o tauloto ne tatou te ‵talo fakaakoako ko te mea ke fakafokifoki faeloa ne tatou a pati i ei i taimi katoa. Kae e tuku mai fua i ei se ata o ‵talo e ‵tau o fai ne tatou. E pelā mo te mea tenei, ne fakatulaga muamua ne Iesu a te Atua i ana pati kamata: “Te motou Tamana telā i te lagi: ke tapu tou igoa.” (Mataio 6:⁠9) E taku ne tatou a Ieova e pelā me ko te “motou Tamana” me i a ia ko te ‵tou Mafuaga, telā e nofo “i te lagi,” telā e ‵mao ‵ki mai i te lalolagi. (Teutelonome 32:6; 2 Nofoaiga Tupu 6:​21; Galuega 17:​24, 28) A te fakaaogaga o te tugapati “te motou” e ‵tau o fakamasaua mai ki a tatou me e maua foki ne ‵tou taina tali‵tonu se fesokotakiga pili mo te Atua. “Ke tapu tou igoa” se fakamolemole e fai ki a Ieova ke gasuesue o fakamaluga aka a ia e auala i te faka‵maga ne ia o tena igoa mai ‵losiga ‵se e uke kolā ne fai ki ei talu mai te ‵tekeatuga i Etena. I te tali atu ki te ‵talo tenā, ka ­fakaseai ne Ieova a amioga ma‵sei mai te lalolagi, kae ka fakamaluga aka ei a ia.​—⁠Esekielu 36:⁠23.

13. (a) E fakataunu pefea a te fakamolemole “ke oko mai tou Malo”? (e) Ne a mea e aofia i te faiga o te loto o te Atua i te lalolagi?

13 “Ke oko mai tou Malo. Ke fai te mea e loto koe ki ei i lalo nei, e pelā mo te faiga i te lagi.” (Mataio 6:​10) E ‵tusa mo te fakamolemole i te ‵talo fakaakoako, e ‵tau o masaua ne tatou me i te “malo” ko te pulega faka-Mesia i te lagi telā e pule ne Keliso mo tino kolā ka maua ne latou “te malosi faka tupu” kae ko oti ne toe faka‵tu aka kae ‵kau fakatasi mo ia. (Tanielu 7:​13, 14, 18; Isaia 9:​6, 7) A te ‵talo atu ke na “oko mai” se fakamolemole ke na fakaoko mai te pulega a te Malo o te Atua ke fakaseai atu i ei a tino ‵teke katoa i te lalolagi nei kolā e ‵teke atu ki te pulega faka-te-lagi. Ko pili o tupu a te mea tenā, kae ka ‵tala mai i ei te auala ki te mauaga o se lalolagi palataiso telā e ‵fonu i te amiotonu, filemu, mo te olaga ‵lei. (Salamo 72:​1-​15; Tanielu 2:​44; 2 Petelu 3:​13) Ko fai nei a te loto o Ieova i te lagi, kae ko te ‵talo atu ke fai tena loto i te lalolagi nei se fakamolemole ke fakataunu ne te Atua tena fuafuaga i te lalolagi, e aofia i ei te fakaseaiga o ana fili i aso nei e pelā mo ana faiga i aso mua.​—⁠Faitau te Salamo 83:​1, 2, 13-​18.

14. Kaia e ‵lei ei ke ‵talo atu tatou mō “mea‵kai e ‵tau mō te aso nei”?

14 “Tuku mai omotou meakai e ‵tau mo te aso nei.” (Mataio 6:​11; Luka 11:⁠3) A te ‵talo atu e uiga mō te mea tenei, e fakamolemole atu eiloa tatou ki te Atua ke tuku mai ne ia ‵tou mea‵kai “e ‵tau mo te aso nei.” E fakaasi mai i ei me tali‵tonu tatou me e mafai o tausi ne Ieova tatou i aso takitasi. E se ‵talo atu tatou ke fakauke ‵tou mea e maua. A te fakamolemole ke tausi mai tatou i aso takitasi, kāti e fakamasaua mai i ei ki a tatou a te fakatonuga a te Atua ki te kau Isalaelu ke fakaputu ne latou a manai “e lava ei latou i te aso tenā.”​—⁠Esoto 16:⁠4.

15. Fakamatala mai a te uiga o te fakamolemole atu ke “fakamagalo mai omotou agasala e pelā mo matou e fakamagalo atu ki tino kolā e agasala mai ki a matou”?

15 A te suā fakamolemole i te ‵talo fakaakoako e fakasino atu ki se mea telā e ‵tau o fai ne tatou. Ne fai atu a Iesu: “Fakamagalo mai omotou agasala e pelā mo matou e fakamagalo atu ki tino kolā e agasala mai ki a matou.” (Mataio 6:​12) Kafai fua ko oti ne “fakamagalo atu ki tino kolā e agasala mai” ko mafai ei ne tatou o ­fakamoemoe ke fakamagalo tatou ne Ieova. (Faitau te Mataio 6:​14, 15.) E ‵tau o fakatau fakamagalo ne tatou a nisi tino.​—⁠Efeso 4:​32; Kolose 3:​13.

16. Se a te mainaga e ‵tau o maua ne tatou e uiga ki te fakamolemole ke sa tofotofogina tatou kae ke faka‵sao mai te tino masei?

16 “Sa takitakigina matou ki se tofotofoga, kae faka‵sao mai matou mai te masei [“te tino masei,” NW].” (Mataio 6:​13) Se a te ‵tou malamalama i fakamolemole e lua konei i te ‵talo fakaakoako a Iesu? E tasi te mea mautinoa i ei: E se tofotofo ne Ieova tatou ki te agasala. (Faitau te Iakopo 1:​13.) A Satani​—⁠te “tino masei”​—⁠ko ia eiloa te “tino fakaosooso.” (1 Tesalonia 3:⁠5) Kae tigā eiloa te feitu tenā, e faipati mai eiloa te Tusi Tapu me e fai fua ne te Atua a mea kolā e talia ne ia. (Luta 1:​20, 21; Failauga 11:⁠5) Tela la, a te fakamolemole atu ke “sa takitakigina matou ki se tofotofoga” se fakamolemole e fai ke se talia ne Ieova ke taka‵vale tatou māfai ko tofotofogina ke se faka‵logo ki a ia. Kae ko te fakamolemole fakaoti ke “faka‵sao mai matou mai te tino masei” se akai ke mo a ma talia ne Ieova ke manumalo Satani i a tatou. E mafai eiloa o tali‵tonu tatou me ‘e se mafai o talia ne te Atua ke fakaosoosogina koutou ke sili atu i te otou malosi o ‵teke te fakaosoosoga.’​—⁠Faitau te 1 Kolinito 10:⁠13.

‘Akai Atu, Salasala Atu, Tukituki Atu’

17, 18. Se a te uiga o te tumau i te ‘akai, salasala mo te tukituki atu’?

17 Ne fakamalosi atu te apositolo ko Paulo ki tino tali‵tonu ke: “‵Talo i taimi katoa.” (Loma 12:12) Ne fai atu ne Iesu se fakatonuga tai ‵pau i ana pati konei: “Akai atu, kae ka tuku mai ki a koutou; salasala atu, kae ka maua ne koutou; tukituki atu, kae ka ‵tala mai ki a koutou. So se tino e akai atu, e tuku mai ki a ia; a ia telā e salasala atu, e maua ne ia; a ia foki telā e tukituki atu, e ‵tala mai ki a ia.” (Mataio 7:​7, 8) Se mea ‵lei ke “akai atu” ki so se mea telā e fetaui mo te loto o te Atua. E ‵tusa mo pati a Iesu, ne tusi mai te apositolo ko Ioane: “Tenei te pogai e maua ei ne tatou te loto malosi i mua o te Atua; e tali‵tonu foki tatou me e talia ne ia manafai e fakatagi tatou ki so se mea e ‵tusa mo tena loto.”​—⁠1 Ioane 5:​14.

18 A te fakatonuga a Iesu ke ‘akai kae salasala atu’ e fakauiga loa me e ‵tau o tumau faeloa tatou i te ‵talo kae ke mo a ma ‵fiu vave. Se mea ‵lei foki ke tumau i te “tukituki atu” ke mafai o ulu atu tatou ki loto i te Malo kae maua i ei a fakamanuiaga, mea aoga, mo te taui. Kae e mata, e mafai o tali‵tonu katoatoa tatou me ka tali mai ne te Atua a ‵tou ‵talo? Ao, e mafai ne tatou māfai e fakamaoni tatou ki a Ieova, me ne fai mai a Keliso: “So se tino e akai atu, e tuku mai ki a ia; a ia telā e salasala atu, e maua ne ia; a ia foki telā e tukituki atu, e ‵tala mai ki a ia.” E uke a tala mai i tavini a Ieova e fakamaoni mai ei me i te Atua se tino telā e “tali mai eiloa” ne ia a talosaga.​—⁠Salamo 65:⁠2.

19, 20. E uiga ki pati a Iesu i te Mataio 7:​9-​11, e fai pefea a Ieova e pelā me se tamana alofa?

19 Ne fakatusa ne Iesu a te Atua ki se tamana alofa telā e tuku atu ne ia a mea ‵lei ki ana fanau. Ke mafaufau me e nofo atu koe i te taimi ne fai ei a te Lauga i luga i te mauga kae lagona ne koe a pati a Iesu: “Ko oi se tino i a koutou e mafai o tuku atu se fatu ki tena tama manafai e akai mai ki se falaoa? Io, me akai mai ki se ika, kae tuku atu ki a ia se gata? Tela la, kafai koutou e ma‵sei, kae e iloa ne koutou o tuku atu a mea ‵lei ki otou tama‵liki; e a, e se sili atu la te otou Tamana i te lagi, i te fia tuku atu o mea ‵lei ki tino kolā e akai atu ki a ia?”​—⁠Mataio 7:​9-​11.

20 E tiga eiloa e mafai o taku se tamana e pelā me e “masei” ona ko tena tulaga agasala, kae e isi eiloa se alofa i a ia ki ana fanau. E se mafai o fakaloiloi ne ia tena tama kae taumafai eiloa o tuku atu a “mea ‵lei” ki ei. E pelā me se tamana, e tuku mai faeloa ne te ‵tou Tamana alofa faka-te-lagi a “mea ‵lei,” e pelā mo tena agaga tapu. (Luka 11:13) E mafai o fakamalosi mai ki a tatou ke talia ne Ieova ‵tou taviniga, ko Ia telā e tuku mai ne ia “a mea ‵lei katoa kolā e maua fua mo meaalofa katoatoa takitasi.”​—⁠Iakopo 1:​17.

Ke Maua Faeloa Mea Aoga Mai i Pati a Iesu

21, 22. Ne a mea tāua ne tauloto ne koe mai te Lauga i luga i te mauga, kae ne a ou lagonaga ki akoakoga konei a Iesu?

21 A te Lauga i luga i te mauga ko te ‵toe lauga takutakua eiloa ne fai i te lalolagi. E lauiloa ona ko mea faka-te-agaga kolā e maua i ei e uiga ki te Atua kae maina ‵lei foki i ei. E pelā mo manatu o te lauga tenā kolā e maua i te fakasologa o mataupu konei, e maua eiloa ne tatou a mea aoga e uke māfai e fakagalue aka ne tatou a manatu fakatonutonu mai te lauga tenei. E mafai ne pati a Iesu konei o fakafeoloolo aka a ‵tou olaga i te taimi nei kae tuku mai i ei se fakamoemoega mō se olaga fakafiafia i aso mai mua.

22 Ne onoono fua tatou ki nai mea tāua faka-te-agaga i te Lauga a Iesu i luga i te mauga, i mataupu konei. E se tioa eiloa o “ofo masei a te vaitino i ana akoakoga.” (Mataio 7:​28) Kāti ka penā foki eiloa tatou māfai e faka‵fonu a ‵tou mafaufau mo ‵tou loto ki akoakoga tāua konei mo nisi akoakoga a te ‵Toe Faiakoga Sili, ko Iesu Keliso.

Ne a Au Tali?

• Ne a pati ne fai mai ne Iesu e uiga ki ‵talo fakaloiloi?

• Kaia e ‵tau ei o ‵kalo keatea tatou mai i te fakafokifoki o ‵tou pati i te faiga o ‵talo?

• Ne a fakamolemole ne aofia i te ‵talo fakaakoako a Iesu?

• E mafai pefea o tumau tatou i te ‘akai, salasala, mo te tukituki atu’?

[Ata i te itulau e 15]

Ne taku fakamasei ne Iesu a tino fia amio‵tonu kolā e ‵talo ko te mea ke lavea kae lagona foki latou ne tino

[Ata i te itulau e 17]

E mata, e iloa ne koe te pogai e ‵lei ei ke ‵talo tatou mō ‵tou meakai i aso takitasi?