“Fakataunu Tau Galuega Totino”

“Fai ke ‵lei katoatoa tau taviniga.”​—2 TIMOTEO 4:​5, Byington.

1, 2. E tiga eiloa e fai a Kelisiano katoa mo fai ne tino talai, se a te mea telā e fakatonu mai i te Tusi Tapu ke fai ne toeaina?

A KOE se tino talai o te Malo? Kafai e penā loa, fakafetai atu ki a Ieova te Atua mō te tauliaga gali tenei. A koe se toeaina i te fakapotopotoga? A te mea tenā se tauliaga fakaopoopo mai i a Ieova. Kae ke mo a ma puli i a tatou me e se ko akoakoga faka-te-lalolagi io me ko te atamai i te faipati atu e mafai ei o fai se tino mo fai se tino talai io me se toeaina i te fakapotopotoga. E fai ne Ieova ke toka tatou mō te galuega talai, kae ona ko te mea e fetaui a nisi tāgata i a tatou mo tulaga faka-te-Tusi Tapu, e maua ei ne latou te tauliaga ke tavini atu e pelā me ne ovasia.​​—2 Kolinito 3:​5, 6; 1 Timoteo 3:​1-7.

² E fai ne Kelisiano tukugina atu katoa te galuega a tino talai, kae maise eiloa a ovasia, io me ko toeaina, e ‵tau o fai ne latou se fakaakoakoga ‵lei i te feitu tenei. E lavea ‵lei ne te Atua mo Keliso, pelā foki mo Molimau a Ieova a toeaina “kolā e fai ne latou a galuega ‵lei e pelā mo ne takitaki.” (1 Timoteo 5:​17; Efeso 5:​23; Epelu 6:​10-​12) Mai lalo o so se fakanofonofoga, e ‵tau o fakamalosi atu i te feitu faka-te-agaga a akoakoga a se toeaina, me ne fai atu a te apositolo ko Paulo ki te ovasia ko Timoteo: “E oko mai te taimi ko se toe faka‵logo ei tino ki akoakoga ‵tonu, kae ka tau‵tali atu ki olotou manakoga, kae fakapotopoto foki ne latou a faiakoga kolā e logosala olotou akoakoga ki olotou taliga. Ka ‵fuli latou keatea mai te mea tonu o faka‵logo ki tala ‵kai. Kae pelā mo koe, e ‵tau eiloa mo koe o mafaufau faka‵lei i mea katoa, kufaki i puapuaga, fai te galuega a te tino folafola, kae fakataunu tau galuega totino, e pelā mo se tavini a te Atua.”​​—2 Timoteo 4:​3-5.

3. Ne a mea e ‵tau o fai ko te mea ke sē fakalavelave atu a akoakoga ‵se ki te malosi o te fakapotopotoga i te feitu faka-te-agaga?

³ Ke fakamautinoa aka me e fakama‵taku a akoakoga ‵se ki te malosi i te feitu faka-te-agaga o te fakapotopotoga, e ‵tau o tautali atu te ovasia ki pati fakatonutonu a Paulo konei: “Mafaufau faka‵lei i mea katoa, . . . kae fai ke ‵lei katoatoa tau taviniga.” (2 Timoteo 4:​5, Byington) E tonu, e ‵tau o ‘fakataunu katoatoa ne se toeaina tena galuega.’ E ‵tau o fakamāea faka‵lei ne ia, ko te mea ke ‵lei katoatoa. A te toeaina telā e fakataunu katoatoa ne ia tena galuega e saga faka‵lei atu ki ana tiute katoa, ke mo a ma fakatamala io me sē fakaoti faka‵lei a nisi mea. E fakamaoni eiloa te vaegā tagata tenā i mea fo‵liki.​​—Luka 12:48; 16:10.

4. Ne a mea e mafai o fesoasoani mai ke fakataunu katoatoa te ‵tou galuega?

⁴ E sē manakogina a taimi e uke i te fakataunuga faka‵lei o te ‵tou galuega, kae e manakogina fua i ei ke fakaaogā faka‵lei te taimi. A te tumau i se fakatokaga paleni e fesoasoani atu ki Kelisiano ke fakataunu te lotou galuega. Ke mafai o uke atu a taimi e fakamāumāu i te galuega talai, e ‵tau o fakatoka faka‵lei se toeaina ke paleni ana mea e ‵tau o fai kae ke iloa foki o tuku atu a nisi mea ki nisi tino ke fai mo te auala e fai ei a mea konā. (Epelu 13:17) A te toeaina telā e fakaaloalogina e fai eiloa tena tusaga, e pelā mo Neemia, telā ne galue foki eiloa i te ‵toe atiakaga o ‵pui o Ielusalema. (Neemia 5:​16) Kae e ‵tau mo tavini katoa a Ieova o ‵kau faeloa ki te galuega talai o te Malo.​​—1 Kolinito 9:​16-​18.

5. E ‵tau o pefea ‵tou lagonaga e uiga ki te galuega talai?

⁵ Ko se faka‵tau eiloa te fakafiafia o te fakatonuga e maua ne tatou e pelā me ne tino talai o te Malo faka-te-lagi telā ko oti ne fakatu aka! E fakatāua eiloa ne tatou te ‵tou tauliaga ke fai ‵tou tusaga i te talaiatuga o te tala ‵lei i te lalolagi kātoa a koi tuai o oko mai te gataga. (Mataio 24:14) E tiga eiloa e se ‵lei katoatoa tatou, e fakamalosi aka eiloa ‵tou loto ne pati a Paulo konei: “E ui eiloa me ko maua ne tatou te koloa faka te Agaga tenei, e ‵pau tatou mo fagu kele i te ma‵fa gofie. Ne fai ne te Atua penei o fakaasi i te ‵mana e o ia, kae se e o tatou.” (2 Kolinito 4:7) E tonu, e mafai o tuku atu ne tatou se taviniga telā e talia ne te Atua​​—ona fua ko te malosi mo te poto telā e tuku mai ne ia.​​—1 Kolinito 1:​26-​31.

Ke Fakaasi Atu te ‵Malu o te Atua

6. Se a te ‵kese i te va o te Isalaelu faka-te-foitino mo te Isalaelu faka-te-agaga?

⁶ E uiga ki Kelisiano fakaekegina, ne fai atu a Paulo me i te Atua “ne fai ne ia tatou ke mafai o tavini i te feagaiga fou.” Ne fakaasi mai ne te apositolo a te ‵kese o te feagaiga fou telā ne fai mo te Isalaelu faka-te-agaga e auala i a Iesu Keliso mo te feagaiga mua o te Tulafono telā ne fai mo te Isalaelu faka-te-foitino e auala i a Mose. Ne toe fai mai a Paulo me i te taimi ne fanaifo ei a Mose mai te Mauga o Sinai mo papa fatu kolā e tusi i ei a Tulafono e Sefulu, ne maina ana mata, telā ne seki mafai ei ne te kau Isalaelu o ‵kilo tonu atu ki a ia. E seki leva kae ne tupu se mea telā e sili atu i te fakamataku ona ko te mea ko “fakamakekegina olotou loto” kae ne fai ei pelā me se veli e pulou i luga i olotou loto. Kae kafai ko tapuaki atu latou mo te loto kātoa ki a Ieova, ko tapale ei keatea te veli tenā. I te fakasino atu ki te galuega telā ne tuku atu ki tino kolā e aofia i te feagaiga fou, muna a Paulo: “Ko tatou katoa kolā e se ufiufi o‵tou mata, e matea ne tatou te ‵malu o te Aliki [ko Ieova].” (2 Kolinito 3:​6-8, 14-​18; Esoto 34:​29-​35) E taulia foki a ‘nisi mamoe’ a Iesu i aso nei ke fakaasi atu ne latou te ‵malu o Ieova.​​—Ioane 10:16.

7. E mafai pefea ne tino o fakaasi atu te ‵malu o te Atua?

⁷ E mafai pefea o fakaasi atu ne tino agasala te ‵malu o te Atua, māfai e seai se tino e kilo atu ki ana mata kae ola? (Esoto 33:20) Ia, i tafa o te ‵malu o Ieova, e isi aka foki sena fuafuaga tafasili i te gali ke taku ‵lei aka ei tena pulega sili e auala i tena Malo. E aofia i muna‵tonu e uiga ki te Malo a “galuega fakaofoofogina a te Atua” kolā ne kamata o folafola atu ne tino kolā ne ‵ligi atu ki ei te agaga tapu i te Penitekoso i te 33 T.A. (Galuega 2:​11) Mai te takitakiga a te agaga, ne mafai ei ne latou o fakataunu katoatoa te galuega ne tuku atu ki a latou.​​—Galuega 1:8.

8. E uiga ki te galuega, se a te mea ne fakaiku aka ne Paulo ke fai?

⁸ Ne fakaiku aka ne Paulo ke mo a ma talia ne ia se mea ke taofi aka ei te fakataunuga katoatoa o tena galuega. Ana muna: “Ko maua ne matou te galuega tenei i te alofa ‵nau o te Atua, ko se loto vāivāi foki matou. Ko oti ne tuku keatea ne matou amioga ‵funa mo amioga fakalumaluma; e ‵teke ne matou te amio takolekole mo te taku ‵se o te muna a te Atua; ka ko te motou galuega e fai i mua o te Atua, ko te fakaasi atu omotou uiga ‵lei i te takutonu atu o te munatonu ki loto o tino katoa.” (2 Kolinito 4:​1, 2) E auala i te mea telā e taku ne Paulo ki “te galuega,” e fakaasi atu ei te munatonu kae fakasalalau atu foki te mainaga faka-te-agaga ki te lalolagi kātoa.

9, 10. E mafai pefea o fakaasi atu te ‵malu o Ieova?

⁹ Ne tusi mai a Paulo e uiga ki te Māfuaga o te mainaga faka-te-foitino mo te mainaga faka-te-agaga: “A te Atua telā ne fai atu penei, ‘Ke ‵pula mai te mainaga mai te pouliga,’ ko te Atua foki eiloa telā ne fai ne ia ke ‵pula te mainaga tenei i omotou loto, ke maua ei ne tatou a te poto e uiga ki te ‵malu o te Atua, telā e ‵pula i foliga o Keliso.” (2 Kolinito 4:6; Kenese 1:​2-5) Ona ko te mea ko oti ne tuku mai ki a tatou te tauliaga sē fuafuagina ke fai mo fai ne faifeau a te Atua, ke na tumau tatou i te ‵mā ko te mea ke fai tatou pelā me ne kilo kolā e fakaata atu i ei te ‵malu o Ieova.

¹⁰ E se mafai o lavea ne tino kolā e ‵nofo atu i te pouliga faka-te-agaga a te ‵malu o Ieova io me ko tena ata mai i a Iesu Keliso, te Mose Sili. Kae pelā me ne tavini a Ieova, e maua ne tatou te mainaga ‵malu mai te Tusi Tapu kae e fakaasi atu ne tatou ki nisi tino. Kafai e fia ‵sao a tino kolā e ‵nofo atu nei i te pouliga faka-te-agaga i te fakaseaiga, e ‵tau o maua ne latou te mainaga mai te Atua. E faka‵logo eiloa tatou i te fia‵fia mo te loto finafinau ki te fakatonuga a te Atua ke fakamaina atu te mainaga o te ‵malu o Ieova ki te pouliga.

Ke Fakamaina atu Tou Mainaga i te Faiga o Akoga Faka-te-Tusi Tapu i Fale o Tino

11. Ne a pati a Iesu e uiga ki te fakamaina atu o ‵tou mainaga, kae se a te auala e tasi e fai ei te mea tenei i ‵tou galuega?

¹¹ Ne fai atu a Iesu ki ana soko: “A koutou ko te mainaga o te lalolagi; e se mafai o se matea te fa‵kai manafai e tu i luga o te mauga. E se tutu te moli ne se tino o tuku ki lalo o te kumete, kae tuku eiloa ki luga o te tugāmoli; kae ka maina atu ki tino katoa kolā i loto i te fale. Ke penā o maina atu te otou mainaga ki mua o tino, ko te mea ke lavea mai ne tino otou galuega ‵lei, ke ‵viki atu ei latou ki te otou Tamana telā i te lagi.” (Mataio 5:​14-​16) E mafai ne ‵tou amioga ‵lei o fai a nisi tino ke ‵viki atu ki te Atua. (1 Petelu 2:​12) Kae ko vaega kese‵kese o te ‵tou galuega talai e maua ei ne tatou a avanoaga e uke ke fakamaina atu te ‵tou mainaga. E tasi te ‵tou fakamoemoega sili ko te fakaasi atu o te mainaga faka-te-agaga mai te Muna a te Atua e auala i te faiga o akoga faka-te-Tusi Tapu ma‵goi i fale o tino. A te mea tenei se auala tāua ‵ki eiloa ke fakataunu katoatoa ei te ‵tou galuega. Ne a manatu e mafai o fesoasoani mai ki a tatou ke fai a akoga faka-te-Tusi Tapu ko te mea ke oko atu ki loto o tino kolā e fia maua ne latou te munatonu?

12. E aogā pefea te ‵talo ki te faiga o akoga faka-te-Tusi Tapu i fale o tino?

¹² A te ‵talo atu ki a Ieova e uiga ki te mea tenei e fakaasi atu ei te ‵tou loto finafinau ke fai a akoga faka-te-Tusi Tapu. E fakaasi atu foki i ei me e lavea ne tatou te tāua o te fesoasoani atu ki nisi tino ke maua ne latou te iloaga e uiga ki te Atua. (Esekielu 33:​7-9) E tali mai eiloa a Ieova ki ‵tou ‵talo kae fakamanuia foki ne ia ‵tou taumafaiga mo te loto kātoa i te galuega talai. (1 Ioane 5:​14, 15) Kae e se ‵talo fua tatou ke maua se tino ke fai tena akoga faka-te-Tusi Tapu. Kafai ko oti ne kamata se akoga, a te faiga o ‵talo mo te mafaufau ‵loto e uiga ki manakoga fakapito o te tino akoga, ka fesoasoani mai ki a tatou ke fai te akoga i taimi takitasi i se auala magoi.​​—Loma 12:12.

13. Se a te mea e mafai o fesoasoani mai ke fai ne tatou a akoga faka-te-Tusi Tapu i fale o tino i se auala magoi?

¹³ E ‵tau o fakatoka faka‵lei ki akoga i taimi takitasi ko te mea ke fai ne tatou a akoga faka-te-Tusi Tapu i se auala magoi. Kafai e mafau‵fau tatou me e se lava te ‵tou atamai, kāti e maua se fesoasoani mai te auala e fai ei ne te ovasia o te Potukau Suke‵suke ki Tusi a te akoga i vaiaso takitasi. I nisi taimi, e mafai o ‵kau atu tatou ki tino talai o te Malo kolā ko oti ne maua ne latou a ikuga ‵lei i te faiga o akoga faka-te-Tusi Tapu. E tonu, e ‵tau eiloa o mafau‵fau faka‵lei tatou ki te kilokiloga mo te auala ne fakaaogā ne Iesu Keliso i te faiga o ana akoakoga.

14. E mafai pefea o oko atu tatou ki te loto o se tino akoga?

¹⁴ Ne fiafia lasi a Iesu i te faiga o te loto o tena Tamana faka-te-lagi i te faipati atu ki nisi tino e uiga ki te Atua. (Salamo 40:8) Ne loto maulalo a ia kae ne manuia i te oko tonu atu ki loto o tino kolā ne fakalogo‵logo ki a ia. (Mataio 11:​28-​30) Tela la, ke na taumafai tatou ke oko ‵tonu atu ki loto o ‵tou akoga faka-te-Tusi Tapu. Kafai e fia fai tatou penā, e ‵tau o fakatoka ki sukesukega takitasi mo te mafaufau ki te tulaga o te tino akoga. E pelā me se fakaakoakoga, kafai ne tupu aka a ia i se kāiga telā e se masani ki te Tusi Tapu, kāti e ‵tau o fakatalitonu atu ki a ia a te ‵tonu o te Tusi Tapu. Ona ko te mea tenā, ko mafai ei o faitau atu a tusi siki e uke kae fakamatala atu ki a latou.

Fesoasoani Atu ki Tino A‵koga ke Malamalama i Tala Fakatusa

15, 16. (a) E mafai pefea o fesoasoani atu tatou ki se tino telā e se malamalama i se tala fakatusa telā ne fakaaogā i te Tusi Tapu? (e) Se a te mea e mafai o fai ne tatou māfai e faigata ki se tino akoga ke malamalama i se tala fakatusa telā e fakaaogā i ‵tou tusi?

¹⁵ Kāti e se masani se tino akoga ki se tala fakatusa telā e fakaaogā i te Tusi Tapu. Kāti e se malamalama a ia i te mea ne fakauiga ki ei a Iesu i tena faimaiga ke tuku te moli ki luga i te tugāmoli. (Maleko 4:​21, 22) Ne fakasino atu a Iesu ki se moli i aso mua telā e ka mai te ‵vae laugatu. E tuku atu a vaegā moli penā i se tulaga fakapito ko te mea ke maina atu ki se kogā koga i te fale. Kāti e manakogina ke fai se sukesukega ki mataupu pelā mo te “Lamp” mo te “Lampstand” i vaegā tusi pelā mo te Insight on the Scriptures ko te mea ke maina faka‵lei i te tala fakatusa a Iesu.a Kae se mea fakafiafia ‵ki eiloa māfai e fanatu koe ki te akoga faka-te-Tusi Tapu mo se fakamatalaga telā e malamalama kae amanaia ki ei te tino akoga!

¹⁶ Kāti e maua i se tusi faka-te-Tusi Tapu se tala fakatusa telā e faigata o malamalama i ei se tino akoga. Ke fakamatala malielie atu, io me fakaaogā se isi tala fakatusa telā e ‵pau eiloa te manatu e maua i ei. Kāti e faka‵mafa atu i se tusi me e tāua ke maua se soa ‵lei e pelā foki mo taumafaiga kolā e fai fakatasi i se fakaipoipoga. Ke fai se tala fakatusa ki te mea tenei, e mafai o fakasino atu ki se tagata telā e ‵ti atu i se lopu, tiaki ana lima kae fakalagolago ke sapo mai ne te suā tino kae sē tō ki lalo. Kae e mafai foki o fakatusa a te manakoga mō se soa ‵lei kae ‵kau fakatasi ki te ‵kau fakatasi o tino kolā e tali fakasolo aka ne latou a pokisi mai i se vaka kākō.

17. Ne a mea e tauloto ne tatou mai i a Iesu e uiga ki tala fakatusa?

¹⁷ A te fakaaogāga o se isi tala fakatusa e manakogina ke fakatoka faka‵lei mai mua o te akoga. Tenā te auala e tasi e fakaasi atu ei ‵tou amanaia tonu ki te tino akoga. Ne fakaaogā ne Iesu a tala fakatusa faigofie ke fakamaina atu ei a mataupu faiga‵ta. E tuku mai i tena Lauga i te Mauga se fakaakoakoga ‵lei o te mea tenei kae e fakaasi mai foki i te Tusi Tapu me ne magoi ana akoakoga ki ana tino fakalogo‵logo. (Mataio 5:1–​7:​29) Ne fakamatala atu ne Iesu a mea mo te loto kufaki ona ko tena amanaia tonu ki nisi tino.​​—Mataio 16:​5-​12.

18. Se a te mea e fakamalosi mai ke fai e uiga ki tusi siki kolā e se siki mai i ‵tou tusi?

¹⁸ A te ‵tou amanaia ki nisi tino ka fakamalosi aka ei tatou ke ‘fakasakosako atu mai muna o te Tusi.’ (Galuega 17:​2, 3) E manakogina i te mea tenei a te faiga o sukesukega fakatasi mo ‵talo mo te fakaaogāga faka‵lei o tusi kolā ne tuku mai e auala i “te tavini fakamaoni kae poto.” (Luka 12:​42-​44) E pelā mo te tusi ko Te Iloaga Telā e Takitaki Atu ei ki te Ola Se-Gata-Mai e maua i ei a tusi siki e uke.b Ona ko tena foliki, e se siki mai a nisi tusi siki. I te taimi e fai ei se akoga faka-te-Tusi Tapu, se mea tāua ke faitau kae fakamatala atu a nisi tusi siki kolā e se siki mai a pati i ei. Me i ‵tou akoakoga e fakavae ki te Muna a te Atua, kae e lasi ‵ki tena ‵mana. (Epelu 4:​12) Ke fakasino atu faeloa ki te Tusi Tapu i sukesukega takitasi, mai te fakaaogāga o tusi kolā e maua i palakalafa. Fesoasoani atu ki te tino akoga ke lavea ne ia a pati i te Tusi Tapu e uiga ki se mataupu io me ko te auala e fakagalue aka ei. Taumafai ke matea ne ia a te auala e aogā ei ki a ia a te fakalogo ki te Atua.​​—Isaia 48:​17, 18.

‵Sili Atu a Fesili Kolā e Fakagasuesue Aka ei te Mafaufau

19, 20. (a) Kaia e ‵tau ei o fakaaogā a fesili kolā e fakaasi mai ei a manatu ‵tonu o te tino akoga i te taimi e fai ei se akoga faka-te-Tusi Tapu? (e) Se a te mea e mafai o fai māfai e manakogina ke tai sukesuke atu ki se mataupu fakapito?

¹⁹ A te apo o Iesu i te fakaaogāga o fesili ne fesoasoani atu ei ke malamalamagofie a tino. (Mataio 17:​24-​27) Kafai e ‵sili atu a fesili kolā e fakaasi mai ei a lagonaga o te tino akoga e aunoa mo te fakamā atu ki a ia, e mafai eiloa o fakaasi mai ana manatu ‵tonu e uiga ki se mataupu. E mafai ei o iloa aka ne tatou me koi talitonu eiloa a ia ki akoakoga ‵se. Kāti koi talitonu eiloa a ia ki te Tolutasi. I te mataupu e 3, e fakasino atu i te tusi ko te Iloaga me sē maua a te pati ko te “Tolutasi” i te Tusi Tapu. E laga kae fakaasi mai i te tusi tenā a tusi siki e uke kolā e fakaasi mai i ei me e ‵kese a Ieova mai i a Iesu kae ko te agaga tapu ko te malosi galue o te Atua, kae e se se tino. Kāti e mafai o lava fua i te faitau mo te sau‵tala ki tusi siki konā. Kae e a māfai e uke atu a mea e manakogina ke fai? Kāti mai tua o te suā akoga masani, e mafai o fakaaogā ne nāi minute ke sau‵tala ki te mataupu tenei mai te fakaaogāga o se isi tusi a Molimau a Ieova, e pelā mo te polosiua ko te E ‵Tau o Talitonu Koe ki te Tolutasi? Mai tua i ei , ko toe faka‵soko atu ei te faiga o te akoga mai te fakaaogāga o te tusi ko te Iloaga.

²⁰ Kāti ka fakapoi io me e se fakafiafia a te tali a te tino akoga ki se fesili. Kafai e aofia i ei se mataupu tai ‵mafa e pelā mo te ‵pusi, kāti e mafai o fai atu ke faka‵soko loa te akoga kae ke sau‵tala ki te mataupu tenā i se taimi fakamuli. A te iloa atu me koi ‵pusi loa te tino akoga e fai ei ke ‵sala atu ki nisi fakamatalaga kolā ko oti ne ‵lomi ke fesoasoani atu ei ki tena gasolo ki mua. A koi taumafai tatou ke oko atu ki te loto o te tino akoga, e mafai o ‵talo tatou ke fesoasoani atu a Ieova ki tena gasolo ki mua i te feitu faka-te-agaga.

21. Se a te mea e mafai o tupu māfai e fakafetaui aka a ‵tou akoakoga ki manakoga o te tino akoga?

²¹ A te fakatokatoka faka‵lei fakatasi mo te fesoasoani o Ieova, e mautinoa eiloa me ka mafai ne tatou o fakafetaui aka a ‵tou akoakoga ki manakoga o te tino akoga. Kāti e mafai o fesoasoani atu tatou ke ati aka tena alofa ‵nau ki te Atua i se vaitaimi. E mafai foki o manuia tatou i te fakamalosiakaga o tena āva mo tena loto fakafetai ki te fakapotopotoga a Ieova. Kae se mea fakafiafia ‵ki eiloa māfai ko iloa ne te tino akoga me ‘i te Atua e i konei i a tatou’! (1 Kolinito 14:​24, 25) Tela la, ke na fai ne tatou a akoga faka-te-Tusi Tapu i se auala magoi kae ke fai a mea katoa ke fesoasoani atu ei ki nisi tino ke fai mo fai ne soko o Iesu.

Se Koloa Telā e ‵Tau o Fakatāua

22, 23. Ne a mea e manakogina māfai e fia fakataunu katoatoa te ‵tou galuega?

²² Ko te mea ke fakataunu katoatoa te ‵tou galuega, e ‵tau o fakalago‵lago tatou ki te malosi telā e tuku mai ne te Atua. Ne tusi atu a Paulo ki ana taina fakaekegina e uiga ki te galuega tenei: “E ui eiloa me ko maua ne tatou te koloa faka te Agaga tenei, e ‵pau tatou mo fagu kele i te ma‵fa gofie. Ne fai ne te Atua penei o fakaasi i te ‵mana e o ia, kae se e o tatou.”​​—2 Kolinito 4:7.

²³ Faitalia me ko tatou ne tino fakaekegina io me ko ‘nisi mamoe,’ e ‵pau eiloa tatou mo fagu kele i te ma‵fagofie. (Ioane 10:16) Kae e tuku mai ne Ieova te malosi e manakogina ke fakataunu ei te ‵tou galuega faitalia a ‵tekemaiga ki a tatou. (Ioane 16:13; Filipi 4:​13) Tela la, ke na fakalago‵lago katoatoa tatou ki a Ieova, ke fakaasi atu te fiafia tonu ki te ‵tou tauliaga i te taviniga, kae ke fakataunu katoatoa te ‵tou galuega.

[Fakamatalaga mai lalo]

Ka Tali Mai Pefea ne Koe?

• Ne a mea e mafai o fai ne toeaina ke fakataunu katoatoa ei te lotou galuega?

• E mafai pefea o momea aka te magoi o ‵tou akoga faka-te-Tusi Tapu i fale o tino?

• Ne a mea ka fai ne koe māfai e se malamalama se tino akoga i se tala fakatusa io me e manako ki nisi fakamatalaga e uiga ki se mataupu?

[Ata i te itulau e 14]

E akoako atu a toeaina Kelisiano i te fakapotopotoga kae fesoasoani atu o fakamasani a taina tali‵tonu i te galuega talai

[Ata i te itulau e 16]

A te faiga o akoga faka-te-Tusi Tapu ma‵goi i fale o tino se auala e tasi ke fakamaina atu ei te ‵tou mainaga