Ke Fakatau Fakamalosi Tatou

“Ko latou fua konei . . . ne tino ne fesoasoani malosi [“fakamalosi,” NW] mai ki a au.”​—KOLOSE 4:11.

1, 2. Faitalia a mea fakama‵taku, kaia ne āsi atu ei a taugasoa o Paulo ki a ia i te falepuipui?

SE MEA fakamataku māfai e taugasoa koe mo se tino telā e ‵pei i te falepuipui​—faitalia me ne ‵pei atu a ia ona ko ‵losiga ‵se. E mafai o fakalotolotolua a tausi pagota ki a koe, kae e lamalama faeloa ke mo a ma soli ne koe se tulafono. Tela la, e manakogina i ei te loto toa ke fesokotaki atu faeloa ki tou taugasoa i te falepuipui.

² Kae tenā eiloa te mea ne fai ne nisi taugasoa o te apositolo ko Paulo i se 1,900 tausaga ko ‵teka. Ne seki fakata‵mala latou i te āsi atu ki a Paulo telā e saisai i te falepuipui, ke fakamafanafana kae fakamalosi atu ki a ia i te feitu faka-te-agaga. Ko oi ana taugasoa fakamaoni konei? Kae ne a mea e mafai o tauloto ne tatou mai te lotou loto ‵toa, fakamaoni mo te lotou fai taugasoa ‵lei?​—Faataoto 17:17.

Se Mea Fakamalosi Loto

3, 4. (a) Ko oi a taugasoa e tokolima o Paulo, kae ne fai latou pelā me ne vaegā tino pefea ki a ia? (e) Se a te uiga o te mea fakamalosi loto?

³ Ke toe mafaufau ki te tausaga ko te 60 T.A. Ko nofo atu te apositolo ko Paulo i te falepuipui i Loma ona ko ‵losiga ‵se o te soli tulafono. (Galuega 24:5; 25:​11, 12) Ne taku takitasi mai ne Paulo a Kelisiano e tokolima kolā ne ‵lago mālō atu ki a ia: ko Tukasi, ko tena sui i Asia kae se “tavini foki i te Aliki”; ko Onosemu, se “taina fakamaoni kae fagasele” mai Kolose; ko Alitako, se tagata Maketonia mai Tesalonia kae se “taina pagota” foki o Paulo i se taimi e tasi; ko Maleko, te fakataina o te taugasoa misionale o Paulo, ko Panapa kae ne tusi foki ne ia te evagelia telā e fakaigoa ki a ia; mo Iuso, se tino foki ne ga‵lue mo te apositolo “mō te Malo o te Atua.” Ne fai mai a Paulo e uiga ki te tokolima konā: “Ko latou eiloa konei ne fai mo tino fakamalosi loto ki a au.”​—Kolose 4:​7-11, NW.

⁴ Ne taku ‵tonu mai ne Paulo a te fesoasoani ne maua ne ia mai i ana taugasoa fakamaoni konei. Ne fakaaogā ne ia te pati Eleni ko te (pa·re·go·riʹa) telā e ‵fuli ki te mea fakamalosi loto, telā e maua fua i te fuaiupu tenei o te Tusi Tapu kātoa. E uke a uiga o te pati tenei kae ne fakaaogā malosi i mea e uiga ki vailakau faka‵lei masaki.a E mafai o ‵fuli ki te ‘fakamafanafana, te faka‵leiga, io me ko te fakatapūga.’ Ne manako a Paulo ki vaegā fakamalosiga penā, kae ne tuku atu eiloa ne tāgata e tokolima konā ki a ia.

Te Pogai ne Manako ei a Paulo ki Fakamalosiga

5. E tiga eiloa ne fai a ia pelā me se apositolo, se a te mea ne manako ki ei a Paulo, kae se a te mea e ma‵nako ki ei a tatou katoa i nisi taimi?

⁵ Kāti ka ‵poi a nisi tino me ne manako a Paulo, telā se apositolo, ki fakamalosiga. Kae ne manako eiloa a ia ki ei. E tonu la me ne lasi te fakatuanaki o Paulo, kae ne sao foki a ia i nisi fakasauāga e uke, ko “‵kiniga,” “ne tai mate” a ia mo nisi logo‵maega foki. (2 Kolinito 11:​23-27) Kae ko ia se tagata fua kae e ma‵nako a tino katoa i nisi taimi ki fakamafanafanaga mo fakamalosiga ki olotou fakatuanaki mai te fesoasoani o nisi tino. Ne penā foki eiloa a Iesu. I tena toe po, ne fakasae atu se agelu i Ketesemane “o fakamalosi ki a ia.”​—Luka 22:43.

6, 7. (a) Ko oi ne fakafanoanoa atu ki a Paulo i Loma, kae ko oi ne fakamalosi atu ki a ia? (e) Ne a vaegā fesoasoani ne tuku atu ne taina Kelisiano o Paulo ki a ia i Loma, kolā ne fai pelā me ne mea fakamalosi loto?

⁶ Ne manako foki a Paulo ki fakamalosiga. I te taimi ne oko atu ei a ia pelā me se pagota ki Loma, ne seki talimālō faka‵lei a ia ne tino o tona gafa Iutaia. Ne ‵teke atu a te tokoukega o tino Iutaia i ei ki te fekau o te Malo. I te otiga ne āsi atu a takitaki o tino Iutaia ki te koga ne tausi i ei a Paulo, e fai mai te tala i te Galuega: “Nisi o latou ne talia tena talaiga, ka ko nisi e se tali‵tonu ki ei. Telā, ko olo latou mo te sē tasi o se manatu e ‵kau latou ki ei.” (Galuega 28:​17, 24, 25) Ko oko loa i te fakafanoanoa ki a Paulo te lotou sē loto fakafetai ki te alofa tauanoa o Ieova! Ne lavea atu te lasi o tena fanoanoa ki te mea tenei i tena tusi ne tusi i nāi tausaga mai mua atu i ei ki te fakapotopotoga i Loma: “Ko oko eiloa i te lasi o toku fanoanoa mo te loto ‵mae. I te mea ko loto au ke malaia au, kae ke fakamavae foki keatea mai i a Keliso mō te ‵lei o oku taina [ko tino Iutaia] pelā foki tino o toku fenua.” (Loma 9:​2, 3) Kae ne mafai o maua ne ia i Loma a taugasoa ‵tonu kae fakamaoni kolā ne fakamalosi atu ki a ia te lotou loto ‵toa. Ko ana taina ‵tonu faka-te-agaga eiloa konā.

⁷ Ne fai pefea a taina konā e pelā ne mea fakamalosi loto? Ne seki ‵mā latou ona ko te nofo atu o Paulo i te falepuipui. I lō te fai penā, ne lotoma‵lie latou o fesoasoani atu mo te a‵lofa ki a Paulo, i te faiga o galuega kolā ko sē mafai ne ia o fai ona ko tena nofo atu i te falepuipui. E pelā eiloa mo te faiga e pelā me ne ave fekau a Paulo i te fakaokoatuga o ana tusi mo fakatonuga ki fakapotopotoga kese‵kese; ne avatu foki ne latou a lipoti fakamalosi loto ki a Paulo e uiga ki te tulaga o taina i Loma mo nisi koga katoa. Kāti ne avatu foki ne latou a mea ne manako a Paulo ki ei, pelā mo gatu ‵moko, pelugā tusi mo mea tusitusi. (Efeso 6:​21, 22; 2 Timoteo 4:​11-​13) Ne fakamalosi atu a mea katoa konei ki te apositolo i te falepuipui ko te mea ke fai foki a ia pelā me se mea fakamalosi loto ki nisi tino, e aofia i ei a fakapotopotoga katoa.​—Loma 1:​11, 12.

Te Faiga Pelā me ne Mea Fakamalosi Loto

8. Se a te akoakoga e maua ne tatou mai te loto maulalo o Paulo ke talia ne ia a fakamalosiga?

⁸ Ne a mea e tauloto ne tatou mai te tala o Paulo mo ana taugasoa e tokolima? Ke onoono tatou ki se akoakoga e tasi: E manakogina te loto toa ke fesoasoani atu ki nisi tino kolā e fe‵paki mo fakalavelave. E se gata i ei, e manakogina te loto maulalo ke iloa ne tatou me ‵tau foki o maua ne tatou te fesoasoani i taimi o fakalavelave totino. Ne seki manako fua a Paulo ki se fesoasoani kae ne talia foki ne ia mo te loto fakafetai a te fesoasoani tenā kae fakamālō atu foki ki tino konā. Ne seki mafaufau a ia me i te taliaga o te fesoasoani mai nisi tino e fai pelā me se fakailoga o tena vāivāi io me se mea fakamasiasi ki a ia, kae e ‵tau foki o fai tatou penā. A te fai atu me e se ma‵nako lele eiloa tatou ki fakamalosiga e fakaasi atu ei me e katoatoa te ‵tou malosi. Ke masaua te fakaakoakoga a Iesu me i nisi taimi e ma‵nako foki a tino ‵lei katoatoa ki se fesoasoani.​—Epelu 5:7.

9, 10. Ne a mea ‵lei e mafai o maua māfai e iloa ne se tino tena manakoga ki se fesoasoani, kae e aogā pefea te mea tenei ki tino i te kāiga mo te fakapotopotoga?

⁹ E mafai o maua a ikuga ‵lei māfai e fakaasi atu ne taina kolā e fai ne latou te takitakiga me e isi ne olotou vāivāiga kae e fakalago‵lago eiloa latou ki te fesoasoani o nisi tino. (Iakopo 3:2) E fakamalosi atu a te iloaga tenā ke malosi ‵lei te vā fakataugasoa o tino kolā e fai ne latou te takitakiga mo latou kolā e faka‵logo ki ei, ke maua ei se fesokotakiga fealofani ‵lei i te vā o latou. A te loto maulalo o tino kolā e talia ne latou a fesoasoani se fakaakoakoga ‵lei mō nisi tino i vaegā tulaga penā. E fakaasi mai i ei me i a latou kolā e fai te takitakiga ne tino foki kae e faigofie ke olo atu ki a ia a nisi tino.​—Failauga 7:20.

¹⁰ E pelā mo te faigofie ki tama‵liki ke talia ne latou te fesoasoani mai i olotou mātua ke fakafesagai atu ki se fakalavelave io me ko tofotofoga māfai e iloa ne latou me ne fe‵paki foki olotou mātua mo vaegā fakalavelave penā i te taimi koi fo‵liki ei. (Kolose 3:21) Ka faigofie i ei te fesokotakiga i te vā o mātua mo te tamaliki. Ka mafai ei o magoi a faka‵leiga faka-te-agaga ki fakalavelave kae talia vave foki ne latou. (Efeso 6:4) I se auala tai ‵pau, ka taliagofie ne taina i te fakapotopotoga a te fesoasoani mai toeaina māfai e iloa ne latou me e fe‵paki foki a toeaina mo fakalavelave mo mea faiga‵ta mo mea e manavase latou ki ei. (Loma 12:3; 1 Petelu 5:3) E pelā mo tama‵liki, ka maua i ei se fesokotakiga ‵lei, ka fakatau fesoasoani latou i fakatonutonuga faka-te-agaga kae ka maua i ei a fakamalosiga ki olotou fakatuanaki. Ke masaua la, e ma‵nako malosi eiloa a ‵tou taina mo tuagane ki fakamalosiga i taimi nei i lō taimi mua.​—2 Timoteo 3:1.

11. Kaia e ma‵nako ei a tino e tokouke i aso nei ki fakamalosiga?

¹¹ Faitalia te koga e ola ei tatou, ko tatou ne tino pefea, io me pefea te ‵tou ma‵tua, e fe‵paki eiloa tatou i nisi taimi mo fakalavelave i te olaga. Tenā eiloa te mea e tupu i te lalolagi i aso nei. (Fakaasiga 12:12) E tofotofo aka ne tulaga fakafanoanoa penei a te malosi o te ‵tou fakatuanaki. E mafai o ‵sae aka a tofotofoga i te galuega, i te akoga, i loto i te kāiga, io me i te fakapotopotoga. E mafai o māfua mai te mea tenā i se masaki lasi io me se masaki o te mafaufau i tausaga ko ‵teka. Se mea fakamafanafana māfai e fakamalosi atu mo te alofa a tau avaga, se toeaina io me se taugasoa ki a koe. E fai eiloa pelā me se sinu telā ne ‵mili ki luga i se pakiaga! Tela la, kafai e iloa ne koe me ko oko atu sou taina ki se tulaga penā, ke na fakamalosi atu ki a ia. Io me kafai e isi se fakalavelave fakapito e pokotia malosi koe i ei, ke ‵sala atu ki te fesoasoani o tino kolā ko ma‵tua ‵lei i te feitu faka-te-agaga.​—Iakopo 5:​14, 15.

Auala e Fesoasoani Atu ei te Fakapotopotoga

12. Ne a mea e mafai o fai ne tino taki tokotasi i te fakapotopotoga ke fakamalosi atu ei ki olotou taina?

¹² E mafai o fesoasoani atu a tino katoa i te fakapotopotoga, e aofia i ei a talavou, o fakamalosi atu ki nisi tino. E pelā mo te kau atu faeloa ki fakatasiga mo te galuega talai e fakamalosi aka ei te fakatuanaki o nisi tino. (Epelu 10:​24, 25) A tou tumau i te taviniga ‵malu se fakamaoniga tenā o tou alofa fakamaoni ki a Ieova kae e fakaasi atu foki i ei me ala faeloa koe i te feitu faka-te-agaga faitalia a fakalavelave e fepaki mo koe. (Efeso 6:18) E mafai o fakamalosi atu ki nisi tino a te mea tenā.​—Iakopo 2:18.

13. Kaia e mafai ei o sē ti ‵kau mai sāle a nisi tino, kae ne a mea e mafai o fai ke fesoasoani atu ei ki a latou?

¹³ I nisi taimi, ko fakavāivāi atu a fakalavelave o te olaga mo nisi mea aka io me fai ei ke sē kau atu koe ki te galuega talai. (Maleko 4:​18, 19) Kāti ko sē ‵kau mai sāle a tino vāi‵vāi ki fakatasiga. Kae kāti koi a‵lofa eiloa latou ki te Atua. Ne a mea e mafai o fai ke fakamalosi aka ei te lotou fakatuanaki? E mafai o fesoasoani atu a toeaina mo te a‵lofa mai te āsi atu ki a latou. (Galuega 20:35) E mafai foki o fakamolemole atu ki nisi tino i te fakapotopotoga ke fesoasoani atu. A vaegā āsiga penā e mafai o fai pelā me ko te vailakau tonu eiloa ke fakamalosi aka ei te fakatuanaki o tino vāi‵vāi.

14, 15. Se a te fakatakitakiga ne tuku mai ne Paulo e uiga ki te fakamalosiga o nisi tino? Ke fai mai se fakaakoakoga a se fakapotopotoga telā ne fakagalue ne ia te fakatakitakiga tenei.

¹⁴ E fakamalosi mai te Tusi Tapu ki a tatou ke “fakaloto malosi atu a tino matama‵taku [“loto mafatia” NW], o fesoasoani ki tino vāi‵vāi.” (1 Tesalonia 5:14) Kāti e iloa ne tino “loto mafatia” me ko gasolo ifo latou o vāi‵vāi kae ko sē mafai ne latou o fakafesagai atu ki fakalavelave e aunoa mo se fesoasoani. E mata, e mafai o fesoasoani atu koe? Ko oti ne ‵fuli aka a te tugāpati ko te, “fesoasoani atu ki tino vāi‵vāi” ki te “puke ‵mautakitaki” io me “‵piki ‵mau ki” tino vāi‵vāi. E fakatāua kae alofa a Ieova ki ana mamoe katoa. E se kilo atu a ia ki a latou e pelā me ne tino e foliki fua te lotou aogā, kae e se manako foki a ia ke tapeapea atu keatea se tokotasi o latou. E mata, e mafai o fesoasoani atu koe ki tino i te fakapotopotoga ke “puke ‵mautakitaki” ki tino kolā e vāi‵vāi faka-te-agaga ke oko ki te taimi ko toe ma‵losi ei latou?​—Epelu 2:1.

¹⁵ Ne āsi atu se toeaina ki se tauavaga kolā ne seki ‵kau atu sāle ki te fakapotopotoga i tausaga e ono. Ne tusi mai te toeaina: “A te atafai mo te a‵lofa telā ne fakaasi atu ne tino katoa i te fakapotopotoga ne aogā malosi ‵ki ke toe ‵foki mai a laua ki te lafu mamoe.” Ne a lagonaga o te tuagane telā ne vāivāi e uiga ki āsiga mai tino i te fakapotopotoga? Ne fai mai a ia: “A te mea telā ne fakamalosi mai ke toe ‵kau atu maua me e seki lavea aka loa ne maua i taina io me ko tuagane kolā ne āsi atu, se uiga takalialia io me fakatauemu ki a māua. I lō te fai penā, ne maua ne latou te loto malamalama kae tuku mai a fakamalosiga mai te Tusi Tapu.”

16. Ko oi e toka faeloa o fesoasoani atu ki tino kolā e ma‵nako ki fakamalosiga?

¹⁶ E tonu, e fiafia a te Kelisiano tonu ke fai a ia mo fai se fakamalosiga ki nisi tino. Kae e mafuli‵fuli a fakanofonofoga i ‵tou olaga, kae kāti ka manako koe ki faifaiga fakamalosi loto mai i ‵tou nisi taina. E ‵tau foki o malamalama tatou me i nisi taimi ka sē toka ‵tou taina o fesoasoani mai i te taimi telā e manako ei koe ki ei. Kae ui i ei, e tokotasi eiloa te Tino e toka faeloa o fakamalosi mai, ko te tino telā e fiafia faeloa o fesoasoani atu​—ko Ieova te Atua.​—Salamo 27:10.

Ieova​—te Pogai Sili o te Malosi

17, 18. Ne fakamalosi aka pefea ne Ieova a tena Tama ko Iesu Keliso?

¹⁷ I te taimi ne fakasataulo ei, ne tagi atu a Iesu: “Toku Tamana, ko tuku atu ne au toku agaga ki ou lima!” (Luka 23:46) Oti i ei, mate ei a ia. I te fia itula mai mua atu i ei, ne puke fakapagota a ia kae ne tiakina ne ana taugasoa ona ko te ma‵taku. (Mataio 26:56) Ne maua fua ne Iesu i ei a te malosi mai te Tino e tokotasi​—ko tena Tamana faka-te-lagi. Kae ne aogā eiloa tena talitonu ki a Ieova. Ne taui atu a te alofa fakamaoni o Iesu ki tena Tamana mai te ‵lago malosi atu o Ieova ki a ia.​—Salamo 18:25; Epelu 7:26.

¹⁸ I te galuega kātoa a Iesu i te lalolagi, ne tuku atu ne Ieova ki tena Tama a mea e ‵tau o maua ke tumau ei a ia i te fakamaoni ke oko ki tena mate. E pelā mo te taimi ne fatoa oti ei ne papatiso a Iesu, ko te taimi foki tenā ne kamata ei tena galuega, ne lagona ne ia te leo o tena Tamana e fakaasi mai ei tena taliaga kae fakamaoni mai foki i ei Tena alofa mō ia. I te taimi e manako ei Iesu ki se fesoasoani, e uga mai sāle ne Ieova a agelu ke fakamalosi atu ki a ia. I te taimi ne fepaki ei a Iesu mo ‵toe tofotofoga faigata i te fakaotiga o tena olaga i te lalolagi, ne lagona kae talia ne Ieova ana fakatagi. E tonu, ne fai katoa a mea konei pelā me ne fakamalosiga ki a Iesu.​—Maleko 1:​11, 13; Luka 22:43.

19, 20. E fakamautinoa aka pefea ne tatou me e fakamalosi ne Ieova tatou i te taimi e ma‵nako tatou ki ei?

¹⁹ E manako eiloa Ieova ke fai a ia e pelā me ko te Māfuaga sili o te ‵tou malosi. (2 Nofoaiga Tupu 16:9) A te Pogai Sili o malosi katoa e mafai o fakamalosi mai ki a tatou i taimi o ‵tou fakalavelave. (Isaia 40:26) E mafai o loto vāi‵vāi tatou ona ko taua, te mativa, masaki, te mate io me ko te ‵tou tulaga sē ‵lei katoatoa. Kafai ko ma‵losi ‵ki a tofotofoga i te olaga e pelā me se “fili malosi” o kautau, e mafai o fai a Ieova pelā me ko te ‵tou malosi. (Salamo 18:17; Esoto 15:2) E isi sena fesoasoani mafi mō tatou​—ko tena agaga tapu. E auala i tena agaga tapu, e mafai o “fakamalosi ne [Ieova] a latou kolā ko vāi‵vāi” ko te mea ke “eva latou i olotou kapakau e pelā me ne aeto.”​—Isaia 40:​29, 31.

²⁰ A te agaga o te Atua ko te toe malosi sili eiloa i te lagi mo te lalolagi. Ne fai mai a Paulo: “E mafai ne au o fai a mea katoa konā, ona ko te fakamalosi mai o Keliso ki a au.” E tonu, e mafai o tuku mai ne te ‵tou Tamana alofa i te lagi a “te malosi e sili atu i te malosi masani” ko te mea ke mafai ne tatou o kufaki a fakalavelave fakalogo‵mae katoa ke oko ki te taimi ko ‘faka‵fou ei a mea katoa’ i te Palataiso telā ko leva ne folafola mai ne ia, i se taimi pili mai nei.​—Filipi 4:13; 2 Kolinito 4:​7, NW; Fakaasiga 21:​4, 5.

[Fakamatalaga mai lalo]

E Masaua ne Koe?

• Ne fai pefea a taina i Loma e pelā me ne mea fakamalosi loto ki a Paulo?

• I auala fea e fai ei tatou e pelā me ne mea fakamalosi loto i te fakapotopotoga?

• E fai pefea a Ieova e pelā me ko te Pogai Sili o fakamalosiga e maua ne tatou?

[Ata i te itulau e 28]

Ne fai a taina e pelā me ne mea fakamalosi loto ki a Paulo mai te ‵lago atu mo te fakamaoni, olotou fakamalosiga, mo te faiga o ana galuega totino

[Ata i te itulau e 31]

E fai ne toeaina te takitakiga i te fakamalosiga o te lafu mamoe