Amutia a Latou Kolā e ‵Viki Atu ki te Atua

“E o‵mai katoa o ifo atu ki a koe. Ka tavae atu latou ki tou [“igoa,” NW] maluga.”​—Salamo 86:9.

1. Kaia e mafai ei o sili atu te auala e ‵viki atu ei tatou ki te Atua i lō ana mea ‵mate kolā ne faite?

E ‵TAU eiloa o maua ne Ieova te vikiga mai i ana mea katoa ne faite. Me mafai o avatu lēmū ne ana mea ‵mate ne faite ana vikiga, e mafai ne tatou, tino ola, o fakasako‵sako, malamalama, fakaasi atu te loto fakafetai, kae ke tapuaki atu foki. Tela la, e fakauiga eiloa ki a tatou a pati a te faisalamo: “Ke ka‵laga mo te fia‵fia tino katoa ki te Atua! Ke usu pese atu koutou ki te ‵malu o tena igoa; tuku atu ki a ia te vikiga.”​—Salamo 66:​1, 2.

2. Ko oi a tino ne tali atu ki te fakatonuga ke ‵viki atu ki te igoa o te Atua, kae kaia?

² E se fia iloa io me fia ‵viki atu a te tokoukega o tino ki te Atua. Kae i atufenua e 235, e silia atu i te ono miliona o Molimau a Ieova e fakaasi mai ne latou me e lavea ne latou a “uiga sē lavea” o te Atua e auala i ana mea ne faite kae ko oti ne “lagona” ne latou te molimau lēmū a mea konā. (Loma 1:20; Salamo 19:​2, 3) Mai te suke‵suke ki te Tusi Tapu, ko iloa kae a‵lofa foki latou ki a Ieova. E ‵valo mai te Salamo 86:​9, 10: “A fenua katoa kolā ne faite ne koe, e o‵mai katoa o ifo atu ki a koe. Ka tavae atu latou ki tou [“igoa,” NW] maluga. Ko koe ko te Atua Malosi; ko koe fua e fai ne koe a mea fakaofoofogina.”

3. I te auala fea e ‘tavini atu ei i te ao mo te po’ a te “vaitino tokouke”?

³ E penā foki a fakamatalaga i te Fakaasiga 7:​9, 15 e uiga ki te “vaitino tokouke” o tino tapuaki e “tavini atu ki [te Atua] i te ao mo te po i tona fale tapu.” E se fakauiga i ei me ne fakatonu mai a te Atua ke ‵viki atu faeloa ana tavini e aunoa mo te manava, kae ko ana tino tapuaki se fakapotopotoga i te lalolagi kātoa. Tela la,kafai ko po i nisi fenua, e fai eiloa ne tavini a te Atua i te suā feitu o te lalolagi a te galuega talai. Tela la, ko mafai ei o fai atu me sē mafai o tō te la ki tino kolā e avatu ne latou a vikiga ki a Ieova. Ko pili fua nei o ka‵laga atu a “mea ola katoa” o ‵viki atu ki a Ieova. (Salamo 150:6) Kae i te vaitaimi nei, ne a mea e mafai ne tatou taki tokotasi o fai ke ‵viki atu ei ki te Atua? Ne a mea faiga‵ta e mafai o fe‵paki mo tatou? Kae ne a fakamanuiaga ka maua ne tino kolā e ‵viki atu ki te Atua? Ke maua te tali, ke onoono tatou ki se tala i te Tusi Tapu e uiga ki te matakāiga e tasi o Isalaelu ko Kato.

Mea Faiga‵ta i Aso Mua

4. Ne a mea faiga‵ta ne fepaki mo te matakāiga o Kato?

⁴ Mai mua o ulu atu ki te Fenua o te Folafolaga, ne fakamolemole atu a tino Isalaelu i te matakāiga o Kato ke ‵nofo aka latou i te fenua e ola ‵lei ei a pulumakau i te feitu ki saegala o te Iolitana. (Numela 32:​1-5) E uke a mea fakama‵taku ne ‵tau o fakafesagai atu ki ei i se vaegā koga penā. Ne maua ne matakāiga i te feitu ki te togala se puipuiga mai te vaitafe ko te Iolitana​—mai kautau a nisi fenua. (Iosua 3:​13-17) Kae e pelā mo laukele i te feitu ki te saegala o te Iolitana, e fai mai The Historical Geography of the Holy Land, telā ne tusi ne George Adam Smith: “E lauefa kae laugatasi, e aunoa mo se puipuiga i te kogā laukele e igoa ki te Arabian plateau. Tela la, e tuku faka‵sau atu faeloa i taimi katoa ki tino maumausolo kae ‵fao mea, kolā e taua atu faeloa i tausaga katoa ke puke ne latou a laukele ola ‵lei.”

5. Ne fakamalosi atu pefea a Iakopo ki tino i te matakāiga o Kato māfai ko taua atu a tino ki a latou?

⁵ Ne fakafesagai atu pefea a te matakāiga o Kato ki mea faiga‵ta konā? I te fia senitenali mai mua atu i ei, ne ‵valo mai a te lotou tupuga ko Iakopo kae ko pili i ei o mate: “A tino kaisoa ka o‵mai o faitaua ki a Kato, kae ka afuli latou ne Kato.” (Kenese 49:19) Kāti ne foliga mai a pati konā i te taimi muamua me e se ‵lei. Kae ko te tonuga loa, a pati konā se fakatonuga ne tuku atu ki tino i te matakāiga o Kato ke taua atu ki a latou. Ne fakamaoni atu a Iakopo ki a latou, me kafai e fai latou penā, ka ‵tele ei a tino fai taua mo te masiasi, kae ka tau‵tali atu latou i olotou tua o afuli keatea.

‵Tekemaiga ki ‵Tou Tapuakiga i Aso Nei

6, 7. E ‵pau pefea te tulaga o Kelisiano i aso nei mo te matakāiga o Kato?

⁶ E pelā mo te matakāiga o Kato, e tuku faka‵sau atu a Kelisiano i aso nei ki tofotofoga mo fakalavelave mai te lalolagi a Satani; kae ka seai se puipuiga fakavavega ka maua i te ‵tou fakafesagai atu ki a latou. (Iopu 1:​10-12) E ‵tau o kufaki tatou i fakalavelave e fe‵paki mo tatou i te akoga, i te tausiga o te olaga mo te putiakega o tama‵liki. Kae ke sē puli foki i a tatou a fakalavelave totino. Kāti e ‵tau o kufaki a nisi tino i mea kolā e ‘logo‵mae ei te foitino’ kāti ko te sē katoatoa o te foitino io me se masaki aveave ‵loa. (2 Kolinito 12:​7-10) Nisi tino e logo‵mae ona ko lagonaga i a latou e se taulia. E mafai ne te tulaga “toeaina” o fakalavelave atu ki te taviniga a se Kelisiano ki a Ieova ke sē pelā mo aso mua.​—Failauga 12:1.

⁷ E fakamasaua mai foki te apositolo ko Paulo me “i a tatou e . . . taua mo malosi ma‵sei faka te tiapolo i te lagi.” (Efeso 6:12) E tuku faka‵sau atu faeloa tatou ki te “agaga o te lalolagi,” ko te uiga ‵teke mo amioga ma‵sei kolā e fakamalosi aka ne Satani mo ana temoni. (1 Kolinito 2:12; Efeso 2:​2, 3) E pelā mo Lota telā ne mataku ki te Atua, e mafai foki o loto vāi‵vāi tatou i aso nei ona ko amioga ma‵sei kolā e fai ne tino i ‵tou tafa. (2 Petelu 2:7) E tuku faka‵sau atu foki tatou ki taua a Satani. E taua tonu atu eiloa a Satani ki te toega o te kau fakaekegina “kolā e faka‵logo ki fakatonuga a te Atua, kae fakamaoni foki ki te mea tonu e fakaasi mai ne Iesu.” (Fakaasiga 12:17) E fe‵paki foki a ‘nisi mamoe’ a Iesu mo ‵tekemaiga a Satani e auala i te fakatapuga o te galuega mo fakasauāga.​—Ioane 10:16.

Kau Atu io me Taua Atu?

8. E ‵tau o ‵kilo atu pefea tatou ki ‵tekemaiga a Satani, kae kaia?

⁸ Se a te ‵tou mea e ‵tau o fai atu ki ‵tekemaiga a Satani? E pelā mo te matakāiga o Kato, e ‵tau o malosi ‵lei tatou i te feitu faka-te-agaga kae taua atu e ‵tusa mo fakatonuga a te Atua. Se mea fakafanoanoa me ko oti ne kamata o taka‵vale a nisi tino ona ko fakalavelave o te olaga, kae ko sē ‵saga atu ki olotou tiute faka-te-agaga. (Mataio 13:​20-22) Ne fai mai se Molimau e uiga ki te pogai ko sē tokouke ei a tino e ‵kau atu ki fakatasiga a te lotou fakapotopotoga: “Ko te fi‵ta fua o taina. Ko tuku eiloa ki togi te lotou fi‵ta.” E tonu, e uke a pogai e fi‵ta ei a tino e tokouke i aso nei. Tela la, e faigofie fua ke ‵kilo atu ki te tapuakiga a te Atua e pelā me se mea fakafi‵ta, se amoga ‵mafa. Kae e mata, a te kilokiloga tenā e ‵lei​—io me tonu?

9. E maua pefea ne tatou te malologa māfai e fakaaogā ne tatou te amo a Keliso?

⁹ Ke mafaufau ki pati a Iesu ki tino i ona aso kolā ne mafatia foki i fakalavelave o te olaga: “O‵mai ki a au a koutou katoa kolā e fi‵ta i te ‵mafa otou amoga, me ka avatu ne au ki a koutou a te malologa.” E mata, ne fai atu a Iesu me ka maua ne se tino a te malologa māfai ko fakavāivāi a ia i tena taviniga ki te Atua? Ikai, ne fai mai a Iesu: “Ke amo ne koutou taku amoga, kae fakaakoako mai ki a au, me i a au e filemu kae loto malalo; e maua foki i ei ne koutou a te tokaga malie otou agaga.” A te amo se lakau io me se fiti telā e fai i ei ke mafai ne se tino io me se manu o amo se amoga ‵mafa. Kaia la e ‵tau ei o talia ne se tino se vaegā amo penā? Ko leva tatou ne “fi‵ta i te ‵mafa” o ‵tou amoga, i ne? Ao, kae e mafai foki o faitau penei te fuaiupu tenei i te ‵gana Eleni: “Vau ke amo fakatasi taua.” Ke mafaufau la: e ofo mai a Iesu ke fesoasoani mai a ia i te ‵futiga o ‵tou amoga! E se ‵tau o fai ne tatou te mea tenā i ‵tou malosi eiloa.​—Mataio 9:36; 11:​28, 29; 2 Kolinito 4:7.

10. Ne a mea e iku mai i ‵tou taumafaiga ke ‵viki atu ki te Atua?

¹⁰ Kafai ko talia ne tatou a te amo ke fai pelā me se soko o Iesu, ko taua atu ei tatou ki a Satani. E folafola mai te Iakopo 4:7: “‵Teke atu te Tiapolo, ko sola ei a ia keatea mai i a koutou.” E se fakauiga i ei me e faigofie fua te faiga o te mea tenā. A te tavini atu ki te Atua e aofia i ei a taumafaiga e uke. (Luka 13:24) Kae e folafola mai a te Tusi Tapu i te Salamo 126:5: “A latou kolā ne ‵toki lakau kae tagi, ka tau ne latou te taukai mo te fiafia!” E tonu, e se tapuaki atu tatou ki se Atua sē loto fakafetai. E “tuku atu foki ne ia te taui ‵lei ki tino kolā e salasala ki a ia,” kae fakamanuia ne ia a tino kolā e ‵viki atu ki a ia.​—Epelu 11:6.

Te Tukuatuga o ‵Vikiga ki te Atua e Pelā me ne Tino Talai o te Malo

11. E fai pefea a te galuega talai e pelā me se puipuiga ki ‵tekemaiga a Satani?

¹¹ Ne fakatonu mai a Iesu: “Olo atu koutou ki fenua katoa ke fai a tino i ei mo oku soko.” A te galuega talai ko te ‵toe auala tāua ke avatu ei ki te Atua ‘se taulaga o tavaega.’ (Mataio 28:19; Epelu 13:15) A te fakatokaga o ‵tou ‘vae ke takutaku atu ei te tala ‵lei o te filemu’ se vaega telā e ‵tau o aofia i ‵tou ‘gatu tau’​—ko te puipuiga tenā ki ‵tekemaiga a Satani. (Efeso 6:​11-15) A te avatuga o vikiga ki te Atua i te galuega talai ko te ‵toe auala ‵lei ke fagai i ei te ‵tou fakatuanaki. (2 Kolinito 4:13) E fesoasoani mai i ei ke sē mafau‵fau tatou ki mea sē aogā. (Filipi 4:8) E maua foki ne tatou i te galuega talai te avanoaga ke maua se fesokotakiga aogā mo ‵tou taina tali‵tonu.

12, 13. E maua pefea ne kāiga a mea aogā mai te ‵kau atu faeloa ki te galuega talai? Fakamatala mai.

¹² E fai foki a te galuega talai e pelā me se mea aogā mō se kāiga kātoa. E tonu, e ‵tau o fakapaleni aka ne talavou olotou fakafiafiaga. Kae, ko te ‵kau atu e pelā me se kāiga ki te galuega talai e se ‵tau o fai pelā me se mea faka‵pafu tino. E mafai ne mātua o fai te mea tenā e pelā me se mea fakafiafia māfai e akoako ne latou olotou tama‵liki ke magoi te lotou galuega. E mata, ka sē fia‵fia a tama‵liki ki olotou galuega kolā ne fai faka‵lei? I te fakaasiatuga o se kilokiloga paleni, i lō te faimālō atu o tama‵liki, e fesoasoani atu eiloa a mātua ke maua ne latou te fiafia tonu ki te galuega talai.​—Kenese 33:​13, 14.

¹³ E se gata i ei, a te kāiga telā e ‵viki fakatasi atu ki te Atua, e ati aka ne latou i ei se va fealofani. Ke mafau‵fau ki se tuagane telā ne tiakina ne tena avaga sē talitonu ke ‵nofo mo la tama‵liki e tokolima. Ne ‵tau o ‵sala ne ia sena galuega ke tausi atu i ei ki ana tama‵liki. E mata, ne tō fi‵ta a ia kae sē fia saga atu ki manakoga faka-te-agaga o ana tama‵liki? Ana muna: “Ne sukesuke faka‵lei au ki te Tusi Tapu mo tusi faka-te-Tusi tapu kae taumafai o fakagalue aka a mea ne faitau ne au. Ne ave faeloa ne au a tama‵liki ki fakatasiga e pelā foki mo te galuega talai. Ne a ikuga o aku taumafaiga? Ko oti nei ne papatiso katoa aku tama‵liki e tokolima.” A te kau atu faeloa ki te galuega talai e mafai foki o fesoasoani atu ki au taumafaiga ke puti ake au tama‵liki “i te olaga ‵lei mo akoakoga faka-Kelisiano.”​—Efeso 6:4.

14. (a) E ‵viki atu pefea a tama‵liki ki te Atua i te akoga? (e) Se a te mea e mafai o fesoasoani atu ki talavou ke sē “‵mā i te tala ‵lei”?

¹⁴ Tama‵liki, kafai e ola koutou i se fenua telā e saoloto i ei te galuega talai, e mata, e ‵viki atu koe ki te Atua mai te talai atu i te akoga, io me talia ne koe te mataku ki tino ke sē fai penā? (Faataoto 29:25) Ne tusi mai se Molimau telā ko 13 ana tausaga mai Puerto Rico: “Ne seki mā lele eiloa au o talai atu i te akoga me iloa ne au me tenei eiloa te munatonu. E masani o sisi sāle toku lima i te faleakoga kae fakamatala atu a mea kolā ne tauloto ne au mai te Tusi Tapu. Kafai e isi ne oku taimi avanoa, e fanatu au ki te fale tusi, kae faitau ki te tusi ko te Young People Ask.”a E mata, ko oti ne fakamanuia atu Ieova ki ana taumafaiga? E fai mai tou fafine: “I nisi taimi e fesili mai a tama‵liki i toku vasega kae fakamolemole mai foki ke maua ne olotou tusi.” Kafai e seki fai ne koe te mea tenei, kāti e manakogina ke fakamaoni aka ne koe ki a koe eiloa “me se a te loto o te Atua, te mea ‵lei, te mea e logomalie mo te gali” mai te faiga o sukesukega totino. (Loma 12:2) Kafai ko talitonu koe me i mea ne tauloto ne koe ko te munatonu eiloa, ka sē ‘mā eiloa koe i te tala ‵lei.’​—Loma 1:16.

Se “Avanoaga” ke Tavini Atu

15, 16. Ne a ‘avanoaga e uke mō te galuega’ ko oti ne maua ne nisi Kelisiano, kae ne a fakamanuiaga ko oti ne maua ne latou?

¹⁵ Ne tusi mai te apositolo ko Paulo me ko “uke avanoaga konei mō te galuega” ke fai ne ia. (1 Kolinito 16:9) E mata, e ‵lei ou fakanofonofoga ke fakaaogā ne koe avanoaga konā? A te fai pelā me se paenia tumau io me se paenia lagolago e aofia i ei te fakamāumāuga o itula e 70 io me 50 i te masina i te galuega talai. E pelā mo te masani, e fakatāua malosi ne taina Kelisiano a paenia ona ko te lotou taviniga. Kae ko te uke atu o olotou taimi e fakamāumāu ki te galuega talai e se fai i ei ke fia ma‵luga atu latou i olotou taina mo tuagane. I lō te fai penā, e fakamalosi aka ne latou te uiga ne fai mai ne Iesu: “A matou nei ne tavini sē aogā; ne fai fua ne matou te motou tiute.”​—Luka 17:10.

¹⁶ A te paenia e manakogina i ei a te loto pulea, te faiga o fakatokaga totino, mo te taliaga o mea faiga‵ta. Kae ka maua eiloa mai i ei a fakamanuiaga. “A te mafai ne koe o akoako tonu atu a te munatonu mai te Muna a te Atua se tinā fakamanuiaga eiloa,” ko pati a te paenia talavou ko Tamika. “Kafai koe e paenia e uke a taimi e fakaaogā ei ne koe te Tusi Tapu. Tela la, kafai e fanatu au mai fale ki fale ko mafai o masaua ne au a tusi siki kolā e fetaui ‵tonu mo te tino i te fale.” (2 Timoteo 2:15) Ne fai mai te paenia ko Mica: “A te kilo atu ki te auala e aogā ei te munatonu ki olaga o nisi tino se matugā fakamanuiaga lasi foki.” Ne fai mai te talavou ko Mataio e uiga ki te fiafia e maua māfai e “lavea atu se tino ko kau mai ki te munatonu. E seai eiloa se isi fiafia e mafai o sui ki ei te fiafia tenei.”

17. Ne manumalo pefea se Kelisiano i mafaufauga sē aogā e uiga ki te fai pelā me se paenia?

¹⁷ E mata, ko oti ne mafaufau koe ke paenia? Kāti e manako koe ke fai penā, kae e manatu aka koe me sē lava tou iloa. “Ne ma‵sei faeloa oku mafaufauga e uiga ki te fai pelā me se paenia,” ko pati a se tuagane talavou ko Kenyatte. “Ne seki talitonu au me ko lava toku poto. Ne seki iloa ne au o fai aku pati fakatomua io me fakasakosako atu mai te Tusi Tapu.” Kae ne tofi aka ne toeaina se tuagane paenia telā ko matua ‵lei ke ga‵lue mo ia. “Ne gali ‵ki ke ga‵lue fakatasi mo ia,” ko pati a Kenyatte. “Ne fai i ei ke fia paenia au.” Kafai e maua ne koe a fakamalosiga mo fakamasaniga pena, kāti ka fia paenia foki koe.

18. Ne a fakamanuiaga e mafai o maua ne tino kolā e ga‵lue pelā me ne misionale?

¹⁸ Kāti e mafai o ma‵tala mai a nisi tauliaga ki tino kolā e ga‵lue fakapaenia. E pelā mo nisi taki tauavaga, kāti e mafai o ‵kau atu latou ki te akoga mō misionale ko te mea ke olo atu ki nisi fenua o talai i ei. E ‵tau o fakamasani a misionale ki te olaga i te fenua fou tenā, kāti e ‵tau o tauloto ki se ‵gana fou, tu mo aganuu fou, mo meakai fou. Kae ko fakamanuiaga kolā ka maua mai i ei e fai ei a mea konā e pelā me ne tamā mea fua. Ne fai mai a Mildred se misionale apo i Mekisiko: “Ne seki salamo lele eiloa au i taku fakaikuga ne fai ke fai au pelā me se misionale. Se manakoga telā ne nofo faeloa mo au talu te taimi koi foliki ei au.” Ne a fakamanuiaga ko oti ne maua ne ia? “Ne faigatā ‵ki ke maua se akoga faka-te-Tusi Tapu i toku fenua. Kae i konei, ko oti ne oko au ki te tokofa o aku akoga faka-te-Tusi Tapu ne kamata o ‵kau atu ki te galuega talai i te taimi eiloa e tasi!”

19, 20. Ne tuku atu pefea ne te taviniga i te Peteli, galuega fakatu‵tu i te lalolagi kātoa, mo te Akoga Fakamasani mō Tavini Fakafaifeau a fakamanuiaga ki tino e tokouke?

¹⁹ E uke foki a fakamanuiaga e maua ne latou kolā e ga‵lue i Peteli i ofisa lagolago o Molimau a Ieova. Ne fai mai a Sven se taina talavou telā e galue i Siamani, e uiga ki tena galuega i te Peteli: “E maua ne au te lagonaga me e tumau te aogā o galuega e fai ne au. Ne mafai o fakaaogā ne au toku atamai i te lalolagi. Kae e fai fua pelā me faulu atu ne au a tupe ki te pagike telā ko pili o ‵kiva kae mate foki.” E tonu, a te tavini atu e aunoa mo te mauaga o se peofuga e aofia i ei a mea faiga‵ta. Kae ne fai mai a Sven: “Kafai e foki atu koe ki te fale, e iloa ne koe me i au mea katoa ne fai i te aso tenā ne fai katoa mō Ieova. Kae e maua i ei ne koe se lagonaga fiafia ‵ki.”

²⁰ Ko oti ne maua ne nisi taina a fakamanuiaga i te ga‵lue i galuega fakatu‵tu i te lalolagi kātoa mo te faka‵tuga o ofisa lagolago i nisi fenua. Ne tusi mai se tauavaga kolā ne ga‵lue i fenua kese‵kese e valu, penei: “Ko oko loa te ‵gali o taina i konei. Se mea fakafanoanoa māfai ko ‵tau o tiakina atu latou​—tenei te valu o taimi ne fati‵fati ei o ma loto. Ko tafaga te gali o te mea ne maua ne maua!” Kae e isi foki se Akoga Fakamasani mō Tavini Fakafaifeau. E tuku atu i ei a akoakoga faka-te-agaga ki taina kolā e seki a‵vaga. Ne tusi mai se tino ne akoga i ei: “E se iloa ne au me ne a aku pati ka fai ke fakafetai atu ei mō te gali o te akoga tenei. E maua foki la i fea se isi fakapotopotoga telā e taumafai malosi o tuku mai a vaegā akoakoga penei?”

21. Ne a mea faiga‵ta e fepaki mo Kelisiano katoa i te lotou taviniga ki te Atua?

²¹ E tonu, e uke a avanoaga o galuega e ma‵tala nei. E tonu, e se mafai o tavini atu a te tokoukega o tatou i Peteli io me i nisi fenua. Ne fakailoa mai ne Iesu me ka ‵fua mai ne Kelisiano a “fuaga” kese‵kese ona ko te kese‵kese o olotou fakanofonofoga. (Mataio 13:23) Tela la, e pelā me ne Kelisiano, e ‵tau o fakaaogā ke magoi te tulaga ko ‵nofo tatou i ei​—ke fai te ‵toe mea e mafai o fai i te taviniga ki a Ieova. Kafai e fai tatou penā, ko avatu eiloa ne tatou i ei a vikiga ki a Ieova, kae e mautinoa eiloa me ka fiafia malosi a ia ki ei. Ke mafau‵fau ki a Ethel, se tuagane matua telā ko nofo i te fale e tausi ei a tino ma‵tua. E talai atu faeloa a ia ki tino kolā e ‵nofo tasi mo ia kae talai atu foki i telefoni. Faitalia te tulaga ko oko atu a ia ki ei, e tavini atu a ia mo te loto kātoa.​—Mataio 22:37.

22. (a) Ne a nisi auala e mafai ei o ‵viki atu tatou ki te Atua? (e) Se a te taimi gali telā ka maua ne tatou i aso mai mua?

²² Ke masaua la me i te galuega talai ko te auala fua e tasi ke ‵viki atu ei ki a Ieova. Kafai e fakaasi atu foki ne tatou se fakaakoakoga ‵lei i ‵tou amioga mo teuga i te galuega, i te akoga io me i te fale, ko fakafiafia atu eiloa ne tatou te loto o Ieova. (Faataoto 27:11) E folafola mai te Faataoto 28:20: “A tino fakamaoni e maua ne latou se olaga gali kae fiafia.” Tela la, e ‵tau mo tatou o ‘‵toki ke uke a fuaga’ i ‵tou taviniga ki te Atua, mo te iloa me ka uke foki a fakamanuiaga e maua ne tatou. (2 Kolinito 9:6) Mai te faiga penā, ka maua eiloa ne tatou se tauliaga gali ke ola i te taimi gali telā ka tuku atu ei ne “mea ola katoa” ki a Ieova a te vikiga telā e ‵tau eiloa o maua ne ia!​—Salamo 150:6.

[Fakamatalaga mai lalo]

E Masaua ne Koe?

• E tavini atu pefea a tino o te Atua ki a Ieova “i te ao mo te po”?

• Ne a mea faiga‵ta ne fepaki mo te matakāiga o Kato, kae se a te akoakoga e maua mai i ei mō Kelisiano i aso nei?

• E fai pefea te galuega talai mo fai se puipuiga ki ‵tekemaiga a Satani?

• Ne a “avanoaga” ko oti ne maua ne nisi tino, kae ne a fakamanuiaga ne maua ne latou?

[Ata i te itulau e 31]

E maua ne tatou a fesokotakiga aogā i te galuega talai