E Fi‵ta Kae sē ‵Fiu

“A [Ieova] te Aliki ko te Atua . . . ne faite ne ia a te lalolagi kātoa. . . . E fakamalosi ne ia a latou kolā ko vāivāi kae fi‵ta.”​—ISAIA 40:​28, 29.

1, 2. (a) Se a te ‵kamiga gali e maua ne tino katoa kolā e fia fai ne latou te tapuakiga tonu? (e) Se a te mea fakamataku e mafai o oko mai ki a tatou i te feitu faka-te-agaga?

E PELĀ me ne soko o Iesu, e masani ‵lei tatou mo tena ‵kamiga gali tenei: “O‵mai ki a au koutou katoa kolā e fi‵ta i te ‵mafa otou amoga, me ka avatu ne au ki a koutou a te malologa. . . . Me amogofie taku amoga, kae māmā foki.” (Mataio 11:​28-30) E tuku atu foki ki Kelisiano a “tausaga o te filemu io me ko te tokagamalie mai . . . te Aliki.” (Galuega 3:​19, Tusi Paia, Samoa) Kāti ko oti eiloa ne lavea ne koe a fakamalosiga mai i au sukesukega ki muna‵tonu mai te Tusi Tapu, te fakamoemoega gali mō aso mai mua, mo te fakagaluegāga o fakatakitakiga a Ieova i tou olaga.

² Kae e fe‵paki eiloa a nisi tino tapuaki a Ieova mo te fi‵ta o te mafaufau i nisi taimi. E mafai o oko mai a faka‵tukaga penā i se taimi toetoe fua. Kae i nisi taimi e tumau eiloa i se taimi leva. Kāti ka mafau‵fau ifo a nisi Kelisiano me ko fai olotou tiute faka-Kelisiano e pelā me se amoga ‵mafa i lō te fai pelā me ne amoga fakamalosi tino e ‵tusa mo te folafolaga a Iesu. E mafai o fakamataku a vaegā mafaufauga sē aogā penā ki te va ‵lei o se Kelisiano mo Ieova.

3. Kaia ne tuku mai ei ne Iesu a pati polopoloki i te Ioane 14:1?

³ Mai mua malie o tena puke fakapagota mo tena tamate, ne fai atu a Iesu ki ana soko: “Sa manava‵se koutou. Fakatuanaki ki te Atua, kae fakatuanaki mai foki ki a au.” (Ioane 14:1) Ne fai atu ne Iesu a pati konei me ko pili fua o fe‵paki ana soko mo fakalavelave faiga‵ta. Kae ka ‵soko atu ki ei ko fakasauaga matagā i koga katoa. Ne iloa ne Iesu me e mafai o pa‵ku ana apositolo ona ko te lasi o te loto vāivāi. (Ioane 16:1) Kafai e se pule atu ki ei, e mafai eiloa o sinā fakavāivāi atu a lagonaga fakafanoa‵noa penā ki te lotou tulaga faka-te-agaga kae fai ei ke galo i a latou te lotou tali‵tonu ki a Ieova. E penā foki eiloa a Kelisiano ‵tonu i aso nei. E mafai o logo‵mae tatou ona ko faka‵tukaga kolā e maua ne tatou i se taimi leva, kae fai i ei ke loto vāivāi tatou. (Ielemia 8:18) Ona ko tofotofoga konei, e mafai o ‵mate ‵tou lagonaga io me ko ‵tou tulaga faka-te-agaga, ke oko ki te galo o te ‵tou fia tapuaki atu ki a Ieova.

4. Se a te mea e fesoasoani mai ke puipui ei ‵tou loto ke sē fi‵ta malosi?

⁴ E fetaui tonu a te fautuaga tenei mai te Tusi Tapu: “Fakaeteete ki mea e mafaufau koe ki ei me i tou ola e faite ne tou mafaufau io me ko tou loto.” (Faataoto 4:23) E tuku mai i te Tusi Tapu a fautuaga aogā i te fesoasoani mai ke puipui i ei a ‵tou loto mai faka‵tukaga mo te fi‵ta i te feitu faka-te-agaga. Muamua la, e ‵tau o malamalama tatou i te pogai ko vāivāi ei tatou.

E se Fakafi‵ta Malosi a te Lotu Kelisiano

5. Se a te mea e foliga mai me e ‵kese e uiga ki te lotu Kelisiano?

⁵ E tonu, e manakogina a taumafaiga e uke i te fai o se tino e pelā me se Kelisiano. (Luka 13:24) Ne fai mai foki a Iesu: “A ia telā e se amo tena sataulo, kae sē tautali mai i a au, e se mafai o fai a ia mo oku soko.” (Luka 14:27) I te taimi muamua, kāti ka mafaufau koe me e se fetaui ana pati konei mo ana pati e uiga ki tena amoga telā e māmā kae fakamalosi tino, kae ko te tonuga loa e fetaui ‵lei eiloa a pati konei.

6, 7. Kaia e mafai ei o fai atu me e se fakafi‵ta mai a te ‵tou tapuakiga ki a tatou?

⁶ E ui eiloa e mafai o fakafi‵ta a te galue ‵mafa i te feitu faka-te-foitino, e maua eiloa te lotomalie mo te malosi fou māfai e fai te galuega tenā mō se pogai ‵lei. (Failauga 3:​13, 22) Kae isi aka foki se isi pogai e ‵lei atu i lō te folafolaatuga o muna‵tonu gali mai te Tusi Tapu ki ‵tou tuakoi? E se gata i ei, e mafai foki o sē aogā a ‵tou taumafaiga ke tumau i amioga ‵ma o te Atua māfai e faka‵tusa ki mea aogā e uke kolā e maua ne tatou mai i ei. (Faataoto 2:​10-20) Kafai foki ko fakasauāgina, e ‵kilo atu eiloa tatou ki ei e pelā me se tauliaga ke logo‵mae mō te Malo o te Atua.​—1 Petelu 4:14.

⁷ E maua eiloa te malosi fou i te amoga a Iesu māfai e fakatusa ki te pouliga i te feitu faka-te-agaga telā e amo ne tino kolā koi ‵nofo mai lalo i te amoga a lotu ‵se. E alofa atafai a Ieova ki a tatou kae sē tō ‵mafa ana fakatonuga e tuku mai ki a tatou. E se ‘na ‵mafa a fakatonuga’ a Ieova. (1 Ioane 5:3) E pelā mo te mea e fakaasi mai i te Tusi Tapu, a te lotu Kelisiano tonu e se fakafi‵ta malosi. E manino ‵lei me e se fakafi‵ta io me faka‵tuka mai a te ‵tou tapuakiga ki a tatou.

“Ke Tiakina ne Tatou a Mea ‵Mafa Katoa”

8. Se a te mafuaga o te fi‵ta i te feitu faka-te-agaga i taimi e uke?

⁸ A fakafi‵taga katoa i te feitu faka-te-agaga kolā e fepaki mo tatou ne mea ‵mafa katoa kolā ko fakaopoopo mai i te olaga masei tenei. Ona “ko te lalolagi katoa ko i lalo i te pule a te Tino Masei,” e sikomia eiloa tatou ne amioga sē ‵lei kolā e mafai o fakavāivāi mai ki te ‵tou paleni ‵lei faka-Kelisiano. (1 Ioane 5:19) E mafai o fakalavelave mai a mea kolā e se aogā malosi ki ‵tou faifaiga faka-Kelisiano masani. E mafai o fakafi‵ta mai a fakalavelave fakaopoopo konei ke oko ki te mauaga o te loto māfatia. Tenā eiloa te pogai e fakamalosi mai ei te Tusi Tapu “ke tiakina ne tatou a mea ‵mafa katoa.”​—Epelu 12:​1-3.

9. E fi‵ta pefea tatou i te ‵sala atu ki mea faka-te-foitino?

⁹ E pelā mo te ‵sala atu faeloa o te lalolagi ki tulaga lauiloa, tupe, fakafiafiaga, te faima‵laga fua o ta‵fao mo nisi manakoga faka-te-foitino e mafai o tosina atu tatou ki ei. (1 Ioane 2:​15-17) Ne faka‵numi valevale ne nisi Kelisiano i te senitenali muamua a olotou olaga ona ko te fia maumea. E fakamatala mai te apositolo ko Paulo: “Ka ko tino kolā e ma‵nako ke maumea latou, ko pa‵ku atu latou ki te fakaosoosoga, ka ko maleigina foki latou ne te uke o manatu va‵lea mo manako ma‵sei, kolā e ‵futi ne latou ki lalo o fakamasei kae fakamalepe valevale. Me i te manako ki tupe, ko te mafuaga tenā o mea ma‵sei katoa. A nisi tino ko oko eiloa i te ma‵nako ke maua ne latou, ka ko olo foki keatea mai te fakatuanaki, ka ko fatifati nei olotou loto i puapuagā e uke.”​—1 Timoteo 6:​9, 10.

10. Se a te mea e tauloto ne tatou e uiga ki te fia maumea mai te tala fakatusa a Iesu e uiga ki te tagata toki saito?

¹⁰ Kafai ko fi‵ta kae loto vāivāi tatou i ‵tou taviniga ki te Atua, e mata, e fai penā ona ko tekeia a ‵tou tulaga faka-te-agaga ne ‵tou manakoga faka-te-foitino? E mafai eiloa o tonu te manatu tenei, e pelā mo te mea e fakaasi mai i te tala fakatusa a Iesu e uiga ki te tino ‵toki saito. Ne fakatusa ne Iesu a te “manavase ki mea o te olaga nei mo te fia‵fia ki koloa mo te kaimanako ki nisi mea” ki lakau makai‵kai kolā e fai ke “ola saitia ei te muna [a te Atua] ka ko sē fua mai” i ‵tou loto. (Maleko 4:​18, 19) Tela la, e polopoloki mai te Tusi Tapu: “Ke faka‵mao koutou mai te matatupe, kae loto ma‵lie ki mea ko maua ne koutou. Me ne muna mai te Atua, ‘E se tiakina lele eiloa ne au koutou, e se tuku tiaki lele eiloa ne au a koutou.’ ”​—Epelu 13:5.

11. E mafai pefea o fakaseai ne tatou a mea kolā e sōna faka‵mafa mai ki a tatou?

¹¹ I nisi taimi, a mea kolā e fakalavelave mai ki ‵tou olaga e se ko te ‵sala atu ki mea e uke kae ko ‵tou mea e fai ki mea kolā ko maua ne tatou. Kāti e loto mafatia a nisi tino ona ko masaki, te ‵galo atu o kāiga pele, io me ko nisi fakalavelave aka. Ko oti ne lavea ne latou a te manakoga ke fai ne fakamafuliga ki olotou olaga i nisi taimi. Ne taofi ne se tauavaga a te faiga o mea masani kolā ne fia‵fia sāle laua ki ei mo galuega totino kolā e se tāua. Ne iloilo faka‵lei ne laua a la kope katoa kae ‵tuki katoa ki pokisi a mea katoa konā kae tuku fakaatea. E mafai eiloa o aogā ki a tatou a te iloiloga o mea masani kolā e fia‵fia tatou ki ei mo ‵tou kope i taimi katoa, kae ave keatea a mea katoa kolā e sōna faka‵mafa mai ko te mea ke sē fi‵ta tatou.

Te Tāua o te Loto Malamalama mo te Agamalū

12. Se a te mea e ‵tau o lavea ne tatou e uiga ki ‵tou tamā mea ‵se?

¹² E mafai o fakalavelave malielie mai ki ‵tou olaga a ‵tou tamā mea ‵se e fai. E pefea te ‵tonu o pati a Tavita: “Au ko malemu i te lofiaga o aku agasala; se amoga ‵mafa, ko sē mafai ne au o amo.” (Salamo 38:4) A te faiga o tamā fakamafuliga e masani o fakafeoloolo aka ei a ‵tou amoga ‵mafa.

13. E fesoasoani mai pefea te loto malamalama ke maua ne tatou se kilokiloga paleni ki te faiga o te galuega talai?

¹³ E fakamalosi mai te Tusi Tapu ke ati aka “tou poto mo tou atamai.” (Faataoto 3:​21, 22) E fai mai te Tusi Tapu me i “te poto mai te lagi . . . e maliegofie io me loto malamalama.” (Iakopo 3:17) Ko oti ne fi‵ta a nisi tino i olotou taumafaiga ke ‵pau olotou mea e fai mo nisi tino i te galuega faka-Kelisiano. Kae e polopoloki mai te Tusi Tapu: “E ‵tau mo te tino o fakamasino ifo eiloa ki ana galuega ne fai. Kafai e ‵lei ko ‵tau mo ia o fakamatamata ki ei, kae sa fakatusatusa fua ki mea a te suā tino ne fai. I te mea e ‵tau eiloa mo te tino o amo tena amoga.” (Kalatia 6:​4, 5) E tonu, e fakamalosi mai a fakaakoakoga ‵lei a taina Kelisiano ke tavini atu tatou ki a Ieova mo te loto kātoa, kae e fesoasoani mai a te fakaaogāga o ‵tou poto mo te loto malamalama ke kausaki atu ki fakamoemoega kolā e fetaui ‵lei mo ‵tou fakanofonofoga.

14, 15. E fakaasi atu pefea ne tatou te poto i te tausi atu ki ‵tou manakoga faka-te-foitino mo lagonaga?

¹⁴ A te loto malamalama i nisi mea kolā e foliga mai me e se tāua malosi e mafai o fesoasoani mai ke sē fi‵ta tatou. E mata, e ati aka ne tatou a mea kolā e aogā ki te ‵tou malosi ‵lei faka-te-foitino? Ke mafaufau ki te fakaakoakoga a se tauavaga kolā ne ga‵lue i se ofisa lagolago o Molimau a Ieova. Ne lavea ne laua te aogā o te fakaaogāga o te poto ke sē fi‵ta laua. Ne fai mai a te fafine: “Faitalia te uke o ma galuega e fai, e taumafai eiloa māua o ‵moe i te taimi e tasi i po katoa. E fai faeloa ne māua a tāga fakama‵losi foitino. Ne fesoasoani malosi mai a mea konei ki a māua. Ko oti ne iloa ne māua a ma tapulā, kae fai ne māua a mea e ‵tusa mo tapulā konā. E se taumafai māua o ga‵lue fakatautau ki tino kolā e foliga mai me e se mafai o fi‵ta.” E mata, e kai faeloa koe ki meakai aogā kae lava tau moe? A te fakaasiga o te loto malamalama ‵tau i tulaga masani o ‵tou malosi faka-te-foitino e fakafoliki aka i ei te loto mafatia mo te fi‵ta i te feitu faka-te-agaga.

¹⁵ E isi foki ne manakoga fakapito o nisi o tatou. E pelā mo te tuagane Kelisiano e tokotasi telā ne tavini atu i te taviniga tumau i tulaga faiga‵ta e uke. Ne uke ‵ki ana masaki kae ne aofia i ei te kenisa. Se a te mea ne fesoasoani atu ke fakafesagai atu ei ki fakalavelave faiga‵ta konā? Ana muna: “E tāua ‵ki ke maua se taimi ke nofo au i a au eiloa. Ko te lasi o te fi‵ta ko te lasi foki o te manakoga ke maua se taimi filemu ke mafai ne au o faitau kae malolo.” E fesoasoani mai a te poto mo te atamai ke lavea kae ke faka‵lei aka foki a ‵tou manakoga taki tokotasi kae ke sē fi‵ta tatou i te feitu faka-te-agaga.

E Fakamalosi ne Ieova a Tatou

16, 17. (a) Kaia e tāua ‵ki ei a te tausiga o ‵tou malosi i te feitu faka-te-agaga? (e) Ne a mea e ‵tau o aofia i ‵tou fakatokaga masani mō aso takitasi?

¹⁶ E tāua ‵ki eiloa a te tausiga o ‵tou malosi faka-te-agaga. Kafai e ‵pili te va fesokotaki o tatou mo Ieova te Atua, kāti ka fi‵ta tatou i te feitu faka-te-foitino, kae ka sē ‵fiu eiloa tatou i te tapuaki atu ki a ia. Ko Ieova eiloa e “fakamalosi ne ia a latou kolā ko vāi‵vāi kae fi‵ta.” (Isaia 40:​28, 29) Ne tusi mai a Paulo, telā ne lavea ne ia te ‵tonu o pati konei: “E se mafai o loto vāi‵vāi matou. E tiga eiloa i te gasolosolo malie o vāivāi omotou foitino, ka ko te motou malosi faka te Agaga e fakafou faeloa i aso takitasi.”​—2 Kolinito 4:16.

¹⁷ Ke mafaufau ki te tugāpati “i aso takitasi.” E fakauiga i ei me e maua faeloa ne tatou a mea kolā e tuku mai ne Ieova i aso katoa. Ne fi‵ta kae loto vāivāi foki se misionale telā ne tavini fakamaoni atu i tausaga e 43. Kae ne seki ‵fiu eiloa a ia. Ne fai mai tou fafine: “Ko oti ne fakamasani au ki te alausu i te taeao ko te mea ke lava te taimi o ‵talo atu ki a Ieova kae faitau ki tena Muna mai mua o fai aku galuega. Ne fesoasoani mai a te faifaiga tumau tenei i aso katoa ke maua ei te loto kufaki ke oko mai eiloa ki te aso nei.” E tonu, e mafai eiloa o fakalagolago tatou ki te malosi o Ieova ke fakatumau ne ia tatou māfai e ‵talo faeloa “i aso takitasi” kae mafau‵fau ‵loto ki ana uiga lauiloa mo ana folafolaga.

18. Se a te fakamafanafanaga gali e tuku mai ne te Tusi Tapu mō tino fakamaoni kolā ko ma‵tua io me ma‵saki?

¹⁸ E aogā malosi eiloa te mea tenei ki tino kolā e loto vāivāi ona ko te matua io me ko masaki. E mafai o mafatia malosi a tino konei e se ona ko te sē ‵pau o latou mo nisi tino, kae ona ko te ‵kese o mea e mafai ne latou o fai i aso nei mo mea ne mafai ne latou o fai i aso mua. Ko oko eiloa i te fakamafanafana mai ke iloa atu me e fakatāua ne Ieova a tino ma‵tua! E fai mai te Tusi Tapu: “A te ulu sina ko te kalauna ‵malu tenā.” (Faataoto 16:31) E iloa ne Ieova a ‵tou tapulā kae fakatāua malosi ne ia a ‵tou taviniga telā e fai atu mo te loto kātoa faitalia ‵tou masaki. Kae ko galuega ‵lei katoa kolā ko oti ne fai ne tatou ko oti ne faka‵mautakitaki i te mafaufau o te Atua. E fakatalitonu mai te Tusi Tapu ki a tatou penei: “Me i te Atua e fai mea tonu. E se mafai foki o puli i a ia a galuega ne fai ne koutou, io me ko te alofa ne fakaasi ne koutou mō ia e auala i otou galuega alofa kolā ne fai mō otou taina kelisiano, kae koi fai nei eiloa ne koutou.” (Epelu 6:10) Ko oko eiloa te ‵tou fia‵fia ke ‵nofo fakatasi tatou mo tino kolā ne tumau te lotou fakamaoni ki a Ieova i te fia sefulu tausaga ko ‵teka!

Ke sē ‵Fiu Eiloa

19. E maua pefea ne tatou a mea aogā mai te fakalavelave faeloa i te faiga o mea ‵lei?

¹⁹ E tali‵tonu a tino e tokouke me ko te galue faeloa fakafi‵ta e galo ei te fi‵ta. E penā foki a te galue faeloa i mea faka-te-agaga e fesoasoani mai i ei ke maua se fakatapūga mai te fi‵ta faka-te-agaga. E fai mai te Tusi Tapu: “Ko sē ‵fiu tatou i te fai o mea ‵lei; me kafai e tumau eiloa tatou i ei, e oko mai te taimi tonu telā e tau ei ne tatou a fuataga. Tenei la, e ‵tau mo tatou o fai te mea ‵lei ki tino katoa, kae fakasilisili ki a latou kolā e i loto i te kāiga Kelisiano.” (Kalatia 6:​9, 10) Ke mafaufau ki tugāpati konei “fai o mea ‵lei” mo te “fai te mea ‵lei.” E fakauiga i ei me e manakogina ke gasue‵sue tatou o fai ‵tou tusaga. A te faiga o mea ‵lei mō nisi tino e fesoasoani mai ke sē ‵fiu tatou i ‵tou taviniga ki a Ieova.

20. Ke ‵teke atu ki faka‵tukaga, ko oi a tino e ‵tau o ‵kalo keatea tatou mai i ei?

²⁰ E ‵kese mai i ei, a te ‵kau fakatasi atu ki faifaiga a tino kolā e se fakatāua ne latou a tulafono a te Atua e mafai o fai pelā me se amoga ‵mafa kae fakafi‵ta. E polopoloki mai te Tusi Tapu: “A te ‵mafa o fatu mo one e se taitai o ‵pau mo te ‵mafa o fakalavelave kolā e fakatupu ne tino va‵lea.” (Faataoto 27:3) Ke ‵teke atu ki lagonaga vāivāi mo te fakafi‵ta, se mea ‵lei ke ‵kalo keatea mai te faitaugasoa ki tino loto ma‵sei kolā e ‵nofo faeloa o fakama‵sei a nisi tino.

21. E fai pefea tatou e pelā me ne mea fakamalosi loto ki nisi tino i fakatasiga Kelisiano?

²¹ A fakatasiga Kelisiano se fakatokaga a Ieova telā e mafai o faka‵fonu ne ia tatou ki te malosi faka-te-agaga. E maua ne tatou i ei se avanoaga gali ‵ki ke fakatau fakamalosi atu te suā tino ki te suā tino ki akoakoga mo fesokotakiga fakamalosi loto. (Epelu 10:25) E ‵tau o taumafai a tino katoa i te fakapotopotoga o fai a tali fakamalosi loto i fakatasiga io me māfai e isi ne olotou tusaga e fai mai luga i te tulaga. A tino kolā e fai pelā me ne faiakoga e maua ne latou te tiute fakapito ke fakamalosi atu a nisi tino. (Isaia 32:​1, 2) Kafai foki eiloa e polopoloki atu, e ‵tau o fai penā i se leo fakamalosi loto. (Kalatia 6:​1, 2) Ka fesoasoani mai eiloa a ‵tou a‵lofa ki nisi tino ke tavini atu tatou ki a Ieova e aunoa mo te ‵fiu.​—Salamo 133:1; Ioane 13:35.

²² A te tapuakiga ki a Ieova i te vaitaimi tenei o te gataga e aofia i ei te faiga o galuega. Kae e fepaki foki a Kelisiano mo ikuga o te loto mafatia mo te logo‵mae. A te ‵tou tulaga sē ‵lei katoatoa e mapāgofie, e pelā eiloa mo meafale kolā e faite mai te kele. Kae e fai mai te Tusi Tapu, “E ui eiloa me ko maua ne tatou te koloa faka te Agaga tenei, e ‵pau tatou mo fagu kele i te ma‵fa gofie. Ne fai ne te Atua penei o fakaasi i te mana e o ia, kae se e o tatou.” (2 Kolinito 4:7) E tonu, ka fi‵ta kae ka sē ‵fiu eiloa tatou. I lō te fai penā ke na “loto ‵toa tatou o fai ake penei, ‘A te Aliki [Ieova] ko toku fesoasoani.’ ”​—Epelu 13:6.

Ke Toe Onoono ki ei

• Ne a nisi amoga ‵mafa e mafai o tapale keatea ne tatou?

• E mafai pefea ne tatou o “fai te mea ‵lei”

ki ‵tou taina Kelisiano?

• E fakatumau pefea tatou ne Ieova māfai ko fi‵ta io me loto vāi‵vāi tatou?

22. Faitalia te ‵tou tulaga sē ‵lei katoatoa, kaia e ‵tau ei o loto ‵toa tatou?

[Ata i te itulau e 19]

Ne iloa ne Iesu me i te loto vāivāi i se taimi leva e mafai o fakalavelave atu ki te kau apositolo

[Ata i te itulau e 20]

Ko oti ne taofi aka ne nisi tino a mea masani kolā ne fia‵fia latou ki ei mo nisi mea sē tāua