‘E ‵Tau o ‵Talo Koutou Penei’

E MATA, e iloa ne koe a pati o te ‵Talo a te Aliki? Ko te ‵talo fakaakoako telā ne akoako mai ne Iesu Keliso. I tena Lauga takutakua i luga i te Mauga, ne fai mai Iesu: “Ke ‵talo koutou penei.” (Mataio 6:9) Ona ko te mea ne kamata ne Iesu, ne fakaigoa sāle a te ‵talo tenā e pelā me ko te ‵Talo a te Aliki.​—Latin, Paternoster.

E lau i miliona a tino i te lalolagi kātoa ko oti ne tauloto ne latou te ‵talo a te Aliki kae kāti e fai‵pati faeloa ki ei i aso katoa. I tausaga fakamuli nei, ko oti ne fai sāle ne tino e tokouke a te ‵talo tenei i akoga mo nisi faigā mea a tino e tokouke. Kaia ko tāua malosi ei a te ‵Talo a te Aliki?

Ne tusi mai te faifeau ko Cyprian i te tolu o senitenali penei: “E mata, e isi aka foki se isi ‵talo e sili atu i te ‵lei i lō te ‵talo telā ne tuku mai ki a tatou ne Keliso . . . ? Se a foki se isi ‵talo aka e fai atu ki te Tamana telā e tonu katoatoa i lō te ‵talo telā ne tuku mai ne tena Tama telā ko te Munatonu?”​—Ioane 14:6.

I tena tusi fakatonutonu, e kilo atu a te Lotu Katolika Loma ki te ‵Talo a te Aliki e pelā me “ko te ‵toe ‵talo tāua mō Kelisiano.” E fakaasi mai i The World Book Encyclopedia a te tāua o te ‵talo tenei ki lotu Kelisiano ‵Se katoa, kae e fakaigoa ne ia me ko te “fakamatalaga fakavae eiloa e tasi o te talitonuga Kelisiano.”

Kae se mea ‵tau ke fakaasi ‵tonu atu, me i tino e tokouke kolā e lau faeloa ne latou te ‵Talo a te Aliki i olotou gutu e se malamalama ‵lei i te uiga o te ‵talo tenā. “Kafai ne tupu aka koe i se kāiga Kelisiano e se taumate e mafai o fai ne koe a te ‵talo a te Aliki e pelā fua me se mea tauloto,” ko pati i te nusipepa Kanata ko te Ottawa Citizen, “kae kāti e faigata ki a koe ke faipati malielie ki ei mo te malamalama.”

E mata, se mea tāua ke malamalama tatou i ‵tou ‵talo e fai atu ki te Atua? Kaia ne akoako mai ei ne Iesu te ‵Talo a te Aliki ki a tatou? Se a tena uiga ki a koe? Ke na ‵saga atu nei tatou ki fesili konei.