Mea Aogā e Maua Mai te ‵Sala Atu ki Mea Tāua Faka-te-Agaga

“Kafai koe se tino e manako ki tupe, e se mafai eiloa koe o malie, kafai koe e manako ke maukoloa koe, e se mafai o maua ne koe a mea katoa e manako koe ki ei.”​—Failauga 5:10.

A TE tō galue ‵mafa e iku atu i ei ki te fi‵ta o te mafaufau telā e mafai o iku atu foki ki te mauaga o masaki kae i nisi taimi ko te mate. I fenua e uke, e nofo mavae‵vae a kāiga ona ko te talaga o avaga. I te ukega o taimi, e pogai mai a te tulaga masei tenā i te sōna manavase ki kope faka-te-foitino. I lō te fiafia ki mea ko maua ne ia, a te tino telā ko valea faeloa ki te ‵salaga o kope faka-te-foitino ka manako faeloa ki mea penā faitalia te masei ki tena ola. E fai mai se tusi fesoasoani e tasi me i te fia fakapaupau ki tino mau‵mea se manakoga masani i atufenua katoa, e tiga eiloa me ko pili o fatu vāivāi te tino ona ko te ga‵lue ‵mafa.

E se mafai eiloa o gata a te manako ki mea e uke, kae fai i ei ke galo te fiafia telā e ‵tau o maua. A ‵tou vāivāiga i te feitu tenei e fakaaogā‵segina ne te mea malosi tenei​—ko faka‵pulaga fakapisinisi! E fakamalosi aka ne faka‵pulaga i letio mo vitio a te manakoga ke ‵togi a mea kolā kāti e se manako malosi koe ki ei kae e se lava foki i au tupe. Ka iku atu a mea katoa konei ki se matugā fakamaseiga lasi ‵ki.

A te sē fakaeteete i mea e ma‵nako tatou ki ei e se mateagofie kae e lasi ‵ki tena fakamaseiga ki a tatou i te feitu faka-te-foitino mo mea tau amioga. E pelā mo pati a te tupu poto ko Solomona: “Kafai e tokagamalie tou mafaufau io me ko tou loto kae ka malosi foki tou foitino.” (Faataoto 14:30) E ‵kese mai i ei, a te fi‵ta malosi, te sōna manavase mo te manakoga ke uke a kope faka-te-foitino e mafai o fakamasei mai ki ‵tou ola mo te ‵tou fiafia. E mafai foki o sē ‵lei a ‵tou va mo nisi tino māfai ko fakamuamua ne tatou a te manako ki kope i ‵tou olaga. Kae kafai e gasolo ifo o sē ‵lei te tulaga o te kāiga o se tino ka pokotia foki i ei tena olaga kātoa.

Te Tāua Atu o Mea Faka-te-Agaga

“Ke sē amio fakatasi koutou mo te lalolagi nei,” ko pati fakamalosi a te apositolo ko Paulo i te fia senitenali ko ‵teka. (Loma 12:2) E a‵lofa a tino o te lalolagi ki tino kolā e fia‵fia malosi ki ana manakoga. (Ioane 15:19) E taumafai te lalolagi o fakagaligali atu ki a koe a mea kolā e lavea, e patele, e tami, e ‵sogi kae lagona ne koe​—e tonu, e taumafai o fakamalosi atu ke ola koe i se olaga maumea. E fakatāua malosi i ei a “mea e matea ne tino” ko te mea ke taumafai malosi latou e pelā foki mo nisi tino ke ‵sala atu faeloa ki kope faka-te-foitino.​—1 Ioane 2:​15-17.

Kae e isi ne mea tāua kolā e sili atu te lotou tāua i lō tupe, te tulaga lauiloa, mo te maumea. I te fia senitenali ko ‵teka, ne maua ne te tupu ko Solomona a mea faka-te-foitino kolā ne mafai o maua i te lalolagi kātoa. Ne faite ana fale kae ne isi foki ne ana fatoaga, tavini, lafu manu, tāgata mo fāfine usuusu e pelā foki mo aulo mo siliva. Ne sili fakafia atu a te uke o kope a Solomona ne maua i lō tino kolā ne mau‵mea muamua atu i a ia. Ne maumea ‵ki eiloa a ia. Ne maua ne Solomona a mea katoa kolā ne manakogina. Kae i te taimi ne mafaufau ei a ia ki ana mea katoa ne fai, ne fai mai a ia: “E seai eiloa se uiga o aku mea konā ne fai. E pelā eiloa me se tino e taumafai o afuli te matagi​—e seai eiloa se aogā.”​—Failauga 2:​1-11.

Mai te poto lasi telā ne maua ne ia, ne iloa ne Solomona me e sili atu i te tāua ke ‵sala atu faeloa ki mea faka-te-agaga. Ne tusi mai a ia: “I te otiga ne kilokilo au ki mea katoa konā, e tasi eiloa taku muna e fai atu: Mataku ki te Atua, kae tausi ki ana fakatonuga, me e tenā eiloa te pogai ne faite ei a te tagata.”​—Failauga 12:13.

A te mea telā e sili atu tena tāua i lō aulo io me ko siliva ko te koloa tāua telā e maua i te Muna a te Atua, ko te Tusi Tapu. (Faataoto 16:16) E pelā mo fatu tāua, e maua ne koe a muna‵tonu māfai e ‵sala koe ki ei. E mata, ka ‵sala kae keli aka ne koe a mea konā? (Faataoto 2:​1-6) E fakamalosi mai a ‵tou Mafuaga, telā ko te mafuaga o mea tāua konā ke fai ne koe penā, kae ka fesoasoani mai eiloa a ia ki a koe. E pefea la?

E tuku mai ne Ieova a muna‵tonu tāua e auala i tena Muna, tena agaga tapu mo tena fakapotopotoga. (Salamo 1:​1-3; Isaia 48:​17, 18; Mataio 24:​45-47; 1 Kolinito 2:10) A te iloilo faka‵lei o mea tāua konei kolā e seai ne olotou nafa se avanoaga gali ke filifili aka ne koe te ‵toe auala ‵lei kae aogā i te olaga. Kae ka sē faigata te mea tenā me e iloa ne Ieova, te ‵tou Mafuaga, a mea kolā e ‵tau o maua ke fia‵fia tonu ei tatou.

E Fakamalosi ne te Tusi Tapu a Toe Mea Tāua

A fakatakitakiga ‵gali io me ko pati polopoloki kolā e maua i te Tusi Tapu e aogā kae seai ne olotou nafa. E sili fakafia atu foki te tāua o fakatakitakiga i mea tau amioga kolā e fakaasi mai i ei. E aogā faeloa a fakatakitakiga i ei. Ko oti ne fakamaoni aka te ‵tonu o mea konā i te vaitaimi leva tenei. E aofia i fakatakitakiga aogā mai te Tusi Tapu ko te galue malosi, te fakamaoni, te atafai o tupe mo te ‵kalo keatea mai te paie.​—Faataoto 6:​6-8; 20:23; 31:16.

E ‵tusa mo te mea tenā, ne fai mai Iesu: “Sa fakaputu ne otou koloa i te olaga nei, me e iai a mogamoga mo te pala o fakamasei, e iai foki ne tino kai‵soa e ofa ne latou a mea kae kaisoa. Kae fakaputu ne otou koloa i te lagi, telā e seai ne mogamoga mo te pala o fakamasei; e seai foki ne tino e ofa ne latou a mea kae kaisoa.”​—Mataio 6:​19, 20.

A te fakamalosiga tenā koi aogā eiloa i aso nei e pelā eiloa mo tena aogā i te 2,000 tausaga ko ‵teka. I lō te faka‵lave mai o taumafaiga ke maumea, e mafai o maua ne tatou a mea aogā nei mai te ‵sala atu ki se olaga telā e ‵lei atu. A te kī tāua ko te fakaputuakaga o koloa faka-te-agaga, telā ka iku atu i ei ki se olaga fiafia tonu kae fakalotomalie. E mafai pefea o fai ne tatou penā? Mai te faitau faeloa ki te Muna a te Atua, ko te Tusi Tapu, mo te tau‵tali atu ki mea kolā e akoako mai i ei.

E Maua te Taui Mai Mea Tāua Faka-te-Agaga

Kafai e tau‵tali faka‵lei ki ei, e maua ne tatou mai mea tāua faka-te-agaga a mea aogā i te feitu faka-te-foitino, i ‵tou lagonaga mo te feitu faka-te-agaga. E pelā eiloa mo te puipui o tatou ne te kēsi ko te ozone mai i kavei fakama‵taku o te la, e penā te puipui o tatou ne fakatakitakiga aogā mai te tulaga fakamataku ko te fia maumea. Ne tusi mai te apositolo Kelisiano ko Paulo: “Ko tino kolā e ma‵nako ke mau‵mea latou, ko pa‵kū atu latou ki te fakaosoosoga, ka ko maleigina foki latou ne te uke o manatu va‵lea mo manako ma‵sei, kolā e ‵futi ne latou ki lalo o fakamasei kae fakamalepe valevale. Me i te manako ki tupe, ko te mafuaga tenā o mea ma‵sei katoa. A nisi tino ko oko eiloa i te ma‵nako ke maua ne latou, ka ko olo foki keatea mai te fakatuanaki, ka ko fati‵fati nei olotou loto i puapuagā e uke.”​—1 Timoteo 6:​9, 10.

E takitaki ‵se ne te fia maumea a tino ke ‵sala malosi atu ki kope, tulaga ma‵luga mo te malosi pule. E masani o fakaaogā sāle a faifaiga sē fakamaoni ke maua i ei a mea konei. E mafai o māumāu a taimi, te malosi, mo nisi mea i te ‵sala atu ki kope faka-te-foitino. E mafai foki o fai i ei ke sē to te moe a se tino. (Failauga 5:12) A te ‵sala faeloa ki kope e uke atu e fai i ei ke gasolo ifo eiloa ki lalo te tulaga faka-te-agaga o se tino. Ne fakaasi mai ne te toe tagata sili ko Iesu Keliso a te ‵toe auala ‵lei ke ola i ei: “Amutia a latou kolā e iloa ne latou i a latou e ma‵tiva faka-te-Agaga.” (Mataio 5:3) Ne iloa ne ia me ka iku atu a te maumea faka-te-agaga ki te mauaga o te taui tumau kae sili fakafia atu tena tāua i lō kope faka-te-foitino.​—Luka 12:​13-31.

E Mata, e Aogā Eiloa?

“Ne taumafai malosi a oku mātua o fakamaoni mai ki a au me seai se aogā o mea faka-te-agaga,” ko pati a Greg. “Kae, ko maua nei ne au te filemu faka-te-mafaufau me ko saoloto au mai te fi‵ta telā e maua mai i te fakatau‵fai ke maua a kope e uke.”

E fakamalosi aka foki ne mea faka-te-agaga a fesokotakiga totino. Ka maua eiloa ne koe ou taugasoa ‵tonu me fia fakapili‵pili atu latou ki a koe ona ko ou uiga totino, kae e se ko ou kope. E fakamalosi mai te Tusi Tapu: “Kauga ki tino poto kae ka poto foki koe.” (Faataoto 13:20) E se gata i ei, a te kāiga manuia e ati aka i luga i te poto mo te alofa, kae e se ko kope faka-te-foitino.​—Efeso 5:22–6:4.

E se fa‵nau mai tatou mo mea kolā e ‵tau o fakatāua ne tatou. E ‵tau o tauloto ne tatou a mea konā mai ‵tou taugasoa io me se isi mea telā e fakatuagagina. Tenā eiloa te pogai e mafai ei o ‵fuli katoatoa ne akoakoga mai te Tusi Tapu a ‵tou kilokiloga ki kope faka-te-foitino. “Ne maua ne au te fesoasoani ke toe mafaufau faka‵lei ki mea e ‵tau o fakatāua ne au, kae ne akoakogina foki au ke lotomalie ki mea e maua ne au,” ko pati a Don, se tino telā ne galue muamua i se pagike.

Te ‵Sala Atu ki te Maumea Faka-te-Agaga Telā e Tumau

E tuku mai i mea tāua faka-te-agaga se taui telā e tumau ki te se-gata-mai, kae sē ko te lotomalie fua i se taimi toetoe. Ne tusi mai a Paulo: “A mea kolā e matea ki mata [mea faka-te-foitino] e se tumau, ka ko mea kolā e se matea [mea faka-te-agaga], e tumau eiloa ke oko ki te se gata mai.” (2 Kolinito 4:18) E tonu, e fia‵fia fua tatou ki mea faka-te-foitino i se taimi toetoe, kae e seai loa ne mea aogā tumau e maua i te kaimanako. E tumau ki te se-gata-mai a mea tāua faka-te-agaga.​—Faataoto 11:4; 1 Kolinito 6:​9, 10.

E taku fakamasei ne te Tusi Tapu a te fia maumea telā ko lauiloa valevale i te taimi nei. E akoako mai i ei ke taofiofi aka te kaimanako mai te fakafaigofiega o ‵tou olaga, kae ke ‵saga tonu atu faeloa ki mea e sili atu i te tāua, ko koloa faka-te-agaga. (Filipi 1:10) E fakaasi mai i ei a te uiga tonu o te kaimanako​—ko te ifo ki tupua. I te fakagalue ne tatou a ‵tou mea ne tauloto mai te Muna a te Atua, ko lavea i ei ne tatou te lasi o te ‵tou fiafia. Ka ‵fuli i ei a ‵tou kilokiloga mai te fia maua o mea ki te fia tuku atu o mea. Ma‵faga o fakamalosiga aogā ke sui te kaimanako ki mea tāua faka-te-agaga!

E tonu, e fai a tupe e pelā me se puipuiga i nisi taimi. (Failauga 7:12) Kae e fai ‵tonu mai te Tusi Tapu: “Au tupe e mafai faeloa o ‵galo atu pelā me se lapaga o se uila, e pelā me ne tupu ake ona kapakau ko te mea eiloa ko eva atu e pelā me se aeto.” (Faataoto 23:5) Ona ko te fia maumea ko sē maua ei ne tino a mea kolā e tāua atu​—te malosi ‵lei, kāiga fia‵fia, ke oko ki te mauaga o se loto lagona ‵lei. I te suā feitu la, e fakama‵lie aka ne mea faka-te-agaga a ‵tou manakoga tāua​—ko te alofa, te fakamoemoega, mo te manakoga ke tapuaki atu ki te Atua alofa, ko Ieova. E fakaasi mai foki i ei a te auala o tino ki te ola se-gata-mai i te lalolagi palataiso​—ko te fakamoemoega telā ko oti ne fuafua ne te Atua mō tatou.

Ko pili fua nei o fakataunu a te manakoga o tino ke manuia latou, i te lalolagi fou a te Atua. (Salamo 145:16) I te taimi tenā a te lalolagi kātoa ka ‘‵fonu i te malamalama e uiga ki a Ieova.’ (Isaia 11:9) Ka lausa a mea tāua faka-te-agaga. Ka fakaseai atu i ei te fia maumea mo ana ikuga ma‵sei. (2 Petelu 3:13) Kae ko mea kolā ka fai i ei ke fia ola a tino​—te ola ‵lei katoatoa, galuega fakamalie loto, fakafiafiaga aogā, fesokotakiga fealofani i kāiga, mo te va fealofani tumau mo te Atua​—ka fai i ei ke fia‵fia faeloa a tino ki te se-gata-mai.

[Pokisi/Ata i te itulau e 7]

Tauloto Mai Au Mea ne Fai​—E Isi se Auala Telā e ‵Lei Atu

A mea a tatou ko oti ne fai​—ko mea ‵lei io me ko mea ma‵sei​—e mafai o maua i ei ne tatou a akoakoga tāua. Kae, e mata, e tonu me sili atu te aogā o mea e tauloto ne tatou mai ‵tou mea kolā ko oti ne fai? Ikai, e isi se mea telā e sili atu tena tāua. Ne fakaasi mai ne te faisalamo a te mea tenā i tena ‵talo: “A tau muna se moli e takitaki ne ia au, se mainaga foki ki toku auala.”​—Salamo 119:105.

Kaia e sili atu ei te aogā o te tauloto mai i akoakoga a te Atua i lō mea kolā ko oti ne fai ne tatou? A te pogai e tasi, a te tauloto mai ‵tou mea ko oti ne fai​—telā ko te tofotofoga o mea kese‵kese​—e mafai o ‵togi ‵mafa kae fakalogo‵mae foki. Se mea foki telā e se ‵tau o fai. Ne fai atu a te Atua ki tino Isalaelu mua, “Moi ne faka‵logo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o masa pakupaku! E penei e maua ne koutou te manumalo pelā mo galu kolā e ‵fati ki luga i te tafatai.”​—Isaia 48:18.

A te pogai e tasi e sili atu ei te aogā o akoakoga i te Muna a te Atua me e aofia i ei a tala mua kae ‵tonu e uiga ki tino. Kāti ko iloa ne koe me e sili atu ke tauloto tatou mai mea ‵lei mo mea ma‵sei kolā ne fai ne nisi tino i lō te ‵toe fai ne tatou olotou mea ‵se. (1 Kolinito 10:​6-11) Kae sili atu i te tāua, e tuku mai ne te Atua i te Tusi Tapu a toe tulafono sili mo fakatakitakiga aogā kolā e fakatuagagina katoatoa. “E tonu katoatoa te tulafono a te Aliki . . . A fakatonuga foki a te Aliki e fakatuagagina, e aumai ne ia te poto ki a latou kolā e valea.” (Salamo 19:7) E tonu, a te tauloto mai te poto o te Atua alofa ko te ‵toe auala ‵lei eiloa tenā.

[Ata i te itulau e 4]

E manako a te lalolagi ke ola koe i se olaga maumea

[Ata i te itulau e 5]

E sili atu te tāua a koloa kolā e maua i te Tusi Tapu i lō aulo mo siliva