“Amutia io me e Fia‵fia a Latou Kolā e Iloa ne Latou i a Latou e Ma‵tiva Faka te Agaga”

KAFAI e ala aka a manu eva i te taeao, e masani sāle o tagi‵tagi i se taimi toetoe a koi tuai o eva atu o fa‵gota. E ‵foki atu latou ki olotou ofaga i te afiafi, toe tagi‵tagi malie aka, ko ‵moe ei. E isi ne vāitau e fai ei olotou tama‵liki, ‵tao olotou fuāmanu kae puti aka ei olotou punua. E fai foki penā a nisi manu.

A tatou e ‵kese mo manu. E tonu, tatou e ‵kai foki, e ‵moe, e fanafanau, kae ko te tokoukega o tatou e se lotoma‵lie fua ki mea konā. E fia iloa ne tatou te pogai e ola ei tatou. E fia iloa foki ne tatou te aogā o te ‵tou olaga mo te fakamoemoega mō aso mai mua. E fakasino atu eiloa a manakoga ‵loto konei ki se uiga fakapito telā ko tino fua e ma‵nako ki ei​—ko te lotou tulaga faka-te-agaga, io me ko olotou manakoga ki mea faka-te-agaga.

Ne Faite ki Foliga o te Atua

E fakamatala mai i te Tusi Tapu a te tulaga faka-te-agaga o te tagata i pati konei: “Telā ne faite ei ne te Atua a te tino ke foliga ki a ia. Ne faite ne ia te tagata mo te fafine.” (Kenese 1:27) E fakauiga eiloa te ‵tou faitega ki “foliga” o te Atua me e tiga eiloa ko oti ne lai‵lai tatou i te agasala mo te ‵tou tulaga sē ‵lei katoatoa, e fakaasi atu eiloa ne tatou a nisi uiga ‵lei o te Atua. (Loma 5:12) E pelā mo te mafai ne tatou o fai a mea. E maua foki ne tatou se vaega o te poto, te fai mea tonu, e pelā foki mo te fakatau fakaasiatuga o te alofa sē fakapito. E se gata i ei, e mafai o fakaaogā ne tatou a mea ko oti ne ‵tupu ke fakavae ki ei ‵tou palani mō aso mai mua.​​—Faataoto 4:7; Failauga 3:​1, 11; Mika 6:8; Ioane 13:34; 1 Ioane 4:8.

E fakaasi manino mai a te malosi o te ‵tou tulaga faka-te-agaga e auala i ‵tou manakoga masani ke tapuaki atu ki te Atua. Seiloga ke fakamalie faka‵lei ne tatou te ‵tou manakoga ke maua se fesokotakiga ‵lei mo te ‵tou Māfuaga, e se mafai o maua ne tatou se fiafia tonu kae tumau. “Amutia a latou kolā e iloa ne latou i a latou e ma‵tiva faka te Agaga,” ko muna a Iesu. (Mataio 5:3) Kae e ‵tau o fakaeteete tatou, ke fakamalie aka te manakoga tenā ki muna‵tonu faka-te-agaga​​—ko mea ‵tonu e uiga ki te Atua, ko ana tulaga amio‵tonu, mo ana fuafuaga mō tino katoa. E maua ne tatou i fea a muna‵tonu faka-te-agaga? I te Tusi Tapu.

‘Tau Muna ko te Munatonu’

Ne tusi mai te apositolo ko Paulo: “Me i Tusitusiga Tapu katoa ne aumai mai te Atua, kae aogā ki te akoakoga o te mea tonu, ki te polopoloki, ki te fakatonu o te mea ‵se.” (2 Timoteo 3:16) E ‵pau eiloa a pati a Paulo mo pati a Iesu kolā ne fai i tena ‵talo ki te Atua: ‘A tau muna ko te munatonu.’ I aso nei, e iloa ne tatou me i te Muna tenā ko te Tusi Tapu, kae e ‵poto tatou māfai e iloilo aka a ‵tou talitonuga mo ‵tou tulaga i mea katoa me e ‵pau mo mea kolā e fakaasi mai i te Tusi Tapu.​​—Ioane 17:17.

Mai te fakatusatusaga o ‵tou talitonuga mo mea kolā e maua i te Tusi Tapu, ko ‵pau ei tatou mo tino i Pelea mua, kolā ne fakatalitonu aka ne latou a akoakoga a Paulo ki te Tusi Tapu. I lō te taku fakamasei ne ia a tino Pelea, ne fakamālō atu a Luka ki a latou e uiga mo te lotou kilokiloga tenā. Ana muna: “Ne sukesuke malosi foki latou ki muna mai te Tusi i aso takitasi, e fakatalitonu ei ne latou me tonu a muna a Paulo.” (Galuega 17:11) Ona ko te uke o akoakoga faka‵numi a lotu mo olotou tulaga i mea tau amioga i aso nei, se mea tāua ke tau‵tali atu tatou ki te fakaakoakoga ‵lei a te kau Pelea.

A te suā auala e matea ei ne tatou te munatonu faka-te-agaga ko te auala e pokotia ei a olaga o tino i ei. (Mataio 7:17) E pelā mo te mea tenei, a te tino telā e ola e ‵tusa mo muna‵tonu i te Tusi Tapu e iku atu i ei ki tena faiga mo fai se tagata avaga ‵lei, se tamana ‵lei, se fafine avaga ‵lei, se mātua ‵lei, kae e fesoasoani atu ei ki te faiga o te kāiga ke fiafia kae tokagamalie. Ne fai mai a Iesu: “E sili atu te manuia o tino kolā e faka‵logo ki te muna a te Atua, kae tausi ki ei.”​—Luka 11:28.

E fakamasaua mai i pati a Iesu a pati a tena Tamana i te lagi, kolā ne fai atu ki te kau Isalaelu mua: “Au ko te Aliki te otou Atua, telā e manako o akoako koutou ke ‵lei koutou kae fakatonutonu foki koutou i te auala e ‵tau o olo koutou i ei. Moi ne fakalogo mai eiloa koutou ki aku fakatonuga, e penei a fakamanuiaga mō koutou e ‵tafe eiloa pelā me se vaitafe telā e se mafai o masa pakupaku! E penei e maua ne koutou te manumalo pelā mo galu kolā e ‵fati ki luga i te tafātai.” (Isaia 48:​17, 18) Ka otia eiloa a loto o tino fai mea ‵tonu kae aga‵lei i te fakaasiga alofa tenei!

E Ma‵nako a Nisi Tino ke ‘Fakamagisogisogina Olotou Taliga’

Ne fai atu ne te Atua te fakaasiga alofa tenā ki te kau Isalaelu ona ko te mea ko oti ne takitaki‵segina latou e auala i ‵loi fakalotu e uke. (Salamo 106:​35-40) E ‵tau foki o matapula‵pula tatou e uiga ki akoakoga ‵se penā. Ne tusi mai a Paulo e uiga ki Kelisiano ‵loi: “E oko mai te taimi ko se toe faka‵logo ei tino ki akoakoga ‵tonu, kae ka tau‵tali atu ki olotou manakoga, kae ka fakapotopoto foki ne latou a faiakoga kolā e logosala olotou akoakoga [“kolā e fakamagisogiso atu,” NW] ki olotou taliga. Ka ‵fuli latou keatea mai te mea tonu o faka‵logo ki tala ‵kai.”​​—2 Timoteo 4:​3, 4.

E fakamagisogiso ne takitaki lotu a taliga o tino mai te taliaga o faifaiga kolā e fakamalosi aka ei a manakoga ma‵sei, e pelā mo amioga fakatauavaga i tua o te fakaipoipooga, amioga faka-Sotoma, mo te konā. E fakaasi manino mai i te Tusi Tapu me i tino kolā e fai ne latou a faifaiga konā, ‘ka se maua ne latou te malo o te Atua.’​— 1 Kolinito 6:​9, 10; Loma 1:​24-32.

Se mea mautinoa me e manakogina te loto toa ko te mea ke mafai o ola tatou e ‵tusa mo tulaga faka-te-Tusi Tapu, maise eiloa i loto i fakatauemuga, kae e mafai eiloa o fai te mea tenā. E aofia i Molimau a Ieova i aso nei a tino e tokouke kolā ne u‵miti ki vailakau tapu, te kava, ne tino finalalolagi, ne tino fai taua, tino kai‵soa, mo tino ‵loi. Kae ne otia latou i te Muna a te Atua kae fakatasi mo te fesoasoani o te agaga tapu, ne fai ei ne latou a ‵fuliga ki olotou olaga ko te mea “ke takitaki ei se olaga e aogā mō te Aliki [ko Ieova].” (Kolose 1:​9, 10; 1 Kolinito 6:​11) Ona ko te mauaga o se tulaga filemu mo te Atua, ne maua foki ei ne latou te filemu tonu e pelā foki mo te fakamoemoega mautinoa mō aso mai mua, e pelā mo te mea ka matea atu ne tatou.

Te Fakamoemoega e Uiga ki te Malo

Ka fakataunu mai eiloa a te fakamoemoega i te Tusi Tapu e uiga ki te mauaga o se filemu tumau e auala i te Malo o te Atua. Ne fai mai a Iesu i tena ‵talo fakaakoako: “Ke oko mai tou Malo, ke fai te mea e loto koe ki ei i lalo nei, e pelā mo te faiga i te lagi.” (Mataio 6:​10) E tonu, ko te Malo fua o te Atua e mafai ne ia o fai te loto o te Atua i luga i te lalolagi nei. Kaia? Me i te Malo mai te lagi tenā​​—se pulega telā ka tupu i ei a Iesu Keliso​—ko te auala e fakaasi mai ei ne te Atua a Tena saolotoga o pule ifo ki te lalolagi kātoa.​​—Salamo 2:​7-​12; Tanielu 7:​13, 14.

I tena fai mo fai te Tupu o te Malo tenā mai te lagi, ka fakasaoloto ei ne Iesu Keliso a tino faka‵logo mai mea katoa kolā e ‵nofo pologa a latou ki ei, e aofia ei te pikifao a te agasala a Atamu mo masaki mo te mate kolā ne iku mai i ei. E fai mai te Fakaasiga 21:​ 3, 4: “Ko ‵nofo nei mo tino te fale o te Atua! . . . Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.”

Ka tumau ei te filemu i te lalolagi kātoa. Kaia e mafai ei o tali‵tonu tatou ki ei? E fakaasi mai te pogai i te Isaia 11:9: “Ka seai eiloa se mea fakamataku kae masei [e fai ne tino kolā e ‵nofo mai lalo i te Malo tenā] i luga i Siona, te mauga tapu o te Aliki. A te laukele ka ‵fonu i te malamalama i uiga o te Aliki, e pelā mo te tai telā e ‵fonu i te suātai.” Ao, ka maua ne tino katoa i luga i te lalolagi a te iloaga tonu e uiga ki te Atua kae ka faka‵logo katoatoa latou ki a ia. E mata, e fakamafanafana atu ki a koe a te mea tenā? Kafai e penā loa, tenei eiloa te taimi ke na maua ne koe te ‘iloaga tonu e uiga ki a Ieova.’

E Mata, ka Fakalogo Koe ki te Fekau o te Malo?

E auala i te Malo, ka tapale ei keatea ne te Atua a galuega ma‵sei katoa a Satani kae ka akoako ne ia a tino ki Ana auala amio‵tonu. Telā la, e se ‵poi tatou i te faiga o te Malo mo fai te ‵toe mataupu tāua o akoakoga a Iesu. Ana muna: “E ‵tau mo au o takutaku atu te Tala ‵Lei o te Malo o te Atua . . . me tenā eiloa te mea ne uga mai ei au ne te Atua, ke vau o fai.” (Luka 4:​43) Ne fakatonu atu a Iesu ki ana soko ke talai atu te fekau tenā ki nisi tino. (Mataio 28:​19, 20) Ne ‵valo mai a ia: “A te Tala ‵Lei tenei e uiga ki te Malo, e fakamatala atu ki te lalolagi kātoa, mo fai te molimau ki tino katoa; ko oko mai ei te gataga.” (Mataio 24:14) Ko pili‵ki mai eiloa te gataga. E pefea la te tāua, ke na faka‵logo nei a tino loto fakamaoni ki te tala ‵lei fakaola tino tenei!

Ne lagona ne Alapati, telā ne sau‵tala tatou ki ei i te mataupu muamua, a te fekau e uiga ki te Malo i te kamataga o suke‵suke a tena avaga mo tena tama tagata mo Molimau a Ieova. Ne fakalotolotolua a Alapati i te taimi muamua. Ne fakamolemole atu foki a ia ki se faifeau ke āsi atu ki tena avaga mo tena tama ko te mea ke fakaasi faka‵sau atu ei a akoakoga ‵se a Molimau. Kae ne seki manako te faifeau ke aofia a ia i ei. Ne fakaiku aka ei ne Alapati ke kau atu a ia ki te akoga faka-te-Tusi Tapu e tasi ko te mea ke mafai o fakasino atu a ia ki so se mea ‵se. I te otiga o te akoga e tasi fua tenā, ne kau atu ei a ia ki ei, me ko manako malosi tou tagata ke uke atu ana mea e iloa. Fakamuli ne fakamatala mai ne ia te pogai ne ‵fuli ei tena kilokiloga. Ne fai mai tou tagata: “Tenei eiloa te mea ne salasala sāle au ki ei.”

Ne fatoā fakamalie aka ei ne Alapati ana manakoga faka-te-agaga, kae ne seki toe saga lele a ia ki tua. Ne tuku atu ne te munatonu mai te Tusi Tapu a te mea telā ne salasala a ia ki ei i tena olaga kātoa​—ko te faka‵leiga ki faifaiga sē ‵tonu kae ‵loi mo faifaiga faivalevale kolā e i‵tia i ei a manava o tino katoa kae e pelā foki mo te fakamoemoega mō aso mai mua. Ne tuku atu ne te munatonu mai te Tusi Tapu ki a ia te filemu tonu. E mata, ko lotomalie koe e uiga ki ou manakoga faka-te-agaga? Kaia e se fakaavanoa ei se taimi toetoe ke faitau ki fesili kolā e fakasolo mai i te pokisi i te itulau e 6? Kafai e manako koe ki nisi fakamatalaga, ka fia‵fia malosi a Molimau a Ieova o fesoasoani atu ki a koe.

[Pokisi/Ata i te itulau e 6

E Mata, E Makona Koe I Te Feitu Faka-te-agaga?

E mata, e makona koe i meakai faka-te-agaga kolā e maua ne koe? E ‵kami atu koe ke faitau ki fesili kolā e fakasolo atu mai lalo nei kae fakamailoga aka a fesili kolā e maua ne koe a tali ‵tonu ki ei.

□ Ko oi te Atua, kae ko oi tena igoa?

□ Ko oi a Iesu Keliso? Kaia ne ‵tau ei o mate a ia? E aogā pefea tena mate ki a koe?

□ E mata, e isi se Tiapolo? Kafai e isi, ne māfua pefea a ia?

□ Ne a mea e ‵tupu māfai ko ‵mate tatou?

□ Se a te fuafuaga a te Atua e uiga ki te lalolagi mo tino katoa?

□ Se a te Malo o te Atua?

□ Ne a tulaga o te Atua i mea tau amioga?

□ Ne a tiute ne tuku atu ne te Atua ki te tagata mo tena avaga i loto i te kāiga? Ne a nisi fakatakitakiga fakavae mai te Tusi Tapu kolā e ‵lago atu ki te fakamalosiakaga o te fiafia i loto i te kāiga?

Kafai e fakalotolotolua koe e uiga ki tali ki so se fesili i konei, fai ke maua sau kopi i te tusi ko te Ne a Mea e Manako ki ei te Atua ke Fai ne Tatou? Ne ‵lomi ne Molimau a Ieova a te tusi tenei i ‵gana toeitiiti ko kātoa te 300, kae e fakamatala mai i ei a mataupu fakavae e 16, kolā e tuku mai foki i ei a tali mai te Tusi Tapu ki fesili kolā e fakasolo atu mai luga.

[Ata i te itulau e 4]

E se pelā mo manu, e isi ne manakoga faka-te-agaga o tino

[Ata i te itulau e 5]

‘Ka fakatokouke ne latou a faiakoga mō latou ke fakamagisogiso ne latou olotou taliga’​—2 Timoteo 4:3

[Ata i te itulau e 7]

Ka maua te filemu tumau e auala i te Malo faka-Mesia o te Atua