Te Tala ‵Lei Mō Tino o Atufenua Katoa

“Ka fai foki koutou mo molimau ki a au . . . ke oko eiloa ki kapakapalagi o te lalolagi.”​—GALUEGA 1:8.

1. Ona ko tatou ko faiakoga o te Tusi Tapu, ne a mea e ‵tau o ‵saga atu tatou ki ei, kae kaia?

E SE ‵saga atu fua a faiakoga āpo ki te mataupu telā e akoako atu ne latou ki te vasega kae e penā foki eiloa ki te auala e akoako atu ei latou. Ona ko tatou ko faiakoga o te munatonu i te Tusi Tapu, e fai foki tatou penā. E ‵saga atu eiloa tatou ki te avā mea konā, ko te fekau telā e talai ne tatou mo auala kolā e talai atu ei tatou. E seai eiloa se ‵fuliga ki te ‵tou fekau, telā ko te tala ‵lei o te Malo o te Atua, kae e fakamafuli‵fuli fua ne tatou a auala kolā e talai atu ei tatou. Kaia? Ko te mea ke oko atu tatou ki tino e tokouke kolā e mafai o maua.

2. Kafai e fakamafuli‵fuli ne tatou a auala kolā e talai atu ei tatou, ko oi la e fakaakoako tatou ki ei?

² Mai te fakamafulifuliga o auala e fakaaogā ne tatou, e fakaakoako atu eiloa tatou ki tavini a te Atua i aso mua. E pelā mo te apositolo ko Paulo i ana pati konei: “Mō tino Iutaia, e ola au e pelā eiloa mo se tino Iutaia, . . . E pelā foki ki tino o fenua fakaatea, e ola au e pelā mo se tino o fenua fakaatea kolā e se aofia i Tulafono faka-Iutaia, . . . E penā foki ki tino e vaivai i te fakatuanaki, e ola au e pelā mo latou, ko te mea ke maua ne au latou. Telā la, e ola au i so se vaega olaga o tino, ko te mea ke fakaola ne au nisi o latou, i so se auala e mafai ne au o fakaaogā.” (1 Kolinito 9:​19-​23) Ne magoi ‵ki a fakamafulifuliga kolā ne fai ne Paulo. E penā foki tatou māfai e fakafetaui aka ne tatou a ‵tou fakamatalaga ki tino taki tokotasi kolā e fai‵pati tatou ki ei.

“Tino Katoa i te Lalolagi”

3. (a) Se a te mea faigata e fe‵paki mo tatou i te ‵tou galuega talai? (e) E fakataunu pefea a pati i te Isaia 45:22 i aso nei?

³ E tasi te mea faigata lasi i te talaiatuga o te tala ‵lei ko te lasi o te koga talai​​—ko “te lalolagi kātoa.” (Mataio 24:14) Ne ga‵lue malosi a tavini a Ieova i te senitenali ko teka ke oko atu ki koga ‵fou i te fakasalalauatuga o te tala ‵lei. Se a te ikuga? E fakaofoofogia eiloa te gasoloakaga o lasi te galuega ne fai i te lalolagi kātoa. Ne lipoti mai i te kamataga o te 20 senitenali me ne nāi fenua fua ne fai i ei te talaiga, kae nei la ko ga‵lue a Molimau a Ieova i atufenua e 235! Ko tena uiga, ko folafola atu nei te tala ‵lei ki “tino katoa i te lalolagi.”​​—Isaia 45:22.

4, 5. (a) Ko oi a tino kolā ne tāua ‵ki olotou tusaga ne fai i te fakasalalauatuga o te tala ‵lei? (e) Ne a pati a nisi ofisa lagolago e uiga ki tino mai nisi fenua kolā e ga‵lue i olotou koga talai?

⁴ Ne a pogai mō te gasoloakaga tenā? E uke. E lasi ‵ki te tusaga ne fai ne misionale kolā ne a‵koga i te Akoga Fakamisionale o te Faleleoleo Maluga i Kiliata i aso fakamuli nei, ko silia atu i te toko 20,000 o taina ne ‵kau atu ki te Akoga Fakamasani mō Tavini Fakafaifeau kae ne lasi foki te lotou fesoasoani. Kae e penā foki a Molimau e tokouke kolā ne olo atu ki nisi fenua i a latou eiloa ona ko te lasi o te manakoga i ei. Ko vaegā Kelisiano penā​​—fāfine mo tāgata, talavou mo tino ma‵tua, tino ‵taka mo tino a‵vaga​​—e lasi ‵ki foki te lotou tusaga e fai i te talaiatuga o te fekau o te Malo i te lalolagi kātoa. (Salamo 110:3; Loma 10:18) E fakatāua malosi eiloa ne tatou a latou. Ke onoono ki pati mai nisi ofisa lagolago e uiga ki tino mai nisi fenua kolā e ga‵lue i koga e lasi i ei te manakoga i olotou koga talai.

⁵ “E fai ne Molimau taulia konei a te takitakiga o te galuega i koga kolā e faigata o oko ki ei a tino, e fesoasoani atu i te faka‵tuakaga o fakapotopotoga ‵fou, e pelā foki mo te gasolo ki mua o te tulaga faka-te-agaga o taina mo tuagane i ei.” (Ecuador) “Kafai ko toe olo kea‵tea a te fia selau o taina mai fenua faka‵tea kolā e tavini atu i konei, ka pokotia malosi i ei a fakapotopotoga i konei. E fai eiloa latou mo fai se fakamanuiaga ki a matou.” (Dominican Republic) “I motou fakapotopotoga e uke, a te tokoukega i ei ne tuagane, i nisi taimi e nofo pelā ki se 70 pasene o latou. (Salamo 68:11) A te tokoukega o latou ne tino ‵fou i loto i te munatonu, kae e fesoasoani atu ki a latou a tuagane ‵taka kolā e paenia mai nisi fenua o fakamasani latou. E fai a tuagane konei mo fai se meaalofa tāua ki a matou!” (Se fenua i Eulopa ki te Saegāla) Kai mafaufau aka eiloa koe o tavini atu i se isi fenua?a​​—Galuega 16:​9, 10.

“Tino o Fenua Fakaa‵tea e Tokosefulu”

6. E fakasino atu pefea te Sakalia 8:​23 ki te faigata o te ‵tou galuega talai ona ko te uke o ‵gana kese‵kese?

⁶ A te suā mea faigata ko te uke o ‵gana kese‵kese e fai‵pati ki ei i te lalolagi. Ne ‵valo mai i te Muna a te Atua: “I aso konā, ka o‵mai a tino o fenua fakaa‵tea e tokosefulu [“mai ‵gana kese‵kese,” NW] ki se Iutaia e tokotasi, kae fai atu ki a ia penei, ‘Matou e ma‵nako o kau mo koe, me ne lagona ne matou me i te Atua e fakatasi mo koe.’ ” (Sakalia 8:​23) I te fakataunuga i aso nei o te valoaga tenei, e fakaata mai ne te tokosefulu konei a te vaitino tokouke kolā e ‵valo mai i te Fakaasiga 7:9. Ke onoono foki la me e ‵tusa mo te valoaga a Sakalia, e se o‵mai fua te “tokosefulu” mai fenua katoa kae e o‵mai foki mai “‵gana kese‵kese” o atufenua katoa. E a, ko matea ne tatou te fakataunuga likiliki o te valoaga tāua tenei? Ao, ko oti eiloa.

7. Ne a fakamatalaga e fakaasi mai i ei me ko oko atu nei te tala ‵lei ki tino i “‵gana kese‵kese” katoa?

⁷ Ke mafau‵fau ki nisi fakamatalaga. I te limasefulu tausaga ko ‵teka ne ‵lomi sāle a ‵tou tusi i ‵gana e 90 fua. I aso nei, ko oti ne oko atu te aofaki tenā ki te 400. Ne seki fakatamala “te tavini fakamaoni kae poto” i te tukumaiga o tusi, ke oko foki ki ‵gana kolā e fai‵pati fua ki ei a nāi tino. (Mataio 24:45) E pelā mo tusi faka-te-Tusi Tapu i te ‵gana Greenland (e fai‵pati ki ei a tino e toko 47,000), te ‵gana Palau (e toko 15,000 fua a tino e fai‵pati ki ei), te ‵gana Yap (e fai‵pati ki ei a tino e mu‵tana ifo i te toko 7,000).

“E Uke Avanoaga Konei mō te Galuega”

8, 9. Se a te pogai ne ‵tala mai ei se ‘avanoaga lasi’ ki a tatou, kae ne ‵saga atu pefea ki ei te fia afe o Molimau?

⁸ Kae kāti ko seai se manakoga i aso nei ke olo atu ki nisi fenua o talai atu te tala ‵lei ki tino kolā e fai‵pati ki ‵gana kese‵kese katoa. I tausaga fakamuli nei, ko oti ne ‵nofo atu te fia miliona o tino fakaa‵lofa i atufenua mau‵mea kae ko maua aka i ei a potukau e tokouke kolā e fai‵pati ki ‵gana kese‵kese e uke. E pelā mo Paris i Falani, kāti e 100 a ‵gana kese‵kese e fakaaogā i ei. I Toronto, Kanata, e 125 te aofaki; kae e silia atu i te 300 o ‵gana kese‵kese e fakaaogā i Lonitona, i Egelani! Ona ko te tokouke o tino mai nisi fenua e ‵nofo i loto i koga talai o fakapotopotoga e uke, ‘ko maua ei a avanoaga e uke’ ke talai atu te tala ‵lei ki tino mai atufenua katoa.​​—1 Kolinito 16:9.

⁹ E ‵saga atu te fia afe o Molimau ki te tulaga faigata tenei mai te taulotoga o se isi ‵gana. E se faigofie ki a latou te faiga o te mea tenā; kae e sili atu te lotou fiafia e maua mai te fesoasoani atu ki tino fakaa‵lofa konei ke iloa ne latou te munatonu mai te Muna a te Atua. I se tausaga fakamuli nei, toeitiiti kae kātoa te 40 pasene o tino kolā ne papatiso i fono ‵lasi i te fenua e tasi i Eulopa ki Togāla ne o’mai mai nisi fenua.

10. Ne fakaaogā pefea ne koe te tamā tusi ko te Good News for People of All Nations? (Ke onoono ki “Vaega Kese‵kese o te Tamā Tusi ko te Good News for People of All Nations,” i te pokisi i te itulau e 32.)

¹⁰ E tonu, kāti e se ‵kafi ne te tokoukega o tatou o tauloto se isi ‵gana. E ui i ei, e mafai eiloa o fesoasoani atu tatou ki tino fakaa‵lofa mai te fakaaogāga o te tamā tusi telā ne fatoā ‵tala mai ko te Good News for People of All Nations,b kae telā e maua i ei se fekau mai te Tusi Tapu i ‵gana kese‵kese e uke. (Ioane 4:​37) E a, e fakaaogā ne koe te tusi tenei i te galuega talai?

Kafai e se Fia ‵Saga Mai a Tino

11. Ne a nisi fakalavelave e maua atu i nisi fenua?

¹¹ E ‵tusa eiloa mo te gasoloakaga o fakamalosiga a Satani i te lalolagi, e fe‵paki faeloa tatou mo te suā fakalavelave tenei​​—ko koga talai kolā e se fia ‵saga malosi mai i ei a tino. E se ‵poi tatou i te tulaga tenei, me ko leva ne ‵valo mai ne Iesu te mea tenā. I ana pati e uiga ki ‵tou aso nei, ana muna: “A mea konā e fai ne latou ke na gasolo ei o sē a‵lofa kae amio ma‵sei a tino.” (Mataio 24:12) E tonu, ko oti ne gasolo ifo te tali‵tonu o tino ki te Atua, penā foki loa mo te lotou āva ki te Tusi Tapu. (2 Petelu 3:​3, 4) Ona ko te mea tenā, ko gasolo ei o sē tokouke a tino e fia fai mo fai ne soko ‵fou o Keliso i nisi koga i te lalolagi. Kae e se fakauiga i ei me ko seai eiloa se aogā o galuega o ‵tou taina mo tuagane Kelisiano pele kolā e talai atu mo te fakamaoni i vaegā koga penā. (Epelu 6:​10) Kaia? Mafaufau ki te mea tenei.

12. Ne a fakamoemoega tāua e lua i te ‵tou galuega talai?

¹² E faka‵mafa mai i te Evagelia a Mataio a fakamoemoega tāua e lua i te ‵tou galuega talai. E tasi ko te faiga o soko i “fenua katoa.” (Mataio 28:19) A ko te suā mea ko te faiga o te fekau o te Malo mo fai se “molimau.” (Mataio 24:14) E tāua ‵ki a mea konei e lua, kae tai sili atu eiloa te lua o mea. Kaia?

13, 14. (a) Se a te vaega tāua e tasi o te fakailoga o te fakatasi mai o Keliso? (e) Se a te mea e ‵tau o masaua ne tatou, maise eiloa māfai e talai tatou i koga kolā e se fia ‵saga malosi mai i ei a tino?

¹³ Ne tusi ne Mataio a te fesili a apositolo ki a Iesu: “Ne a foki a fakailoga e iloa ei tou foki mai mo te gataga o te lalolagi?” (Mataio 24:3) I tena tali ki ei, ne fai atu a Iesu me e tasi te vaega tāua o te fakailoga tenā ko te faiga o te galuega talai i te lalolagi kātoa. E mata, ne faipati a ia i konei ki te faiga o soko? Ikai. Ana muna: “A te Tala ‵Lei tenei e uiga ki te Malo, e fakamatala atu ki te lalolagi kātoa mo fai te molimau ki tino katoa.” (Mataio 24:14) Telā la, ne fakailoa mai ne Iesu i te galuega ko te talaiatuga o te Malo se vaega tāua o te fakailoga.

¹⁴ Telā la, i taimi e talai atu ei ne tatou te tala ‵lei e uiga ki te Malo, e masaua ne tatou me kafai e se manuia faeloa te faiga o soko, e manumalo eiloa tatou i te tukuatuga o se “molimau.” Faitalia te auala e ‵saga mai ei a tino, e iloa ne latou te mea telā e fai ne tatou, kae e ‵kau atu eiloa tatou ki te fakataunuga o te valoaga a Iesu. (Isaia 52:7; Fakaasiga 14:​6, 7) Konei a pati a Jordy, se Molimau talavou i Eulopa ki Togāla: “Ona ko toku iloa i au e fakaaogā ne Ieova ke fai soku tusaga i te fakataunuga o te Mataio 24:​14, e fai ei au ke fiafia malosi.” (2 Kolinito 2:​15-​17) Kāti e penā foki ou lagonaga.

Kafai e ‵Teke Mai ki te ‵Tou Fekau

15. (a) Se a te mea ko leva ne fakailoa atu ne Iesu ki ana soko? (e) Se a te mea e fai ei ke talai atu faeloa tatou faitalia a ‵tekemaiga?

¹⁵ A te suā mea faigata i te talaiatuga o te tala ‵lei o te Malo ko te ‵teke mai o tino. Ne fakailoa atu te mea tenā ne Iesu ki ana soko: “E takalia‵lia a fenua katoa ki a koutou, ona ko toku igoa.” (Mataio 24:9) E pelā mo Kelisiano i aso mua, ko oti eiloa ne takalia‵lia, ‵teke atu, kae fakasauāgina a soko o Iesu i aso nei. (Galuega 5:​17, 18, 40; 2 Timoteo 3:​12; Fakaasiga 12:​12, 17) I nisi fenua, e fakatapu i ei te lotou galuega ne malo. E ui i ei, ona ko te lotou faka‵logo ki te Atua, e tumau eiloa a Kelisiano ‵tonu i fenua konā i te talaiatuga o te tala ‵lei o te Malo. (Amosa 3:8; Galuega 5:​29; 1 Petelu 2:​21) Se a te mea e fakamalosi atu ki a latou, e pelā foki mo nisi Molimau i te lalolagi kātoa, ke fai penā? E tuku atu ne Ieova te malosi ki a latou e auala i tena agaga tapu.​​—Sakalia 4:11; Efeso 3:​16; 2 Timoteo 4:​17.

16. Ne fakaasi mai pefea ne Iesu te sokoga i te vā o te galuega talai mo te agaga o te Atua?

¹⁶ Ne faka‵mafa mai ne Iesu te sokoga i te vā o te agaga o te Atua mo te galuega talai i ana pati konei ki ana soko: “Ka faka‵fonugina koutou i te ‵mana manafai e oko atu ki luga i a koutou a te Agaga Tapu. Ka fai foki koutou mo molimau ki a au . . . ke oko eiloa ki kapakapalagi o te lalolagi.” (Galuega 1:8; Fakaasiga 22:17) E tāua te fakasolomaiga o mea kolā e ‵tau o ‵tupu i te fuaiupu tenei. Muamua la, ne maua ne soko te agaga tapu, kae ne ‵saga malosi atu ei latou ki te faiga o te galuega talai i te lalolagi kātoa. Ne mafai fua o maua ne latou te malosi ke tumau i te tukuatuga o “te molimau ki tino katoa io me ki atufenua katoa,” mai te ‵lago atu o te agaga o te Atua. (Mataio 24:​13, 14; Isaia 61:​1, 2) Tenā eiloa te pogai ne fakasino atu ei a Iesu ki te agaga tapu e pelā me ko “te Fesoasoani.” (Ioane 15:26) Ana muna me ka akoako kae fakatonutonu ne te agaga o te Atua ana soko.​​—Ioane 14:​16, 26; 16:13.

17. Kafai ko fe‵paki tatou mo se ‵tekemaiga fakamataku, e fesoasoani mai pefea te agaga tapu ki a tatou?

¹⁷ I auala fea e fesoasoani mai ei te agaga o te Atua ki a tatou i aso nei māfai ko fe‵paki tatou mo ‵tekemaiga matagā i te talaiatuga o te tala ‵lei? E fakamalosi tatou ne te agaga o te Atua, kae e ‵teke atu ki a latou kolā e fakasauā mai ki a tatou. Ka matea ne tatou te mea tenei i se mea e tasi telā ne tupu i te olaga o te tupu ko Saulo.

E ‵Teke Atu te Agaga o te Atua

18. (a) Se a te ‵fuliga lasi ki te masei telā ne oko atu ki a Saulo? (e) Ne a togafiti ne fakaaogā ne Saulo ke fakasauā atu ei ki a Tavita?

¹⁸ Ne ‵lei eiloa te kamataga o Saulo telā ko te tupu muamua o Isalaelu, kae fakamuli ifo ne seki fakalogo a ia ki a Ieova. (1 Samuelu 10:​1, 24; 11:​14, 15; 15:​17-​23) Ona ko te mea tenā, ne seki toe ‵lago atu ei a te agaga o te Atua ki te tupu tenā. Ne kaitaua kae fia tamate a Saulo ki a Tavita, telā ko oti ne faū mo fai te tupu i ana tua kae ko ‵lago atu nei ki ei te agaga o te Atua. (1 Samuelu 16:​1, 13, 14) Ne foliga mai me ne faigofie o tamate ne ia a Tavita. Ne taofi fua ne Tavita se mea fakatagitagi a ko Saulo ne fakaaogā ne ia se tao. Telā la, i te aso e tasi ne tātā ei a Tavita i te kitala, “ne velo . . . ne ia Tavita ki te ‵tao” mo ana pati penei: “ ‘Ka velo ne au a ia ke ‵mau tasi mo te ‵pui’ . . . kae ne fakaseke faeloa ne Tavita” a te ‵tao i taimi e lua konā. (1 Samuelu 18:​10, 11) Fakamuli ifo, ne toe ‵fuli ei a te mafaufau o Saulo. Ne fakalogo a ia ki tena tama ko Ionatana, te taugasoa o Tavita, kae tauto atu “i te igoa o te Aliki me ka se tamate ne ia Tavita.” Kae ne toe taumafai a Saulo o “velo Tavita ke ‵mau tasi mo te ‵pui, ka ko Tavita ne fakaseke ne ia te ‵tao, tena ne mau atu ei te tao ki te ‵pui.” Ne sola ei keatea a Tavita, kae ne lamalama faeloa a ia ne Saulo. I te taimi faigata tenā, ne fai ei te agaga o te Atua e pelā me se tino ‵teke ki a Saulo. I se auala pefea?​​—1 Samuelu 19:​6, 10.

19. Ne fakasao pefea ne te agaga o te Atua a Tavita?

¹⁹ Ne tele atu a Tavita ki te pelofeta ko Samuelu, kae ne uga atu ne Saulo ana tāgata ke puke mai a Tavita. Kae i te lotou okoatuga ki te koga ‵muni o Tavita, “ne ulufia te kau konā a Saulo ne te agaga o te Atua, tenā ne ‵saka kae paka‵laga foki ei latou.” Ne pokotia masei latou i te malosi o te agaga o te Atua telā ne puli atu ei te pogai o te lotou malaga. Ne toe uga atu fakalua ne Saulo a tāgata ke puke mai a Tavita, kae ne toe tupu foki te mea tenā ki a latou. Fakamuli loa, ne fanatu eiloa a Saulo ki a Tavita, kae ne seki ‵kafi foki o fakafesagai ne ia te agaga o te Atua. Ko tena uiga, ne taofi a ia ne te agaga o te Atua ke mo a ma gasuesue “i te ao kātoa . . . e pelā foki i te po kātoa”​​—ko te mea ke maua ne Tavita se avanoaga o tele keatea.​—1 Samuelu 19:​20-24.

20. Se a te akoakoga e maua ne tatou mai te tala e uiga ki fakasauāga kolā ne fai ne Saulo ki a Tavita?

²⁰ E maua ne tatou se akoakoga fakamalosi loto mai te tala e uiga ki a Saulo mo Tavita: E se mafai o manumalo a tino fakasauā i tavini a te Atua māfai e ‵teke atu te agaga o te Atua ki a latou. (Salamo 46:11; 125:2) Ko oti ne fakaiku ne Ieova ke fai a Tavita mo fai te tupu i Isalaelu. E seai lele eiloa se tino e mafai o ‵fuli ne ia te mea tenā. I ‵tou aso nei, ko oti ne fakaiku aka ne Ieova ‘ke talai atu te tala ‵lei e uiga ki te malo.’ E seai eiloa se tino e mafai o fakagata ne ia te mea tenā.​​—Galuega 5:​40, 42.

21. (a) E fai pefea a faifaiga a nisi tino ‵teke i aso nei? (e) Se a te mea e tali‵tonu katoatoa tatou ki ei?

²¹ E fakaaogā ne takitaki o lotu mo malo a ‵loi, penā foki loa mo fakasauāga ke faka‵lave ei tatou. Kae, e pelā eiloa mo te puipuiga ne Ieova a Tavita i te feitu faka-te-agaga, ka puipui foki ne Ia Ana tino i aso nei. (Malaki 3:6) Telā la, e pelā mo Tavita, e fai atu tatou mo te loto tali‵tonu penei: “Au e fakatuanaki ki a ia, tenā te mea ka se mataku ei au. Se a te mea e mafai ne se tino o fai mai ki a au?” (Salamo 56:11; 121:​1-8; Loma 8:31) E tonu, fakatasi mo te fesoasoani o Ieova, ke na tumau eiloa tatou i te fakafesagai atu ki mea faiga‵ta i te faiga o te ‵tou galuega telā ne tuku mai ne te Atua, ko te talaiatuga o te tala ‵lei o te Malo ki tino i atufenua katoa.

[Fakamatalaga mai lalo]

E Masaua ne Koe?

• Kaia e ‵tau ei o fakamafuli‵fuli sāle aka a auala e fakaaogā ne tatou i te galuega talai?

• Ne a “avanoaga” ‵fou ko oti ne ‵tala mai ki a tatou?

• Ne a mea ne iku mai i te ‵tou galuega talai, ke oko foki eiloa ki koga kolā e se fia ‵saga malosi mai i ei a tino?

• Kaia e seai ei se tino ‵teke e mafai o fakagata ne ia te talaiatuga o te tala ‵lei e uiga ki te Malo?

[Pokisi/Ata i te itulau e 28]

E Maua i ei te Lotomalie Lasi

“E fia‵fia kae lotoma‵lie latou i te lotou tavini fakatasi atu ki a Ieova.” E fakaasi mai i ei a lagonaga o se kāiga telā ne olo atu mai Sepania ki Polivia. Ne fanatu se tama tagata o te kāiga tenā o fesoasoani atu ki se tamā potukau i se koga telā e faigata o oko ki ei a tino. A te lasi o tena fiafia ne fai ei ke ofo ana mātua, olo atu ei te kāiga kātoa tenā​​—e aofia i ei a tamaliki tāgata e tokofa kolā ko 14 ki te 25 olotou tausaga​​—o tavini atu i konā. Ko fai nei a tamaliki tāgata e tokotolu konā mo fai ne paenia, kae ko te tamaliki telā ne fanatu muamua, ko oti ne kau atu nei ki te Akoakoga Fakamasani mō Tavini Fakafaifeau.

“E uke a fakalavelave i konā,” ko pati a Angelica, telā ko 30 ana tausaga, mai Kanata kae ne galue i Eulopa ki te Saegāla, “kae ne maua eiloa ne au te fiafia mai te fesoasoani atu ki tino i te galuega talai. Ne otia foki toku loto i te uke o fakafetai mai Molimau i te fenua tenei e uiga ki toku fanatu o fesoasoani ki a latou.”

“Ne uke ‵ki eiloa a tuu mo aganuu kese‵kese ne ‵tau o fakamasani maua ki ei,” ko muna a se tautaina fāfine ko taki 20 tupu lā tausaga mai te Iunaite Sitete kolā ne ga‵lue i te Dominican Republic. “E tiga te feitu tenā, ne tumau eiloa maua i te mā galuega, kae ko tokofitu a mā a‵koga faka-te-Tusi Tapu ko ‵kau mai nei ki fakatasiga.” Ne fakatoka eiloa ne te tautaina konei se potukau o tino talai i se fa‵kai telā e seai se fakapotopotoga i ei.

A Laura, se tuagane telā ko fano ki te 30 o ana tausaga, kae ko oti ne galue i se isi fenua i tausaga e silia atu i te fa. Ana muna: “Ne taumafai malosi au o fakafaigofie toku olaga. Ne fesoasoani atu te mea tenei ke matea ne taina me i te olaga faigofie se mea telā e ‵tau o filifili ki ei kae e fakaasi atu foki i ei te ‵lei o te mafaufau, kae e se ko te mativa. A te fesoasoani atu ki nisi tino, maise eiloa ki talavou, e fakapaleni aka ei a mea faiga‵ta kolā e fe‵paki mo koe i te galuega i nisi fenua. E se mafai eiloa o fesuiaki ne au toku olaga i konei ki se isi vaegā olaga, kae ka nofo eiloa au i konei māfai e talia ne Ieova.”

[Pokisi/Ata i te itulau e 32]

Vaega Kese‵kese o te Tamā Tusi ko te Good News for People of All Nations

E maua i te tamā tusi ko te Good News for People of All Nations se fekau i se itulau e tasi i ‵gana kese‵kese e 92. Ne tusi te fekau tenei ke fakasino atu ki tino taki tokotasi. Telā la, kafai e faitau se tino ki ei, e pelā eiloa me ko faipati atu koe ki a ia.

E ‵lomi atu i te fakavaka i loto se mape o te lalolagi. Fakaaogā te mape tenei ke fai ei se fesokotakiga mo te tino i te fale. E mafai o fakasino atu koe ki te fenua telā e nofo koe i ei kae fakailoa atu me e fia iloa ne koe tena fenua. I te faiga tenā, ko mafai ei o maua sou fesokotakiga ‵lei mo ia.

E fakasolo atu i te fakatomuaga ki te tamā tusi tenei a lasaga e ‵tau o tau‵tali tatou ki ei ko te mea ke mafai o tuku atu se fesoasoani magoi ki tino e fai‵pati ki ‵gana kolā e se malamalama tatou i ei. Fakamolemole, faitau kae fakaaogā faka‵lei a lasaga konā.

E se fakasolo atu fua a ‵gana kese‵kese i ei kae e pelā foki mo olotou fakailoga takitasi. E fesoasoani mai te faiga tenei ke mafai o matea ne tatou a fakailoga o ‵gana konei i ‵tou tamā pepa mo nisi tusi aka i ‵gana kese‵kese konei.

[Ata i te itulau]

E fakaaogā ne koe te tamā tusi tenei i te galuega talai?

[Ata i te itulau e 29]

Ko maua nei a ‵tou tusi faka-te-Tusi Tapu i ‵gana e silia atu i te 400

KANA

FILIPAINA

SUTENI

[Ata i te itulau e 30]

E mafai o galue koe i se koga telā e manakogina i ei a tino talai e tokouke?

ECUADOR

DOMINICAN REPUBLIC