Ke na Fakamaluga Fakatasi Aka ne Tatou te Igoa o Ieova
“Ke takutaku fakatasi atu ne tatou te ‵malu o te Aliki [ko Ieova]; ke tavae foki fakatasi tatou ki tena igoa!”—SALAMO 34:3.
1. Se a te fakaakoakoga ‵lei ne tuku mai ne Iesu i tena galuega i te lalolagi nei?
I TE afiafi po o Nisani 14, 33 T.A., ne usuusu fakatasi ne Iesu mo ana apositolo a vikiga o Ieova i te potu i luga o se fale i Ielusalema. (Mataio 26:30) Ko te taimi fakaoti eiloa tenā ne fai fakatasi ei ne Iesu te mea tenā mo ana apositolo. Kae se mea ‵tau eiloa ke fakaoti ne ia tena fakatasiga mo latou i te auala tenā. Mai te kamataga o tena galuega ke oko eiloa ki tena fakaotiga, ne tavae faeloa ne Iesu tena Tamana kae fakailoa atu mo te loto finafinau a Tena igoa. (Mataio 4:10; 6:9; 22:37, 38; Ioane 12:28; 17:6) E tonu, ne fai eiloa ne ia te ‵kamiga tenei a te faisalamo: “Ke takutaku fakatasi atu ne tatou te ‵malu o te Aliki; ke tavae foki fakatasi tatou ki tena igoa!” (Salamo 34:3) Mafaga o fakaakoakoga ‵lei mō tatou ke tau‵tali i ei!
2, 3. (a) E iloa pefea ne tatou me isi se uiga fakavaloaga tāua o te Salamo 34? (e) Ne a mea ka sau‵tala tatou ki ei i te mataupu tenei mo te mataupu telā e ‵soko mai?
2 I ne nāi itula mai tua o te usuusuga ne latou a vikiga fakatasi mo Iesu, ne molimau mai a te apositolo ko Ioane ki se isi mea telā ne ‵kese ‵ki. Ne matea ne ia tena Matai e tamate fakatasi mo te tokolua tino ma‵sei i luga i sataulo. Ne ‵fati ne sotia Loma a vae o te tokolua tino ma‵sei ke na ‵mate fakavave laua. Kae ne lipoti mai ne Ioane me ne seki ‵fati ne latou a vae o Iesu. I te oloatuga a sotia ki a Iesu, a ko ia ko leva ne mate. I tena Evagelia, ne fakaasi mai ne Ioane a te mea tenā me ko te fakataunuga o se isi vaega o te Salamo 34: “E seai eiloa se ivi o ia e fati.”—Ioane 19:32-36; Salamo 34:20, Septuagint.
3 E uke foki a nisi manatu tāua mō Kelisiano i te Salamo 34. Tela la, i te mataupu tenei mo te mataupu telā e ‵soko mai, ka onoono tatou ki fakanofonofoga ne tusi ei ne Tavita te salamo tenei, ko mafau‵fau ei tatou ki mea fakamalosi loto i te salamo tenā.
Te ‵Telega Keatea a Tavita Mai i a Saulo
4. (a) Kaia ne fakaeke ei a Tavita mo fai te tupu o Isalaelu i aso mai mua? (e) Kaia ne “fiafia malosi” ei a Saulo ki a Tavita?
4 Ne fai a Saulo mo fai te tupu o Isalaelu a ko Tavita koi foliki fua. Kae ne kamata o se fakalogo a Saulo, galo ei i a ia te taliaga a Ieova. Ona ko te pogai tenā, ne fai atu ei te pelofeta ko Samuelu ki a ia: “Ko ‵sae nei ne te Aliki mai ou lima a te malo o Isalaelu, kae tuku atu ki se tino e ‵lei atu i a koe.” (1 Samuelu 15:28) Fakamuli ifo, ne uga atu ne Ieova a Samuelu ke fakaeke ne ia a Tavita, te tama tagata foliki eiloa a Iese mo fai te suā tupu o Isalaelu. I te vaitaimi tenā, ne galo i a Saulo te agaga o te Atua kae ne pokotia malosi a ia i te loto māfatia. Ne avatu a Tavita, se tino apo i te tātā kitala, ke tavini atu ki te tupu i Kipea, kae ne fakamafanafana atu a pese a Tavita ki a Saulo kae “ne fiafia malosi a Saulo ki a Tavita.”—1 Samuelu 16:11, 13, 21, 23.
5. Kaia ne ‵fuli ei te kilokiloga a Saulo e uiga ki a Tavita, kae se a te mea ne faimālō atu i ei ke fai ne Tavita?
5 Ne fakatasi atu eiloa a Ieova ki a Tavita i taimi katoa. Ne fesoasoani atu a Ieova ki tou tagata ke fakatakavale ne ia a te mafi o Filisitia ko Koliata, kae ne ‵lago atu foki ki a Tavita i te taimi ne fakaaloalogina ei tou tagata i Isalaelu ona ko tena poto i te faiga o taua. Kae ne fai ei a fakamanuiaga a Ieova ki luga i a Tavita mo fai te mea e masalosalo ei a Saulo, kae ne gasolo o kaitaua tou tagata ki a Tavita. Ne velo fakalua ne te tupu a Tavita ki te tao i taimi ne tātā ei ne Tavita te kitala i mua o Saulo. I taimi e lua konā, ne mafai ne Tavita o fakaseke te ‵tao. I te tolu o taimi ne taumafai ei a Saulo o tamate a ia, ne matea ei ne te tino telā ka fai mo fai te tupu me ko ‵tau o sola a ia keatea. Fakamuli loa, ona ko te tumau o taumafaiga a Saulo ke ‵poa kae tamate a ia, ne fakaiku aka ei ne Tavita ke fano a ia o ‵muni i se fenua i tua o Isalaelu.—1 Samuelu 18:11; 19:9, 10.
6. Kaia ne fakatonu atu ei a Saulo ke tamate a tino katoa o te fa‵kai ko Nopa?
6 I tena auala ki te tuakoi o Isalaelu, ne afe aka a Tavita i te fa‵kai ko Nopa, ko te koga telā ne tu mua i ei a te faleie tapu o Ieova. Ne ‵kau atu eiloa a tamataene ki a Tavita i tena solaga, kae ne ‵sala atu ei a Tavita ki ne meakai mo meainu ma latou. Ne iloa ne Saulo me ne tuku atu ne te faitaulaga sili ki a Tavita mo ana tāgata a meakai mo te pelu a Koliata telā ko mate. Ona ko tena kaitaua, ne fakatonu atu a Saulo ke tamate a tino katoa o te fa‵kai, e aofia i ei a faitaulaga e toko 85.—1 Samuelu 21:1, 2; 22:12, 13, 18, 19; Mataio 12:3, 4.
Ne Toe Sao Mai te Mate
7. Kaia ne seki fai ei a Kata mo fai se koga ‵lei ke ‵muni i ei a Tavita?
7 Mai i Nopa, ne sola a Tavita ki te feitu ki te togālā i se 25 maila ki loto i te fenua ko Filisitia kae ‵sala atu ki se puipuiga mai te tupu ko Akisa i te fa‵kai o Koliata ko Kata. Kāti ne talitonu a Tavita me ka faigata o ‵sala atu a Saulo ki a ia i konā i Kata. Ne seki leva kae matea ne tavini a te tupu o Kata a Tavita. I te lagonaga ne Tavita i a ia ko iloa, “ne mataku ei a ia i a ia ma tamate ne te tupu ko Akisa.”—1 Samuelu 21:10-12.
8. (a) Se a te mea e fakaasi mai ki a tatou i te Salamo 56 e uiga ki te tala o Tavita i Kata? (e) Ne sao amate atu pefea a Tavita mai te mate?
8 Ne ‵poa ne tino Filisitia a Tavita. E se taumate tenei te taimi ne ‵fatu ei ne Tavita te salamo mai tena ‵kano loto o fakamolemole atu ki a Ieova: “Utu aka oku loimata ki loto i tau atigi fagu.” (Salamo 56:8, Tusi Paia, Samoa mo tena ulutala) Ne fakaasi atu ne ia i konā a tena talitonu me ka se puli i a Ieova a tena fanoanoa kae ka tausi atu eiloa mo te alofa kae puipui atu ki a ia. Ne fai foki ne Tavita se aofaga ke fakaloiloi aka ei te tupu o Filisitia. Ne fakavalevale fakaloiloi tou tagata. I te laveaga ne ia o te mea tenā, ne kaitaua ei te Tupu ko Akisa ki ana tavini i te avatuga ne latou se tino “valea” ki a ia. E manino ‵lei me ne fakamanuia ne Ieova te aofaga a Tavita. Ne afuli keatea a Tavita mai te fa‵kai, telā ne sao amate atu eiloa tou tagata mai te mate.—1 Samuelu 21:13-15.
9, 10. Se a te pogai ne tusi ei ne Tavita te Salamo 34, kae kāti se a te suā mea ne mafaufau a ia ki ei i te ‵fatūga ne ia o te salamo tenā?
9 E se fai mai te Tusi Tapu me ne ‵sola fakatasi a Tavita mo ana tino ki Kata io me ne ‵nofo latou i fa‵kai ‵pili o Isalaelu o leoleo a ia mai i ei. Faitalia te mea ne tupu, kāti ne ‵tau o fia‵fia lasi latou i te fakaasiatuga ne Tavita te auala ne toe fakasao ei a ia ne Ieova. Ne fakavae eiloa te Salamo 34 ki luga i te mea tenā, e pelā mo te mea e fakaasi mai i tena ulutala. I fuaiupu muamua e fitu o te salamo tenā, ne tavae ei ne Tavita a te Atua ona ko te fakasaoga ne ia a ia, kae ‵kami atu ana tino ke ‵kau atu ki a ia i te fakamalugāga o Ieova, te Tino Faka‵sao Tino Sili o Ana tino.—Salamo 34:3, 4, 7.
10 Ne maua ne Tavita mo ana tāgata se puipuiga ‵lei i te ana o Atulama, se koga maugā o Isalaelu kāti se sefulu maila ki te saegālā o Kata. I konā, ne kamata ei o ‵kau atu ki a ia a tino Isalaelu kolā ne seki fia‵fia ki faifaiga mai lalo i te pulega a te tupu ko Saulo. (1 Samuelu 22:1, 2) I te ‵fatūga ne Tavita a kupu o te Salamo 34:8-22, kāti ne mafaufau a ia ki tino konā. E tāua foki a fakamasauaga i fuaiupu konā ki a tatou i aso nei, kae ka aogā eiloa ki a tatou a te sukesuke māea ki te salamo gali tenei.
E Mata, e ‵Pau te Mea e Mafaufau Muamua Koe ki ei e Pelā mo Tavita?
11, 12. Ne a pogai e ‵tau ei o tavae atu faeloa ne tatou a Ieova?
11 “Au e fakafetai faeloa ki [a Ieova], e se gata eiloa aku tavaega ki a ia.” (Salamo 34:1) E pelā me se tino ne fakaaunua, ne ‵tau o uke a mea faka-te-foitino ne manavase a Tavita ki ei, kae e pelā mo te mea e fakaasi mai i pati konei, ne seki talia ne ia ke fakalavelave atu ana manakoga i aso takitasi ki tena fakaikuga ke tavae atu ki a Ieova. Ma‵faga o fakaakoakoga ‵lei mō tatou māfai ko fe‵paki tatou mo mea faiga‵ta! Faitalia me e ‵nofo tatou i te akoga, i te galuega ‵togi, i tafa o taina Kelisiano, io me i te galuega talai, a te ‵tou manakoga muamua ko te tavae atu ki a Ieova. Mafaufau ki te uke o pogai ke fai ei penā! E pelā mo te seai o se gataga ki mea kolā e mafai o iloa ne tatou kae fia‵fia ki ei i galuega fakaofoofogia a Ieova ne fai. Kae mafaufau la ki mea kolā ko oti ne fakataunu ne ia e auala i te vaega o tena fakapotopotoga saukātoa i te lalolagi! E tiga eiloa e se ‵lei katoatoa latou, ko oti ne fakaaogā ne Ieova a tino fakamaoni i se auala lasi ‵ki i taimi konei. E pefea te ‵pau o galuega a te Atua ko oti ne fai mo galuega a tāgata kolā e tavae ne te lalolagi? E mata, e lotomalie koe ki pati a Tavita kolā ne tusi mai: “Te Aliki, e seai ake eiloa se Atua e ‵pau mo koe, e seai eiloa se tino e mafai ne ia o fai a mea kolā ko oti ne fai ne koe”?—Salamo 86:8.
12 E pelā mo Tavita, e fia tavae atu foki tatou ki a Ieova i taimi katoa ona ko ana galuega se fuafuagina. E se gata i ei, e ‵lifu tatou ke iloa atu me ko nofo nei i lima o te sui tumau o Tavita, ko Iesu Keliso, a te Malo o te Atua. (Fakaasiga 11:15) E fakauiga i ei me ko pili mai eiloa te gataga o te olaga masei tenei. Ko tu nei i se tulaga fakamataku a te avanoaga ke maua ne te aofaki o tino e silia atu i te ono piliona a te ola se-gata-mai. Tenei eiloa te taimi ko manakogina malosi ei ke fakailoa atu ki nisi tino e uiga ki te Malo o te Atua mo mea kolā ko pili o fai ne ia mō tino katoa, kae fesoasoani atu ki a latou ke ‵kau mai ki a tatou i te avatuga o tavaega ki a Ieova. E mautinoa eiloa te mea e ‵tau o fakamuamua ne tatou i ‵tou olaga, ko te fakaaogāga o so se avanoaga ke fakamalosi atu ke talia ne nisi tino a “te tala ‵lei” a koituai o talimuli.—Mataio 24:14.
13. (a) Ko oi te tino ne fakamatamata ki ei a Tavita, kae ko oi ne ‵saga atu ki ei? (e) E ‵taki atu pefea a tino loto mau‵lalo ki te fakapotopotoga Kelisiano i aso nei?
13 “Ka tavae atu au ki a [Ieova] i ana mea ne fai; ke faka‵logo kae fia‵fia a tino katoa kolā e puapuagātia.” (Salamo 34:2) Ne seki tavae ne Tavita i konei se mea i ana mea totino ne fai. E pelā mo te fakaloiloiga ne ia o te tupu o Kata. Ne iloa ne ia me ne puipui a ia ne Ieova i tena nofoga i Kata, kae ne sao atu a ia i te fesoasoani o Ieova. (Faataoto 21:1) Tela la, ne seki fakamatamata a Tavita ona ko ana mea ne fai, kae ona ko mea ne fai ne Ieova. Ona ko te mea tenei, ne ‵taki atu ei a tino loto mau‵lalo ki a Ieova. Ne fakamaluga foki ne Iesu te igoa o Ieova, kae ne ‵taki atu ei a tino loto mau‵lalo, ko tino kolā e akoakogofie, ki a Ia. I aso nei, e ‵taki atu a tino loto mau‵lalo o atufenua katoa ki te fakapotopotoga saukātoa o Kelisiano fakaekegina i te lalolagi kātoa, telā ko Iesu te Ulu i ei. (Kolose 1:18) E otia a loto o tino loto mau‵lalo konā, māfai e lagona ne latou te faka‵maluga o te igoa o te Atua ne ana tavini loto mau‵lalo mo te fekau mai te Tusi Tapu, telā e fakamaina atu ne te agaga tapu o te Atua.—Ioane 6:44; Galuega 16:14.
E Fakamalosi Aka ne Fakatasiga ‵Tou Fakatuanaki
14. (a) E mata, ne lotomalie fua a Tavita ke tavae tokotasi atu a ia ki a Ieova? (e) Se a te fakaakoakoga ne tuku mai ne Iesu e uiga ki fakatasiga mō tapuakiga?
14 “Ke takutaku fakatasi atu ne tatou te ‵malu o [Ieova]; ke tavae foki fakatasi tatou ki tena igoa!” (Salamo 34:3) Ne seki lotomalie fua a Tavita ke tavae tokotasi ne ia a Ieova. Ne ‵kami fakaaloalo atu ne ia ana taugasoa ke ‵kau atu ki a ia i te fakamalugāga o te igoa o te Atua. E penā foki loa, ne fiafia malosi a Iesu Keliso, te Tavita Sili, o tavae a Ieova i mua o tino katoa—i te sunako, i fakamanatuga i te faletapu o Ieova i Ielusalema, e pelā foki māfai e ‵nofo latou mo ana soko. (Luka 2:49; 4:16-19; 10:21; Ioane 18:20) Mafaga o tauliaga fakafiafia ke tau‵tali atu i te fakaakoakoga a Iesu i te avatuga o tavaega ki a Ieova i so se avanoaga e maua fakatasi mo taina tali‵tonu, maise eiloa i te taimi nei me ko iloa ne tatou “i te Aso o te Aliki ko pili mai.”—Epelu 10:24, 25.
15. (a) Ne pokotia pefea a tino o Tavita i ana mea ne fai? (e) E maua pefea ne tatou a mea aogā mai te ‵kau atu ki ‵tou fakatasiga?
15 “Au ne ‵talo ki [a Ieova] kae ne tali mai a ia ki a au; ne fakasao ne ia au i mea katoa ne mataku au ki ei.” (Salamo 34:4) Ne tāua ki a Tavita a te mea tenei, me ne toe fai atu a ia penei: “Ne kalaga atu ki a ia [te] tino puapuagātia kae ne tali mai a ia; ne fakasao ne ia [a ia] mai [i ana] puapuagā katoa.” (Salamo 34:6) Kafai e ‵nofo fakatasi tatou mo taina tali‵tonu, e maua ne tatou a avanoaga e uke ke sau‵tala ki tala fakamalosi loto e uiga ki te auala ne fesoasoani mai ei a Ieova ke kufaki tatou i mea faiga‵ta. E fakamalosi aka ne te mea tenei te fakatuanaki o ‵tou taina tali‵tonu, e pelā eiloa mo te fakamalosiga ne Tavita te fakatuanaki o ana tino. E pelā mo taugasoa o Tavita, “ne ‵kilo ki a [Ieova] kae fia‵fia; ka se toe fanoa‵noa eiloa io me e ‵mā latou.” (Salamo 34:5) E tiga eiloa ne ‵sola keatea latou mai te tupu ko Saulo, ne seki ‵mā latou. Ne tali‵tonu latou me ne ‵lago atu eiloa te Atua ki a Tavita, kae ne fia‵fia latou. E penā foki te ‵kilo atu o tino ‵fou e pelā foki mo tino kolā ko leva ne fai mo fai ne Kelisiano ‵tonu, ki te ‵lago mai o Ieova. Ona ko te mea ne lagona tonu eiloa ne latou tena fesoasoani, e fakaasi mai i olotou mata fia‵fia a te lotou fakaikuga ke tumau latou i te fakamaoni.
Ke Fakafetai mō te Fesoasoani o Agelu
16. Ne fakaaogā pefea ne Ieova ana agelu ke faka‵sao ne latou tatou?
16 “E leoleo ne tena agelu a latou kolā e ma‵taku ki te Aliki kae fakasao ne ia latou mai mea faiga‵ta.” (Salamo 34:7) Ne seki kilo atu a Tavita ki tena fakasaoga ne Ieova e pelā me se mea e mafai fua o tupu ki a ia. E tonu, a Tavita ko te tino fakaekegina a Ieova, ko te tupu o Isalaelu i aso mai mua; kae ne iloa ne ia me e fakaaogā ne Ieova ana agelu ke leoleo ne latou a tino tapuaki fakamaoni katoa, faitalia me e ma‵luga olotou tofiga io me ikai. Ko oti foki ne lagona ne tino tapuaki ‵tonu a te puipuiga telā e tuku mai ne Ieova i aso nei. I Siamani mai lalo i te kau Nasi e pelā foki mo Angola, Malawi, Mozambique, mo nisi fenua e uke, ko oti ne taua atu a malo i ei ke fakaseai a Molimau a Ieova. Kae ne seki aogā olotou taumafaiga. E tumau eiloa a Molimau a Ieova i te ga‵solo o tokouke i fenua konā i te lotou ‵kau fakatasi o fakamaluga aka te igoa o te Atua. Kaia? Me e fakaaogā ne Ieova ana agelu o puipui kae takitaki ana tino.—Epelu 1:14.
17. I auala fea e fesoasoani mai ei a agelu a te Atua ki a tatou?
17 I tafa o te mea tenā, e mafai foki ne agelu a Ieova o fakagalue a mea ko te mea ke tapale keatea mai i tino o Ieova so se tino telā e fai ne ia a nisi tino ke ‵siga. (Mataio 13:41; 18:6, 10) E tiga eiloa kāti e se iloa ne tatou i te taimi tenā, e tapale ne agelu a fakalavelave kolā e mafai o faka‵lave aka ei te ‵tou taviniga ki te Atua, kae e puipui ne latou tatou mai mea kolā e fakama‵taku ki te ‵tou fesokotakiga mo Ieova. A ko te ‵toe mea tāua, e takitaki ne latou tatou i te folafolaatuga o “te Tala ‵Lei” ki tino katoa, e aofia i ei a koga kolā e fakamataku te faiga o te galuega talai. (Faakasiga 14:6) E fakaasi atu faeloa a fakamaoniga o te fesoasoani o agelu i tusi faka-te-Tusi Tapu kolā e ‵lomi ne Molimau a Ieova.a Ko tō uke a tala penā ke fai fua pelā me ne mea ‵tupu fakafuasei.
18. (a) Se a te mea e manakogina ke fai ne tatou ko te mea ke aogā ki a tatou te fesoasoani o agelu? (e) Ne a mea ka sau‵tala ki ei i te suā mataupu?
18 Ko te mea ke fakatumau te mauaga o mea aogā mai te takitakiga mo te puipuiga a agelu, e ‵tau o fakatumau ne tatou te faka‵maluga o te igoa o Ieova faitalia a ‵tekemaiga. Ke masaua me “e leoleo ne tena agelu a latou kolā e ma‵taku ki a [Ieova].” Se a te mea e fakaasi mai i te mea tenā? Se a te mataku ki te Atua kae e mafai pefea o ‵toki ne tatou? Kaia e manako ei se Atua telā e alofa ke ma‵taku atu tatou ki a ia? Ka sau‵tala tatou ki fesili konei i te suā mataupu.
[Fakamatalaga mai lalo]
a Ke onoono ki te tusi ko te Jehovah’s Witnesses—Proclaimers of God’s Kingdom, te itulau e 550; 2005 Yearbook of Jehovah’s Witnesses, te itulau e 53-4; Te Faleleoleo Maluga i a, Mati 1, 2000, itulau 5-6; The Watchtower i a Ianuali 1, 1991, te itulau e 27; mo Fepuali 15, 1991, te itulau 26.
Ka Tali Mai Pefea ne Koe?
• Ne a tofotofoga ne kufaki i ei a Tavita i te taimi koi talavou ei tou tagata?
• E pelā mo Tavita, se a te mea muamua e mafaufau malosi tatou ki ei?
• E pefea te ‵tou kilokiloga ki fakatasiga Kelisiano?
• E fakaaogā pefea ne Ieova ana agelu ke fesoasoani mai ki a tatou?
[Fakamatalaga o te Ata i te itulau e 25]
Lama
Kata
Sikilaka
Kipea
Ielusalema
Atulama
Keila
Hepelona
Sifo
Horesh
Maono
Nopa
Peteleema
Eneketi
Kalamelu
Tai Mate
[Te Fakamatalaga]
Map: Based on maps copyrighted by Pictorial Archive (Near Eastern History) Est. and Survey of Israel
[Fakamatalaga o te Ata i te itulau e 25]
E tiga eiloa tena fai mo fai se fakaalofa i nisi fenua, ne fakamaluga faeloa ne Tavita te igoa o Ieova
[Fakamatalaga o te Ata i te itulau e 26]
E fakamalosi aka te ‵tou fakatuanki i te taimi e fakalogo‵logo ei tatou ki tala fakamalosi loto kolā e fakamatala mai i ‵tou fakatasiga Kelisiano