“Ke Fai Se Tofotofoga Mō Koutou”

“Ke sukesuke ifo faka‵lei koutou ki a koutou eiloa, me mata e ‵mautakitaki koutou i te otou fakatuanaki. Ke fai se tofotofoga mō koutou.”​—⁠2 KOLINITO 13:⁠5.

1, 2. (a) E mafai pefea o pokotia tatou māfai e fakalotolotolua tatou e uiga ki ‵tou talitonuga? (e) Se a te fakalavelave ne sae aka i Kolinito i te senitenali muamua telā ne fai ei a nisi tino ke fakalotolotolua e uiga ki te auala e ‵tau o sa‵sale latou i ei?

NE FAIMALAGA atu se tagata ki se koga ‵mao mai te fa‵kai, kae oko atu ei ki se maga auala. Ona ko te mea ko se iloa ne ia te auala telā e tau atu ki te koga e fia fanatu a ia ki ei, ne fesili atu ei a ia ki tino i konā kae ne maua fua ne ia a fakamatalaga kese‵kese mai i a latou. Ona ko tena ‵numi, ne seki toe faka‵soko atu ei tena malaga. E mafai foki o tupu te mea tenā ki a tatou māfai ko fakalotolotolua tatou e uiga ki ‵tou talitonuga. E mafai o fai ne te fakalotolotolua tenā ke fakalavelave mai ki te faiga o ‵tou fakaikuga, ke fai ei ke fakalotolotolua tatou e uiga ki te auala e ‵tau o sa‵sale atu i ei.

² Ne sae aka foki se fakalavelave penā, telā kāti ne pokotia ei a nisi tino i te fakapotopotoga Kelisiano i Kolinito mua, i Eleni. Ne ‵teke atu a “apositolo ‵loi” ki te apositolo ko Paulo, kae fai atu: “E ‵mafa kae ma‵losi ana tusi, ka ko tona nofo mai i o‵tou mua, e vāi‵vāi fua ana pati kae e se aogā foki!” (2 Kolinito 10:​7-​12; 11:​5, 6) Kāti ne iku atu te vaegā kilokiloga tenā ki te faiga o nisi tino i te fakapotopotoga i Kolinito ke fakalotolotolua e uiga ki te auala e ‵tau o sa‵sale atu latou i ei.

3, 4. Kaia e ‵tau ei o fia ‵saga atu tatou ki polopolokiga a Paulo ki te kau Kolinito?

³ Ne fakatu ne Paulo te fakapotopotoga i Kolinito i te taimi ne āsi atu ei a ia ki ei i te 50 T.A. Ne nofo atu tou tagata i Kolinito “i te tasi mo te āfa tausaga; o akoako atu te muna a te Atua ki tino.” E tonu, “e tokouke foki a tino Kolinito ne lagona ne latou a te muna, ne tali‵tonu ki ei, kae ne papatisogina foki latou.” (Galuega 18:​5-​11) Ne saga tonu atu eiloa a Paulo ki te ‵lei o ana taina tali‵tonu i Kolinito i te feitu faka-te-agaga. E se gata i ei, ne tusi atu foki te kau Kolinito ki a Paulo mō ne fakatakitakiga e uiga ki nisi mataupu. (1 Kolinito 7:⁠1) Telā, ne tuku atu i ei ne ia a fakatakitakiga tafasili i te ‵lei ki a latou.

⁴ “Ke sukesuke ifo faka‵lei koutou ki a koutou eiloa, me mata e ‵mautakitaki koutou i te otou fakatuanaki,” ne tusi atu a Paulo, “ke fai se tofotofoga mō koutou.” (2 Kolinito 13:⁠5) Ne mafai eiloa o puipui a taina konā i Kolinito mai te fakalotolotolua e uiga ki te auala e ‵tau o sa‵sale latou i ei moi ne fakagalue ne latou a pati fakatonutonu konā. E mafai foki o fai tatou penā i aso nei. E mafai la pefea o tau‵tali atu tatou ki te fakatakitakiga a Paulo? E mafai pefea o tofotofo aka ne tatou me e ‵mautakitaki tatou i te fakatuanaki? Kae ne a mea e aofia i te tofotofoga o tatou?

‘Ke Sukesuke Aka Faeloa Tou Fakatuanaki’

5, 6. Se a te fua e maua ne tatou ke tofotofo aka ei te ‵tou fakatuanaki, kae kaia e ‵lei katoatoa ei te fua tenā?

⁵ I te faiga o te tofotofoga, e masani o isi se tino io me se mea ke tofotofo aka, e pelā foki mo se fua io me se tulaga fakavae ke fua ki ei te tofotofoga tenā. I te tofotofoga tenei, e se tofotofogina te fakatuanaki​​—⁠ko talitonuga katoa kolā ko oti ne puke ‵mau tatou ki ei. A te mea telā e tofotofogina ko tatou taki tokotasi. Ke fai te tofotofoga tenā, e maua ne tatou se fua ‵lei katoatoa. E fai mai se pese telā ne ‵fatu ne te faisalamo ko Tavita: “E tonu katoatoa te tulafono a te Aliki, e maua mai i ei te malosi fou. A fakatonuga io me ko fakamasauaga foki a te Aliki e fakatuagagina, e aumai ne ia te poto ki a latou kolā e va‵lea. E ‵tonu faeloa tulafono a te Aliki e fia‵fia faeloa a latou kolā e tausi ki ei. A fakatonuga a te Aliki e ‵tonu katoatoa, kae fakamaina ne ia te mafaufau.” (Salamo 19:​7, 8) E maua i te Tusi Tapu a tulafono ‵lei katoatoa mo fakatonuga amio‵tonu a Ieova, ana fakamasauaga kolā e fakatuagagina mo ana fakatonuga ‵ma kae ‵tonu katoatoa. A te fekau telā e maua i ei ko te fakavae ‵lei katoatoa mō te faiga o te tofotofoga.

⁶ E fai mai te apositolo ko Paulo e uiga ki te fekau tenā mai te Atua: “Me i te muna a te Atua e ola kae galue mo te ‵mana. E sili atu foki tona ‵kai i se pelu e ‵kai matalua. E ‵suki ne ia te loto mo te agaga ke mavaelua, ke oko foki eiloa ki sokogā ivi mo ‵kano; e fakamasino foki ne ia a manako mo mafaufauga o loto o tino.” (Epelu 4:​12) E tonu, e mafai o tofotofo ne te muna a te Atua ‵tou loto​​—⁠ke iloa atu ei a mea i ‵tou ‵kanoloto. E mafai pefea o fakagalue aka ne tatou i ‵tou olaga a te fekau malosi kae ‵mana tenei? E taku ‵tonu mai ne te faisalamo a mea kolā e aofia i te mea tenei. Ne usu mai penei: “Amutia latou kolā e . . . fia‵fia o fai‵tau ki Tulafono a te Aliki, kae mafaufau ‵loto foki ki ei i te ao mo te po.” (Salamo 1:​1, 2) E maua eiloa te “Tulafono a te Aliki [ko Ieova]” i te Muna tusia a te Atua, ko te Tusi Tapu. E ‵tau o maua ne tatou te loto fiafia ke fai‵tau ki te Muna a Ieova. E tonu, e ‵tau o fakatoka ne tatou ne taimi ke fai‵tau io me mafaufau ‵loto ki ei. I te taimi e fai ei ne tatou te mea tenei, e ‵tau o talia ne tatou​​—⁠ko te mea telā e tofotofogina​​—⁠a mea kolā e tusi i ei.

7. Se a te ‵toe auala sili ke tofotofo aka ei te ‵tou fakatuanaki?

⁷ A te ‵toe auala sili ke tofotofo aka ei te ‵tou fakatuanaki, ko te faitau kae mafau‵fau ‵loto ki te Muna a te Atua kae iloilo aka me e pefea te fetaui o ‵tou amioga mo mea kolā e tauloto ne tatou mai i ei. E mafai eiloa o fia‵fia tatou me e maua ne tatou a fesoasoani e uke ke malamalama ei tatou i te Muna a te Atua.

8. E mafai pefea o fesoasoani mai a tusi mai i “te tavini fakamaoni kae poto” ke tofotofo aka ki ei te ‵tou fakatuanaki?

⁸ Ko oti ne tuku mai ne Ieova a akoakoga mo fakatonuga e auala i tusi mai i “te tavini fakamaoni kae poto,” kolā e fakamatala mai i ei a te Tusi Tapu. (Mataio 24:45) E pelā mo te pokisi telā e fakaulutala penei “Questions for Meditation,” (“Fesili ke Mafaufau ‵Loto ki ei”) i te fakaotiga o te ukega o mataupu i te tusi ko te Draw Close to Jehovah.a E gali ‵ki te avanoaga e tuku mai ne te vaega o te tusi tenei ke mafaufau faka‵lei tatou ki a tatou eiloa. E uke foki a mataupu kese‵kese i ‵tou mekesini, ko Te Faleleoleo Maluga mo te Awake!, kolā e fesoasoani mai ke fua aka ne tatou ki ei te ‵tou fakatuanaki. Ne fai mai se fafine Kelisiano e tokotasi e uiga ki mataupu o te tusi ko Faataoto i mataupu fakamuli nei o Te Faleleoleo Maluga: “Ko oko eiloa te aogā o mataupu konei ki a au. E fesoasoani mai ke iloilo ne au me e fetaui aku pati, aku amioga, mo taku kilokiloga mo tulaga amio‵tonu o Ieova.”

9, 10. Ne a fakatokaga mai i a Ieova e fesoasoani mai ke tofotofo aka faeloa ki ei ‵tou fakatuanaki?

⁹ E maua foki ne tatou a fakatakitakiga mo fakamalosiga e uke i fakatasiga, tamā fono, mo fono ‵lasi a te fakapotopotoga. E aofia a mea konei i fakatokaga faka-te-agaga ne tuku mai ne Ieova mō tino kolā ne ‵valo mai ne Isaia: “I aso mai mua nei io me ko aso fakaoti, a te mauga telā e tu ei te Faletapu ka maluga atu i mauga katoa. E uke a malo ka o‵mai ki ei, ka ko olotou tino ka fai ake penei, ‘Tatou ka olo ake ki te mauga o te Aliki [ko Ieova], . . . ka akoako mai ne ia tatou ki mea e manako a ia ke fai ne tatou; ka sa‵sale tatou i auala me ne filifili ne ia.’ ” (Isaia 2:​2, 3) E fai eiloa mo fai se tinā fakamanuiaga a te mauaga o vaegā akoakoga penā e uiga ki auala o Ieova.

¹⁰ Ke mo a foki ma puli a te suā auala e mafai o tofotofo aka ei tatou, ko pati polopoloki mai tino ma‵tua i te feitu faka-te-agaga, e aofia i ei a toeaina Kelisiano. E fai mai te Tusi Tapu e uiga ki a latou: “Oku taina, kafai se tino e maua i so se agasala; ko koutou kolā e tumau i te olaga faka-te-Agaga ke fakatonu ne koutou; kae ‵tau mo koutou o fai i te agaga o te loto malalo. Kae onoono tonu ki a koe eiloa, i a koe ma fakaosoosogina foki.” (Kalatia 6:⁠1) E ‵tau o fia‵fia tatou mō te fakatokaga tenei ke fakatonutonu aka ei tatou!

11. Ne a mea e aofia i te tofotofoga o te ‵tou fakatuanaki?

¹¹ E fai eiloa a ‵tou tusi, fakatasiga faka-Kelisiano, tāgata tofia​—⁠mo fai ne fakatokaga tafasili i te ‵gali mai i a Ieova. Kae e manakogina ke tofotofo aka te ‵tou fakatuanaki ne tatou eiloa. Telā la, kafai e fai‵tau tatou ki ‵tou tusi io me e fakalogologo ki se fakatakitakiga mai te Tusi Tapu, e ‵tau o fesili ifo tatou ki a tatou eiloa: ‘E mata, e fakasino mai eiloa te mea tenei ki a au? E mata, e fai ne au te mea tenei? E mata, e puke ‵mau au ki talitonuga faka-Kelisiano katoa?’ A ‵tou kilokiloga ki fakamatalaga kolā e maua ne tatou e auala i fakatokaga konei e pokotia malosi i ei te ‵tou tulaga faka-te-agaga. “Ka ko te tino telā e se maua ne ia te Agaga, e se maua foki ne ia a meaalofa mai te Agaga o te Atua. E se mafai eiloa o iloa tonu ne ia, me ne mea va‵lea fua ki a ia,” ko muna a te Tusi Tapu. Kae ko “te tino telā ei i a ia a te Agaga o te Atua, e mafai ne ia o fakamasino a te tāua o mea katoa.” (1 Kolinito 2:​14, 15) E mata, e se ‵tau o taumafai tatou ke fakatumau se kilokiloga faka-te-agaga aogā ki mea kolā e fai‵tau tatou ki ei i ‵tou tusi, mekesini, mo nisi tusi aka mo mea foki kolā e lagona ne tatou mai i ‵tou fakatasiga mo toeaina?

“Ke Fai se Tofotofoga mō Koutou”

12. Ne a mea e aofia i te fakatalitonu atu e uiga ki a tatou eiloa?

¹² A te tofotofoga o tatou e fai eiloa ne tatou taki tokotasi. E tonu, e mafai o ‵nofo atu nei tatou i te munatonu, kae se a te tulaga o ‵tou malosi faka-te-agaga? A te tofotofoga o tatou e aofia i ei a te fakaasiatuga o fakamaoniga o te ‵tou ma‵tua ‵lei i te feitu faka-te-agaga mo te loto fakafetai tonu mō fakatokaga faka-te-agaga.

13. E ‵tusa mo te Epelu 5:​14, se a te mea telā e fakamaoni atu i ei me ko ma‵tua ‵lei tatou?

¹³ Ne a la fakamaoniga o ‵tou ma‵tua ‵lei faka-Kelisiano? Ne tusi mai te apositolo ko Paulo: “A meakai ma‵keke e mō tino ma‵tua fua, kolā ko oti ne akoako ke iloa ne latou o tami ki te kese‵kesega o te ‵lei mo te masei.” (Epelu 5:​14) E fakatalitonu atu ne tatou ‵tou ma‵tua ‵lei mai te fakamasaniga faka‵lei o te malosi o ‵tou mafaufau. E pelā eiloa mo te fakamasaniga faeloa o gā‵kano i te foitino o se tino tafao a koi tuai o apo malosi a ia i se tafaoga, e ‵tau foki o fakamasani faka‵lei te malosi o ‵tou mafaufau e auala i te fakaaogāga faeloa o akoakoga fakavae i te Tusi Tapu.

14, 15. Kaia e ‵tau ei o taumafai malosi tatou mo te loto fia‵fia ke suke‵suke ki mea ‵loto i te Muna a te Atua?

¹⁴ Kae koi tuai o fakamasani faka‵lei aka a te malosi o ‵tou mafaufau, e ‵tau eiloa o maua ne tatou te poto tonu. Ke maua te mea tenā, e tāua ‵ki te faiga o sukesukega totino. Kafai e fai faeloa ‵tou sukesukega totino​​—⁠maise eiloa e uiga ki fakamatalaga ‵loto i te Muna a te Atua​​—⁠ka gasolo aka ei o ma‵losi atu ‵tou mafaufau. Ko oti ne suke‵suke tatou ki mataupu ‵loto e uke i Te Faleleoleo Maluga i te fia tausaga ko ‵teka atu. E ‵saga atu pefea tatou ki mataupu ‵loto konā? E mata, ka se ‵saga atu tatou ki ei ona fua ko te mea e aofia i ei a “mea faiga‵ta”? (2 Petelu 3:​16) Ikai, e ‵tau o taumafai malosi tatou ke malamalama i mea kolā e fakaasi mai i ei.​​—⁠Efeso 3:​18.

¹⁵ Kae e a māfai ko tō faigata ki a tatou te faiga o sukesukega totino? Se mea tafasili i te tāua ke taumafai malosi ke fia‵fia tonu tatou ki ei.b (1 Petelu 2:⁠2) A te gasolo aka o matua ‵lei, e manakogina i ei a te fakamasani o tatou o ‵kai ki mea‵kai ma‵keke, ko muna‵tonu ‵loto kolā e maua i te Muna a te Atua. Kafai e se fai penā, ka tumau eiloa i te sē gasuesue a te malosi o ‵tou mafaufau. Kae ko te tukuatuga o se fakamaoniga o te ‵tou ma‵tua ‵lei, e aofia i ei a mea e uke atu i lō te mauaga fua o se mafaufau malosi ‵lei. E ‵tau o fakagalue aka ne tatou i aso katoa a te iloaga telā e maua ne tatou e auala i ‵tou sukesukega totino.

16, 17. Se a te polopolokiga ne tuku mai ne te soko ko Iakopo e uiga ki te fai mo fai ne “tino kolā e tau‵tali i te muna a te Atua”?

¹⁶ E lavea atu foki a fakamaoniga e uiga ki a tatou e auala i te fakaasiatuga o ‵tou loto fakafetai e uiga ki te munatonu​​—⁠ko ‵tou galuega e fai i te fakatuanaki. Mai te fakaaogāga o se tala fakatusa aogā ke fakamatala atu ei te auala tenei o te iloiloga ne koe a koe eiloa, e fai mai te soko ko Iakopo: “Ke fai koutou mo tino kolā e tau‵tali i te muna a te Atua, kae se na ko te fakalogo fua ki ei, i te mea mana faka‵segina ei koutou ne koutou eiloa. Me ko te tino telā e fakalogologo fua ki te muna kae se fai ne ia, e ‵pau a ia mo te tino telā e onoono ki te kilo kae matea ne ia ona foliga tonu. E onoono fua ki ona foliga, kae kafai e fano keatea mai i ei, puli fakavave ei i a ia me pefea ona foliga. Ka ko te tino e tausi faka‵lei ki te tulafono e fakakatoatoa ne ia te ‵lei, telā ko te tulafono o te saolotoga, kae ola foki i ei a ia, kae se na ko te fakalogologo fua ki ei ko puli ei i a ia, kae e tausi fakamaoni eiloa ki ei, i te fai ne ia a mea e fakatonu mai. A te tino tenā ka fakamanuia ne te Atua i ana mea e fai.”​​—⁠Iakopo 1:​22-​25.

¹⁷ E pelā me e fai mai a Iakopo: ‘Onoono atu ki te kilo, ko te muna a te Atua, kae onoono aka me e pefea tou tulaga i ei. Ke tumau i te faiga o te mea tenei, kae iloilo aka tou tulaga e ‵tusa mo te mea telā e maua ne koe i te muna a te Atua. Kae ke mo a ma puli fakavave a mea kolā ko oti ne lavea ne koe i ei. Ke na fakatonutonu aka a mea ‵se kolā e ‵tau o fai.’ A te tau‵tali atu ki pati fakatonutonu konei, e mafai o ‵sae aka i ei a mea faiga‵ta i nisi taimi.

18. Kaia e faigata ei te tau‵tali atu ki pati polopoloki a Iakopo?

¹⁸ E pelā mo te mea e tasi telā e ‵tau o fai, ko te kau atu ki te galuega talai o te Malo. Ne tusi mai a Paulo: “Me e talitonu a te tino i tona loto, telā la, ko takuamiotonugina a ia, kae kafai e molimau foki ona laugutu, e fakaolagina a ia.” (Loma 10:10) E manakogina eiloa a fakamafulifuliga e uke i te molimau atu o ‵tou laugutu i mua o tino katoa. A te faiga o te galuega talai e se faigofie ki te tokoukega o tatou. E uke atu foki a ‵fuliga mo mea faiga‵ta e ‵tau o fai i te ‵tou taumafai ke maua te loto finafinau ki te galuega talai mo tena faiga mo fai te ‵toe mea tāua i ‵tou olaga. (Mataio 6:​33) Kae kafai ko fai ne tatou te galuega tenei mai te Atua, e fia‵fia eiloa tatou me e avatu i ei a tavaega ki a Ieova. Telā la, e mata, e fai nei tatou mo fai ne tino talai loto finafinau o te Malo?

19. Ne a mea e ‵tau o aofia i ‵tou galuega kolā e fai i te fakatuanaki?

¹⁹ E pefea te lasi o ‵tou galuega e ‵tau o fai i te fakatuanaki? E fai mai a Paulo: “Ke fai ne koutou a mea kolā ko oti ne tauloto ne koutou mai i a au i aku pati mo faiga. Ke i a koutou a te Atua o te filemu.” (Filipi 4:⁠9) E tuku atu se fakamaoniga e uiga ki a tatou eiloa e auala i te ‵tou tumau i te fakagalue aka o mea kolā ko oti ne tauloto, talia, lagona kae lavea ne tatou​​—⁠ko te katoatoaga o ‵tou tukuatuga faka-Kelisiano mo te ‵tou fai mo fai ne soko o Keliso. E fakatonu mai a Ieova e auala i te pelofeta ko Isaia: “Tenei te auala. Tautali i ei.”​​—⁠Isaia 30:⁠21.

20. Ne a vaegā tino kolā e fai mo fai se fakamanuiaga lasi ki te fakapotopotoga?

²⁰ E fai eiloa mo fai se fakamanuiaga lasi ki te fakapotopotoga a tāgata mo fāfine kolā e āpo i te Muna a te Atua, ke fai mo fai ne tino talai loto finafinau o te tala ‵lei, kolā e ‵mautakitaki te lotou fakamaoni, kae kolā e ‵lago atu foki mo te alofa fakamaoni ki te Malo. E fesoasoani atu eiloa te lotou ‵kau atu ki te malosi o te fakapotopotoga telā e ‵kau atu latou ki ei. E lasi ‵ki eiloa te lotou fesoasoani, maise eiloa ona ko te tokouke o tino ‵fou kolā e ‵tau o tausi faka‵lei atu ki ei. Kafai e fakatāua ne tatou a polopolokiga a Paulo ke ‘sukesuke aka faeloa ‵tou fakatuanaki, kae ke fakatalitonu aka te ‵tou tulaga totino,’ e mafai foki o fai tatou mo fai se fakamalosiga ‵lei ki nisi tino.

Ke Fiafia i te Faiga o te Loto o te Atua

21, 22. E mafai pefea o fia‵fia tatou ki te faiga o te loto o te Atua?

²¹ Ne usu mai te Tupu ko Tavita i Isalaelu mua: “Toku Atua, e fiafia au o fai tou loto! E tausi ne au au akoakoga i toku loto.” (Salamo 40:⁠8) Ne maua eiloa ne Tavita a te fiafia i te faiga o te loto o te Atua. Kaia? Me ne tausi ne Tavita a tulafono a Ieova i tena loto. Ne seki fakalotolotolua a Tavita e uiga ki te auala e ‵tau o sasale atu a ia i ei.

²² Kafai e lagona ‵tonu ne tatou te tulafono a te Atua i ‵tou ‵kanoloto, ka se fakalotolotolua eiloa tatou e uiga ki te auala e ‵tau o sa‵sale tatou i ei. E fia‵fia eiloa tatou o fai te loto o te Atua. Telā la, ke na ‘fai te mea e mafai ne tatou o fai’ ke tavini atu tatou ki a Ieova mai i ‵tou ‵kanoloto.​​—⁠Luka 13:⁠24.

[Fakamatalaga mai lalo]

E Masaua ne Koe?

• E mafai pefea o tofotofo aka te ‵tou fakatuanaki?

• Ne a mea e aofia i te fakatalitonu atu e uiga ki a tatou eiloa?

• Ne a fakamaoniga e tuku atu ne tatou e uiga ki te ‵tou ma‵tua ‵lei faka-Kelisiano?

• E fesoasoani mai pefea ‵tou galuega kolā e fai i te fakatuanaki ke iloa ei ne tatou ‵tou tulaga tonu?

[Ata i te itulau e 15]

E mata, e iloa ne koe te ‵toe auala sili ke tofotofo aka ei tou fakatuanaki?

[Ata i te itulau e 16]

E fakamaoni atu ne tatou te ‵tou ma‵tua ‵lei faka-Kelisiano mai te fakagaluegāga o te malosi o ‵tou mafaufau

[Ata i te itulau e 17]

E fakatalitonu atu ne tatou ‵tou tulaga tonu mai te fai mo fai ne ‘tino kolā e tau‵tali i te muna a te Atua, kae se na ko te faka‵logo fua ki ei’