Ke Gasolo Atu ki te Matua ‵Lei—me ‘ko Pili Mai te Aso o Ieova’

“E ‵tau mo tatou o sa‵sale ki mua, ki te katoatoaga o akoakoga tāua.”​—EPELU 6:1.

1, 2. Se a te avanoaga ‘ke ‵tele atu ki mauga’ ne maua ne Kelisiano i te senitenali muamua i Ielusalema mo Iutaia?

ITE taimi ne nofo ei a Iesu i te lalolagi, ne olo atu ana soko kae fesili atu ki a ia: “Ne a foki a fakailoga e iloa ei tou foki mai mo te gataga o te lalolagi?” A te fakataunuga muamua o te valoaga telā ne tuku atu ne Iesu i te tali ki te lotou fesili ne tupu i te senitenali muamua. Ne faipati eiloa a Iesu ki mea fakaofoofogia kolā e ‵tau o ‵tupu mo fai se fakamaoniga me ko pili ‵ki mai te gataga. I te laveaga ne latou a mea konā ko ‵tupu, “ko tino kolā e ‵nofo i Iutaia, e ‵tau o ‵tele ki mauga.” (Mataio 24:​1-3, 15-​22) E mata, ne lavea ne soko o Iesu a te fakailoga kae gasue‵sue latou e ‵tusa mo ana fakatonuga?

2 Toeitiiti kae kātoa te tolu sefulu tausaga, i te 61 T.A., ne tusi atu ei ne te apositolo ko Paulo se fekau ‵mafa kae aoga ki Kelisiano Epelu kolā ne ‵nofo atu i Ielusalema mo nisi fenua i ana tafa. Ne seki iloa ne Paulo mo ana taina tali‵tonu, a te fakailoga telā ne fakamailoga ki ei a te kamataga o te “fakalavelave lasi” telā ka tupu i se lima tausaga fua mai mua. (Mataio 24:21) I te 66 T.A., ne takitaki atu ne Cestius Gallus a te kautau Loma ki se taua telā toeitiiti ko manumalo i te osoatuga ki Ielusalema. Kae ne olo fakavave atu latou keatea i se auala fakapoi, telā ne tuku atu i ei se avanoaga ke ‵sao a tino kolā ne ‵tu i se tulaga fakamataku olotou ola.

3. Se a te fakamalosiga ne tuku atu ne Paulo ki Kelisiano Epelu, kae kaia?

3 Ne manakogina ne Kelisiano konā a te loto malamalama mo te mainaga faka-te-agaga ke lavea atu a te fakataunuga o pati a Iesu telā ne ‵tau ei o ‵tele latou keatea. Kae ko nisi tino ne “to tuai [olotou] mafaufau o malamalama.” A latou koi ma‵nako eiloa ki “susu” e pelā me ne tamaliki i te feitu faka-te-agaga. (Faitau te Epelu 5:​11-​13.) Ke oko foki eiloa ki tino kolā ne sa‵sale atu i te auala o te munatonu i te fia sefulu tausaga ne lavea atu a fakailoga o te vāivāi i a latou, telā ne iku atu ei ki te ‘‵teka atu keatea mai te Atua ola.’ (Epelu 3:​12) Ne “masani” a nisi o latou o ‵galo atu i fakatasiga Kelisiano i te taimi telā ko “pili mai” ei a “te Aso” fakamataku tenei. (Epelu 10:​24, 25) Ne tuku atu ne Paulo a fakamalosiga ‵tau, i ana muna: “E ‵tau mo tatou o sa‵sale ki mua, ki te katoatoaga o akoakoga tāua a Keliso.”​—Epelu 6:1.

4. Kaia e tāua ei ke tumau tatou i te mataala i te feitu faka-te-agaga, kae se a te mea ka fesoasoani mai ke fai tatou penā?

4 Ko ola nei tatou i te taimi o te fakataunuga fakaoti o te valoaga a Iesu. “A te aso fakamataku o te Aliki [ko Ieova]”​—ko te aso telā ka fakaoko atu ei te gataga ki te lalolagi kātoa a Satani​—“ko pili mai.” (Sefanaia 1:​14) Tenei eiloa te taimi e ‵tau ei mo tatou o tumau i te matapula‵pula mo te mataala i te feitu faka-te-agaga. (1 Petelu 5:8) E mata, tenā eiloa te mea e fai ne tatou? A te matua ‵lei faka-Kelisiano ka fesoasoani mai ke ‵saga tonu atu tatou ki te taimi ko ‵nofo nei tatou i ei.

Te Matua ‵Lei Faka-Kelisiano

5, 6. (a) Ne a mea e aofia i te matua ‵lei i te feitu faka-te-agaga? (e) Ne a feitu e lua e manakogina malosi i ei a taumafaiga ke gasolo atu ki te matua ‵lei?

5 Ne seki fakamalosi atu fua a Paulo ki Kelisiano Epelu i te senitenali muamua ke gasolo atu ki te matua ‵lei kae ne fakailoa atu foki ne ia a mea e aofia i te matua ‵lei i te feitu faka-te-agaga. (Faitau te Epelu 5:​14.) E se lotoma‵lie fua a “tino ma‵tua” ke inu faeloa latou ki “susu.” E ­taumafai latou o ‵kai ki “meakai ma‵keke.” Tela la, e iloa ne latou a “mea katoa” mo “fuafuaga ‵loto” o te munatonu. (1 Kolinito 2:​10) E se gata i ei, e akoako faka‵lei olotou mafaufau mai te fakaaoga faka‵lei​—e auala i te fakagaluegaga o mea e iloa ne latou​—telā e fesoasoani atu ke iloa ne latou o faka‵kese a te mea tonu mai te mea ‵se. Kafai ko fe‵paki latou mo se fakaikuga, e fesoasoani atu a te akoakoga tenei ke iloa ne latou me e aofia pefea a akoakoga fakavae i te Tusi Tapu mo te auala ke fakagalue aka ei a mea konā.

6 “Ko ‵tau ei mo tatou o puke ‵mautakitaki ki mea ‵tonu ko oti ne lagona ne tatou,” ne tusi mai a Paulo, “ko te mea ke mo a ma olo tatou keatea mai i ei.” (Epelu 2:1) E mafai o tapea‵pea malie tatou keatea mai te fakatuanaki e aunoa mo te iloa ne tatou. E mafai o ‵teke atu tatou ki te mea tenei mai te momea aka o te ‵tou “puke ‵mautakitaki ki mea ‵tonu” i te faiga o ‵tou suke‵sukega ki muna‵tonu faka-te-agaga. Tela la, e ‵tau mo tatou taki tokotasi o fesili ifo: ‘E mata, ko gata fua toku sukesuke ki akoakoga fakavae masani? E mata, ko fai fua ne au a mea e pelā mo te masani, e aunoa mo te aofia katoatoa o toku loto i te munatonu? E mafai pefea o gasolo tonu atu au ki mua i te feitu faka-te-agaga?’ A te gasolo atu ki te matua ‵lei e manakogina a taumafaiga e uke i feitu e lua konei. E ‵tau o fakamasani faka‵lei tatou ki te Muna a te Atua. Kae e ‵tau foki o fakamasani tatou ki te fakalogo.

Ke Fakamasani Faka‵lei ki te Muna

7. E mafai pefea o maua ne tatou a mea aoga mai i te fakamasani faka‵lei ki te Muna a te Atua?

7 Ne tusi mai a Paulo: “So se tino koi inu susu, koi tamaliki eiloa a ia, e se iloa foki ne ia a te ‵lei mo te masei.” (Epelu 5:​13) Ke matua ‵lei, e ‵tau o fakamasani faka‵lei tatou ki te Muna a te Atua, ko tena fekau ki a tatou. Ona ko te mea e maua te fekau tenei i tena Muna, ko te Tusi Tapu, e ‵tau o fai tatou mo tamaliki a‵koga ‵lei o te Tusi Tapu mo tusi kolā e fakavae ki tena Muna mai “te tavini fakamaoni kae poto.” (Mataio 24:​45-​47) A te sukesuke ki mafaufauga o te Atua i te auala tenei e fesoasoani mai ke akoako faka‵lei ‵tou mafaufau. Mafaufau ki te fakaakoakoga a se Kelisiano e igoa ki a Orchid.a Ana muna: “A te mea telā ne lasi tena aoga ki toku olaga ko te fakamasauaga e uiga ki te faitau faeloa ki te Tusi Tapu. E nofo pelā ki se lua tausaga kae oti i a au a te Tusi Tapu kātoa, kae foliga mai me ne gasolo aka o iloa ‵lei ne au toku Mafuaga mō te taimi muamua. Ne tauloto ne au a mea kolā e fiafia a ia ki ei mo mea e se fiafia a ia ki ei, te lasi o tena malosi, mo te ‵poko o tena poto. A te faitau ki te Tusi Tapu i aso katoa ne fesoasoani mai ki a au i toe taimi faiga‵ta o toku olaga.”

8. Se a te fakamalosiga e mafai o maua ne tatou i te Muna a te Atua?

8 A te faitau faeloa ki se vaega o te Muna a te Atua e ‘fakamalosi aka’ ei tatou ne te fekau telā e maua i ei. (Faitau te Epelu 4:​12.) E mafai o ‵fuli ne te vaegā faitauga tenā ‵tou loto kae fai ei ke momea aka te ‵tou fakafiafia atu ki a Ieova. E mata, e isi sau fakatokaga totino ke faitau ki te Tusi Tapu kae mafaufau ‵loto ki mea i ei?

9, 10. Ne a mea e aofia i te fakamasani faka‵lei atu ki te Muna a te Atua? Fakamatala mai.

9 A te fakamasani faka‵lei ki te Tusi Tapu e aofia i ei a mea e uke atu i lō te iloa atu fua o pati i ei. A tino kolā koi tamaliki i te feitu faka-te-agaga i aso o Paulo ne seki masani katoatoa latou mo te Muna fakaosofia a te Atua. E ui i ei, ne seki ‵tofo aka eiloa latou o fakaaoga kae fakagalue a mea tāua mai i ei ke maua ei ne latou a ikuga ‵lei. Ne seki fakagalue aka ne latou a te fekau i ei kae ‵tofo aka foki a takitakiga i ei i te faiga o fakaikuga poto i olotou olaga.

10 Ke fakamasani faka‵lei mo te Muna a te Atua e fakauiga eiloa ki te iloa ‵lei o mea kolā e fai mai i ei mo te fakagalue aka ne koe o mea konā. A te tala o se tuagane Kelisiano e igoa ki a Kyle, e fakaasi mai i ei a te faiga o te mea tenei. Ne kinau a Kyle mo se tino telā e ga‵lue mo ia. Ne a ana mea ne fai ke faka‵lei aka ei te lā fakalavelave? E fakamatala mai tou fafine: “A te tusi siki telā ne masaua ‵lei ne au ko te Loma 12:​18, telā e fai mai: ‘Fai te mea e mafai ne koutou, ko te mea ke maua te olaga filemu i te va o koutou mo nisi tino.’ Tela la, ne fakamolemole atu au ke fai‵pati aka maua mai tua o te galuega.” Ne iku manuia te ma fai‵patiga, kae ne ofo a te tino tenei me ne fai ne Tolotea te mea tenā. “Ne iloa ne au me e se mafai eiloa o ‵se tatou māfai e fakagalue aka a akoakoga fakavae i te Tusi Tapu,” ko muna a Kyle.

Ke Fakamasani ki te Fakalogo

11. Ne a mea e fakaasi mai i ei a te sē faigofie ke fakalogo mai lalo i fakanofonofoga faiga‵ta?

11 A te fakagalue aka o mea ne tauloto mai i te Tusi Tapu e mafai o faigata, maise eiloa māfai ko faiga‵ta a fakanofonofoga. E pelā mo te taimi mai tua malie ifo o te fakasaolotoga ne Ieova a tino Isalaelu mai te ‵nofo pologa i Aikupito, ne “mui‵mui faeloa [latou] ki a Mose” kae ‘tofotofo ne latou a Ieova.’ Kaia? Ona ko te sē lava o vai mo olotou inu. (Esoto 17:​1-4) Mai lalo malie o te lua tausaga i te otiga ne fai se feagaiga i te va o latou mo te Atua mo te talia ne latou ke fai “so se mea e faipati mai ei [a Ieova]” ne toe soli eiloa ne latou a tena tulafono mai te ifo ki tupua. (Esoto 24:​3, 12-​18; 32:​1, 2, 7-9) E mata, ne fai latou penei ona ko te galo leva o Mose, i te taimi ne tuku atu ei ki a ia a tulafono i te Mauga o Olepa, telā ne fai ei latou ke ma‵taku? E mata, ne mafau‵fau latou me ka toe taua atu a te kau Amaleka kae ka seai se fesoasoani o te kau Isalaelu me e galo a Mose, ko te tino telā ne sisi ona lima ki luga kae ne manumalo ei latou mai mua malie eiloa o te taimi tenā? (Esoto 17:​8-​16) Faitalia me se a te pogai ne fai ei latou penā, “ne ita [te kau Isalaelu] o faka‵logo.” (Galuega 7:​39-​41) Ne fakamalosi atu a Paulo ki Kelisiano ke “taumafai malosi” latou o ‵kalo keatea mai te “sē fakalogo, e pelā mo te mea ne fai” ne te kau Isalaelu i te taimi ne ma‵taku ei latou ke ulu atu ki loto i te Fenua o te Folafolaga.​—Epelu 4:​3, 11.

12. Ne tauloto pefea a Iesu ki te fakalogo, kae ne a mea aoga ne maua ne ia mai i ei?

12 A te gasolo atu ki te matua ‵lei e manakogina ke taumafai malosi tatou o faka‵logo ki a Ieova. E pelā mo te mea ne fakaasi mai ne Iesu Keliso, ne tauloto eiloa ne ia te fakalogo e auala i logo‵maega. (Faitau te Epelu 5:​8, 9.) A koi tuai o vau ki te lalolagi, ne fakalogo a Iesu ki tena Tamana. Kae ko te faiga o te loto o tena Tamana i te lalolagi ne aofia i ei a te logo‵mae i te feitu faka-te-foitino mo te feitu tau te mafaufau. E auala i te fakalogo mai lalo i toe tulaga faiga‵ta ‵ki, ne “‵lei katoatoa” a Iesu mō se tulaga fou telā ne mafaufau ki ei te Atua, ke fai a ia mo Tupu mo Faitaulaga Sili.

13. Ne a mea e fakaasi mai me ko oti ne fakamasani tatou ki te fakalogo?

13 Kae e a tatou? E mata, ne fakaiku aka ne tatou ke faka‵logo ki a Ieova faitalia a fakalavelave faiga‵ta? (Faitau te 1 Petelu 1:​6, 7.) E manino ‵lei eiloa a pati fakatonutonu a te Atua e uiga ki mea tau amioga, te fakamaoni, te fakaaogaga o te gutu, te faitauga mo sukesukega totino ki te Tusi Tapu, te ‵kau atu ki fakatasiga Kelisiano, mo te ‵kau atu ki te galuega talai. (Iosua 1:8; Mataio 28:​19, 20; Efeso 4:​25, 28, 29; 5:​3-5; Epelu 10:​24, 25) E mata, e faka‵logo tatou ki a Ieova i mea konei ke oko foki eiloa ki fakanofonofoga faiga‵ta? A te ‵tou faka‵logo se fakaasiga me e gasolo atu tatou ki te matua ‵lei.

Te Matua Faka-Kelisiano​—Te Pogai e Aoga ei?

14. Fakamatala mai te auala e mafai ei o fai a te matua ‵lei i te feitu faka-te-agaga mo fai se puipuiga.

14 Se puipuiga tonu eiloa mō se Kelisiano ke maua ne ia te malosi o te mafaufau telā ko oti ne akoakogina faka‵lei ke mafai ne ia o faka‵kese a te mea tonu mai te mea ‵se i se lalolagi telā e “fai katoa ne latou amioga fakatakalialia.” (Efeso 4:​19) E pelā mo te taina e igoa ki a Iakopo, telā ne faitau kae fakatāua faeloa ne ia a tusi faka-te-Tusi Tapu, ne talia ne ia se galuega telā e ga‵lue fakatasi ei a ia mo fafine katoa. E fai mai a Iakopo: “E tiga eiloa ne seki ‵lei a amioga a te tokoukega o tino konei, kae ne foliga mai me e tokotasi i a latou se fafine e ‵lei ana uiga kae ne fiafia ki te munatonu i te Tusi Tapu. Kae i te taimi ne ‵nofo tokolua ei maua i se potu, ne kamata tou fafine o fakakolekole mai i ana tāga fakafafine. Ne mafaufau au me se mea fai fa‵kata fua kae ne faigata eiloa ke taofi aka ne au tou fafine. I konā loa, ne masaua ne au se tala i Te Faleleoleo Maluga e uiga ki se taina telā ne fepaki mo se tofotofoga tai ‵pau i tena galuega. Ne fakaaoga i te mataupu tenā a te fakaakoakoga a Iosefa mo te avaga a Potifala.b Ne ‵tule fakavave atu keatea ne au a tou fafine, kae ne tele atu a ia ki tua.” Ne fakafetai a Iakopo me ne seki ai se mea tai masei atu ne tupu kae ne fakatumau ne ia se loto lagona ‵ma.​—1 Timo. 1:5.

15. E mafai pefea o fakamalosi aka ne te matua ‵lei i te feitu faka-te-agaga ‵tou loto?

15 E aoga foki te matua ‵lei i te feitu faka-te-agaga me e fakamalosi aka ei ‵tou loto kae puipui foki ei tatou mai “akoakoga fakaatea.” (Faitau te Epelu 13:9) Kafai e taumafai tatou ke gasolo atu ki mua i te feitu faka-te-agaga, ka ‵saga tonu atu ‵tou mafaufau ki “mea e sili atu i te ‵lei.” (Filipi 1:​9, 10) Ka gasolo aka foki o lasi te ‵tou loto fakafetai ki te Atua mo fakatokaga katoa ne fakatoka ne ia ke aoga ki a tatou. (Loma 3:​24) A te Kelisiano telā ko ‘matua tena mafaufau’ e fakamalosi aka ne ia a te loto fakafetai mo te fesokotakiga pili mo Ieova.​—1 Kolinito 14:20.

16. Se a te mea ne fesoasoani atu ki se tuagane e tokotasi ke ati aka ne ia te ‘loto malosi’?

16 Ne taku ‵tonu mai ne se tuagane e igoa ki a Loise me i se vaitaimi mai tua ifo o tena papatisoga, a te mea telā ne manavase malosi a ia ki ei ko te fakafiafia atu fua ki tino. Ana muna: “Ne seki fai ne au se mea ‵se, kae ne seki maua ne au se manakoga ke tavini atu ki a Ieova. Ne iloa ne au me ne ‵tau o fai ne au a ‵fuliga ke maua ne au se lagonaga ‵lei me e avatu ne au a mea katoa e mafai ne au ki a Ieova. A te ‵toe fuliga lasi ko te tuku katoatoa atu o toku loto ki tena tapuakiga.” Mai te faiga o vaegā taumafaiga penā, ne ati aka ei ne Loise ‘te loto malosi’ kae ne tāua ‵ki i te taimi ne fe‵paki ei tou fafine mo se masaki fakafanoanoa. (Iakopo 5:8) Ne fai mai a Loise: “Ne faigata ‵ki toku taumafai malosi, kae ne fakapilipili tonu atu eiloa au ki a Ieova.”

‘Ke Māfua Tonu Mai i ‵Tou Loto a te Fakalogo’

17. Kaia ne tāua malosi ei a te fakalogo i te senitenali muamua?

17 A pati fakatonutonu a Paulo e uiga ki te ‘gasolo atu ki te matua ‵lei’ ne fakamalosi atu ki Kelisiano i te senitenali muamua kolā ne ‵nofo atu i Ielusalema mo Iutaia ke ‵sao. A latou kolā ne faka‵logo ki ei ne maua ne latou te malamalama faka-te-agaga ke lavea kae ke iloa foki ne latou te fakailoga ne tuku atu ne Iesu ke “‵tele ki mauga.” Kafai e lavea ne latou “a te Mea Fakamataku [Mea Fakatakalialia] . . . e tu i te koga tapu,” ko te kautau a Loma e nikoi kae ulu atu ki Ielusalema, ne iloa ei ne latou me tenā eiloa te taimi e ‵tau ei o ‵tele latou keatea. (Mataio 24:​15, 16) I te faka‵logo ki te valoaga fakapelofeta a Iesu, ne ‵tele atu keatea a Kelisiano mai i te fa‵kai o Ielusalema a koi tuai o fakaseai atu kae e ‵tusa mo pati a te tino tusitala ko Eusebius, ne ‵nofo atu latou i te fa‵kai o Pela i te koga maugā o Kileata. I konā ne ‵sao atu ei latou mai i te ‵toe fakalavelave matagā ne tupu ki Ielusalema i tala fakasolopito.

18, 19. (a) Kaia e tāua malosi ei a te fakalogo i ‵tou aso nei? (e) Ne a mea ka suke‵suke ki ei i te suā mataupu?

18 A te fakalogo telā e māfua mai i te matua ‵lei i te feitu faka-te-agaga, ka fesoasoani mai foki ke ‵sao atu tatou i te taimi e fe‵paki ei tatou mo te fakataunuga lasi o te valoaga a Iesu me ka isi se “fakalavelave . . . e tafasili i te masei i fakalavelave katoa.” (Mataio 24:21) E mata, ka fakamaoni eiloa tatou o faka‵logo ki so se takitakiga fai fakavave e maua ne tatou mai “te tavini fakamaoni kae poto” i aso mai mua nei? (Luka 12:42) Ko oko eiloa i te tāua ke fakamasani faka‵lei tatou ki ‘te fakalogo mo te loto katoatoa’!​—Loma 6:​17.

19 A te matua ‵lei i te feitu faka-te-agaga e manakogina i ei a te fakamasani faka‵lei ke maua ne tatou se mafaufau telā e malosi. E fai ne tatou te mea tenei mai te taumafai malosi ke masani ‵lei tatou ki te Muna a te Atua mo te fakalogo. A te gasolo atu ki mua i te matua ‵lei e fai ei ke fe‵paki a talavou mo mea faiga‵ta fakapito. E fakaasi mai eiloa ne mataupu kolā e ‵soko mai a te auala e mafai ei o manumalo tatou i vaegā mea faiga‵ta konā.

[Fakamatalaga mai lalo]

Ne a Au Mea ne Tauloto?

• Se a te matua ‵lei i te feitu faka-te-agaga, kae e mafai pefea o oko atu tatou ki ei?

• Se a te aoga o te masani ‵lei mo te Muna a te Atua ki te ‵tou gasolo aka o matua ‵lei i te feitu faka-te-agaga?

• E mafai pefea o fakamasani tatou ki te fakalogo?

• Ne a auala e aoga ei te matua ‵lei i te feitu faka-te-agaga ki a tatou?

[Ata i te itulau e 14]

A te fakagalue aka o pati fakatonutonu i te Tusi Tapu e fesoasoani mai ke fakafesagai atu tatou ki fakalavelave i se auala ‵lei

[Ata i te itulau e 16]

A te fakalogo ki pati fakatonutonu a Iesu ne faka‵sao ei a Kelisiano mua