E Mata, e Fakalavelave Atu ki a Koe ou Lagonaga?

I TE ukega o taimi i tena olaga, ne taua atu faeloa a Lena ki ana lagonaga se ‵lei e uiga ki a ia eiloa. Ana pati: “Ne seki ‵lei oku lagonaga ona ko te fia o tausaga ne maneaneagina ei au i faifaiga fakatauavaga a koi tamaliki ei au. Ne mafaufau au me ko seai lele soku aogā.” Ne mafaufau foki a Simone ki te taimi koi talavou ei a ia kae fai mai, “Ne talitonu au me e se na ko lasi toku aogā.” Kae e foliga mai me i te lasi o te fanoanoa telā e māfua mai i vaegā lagonaga penā ko salalau valevale i aso nei. E fai mai se potukau telā e galue i te tukuatuga o pati fakatonutonu ki talavou i te telefoni, me toeitiiti kae āfa te aofaki o talavou kolā e fakaasi mai olotou “lagona se aogā e uiga ki a latou eiloa.”

E ‵tusa mo pati a nisi tino ‵poto, e ‵sae aka a lagonaga se aogā māfai e fai ne nisi tino ke maua a lagonaga penā i nisi tino. E mafai o oko atu se tino ki te tulaga tenā māfai e kote kae fakamaseigina faeloa, io me e fai valevalegina a ia. Faitalia me se a te pogai, a mea kolā ka iku mai i ei e mafai o fakavāivāi io me e fakamasei katoatoa atu ki se tino. Ne maua aka i se iloiloga fakatokita fakamuli nei, me i tino kolā e pokotia i vaegā lagonaga penei e uiga ki a latou eiloa e masani o se tali‵tonu ki a latou eiloa mo nisi tino, ko faigatā ei o maua ne latou ne fesokotakiga fakataugasoa ‵pili mo nisi tino. E fai mai te iloiloga tenā, “I te feitu e tasi, e ‘fakamāfua’ eiloa ne latou a tulaga kolā e ma‵taku malosi latou ki ei.”

A tino e maua ne latou a lagonaga penā ko latou kolā “e manava‵se kae se toka,” e ‵tusa mo pati i te Tusi Tapu. (Salamo 94:19) E tali‵tonu latou me e se mafai eiloa o ‵lei latou. Kafai e isi se mea ko ‵se, e ‵losi fakavave atu latou ki a latou eiloa. E tiga eiloa e tavae latou ne nisi tino i olotou mea ko oti ne fai, e mafau‵fau latou me ka tuku faka‵sau eiloa olotou me ‵se i se taimi. Ona ko te tali‵tonu me e se ‵tau o maua ne latou te fiafia, ko ‵to atu ei latou ki te faiga o amioga ma‵sei kolā, i te lotou faka‵tau, ko se ‵kafi ne latou o faka‵lei aka. Ne pokotia malosi a Lena, telā ne fai‵pati tatou ki ei muamua, i se masaki e uiga ki tena kai ona ko te se lava o tena talitonu ki a ia eiloa, kae fakaasi ‵tonu mai me “ne seki mafai ne au o ‵fuli se mea i ei.”

E mata, ka fai eiloa penā a tino kolā “e manava‵se kae se toka” i olotou olaga kātoa? E mata, e isi se mea e mafai o fai ke fakaseai atu ei a lagonaga penā? Ko oti ne fesoasoani atu ki tino e tokouke a fakatakitakiga mo fautuaga aogā mai te Tusi Tapu ke manumalo latou i te feitu tenei. Ne a la nisi fakatakitakiga konei, kae ne fesoasoani atu pefea ki tino penā ke maua ne latou te fiafia i te olaga? Ka fakamatala mai i te suā mataupu a te tali ki ei.