E Mafai o Fesoasoani Atu te Tusi Tapu ke Maua ne Koe te Fiafia

E TIGA eiloa e se se tusi fakatokita te Tusi Tapu, e faipati mai eiloa e uiga ki te auala e pokotia ei a tino i olotou lagonaga​—⁠i se feitu ‵lei io me masei​—⁠ki olotou mafaufau mo olotou foitino. “Kafai koe e matafiafia faeloa, kae ka tumau te malosi i a koe,” ko pati i te Tusi Tapu. “Kafai koe e fanoanoa faeloa kae pili mai te mate.” E se gata i ei, e fai‵tau foki tatou penei: “Kafai koe e vāivāi i te taimi e tupu ei se fakalavelave, ko tena uiga a koe e vāivāi eiloa.” (Faataoto 17:22; 24:10) A te lagonaga loto vāivāi e mafai o fakaseai ne ia te malosi, kae fai i ei ke fi‵ta tatou kae sē ma‵nako o fai ne ‵fuliga io me ‵sala atu ki se fesoasoani.

E mafai foki o pokotia se tino i te loto vāivāi i te feitu faka-te-agaga. A tino kolā e mafau‵fau me e seai ne olotou aogā e mafau‵fau sāle foki me e se mafai o maua se lotou fesokotakiga ‵lei mo te Atua e pelā foki mo ana fakamanuiaga. Ne fakalotolotolua a Simone, telā ne fakaasi mai i te mataupu muamua, e uiga ki tena fai mo fai se “vaegā tino telā e mafai o talia ne te Atua.” Kae, kafai e ‵kilo tatou ki te Muna a te Atua, ka maua i ei ne tatou se kilokiloga aogā e uiga ki a latou kolā e taumafai o fakafiafia atu ki a ia.

E Amanaia Mai te Atua

E fai mai te Tusi Tapu me i te “Aliki e nofo pili ki a latou kolā e loto vāivāi, e faka‵sao foki ne ia a latou kolā ko seai ne olotou fakamoemoega.” E se takalialia te Atua ki se tino “loto salamō,” kae e tauto mai me ka “toe fakamalosi ne au olotou loto mo olotou fakamoemoega.”​—⁠Salamo 34:18; 51:17; Isaia 57:⁠15.

Ne iloa ne Iesu, te Tama a te Atua, i te taimi e tasi me e ‵tau o fakailoa atu ki ana soko a te mea tonu e uiga ki te matea ne te Atua o mea ‵lei i Ana tavini. E auala i se tala fakatusa, ne fai atu a ia me e matea ne te Atua māfai ko tō se tamā manu eva ki lalo i te laukele​—⁠se mea telā e se tāua malosi ki te taulasiga o tino. Ne faka‵mafa mai foki ne ia me e iloa ne te Atua a mea likiliki e uiga ki tino, ke oko ki te aofaki o lauulu i olotou ulu. Ne fakaoti ne Iesu tena tala fakatusa ki pati konei: “Telā la, sa manava‵se koutou, i te mea e sili atu eiloa koutou i manu eva konā!” (Mataio 10:​29-31)a Ne fakaasi mai ne Iesu i konei me faitalia a lagonaga o tino taki tokotasi ki a latou eiloa, e tāua eiloa a tino kolā e fakatuanaki, i te kilokiloga a te Atua. E tonu, e fakamasaua mai te apositolo ko Petelu ki a tatou me “i te Atua e se fakailoga tino. So se tino o so se fenua e mataku ki te Atua, kae amiotonu foki, e talia faeloa a ia ne te Atua.”​—⁠Galuega 10:​34, 35.

Ke Fakapaleni Tau Kilokiloga

E fakamalosi mai te Muna a te Atua ke maua ne tatou se kilokiloga paleni e uiga ki a tatou eiloa. Ne fakaosofia te apositolo ko Paulo ke tusi mai penei: “Ona ko te alofa tauanoa ne tuku mai ki a au, au e fai atu ki a koutou katoa, ke se manatu fia maluga se tino ki a ia eiloa, ka ke mafaufau ifo kae fakamasino ifo a te tino ki a ia eiloa, e ‵tusa mo te lasi o te fakatuanaki ne tuku atu ne te Atua ki a ia.”​—⁠Loma 12:⁠3.

E se ma‵nako eiloa tatou ke tō silia te ‵tou mafau‵fau ifo ki a tatou eiloa ke fai ei mo mea e fakamata‵mata ei ki ei; kae e se ma‵nako foki tatou ke mafau‵fau me e seai ne ‵tou aogā. I lō te fai penā, e ‵tau o paleni te ‵tou kilokiloga e uiga ki a tatou eiloa, ko te iloa ne tatou a ‵tou tapulā e pelā foki mo ‵tou mea e mafai o fai. Ne fakaasi mai ne se fafine Kelisiano te tulaga tenā i ana pati konei: “Au e se se tino masei; a ko au foki e se se tino taulia malosi. E isi ne uiga ‵lei mo uiga se ‵lei i a au, e pelā eiloa mo tino katoa.”

E tonu, se mea faigofie ke faipati atu ne koe te vaegā kilokiloga tenā i lō tena faiga. E mafai o uke a taumafaiga e fai ko te mea ke fakaseai ei se kilokiloga se aogā e uiga ki a tatou telā ne ‵nofo mo tatou i tausaga e uke. E ui i ei, fakatasi mo te fesoasoani o te Atua e mafai eiloa o ‵fuli ‵tou uiga e pelā foki mo ‵tou kilokiloga e uiga ki te olaga. Tenā eiloa te mea e fakamalosi mai i te Muna a te Atua ke fai ne tatou. E fai‵tau tatou penei: “Telā la, e ‵tau o tiakina otou foitino mua, kolā e fai ne latou a koutou ke ola i otou olaga mua. A te foitino mua ko fakamaseigina valevale ne ona manakoga masei. E ‵tau o fakafou otou loto mo otou mafaufau katoa. E ‵tau mo koutou o pei ki te foitino fou, telā ne faite i foliga o te Atua i te amiotonu mo te ‵malu.”​—⁠Efeso 4:​22-24.

Mai te taumafai ke ‵fuli ‘te malosi telā e fakagalue ne ia ‵tou mafaufau,’ ko mafai ei o ‵fuli ne tatou a ‵tou uiga mai lagonaga se aogā ki lagonaga aogā. Ne iloa aka ne Lena, telā ne fakaasi atu i te mataupu muamua me seiloga ke tiakina ne ia ana lagonaga me e seai se tino e alofa io me e mafai o fesoasoani atu ki a ia, e seai eiloa se mea e mafai o fai ke ‵fuli ei ana lagonaga e uiga ki a ia eiloa. Se a te fakatakitakiga aogā mai te Tusi Tapu ne maua ne Lena, Simone mo nisi tino ke ‵fuli ei latou?

Fakatakitakiga Mai te Tusi Tapu Kolā e Maua ei te Fiafia

“Tuku atu ki te Aliki [ko Ieova] a mea e manavase koe ki ei, me ka fesoasoani a ia ki a koe.” (Salamo 55:22) A te ‵toe mea tāua, ko te fesoasoani mai o ‵talo ke maua ne tatou te fiafia tonu. E fai mai a Simone: “I so se taimi e lagona ei ne au te loto vāivāi, e ‵fuli atu au ki a Ieova kae fakamolemole atu ke fesoasoani mai ki a au. E seai eiloa se taimi ne seki lagona ei ne au tena malosi mo tena takitakiga.” I te fakamalosi mai o te faisalamo ke tuku atu a mea e manava‵se ei tatou ki a Ieova, e fakamasaua mai eiloa ki a tatou me e se amanaia mai fua a Ieova ki a tatou kae e kilo mai foki ki a tatou taki tokotasi e pelā me ne tino kolā e ‵tau o fesoasoani kae ‵lago atu a ia ki ei. Ne oko atu te loto mafātia ki soko o Iesu i te afiafi po o te Paseka i te 33 T.A., ona ko ana pati e uiga ki tena fano keatea mai i a latou. Ne fakamalosi atu a Iesu ki a latou ke ‵talo ki te Tamana, kae toe fai atu: “Fakatagi atu, kae ka maua ne koutou; ko te mea ke fakakatoatoa te otou fiafia.”​—⁠Ioane 16:​23, 24.

“E sili atu te manuia o te tino telā e tuku atu fua ana mea i lō o te tino telā e talia ne ia.” (Galuega 20:35) E pelā mo akoakoga a Iesu, a te kī ki te mauaga o te fiafia tonu i te olaga ko te tuku atu fua o au mea. I te fakaaogāga o te mea tonu tenei mai te Tusi Tapu e fai ei ke ‵saga atu tatou ki manakoga o nisi tino i lō ‵tou manakoga. Kafai e matea ne tatou te loto fakafetai o tino kolā e fesoasoani tatou ki ei, e lagona eiloa ne tatou te fiafia. E talitonu a Lena me i te fakaasi atu faeloa o te tala ‵lei mai te Tusi Tapu ki ana tuakoi e fesoasoani eiloa ki a ia i auala e lua. “Muamua, e tuku mai i ei a te fiafia mo te lotomalie telā ne faipati a Iesu ki ei,” ko ana pati. “Te lua, e tokouke a tino e ‵saga tonu mai, kae e fesoasoani mai te mea tenā ke maua ne au te fiafia.” Mai te kaimalie o tuku atu ne tatou a tatou eiloa, ka matea ei ne tatou te ‵tonu o pati i te Faataoto 11:25: “Fesoasoani atu ki nisi tino, kae ka fesoasoani mai foki a tino ki a koe.”

“A te olaga o tino ma‵tiva se olaga kausaki ki te puapuagā, ka ko tino fia‵fia e fia‵fia faeloa ki te ‵lei o olotou olaga.” (Faataoto 15:15) E maua ne tatou katoa te saolotoga ke filifili aka te auala e ‵kilo ifo ei tatou ki a tatou eiloa mo ‵tou fakanofonofoga. E mafai o fai tatou pelā mo te tino telā e kilo atu ki mea katoa me e se aogā kae loto mafātia i ei, io me e mafai o filifili tatou ke maua se kilokiloga aogā ki mea, kae “fia‵fia” ‵tou loto e pelā me e ‵nofo atu tatou i se fakaala. Konei a pati a Simone: “E taumafai au ke fakatumau se kilokiloga aogā. E fakalavelave faeloa au i aku sukesukega totino mo te galuega talai, e pelā foki mo te faiga o ‵talo. E taumafai foki au ke ‵nofo fakatasi mo tino kolā e ‵lei olotou kilokiloga, kae e taumafai foki au o fesoasoani atu ki nisi tino i toku nofo atu i konā.” E iku atu te vaegā loto fiafia penā ki te mauaga o te fiafia tonu, e pelā eiloa mo pati i te Tusi Tapu konei: “Lifu kae fia‵fia koutou kolā e amio‵tonu, e ‵tusa mo mea kolā ne fai ne te Aliki! Ka‵laga fia‵fia koutou kolā e fia‵fia ki a ia!”​—⁠Salamo 32:⁠11.

“A takaga e masani o fia‵fia fakatasi kae fakatau a‵lofa. A taina e ‵tau o fakatau fesoasoani i taimi o fakalavelave.” (Faataoto 17:17) A te talitonu ki sou kāiga pele io me se tino fakatonutonu telā e fakatuagagina, e mafai o fesoasoani atu ke fakatulaga ne tatou a lagonaga se aogā ki se tulaga ‵tau a koituai o fakamasei ne ia tatou. A te faipati atu ki nisi tino e mafai o fesoasoani mai ke maua ne tatou se kilokiloga paleni kae aogā ki mea katoa. E fai mai a Simone: “E lasi te fesoasoani e maua mai i te sau‵tala mo nisi tino a ou lagonaga. E manakogina ke fakaasi atu ne koe ki se isi tino a ou lagonaga. I te ukega o taimi ko lava loa i te fakaasi atu fua o ou lagonaga.” Ka fesoasoani atu te faiga tenā ke matea atu te ‵tonu o pati konei a te faifaataoto: “A te mafaufau ‵mafa ki se mea, e ave keatea ne ia te fiafia mai i a koe, ka ko te alofa io me se pati ‵lei e fakafiafia ne ia koe.”​—⁠Faataoto 12:⁠25.

Te Mea e Mafai o Fai ne Koe

Ko oti ne mafau‵fau tatou ki nāi mea mai fakatakitakiga fakavae e uke mai te Tusi Tapu kolā e mafai o fesoasoani mai ke manumalo tatou i ‵tou lagonaga se aogā kae ke maua ei te fiafia. Kafai e aofia koe i a latou kolā e taua atu ki olotou lagonaga se aogā, e fakamalosi atu matou ke fai ne koe se iloiloga tai ‵loto atu ki te Muna a te Atua, ko te Tusi Tapu. Fai ke maua ne koe se kilokiloga ‵lei kae paleni e uiga ki a koe e pelā foki mo tou fesokotakiga mo te Atua. Ko te motou fakamoemoega me ka maua eiloa ne koe te fiafia tonu i au mea katoa e fai ona ko fakatakitakiga mai te Muna a te Atua.

[Fakamatalaga mai lalo]

[Ata i te itulau e 7]

E maua te fiafia tonu mai te fakaaogāga o fakatakitakiga mai te Tusi Tapu