Meaalofa Kolā e Fakafiafia Atu ki te Loto te Atua

A TE tala e se se tala gali. Ko oti ne ‵fao mālō ne te tupu fafine ko Atalia a te nofogaaliki o Iuta e auala i se togafiti masei mo te tatino. Mai tena mafaufau me ko oti ne tamate katoa a sui mai te kaigā tupu, ne fakasopo ei ne ia a ia eiloa mo fai te tupu fafine. Ne ‵funa ne se suā fafine, te pelenisese ko Ieosepa mo te loto toa, telā ne alofa malosi ki a Ieova mo ana Tulafono, a te tama a te tupu, ko te pepe ko Ioasa. Ne ‵funa ne Ieosepa mo tena avaga, ko te Faitaulaga Sili ko Ieoiata a te tama a te tupu i tausaga e ono i loto i te lā potu i te faletapu.​—⁠2 Tupu 11:​1-3.

I te taimi ko fitu ei tausaga o Ioasa, ne toka ‵lei ei a te Faitaulaga Sili ko Ieoiata o tapale keatea a te tupu fafine mai te tulaga telā ne ‵fao mua ne ia. Ne aumai ne ia ki tua te tamaliki tagata tenā mai te koga ne fakamuni i ei kae faū ei mo fai te tupu o te malo. Ne ave a te tupu fafine matagā ko Atalia ki tua mo te faletapu ne sotia pule kae tamate i ei, kae ne fia‵fia malosi ei a tino. Ona ko lā faifaiga konā, ne fesoasoani malosi atu eiloa a Ieoiata mo Ieosepa ki te toe fakafouga o te tapuakiga tonu i Iuta. Kae sili atu i ei, e lasi te tusaga ne fai ne laua ki te fakasologa o te gafā tupu o Tavita, telā ka takitaki atu ei ki te Mesia.​—⁠2 Tupu 11:​4-21.

Ne ‵tau foki o fai ne te tupu fou tenā tena tusaga i te fakafiafia atu ki te loto o te Atua. Ne manakogina malosi ke toe fakafou aka te fale o Ieova. Ona ko te lasi o te manakoga masei o Atalia ke fai a ia mo pule aoao o Iuta, ne seki fia saga atu ei a ia ki te faletapu kae kaisoa foki ne ia a mea i ei. Tenā, ne manako malosi ei a Ioasa ke toe faite kae fakafou te faletapu. E aunoa mo se fakatalave, ne fai tena fakatonuga ke ‵sala a tupe mō te fakafouga o te fale o Ieova. Ne fai atu a ia: “Teu faka‵lei aka a tupe kolā e maua sāle mai taulaga i te Faletapu, ko tupe i taulaga fai sāle, mo tupe e maua i te loto malie. A faitaulaga taki tokotasi ke onoono faka‵lei ki tupe e avatu ki a latou ne tino kolā ne tautua latou ki ei. A te tupe e fakaaogā mo faite a mea o te Faletapu kolā ko ma‵sei.”​—⁠2 Tupu 12:​4, 5. 

Ne tuku atu ne tino olotou meaalofa mo te loto kātoa. Kae ne seki fakamaoni katoatoa a faitaulaga ki olotou tiute ke faka‵lei aka te faletapu. Telā la, ne fakaiku aka ne te tupu ke fai eiloa ne ia te galuega tenā, telā ne fakatonu atu ei ke faite se pokisi mo tuku a meaalofa konā. Ne fai ne ia a Ieoiata ke onoono ki te mea tenā, kae fai mai te tala: “Ne puke mai ne Ieoiata se pokisi, fakapu aka ne ia se pu i te pono, kae tuku atu te pokisi tenā i tafa o te fatafaitaulaga, i te feitu fakaatamai, i te koga e ulu mai ei a tino. A faitaulaga kolā e ga‵lue i te mataloa e tuku ne latou ki loto i te pokisi, a tupe katoa kolā e aumai ne tino tapuaki. Kafai ko uke eiloa a tupe i loto i te pokisi, ko mai ei a te failautusi a te tupu mo te Faitaulaga Pule o lau te tupe, ko saisai ei ki taga. Kafai ko oti ne lau te aofaki tonu, ko tuku atu ei ne laua a te siliva ki tāgata kolā e pulepule i te faiga o te galuega i te Faletapu. A te tupe tenā e ‵togi ei a kamuta, tino faite fale, tino ga‵lue i fatu, mo tino katikati fatu; e ‵togi foki ei a laupapa mo fatu kolā e fakaaogā mō te galuega; e ‵togi foki ki ei a nisi mea kolā e manakogia mō te galuega.”​—⁠2 Tupu 12:​9-12.

Ne ‵saga atu a tino mo te loto kātoa ki te faiga o te galuega. Ne toe fakafou a te faletapuaki o Ieova ko te mea ke mafai o toe tapuaki atu ki a ia i se auala ‵malu. Ne fakaaogā eiloa faka‵lei a meaalofa kolā ne tuku atu. Ne fakamautinoa aka eiloa ne te tupu ko Ioasa a te mea tenā!

I aso nei, e onoono faka‵lei a te fakapotopotoga matea a Ieova ke fakaaogā faka‵lei a meaalofa kolā e tuku atu ke fakalauefa atu ei te tapuakiga ki a Ieova, kae ko oti ne ‵saga tonu atu ki ei a Kelisiano ‵tonu i aso nei e pelā mo tino Isalaelu i aso mua​—⁠mo te loto kātoa. Kāti e aofia koe i tino kolā ne fai meaalofa ke fakalauefa atu ei a manakoga o te Malo i te tausaga faka-te-taviniga ko teka. Ke onoono nei tatou ki nisi auala kolā ne fakaaogā ei au meaalofa.

Te Fakamalosiakaga o Akoakoga Mai te Tusi Tapu

Ne fakatonu atu a Iesu Keliso ki ana soko ke olo ki “fenua katoa ke fai a tino i ei mo [ana] soko.” (Mataio 28:19) Mai te faka‵logo ki ana pati, e fakalave‵lave nei a Molimau a Ieova i te folafolaatuga mo te akoakoatuga o te fekau mai te Tusi Tapu i fenua e 235. E ‵lomi kae tufa atu ne latou a tusi faka-te-Tusi Tapu i ‵gana e 413.

Kae ko te toe kope tāua eiloa e mafai o fakameaalofa atu ne se Kelisiano i te fesoasoani atu ki tino e tokouke ke tauloto e uiga ki te Atua mo Ana fuafuaga, ko tena taimi. Ko oti ne fakaavanoa ne Molimau a Ieova olotou taimi e uke mo olotou malosi ke fesoasoani atu ei ki olotou tuakoi. Ko oti foki ne tuku atu mo te kaimalie olotou meaalofa tupe, kae e fesoasoani atu so se meaalofa e tuku atu ne latou ki te faiga o te igoa mo fuafuaga a Ieova ke lauiloa i te lalolagi kātoa. E fakamoe‵moe tatou ke fakamanuia mai faeloa ne Ieova a ‵tou taumafaiga ke fesoasoani atu ki nisi tino ke fakauke atu olotou mea e iloa e uiga ki a ia. (Faataoto 19:17) A te fesoasoani atu mo te loto finafinau e fakafiafia atu ei ki te loto o Ieova!​—⁠Epelu 13:​15, 16.

TE ‵LOMIGA O TUSI

Ko oti ne ‵lomi a tusi konei i te lalolagi kātoa ke sukesuke ki ei kae ke tufa atu foki:

• Tusi: 47,490,247

• Tamā Tusi: 6,834,740

• Polosiua: 167,854,462

• Kalena: 5,405,955

• Mekesini: 1,179,266,348

• Tamā Pepa: 440,995,740

• Vitio: 3,168,611

E ‵lomi a tusi i fenua ko Afelika, Amelika ki Matū, Amelika i te Kogaloto, Amelika ki Saute, Asia, Eulopa mo fenua o te Pasefika​—⁠e ‵tusa mo te 19 te aofaki o fenua katoa.

“A toku igoa ko Katelyn May. Ko valu oku tausaga. E isi saku $28, kae e manako au o tuku atu ke fesoasoani ki te ‵togiga o mesini ‵lomi tusi. Ko te otou tuagane foliki, Katelyn.”

“Ne fai‵pati te motou kāiga e uiga ki mesini ‵lomi tusi ‵fou. Ne fakaiku aka ne mā tama‵liki kolā ko 11 mo te 9 o lā tausaga, ke fai te lā tusaga mai tupe kolā ne ‵teu eiloa ne laua. E fia‵fia maua o avatu te lā meaalofa fakatasi mo te mā meaalofa.”

GALUEGA FAKATU‵TU

E fakasolo atu mai lalo nei ko nisi fale kolā ne faka‵tu ke ‵lago atu ei ki te galuega e fai ne Molimau a Ieova:

• Kingdom Hall i fenua kolā e se na lo ko mau‵mea: 2,180

• Fale Fai Fono: 15

• Ofisa Lagolago: 10

• Volenitia kolā e ga‵lue tumau i galuega fakatu‵tu i te lalolagi kātoa: 2,342

“I te fakaotiga o te vaiaso nei ne fai ei te fakatasiga muamua eiloa a matou i te motou Kingdom Hall fou. E fia‵fia malosi matou me ko isi se koga ‵lei ke avatu i ei a vikiga ki te ‵tou Tamana, ko Ieova te Atua. E fakafetai matou ki a Ieova e pelā foki mo koutou, mo te amanaia mai ki omotou manakoga mai te faitega o Kingdom Hall e uke. E tonu, e fai eiloa te motou Kingdom Hall e pelā me se kope tāua i te motou fa‵kai.”​—⁠Chile.

“E fia‵fia malosi a taina mo tuagane ki te fesoasoani e tuku mai ne te fakapotopotoga a Ieova. Ke oko mai ki te aso nei, koi sau‵tala faeloa matou ki te taimi gali ne ‵kau fakatasi ei matou mo te potukau fakatu‵tu.”​—⁠Moldova.

“Ne fatoā oti ne fakamanatu ne maua mo taku avaga te katoaga o te 35 tausaga o te mā fakaipoipoga. Ne mafau‵fau māua me ne a meaalofa ka ‵togi ne māua mō te taimi tenā, kae ne fakaiku aka ne māua ke tuku atu se meaalofa ki a Ieova mo tena fakapotopotoga, me e aunoa mo te lotou fesoasoani, kāti e se manuia te mā fakaipoipoga. E ma‵nako maua ke fakaaogā a te tupe tenei mō te faitega o se Kingdom Hall i fenua kolā e se na lo ko mau‵mea.”

“Ne fatoā maua ne au a toku vaega mai se togi, kae ona ko te mea e se uke a mea e ‘manako’ au ki ei kae se uke malosi foki a mea e ‘‵tau’ o maua ne au, e manako au ke fakaaogā ne koutou a te tupe tenei ke faite ei a Kingdom Hall i fenua kolā e manakogina malosi i ei.”

FESOASOANI I TAIMI O FAKALAVELAVE ‵TUPU FAKAFUASEI

I aso fakaoti konei, e ‵tupu fakafuasei sāle a fakalavelave. E fai ne Molimau a Ieova e tokouke olotou meaalofa ko te mea ke mafai o fesoasoani atu ei ki olotou taina kolā e ‵nofo i fenua kolā e pokotia i mea konā. E pelā me se fakamasauaga, a meaalofa mō fakalavelave ‵tupu fakafuasei e fai pelā me se vaega o te galuega i te lalolagi kātoa. E fakasolo mai i lalo nei, ko koga kolā ne oko atu ki ei te fesoasoani o Molimau a Ieova:

• Afelika

• Asia

• Kogā Koga i te Caribbean

• Fenua o te Pasefika

“E fakafetai lasi atu māua mo taku avaga e uiga mo te fesoasoani ne maua mai i a koutou ke faka‵lei aka ei a mea kolā ne fakama‵seigina i te alikeni. Ko oti ne faite te tuafale o te mā fale. E fakafetai lasilasi eiloa māua me ne ‵saga fakavave mai koutou.”

“A toku igoa ko Connor, kae ko 11 oku tausaga. I te taimi ne lavea ei ne au a mea ne ‵tupu i te taimi ne poko ei te galu lasi, ne manako au o fesoasoani. E fakamoemoe au me ka fesoasoani atu a te mea tenei ki oku taina mo tuagane.”

TAVINI FAKAPITO I TE TAVINIGA TUMAU

E isi ne Kelisiano e ga‵lue tumau i te galuega talai io me i te Peteli. E maua ne volenitia i te taviniga tumau a te fesoasoani mai meaalofa kolā ne tuku atu mo te loto kātoa. E aofia i tino konā ko latou konei:

• Misionale: 2,635

• Ovasia faima‵laga: 5,325

• Tino ga‵lue i te Peteli: 20,092

“Ona ko te mea e se mafai nei o fanatu au o galue i te Peteli [se tamaliki tagata ko lima ana tausaga], e fiafia au o avatu a te meaalofa tenei mo toku loto kātoa. Kafai ko lasi au, ka fano eiloa au o galue malosi i te Peteli.”

[Te Fakamatalaga o Ata i te itulau e 9]

Faithful video: Stalin: U.S. Army photo