Fakafiafiaga Kolā e Faka‵fou Malosi

“Me ne a otou mea e fai, me ‵kai io me inu, e fai katoa ne koutou mō te vikiga o te Atua.”​—1 KOLINITO 10:31.

1, 2. Kaia e mafai ei o ‵kilo atu ki fakafiafiaga e pelā me se “meaalofa a te Atua,” kae se a te polopolokiga manino e tuku mai i te Tusi Tapu?

SE MEA masani ke fia aofia tatou i faifaiga kolā e fakafia‵fia ki a tatou. E manako a te ‵tou Atua fiafia ko Ieova ke fia‵fia tatou i te olaga nei, kae tuku mai ne ia a mea e uke ke mafai o fakataunu a te mea tenā. (1 Timoteo 6:17) Ne tusi mai a te tupu poto ko Solomona: “Ko iloa aka nei ne au me i te mea sili e ‵tau o fai . . . ko te fakafia‵fia . . . e ‵tau mo tatou katoa o ‵kai kae inu kae fakafiafia ki mea ne maua ne tatou mai o‵tou galuega. Ko te meaalofa a te Atua tenā.”​—Failauga 3:​12, 13.

² A te fiafia telā e maua mai te mafaufau ki galuega kolā ko oti ne fai ne koe e fakamalie loto, maise eiloa māfai e ‵kau fakatasi koutou i ei mo kāiga mo taugasoa. E mafai o kilo tonu atu ki te mea tenā e pelā me se “meaalofa a te Atua.” E tonu, a te tukumaiga o mea e lava kae ‵toe ne te ‵tou Mafuaga e se fakauiga i ei me ko maua ne tatou te saolotoga ke aofia i so se fakafiafiaga telā e se mafai o pule atu ki ei. E taku fakamasei ne te Tusi Tapu a te konā, gafula mo te finalalolagi, kae polopoloki mai foki me i tino kolā e fai ne latou a vaegā mea penā ka “se ulu atu ki te malo o te Atua.”​—1 Kolinito 6:​9, 10, NW; Faataoto 23:​20, 21; 1 Petelu 4:​1-4.

3. Se a te mea ka fesoasoani mai ke tumau tatou i te ala i te feitu faka-te-agaga, kae ke masaua faeloa te aso lasi o Ieova?

³ I aso fakaoti kae faiga‵ta konei, e fe‵paki eiloa a Kelisiano mo toe tulaga faiga‵ta ke ola faka‵lei latou i loto i se lalolagi faivalevale e aunoa mo te aofia i ana faifaiga masani. (Ioane 17:​15, 16) E pelā mo te mea ko oti ne ‵valo mai, a tino o te kautama tenei ko sili atu te lotou “fia‵fia ki manakoga o te foitino i lō te Atua,” ko fai ei ke se matea io me “fia ‵saga” latou ki fakamaoniga o te pili mai o te ‵toe ‘fakalavelave lasi.’ (2 Timoteo 3:​4, 5; Mataio 24:​21, 37-39) Ne polopoloki atu a Iesu ki ana soko: “Fakaeteete koutou! Ke mo a ma to fai ‵kaiga kae ko‵na sāle, io me manava‵se ki mea o te olaga nei, i te mea manafai e fakapoi mai te aso tenā ki a koutou. Me ka vau pelā mo se malei.” (Luka 21:​34, 35) E pelā me ne tavini a te Atua, ko oti ne fakaiku aka ne tatou ke ‵saga tonu atu ki pati a Iesu. E se pelā mo tino se amioatua o te lalolagi i ‵tou tafa, e taumafai tatou ke tumau i te ala i te feitu faka-te-agaga kae ke masaua faeloa te aso lasi o Ieova.​—Sefanaia 3:8; Luka 21:36.

4. (a) Kaia e faigatā ei ke maua ne tatou a fakafiafiaga ‵lei? (e) Ne a fakatakitakiga i te Efeso 5:​15, 16 e fia fakagalue ne tatou?

⁴ A te ‵kalo keatea katoatoa mai faifaiga faivalevale o te lalolagi nei e se se mea faigofie, ona ko te mea ko oti ne fai ne te Tiapolo ke umiti malosi a tino ki ei kae ke mauagofie foki. E sili atu la te faigatā māfai ko ‵sala atu tatou ki fakafiafiaga. A te ukega o mea kolā e tuku mai ne te lalolagi ne fakatoka eiloa ke fakamalosi aka ei a manakoga “faka te foitino.” (1 Petelu 2:11) E maua a fakafiafiaga ma‵sei i koga kolā e ‵nofo sāle i ei a tino, kae e mafai foki o oko atu ki loto i fale o kāiga e auala i tusi faitau, TV, te Internet mo vitiō. Telā la, e polopoloki mai a te Muna a te Atua mo te poto ki Kelisiano: “Mafaufau faka‵lei ki auala e ‵tau o ola koutou i ei. Sa ola e pelā mo ne tino va‵lea, kae ke pelā mo tino ‵poto. Fakaaogā faka‵lei so se avanoa e maua ne koutou, i te mea ko aso ma‵sei a aso nei.” (Efeso 5:​15, 16) Ko te tau‵tali katoatoa atu fua ki pati polopoloki konei e mafai ei o mautinoa i a tatou me ka se fakalata tatou ne fakafiafiaga ma‵sei, ka se fakamāumau ki ei ‵tou taimi, kae fakamasei foki i ei a ‵tou fesokotakiga mo Ieova, telā e iku atu i ei ki te ‵tou fakaseaiga!​—Iakopo 1:​14, 15.

5. E maua ne tatou mai fea te ‵toe fakamalosiga ‵lei?

⁵ Ona ko te mea e fakalavelave malosi a Kelisiano i te uke o olotou galuega e fai i te olaga, e maua eiloa ne latou i nisi taimi te manakoga ke maua a fakafiafiaga. E tonu, e fai mai te Failauga 3:4 me e isi se “taimi o te fiafia” mo “te taimi o te saka fiafia.” Telā la, e se fakaseaogā ne te Tusi Tapu a fakafiafiaga. Kae, e ‵tau o faka‵fou ‵tou malosi ne fakafiafiaga, e se ko te fakamaseiga o ‵tou tulaga faka-te-agaga io me fakalavelave mai ki ‵tou galuega faka-te-agaga. E iloa ‵lei ne Kelisiano ma‵tua me e maua a te fiafia tonu mai te tukuatuga o mea. E fakamuamua ne latou a te faiga o te loto o Ieova i olotou olaga kae e maua ne latou te ‘malosi fou’ mai te talia ne latou a te amoga māmā a Iesu.​—Mataio 11:​29, 30; Galuega 20:35.

Te Filifiliga o Fakafiafiaga ‵Lei

6, 7. Se a te mea e fesoasoani atu ke fakaiku aka ne koe a fakafiafiaga ‵lei mo fakafiafiaga sē ‵lei?

⁶ E iloa pefea ne tatou a fakafiafiaga kolā e ‵lei mō Kelisiano? E tuku atu ne mātua a fakatakitakiga ki olotou tama‵liki, kae fesoasoani atu foki a toeaina māfai e manakogina. Kae e se manakogina ke fai mai a nisi tino i se tusi, ata, tafaoga, tanisi, io me se pese e masei. E fai mai a Paulo me i “tino ma‵tua . . . ko oti ne akoako ke iloa ne latou o tami ki te kesekesega o te ‵lei mo te masei.” (Epelu 5:14; 1 Kolinito 14:20) E tuku mai ne te Tusi Tapu a fakatakitakiga fakavae. Ka fesoasoani atu a tou loto lagona, telā ko oti ne akoako ki te Muna a te Atua, māfai e fakalogo koe ki ei.​—1 Timoteo 1:​19, NW.

⁷ Ne fai mai a Iesu me “i te lakau e iloa ‵lei eiloa i ona fuataga.” (Mataio 12:33) Kafai e fua mai i se vaegā fakafiafiaga a fuataga ma‵sei o te fiafia ki amioga fakasauā, finalalolagi, io me ko faifaiga faivailakau, e ‵tau eiloa o ‵teke atu ki ei. E se ‵tau foki o talia a te mea tenā māfai e fakamataku ki tou ola io me ki te tulaga o tou ola ‵lei, māfai e fakafi‵ta atu i mea tau tupe io me e fakaloto vāivāi atu, io me e fai i ei nisi tino ke pa‵ku. E fakailoa mai te apositolo ko Paulo me kafai e fakamasei ne tatou a te loto lagona o ‵tou taina, ka agasala eiloa tatou. Ne tusi mai a Paulo: “Ona ko te faiga penei ko agasala ei koutou ki a Keliso, i te fakaagasala ne koutou otou taina kae faka‵mae foki ne koutou olotou mafaufau vāivāi io me ko olotou loto lagona. Kafai ko meakai ko te pogai e agasala i ei toku taina, ka se toe kai eiloa au ki so se meakai telā e fakataputapu, me mana agasala ei toku taina ona ko au.”​—1 Kolinito 8:​12, 13.

8. Ne a mea fakama‵taku e ‵sae aka i tafaoga i vitiō?

⁸ Ko ‵fonu eiloa a sitoa i tafaoga i vitiō. Kāti e seai se mea e fai i ei a nisi tafaoga i vitiō, kae ko gasolo o uke atu a tafaoga kolā e taku fakamasei ne te Tusi Tapu. E tonu, e se se mea faifa‵kata māfai e manakogina i se tafaoga ke tamate tino io me e fai a toe amioga finalalolagi matagā ne tino i te ata! E takalialia a Ieova ki “tino amio fakasauā.” (Salamo 11:5; Faataoto 3:31; Kolose 3:​5, 6) Kae kafai e ati aka ne se tafaoga i loto i a koe se lagonaga kaimanako, te fiafai taua, te fakamaseiga ou lagonaga, io me ko te fakamāumau taimi, taumafai ke matea te fakamaseiga faka-te-agaga telā e māfua mai i ei kae gasuesue fakavave o fai se fakamafuliga ki ei.​—Mataio 18:​8, 9. 

Te Fakataunuga o Fakafiafiaga ‵Lei i Auala Aogā

9, 10. Ne a mea e mafai o fai ne tino ‵poto ke fakataunu ei olotou manakoga e uiga ki fakafiafiaga?

⁹ I nisi taimi, e fesili mai a Kelisiano: “Ne a fakafiafiaga ‵lei? A te ukega o mea e tuku mai ne te lalolagi e se fetaui mo fakatakitakiga i te Tusi Tapu.” Se mea mautinoa me e mafai eiloa o maua a fakafiafiaga aogā, kae e uke a taumafaiga e ‵tau o fai i ei. E manakogina i ei a te kilo ‵mao mo te faiga o fakatokaga ‵lei, maise eiloa a mātua. E maua ne tino e tokouke a fakafiafiaga fakalotomalie i te kāiga e pelā foki mo te fakapotopotoga. E mafai o ‵kai kae sau‵tala fakatasi ki mea ne fai i te aso tenā io me ki se mataupu faka-te-Tusi Tapu gali kae fakamalosi loto. E mafai foki o fakatoka ke olo o pikiniki, ta‵fao, io me sa‵sale i te vao. E mafai o aogā a vaegā fakafiafiaga penā.

¹⁰ E lipoti mai se toeaina mo tena avaga kolā ne puti aka ne laua a lā tama‵liki tāgata e tokotolu: “Mai te taimi koi fo‵liki ei, ne aofia a ma tama‵liki i te filifiliga o koga ke olo ki ei matou o malōlō. I nisi taimi, e talia ne maua ke ‵kami mai ne latou taki tokotasi sena taugasoa, telā ne fai i ei ke gali atu te motou malōlōga. E uke ‵ki a mea ne fakatāua ne ma tama‵liki. I nisi taimi, e ‵kami mai ne maua a kāiga mo taugasoa i te fakapotopotoga ki te motou fale. Ne kuka kae ‵kai matou i te tafafale o te fale kae fai foki motou tafaoga. Ne olo sāle matou o launi kae sa‵sale i luga i mauga, kae fakaaogā a avanoaga konā ke mafau‵fau ki mea a Ieova ne faite.”

11, 12. (a) Ne a au mea e mafai o fai ke aofia a nisi tino i au fakatokaga mō fakafiafiaga? (e) Ne a vaegā maopoopoga kolā e faigatā o fakapuli ne tino e tokouke?

¹¹ E mata, e mafai o fakamasani atu koe io me ko te otou kāiga ke aofia a nisi tino i otou fakafiafiaga i nisi taimi? Kāti e isi ne tino e ma‵nako ki fakamalosiga e pelā mo se fafine ko mate tena avaga, se tino taka, io me se mātua telā e seai sena avaga. (Luka 14:​12-14) Kāti e mafai foki o aofia a tino kolā ne fatoā ‵kau mai, kae ke fakaeteete ke mo ma tuku faka‵sau atu a nisi tino ki so se fakamalosiga se ‵lei. (2 Timoteo 2:​20, 21) Kafai e faigatā ki tino ma‵saki ke olo ki nisi koga, kāti e mafai o fai ne fakatokaga ke ‵kai fakatasi mo latou i olotou fale.​—Epelu 13:​1, 2.

¹² A maopoopoga kolā e ‵kai fakatasi ei a tino ‵kami i se ‵kaiga masani e iloa atu ei te auala e fai ei a nisi tino mo fai ne Kelisiano, mo te mea telā ne fesoasoani atu ki a latou ke tumau i te fakamaoni ki te Atua, ne faigatā o fakapuli i tino e tokouke. E mafai o fakasae aka ne mataupu faka-te-Tusi Tapu ke sau‵tala ki ei mo tino katoa i konā, kae ke ‵kami mai foki a tama‵liki ke aofia i ei. E mafai o aogā ‵ki a vaegā sautalaga penā ke fakatau fakamalosi aka ei e aunoa mo te mā mo lagonaga se aogā.

13. Ne tuku mai pefea ne Iesu mo Paulo se fakaakoakoga i te fakaasimaiga mo te taliaga o uiga talimālō ‵lei?

¹³ Ne fakaasi mai ne Iesu se fakaakoakoga ‵lei i te fakaasimaiga mo te taliaga o uiga talimālō ‵lei. Ne fakaaogā faeloa ne ia a vaegā taimi penā ke tuku atu ei a fakamanuiaga i te feitu faka-te-agaga. (Luka 5:​27-39; 10:42; 19:​1-10; 24:​28-32) Ne fakaakoako atu eiloa ana soko mua ki a ia. (Galuega 2:​46, 47) Ne tusi mai te apositolo ko Paulo: “Ko oko eiloa i toku fia oko atu, ko te mea ke mafai ne au o avatu ki a koutou a nisi meaalofa faka te Agaga, e fakamalosi ei koutou. Ko tena uiga ke fakatau fesoasoani tatou i te tou fakatuanaki, o faka lotomalosi mai koutou, ka ko au ki a koutou.” (Loma 1:​11, 12) I se auala tai ‵pau, e ‵tau o fai a ‵tou maopoopoga e pelā me ne koga e fakatau fakamalosi aka ei tatou.​—Loma 12:13; 15:​1, 2. 

Nisi Fakamasauaga mo Nisi Mea ke Fakaeteete i ei

14. Kaia e se fakamalosi atu ei ke fai ne fakafiafiaga ‵lasi?

¹⁴ E se fakamalosi mai ke fai ne fakafiafiaga ‵lasi, me e faigatā ke tausi faka‵lei atu ki ei. I se taimi telā e seai ne mea faka-te-agaga e fai i ei, e mafai o ‵kau fakatasi ne nāi kāiga i se pikiniki io me e ta‵fao fakatasi e aunoa mo te agaga o te fakatau‵fai. A te ‵kau atu o nisi toeaina, tavini fakafaifeau, io me ko nisi tino ma‵tua ki se maopoopoga penā, e tuku atu ei se fakamalosiga aogā kae e mafai o maua foki ei se malosi fou.

15. Kaia e ‵tau ei o onoono faka‵lei ki tino i te taimi e maopoopo ei i se fakafiafiaga?

¹⁵ I taimi e maopoopo ei i fakafiafiaga, e ‵tau o onoono faka‵lei a tino e fai ne latou te fakatokaga, ke fanofano ‵lei te fakafiafiaga. E ui eiloa e fiafia koe ke fakaasi atu te uiga talimālō, e mata, ka se ‵lei ou lagonaga māfai ko iloa ne koe me ona ko tou fakatamala, ne seki fiafia ei se tino ‵kami ki se mea telā ne fai i tou fale? Ke mafaufau faka‵lei ki te fakatakitakiga telā e fakaasi mai i te Teutelonome 22:8. So se tino Isalaelu telā e faite sena fale fou e ‵tau o faite ne ia a ‵pui i luga i te tuafale o tena fale, telā ne fakaaogā sāle mō fakafia‵fia a tino ‵kami. Kaia? “Kafai e to se tino mai i te tuafale o tou fale kae mate, e se ‵se koe i te feitu tenā.” I se auala tai ‵pau, a te mea telā e fai ne koe​—mai te tuku atu a fakataputapuga ‵tau​—ke puipui ei au tino ‵kami i se fakafiafiaga, e fakaasi atu ei tou amanaia ki olotou manakoga faka-te-foitino e pelā foki mo te feitu faka-te-agaga.

16. Ne a mea e ‵tau o fakaeteete i ei māfai e fakaaogā te kava i fakafiafiaga?

¹⁶ Kafai e fakaaogā te kava i se fakafiafiaga, e ‵tau o fai te mea tenā mo te fakaeteete. E fakaiku aka ne Kelisiano e tokouke kolā e talimālō ke fakaaogā te kava māfai fua e mafai o onoono faka‵lei latou ki mea kolā e tuku atu ki olotou tino ‵kami mo te aofaki e fakaaogā ne latou. E seai se mea e ‵tau o talia telā e mafai o fakavāivāi atu ki nisi tino io me fakaosooso atu ki se tino ke tō silia tena inu. (Efeso 5:​18, 19) E kese‵kese a pogai e se ma‵nako ei a nisi tino ‵kami ke fakaaogā ne latou te kava. E uke a fenua e fakatapulā ne latou a tausaga o te matua e uiga ki te talia o inu kava, kae ‵tau mo Kelisiano o faka‵logo ki tulafono a Kaisala io me ko te malo faitalia te faigatā.​—Loma 13:5.

17. (a) Kafai e faka‵tagi a pese i se fakafiafiaga, kaia e tāua ei ke filifili faka‵lei aka ne te tino talimālō a pese kolā e ‵tau o faka‵tagi? (e) Kafai e fai se fakafiafiaga, e fakaasi atu pefea a uiga ‵lei?

¹⁷ E ‵tau o fakamautinoa aka ne te tino talimālō me e fetaui ‵lei a pese fakatagi‵tagi, vaegā saka, io me ko nisi fakafiafiaga mo fakatakitakiga i te Tusi Tapu. E kese‵kese a fina o tino takitokotasi e uiga ki pese, kae uke ‵ki a vaega kese‵kese o pese. Kae, ko te ukega o pese i aso nei e fakamalosi aka i ei a uiga ‵teke, finalalolagi mo amioga fakasauā. E ‵tau o filifili faka‵lei a pese. E se fai pelā me ko pese tagi‵tagi malielie fua e ‵tau o talia, kae e se ‵tau foki o faka‵tagi a pese kolā e fakamalosi aka ei a lagonaga finalalolagi io me ko pati matagā kae fakalogoā. Ke fakaeteete ke se tuku ne koe ki se tino telā e se iloa ne ia o fuafua te maluga ‵lei o te leo. A vaegā ‵saka kolā e fakaasi atu ei a tāga ma‵sei e aofia i ei a te lue valevale o tega mo fatafata e se ‵tau eiloa o fai ne Kelisiano.​—1 Timoteo 2:​8-10.

18. E mafai pefea o puipui ne mātua olotou tama‵liki mai te tausi atu ki a latou i feitu tau fakafiafiaga?

¹⁸ E ‵tau o iloa ne mātua Kelisiano a mea katoa kolā ko oti ne fakatoka mō se fakafiafiaga telā e ‵kami olotou tama‵liki ki ei, kae se mea poto ke olo fakatasi a laua mo latou i te ukega o taimi. E fakafanoanoa me ko oti ne talia ne nisi mātua ke olo atu olotou tama‵liki i a latou eiloa ki pātī kolā e seki fakatoka faka‵lei, kae ko oti ne fakaosoosogina a nisi tino ke fai amioga finalalolagi mo nisi amioga sē ‵ma. (Efeso 6:​1-4) Kafai foki loa ko tai katoa te luasefulu tausaga o tama‵liki kae ko oti ne fakaasi mai ne latou olotou amioga ‵lei, e ‵tau eiloa o fesoasoani atu ki a latou ke ‵kalo keatea mai “manakoga fakatamatane.”​—2 Timoteo 2:22.

19. Se a te mea tonu e fesoasoani mai ki a tatou ke ‵saga tonu atu ki mea kolā e ‵tau o ‘‵sala muamua’ ki ei?

¹⁹ A fakafiafiaga aogā kae fakamalosi loto kolā e fai i nisi taimi e mafai o fai mo mea fakafiafia i te olaga. E se fai pelā me e se fia tuku mai ne Ieova a vaegā fakafiafiaga penei ki a tatou, kae iloa ‵lei ne tatou me i vaegā faifaiga penā i a latou eiloa e se fesoasoani mai ke fakaputu ne tatou a koloa faka-te-agaga i te lagi. (Mataio 6:​19-21) Ne fesoasoani atu a Iesu ki ana soko ke malamalama me i te ‘‵sala muamua ki tena Malo mo te amiotonu o te Atua’ ko te ‵toe mea tāua eiloa i te olaga, e se ko mea e kai io me inu io me ‵pei ei tatou, ko mea konā e “salasala ne tino o fenua fakaa‵tea.”​—Mataio 6:​31-34.

20. Ne a mea e ‵tau o olioli ki ei a tavini fakamaoni a Ieova mai te Tino Sili telā e tuku mai ne ia a mea katoa?

²⁰ E tonu, faitalia me “ne a otou mea e fai, me ‵kai io me inu,” e mafai o fai ne tatou a mea katoa “mō te vikiga o te Atua,” mai te fakafetai atu ki te Tino Sili telā e tuku mai ne ia a mea katoa e ‵tusa mo mea ‵lei katoa kolā e maua ne tatou. (1 Kolinito 10:31) I tena lalolagi Palataiso telā ko pili mai, ka seai eiloa se gatamaiga o mea ‵gali kolā ka maua ne tatou ona ko te kaimalie o Ieova, fakatasi mo fesokotakiga aogā mo tino katoa kolā e fetaui ‵lei olotou amioga mo faifaiga amio‵tonu a te Atua.​—Salamo 145:16; Isaia 25:6; 2 Kolinito 7:1.

E Masaua ne Koe?

• Kaia e faigatā ei ke maua ne Kelisiano i aso nei a fakafiafiaga aogā?

• Ne a nisi fakafiafiaga kolā ko oti ne fakatalitonu aka me e aogā ki kāiga Kelisiano?

• Kafai ko ‵kau atu ki fakafiafiaga, ne a mea e ‵tau o masaua ne tatou kae ne a foki mea e ‵tau o fakaeteete i ei?

[Ata i te itulau e 27]

Ne a vaegā fakafiafiaga e ‵teke atu ki ei a Kelisiano?