E Mata, E Aoga Ki A Koe A Fakafiafiaga?

“Taumafai o tauloto ki mea kolā e fiafia ki ei te Aliki.”—EFESO 5:10.

1, 2. (a) E fakaasi mai pefea i te Muna a te Atua me e manako a Ieova ke ola fia‵fia tatou? (e) Se a te mea ka fai ne ia tatou ke ‵kilo atu ki fakafiafiaga e pelā me se “meaalofa a te Atua”?

E MAUA ne tatou i te Tusi Tapu kātoa a fakamatalaga kolā e fakaasi mai i ei me e se manako fua a Ieova ke ola tatou kae ke fia‵fia foki tatou i te olaga. E pelā mo te mea e tasi, e fai mai te Salamo 104:14,15 me e fai ne Ieova a “lakau kaina . . . mo te tino ke mafai ne ia o ‵toki ana fatoaga, ke maua ei a te uaina e fakafiafia ei a ia, mo te sinu olive e fakamata fiafia ei a ia, mo te falaoa e fakamalosi ei a ia.” E tonu, e fakaola ne Ieova a lakau katoa ke ola ke maua mai ei a sinu olive, uaina mo falaoa ke fakafiafia kae fakamalosi ei a tino. Kae ko te uaina foki e ‘fakafiafia’ ne ia te loto o te tino. E se tāua malosi ke fakatumau ei te ola kae fakaopoopo mai ki te ‵tou fia‵fia. (Failauga 9:7; 10:19) Ao, e manako a Ieova ke fia‵fia tatou kae ke fakama‵lie aka foki ‵tou loto mo “te fiafia.”—Galuega 14:16, 17.

² E se ‵tau o mafau‵fau tatou me se mea sē ‵lei a te “kilo . . . ki manu eva” mo “talotalo o te vao” io me fai ne tatou a nisi fakafiafiaga kolā e fakamalosi kae fakafiafia ei ‵tou olaga. (Mataio 6:26, 28; Salamo 8:3, 4) A te olaga fiafia se “meaalofa a te Atua.” (Failauga 3:12, 13) A te kilo atu ki taimi fakafia‵fia e pelā me se vaega o te meaalofa tenā ka fai ei ke ‵sala atu tatou ki fakafiafiaga kolā e fiafia ki ei te Atua.a

Fakafiafiaga Kese‵kese mo Olotou Tapula

3. Kaia e ‵lei ei ke filifili aka a vaegā fakafiafiaga kese‵kese?

³ A latou kolā e paleni ‵lei olotou kilokiloga e uiga ki fakafiafiaga e ‵lei ke fai olotou filifiliga kae ke iloa foki ne latou olotou tapula. Kaia e fai ei penā? Ko te mea ke maua te tali ki ei, ke fakatusa ne tatou a fakafiafiaga ki meakai. E kese‵kese eiloa a vaegā mea‵kai i koga kese‵kese o te lalolagi. Tela la, a mea‵kai kolā e ‵gali ki nisi tino e mafai o se ‵gali ki nisi tino i nisi fenua. I se tulaga tai ‵pau, a mea kolā e mafai o ‵kilo atu ki ei a Kelisiano i nisi koga o te lalolagi e pelā me e ‵gali e mafai o se ‵gali ki nisi Kelisiano i nisi koga. Ke oko foki loa ki Kelisiano kolā e ‵nofo i te koga e tasi, e mafai ne se tino o fiafia (o faitau sāle tena tusi), kae kāti e se fiafia ki ei te suā tino; a ko te suā tino e (mafai o fiafia ki te tele i pasika o matamata i nisi koga), kae e mafai o fakafi‵ta ki te suā tino a te mea tenā. Kae e lavea atu ne tatou me kafai e filifili ne tino a mea‵kai kese‵kese e fia ‵kai latou ki ei, e mafai foki o filifili ne latou a vaegā fakafiafiaga kese‵kese.—Loma 14:2-4.

4. Kaia e ‵tau ei o fai ne tatou ne tapula e uiga ki vaegā fakafiafiaga kolā e filifili ne tatou? Fakamatala mai.

⁴ E tiga eiloa e maua ne tatou a te saolotoga ke fai a filifiliga e uiga ki fakafiafiaga, e se ‵tau o faka‵se ne tatou a ‵tou saolotoga. Ke fai se fakatusa, mafaufau ki te fakaakoakoga e uiga ki mea‵kai. E tiga eiloa e mafai ne tatou o ‵kai ki mea‵kai kese‵kese, e se mafai ne tatou o ‵kai ki meakai kolā ko ma‵sei. A te kai ki vaegā meakai penā e mafai o fakamasei ei ‵tou ola ‵lei. I se auala tai ‵pau, faitalia te uke o vaegā fakafiafiaga e mafai o ‵tala mai ki a tatou, e se ‵tau eiloa o kausaki atu tatou ki fakafiafiaga kolā e fakasaua, matagā io me ma‵sei. A te aofia i vaegā fakafiafiaga penā e fai ei ke ‵teke atu tatou ki fakatakitakiga i te Tusi Tapu kae e mafai foki o fakamasei mai ki ‵tou ola i te feitu faka-te-foitino mo te feitu faka-te-agaga. Ke fakamautinoa aka me e fakatapula ne tatou a te filifiliga o fakafiafiaga, e ‵tau o fakaiku aka ne tatou i te taimi muamua me e mata e aoga ki a tatou a nisi fakafiafiaga kolā e fia‵fia tatou ki ei io me ikai. (Efeso 5:10) E mafai pefea o fai tatou penā?

5. E mafai pefea o fakaiku aka ne tatou me e fetaui ‵lei a ‵tou fakafiafiaga mo tulaga o te Atua?

⁵ Ke fai a fakafiafiaga ke aoga ki a tatou kae ke fakafiafia atu foki ki a Ieova, e ‵tau mo tatou o fakafetaui aka ki te Muna a te Atua. (Salamo 86:11) Ke fakaiku aka me e tenā eiloa te vaegā fakafiafiaga e manako koe ki ei, kāti e mafai ne tatou o fakaaoga se fakasologa faigofie. E aofia i te fakasologa tenei a fesili e tolu kolā e mafai o fakatoe‵toe aka ki pati konei: se a, ko te taimi fea, mo te ko oi. Ke na sau‵tala nei tatou ki mea taki tasi konei.

Se a te Mea e Aofia i ei?

6. Ne a vaegā fakafiafiaga e ‵tau o ‵teke atu tatou ki ei kae kaia?

⁶ A koituai o aofia koe i se vaegā fakafiafiaga, e ‵tau o fesili ifo ne koe a te fesili tenei: ‘Se a te uiga tonu o te fakafiafiaga telā e gali ki a au?’ A koi ‵sala koe ki te tali, se mea aoga ke masaua ne koe me e lua a vaegā fakafiafiaga. A te mea muamua ko fakafiafiaga kolā e se ‵tau lele eiloa o ‵kau atu tatou ki ei; a ko te lua e mafai o fai ne tatou se filifiliga ki ei. Se a la te mea muamua? I te lalolagi masei tenei, e uke ‵ki a vaegā fakafiafiaga kolā e ‵teke katoatoa atu ki fakatakitakiga i te Tusi Tapu io me ofa i ei a tulafono a te Atua. (1 Ioane 5:19) E fai eiloa ne Kelisiano se fakaikuga mautinoa ke se aofia i vaegā fakafiafiaga penā. E aofia i te mea tenei a fakafiafiaga kolā e fakaasi mai i ei a faifaiga tatino, mea faka-temoni, amioga faka-sotoma, te onoono ki ata ma‵sei, amioga fakasaua io me ko amioga ma‵sei. (1 Kolinito 6:9, 10; faitau te Fakaasiga 21:8.) Faitalia me tefea te koga e ‵nofo ei tatou, e fakamaoni atu eiloa ne tatou ki a Ieova me i a tatou e “kaitaua [io me takalia‵lia] ki mea ma‵sei” mai te sē fakapili‵pili atu ki vaegā fakafiafiaga penā.—Loma 12:9; 1 Ioane 1:5, 6.

7, 8. E mafai pefea o fuafua aka ne tatou a te ‵lei io me ko te masei o se fakafiafiaga? Fakamatala mai.

⁷ A te lua o vaega o fakafiafiaga e sē aofia i ei a faifaiga kolā e takalialia io me ‵teke tonu atu ki te Muna a te Atua. I vaegā mea penā, a koituai o filifili ne tatou a fakafiafiaga, e ‵tau o fakatusatusa faka‵lei aka ne tatou a te mea tenā mo te kilokiloga a Ieova e uiga ki te mea telā e aoga, telā ne fakaasi mai i fakatakitakiga a te Tusi Tapu. (Faataoto 4:10, 11) Kae e ‵tau o fai ne tatou se filifiliga totino telā e maua i ei se loto lagona ‵lei. (Kalatia 6:5; 1 Timoteo 1:19) E mafai pefea o fai tatou penā? Mafaufau ki te mea tenei: A koituai o ‵kai tatou ki se meakai fou, e fia iloa muamua ne tatou me ne a mea ne fai ki ei. E ‵pau foki mo te filifiliga o se fakafiafiaga, a koituai o filifili ne tatou se fakafiafiaga, e ‵tau o iloilo faka‵lei ne tatou me ne a mea e aofia i ei.—Efeso 5:17.

⁸ Kāti e fiafia koe ki tafaoga, e tokouke foki a tino e fia‵fia ki ei. E mafai o gali kae fakafiafia atu ki a koe a te tafaoga. Kae e a la moi ne fiafia koe ki ne tafaoga kolā e aofia i ei a fakatau‵faiga kolā e mafai o pakia malosi koe i ei, ko fakafiafiaga ma‵sei, te loto fenua io me ko nisi mea aka penā kolā e “aofia” i ei? Kafai ko oti ne sukesuke ne koe a mea e aofia i ei, e mafai o fakaiku aka ne koe me e faigata ke fakafetaui aka ne koe a ou mafaufauga mo mafaufauga o Ieova fakatasi mo te tala ‵lei o te filemu mo te alofa telā e talai sāle ne tatou ki nisi tino. (Isaia 61:1; Kalatia 5:19-21) I te suā feitu, kafai e isi se fakafiafiaga telā e “aofia” i ei a faifaiga kolā e ‵lei i te kilokiloga a Ieova, ko iloa ei ne koe me e aoga kae fakamalosi loto a vaegā fakafiafiaga penā.—Kalatia 5:22, 23; faitau te Filipi 4:8.

Ko te Taimi Fea e Mafai ei o Aofia au i Fakafiafiaga?

9. Se a te mea e fakaasi mai i ‵tou tali ki te fesili, ‘Ko te taimi fea e mafai ei o aofia au i fakafiafiaga?’

⁹ Tenei te fesili i te lua telā e ‵tau o fesili ifo ne koe ki a koe eiloa, Ko te Taimi Fea?—ko tena uiga, ‘Ko te taimi fea e mafai ei o aofia au i fakafiafiaga? E mata, e pefea te uke o taimi e fakamāumāu ne au ki ei?’ A te ‵tou tali ki te fesili se a? e fakaasi mai i ei a mea e uke e fia‵fia ki ei ‵tou loto mo mea kolā e se fia‵fia tatou ki ei. A ko te tali ki te fesili ko te taimi fea? e fakaasi mai i ei a mea kolā e fakamuamua ne tatou—ko mea tāua mo mea kolā e se tāua. Kae e mafai pefea o fakaiku aka ne tatou me e aoga a fakafiafiaga i ‵tou olaga io me ikai?

10, 11. E fesoasoani mai pefea ki a tatou a pati a Iesu kolā ne tusi i te Mataio 6:33 i te filifiliga o taimi ke fakamāumāu ki fakafiafiaga?

¹⁰ Ne fai atu a Iesu Keliso ki ana soko: “E ‵tau mo koe o alofa ki te Aliki tou Atua mo tou loto kātoa, mo tou agaga kātoa, mo tou mafaufau kātoa, mo tou malosi kātoa.” (Maleko 12:30) Tela la, e ‵tau o fakamuamua ne tatou a te ‵tou a‵lofa ki a Ieova. I te faiga tenā e tau‵tali ei tatou ki te fakatonuga a Iesu, penei: “Ke mua koutou o ‵sala tena Malo mo tena amiotonu; kae ka fakaopoopogina atu a mea katoa konā ki a koutou.” (Mataio 6:33) E mafai pefea o fesoasoani mai ki a tatou a te tusi siki tenā ke fuafua aka te uke mo te aoga o taimi e fakamāumāu ki fakafiafiaga?

¹¹ Ke mafaufau ki te mea tenei: Ne fakamalosi mai a Iesu ki a tatou ‘ke mua o ‵sala tena Malo.’ E seki fai mai a ia i konei ke ‘‵sala fua tena Malo.’ E manino ‵lei, me ne iloa ne Iesu me e ‵tau foki o ‵sala ne tatou a mea e uke atu i tafa o te Malo. E manakogina ne tatou se fale mo ‵nofo, mea‵kai, gatu, akoakoga, galuega ‵togi, fakafiafiaga mo nisi mea aka. Kae e tiga eiloa e uke a mea e ‵tau o ‵sala ne tatou, kae e tasi fua te mea e ‵tau o fakamuamua ne tatou—ko manakoga o te Malo. (1 Kolinito 7:29-31) A te munatonu tāua tenā e fai ne ia tatou ke kausaki atu ki mea kolā e fakatulaga lua ne tatou e pelā mo fakafiafiaga, ko te mea ke mafai ne tatou o fai a te mea telā e ‵tau o fakamuamua ne tatou—ko te tausi atu ki manakoga o te Malo. Kafai e fai ne tatou a te mea tenā, ka aoga ‵ki eiloa ki a tatou a fakafiafiaga kolā e fakatapulagina.

12. E mafai pefea o fakagalue aka a te fakatakitakiga i te Luka 14:28 ki fakafiafiaga?

¹² Tela la, kafai ko oko mai ki te taimi e fakamāumāu ki fakafiafiaga, e ‵tau o ‵nofo muamua tatou o fuafua aka faka‵lei a te uke o taimi e fakamāumāu ki ei. (Luka 14:28) E ‵tau o fakaiku aka ne tatou a te aofaki o ‵tou taimi e fakamāumāu ki fakafiafiaga. E se gata i ei, e ‵tau o filifili aka ne tatou a te tāua o ‵tou taimi. Kafai a te kausaki atu ki se vaega o fakafiafiaga ka fai ei ke tiakina ne tatou a vaegā mea tāua e pelā mo sukesukega totino ki te Tusi Tapu, tapuakiga a te kāiga, te ‵kau atu ki fakatasiga, io me ko te talaiga o te Malo, ka se aoga eiloa te mea tenā. (Maleko 8:36) Kae kafai e isi se fakafiafiaga telā e fakamalosi ei tatou ke tumau i te kausaki atu ki manakoga o te Malo, ka iloa ei ne tatou me e aoga eiloa a te taimi e fakamāumāu ne tatou ki te vaegā fakafiafiaga tenā.

Ko oi Oku Taugasoa?

13. Kaia e ‵tau ei o mafaufau faka‵lei me ko oi e ‵kau fakatasi mo tatou i ‵tou fakafiafiaga?

¹³ A te tolu o fesili ke fesili ifo ki a koe eiloa, Ko oi?—ko tena uiga, ‘Ko oi a tino e manako au ke ‵kau fakatasi mo au i fakafiafiaga?’ E tāua ‵ki ke mafau‵fau ki te vaega tenei o fakafiafiaga. Kaia? Me i te gali io me ko te masei o fakafiafiaga e faka‵na loa ki vaegā taugasoa e filifili ne koe. E pelā eiloa mo te fakafiafia o te kai ki se meakai gali fakatasi mo ou taugasoa ‵lei, a te aofia i fakafiafiaga e mafai o fakafiafia atu māfai e ‵kau fakatasi koe mo taugasoa ‵lei. Tela la, e maina ‵lei me e tokouke i a tatou, maise loa talavou e fia‵fia ke ‵kau fakatasi i fakafiafiaga mo nisi tino. Kae ke fakamautinoa aka me ka aoga eiloa se fakafiafiaga, se mea poto ke fakaiku muamua ne koe me ko oi a taugasoa ‵lei kae ko oi foki a taugasoa ma‵sei.—2 Nofoaiga Tupu 19:2; faitau te Faataoto 13:20; Iakopo 4:4.

14, 15. (a) Se a te fakaakoakoga ne fai ne Iesu i te filifiliga o taugasoa ‵tonu? (e) Ne a fesili e ‵tau o ‵sili ifo ne tatou ki a tatou eiloa e uiga ki ‵tou taugasoa?

¹⁴ A te tautali atu ki te fakaakoakoga a Iesu i te filifiliga o taugasoa se fesoasoani e aoga ‵ki eiloa. Talu mai te faitega o mea, ne alofa eiloa a Iesu ki tino katoa. (Faataoto 8:31) I tena nofoga i te lalolagi, ne fakaasi atu ne ia a te alofa atafai mō tino katoa. (Mataio 15:29-37) Ne iloa ne Iesu me e isi se ‵kese i te va o te fai taugasoa mo te fai e pelā me se taugasoa pili. E tiga eiloa ne fai taugasoa a Iesu ki tino katoa, ne seki fai a ia e pelā me se taugasoa pili ki tino katoa. Mai te faipati atu ki ana apositolo fakamaoni e toko 11, ne fai atu a Iesu, penei: “Ko oku taugasoa koutou, manafai e fai ne koutou aku poloakiga.” (Ioane 15:14; ke onoono foki ki te Ioane 13:27, 30.) A tino fua kolā ne talia ne Iesu ke fai e pelā me ne ana taugasoa ko latou kolā ne tau‵tali i a ia kae tavini atu ki a Ieova.

¹⁵ Tela la, kafai e mafaufau koe me e ‵tau mo koe o filifili se tino e pelā me se taugasoa pili io me ikai, se mea poto ke mafaufau ki te fakamatalaga a Iesu. Fesili ifo ki a koe eiloa, penei: “E mata, e fakaasi mai ne te tino tenei i ana pati mo ana faiga me e fakalogo a ia ki fakatonuga a Ieova mo Iesu? E mata, e maua ne ia a uiga kolā e fakavae ki te Tusi Tapu e penei mo au? E mata, ka fakamalosi mai a te fai taugasoa mo ia ke fakamuamua ne au a te Malo i toku olaga kae fai pelā me se tavini fakamaoni a Ieova? Kafai e mautinoa i a koe a tali ki fesili konā, ko maua eiloa ne koe se taugasoa ‵lei telā ka fia‵fia fakatasi mo koe.—Faitau te Salamo 119:63; 2 Kolinito 6:14; 2 Timoteo 2:22.

‵Tou Fakafiafiaga —E Mata e ‵Lei Eiloa?

16. Ne a mea e ‵tau o fakaiku aka ne tatou e uiga ki ‵tou fakafiafiaga?

¹⁶ Ne onoono malie tatou ki vaega e tolu o fakafiafiaga—te ‵lei, te uke o taimi mo ‵tou taugasoa. Ke maua a mea aoga, e ‵tau o fetaui ‵lei a ‵tou fakafiafiaga mo tulaga fakavae o te Tusi Tapu mō vaega takitasi konei. Tela la, a koituai o aofia i se vaega o fakafiafiaga, e ‵tau o fai muamua ne tatou se tofotofoga ki ei. Kafai e ‵lei, e ma‵nako tatou ke iloa ne tatou a mea konei: ‘Ne a mea e aofia i ei? E mata, e aoga io me e se na lo ko tāua malosi?’ (Faataoto 4:20-27) E uiga ki te uke o taimi, e ma‵nako tatou ke iloa ne tatou te mea tenei: ‘E pefea te uke o taimi ka fakamāumāu ne au ki ei? E mata, e ‵lei io me ikai?’ (1 Timoteo 4:8) Kae e uiga ki taugasoa, e ‵tau o fakaiku aka ne tatou, penei: ‘Ko oi te tino ka fai taugasoa au ki ei i te fakafiafiaga tenei? E mata, a vaegā taugasoa penā e ‵lei io me e ma‵sei?’—Failauga 9:18; 1 Kolinito 15:33.

17, 18. (a) E mafai pefea ne tatou o tofotofo aka me e fetaui ‵lei a ‵tou fakafiafiaga mo tulaga o te Tusi Tapu io me ikai? (e) Ne a au fakaikuga totino e fai māfai ko ‵tau o filifili ne koe a fakafiafiaga?

¹⁷ Kafai e se fetaui ‵lei se vaega e tasi mai i vaega e tolu konei o fakafiafiaga mo tulaga fakavae o te Tusi Tapu, e se ‵lei eiloa te mea tenā. I te suā feitu, kafai e fakamautinoa aka ne tatou me i ‵tou fakafiafiaga e fetaui ‵lei mo tulaga fakavae o te Tusi Tapu i vaega e tolu konei, ka faka‵malu atu eiloa a ‵tou fakafiafiaga ki a Ieova kae aoga foki ki a tatou.—Salamo 119:33-35.

¹⁸ Tela la, kafai ko faipati e uiga ki fakafiafiaga, ke na kausaki malosi tatou o fai te mea tonu i te taimi tonu fakatasi mo tino ‵tonu. Ao, ke na fai e pelā me se manakoga o tatou taki tokotasi ke tau‵tali atu ki te fakatakitakiga i te Tusi Tapu, penei: “Me ne a otou mea e fai, me ‵kai io me inu, e fai katoa ne koutou mō te vikiga o te Atua.”—1 Kolinito 10:31.

[Fakamatalaga fakaopoopo]

E Mafai o Fakamatala Mai ne Koe?

E uiga ki fakafiafiaga, e mafai pefea ne koe o fakagalue aka a fakatakitakiga e maua i te . . .

• Filipi 4:8?

• Mataio 6:33?

• Faataoto 13:20?

[Ata i te itulau e 11]

✔Se a

[Ata i te itulau e 12]

✔Ko te taimi fea

[Ata i te itulau e 14]

✔Ko oi

[Ata i te itulau e 12]

E mafai pefea o tau‵tali atu tatou ki te fakaakoakoga a Iesu i te filifiliga o ‵tou taugasoa mo ‵tou fakafiafiaga?