Sui ‵Fou o te Potukau Pule

I TE taeao o te Aso Tolu, i te po 24 o Aokuso, 2005, ne lagona atu ei se faka‵pulaga fakafiafia ne kāiga Peteli i te Iunaite Sitete mo Kanata. E kamata mai i a Setema 1, 2005, e tokolua a sui ‵fou​​—⁠ko Geoffery W. Jackson mo Anthony Morris III​​—⁠ko aofia i te Potukau Pule o Molimau a Ieova.

A te taina ko Geoff (Tiefu) ne kamata o paenia i a Fepuali 1971 i Tasmania, se tamā fenua o Ausetalia. I a Iuni 1974, ne avaga a ia ki a Jeanette (Tieni). Mai tua malie ifo i ei, ne ‵tofi aka ei laua ke tavini atu pelā me ne paenia fakapito. Mai i te 1979 ki te 2003, ne tavini atu laua e pelā me ne misionale i Tuvalu, Samoa, mo Fiti​​—⁠ko fenua i te Pasefika ki Saute. I te taimi ne ‵nofo atu ei laua i fenua o te Pasefika, ne fesoasoani malosi atu te Taina ko Tiefu mo te Tuagane ko Tieni ki te ‵fuliga o tusi faka-te-Tusi Tapu. I te kamataga o te 1992, ne tavini atu a te Taina ko Tiefu i te Komiti i te Ofisa Lagolago i Samoa, kae mai te 1996, ne tavini atu a ia i te Komiti i te Ofisa Lagolago i Fiti. I a Apelila i te 2003, ne fai ei laua mo Tieni mo vaega o te kāiga Peteli i te Iunaite Sitete kae ne kamata o ga‵lue i te Matagaluega ‵Fulitusi. E seki leva, kae ne fai a te Taina ko Tiefu mo fai se fesoasoani ki te Komiti mō Akoakoga a te Potukau Pule.

Ne kamata te taina ko Morris o paenia i te 1971 i te Iunaite Sitete. I te tausaga foki loa tenā i a Tesema, ne avaga ei a ia ki a Susana, kae ne tumau eiloa laua i te paenia mō se tolu tupu tausaga ke oko eiloa ki te taimi ne fanau ei te lā tama tagata matua, ko Jesse. Mai tua malie ifo ne toe fanau mai te suā tama tagata, ko Paul. Ne toe kamata te Taina ko Morris i te taviniga tumau i te 1979 e pelā me se paenia tumau. Ne toe kau atu tena avaga ki a ia i te taimi ko olo atu ei a lā tama tāgata ki te akoga. Ne tavini atu te kāiga tenei i koga kolā e manakogina malosi i ei se fesoasoani i Rhode Island mo North Carolina, i te Iunaite Sitete. I North Carolina, ne tavini atu ei te Taina ko Morris e pelā me se toeaina asiasi fesoasoani, kae ne ‵kau atu ana tama tāgata ki te galuega fakapaenia. Ne ‵kamigina a Jesse mo Paul ke ga‵lue i te ofisa lagolago i te Iunaite Sitete i te taimi ko 19 ei lā tausaga. I te taimi tenā, ne kamata ei te Taina ko Morris i te taviniga e pelā me se toeaina asiasi. Kae i te 2002, ne ‵kamigina ei laua mo Susana ki te Peteli, telā ne kamata mai ei te lā tofiga fou i a Aokuso 1. Ne galue te Taina ko Morris i te Matagaluega mō te Galuega Talai i Patterson kae fai fakamuli mo fai se fesoasoani ki te Komiti mō te Galuega Talai a te Potukau Pule.

I tafa o sui ‵fou e tokolua konei, e aofia i te Potukau Pule a C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; mo D. Sydlik. A sui katoa o te Potukau Pule ne Kelisiano fakaekegina.