E Pefea te ‵Lei o Aulua Fesokotakiga?
“SE TUSI Alofa Fakafamau Mai se Tino ko 60 Ana Tausaga.” Tenā loa te matua o te fakataufaiga a se pagike i Tiapani telā ne fai i nāi tausaga ko ‵teka. E fakamalosi atu i ei ki tino Tiapani kolā ko taki 50 mo te 60 tausaga ke fakaasi mai olotou “lagonaga ‵tonu” ki olotou avaga. Ne tusi atu se tino fakatau‵fai penei ki tena avaga fāfine: “Kāti ka kata koe, kae ka salamo au māfai e se fai atu ne au a pati konei, konei la oku lagonaga: Fakafetai lasi me ne avaga ne koe au.”
I tuu mo aganuu a nisi atufenua, e aofia i ei a nisi fenua i Asia ki te Saegālā, ne seki fakamalosi aka i ei a te fakaasiatuga o lagonaga ‵tonu o tino. Kae, e silia atu i te toko 15,000 a tino ne ‵kau ki te fakataufaiga e uiga ki te tusi fakafamau tenā. Ne lauiloa malosi te mea tenei telā ne toe fai ei te suā fakataufaiga, kae ne tusi foki a tusi kolā ne ‵lomi kae fakavae ki tusi konā. E fakaasi mai i konei, me e tokouke a tino e ma‵nako o fakaasi mai olotou lagonaga ‵loto e uiga ki te pele o olotou avaga i a latou. Kae e se ma‵nako a nisi tino ke fai latou penā. Kaia? Kāti e fai penā ona ko te mea e manakogina i ei a taumafaiga mo te apo ke fakaasi atu ki nisi tino—e pelā mo olotou avaga—ke iloa ne latou olotou lagonaga ‵tonu.
E fai mai a Hitoshi Kato, telā ne tusi ne ia se tusi e uiga ki tino litaea, me i avaga a tino ma‵tua i Tiapani kolā e ‵tala sāle e masani o fakamāfua ne avaga fāfine ona ko te ita fakamoemoe telā ko leva ne fakaputuputu aka ne latou i te fia o tausaga. “Kae, tenā foki loa te mea e tupu māfai e se fesokotaki faka‵lei se tauavaga i taimi e fe‵paki ei laua mo fakalavelave,” ko ana pati.
E poi te tagata i te taimi e litaea ei a ia me ko manako tena avaga ke ‵tala te lā avaga. Kāti ne seki sau‵tala aka eiloa te tauavaga e uiga ki lā lagonaga, te suā tino ki te suā tino, i te fia o tausaga. Kāti ne taumafai te tauavaga o fakatau fakaasi atu a lā lagonaga kae ne seki mafai o fai penā i se auala ‵lei. I lō te ati aka o se fesokotakiga ‵pili i te lā vā, ne aofia faeloa a laua i kinauga.
E mafai pefea o fakafesagai atu i se auala filemu se tauavaga ki lā fakalavelave kae ke fakatau fakaasi atu a lā lagonaga i se auala ‵lei? Kāti ka manako malosi koe ke iloa ne koe me e se maua a toe auala aogā i se tusi telā ne tusi ne se tino poto i mea tau fakaipoipoga, kae e maua atu i se tusi telā ko leva ‵ki ne tusi kae ne fia‵fia malosi foki ki ei a tino i te fia o senitenali ko ‵teka—ko te Tusi Tapu.