Se a te Malo o te Atua?

KO TAFAGA la te matagā o te fakalavelave ne tupu ki tino i te kamataga! Ne ‵teke atu se agelu ki te pulega a te Tino telā ne faite ne ia a ia. Ne fakaosooso ne te tino uiga ‵teke tenei te fafine muamua, ko Eva, ke kai ki te fuaga telā ne fakatapu ma ‵kai ki ei. Ne fai atu te agelu e uiga ki tou fafine mo tena avaga, ko Atamu: “A koulua e se ‵mate. A te Atua ne fai atu penā, me e iloa ne ia me kafai e ‵kai koulua ki fuaga o te lakau tenā, ko koulua ka ‵pau mo te Atua, ka iloa foki ei ne koulua te mea ‵lei mo te mea masei.” (Kenese 2:​16, 17; 3:​1-5) Ne fai fakamuli te agelu ‵teke tenei mo fai te Tiapolo io me ko Satani.​​—⁠Fakaasiga 12:⁠9.

E mata, ne fakalogo a Eva ki pati a Satani? E fai mai te Tusi Tapu: “Ne kilo atu te fafine ki te gali o te lakau, mo ona fuaga ko mata ‵lei fāka i te kai. Ne mafaufau aka a ia me kaati se mea sili i te ‵lei ke maua te poto i a ia. Telā ne puke aka ne ia te fuagā lakau, kai ei ne ia. Ne tuku atu ne ia ne mū mea ki tena avaga, telā ne kai foki ki ei.” (Kenese 3:⁠6) E tonu, ne ‵kau atu a te tauavaga muamua, ko Atamu mo Eva ki a Satani i tena ‵tekeatuga. Ne iku atu i ei ki te galo atu i a laua mo lā tama‵liki te Palataiso. A tama‵liki ‵lei katoatoa kolā ne ‵tau o fa‵nau mai mo te fakamoemoega ke ola ki te se-gata-mai, ne maua ne latou te agasala mo te mate.​​—⁠Loma 5:​12.

Ne saga atu pefea ki ei a Ieova te Atua, te Pule Sili i te lagi mo te lalolagi? Ne fakatoka ne ia se auala mō te fakamagaloga o agasala. (Loma 5:⁠8) Ne fakatu foki ne Ieova te Atua se malo telā ka faka‵lei aka ei te fakalavelave. E taku eiloa te fakatokaga tenei ki “te Malo o te Atua.” (Luka 21:31) E pelā me se vaega o te pulega a te Atua i te lagi mo te lalolagi, e isi eiloa se fuafuaga fakapito o te Malo tenei.

Se a te fuafuaga a te Malo o te Atua? Ne a nisi vaega o te Malo tenā, kae e pefea tena tulaga māfai e fakatusa ki pulega a tino? Ne kamata anafea o pule mai te Malo? Ka fakamatala mai eiloa a tali ki fesili konei i te suā mataupu.