E Fakatāua ne Ieova Tou Fakalogo

“Ke poto koe, e taku tama, kae ke fai ne koe toku loto ke fiafia.”​—⁠FAATAOTO 27:​11, NW.

1. Se a te uiga telā ko salalau i te lalolagi i aso nei?

KO ‵FONU te lalolagi nei i te uiga ko te fia tu tokotasi mo te sē fakalogo. Ne fakamatala mai ne te apositolo ko Paulo a te pogai o te mea tenā i tena tusi ki Kelisiano i Efeso: “I aso foki konā, koi tau‵tali eiloa koutou i auala ma‵sei o te lalolagi; ne faka‵logo koutou ki te pule o te ‵mana fakatiapolo i te lagi, ko te agaga telā e pule ne ia a tino kolā e se faka‵logo ki te Atua.” (Efeso 2:​1, 2) E tonu, a Satani te Tiapolo, “te pule o te ‵mana fakatiapolo i te lagi” io me ko te ea, ne faka‵pisi atu ne ia ki te lalolagi kātoa a te uiga sē fakalogo. Ne fai ne ia penā i te senitenali muamua, kae koi fai faeloa te mea tenā i se auala e lasi fakafia atu talu mai tena ‵peiifoga mai te lagi i te taimi o te Taua Muamua.​—⁠Fakaasiga 12:⁠9.

2, 3. Ne a pogai e ‵tau ei o faka‵logo tatou ki a Ieova?

² Kae e pelā me ne Kelisiano, e iloa ne tatou me ‵tau o faka‵logo tatou mo ‵tou loto kātoa ki a Ieova te Atua, ona ko ia ko te ‵tou Māfuaga, te Pogai o ‵tou ola, te Pule alofa, mo te Tino e faka‵sao ne ia tatou. (Salamo 148:​5, 6; Galuega 4:24; Kolose 1:13; Fakaasiga 4:11) Ne iloa ne tino Isalaelu i aso o Mose me i a Ieova ko te Māfuaga o te Ola mo te Tino e faka‵sao ne ia latou. Tela la, ne fai atu ei a Mose ki a latou: “Masaua o fai a mea katoa ne fakatonu atu ne te Aliki te otou Atua ke fai ne koutou.” (Teutelonome 5:32) E tonu, e ‵tau eiloa o faka‵logo latou ki a Ieova. Kae ne seki faka‵logo fakavave a latou ki te lotou Pule.

³ E pefea te tāua o te ‵tou faka‵logo ki te Māfuaga o te lagi mo te lalolagi? I se taimi e tasi, ne fai ne te Atua ke faipati atu a te pelofeta ko Samuelu ki te tupu ko Saulo: “E sili atu te fakalogo . . . i lō te ofo atu o te mamoe tafasili i te ‵lei.” (1 Samuelu 15:​22, 23) Kaia e ‵tau ei o fai penā?

Te Auala ‘e Sili Atu ei te Fakalogo i lō Taulaga’

4. I te auala fea e mafai ei o tuku atu ne tatou se mea ki a Ieova?

⁴ E pelā me ko te Māfuaga, i a Ieova a mea faka-te-foitino katoa kolā e maua ne tatou. Ona ko te mea tenā, e mata, e isi se mea e mafai o tuku atu ne tatou ki a ia? Ao, e mafai o tuku atu ne tatou se mea tafasili i te tāua. Se a la te mea tenā? E mafai o maua te tali mai pati polopoloki konei: “Ke poto koe, e taku tama, kae ke fai ne koe toku loto ke fiafia, ko te mea ke mafai o tuku atu ne au se tali ki te tino telā e fakaitaita mai ki a au.” (Faataoto 27:​11, NW) A ‵tou faka‵logo ko te mea telā e mafai o tuku atu ne tatou ki te Atua. E tiga eiloa te kese‵kese o ‵tou fakanofonofoga mo olaga ne ‵tupu aka ei tatou, ona ko ‵tou faka‵logo, e tuku atu ei ne tatou taki tokotasi se tali ki ‵losiga matagā a Satani te Tiapolo me ka se tumau a tino i te fakamaoni ki te Atua māfai ko fe‵paki mo tofotofoga. Ma‵faga o tauliaga gali!

5. E pokotia pefea a te Māfuaga ona ko te sē fakalogo? Fakamatala mai.

⁵ E amanaia a te Atua ki fakaikuga e fai ne tatou. Kafai e se faka‵logo tatou, ka pokotia a ia i ei. E pefea la? E logo‵mae a ia ke lavea atu se tino ko fanatu i se auala sē tonu. (Salamo 78:​40, 41) Kafai ko sē fakamaoni se tino sukā ki ana meakai kolā ne fakatonu mai ne te tokita, kae tumau i te kai ki meakai kolā e se ‵lei ki a ia, e mata, ka pefea a lagonaga o tena tokita? E mautinoa i a tatou me e logo‵mae eiloa a Ieova māfai e se faka‵logo a tino ki a ia, me e iloa ne ia a ikuga o tino kolā e manatu ma‵ma ki ana fakatonuga mō te ola.

6. Se a te mea ka fesoasoani mai ke faka‵logo tatou ki te Atua?

⁶ Se a te mea e fesoasoani mai ki a tatou taki tokotasi ke faka‵logo? Se mea ‵lei ke fakamolemole atu tatou ki te Atua ke tuku mai ne ia te “loto fakalogo,” e pelā mo te mea ne fai ne te tupu ko Solomona. Ne fakamolemole atu a ia ke maua ne ia se vaegā loto penā ko te mea ke “mafai o iloa ne ia te mea ‵lei mo te mea masei” ke mafai ei ne ia o fakamasino a tino Isalaelu. (1 Tupu 3:​9, NW) E ‵tau o maua ne tatou te “loto fakalogo” māfai e fia iloa ne tatou te mea ‵lei mo te mea masei i te lalolagi telā e ‵fonu i te uiga sē fakalogo. Ko oti ne tuku mai ne te Atua ki a tatou a tena Muna, tusi faka-te-Tusi Tapu, fakatasiga faka-Kelisiano, mo toeaina a‵lofa i te fakapotopotoga ko te mea ke mafai o maua ne tatou a te “loto fakalogo.” E mata, e fakaaogā faka‵lei ne tatou a fakatokaga a‵lofa konā?

7. Kaia e faka‵mafa mai ei ne Ieova te fakalogo i lō te faiga o taulaga?

⁷ E ‵tusa mo te mea tenei, ke masaua me ne fakaasi atu ne Ieova ki ana tino mua me e sili atu te fakalogo i lō te ofoatuga o manu e pelā me ne taulaga. (Faataoto 21:​3, 27; Hosea 6:6; Mataio 12:⁠7) Kaia ne fai ei penā, me ko Ieova foki eiloa ne fakatonu atu ki ana tino ke ofo atu a taulaga? Ia, kae e pefea a lagonaga o te tino telā e ofo atu ne ia a taulaga? E mata, e fai ne ia penā ke fakafiafia atu ei ki te Atua? Io, me fai fua ne ia ona ko te mea se faifaiga masani e ‵tau o fai? Kafai e manako tonu te tino tapuaki ke fakafiafia ne ia te Atua, ka fakalogo eiloa a ia ki fakatonuga katoa a te Atua. E se manako a te Atua ki taulaga manu, kae ko ‵tou faka‵logo se mea tāua e tasi telā e mafai o tuku atu ne tatou ki a ia.

Se Fakaakoakoga e ‵Tau o Fakaeteete i ei

8. Kaia ne seki talia ei ne te Atua a Saulo ke fai mo fai te tupu?

⁸ A te tala i te Tusi Tapu e uiga ki te tupu ko Saulo e faka‵mafa mai i ei te tāua o te fakalogo. Ne kamata a Saulo e pelā me se pule loto maulalo kae agamalū, kae ‘manatu fatauvā ki a ia eiloa.’ Fakamuli ifo, ne kamata o pule atu ki ana fakaikuga a te fakamatamata mo manatu sē ‵tonu. (1 Samuelu 10:​21, 22; 15:17) I se taimi e tasi, ne ‵tau o saga atu a Saulo ki te kau Filisitia i se taua. Ne fai atu a Samuelu ki te tupu ke faka‵tali ke ofo atu ne ia a taulaga ki a Ieova kae ke tuku atu foki a nisi fakatonuga. Kae, ne seki oko atu a Samuelu i te taimi ne fakamoemoegina, kae ne kamata o olo valevale a tino. Ona ko te mea tenā, ‘ne ofo atu ei ne Saulo te taulaga ‵sunu.’ Ne fanoanoa eiloa a Ieova i te mea tenei. I te okoatuga a Samuelu, ne fakasakosako atu a te tupu, me ona ko te tuai o Samuelu, ‘ne faimālōgina ei a ia’ ke ofo atu te taulaga ‵sunu ke maua ei te taliaga a Ieova. Ne mafaufau te tupu ko Saulo me i te ofoatuga o te taulaga tenā e tāua atu i lō tena fakalogo ki te fakatonuga ke faka‵tali ki a Samuelu ke ofo atu ne ia te taulaga. Ne fai atu a Samuelu ki a ia: “E se ‵lei tau mea tenā ne fai. A koe ko sē fakalogo ki te fakatonuga a te Aliki tou Atua ne tuku atu ki a koe.” Ona ko te sē fakalogo ki a Ieova, ne fai ei ke tapale keatea te tulaga fakatupu mai i a Saulo.​—⁠1 Samuelu 10:8; 13:​5-13.

9. Ne fakaasi atu pefea ne Saulo te sē fakalogo ki te Atua?

⁹ E mata, ne tauloto ne te tupu se akoakoga tāua mai te mea tenei ne tupu? Ikai! Fakamuli ifo, ne fakatonu atu a Ieova ki a Saulo ke fakaseai ne ia te kau Amaleka, kolā ne taua muamua atu ki Isalaelu e aunoa mo se pogai ‵lei. Ke oko ki olotou manu ne seki ‵tau o faka‵sao ne Saulo. Ne fakalogo eiloa a ia mai te fakatakavalega o te “kau Amaleka, i te taua a latou mai Havila ke oko eiloa ki Sula.” I te taimi ne fakafetaui atu ei a Samuelu ki a ia, ne fiafia malosi te tupu ona ko te lotou manumalo kae fai atu: “A te Aliki ke fakamanuia atu ki a koe! Ko oti ne fai ne au te fakatonuga a te Aliki.” Kae, i lō te fakalogo ki tulafono manino kolā ne tuku atu ki a latou, ne seki tamate ne Saulo mo ana tino a te tupu ko Akako e pelā foki mo “mamoe tafasili i te ‵lei mo pulumakau . . . tamā mamoe tafasili i te ‵lei, pelā foki a nisi mea ‵lei.” Ne tuku mai ne te tupu ko Saulo se fakamasakoga mō tena sē fakalogo i ana pati: “Ne faka‵sao ne latou a mamoe mo pulumakau tafasili i te ‵lei, ke ofo mo fai taulaga ki te Aliki tou Atua.”​—⁠1 Samuelu 15:​1-15.

10. Se a te akoakoga ne seki tauloto ne Saulo?

¹⁰ Ona ko te mea tenā, ne fai atu a Samuelu ki a Saulo: “Se a te mea e manako ki ei te Aliki: ko te fakalogo io me ko taulaga? E sili atu te fakalogo ki a ia i lō te ofo atu o te mamoe tafasili i te ‵lei ki a ia.” (1 Samuelu 15:22) Ona ko te mea ko oti ne fakaiku aka ne Ieova ke tamate a manu konā, ko tena uiga ko se talia a manu konā ke ofo atu e pelā me ne taulaga.

Ke Fakalogo i Mea Katoa

11, 12. (a) Se a te kilokiloga a Ieova ki ‵tou taumafaiga ke fakafiafia atu ki a ia i ‵tou tapuakiga? (e) E mafai pefea o fakaloiloi ne se tino a ia eiloa mai te mafaufau me e fai ne ia te loto o te Atua kae ko te ‵tonuga loa a ia e se fakalogo?

¹¹ E pefea te lasi o te fiafia o Ieova ke lavea atu ana tavini fakamaoni e tu ‵mautakitaki faitalia a fakasauāga, e folafola atu te Malo faitalia te se fia ‵saga mai o tino, kae ‵kau atu ki fakatasiga Kelisiano faitalia te faigata o te olaga! A te ‵tou faka‵logo i vaegā mea tāua penei i te feitu faka-te-agaga e fakafiafia atu eiloa ki tena loto! E tāua ‵ki ki a Ieova a ‵tou taumafaiga ke tapuaki atu ki a ia ona ko ‵tou a‵lofa ki a ia. E mafai o se lavea ne tino a ‵tou galuega e uke, kae e lavea ne te Atua a ‵tou taulaga kolā e ofo atu mo te loto kātoa kae e masaua foki ne ia.​—⁠Mataio 6:⁠4.

¹² Ko te mea ke fakafiafia katoatoa atu ki te Atua, e ‵tau o faka‵logo katoatoa tatou i tulaga katoa o te olaga. E se ‵tau lele eiloa o fakaloiloi ne tatou a tatou mai te mafaufau me e mafai o saoloto tatou mai i fakatonuga a te Atua ona ko te mea e tapuaki atu tatou ki a ia i nisi tulaga o ‵tou olaga. E pelā me se fakaakoakoga, e mafai o fakaloiloi ne se tino a ia eiloa mai te mafaufau me e mafai o tautali atu a ia ki nisi faifaiga masani o te tapuakiga, ko saoloto ei a ia ke finalalolagi io me fai nisi amioga matagā. Ma‵faga o mea ‵se tenā!​​—⁠Kalatia 6:​7, 8.

13. E mafai o tofotofogina pefea a te ‵tou faka‵logo ki a Ieova mafai ko ‵nofo tatou i a tatou eiloa?

¹³ E ‵tusa mo te mea tenā, e mafai o fesili ifo tatou, ‘E mata, e fakalogo au ki a Ieova i aku mea e fai i aso takitasi, ke oko foki loa ki aku mea totino e fai?’ Ne fai mai Iesu: “A ia telā e fakamaoni i mea fo‵liki, e fakamaoni foki i mea ‵lasi. Ka ko ia telā e se fakamaoni i mea fo‵liki, e se fakamaoni foki i mea ‵lasi.” (Luka 16:10) E mata, e ‘ola tatou i te fakamaoni o ‵tou loto,’ ke oko foki eiloa ki loto i ‘‵tou fale,’ ko te koga telā e se lavea ei tatou ne tino? (Salamo 101:⁠2) E tonu, ke oko foki eiloa ki loto i ‵tou fale, e mafai o tofotofogina i ei ‵tou fakatuanaki. I fenua e uke kolā toeitiiti kae tofu a fale mo komupiuta, e faigofie fua ke onoono atu ki ata ma‵sei. I nāi tausaga ko ‵teka, e faigata o lavea atu a vaegā ata penā e aunoa mo te fanatu ki nisi koga kolā e fai i ei a vaegā fakafiafiaga ma‵sei penā. E mata, ka faka‵logo eiloa tatou ki pati konei a Iesu: “So se tino e onoono atu ki se fafine kae manako ki ei tena loto, ko mulilua a ia i te loto”? E tonu, e mata, ka se fia onoono atu eiloa tatou ki ata ma‵sei? (Mataio 5:​28; Iopu 31:​1, 9, 10; Salamo 119:37; Faataoto 6:​24, 25; Efeso 5:​3-5) Kae pefea la a polokalame fakasauā i TV? E mata, e ‵pau tatou mo te Atua telā ‘e se fiafia ki tino fakasauā’? (Salamo 11:⁠5) Kae pefea la te sōna fakaaogāga o meainu ma‵losi i a tatou eiloa? E taku fakamasei ne te Tusi Tapu a te konā, kae e fakamalosi mai foki ki Kelisiano ke mo a e inu malosi ki “te kava.”​—⁠Tito 2:3; Luka 21:​34, 35; 1 Timoteo 3:⁠3.

14. I auala fea e lavea atu ei te ‵tou fakalogo ki te Atua i ‵tou faifaiga ki mea tau sene?

¹⁴ A te suā auala e ‵tau o fakaeteete i ei ko faifaiga o mea tau sene. E pelā me se fakaakoakoga, e mata, e ma‵nako tatou ke mau‵mea fakavave i se auala faitogafiti? E mata, e fakaosoosogina tatou ke sē faka‵logo ki te tulafono i te ‵togiga o ‵tou lafoga? Io, me e mata, e faka‵logo eiloa tatou mo te fakamaoni ki te fakatonuga ke “‵togi atu ou lafoga ki tino kolā ko ‵tau o ‵togi ki ei”?​—⁠Loma 13:⁠7.

Te Fakalogo Telā e Māfua Mai i te Alofa

15. Kaia e fakalogo ei koe ki fakatonuga a Ieova?

¹⁵ A te fakalogo ki fakatakitakiga mai te Atua e maua i ei a fakamanuiaga. E pelā mo te sē ‵pusi, te ola i se olaga ‵ma, te āva ki te tulaga tāua o te toto, e fai ei ke se pokotia tatou i masaki kolā e māfua mai i ei. E se gata i ei, mai te ola e ‵tusa mo te munatonu i te Tusi Tapu i nisi vaega o te olaga, ka aogā eiloa ki a tatou i mea tau sene mo nisi feitu o te olaga. (Isaia 48:17) E mafai o ‵kilo atu tatou ki mea aogā ‵tonu konei e pelā me ne fakamanuiaga kolā e fakamaoni mai i ei te aogā o tulafono a te Atua. Kae, ko te pogai tāua e faka‵logo ei tatou ki a Ieova me e a‵lofa tatou ki a ia. E se tavini atu tatou ki te Atua ona ko te kaimanako. (Iopu 1:​9-11; 2:​4, 5) Ne tuku mai ne te Atua te saolotoga ke filifili aka me ko oi te tino e faka‵logo tatou ki ei. E filifili tatou ke faka‵logo ki a Ieova me e ma‵nako tatou ke fakafiafia atu ki a ia kae e fia ‵sala foki tatou ki te mea tonu.​—⁠Loma 6:​16, 17; 1 Ioane 5:⁠3.

16, 17. (a) Ne fakaasi atu pefea ne Iesu te fakalogo mo te loto kātoa ki te Atua ona ko tena alofa? (e) E mafai pefea o fakaakoako atu tatou ki a Iesu?

¹⁶ Ne tuku mai ne Iesu te toe fakaakoakoga ‵lei i te fakalogo ki a Ieova ona ko tena alofa ki a Ia. (Ioane 8:​28, 29) I tena nofoga i te lalolagi, ne “tauloto ne [Iesu] a te olaga fakalogo muna e auala i ona puapuagā.” (Epelu 5:​8, 9) E pefea la? Ne “loto malalo a [Iesu] kae ne sasale foki i te auala o te fakalogo muna, ke oko eiloa ki tona mate, telā ko tena mate i luga i te sataulo.” (Filipi 2:​7, 8) E ui eiloa ko leva ne fakalogo a Iesu i te lagi, ne toe tofotofogina tena fakalogo i te lalolagi. E mafai o mautinoa i a tatou me e fetaui ‵lei a Iesu ke fai pelā me se Faitaulaga Sili mō ana taina faka-te-agaga e pelā foki mo nisi tino tali‵tonu.​—⁠Epelu 4:15; 1 Ioane 2:​1, 2.

¹⁷ Kae pefea la tatou? E mafai o fakaakoako tatou ki a Iesu mai te fakamuamua ne tatou te ‵tou faka‵logo ki mea kolā e loto ki ei te Atua. (1 Petelu 2:21) E mafai o maua ne tatou te lotomalie māfai e fakamalosi mai te ‵tou alofa ki te Atua ke fai ne tatou a mea kolā e fakatonu mai ne Ieova, ke oko ki taimi faiga‵ta io me ko tofotofoga ke se fai ne tatou a mea konā. (Loma 7:​18-20) E aofia i ei te ‵tou loto fia‵fia o faka‵logo ki fakatonuga kolā e fai mai ne tino kolā e fai ne latou te takitakiga i te tapuakiga tonu, faitalia te lotou tulaga sē ‵lei katoatoa. (Epelu 13:17) E tāua ‵ki te ‵tou faka‵logo ki fakatonuga a te Atua i ‵tou olaga totino i te kilokiloga a Ieova.

18, 19. Se a te mea e iku mai i ‵tou faka‵logo mo te loto kātoa ki te Atua?

¹⁸ I aso nei, e aofia i ‵tou faka‵logo ki a Ieova a te kufaki i fakasauāga ke fakatumau ei te ‵tou fakamaoni. (Galuega 5:29) E se gata i ei, a te ‵tou fakalogo ki te fakatonuga a Ieova ke talai kae akoako atu e manakogina i ei te kufaki ke oko eiloa ki te gataga o te olaga tenei. (Mataio 24:​13, 14; 28:​19, 20) E manakogina te kufaki ke tumau tatou i te maopoopo fakatasi mo ‵tou taina, e ui eiloa e lagona ne tatou te uke o fakamalosiga mai te lalolagi. E iloa ‵lei ne te ‵tou Atua alofa a ‵tou taumafaiga ke faka‵logo tatou i feitu penā. Ko te mea ke faka‵logo katoatoa tatou, e ‵tau o taua atu tatou ki ‵tou tulaga agasala kae ‵fuli keatea mai mea ma‵sei, kae ati aka te loto fakafetai ki mea ‵lei.​—⁠Loma 12:⁠9.

¹⁹ Kafai e tavini atu tatou ki a Ieova ona ko te alofa mo te loto fakafetai, ka fai ei a ia e pelā me se tino telā e “tuku . . . ne ia te taui ‵lei ki tino kolā e salasala ki a ia.” (Epelu 11:⁠6) E ‵tau kae manakogina foki ke ofo atu a taulaga ‵lei, kae ko te fakalogo katoatoa ona ko te alofa ki a Ieova ko te ‵toe mea fakafiafia ki a ia.​—⁠Faataoto 3:​1, 2.

Ka Tali Mai Koe Pefea?

• Kaia e mafai ei o fai atu tatou me e isi se mea e mafai o tuku atu ne tatou ki a Ieova?

• Ne a mea ‵se ne fai ne Saulo?

• E fakaasi atu pefea ne koe tou talitonu me e sili atu te fakalogo i lō te faiga o taulaga?

• Se a te mea e fakamalosi atu ke fakalogo koe ki a Ieova?

[Fakamatalaga o te Ata i te itulau e 13]

Ka pefea a lagonaga o se tokita atafai ki tena masaki telā e se fia fakalogo ki ana manatu fesoasoani?

[Fakamatalaga o te Ata i te itulau e 15]

Kaia ne fakafanoanoa ei ne te tupu ko Saulo a Ieova?

[Fakamatalaga o te Ata i te itulau e 17]

E mata, e fakalogo koe ki fakatonuga a te Atua ma nofo tokotasi koe i te fale?