Se Mea Tāua ke Fakaakoako a Tama‵liki ki te Faka‵logo?

NE FAI mai te ulutala i se nusipepa e tasi penei: “E Ma‵nako a Mātua ke ‵Tu Tokotasi Olotou Tama‵liki i lō te Faka‵logo Fua.” Ne fakavae te tamā lipoti tenei ki te sukesukega telā ne fai i Niu Sila, kae ne fakaasi mai i ei me ko te “22 pasene fua o tino kolā ne fesili atu ki ei ne ma‵natu aka me e ‵tau o fakaakoako olotou tama‵liki ki te faka‵logo i loto i te kāiga.” Ne fakaasi mai foki i te sukesukega tenā me e tali‵tonu a mātua i aso nei me e sili atu i te tāua ke fakaakoako a tama‵liki ki faifaiga fakaaloalo, te tu tokotasi mo te tausiga o olotou tiute.

E se ofo tatou me e fakalotolotolua a tino ki te tāua o te faka‵logo mo te fakaakoako o te faka‵logo ki olotou tama‵liki me e ‵nofo atu tatou i te vaitaimi tenei e faka‵mafa ei te tu tokotasi mo te ‵saga atu o tino ki olotou manakoga eiloa. Kae, e mata, e se aogā te faka‵logo o tama‵liki i aso nei? Io me ko te faka‵logo se mea tāua e tasi telā e ‵tau o tauloto ki ei a tama‵liki kae e aogā foki ki a latou? Kae e sili atu i te tāua, se a te kilokiloga a Ieova te Atua, telā ne Fakatoka ne ia te kāiga, e uiga ki te faka‵logo ki mātua, kae ne a mea aogā e maua mai i te vaegā faka‵logo tenā?​—⁠Galuega 17:28; Efeso 3:​14, 15.

“Tena Eiloa te Mea Tonu”

Ne tusi atu penei ne te apositolo ko Paulo ki te fakapotopotoga Kelisiano i Efeso i aso o te kau apositolo: “A koutou e tamaliki, se tiute faka-Kelisiano o koutou, o faka‵logo ki otou matua, me tena eiloa te mea tonu e ‵tau o fai ne koutou.” (Efeso 6:⁠1) Tenā la, a te pogai tāua muamua ke faka‵logo a tama‵liki e fai pelā me e fetaui ‵lei te faka‵logo mo fakatakitakiga a te Atua e uiga ki mea tonu. E pelā mo pati a Paulo, “tena eiloa te mea tonu.”

E tusa loa mo te mea tenei, ko iloa ne tatou me e fakamatala mai ne te Muna a te Atua a te fakaakoako atu ki tama‵liki i te alofa e fai pelā me se mea ‵gali, “e pela mo te pulou io me ko te malele tela e fakaopoopo ne ia te gali o koe” kae “se mea fakafiafia loto tena ki te Aliki.” (Faataoto 1:​8, 9; Kolose 3:20) Kae e ‵kese mai i te mea tenā, e se fiafia te Atua ki te sē faka‵logo.​—⁠Loma 1:​30, 32.

“Ka ‵Lei ei Koe”

Ne fakaasi mai foki ne Paulo a te suā mea e aogā ei te faka‵logo, i ana pati konei: “Ava ki tou tamana mo tou matua, me kafai e fai ne koe, ka ‵lei ei koe kae ola leva foki i te fenua. Tenei te tulafono muamua e isi sona taui.” (Efeso 6:​2, 3; Esoto 20:12) Ka ‵lei pefea se tino ona ko tena fakalogo ki ana mātua?

A te mea muamua, e ma‵tua atu kae e sili atu foki te masani o ‵tou mātua i te olaga nei, i ne? E tiga eiloa kāti e se ‵poto malosi latou i te fakaaogāga o komipiuta io me ko nisi mataupu aka kolā e akoako mai i te akoga, e iloa ne latou a mea e uke e uiga ki te olaga nei mo te fakafesagai atu ki fakalavelave i ei. Kae ko te suā feitu, e se kātoa ‵lei te poto o te kau talavou ona ko te mea ne seki oko atu latou ki te tulaga o tino mā‵tua. Tela la, i nisi taimi e fai fakavave ne latou olotou filifiliga, kāti i te tautali atu fua ki nisi talavou kae e iku atu ki mea sē ‵lei mō latou. E fakaasi mai ne te Tusi Tapu a te manatu tonu i pati konei: “A te uiga o tamaliki, e fai ne latou a uiga valea.” Kae se a te mea ka fesoasoani atu ki a latou? “E tau o kini ke lei ei olotou amioga.”​—⁠Faataoto 22:⁠15.

E uke atu a mea aogā e maua i te faka‵logo i lō te ‵lei o te va o mātua mo olotou tama‵liki. E ‵tau o fakatau fesoasoani a tino ke fanofano ‵lei olotou olaga kae e aofia i ei te faka‵logo i nisi taimi. E pelā mo te tauavaga, kafai e loto ma‵lie laua ke talia a manatu o te suā tino i lō te faiga fua o tonu io me ko te sē ‵saga atu ki te loto lagona o te suā tino, ka iku atu i ei ki te filemu, te tokagamalie mo te fiafia. Ke manuia te faiga o so se pisinisi e ‵tau o fakamalalo se tino ki tena pule i te koga galue. Kafai e faka‵logo tatou ki tulafono mo fakatonuga a te malo, e se gata fua i te sē fakasala o tatou kae e puipui foki tatou ko te mea ke maua sāle te olaga tokagamalie.​—⁠Loma 13:​1-7; Efeso 5:​21-​25; 6:​5-8.

Kafai e se iloa ne nisi talavou o faka‵logo faka‵lei ki pulega, ko fai fakaa‵tea sāle olotou amioga. Kae e ‵kese mai te mea tenā, kafai e iloa ne se tamaliki o fakalogo faka‵lei a koi foliki a ia ko aumai ei a mea aogā e uke ki te olaga kātoa o te tino tenā. E pefea te aogā ke fakaakoako ki ei a koi fo‵liki a tama‵liki!

Te Taui Sili mō te Faka‵logo

E se aumai fua ne te faka‵logo a fesokotakiga fiafia mo tino i loto i te kāiga mo nisi mea aogā foki i te olaga kātoa, kae e tuku mai foki i ei se fakavae ‵lei ke ati aka ei te ‵toe fesokotakiga tāua​—⁠ko te fesokotakiga i te va o te tino mo tena Atua. E ‵tau o faka‵logo katoatoa tatou ki a Ieova te Atua me ‘ne faite ne Ia tatou’ kae ko ia foki ko “te pogai o te ola.”​—⁠Failauga 12:1; Salamo 36:⁠9.

E maua faka 839 taimi te pati fakalogo i te Tusi Tapu. E se gata i ei, e fia selau taimi e taku mai ei a nisi pati kolā e fakauiga ki tulafono a te Atua, ana fakatonuga mo ana tonu kae e fakaasi mai i ei me e manakomia te fakamalalo. E seai se fakalotolotolua i ei me ko te faka‵logo se mea ‵tau i te kilokiloga a te Atua ko te mea ke talia ne ia tatou. E tonu, e ‵tau eiloa o faka‵logo tatou māfai e fia ati aka ne tatou se fesokotakiga ‵lei mo Ieova. (1 Samuelu 15:22) Se mea fakafanoanoa me ko te faiga masani a tino ko te sē faka‵logo i lō te faka‵logo. Muna a te Tusi Tapu: “I te taimi koi foniki ei a ia, a tena mafaufau e se ‵lei.” (Kenese 8:21) Tela la, a te fakaakoako ki te faka‵logo e se ‵tau o fai fua māfai koi foliki se tino kae e ‵tau o fai i tena olaga kātoa. Ka maua i ei ne tatou a taui sili māfai e fai penā.

Ke masaua a pati a Paulo e uiga ki te fakatonuga ke faka‵logo ki mātua kae ne fakaasi mai i ei a te folafolaga telā e lua a taui i ei, ko te mea “ke ‵lei ei koe kae ke ola leva foki i te fenua.” Ne toe fakatalitonu mai te folafolaga tenā i te Faataoto 3:​1, 2: “Taku tama, sa puli aku akoakoga konei e fai atu ki a koe. Ke masaua faeloa ne koe a mea e fakatonu atu ne au ke fai ne koe. Aku akoakoga ka fai ne ia koe ke ola i se olaga loa kae maumea.” Ka maua ne tino kolā e faka‵logo a te taui tafasili i te ‵lei ko te fesokotakiga totino mo Ieova i te taimi nei, e penā foki mo te ola se-gata-mai i te lalolagi fou telā e filemu.​—⁠Fakaasiga 21:​3, 4.

[Ata i te itulau e 31]

E aumai ne te faka‵logo a fesokotakiga fakafia‵fia i loto i te kaiga, i te galuega, e pelā foki mo Ieova