Fesili Mai te Kau Fai‵tau

Se a te mea ne fakauiga a Iesu ki ei i ana pati me i tena tavini fakamaoni e “poto”?

Ne fakasae aka ne Iesu se fesili: “Ko oi te tavini fakamaoni kae poto? Ko ia telā ko oti ne fili ne tona pule ke pule i isi tavini, kae fakasoa atu foki ne ia olotou meakai i te taimi tonu.” (Mataio 24:45) A te “tavini” telā e tuku mai ne ia a “meakai” faka-te-agaga ko te fakapotopotoga o Kelisiano fakaekegina ki te agaga. Kaia ne taku ei ne Iesu a latou me e ‵poto?a

E mafai o malamalama faka‵lei tatou e auala i akoakoga a Iesu i te mea telā kāti ne fakauiga a ia ki ei i te fakaaogāga o te pati ko te “poto.” E pelā mo te taimi ne faipati atu ei a ia e uiga ki “te tavini fakamaoni kae poto,” ne fai atu ei ne Iesu te tala fakatusa e uiga ki tamafine e tokosefulu kolā ne fakatali‵tali ki te oko mai o te tagata fatoā fakaipoipo. E fakamasaua mai ki a tatou a tamafine konei ki Kelisiano fakaekegina mai mua o te 1914 kolā ne ‵nofo fakatali‵tali mo te fia‵fia ki te oko mai o te Tagata fatoā fakaipoipo sili, ko Iesu Keliso. Mai tamafine e tokosefulu konā, e tokolima ne seki lava olotou kalasini i te taimi ne oko mai ei te tagata fatoā fakaipoipo, kae ne seki oko atu ei latou ki te ‵kaiga o te fakaipoipoga. Kae ko te suā tokolima ne fakamaoni mai i a latou ne tino ‵poto. Ne fakatoka ne latou a kalasini e lava ko te mea ke mafai o fakatumau te mainaga māfai ko oko mai te tagata fatoā fakaipoipo kae talia ei latou ki loto i te ‵kaiga.​​—⁠Mataio 25:​10-​12.

I te taimi ne pule mai ei a Iesu i tena Malo i te 1914, ne fakatali‵tali eiloa a tino e tokouke mai Kelisiano fakaekegina ke ‵kau fakatasi latou mo ia i te taimi eiloa tenā i te lagi. Kae, koi uke eiloa a galuega e ‵tau o fai ne latou i te lalolagi, kae ne seki toka a nisi o latou ke fai a galuega konā. E pelā mo tamafine va‵lea, ne seki fakamalosi aka ne latou a latou eiloa i te feitu faka-te-agaga mai mua atu i ei, tela la, ne seki toka ei latou ke tumau i te fakamaina atu o te mainaga. Kae ko te tokoukega o latou ne gasue‵sue mo te poto​​—⁠mo te atamai mo te kilo ‵mao⁠​—⁠kae ne maua ne latou a fakamalosiga faka-te-agaga. I te taimi ne iloa ei ne latou me e uke a galuega koi ‵tau o fai, ne gasue‵sue ei latou mo te fia‵fia o fakataunu a galuega konā. Tela la, ne fai ei latou mo fai “te tavini fakamaoni kae poto.”

Ke mafaufau foki ki te fakaaogāga ne Iesu a te pati “poto” i te Mataio 7:24. Ana muna: “So se tino e fakalogo ki aku muna kae fai ne ia, e fakatusa ne au ki se tino poto telā ne faite tena fale i luga i te kaupapa.” A te tagata poto e faite tena fale i luga i te kaupapa, e faka‵tau ki matagi ma‵losi. E ‵kese mai i ei, e faite ne te tagata valea tena fale i luga i te one kae oti ko maofa ei. Tela la, a te soko poto o Iesu, ko te tino telā e lavea ‵mao ne ia a ikuga ma‵sei o te tautali atu i poto o tāgata. E takitaki a ia ne tena malamalama mo ana faka‵tauga ‵lei ke fakavae katoatoa tena fakatuanaki, ana faifaiga mo ana akoakoga ki mea kolā ne akoako mai ne Iesu. Tenā foki eiloa te mea e fai ne “te tavini fakamaoni kae poto.”

Ke onoono foki ki te fakaaogāga o te pati “poto” i vaega kese‵kese e uke o te Tusi Tapu i te ‵Gana Epelu. E pelā mo te taimi ne fakasopo ei ne Falao a Iosefa ke pule i meakai i Aikupito, ne fai a te mea tenā e pelā me se vaega o te fakatokaga a Ieova ke tuku atu ei a meakai ki ana tino. Kaia ne fili aka ei a Iosefa? Ne fai atu a Falao ki a ia: “E seai eiloa se tino e sili atu tena malamalama io me poto mo tena kilo ‵mao i lō koe.” (Kenese 41:​33-​39; 45:⁠5) I se auala foki penā, e fai mai te Tusi Tapu me i a Apikaila se fafine “poto.” Ne fakatoka ne ia a meakai ma Tavita, te tino filifilia a Ieova, mo ana tāgata. (1 Samuelu 25:​3, 11, 18) E mafai o fai atu i a Iosefa mo Apikaila ne tino ‵poto, me ne iloa ne laua te loto o te Atua, kae ne gasue‵sue laua mo te kilo ‵mao mo te faiga o faka‵tauga ‵lei.

Tela la, i te taimi ne fakamatala mai ne Iesu e uiga ki te tavini fakamaoni me e poto, e fakasino atu a ia me i tino kolā e aofia i te tavini tenā ka fakaasi atu ne latou a te atamai, te kilo ‵mao, mo te faiga o faka‵tauga ‵lei me e fakavae te lotou fakatuanaki, faifaiga, mo akoakoga ki te munatonu mai te Muna a te Atua.

[Fakamatalaga mai lalo]