‘E Tau‵tali Eiloa Latou i te Tamā Mamoe’
“Ko latou konei . . . e tau‵tali eiloa i te Tamā Mamoe i so se koga e fano a ia ki ei.”—FAKAASIGA 14:4.
1. E pefea a lagonaga o soko ‵tonu o Iesu i te lotou tau‵tali atu i a ia?
KATI ko te lua mo te āfa tausaga o tena taviniga, kae “ne akoako ei a [Iesu] i te fale tapuaki i Kapanaumi.” Ona ko te lotou ofo i tena lauga, “e tokouke ona soko ko solomuli ki tua, ko se tau‵tali foki i a ia.” I te taimi ne fesili atu ei a Iesu ki ana apositolo e toko 12 me e mata, e fia olo foki latou, ne tali atu a Simona Petelu: “Te Aliki, ko oi te tino ka olo matou ki ei? A muna o te ola se gata mai, e nofo mo koe. Ko tali‵tonu matou, ka ko iloa foki ne matou i a koe ko te Tamatapu a te Atua.” (Ioane 6:48, 59, 60, 66-69) Ne ita a soko ‵tonu o Iesu ma tiakina ne latou a ia. I te otiga ne fakaeke ki te agaga tapu, ne tumau eiloa latou i te tau‵tali i fakatonuga a Iesu.—Galuega 16:7-10.
2. (a)Ko oi te “tavini fakamaoni kae poto”? (e) Ne a fakamaoniga ‵gali ne maua mai i te tavini ona ko te lotou “tautali atu i te Tamā Mamoe”?
2 Kae pefea la a Kelisiano fakaekegina i ‵tou aso nei? I tena valoaga e uiga ki te “fakailoga o [tena] foki mai, mo te gataga o te lalolagi,” ne fakasino atu a Iesu ki te potukau o ana soko kolā ne fakaeke ki te agaga tapu i te lalolagi e pelā me se “tavini fakamaoni kae poto.” (Mataio 24:3, 45; Luka 12:42) E pelā me se potukau, ko se fuafuagina eiloa te ‵gali o mea ne fai ne te tavini ke “tau‵tali eiloa i te Tamā Mamoe i so se koga e fano a ia ki ei.” (Faitau te Fakaasiga 14:4, 5.) E tumau eiloa a nisi tino o latou i te fai pelā me ne taupou i te feitu faka-te-agaga mai te se fakalai‵lai ne latou a latou eiloa ki nisi talitonuga mo faifaiga a ‘Papelonia te Sili,’ te emupaea o lotu ‵se i te lalolagi kātoa. (Fakaasiga 17:5) E seai ne akoakoga “‵loi” e akoako ne latou, kae e “seai foki ne olotou ‵se [io me “e ‵ma latou,” NW]” mai i te lalolagi a Satani. (Ioane 15:19) I aso mai mua nei, “ka tau‵tali” atu a te ‵toega o te kau fakaekegina i te lalolagi i te Tamā Mamoe ki te lagi.—Ioane 13:36.
3. Kaia e tāua ei ke tali‵tonu tatou ki te tavini?
3 Ko oti ne fakasopo aka ne Iesu a te tavini fakamaoni kae poto “ke pule i isi tavini,” kolā ko tino takitokotasi o te potukau o te tavini tenā, ke “fakasoa atu . . . ne ia olotou mea‵kai i te taimi tonu.” Ko oti foki ne tofi ne ia a te tavini tenā “ke pule i ana mea katoa.” (Mataio 24:45-47) E aofia i “ana mea katoa” ko “te vaitino tokouke” o ‘nisi mamoe’ telā e gasolo aka faeloa o tokouke. (Fakaasiga 7:9; Ioane 10:16) E mata, e ‵tau o tali‵tonu a tino takitokotasi o te kau fakaekegina mo ‘nisi mamoe’ ki te tavini telā ko oti ne tofi aka ke pule atu ki a latou? E uke a pogai e ‵tau ei o tali‵tonu tatou ki te tavini tenā. E lua a pogai tāua: (1) E talitonu a Ieova ki te tavini tenā. (2) E talitonu foki a Iesu ki te tavini tenā. Ke onoono aka tatou ki fakamaoniga me e tali‵tonu katoatoa a Ieova te Atua mo Iesu Keliso ki te tavini fakamaoni kae poto.
E Talitonu a Ieova ki te Tavini
4. Kaia e mafai ei o tali‵tonu tatou ki mea‵kai faka-te-agaga kolā e fakasoa mai ne te tavini fakamaoni kae poto?
4 Ke mafaufau ki auala e mafai ei o fakasoa mai ne te tavini fakamaoni kae poto a mea‵kai ‵gali faka-te-agaga i te taimi tonu. “Ka akoako atu ne au ki a koe a te auala e ‵tau o fano koe i ei,” ko pati a Ieova. Ne toe fai mai a ia: “Ka fakatonutonu kae akoako ne au a koe.” (Salamo 32:8) E tonu, e tuku atu ne Ieova a fakatonutonuga ki te tavini. Tela la, e ‵tau o tali‵tonu katoatoa tatou ki mainaga faka-te-Tusi Tapu, te malamalama, mo fakatakitakiga kolā e maua ne tatou mai i te tavini.
5. Ne a fakamaoniga e fakaasi mai i ei me e maua ne te tavini a te agaga o te Atua?
5 E fakamanuia foki ne Ieova a te tavini ki tena agaga tapu. E tiga eiloa e se matea atu a te agaga o Ieova, kae e mafai o lavea ne tino kolā e ga‵lue i a latou a te agaga tapu. Ke mafaufau ki mea kolā ne mafai ne te tavini fakamaoni kae poto o fai ke tuku atu i ei se molimau i te lalolagi kātoa e uiga ki a Ieova te Atua, tena Tama mo te Malo. E folafola atu nei ne tino tapuaki a Ieova a te fekau e uiga ki te Malo i atufenua mo tamā fenua e silia atu mo te 230. E mata, e se fakamaoni mai i te mea tenā me e fakamalosi eiloa ne te agaga tapu o te Atua a te tavini? (Faitau te Galuega 1:8.) I te fakasoaatuga o mea‵kai faka-te-agaga i te taimi tonu ki tino o Ieova i te lalolagi kātoa, e ‵tau o fai ne te tavini a fakaikuga tāua. I te taimi e fai kae fakagalue aka ei ne latou a fakaikuga konā, e fakaasi atu ne te tavini a te alofa, te loto maulalo, mo nisi fuataga o te agaga tapu.—Kalatia 5:22, 23.
6, 7. E pefea te lasi a te loto talitonu o Ieova ki te tavini fakamaoni?
6 Ke maina ‵lei tatou i te lasi o te loto talitonu o Ieova ki te tavini fakamaoni, ke mafaufau ki tena tautoga ne fai ki a latou. “Kafai e tagi te pu,” ko pati ne tusi mai ne te apositolo ko Paulo, “ka toe‵tu a Kelisiano ki te se toe ‵mate, kae ka ‵fuli foki a foliga o‵tou foitino. Me i te foitino se ola tumau tenei, e ‵tau o tuku atu ki luga i a ia te foitino ola tumau.” (1 Kolinito 15:52, 53) A soko fakaekegina o Keliso, kolā ne tavini fakamaoni ki te Atua ke oko eiloa ki te taimi e ‵mate ei latou i te feitu faka-te-foitino, ka toe faka‵tu aka ki se tulaga tai ‵lei atu e pelā me ne tino faka-te-agaga mo te fakamoemoega ke ola ki te se-gata-mai. Ka se toe mafai o ‵mate latou—ka ola ki te se-gata-mai kae se mafai o fakamaseigina. E se gata i ei, e maua ne latou a te foitino telā e se toe mafai o fakamasei io me pala kae ka tumau faeloa i te ‵lei. E fakamatala mai i te Fakaasiga 4:4 a latou kolā ne toe faka‵tu aka e pelā me e saga‵saga i nofogaaliki mo olotou kalauna aulo i olotou ulu. A te ‵malu faka-tupu e tuku atu fua ki Kelisiano fakaekegina. Kae e uke aka foki a nisi fakamaoniga.
7 “Ko oko mai nei te aso o te fakaipoipoga a te Tamā Mamoe, ka ko tena avaga ko fakatoka nei ki ei. Ko oti foki ne talia a ia ke pei ki te gatu lino ‵ma kae malapulapu. A te lino ko te fakailoga tenā o faiga ‵lei a Kelisiano,” ko pati i te Fakaasiga 19:7, 8. Ko oti ne filifili ne Ieova a Kelisiano fakaekegina e pelā me ko te fafine telā ka fakaipoipo ki tena Tama. A “te fakaipoipoga a te Tamā Mamoe” e se mafai o toe fakamaseigina, e se toe mafai o mate, kae maua ne ia te ‵malu faka-tupu—ko tafaga la te fakafiafia mo te fakaofoofogina o meaalofa konei! A mea konā ne fakamaoniga o te loto talitonu o te Atua ki te kau fakaekegina, kolā e ‘tumau o tau‵tali atu i te Tamā Mamoe i so se koga e fano a ia ki ei.’
E Talitonu a Iesu ki te Tavini
8. Ne fakaasi mai pefea ne Iesu tena loto talitonu ki ana soko fakaekegina ki te agaga?
8 Ne a fakamaoniga e iloa atu me e talitonu katoatoa a Iesu ki ana soko fakaekegina ki te agaga tapu? I tena toe po i te lalolagi, ne fai ne Iesu se feagaiga mo ana apositolo fakamaoni e toko 11. “Ne ‵kau fakatasi koutou mo au i oku tofotofoga,” ko ana pati ki a latou, “E pelā eiloa mo te tukumaiga ne toku Tamana te pule ki a au, e pelā foki taku feagaiga ki a koutou. Ka ‵kai kae inu koutou i taku taipola i toku Malo, kae ka ‵nofo foki koutou i paepaealiki, o fakamasino atu matakāiga e sefulu lua o Isalaelu.” (Luka 22:28-30) A te feagaiga telā ne fai ne Iesu mo soko e toko 11 e aofia foki i ei te toko 144,000 o Kelisiano fakaekegina. (Luka 12:32; Fakaasiga 5:9, 10; 14:1) Moi ne se talitonu a Iesu ki a latou, e mata, e fai ne ia se feagaiga ke pule fakatasi latou mo ia i tena Malo?
9.Ne a mea e aofia i “mea katoa [a Keliso]”?
9 E se gata i ei, ko oti ne tofi ne Iesu Keliso a te tavini fakamaoni kae poto ke pule “i ana mea katoa”—ko manakoga katoa o te Malo i te lalolagi. (Mataio 24:47) E aofia i mea katoa konei ko kope i te laumua o Molimau a Ieova i te lalolagi kātoa, ofisa lagolago i fenua kese‵kese, Fale Fai Fono mo Kingdom Halls i te lalolagi kātoa. E aofia foki i ei ko te galuega ko te talaiatuga o te Malo mo te faiga o soko. E mata, e mafai o ‵tofi aka ne koe se tino telā e se talitonu koe ki ei ke tausi kae fakaaoga ne ia ou kope tāua?
10. E iloa pefea ne tatou me i a Iesu Keliso e fakatasi atu faeloa ki ana soko fakaekegina?
10 Mai tua malie loa o tena fanakaga ki te lagi, ne fakasae atu a Iesu telā ko oti ne fakatu aka, ki ana soko fakamaoni kae tauto atu ki a latou: “Kiloke! Au e fakatasi faeloa mo koutou, ke oko eiloa ki te gataga o te lalolagi.” (Mataio 28:20) E mata, ne fakataunu a te tautoga tenei? I te 15 tausaga ko ‵teka atu, ne gasolo aka faeloa te aofaki o fakapotopotoga a Molimau a Ieova i te lalolagi kātoa mai te 70,000 ki te 100,000 tupu—se fanakaga telā e sili atu i te 40 pasene. Kae e tokofia a soko ‵fou ne toe fakaopoopo mai? E toeitiiti ko kātoa te 4.5 miliona o soko ne papatiso i te 15 tausaga ko ‵teka—e fakatautau pelā me se 800 tupu i te aso. A te gasoloakaga fakaofoofogia o aofaki konei ne fakamaoniga matea me e takitaki ne Keliso ana soko fakaekegina i olotou fakatasiga i te fakapotopotoga kae ‵lago atu foki ki a latou i te galuega ko te faiga o soko.
E Fakamaoni Kae Poto a te Tavini Tenā
11, 12. E fakaasi mai pefea ne te tavini me i a ia e fakamaoni kae poto?
11 Kafai e tali‵tonu katoatoa a Ieova te Atua mo Iesu Keliso ki te tavini fakamaoni kae poto, e mata, e ‵tau foki mo tatou o fai penā? E se gata i ei, ko oti ne fakamaoni mai ne te tavini a tena fakamaoni i te faiga o te galuega telā ne tuku atu ke fai ne ia. E pelā me se fakaakoakoga, ko nofo nei ki se 130 tausaga ne ‵lomi faeloa i ei a te mekesini ko Te Faleleoleo Maluga. E maua faeloa ne tatou a fakamalosiga i te feitu faka-te-agaga mai i fakatasiga, fono o fenua, mo fono o atufenua a Molimau a Ieova.
12 E lavea atu foki a te poto o te tavini fakamaoni me e se sona fai ana mea mai te faiga o ana fakaikuga e aunoa mo te faka‵tali ki se ikuga mautinoa mai i a Ieova, io me fakatamala o fakagalue aka a fakatonutonuga mai i te Atua kolā ko maina latou i ei. E pelā me se fakaakoakoga, e tiga eiloa e talia ne takitaki lotu ‵se io me faka‵kivi olotou mata ki faifaiga kaima‵nako masani a tino se amio atua o te lalolagi e pelā foki mo olotou amioga ma‵sei, e tuku mai eiloa ne te tavini a manatu fesoasoani ke ‵kalo kea‵tea tatou mai malei matagā i te fakanofonofoga masei a Satani tenei. E mafai eiloa ne te tavini o tuku mai a fakatonutonuga aoga i te taimi tonu me e maua eiloa ne ia a fakamanuiaga a Ieova te Atua mo Iesu Keliso. Tela la, e ‵tau foki o tali‵tonu katoatoa tatou ki te tavini. Kae e mafai pefea ne tatou o fakaasi atu te ‵tou loto tali‵tonu ki te tavini fakamaoni kae poto?
“Olo” mo te Kau Fakaekegina me Tau‵tali i te Tamā Mamoe
13. E ‵tusa mo te valoaga a Sakalia, e mafai pefea o fakaasi atu te loto talitonu ki te tavini fakamaoni kae poto?
13 E faipati a te tusi ko Sakalia e uiga ki “tagata e tokosefulu” kolā ne olo atu ki “se tagata Iutaia” kae fai atu “ka olo matou mo koe mo ou tino.” (Faitau te Sakalia 8:23.) Ona ko te mea e fakasino atu ki “se tagata Iutaia” e pelā me ko “koe mo ou tino,” ko tena uiga e sui ne ia se potukau o tino. I ‵tou taimi nei, e sui eiloa ne ia a te ‵toega o Kelisiano fakaekegina—se vaega o te “Isalaelu a te Atua!” (Kalatia 6:16) A “tagata e tokosefulu” e fakasino atu ki te vaitino tokouke o nisi mamoe. E pelā eiloa mo Kelisiano fakaekegina kolā e tau‵tali i a Iesu i so se koga e fano a ia ki ei, e “olo” atu foki a te vaitino tokouke mo te tavini fakamaoni kae poto. E se ‵tau o ‵ma a te vaitino tokouke ke iloa atu me e fai latou pelā me ne taugasoa o Kelisiano kolā ne “kalagagina foki ne te Atua” ki te lagi. (Epelu 3:1) E se mā a Iesu o taku ne ia a tino fakaekegina ko ana “taina.”—Epelu 2:11.
14. E mafai pefea o ‵lago atu mo te fakamaoni ki taina o Keliso?
14 E kilo atu a Iesu Keliso ki te ‵lago atu o tatou mo te fakamaoni ki ana taina e pelā eiloa me e fai atu ki a ia. (Faitau te Mataio 25:40.) I auala fea, e mafai ei ne tino kolā e fakamoe‵moe ke ola i te lalolagi o ‵lago atu ki taina fakaekegina o Keliso? Muamua la, mai te fesoasoani atu ki a latou i te talaiatuga o te Malo. (Mataio 24:14; Ioane 14:12) E tiga eiloa e gasolo ifo a te aofaki o te kau fakaekegina e ‵toe mai i te lalolagi nei, kae e gasolo aka eiloa ki luga te aofaki o nisi mamoe. Kafai e ‵kau atu a tino kolā e fakamoe‵moe ke ola i te lalolagi nei ki te faiga o te galuega talai, mai te tavini atu i te taviniga tumau māfai e mafai, ko ‵lago atu eiloa latou ki te kau fakaekegina i te fakataunu faka‵lei o te galuega ko te faiga o soko. (Mataio 28:19, 20) Kae e se ‵tau o manatu ma‵ma tatou ki avanoaga ke ‵lago atu ki te galuega tenei mai te faiga o meaalofa tupe i auala kese‵kese.
15. E ‵tau o ‵saga atu pefea a Kelisiano takitokotasi ki mea‵kai faka-te-agaga kolā e tuku mai i te taimi tonu mai te tavini mo fakaikuga e fai ne te tavini mō te fakapotopotoga ‵sau kātoa?
15 E pelā me ne Kelisiano takitokotasi, se a te ‵tou kilokiloga ki mea‵kai faka-te-agaga kolā e fakasoa mai ne te tavini fakamaoni i te taimi tonu e auala i tusi faka-te-Tusi Tapu mo fakatasiga faka-Kelisiano? E mata, e fakaaoga faka‵lei ne tatou a mea konā kae toka foki o fakagalue ne tatou? Se a te ‵tou kilokiloga ki fakaikuga kolā e fai ne te tavini mō te fakapotopotoga ‵sau kātoa? A te ‵tou faka‵logo katoatoa ki fakatonutonuga kolā e tuku mai se fakaasiga tenā o te ‵tou fakatuanaki ki a Ieova mo ana fakatokaga.—Iakopo 3:17.
16. Kaia e ‵tau ei o faka‵logo a Kelisiano katoa ki taina o Keliso?
16 Ne fai mai a Iesu, “A aku mamoe e faka‵logo ki toku leo, kae e iloa ne au latou, kae tau‵tali mai i a au.” (Ioane 10:27) Tenā eiloa te mea e fai ne Kelisiano fakaekegina. Kae pefea la a tino kolā e “olo” atu i a latou? E ‵tau mo tino konā o faka‵logo ki a Iesu. E ‵tau foki mo latou o faka‵logo ki ana taina. A te tonuga loa, ko oti ne tuku atu ki a latou a te tiute ke tausi a tino o te Atua i te feitu faka-te-agaga. Ne a mea e aofia i te faka‵logo ki te leo o taina o Keliso?
17. Ne a mea e aofia i te faka‵logo ki te tavini?
17 A te tavini fakamaoni kae poto i aso nei e sui ne te Potukau Pule, kolā e fai ne latou te takitakiga mo te fakateletelega o te galuega talai e uiga ki te Malo i te lalolagi kātoa. E aofia i te Potukau Pule a toeaina ata‵mai kae ne fakaekegina ki te agaga tapu. E mafai o taku latou e pelā me ne tino kolā e “takitaki” ne latou tatou. (Epelu 13:7) E “ga‵lue malosi [eiloa] i te galuega a te Aliki” a ovasia konei i te tausi atu ki tino talai o te Malo kolā ko sili atu i te toko 7,000,000 i fakapotopotoga e sili atu i te 100,000 i te lalolagi kātoa. (1 Kolinito 15:58) A te faka‵logo ki te tavini e fakauiga loa ki te ‵lago katoatoa atu o tatou ki tena Potukau Pule.
E Fakamanuiagina a Tino Kolā e Faka‵logo ki te Tavini
18, 19. (a)Ne a fakamanuiaga e maua ne tino kolā e faka‵logo ki te tavini fakamaoni kae poto? (e) Se a te mea e ‵tau o fakaiku aka ne tatou?
18 Talu mai te taimi ne fakasopo aka ei a te tavini fakamaoni kae poto, “ne akoako ne latou a tino ki te mea tonu.” (Tanielu 12:3) E aofia i tino konei ko latou kolā e fakamoe‵moe ke ‵sao i te taimi e fakaseai ei a te fakanofonofoga masei tenei. A te mauaga o se tulaga amiotonu i mua o te Atua se fakamanuiaga eiloa!
19 I aso mai mua nei, kafai ‘a te fa‵kai tapu, ko Ielusalema fou [e aofia i ei te 144,000] ko fanaifo mai te Atua i te lagi, e pelā eiloa me se tamafine ko toka ‵lei o fanatu ki tena fakaipoipoga,’ ne a la mea ka maua ne tino katoa kolā ne faka‵logo ki te leo o te tavini? E fai mai te Tusi Tapu, “A te Atua ka fakatasi eiloa mo latou kae ka fai a ia mo olotou Atua. Ka se toe iai ne loimata i olotou mata. Ka se toe iai se mate, se fanoanoa, se tagi io me se ‵mae. Ko palele atu a mea mua.” (Fakaasiga 21:2-4) Tela la, ke na faka‵logo nei eiloa tatou ki a Keliso mo ana taina fakamaoni kolā ne fakaeke ki te agaga tapu.
Ne a Mea ne Tauloto ne Koe?
• Ne a fakamaoniga ko iloa ne tatou me e talitonu a Ieova ki te tavini fakamaoni kae poto?
• Ne a mea e fakaasi mai i ei me e talitonu katoatoa a Iesu Keliso ki te tavini?
• Kaia e ‵tau ei o tali‵tonu tatou ki te tavini fakamaoni?
• E fakaasi atu pefea ne tatou a te ‵tou loto tali‵tonu ki te tavini?
[Ata i te itulau e 25]
E mata, e iloa ne koe me ko oi te tamafine ko oti ne fili aka ne Ieova ke fai mo fai te avaga a tena Tama?
[Ata i te itulau e 26]
Ko oti ne tuku atu ne Iesu Keliso te taliaga ke pule te tavini fakamaoni kae poto ki “ana mea katoa”
[Ata i te itulau e 27]
Kafai e fai ‵tou tusaga i te galuega talai, e ‵lago atu eiloa tatou ki te kau fakaekegina ki te agaga tapu