Te ‵Sala Atu ki te Loto o te Atua i Aso Nei

“Ne mate [a Keliso] mō tino katoa, ko te mea ko tino kolā e ola ke se ola mō latou.”​​—⁠2 KOLINITO 5:​15.

1. Fakamatala mai se tala o se misionale i te koga ne galue a ia i ei.

“A TE motou motoka ko te motoka muamua eiloa ke ulu atu ki loto i se fa‵kai tu tokotasi i Afelika mai tua malie eiloa o te taua i te fenua,” ko pati a se misionale ko Alona.a “Ne seki mafai o fesokotaki matou mo te fakapotopotoga foliki i te fa‵kai tenā, kae ne ‵tau o tausi atu matou ki manakoga o taina i konā. I tafa o meakai, gatu mo tusi faka-te-Tusi Tapu, ne ave ne matou se ‵kopi o te vitiō ko te Jehovah’s Witnesses​​—⁠The Organization Behind the Name.b Tela la, ne ualolo atu se vaitino o tino fia‵fia o onoono i te ata tenā i te ‘koga tamunei’​​—⁠se fale lau lasi telā e isi se VCR mo se TV i ei​​—⁠telā ne pei fakalua ne matou a te ata tenā. E uke a akoga faka-te-Tusi Tapu ne maua mai tua o fakaasiga takitasi konā. E manino ‵lei, me ne aogā eiloa omotou taumafaiga.”

2. (a) Kaia e fakaiku aka ei ne Kelisiano ke fakaaogā olotou ola mō te galuega a te Atua? (e) Ne a fesili ka sau‵tala nei tatou ki ei?

² Kaia ne fai ei ne Alona mo ana taugasoa se galuega faigata penā? Ona ko te lotou loto fakafetai ki te taulaga togiola a Iesu Keliso, ne tuku atu ei ne latou olotou ola ki te Atua kae e ma‵nako latou o fakaaogā e ‵tusa mo te fuafuaga a te Atua. E pelā mo latou, ko oti ne fakaiku aka ne Kelisiano tukugina atu katoa ke “se ola mō latou” kae ke fai ne latou te ‵toe mea e mafai “mō te tala ‵lei.” (2 Kolinito 5:​15; 1 Kolinito 9:​23) E iloa ne latou me kafai ko oko mai te gataga o te olaga tenei, ka seai eiloa se aogā o tupe mo tulaga ma‵luga o te olaga nei. Tela la, mai te ola mo te malosi telā ko maua ne latou, e ma‵nako latou o fakaaogā a mea konā e ‵tusa mo te fuafuaga a te Atua. (Failauga 12:⁠1) E mafai pefea o fai ne tatou te mea tenā? E maua ne tatou i fea a te loto toa mo te malosi ke fai penā? Kae ne a avanoaga e ma‵tala mai ki a tatou?

Faifaiga Aogā Kolā e Ga‵solo ki Mua

3. Ne a mea fakavae e aofia i te faiga o te loto o te Atua?

³ Mō Kelisiano ‵tonu, a te faiga o te loto o te Atua se galuega telā e fai i te olaga kātoa. E masani o kamata mai te kau atu ki te Akoga mō Tino Talai, te faitau ki te Tusi Tapu i aso katoa, te kau atu ki te galuega talai, mo te kausaki atu ki te papatisoga. Kafai ko gasolo ki mua, e masaua ne tatou a pati a te apositolo ko Paulo: “Ke fai ne koe a mea konei kae tuku katoatoa atu tou ola mō latou, ko te mea ke matea ne tino katoa tou gasolosolo ki mua.” (1 Timoteo 4:​15) A te gasolo tenā ki mua e se ko te faiga ke maua ne se tino a vikiga, kae se fakaasiga o ‵tou manakoga ke fai te loto o te Atua mo te loto fiafia. A te faiga o se vaegā mea penā e fakaasi mai i ei me e talia ne tatou a te Atua ke takitaki ne ia a ‵tou mea katoa e fai i te olaga, kae e sili atu ana mea e mafai o fai i lō tatou.​​—⁠Salamo 32:⁠8.

4. E fakasēaogā pefea ne tatou a manavasega sē aogā?

⁴ A te fakatalave io me ko te saga malosi ifo ki a koe eiloa, e mafai o fai pelā me se fakalavelave ki ‵tou ga‵solo ki mua i ‵tou taviniga ki te Atua. (Failauga 11:⁠4) Tela la, mai mua o maua ne tatou te fiafia tonu i te taviniga ki te Atua mo nisi tino, e ‵tau o manumalo muamua tatou i mea kolā e manava‵se tatou ki ei. E pelā mo Erik, ne mafaufau ke tavini atu a ia i se fakapotopotoga telā e fai‵pati ki se ‵gana fakaa‵tea. Kae ne manavase tou tagata: ‘E mata, ka talia au ne te fakapotopotoga tenā? E mata, ka fiafia au ki taina i konā? E mata, ka fia‵fia mai latou ki a au?’ Ne fai mai tou tagata: “Ne iloa fakamuli aka ne au, me e ‵tau o manavase malosi atu au ki taina i lō au. Ne fakaiku aka ne au ke fakagata toku manava‵se, kae ke saga atu mo te loto fiafia ki so se mea e mafai ne au o fai. Ne ‵talo au mō se fesoasoani kae fanatu o fakataunu aku palani. Nei la, ko fiafia malosi au ki taku taviniga i konā.” (Loma 4:20) E tonu, kafai e tavini atu tatou ki te Atua mo nisi tino mo te loto fiafia, ka maua eiloa ne tatou te fiafia mo te lotomalie.

5. Kaia e tāua ei te faiga faka‵lei o fakatokaga i te olaga e ‵tusa mo te loto o te Atua? Fakamatala mai.

⁵ Ke manuia i te ‵sala atu ki te fuafuaga a te Atua, e manakogina foki i ei ke fakatoka faka‵lei ‵tou mea e fai. Se mea poto eiloa ke mo a e sōna kaitalafu tatou kae fai i ei ke ‵nofo pologa tatou ki te olaga tenei kae ke se lava ‵tou taimi ke fai te galuega a te Atua. E fakamasaua mai te Tusi Tapu ki a tatou, penei: “Kafai e kaitalafu ne koe ne tupe mai i se tino, ko tena uiga a koe ko pologa i te tino ne kaitalafu koe i ei.” (Faataoto 22:⁠7) A te talitonu ki a Ieova mo te fakamuamua faeloa o mea faka-te-agaga e fesoasoani mai ke ‵saga atu tatou ki mea kolā e ‵tau o ‵saga atu ki ei. E pelā mo Guoming, e ‵nofo fakatasi a ia mo ana tuagane e tokolua mo te lotou mātua i se fa‵kai telā e ‵togi ‵mafa a fale i ei kae tai faigata loa ke maua se galuega ‵togi tumau. Mai te fakaaogāga faka‵lei o olotou tupe, e maua eiloa ne latou a mea kolā e manakogina mō te olaga, faitalia me e se ko latou katoa e ga‵lue. “I nisi taimi e seai ne peofuga o matou katoa,” ko pati a Guoming. “Kae, e mafai eiloa o tumau matou i te fai pelā me ne paenia kae ke tausi faka‵lei atu foki ki te motou mātua. E fia‵fia eiloa matou me e se manako te motou mātua ke tiakina ne matou a mea tāua faka-te-agaga ko te mea ke maua ne ia a mea ‵gali o te olaga.”​​—⁠2 Kolinito 12:14; Epelu 13:⁠5.

6. Se a te fakaakoakoga e fakaasi mai ei me e mafai o fakafetaui aka ne tatou a ‵tou olaga mo te loto o te Atua?

⁶ Kafai e aofia malosi koe i te ‵sala atu ki mea faka-te-foitino​​—⁠mea tau tupe io me ko nisi mea aka​​—⁠a te fakamuamua o te loto o te Atua kāti e manakogina i ei ne fakama‵fuliga ‵lasi. A vaegā ‵fuliga penā e se manakogina ke fai fua i se po e tasi, kae ko mea ‵se e fai ne koe i te taimi muamua e se ‵tau o fai pelā me ko se manuia eiloa koe. Ke mafaufau ki a Koichi telā e fiafia o fakaaogā ana taimi e uke ki fakafiafiaga. Ne sukesuke a Koichi ki te Tusi Tapu i te taimi koi foliki ei a ia, kae mō se fia tausaga, ne fakavalevale eiloa a ia ki tafaoga i vitiō. I te aso e tasi ne fai ifo a Koichi ki a ia eiloa: ‘Ne a au mea e fai? Ko 30 tupu nei ou tausaga kae e seai loa se mea aogā e fai ne koe i te olaga!’ Ne toe faka‵soko ne Koichi tena sukesukega ki te Tusi Tapu kae talia ne ia a fesoasoani mai te fakapotopotoga. E ui eiloa ne oko malielie mai a fakamafulifuliga ki tena olaga, ne seki ‵fiu eiloa a ia. Fakatasi mo te faiga o ‵talo mo te ‵lago malosi mai o nisi tino, ne mafai ei o tiakina katoatoa ne ia tena faifaiga masani tenā. (Luka 11:⁠9) Ko tavini atu nei a Koichi mo te fiafia e pelā me se tavini fakafaifeau.

Ke Iloa o Fakapaleni a Mea

7. Kaia e ‵tau ei o paleni ‵lei tatou i te faiga o te galuega a te Atua?

⁷ Ka aogā eiloa a ‵tou taumafaiga e fai ke ‵sala atu ei ki te loto o te Atua. E se ‵tau eiloa o fakatalave io me paie tatou i te faiga o te loto o te Atua. (Epelu 6:​11, 12) Kae, e se manako foki a Ieova ke fakafi‵ta ne tatou a tatou eiloa​​—⁠i te feitu faka-te-foitino, faka-te-mafaufau, io me ko ‵tou lagonaga. A te iloa ‵lei ne tatou me e se mafai o fakataunu ne tatou a te galuega a te Atua i ‵tou malosi totino, e avatu i ei a vikiga ki a ia kae fakaasi atu foki i ei te paleni ‵lei o tatou. (1 Petelu 4:​11) Ne tauto mai a Ieova me ka tuku mai ne ia te malosi e manakogina ke fakataunu ei tena loto, kae e se ‵tau o faimālō ne tatou a ‵tou malosi i te taumafaiga o fai a mea kolā e se manako a ia ke fai ne tatou. (2 Kolinito 4:⁠7) Ko te mea ke tumau tatou i te tavini atu ki te Atua e aunoa mo te fakafi‵ta ne tatou a tatou eiloa, e ‵tau o fakaaogā faka‵lei ne tatou a ‵tou malosi.

8. Ne a mea ne ‵tupu ki se Kelisiano talavou telā ne taumafai o tuku katoatoa atu a ia ki te lalolagi e pelā foki mo Ieova, kae ne a fakama‵fuliga ne fai ne ia?

⁸ E pelā me se fakaakoakoga, ne paenia a Ji Hye, telā ne nofo i Asia ki Saegala, kae galue foki mō tausaga e lua i se galuega telā e manakogina a taimi e uke ki ei. “Ne taumafai au o tuku katoatoa atu au ki a Ieova e pelā foki mo taku galuega,” ko ana pati, “kae ne moe fua au i itula e lima i te po. Fakamuli ifo, ne seki ai soku malosi ne ‵toe mō te munatonu, kae ne seki fiafia malosi foki au ki mea faka-te-agaga.” Ko te mea ke tavini atu ki a Ieova mo tena ‘loto, agaga, mafaufau, mo tena malosi kātoa,’ ne ‵sala atu a Ji Hye ki se galuega telā e se manakogina a taimi e uke ki ei. (Maleko 12:30) “Faitalia a fakamalosiga mai kāiga ke ‵sala atu ki se galuega ‵togi ‵lei, ne taumafai eiloa au o fakamuamua te loto o te Atua,” ko ana pati. “Koi maua eiloa ne au a tupe e lava ke ‵togi ei a mea e ‵tau o maua ne au, e pelā mo gatu ‵lei. Kae e fiafia au me ko lava ‵lei eiloa taku moe! Ko fiafia malosi au ki taku galuega talai, kae ko malosi atu foki nei au i te feitu faka-te-agaga. E fai eiloa penā ona ko te se lasi o toku taimi ki fakafiafiaga o te lalolagi.”​​—⁠Failauga 4:6; Mataio 6:​24, 28-​30.

9. E mafai pefea o pokotia a nisi tino i ‵tou taumafaiga?

⁹ E se ko tino katoa e mafai o tavini atu ki te Atua e pelā me ne tino talai tumau. Kafai ko fakafesagai atu koe ki te tulaga matua, te fakamasakisaki, io me ko nisi tapulā aka, ke masaua me e fakatāua eiloa ne Ieova tou fakamaoni mo so se taviniga telā e fai ne koe mo te loto kātoa. (Luka 21:​2, 3) Tela la, e se ‵tau eiloa mo tatou o manatu ma‵ma ki te aogā o ‵tou taumafaiga ki nisi tino, faitalia me mu‵tana fua. E pelā eiloa māfai e āsi atu tatou ki ne nāi fale kae seai ne tino i ei e fia‵fia ki ‵tou fekau. Kafai ko olo tatou, e mafai eiloa o sau‵tala a tino i te fale i se fia o itula io me ne aso e uiga ki ‵tou āsi atu, ke oko foki eiloa ki fale kolā e seai se tino ne ‵tala mai ne ia te mataloa ki a tatou! E se fakamoemoe eiloa tatou ke fia‵fia mai a tino katoa kolā e lagona ne latou te tala ‵lei, kae e isi eiloa ne tino e fai penā. (Mataio 13:​19-​23) E mafai o ‵saga tonu mai a nisi tino māfai ko ma‵fuli a tulaga i te lalolagi io me ko olotou olaga. A te faiga ne tatou a so se mea e mafai o fai i te talai atu ki tino, ko fai eiloa ne tatou te galuega a te Atua. A tatou ne “tino faigaluega, e ga‵lue fakatasi mō te Atua.”​​—⁠1 Kolinito 3:⁠9.

10. Ne a avanoaga e ma‵tala mai nei ki tino katoa i te fakapotopotoga?

¹⁰ I tafa i ei, e mafai o fesoasoani atu tatou katoa ki tino i ‵tou kāiga mo ‵tou taina mo tuagane faka-te-agaga. (Kalatia 6:​10) A ‵tou fakamalosiga ‵lei ki nisi tino e mafai eiloa o aogā mō se taimi leva. (Failauga 11:​1, 6) Kafai e fai faka‵lei ne toeaina mo tavini fakafaifeau olotou tiute, e fesoasoani atu eiloa latou ke maua ne tino i te fakapotopotoga se fesokotakiga ‵lei kae malosi mo Ieova, kae ke uke olotou galuega faka-Kelisiano e fai. E fakamautinoa mai me kafai e ‘ga‵lue malosi tatou i te galuega a te Aliki,’ e se mafai o “maumau” ‵tou galuega.​​—⁠1 Kolinito 15:58.

Te ‵Sala Atu ki te Loto o te Atua e Pelā me se Galuega

11. I tafa o te ga‵lue fakatasi mo te fakapotopotoga, ne a nisi avanoaga e ma‵tala mai ki a tatou?

¹¹ E pelā me ne Kelisiano, e fia‵fia tatou ki te olaga, kae e ma‵nako tatou o avatu a vikiga ki te Atua i so se mea e fai ne tatou. (1 Kolinito 10:31) Kafai e fakamaoni tatou o talai atu te tala ‵lei o te Malo, kae akoako atu a nisi tino ke faka‵logo ki fakatonuga katoa a Iesu, ka ma‵tala mai eiloa ki a tatou a auala e uke o te taviniga. (Mataio 24:14; 28:​19, 20) I tafa o te ga‵lue fakatasi mo te fakapotopotoga, e mafai eiloa o uke a avanoaga ke ga‵lue i koga kolā e manakogina malosi i ei a tino talai, faitalia me i se isi koga talai, ‵gana io me se fenua. A toeaina mo tavini fakafaifeau taka e mafai o ‵kami ke ‵kau atu ki te Akoga Fakamasani mō Faifeau, kae kafai e oti ko tavini atu ei i fakapotopotoga kolā e manakogina i ei te fesoasoani o Kelisiano ma‵tua ‵lei, i olotou fenua eiloa io me ko nisi koga. A taki tauavaga kolā e ga‵lue tumau i te taviniga e mafai o talia ke olo atu ki Kiliata ke a‵koga e pelā me ne misionale kae tavini atu i se isi fenua. Kae koi lasi eiloa te manakogina o volenitia ke fai ne latou a nisi galuega kese‵kese i te Peteli mo te faitega mo te faka‵leiakaga o fale tapuaki mo ofisa lagolago.

12, 13. (a) E fakaiku aka pefea ne koe a te vaegā taviniga e ‵tau o kausaki atu ki ei? (e) Fakamatala mai te auala e mafai ei o aogā te atamai ne tauloto ne se tino mai se galuega e tasi ki te suā galuega.

¹² Se a te vaegā taviniga e ‵tau o kausaki atu koe ki ei? E pelā me se tavini tukugina atu a Ieova, ke na kilo atu faeloa ki a ia e pelā foki mo tena fakapotopotoga ke maua mai i ei a fakatakitakiga. Ka fesoasoani mai eiloa a tena “aga‵lei” ki a koe ke fai a fakaikuga ‵lei. (Neemia 9:​20) E takitaki atu eiloa ne se galuega e tasi a te tino ki se isi galuega, kae ko te atamai mo te apo ne tauloto ne koe mai se vaega o te taviniga e tasi e mafai eiloa o aogā ki tau suā galuega.

¹³ E pelā mo Dennis mo tena avaga ko Jenny, ne fesoasoani atu faeloa laua i te faitega o Kingdom Halls. Mai tua o te pokoga o te matagi malosi ko Katrina, i te feitu ki saute o Iunaite Sitete, ne volenitia laua ke fesoasoani atu ki tino kolā ne pokotia. Ne fai mai a Dennis: “Mai te fakaaogāga o te atamai ne tauloto ne maua i te faitega o Kingdom Halls ke fesoasoani atu ki ‵tou taina, se mea fakafiafia eiloa ki a maua. A te loto fakafetai telā ne fakaasi mai ne tino kolā ne fesoasoani atu maua ki ei se fakamalosiga gali eiloa. Ne seki manuia malosi eiloa a nisi potukau kolā ne fesoasoani atu ki te toe faitega o fale. Ko oti ne toe faite faka‵lei ne Molimau a Ieova a fale e silia atu i te 5,300 mo ne Kingdom Hall tai uke. Ne lavea ne tino a te mea tenei kae ko ‵saga atu nei latou mo te fia‵fia ki te ‵tou fekau.”

14. Ne a au mea e mafai o fai māfai e fia kausaki atu koe ki te taviniga tumau?

¹⁴ E mata, e mafai o ‵sala atu koe ki te loto o te Atua mai te faiga o te taviniga tumau e pelā me se galuega a koe? Kafai e penā loa, e mautinoa eiloa me ka maua ne koe a fakamanuiaga e uke. Kafai e se mafai o fai koe penā ona ko ou fakanofonofoga, kāti e mafai o fai ne fakama‵fuliga. ‵Talo e pelā mo Neemia i te taimi ne manako malosi ei a ia o fai se galuega tāua ‵ki: “Fakalogo mai nei ki taku ‵talo . . . Tuku mai te manuia ki a au.” (Neemia 1:​11) Kae, mai te talitonu ki te tino e ‘tali mai ki talosaga,’ ke gasuesue la koe e ‵tusa mo tau fakamolemole. (Salamo 65:⁠2) Ko te mea ke fakamanuia ne Ieova au taumafaiga ke tavini atu ki a ia mo te loto kātoa, e ‵tau o fai muamua ne koe a taumafaiga konei. Kafai ko oti ne fakaiku aka ne koe ke galue i te taviniga tumau, ke tumau takitaki i tau fakaikuga tenā. I te gasologa o taimi, ka gasolo aka eiloa tou atamai kae penā foki eiloa mo tou fiafia.

Se Olaga Telā e Aogā Tonu

15. (a) E aogā pefea ki a tatou a te sau‵tala mo te fai‵tau ki tala o tavini a te Atua kolā ko leva ne tavini atu ki a ia? (e) Fai mai se tala o se tino telā ne fakamalosi atu ki a koe.

¹⁵ Ne a ikuga e mafai o iku mai i te ‵sala atu ki te loto o te Atua? Ke sau‵tala mo tino kolā ko leva ne tavini atu ki a Ieova, kae maise ko latou kolā ko leva ne ga‵lue i te taviniga tumau. Ma‵faga o olaga aogā e ola nei i ei latou! (Faataoto 10:22) Ka fakamatala atu ne latou me e seki fakatamala eiloa a Ieova o fesoasoani atu ki a latou, ke oko foki eiloa ki tulaga faiga‵ta, i te ‵sala atu ki mea kolā e ‵tau o maua ne latou mo nisi mea aka. (Filipi 4:​11-​13) Mai te 1955 ke oko 1961, ne ‵lomi i The Watchtower se fakasologa o tala o tino fakamaoni penā mai lalo i te ulutala “Te ‵Sala ki Toku Fakamoemoega Tonu i te Olaga [Pursuing My Purpose in Life].” Talu mai te taimi tenā, e lau i selau a nisi tala o tino ko oti ne ‵lomi. E fakaasi mai i tala takitasi konā a te agaga o te loto finafinau mo te fiafia telā e fakamasaua mai ki a tatou a te mea telā e fakaasi mai i te tusi i te Tusi Tapu ko Galuega. A te faitau ki vaegā tala fakamalosi loto penei ka fakamalosi atu ki a koe ke fai atu, ‘Tenā eiloa te vaegā olaga e manako au ki ei!’

16. Se a te mea e fai ne ia te olaga o se Kelisiano ke aogā tonu kae fakafiafia?

¹⁶ Ne masaua ne Alona, telā ne sau‵tala ki ei i te kamataga: “I Afelika, e fetaui sāle au mo talavou kolā e faima‵laga atu ki nisi kogākoga o te fenua o ‵sala atu ki se fakamoemoega aogā mō te olaga. E se manuia eiloa a te tokoukega o latou. Kae konei la tatou, e ‵sala atu ki te loto o te Atua mai te fakamalugāga o te tala ‵lei o te Malo, kae maua foki ne tatou se olaga faigata kae aogā. Ko oti ne lavea ne matou me e sili atu te fakafiafia ki te tino ke tuku atu ana mea i lō te tino e talia ne ia.”​​—⁠Galuega 20:35.

17. Kaia e ‵tau ei o ‵sala atu tatou ki te loto o te Atua i aso nei?

¹⁷ Kae pefea la koe? Se a te fakamoemoega e kausaki atu nei koe ki ei? Kafai e seai sou fakamoemoega faka-te-agaga tonu, ka faigofie fua o ulu mai a nisi fakamoemoega o te olaga. Kaia fua la e fakamāumāu ei ne koe a tou olaga ki mea sē aogā o te olaga a Satani? E se leva nei, kafai ko oko mai te ‘fakalavelave lasi,’ ka seai loa i ei se aogā o tulaga o koloa faka-te-foitino mo tulaga o te lalolagi nei. A te mea telā e tāua atu ko ‵tou fesokotakiga mo Ieova. Ko tafaga la te ‵tou loto fakafetai me ne tavini atu tatou ki te Atua mo nisi tino kae ne maua eiloa ne tatou te fakamoemoega tonu a te Atua i ‵tou olaga!​​—⁠Mataio 24:21; Fakaasiga 7:​14, 15.

[Fakamatalaga mai lalo]

E Mafai o Fakamatala Mai ne Koe?

• E pefea a lagonaga o Ieova e uiga ki ‵tou taviniga ki a ia?

• E fesoasoani mai pefea a ‵tou atamai mo te paleni ‵lei ke tavini atu ki te Atua mo nisi tino?

• Ne a avanoaga o te taviniga e ma‵tala mai nei ki a tatou?

• E mafai pefea o ola tatou i se olaga aogā tonu i aso nei?