Ka Seai se Meatau Ka Fakapakia ne ia Koe

“Ka seai eiloa se meatau e mafai o fakapakia ne ia a koe.”​​—⁠ISAIA 54:⁠17.

1, 2. E fakaasi mai pefea ne tala o Molimau a Ieova i Albania a te ‵tonu o pati i te Isaia 54:⁠17?

I SE fia sefulu tausaga ko ‵teka, ne ‵nofo atu se potukau o Kelisiano loto ‵toa i se fenua foliki kae maugā i te feitu ki saute togālā o Eulopa. Ne palele eiloa a taumafaiga a se malo Kominisi telā e se tali‵tonu ki te Atua, o fakaseai a latou konei. E auala i fakasauāga, te ‵pei ki falepuipui, mo te fakasalalauatuga o tala ‵loi, ne seki mafai eiloa o fakaseai atu a latou konei. Ko oi la latou? Ko Molimau a Ieova i Albania. E ui eiloa te faigata ke maopoopo fakatasi kae ke olo atu foki i te galuega talai, ona ko te lotou kufaki, ne fakamaluga kae ne fakaaloalo atu i ei ki Kelisiano kae avatu foki i ei a vikiga ki te igoa o Ieova. I te fakaulufalega o te lotou ofisa lagolago i te tausaga ko teka, ne fai mai se Molimau telā ne tavini atu mo te fakamaoni i se taimi leva ‵ki penei: “Faitalia te uke o taumafaiga a Satani, e takavale faeloa a ia kae e manumalo faeloa a Ieova!”

² A mea konei ne fakamaoniga katoa o te ‵tonu o te folafolaga a te Atua ki ana tino i te Isaia 54:17: “Kae ka seai eiloa se meatau e mafai o fakapakia ne ia a koe; ka isi faeloa se tali a koe ki a latou kolā e taumafai o taku fakamasei koe.” E fakamaoni mai ne tala fakasolopito, me e seai eiloa se aofaga a Satani e mafai o taofi aka ne ia te tapuakiga a Ieova te Atua telā e fai ne ana tavini tukugina atu.

Taumafaiga se Aogā a Satani

3, 4. (a) Ne a mea e aofia i meatau a Satani? (e) I auala fea ne seki manuia ei a meatau a te Tiapolo?

³ E aofia i meatau kolā ne fakaaogā ki tino tapuaki ‵tonu ko te fakatapuga o te galuega, fakasauāga matagā, te ‵pei ki falepuipui, mo te ‘fakatulafono ne latou o te mea ‵se.’ (Salamo 94:20) I nisi fenua, i te taimi e sukesuke ei a Molimau a Ieova ki te mataupu tenei, e ‘tofotofogina’ eiloa a te fakamaoni o Kelisiano ‵tonu konei ki te Atua.​​—⁠Fakaasiga 2:​10.

⁴ E pelā mo te lipoti mai se ofisa lagolago o Molimau a Ieova, ne fai mai me i se tausaga fua e tasi, e ‵tusa mo te 32 taimi ne taua atu ei ki tavini a te Atua i te taimi ne fai ei te lotou galuega talai. E se gata i ei, e ‵tusa mo te 59 taimi ne puke ei a Molimau​​—⁠talavou mo tino ma‵tua, tāgata mo fāfine⁠​—⁠kolā ne talai atu ki te ofisa pulisimani. Ne puke a fakailoga i lima o nisi tino, ne pei olotou ata, kae ‵loka foki e pelā me ne tino solitulafono. Ne fakamatakutaku atu foki ki nisi tino. I se fenua e tasi, ko silia atu nei mo te 1,100 a tagi e uiga ki Molimau a Ieova kolā ne ave o ‵loka, ne fakasala tupe io me ne ‵kini. E silia atu i te 200 o tagi konei ne ‵tupu eiloa i te aso telā ne maopoopo ei latou o fakamanatu te mate o Iesu! Kae, ona ko te agaga o Ieova, ne mafai eiloa o ‵sao ana tino faitalia a fakalavelave faiga‵ta, i fenua konei e pelā foki mo nisi fenua. (Sakalia 4:11) E se mafai eiloa o ‵pono aka ne te kaitaua o te fili a gutu o tino kolā e ‵viki atu ki a Ieova. E tonu, e tali‵tonu eiloa tatou me e seai se meatau e mafai o fakasēaogā ne ia a fuafuaga a te Atua.

Ko Taku Fakamasei a Tino Fai Tala ‵Loi

5. Ne a tala ‵loi ne ‵sae aka e uiga ki tavini a Ieova i te senitenali muamua?

⁵ Ne ‵valo mai a Isaia me ka taku fakamasei ne tino o te Atua a so se tala e sae aka e uiga ki a latou. I te senitenali muamua, ne taku fakamaseigina sāle a Kelisiano, e pelā me ne tino ma‵sei. A vaegā ‵losiga konā e tai ‵pau eiloa mo pati i te Galuega 16:​20, 21: “A tāgata konei . . . [e] faka‵tupu fakalavelave i te motou fa‵kai. E akoako ne laua a tu kolā e ‵teke ki te motou tulafono; ka ko matou ne tino Loma, tela la, e se mafai o tau‵tali matou i olotou tu.” I se isi taimi, ne taumafai foki a tino ‵teke ki te lotu, o fakamalosi atu ki takitaki o te fenua ke ‵teke atu ki soko o Keliso, i olotou pati penei: “Konei tāgata faka‵tupu fakalavelave i koga katoa, ka ko oko mai foki ki a tatou. Kae . . . ne ‵teke atu foki latou ki tulafono a Kaisala.” (Galuega 17:​6, 7) Ne taku a te apositolo ko Paulo e pelā me “se tino faka‵tupu fakalavelave” kae ko te takitaki foki o te potukau telā e fakamalosi aka ne latou a kinauga “i te lalolagi” kātoa.​​—⁠Galuega 24:​2-5.

6, 7. Se a te auala e tasi e taku fakamasei ei ne Kelisiano ‵tonu a losiga ‵se kolā e fai ki a latou?

⁶ E ‵tusa mo te mea tenā, e se ‵poi tatou me e fetaui eiloa a Kelisiano ‵tonu i aso nei mo losiga ‵se, tala sē ‵lei, mo tala ‵loi. I se auala fea e taku fakamasei ei ne tatou a vaegā losiga ‵se penā?​​—⁠Isaia 54:⁠17.

⁷ A vaegā ‵losiga penā e se fetaui eiloa mo amioga ‵lei o Molimau a Ieova. (1 Petelu 2:​12) Kafai e fakamaoni mai ne Kelisiano i a latou ne tino e faka‵logo ki te tulafono kae ne tino amio ‵lei foki kolā e amanaia ki te ‵lei o nisi tino, ka lavea atu i ei te ‵se o losiga kolā e fai atu ki a latou. E fakamaoni atu eiloa te mea tenā e auala i ‵tou amioga ‵lei. Kafai e lavea ne nisi tino a ‵tou kufaki i te faiga o galuega ‵lei, e fakamalosi atu i ei ki a latou ke ‵viki atu ki te ‵tou Tamana i te lagi kae ke iloa ne latou a te olaga ‵lei telā e ola i ei ana tavini.​​—⁠Isaia 60:14; Mataio 5:​14-​16.

8. (a) Ne a mea e ‵lei ke fai i nisi taimi ko te mea ke ‵pulu i ei a ‵tou tulaga telā e fakavae ki te Tusi Tapu? (e) I te fakaakoako atu ki a Keliso, e taku fakamasei pefea ne tatou a tino fai tala ‵loi?

⁸ I tafa o ‵tou amioga faka-Kelisiano, e ‵tau o ‵pulu ne tatou i nisi taimi mo te loto toa a ‵tou tulaga telā e fakavae ki te Tusi Tapu. A te auala e tasi ko te fakatagi atu ki te malo io me ko te fono tulafono mō se puipuiga. (Eseta 8:3; Galuega 22:​25-​29; 25:​10-​12) I te taimi ne nofo ei a Iesu i te lalolagi, ne kinau a ia i nisi taimi mo tino kolā ne taku fakamasei ne latou a ia, kae ne ‵teke tonu atu a ia ki olotou losiga ‵se. (Mataio 12:​34-​37; 15:​1-​11) I te fakaakoako atu ki a Iesu, e talia faeloa ne tatou so se avanoaga ke fakamatala atu a ‵tou loto tali‵tonu ki tino. (1 Petelu 3:​15) Ke se talia lele eiloa ne tatou a pati fakatauemu i te akoga, i te galuega, io me mai ‵tou kāiga sē tali‵tonu ke taofi aka ei tatou mai te fakasalalauatuga o te munatonu mai te Muna a te Atua.​​—⁠2 Petelu 3:​3, 4.

Ielusalema​​—⁠“Se Fatu ‵Mafa”

9. Ko te Ielusalema fea e fakaata mai ne te “fatu ‵mafa” telā e faipati ki ei te Sakalia 12:​3, kae ko oi ana sui i te lalolagi?

⁹ E fakamaina mai ne te valoaga a Sakalia a te pogai e ‵teke atu ei a malo ki Kelisiano ‵tonu. Ke onoono ki pati i te Sakalia 12:3: “Kafai ko oko mai te taimi tenā, ka fai ne au a Ielusalema e pelā me se fatu ‵mafa.” Ko te Ielusalema fea e fakasino atu ki ei te valoaga tenei? E fakasino atu eiloa te valoaga a Sakalia ki te “Ielusalema faka te lagi,” ko te Malo faka-te-lagi telā ne kalagagina ki ei a Kelisiano fakaekegina. (Epelu 12:22) Koi ‵nofo atu eiloa se ‵toega foliki o tupu fakaekegina o te Malo Faka-Mesia i te lalolagi nei. Fakatasi mo olotou taugasoa ko ‘nisi mamoe,’ e fakamalosi atu latou ki tino ke ‵fuli ki te Malo o te Atua manū koi maua se avanoaga. (Ioane 10:16; Fakaasiga 11:15) Ne ‵saga atu pefea a malo ki te ‵kamiga tenei? Kae, e ‵lago atu pefea a Ieova ki ana tino tapuaki ‵tonu i aso nei? Ke onoono tatou ki ei mai te sukesuke ki te uiga o te Sakalia mataupu e 12. Mai te faiga penā, ka mafai o maua eiloa ne tatou te loto tali‵tonu me “ka seai eiloa se meatau e mafai o fakapakia” ne ia a tino fakaekegina o te Atua fakatasi mo olotou taugasoa tukugina atu.

10. (a) Kaia e taua atu ei ki tino o te Atua? (e) Ne a mea ne ‵tupu ki tino kolā ne taumafai o ave keatea a te “fatu ‵mafa”?

¹⁰ E fai mai te Sakalia 12:3 me i malo ka “pa‵kia” malosi. E tupu pefea te mea tenei? Ko oti ne fakatonu mai te Atua me e ‵tau o folafola atu te tala ‵lei o te Malo. E fakatāua eiloa ne Molimau a Ieova a te tiute ke talai atu. Kae, ko oti ne fai a te folafolaatuga o te Malo tenei e pelā me ko te fakamoemoega fua e tasi mō tino e pelā me se “fatu ‵mafa” ki malo o atufenua. E taumafai latou o ave keatea te fatu ‵mafa tenā e auala i te lotou oso atu ki tino talai o te Malo. Mai te faiga penā, ko “pa‵kia” malosi ei latou. Kae fai foki i ei ke masiasi latou. E se mafai o ‵pono aka ne latou a gutu o tino tapuaki ‵tonu, kolā e fakatāua ne latou te tauliaga ke folafola atu te “talaiga se gata mai” o te Malo Faka-Mesia o te Atua mai mua o te gataga o te olaga tenei. (Fakaasiga 14:⁠6) I te kilo atu ki faifaiga fakasauā ne fai ki tavini a Ieova, ne fai mai se tino tausi pagota i se fa‵kai o Afelika, penei: ‘Ko oko loa i te māumāu otou taumafaiga o fakasauā a tino konei. E se mafai eiloa o gutugutulua latou. E gasolo aka faeloa latou o tokouke.’

11. Ne tausi pefea ne te Atua a tena folafolaga i te Sakalia 12:⁠4?

¹¹ Faitau te Sakalia 12:⁠4. Ne folafola mai a Ieova me ka faka‵kivi kae fai ne ia ke “‵tele valevale” i se auala fakatusa a tino kolā e ‵teke atu ki ana avefekau loto ‵toa o te Malo. Ne tausi eiloa a ia ki ana pati. E pelā mo se fenua e tasi telā ne fakatapu i ei te tapuakiga tonu, ne seki mafai ne tino ‵teke o taofi aka ne latou a meakai faka-te-agaga mai tino o te Atua. Ne fai mai se tala i se nusipepa me e fakaaogā ne Molimau a Ieova a paluni ke fakaoko mai ei olotou tusi faka-te-Tusi Tapu ki loto i te fenua! Ne lavea atu eiloa te ‵tonu o te folafolaga a te Atua ki ana tavini fakamaoni: “Ka tausi faka‵lei ne au a tino o Iuta, kae ka fai ne au a solofanua a olotou fili ke ‵kivi.” Ona ko te kaitaua, ko se iloa ei ne fili o te Malo a olotou mea ka fai. Kae, e tali‵tonu tatou me ka tausi eiloa ne Ieova ana tino e pelā me se potukau kae saga tonu atu mō te olotou ‵lei.​​—⁠2 Tupu 6:​15-​19.

12. (a) I te auala fea ne faka‵ka ei ne Iesu a te afi i te taimi ne nofo ei i te lalolagi? (e) I auala fea ne faka‵ka ei ne te kau fakaekegina a mea i te feitu faka-te-agaga, kae ne a mea ne iku mai i ei?

¹² Faitau te Sakalia 12:​5, 6. “A kaukāiga o Iuta” e fakasino eiloa ki tino kolā e tausi atu ki tino o te Atua. E tuku atu ne Ieova ki tino fakaekegina konei a te loto finafinau telā e ‵ka pelā me se afi ko te mea ke tausi atu ei ki mea o te Malo i te lalolagi. I se taimi e tasi, ne fai atu a Iesu ki ana soko: “Au ne vau o faka‵ka a loto o tino.” (Luka 12:49) E tonu, ne faka‵ka eiloa ne ia se afi. E auala i tena galuega talai telā ne fai mo te loto finafinau, ne fakatāua ne Iesu a te fekau o te Malo o te Atua. Ne māfua mai i ei a kinauga ‵lasi i te malo o Iutaia. (Mataio 4:​17, 25; 10:​5-7, 17-​20) I se auala tai pau, “e pelā me se afi i te vao io me se fatoaga saito kolā ko ‵lei i te ‵kati,” e faka‵ka eiloa ne soko o Keliso i ‵tou aso nei a mea i te feitu faka-te-agaga. E fakaasi faka‵sau mai ne te tusi ko The Finished Mysterya telā ne ‵lomi i te 1917, a amioga fakaloiloi a Lotu Kelisiano ‵Se. Ne fai i ei ke kaitaua malosi a faifeau. I taimi fakamuli nei, ne fai ne te Kingdom News Napa 37, “Ko Pili Mai te Gataga o Lotu ‵Se!” ke fakamautinoa aka ne tino a te lotou tulaga ke ‵lago io me teke atu ki te Malo o te Atua.

Ka Faka‵sao a “Faleie o Iuta”

13. Se a te mea e fakasino atu ki ei te tugāpati ko “faleie o Iuta,” kae kaia e faka‵sao ei ne Ieova a tino kolā e pokotia i ei?

¹³ Faitau te Sakalia 12:​7, 8, Tusi Paia, Samoa. I Isalaelu i aso mua, a faleie ne mea masani kolā ne fakaaogā sāle ne tausi mamoe mo tino fai fatoaga. A tino konei, ko latou konā e pokotia muamua kae ma‵nako sāle ki se puipuiga māfai ko taua mai te fili ki te fakai o Ielusalema. A te tugāpati ko “faleie o Iuta” e fakasino ki te ‵nofo atu o te ‵toega o te kau fakaekegina i se auala fakatusa i te koga ateatea, kae e se i loto i se fakai telā e ‵pui faka‵lei. I te koga eiloa tenā, e ‵pulu ei ne latou mo te loto ‵toa a mea o te Malo Faka-Mesia. Ka faka‵sao muamua eiloa ne Ieova o kautau a “faleie o Iuta” me e ‵tu tonu eiloa latou i te auala e taua mai ei a Satani.

14. E ‵pulu pefea ne Ieova a tino i loto i “faleie o Iuta” kae tausi pefea ne ia latou ke mo a e vāivāi?

¹⁴ E tonu, e fakamaoni mai i tala fakasolopito, me e ‵pulu eiloa ne Ieova a sui fakaekegina o te Malo kolā e ‵nofo i te koga ateatea i loto i olotou “faleie.”b E fai ne ia latou ke mo a e “vāivāi” mai te fakamalosi atu ki a latou kae ke loto ‵toa e pelā mo Tavita, te tupu o kautau.

15. Kaia e ‵sala atu ei a Ieova ki auala ke “fakamasei . . . so se malo,” kae ko te taimi fea ka fai ei ne ia te mea tenā?

¹⁵ Faitau te Sakalia 12:⁠9. Kaia e ‵sala atu ei a Ieova o “fakamasei . . . so se malo”? Me e ‵teke atu faeloa latou ki te Malo Faka-Mesia. E ‵tau eiloa o fakamasino latou ona ko te fai fakamasei mo te fakasauā ne latou a tino o te Atua. Ko pili fua nei o taua ‵tonu atu a sui o Satani i te lalolagi nei ki tino tapuaki ‵tonu o te Atua, telā ka takitaki atu ei ki te tulaga telā e faipati ki ei te Tusi Tapu me ko Amaketo. (Fakaasiga 16:​13-​16) E ‵tusa mo te osomaiga tenā, ka ‵pulu eiloa ne te Famasino Sili ana tavini kae fakamaluga aka ei tena igoa i fenua katoa.​​—⁠Esekielu 38:​14-​18, 22, 23.

16, 17. (a) Se a “te tofi . . . o tavini a Ieova”? (e) Se a te mea e fakamaoni atu ne te ‵tou kufaki i ‵tekemaiga a Satani?

¹⁶ E seai eiloa se meatau a Satani e mafai o fakavāivāi ne ia te fakatuanaki io me fakaseai ne ia te loto finafinau o tino o te Atua i te lalolagi kātoa. A te ‵tou filemu faka-te-agaga, telā e iku mai i te malosi faka‵sao tino o Ieova ko “te tofi tenā o tavini a Ieova.” (Isaia 54:​17, Tusi Paia, Samoa) E seai se tino e mafai o ‵fao mālō ne ia a ‵tou tulaga filemu mo te manuia i te feitu faka-te-agaga. (Salamo 118:⁠6) Ka tumau eiloa a te fakamalosi aka ne Satani a ‵tekemaiga mo logo‵maega. A te ‵tou kufaki mo te fakamaoni faitalia a fakatauemuga, se fakamaoniga me e maua eiloa ne tatou a te agaga o te Atua. (1 Petelu 4:​14) Ko folafola atu nei i te lalolagi kātoa a te tala ‵lei o te Malo o Ieova telā ko oti ne fakatu aka. E pelā me ne meatau fakaofoofogina, e uke a “pana” fakatusa a te fili ko oti ne pana mai ki tino o te Atua. Kae, mai te malosi o Ieova ne mafai o manumalo ana tavini i vaegā pana penā, kae fakasēaogā foki ne latou. (Sakalia 9:​15, Tusi Paia, Samoa) E se mafai eiloa o taofi aka a te ‵toega o te kau fakaekegina mo olotou taugasoa fakamaoni!

¹⁷ E olioli faeloa tatou ki te faka‵saoga katoatoa mai i osomaiga a te Tiapolo. Mafaga o fakamafanafanaga gali ko maua ne tatou i te iloa atu me ‘e seai eiloa se meatau e mafai o fakapakia ne ia tatou kae ka isi faeloa se tali ki a latou kolā e taumafai o taku fakamasei tatou’!

[Fakamatalaga mai lalo]

Ka Tali Mai Koe Pefea?

• Ne a mea e fakamaoni mai i ei me e se aogā a meatau a Satani?

• E fai pefea a Ielusalema faka-te-lagi e pelā me se “fatu ‵mafa”?

• E faka‵sao pefea ne Ieova a “faleie o Iuta”?

• I te pilipili atu o tatou ki Amaketo, se a te mea e talitonu koe ki ei?

[Fakamatalaga o te Ata i te itulau e 29]

Ne fakamaoni faeloa a tino o Ieova i Albania faitalia a ‵tekemaiga a Satani

[Fakamatalaga o te Ata i te itulau e 30]

E seai eiloa se meatau e mafai o fakapakia ne ia a tino kolā e folafola atu te tala ‵lei

[Fakamatalaga o te Ata i te itulau e 31]

Ne ‵teke atu a Iesu ki ‵losiga ‵se