Nofo I Loto I Te Vanu O Te Puipuiga A Ieova

1, 2. Se a te taua tonu telā ko pili fua o oko mai, kae se a te mea e se manakogina ke fai ne tavini a te Atua i te taua tenei?

I A Oketopa 30, 1938, ne fakalogo‵logo a te fia miliona o tino i te Iunaite Sitete ki te polokalame i te letio e uiga ki se koniseti. Ne fakavae a te tala mai te tusi o tala sē ‵tonu ko The War of the Worlds. Ne fakamatala mai ne tino i te koniseti a te okomaiga o te kautau mai Mars kolā ka fakamasei valevale ne latou te Lalolagi. E tigā eiloa ko oti ne faka‵pula me i te polokalame i te letio se tala fua, ne ma‵natu aka a tino fakalogo‵logo i te osomaiga tenā se mea tonu eiloa kae ko kamata o ma‵taku. A nisi tino ko fai a taumafaiga ke puipui latou mai tino kolā e mafau‵fau latou me ne o‵mai i se koga fakaa‵tea.

² I aso nei, e isi se taua tonu telā ko pili fua o oko mai. E ui i ei, a tino e se fia ‵saga ki tena oko mai. E se ‵valo mai a te taua tenei i se tusi fakasaienisi, kae i te Muna fakaosofia eiloa a te Atua, ko te Tusi Tapu. A te taua tenei ko te taua o Amaketo​—te taua a te Atua ki te lalolagi matagā tenei. (Faka. 16:14-16) I te taua tenei, ka sē manakogina ne tavini a te Atua i te lalolagi ke puipui latou mai tino o nisi paneta. Kae ka ofo latou i mea fakaofoofogia e ‵tupu mo te fakaasimaiga o te malosi fakamataku o te Atua.

3. Se a te valoaga ka mafau‵fau tatou ki ei, kae kaia e tāua ei ki a tatou?

³ E isi se sokoga o te valoaga mai te Tusi Tapu i te Sakalia mataupu e 14 ki te taua o Amaketo. E ui eiloa ne tusi i se 2,500 tausaga ko ‵teka, e pokotia eiloa ‵tou ola i te valoaga tenei. (Lo. 15:4) A te ukega o mea kolā ne tusi i ei e faipati loa ki tulaga kolā ne pokotia i ei a tino o te Atua talu mai te fakatuga o te Malo faka-Mesia i te lagi i te 1914 mo mea fakaofoofogia kolā ko pili o ‵tupu i se taimi pili mai mua nei. A toe vaega tāua o te valoaga ko te faitega o “se vanu lasi ‵ki” mo te ‵tafeatuga o “vai o te ola.” (Saka. 14:4, 8, NW) E tāua ‵ki te tusaga e fai ne te vanu tenei i te puipuiga o tino tapuaki o Ieova. Kae kafai e malama‵lama tatou i te aoga o vai o te ola ki a tatou, ka sē manakogina ke inu malie fua ki ei kae ka ma‵nako eiloa tatou o inu malosi ki ei. E tāua ‵ki eiloa ke ‵saga tonu atu tatou ki te valoaga tenei.​—2 Pe. 1:19, 20.

KO KAMATA ‘A TE ASO O IEOVA’

4. (a) Ne kamata anafea ‘te aso o Ieova’? (e) I te fia sefulu tausaga mai mua o te 1914, ne a mea ne folafola atu ne tino tapuaki o Ieova, kae ne ‵saga atu pefea a takitaki o te lalolagi ki ei?

⁴ Ne fakatomua eiloa a te mataupu e 14 o te Sakalia ki ‘te aso o Ieova.’ (Faitau te Sakalia 14:1, 2.) Se a te aso tenei? Ko “te aso o te Aliki,” telā ne kamata i te taimi ne fai ei a “te malo o te lalolagi” mo fai a “te Malo o te ‵tou Aliki, penā foki mo tena Keliso.” (Faka. 1:10; 11:15) Ne kamata a te aso tenā ki te fakatuga o te Malo faka-Mesia i te lagi i te 1914. I te fia sefulu tausaga mai mua o te 1914, ne folafola atu ne tino tapuaki o Ieova ki atufenua me i te “taimi ne fuafuagina mō fenua fakaa‵tea” ka oti atu i te tausaga tenā kae ulu atu te lalolagi ki loto i se vaitaimi o fakalavelave. (Luka 21:24) Ne ‵saga mai pefea a atufenua? I lō te ‵saga tonu atu ki te faka‵pulaga tenā, ne fakatauemu kae fakasaua atu a takitaki fakapolitiki mo takitaki lotu ki tino talai loto finafinau o te kau fakaekegina konā. I te faiga penā, e fakaitaita atu a takitaki o te lalolagi konei ki te Atua Malosi Katoatoa, me i sui fakaekegina o te Malo e sui atu ne latou a te “Ielusalema faka-te-lagi”​—te Malo faka-Mesia​—telā e aofia latou i ei.​—Epe. 12:22, 28.

5, 6. (a) Ne a mea kolā ne ‵valo mai me ne fai ne atufenua ki “te fa‵kai” mo ana ‘tino tonu’? (e) Ko oi a tino ne ‵toe kolā ne “‵nofo eiloa i te fenua”?

⁵ Ne ‵valo mai ne Sakalia a mea kolā ka fai ne atufenua, penei: “A te fa‵kai [Ielusalema] ka puke.” A “te fa‵kai” e fakatusa ki te Malo faka-Mesia o te Atua. E sui ne ana ‘tino tonu,’ ko te ‵toega o Kelisiano fakaekegina i te lalolagi. (Fili. 3:20) I te taimi o te Taua Muamua a te Lalolagi, a takitaki o te fakapotopotoga a Ieova i te lalolagi ne “puke,” kae ave ki se falepuipui i Atlanta, Georgia, i te Iunaite Sitete. A ‘fale ne ‵fao mālō’ telā ko te fakasaua malosi kae sē fai a fakamasinoga tonu ki a latou konei mo nisi tino fakamaoni aka. Ne taofi aka ne te fili a galuega kolā ne fai ne te ‵toega o te kau fakaekegina e auala i te fakatapuga o olotou tusi mo te lotou galuega e pelā me ne tino talai o te Malo.

⁶ Faitalia me e se tokouke a tino o te Atua, e fai a tala ‵loi e uiga ki a latou, e ‵teke ki ei, kae fakasauagina ne te fili, e se mafai eiloa o fakaseai a te tapuakiga tonu. Kae ko tino kolā ne ‵toe ko latou kolā ne “‵nofo eiloa i te fenua,” ko te ‵toega o te kau fakaekegina kolā ne ita ma “olo kea‵tea mai te fa‵kai.”

7. Se a te fakaakoakoga e tuku mai ne te fakamaoni o Molimau fakaekegina a Ieova ki tino tapuaki ‵tonu katoa i aso nei?

⁷ E mata, ne fakataunu katoatoa a te valoaga tenei i te fakaotiga o te Taua Muamua a te Lalolagi? Ikai. Koi uke loa a osomaiga mai atufenua ki te ‵toega o te kau fakaekegina mo olotou taugasoa a‵lofa fakamaoni kolā e fakamoe‵moe ke ola i te lalolagi. (Faka. 12:17) A te Taua i te Lua a te Lalolagi se fakamaoniga o te mea tenā. A te tumau o Molimau fakaekegina a te Atua i te fakamaoni e fakamalosi atu ki tavini a te Atua i aso nei ke loto ‵mau faitalia so se tofotofoga e fe‵paki mo latou, e aofia i ei a ‵tekemaiga mai i kāiga sē tali‵tonu, tino ga‵lue, io me ko tamaliki a‵koga kolā e fakatauemu atu ki a latou ona ko te lotou fakatuanaki. (1 Pe. 1:6, 7) Faitalia me ola latou i fea, ko sili atu nei te ‵mautakitaki o tino tapuaki ‵tonu i lō se isi taimi aka ke ‘tumau latou i te agaga e tasi,’ kae ke sē ‘ma‵taku ki tino kolā e ‵teke’ mai. (Fili. 1:27, 28) Tefea la te koga ka maua ei ne tino o Ieova a te ‵saogalēmū i loto i se lalolagi telā e takalia‵lia ki a latou?​—Ioa. 15:17-19.

E FAI NE IEOVA “SE VANU LASI ‵KI”

8. (a) Se a te mea e mafai o fakatusa ki ei a mauga i loto i te Tusi Tapu? (e) Se a te mea e fakatusa ki “te mauga o olive”?

⁸ Ona ko Ielusalema​—“te fa‵kai”​—se fakatusa o te Ielusalema faka-te-lagi, a “te mauga o olive telā e tu i mua o Ielusalema,” e ‵tau foki o fakatusa ki se mea. Se a te mea e sui mai ne te mauga tenā? Ka ‘vaelua pefea i tena kogaloto’ ke maua mai i ei a mauga e lua? Kaia ne fakasino atu a Ieova ki ei e pelā me ko “aku mauga”? (Faitau te Sakalia 14:3-5.) I loto i te Tusi Tapu, e mafai ne mauga o sui a malo. E tau atu foki a fakamanuiaga mo puipuiga ki te mauga o te Atua. (Isa. 11:9; 25:6, 7) Tela la, a te mauga o olive telā e tu i ei te Atua i te feitu ki te saegala o te fa‵kai o Ielusalema i te lalolagi nei e fakatusa loa ki te pulega a Ieova i te lalolagi kātoa, tena pulega tafasili i te maluga.

9. I te feitu fea ne vaelua ei a “te Mauga o Olive”?

⁹ Se a te mea ne fakaasi mai ne te ‵vaega o te mauga o olive i te kogaloto? A te mauga telā ne tu i te feitu ki te saegala o Ielusalema, ne vaelua me ko fakatu ne Ieova a te suā pulega. A te lua o pulega tenei ko te Malo faka-Mesia i lima o Iesu Keliso. Tenā te pogai ne faipati ei a Ieova e uiga ki mauga e lua kolā ne maua mai i te ‵vaega o “te Mauga o Olive” e pelā mo ko “aku mauga.” (Saka. 14:4) I a ia a mauga e lua konā.

10. Se a te mea e fakatusa ki ei a te “vanu lasi ‵ki” i te va o mauga e lua?

¹⁰ I te taimi ne vaelua ei a te mauga fakatusa, e āfa ka gasue ki matū kae āfa ki saute, kae ko vae o Ieova e ‵tu eiloa i luga i mauga e lua konā. Ko maua ei se “vanu lasi ‵ki” mai lalo i vae o Ieova. E sui mai ne te vanu fakatusa tenei a te puipuiga mai te Atua, telā e maua i ei ne tavini a Ieova a te ‵saogalēmū mai lalo i tena pulega i te lalolagi kātoa mo te pulega a te Malo faka-Mesia a tena Tama. Ka fakamautinoa eiloa ne Ieova ke sē mafai lele o fakaseai a te tapuakiga ‵ma. Ne tupu anafea a te ‵vaega o te mauga o olive tenei? Ne tupu i te taimi ne fakatu ei a te Malo faka-Mesia i te fakaotiga o Taimi o Fenua Fakaa‵tea i te 1914. Ne kamata anafea te malaga a tino tapuaki ‵tonu ki te vanu fakatusa?

KO KAMATA A TE MALAGA KI TE VANU!

11, 12. (a) Ne kamata anafea a te malaga ki te vanu fakatusa? (e) Se a te mea e fakatalitonu mai i ei me e fakatasi atu eiloa a lima ‵mafi o Ieova ki ana tino?

¹¹ Ne fakailoa atu ne Iesu ki ana soko: “Ka takalia‵lia a fenua katoa ki a koutou ona ko toku igoa.” (Mata. 24:9) I aso fakaoti o te olaga tenei talu mai i te 1914, ne gasolo aka eiloa o malosi atu a te takalialia tenā. Faitalia a fakasauaga e fai atu ki te ‵toega o te kau fakaekegina ne olotou fili i te taimi o te Taua Muamua a te Lalolagi, a tino o te potukau fakamaoni tenei ne seki ‵mate. I te 1919, ne fakasaoloto latou mai lima o Papelonia te Sili, te emupaea o lotu ‵se i te lalolagi. (Faka. 11:11, 12)a Tenā te taimi ne kamata ei a te malaga ki te vanu o mauga o Ieova.

¹² Talu mai te 1919, ne tumau eiloa a te vanu o puipuiga mai te Atua i te puipuiga o tino tapuaki ‵tonu i te lalolagi kātoa. Ne uke ‵ki eiloa a fakataputapuga ne fai ki te galuega talai mo tusi faka-te-Tusi Tapu a Molimau a Ieova i te fia sefulu tausaga ko ‵teka i te lalolagi kātoa. Koi tumau eiloa a vaegā fakataputapuga penā i nisi fenua. Me pefea eiloa te taumafai o atufenua, ka sē manumalo eiloa latou i te fakaseaiga o te tapuakiga tonu! Ka fakatasi atu eiloa a lima ma‵losi o Ieova ki luga i ana tino.​—Teu. 11:2.

13. E ‵nofo ‵mau pefea tatou i loto i te vanu o puipuiga a Ieova, kae kaia e tāua malosi atu nei ke fai penā i lō so se taimi aka?

¹³ Kafai e ‵piki ‵mau tatou ki a Ieova kae ‵tu ‵mautakitaki i te munatonu, ka fai eiloa ne lāua mo tena Tama ko Iesu Keliso a lā vaega, kae ka sē talia ne te Atua se tino io me se mea ke ‘‵futi ne ia tatou kea‵tea mai i Ana lima.’ (Ioa. 10:28, 29) E toka a Ieova o fakaoko mai so se fesoasoani e manakogina ko te mea ke mafai o faka‵logo tatou ki a ia e pelā me ko te Pule i te Lalolagi kātoa kae tumau i te a‵lofa fakamaoni ki te Malo faka-Mesia. E tāua ke ‵nofo tatou i loto i te vanu o puipuiga, me ka lasi atu te aoga o te vanu tenā ki tino tapuaki ‵tonu i te taimi o te fakalavelave lasi telā ko pili ‵ki mai.

KO OKO MAI ‘TE ASO E TAUA EI A IA’

14, 15. I ‘te aso e taua ei’ te Atua ki ana fili, ka fai pefea te tulaga o latou kolā e ‵nofo mai tua o te vanu?

¹⁴ Ona ko te pili mai o te gataga o te olaga tenei, ka fakamalosi aka ne Satani auala e oso atu ei a ia ki tavini a Ieova. I konā, ko oko mai ei ‘te aso e taua ei’ te Atua ki ana fili. Ka fakamautinoa aka ne Ieova ke fai se osomaiga e tasi a Satani mo fai a te ‵toe osomaiga eiloa a tou tagata. I te aso tenā, ka faka‵kese ne te Pule o te lagi mo te lalolagi a ia eiloa ke pelā me se Sotia telā ko sili atu te takutakua i lō so se “aso o te taua” ne aofia muamua a ia i ei.​—Saka. 14:3.

¹⁵ I te aso e taua ei te Atua, se a te mea ka tupu ki a latou kolā e ‵nofo i tua o te “vanu lasi” o puipuiga? Ka “seai se mainaga tāua” o te taliaga a te Atua e sulu atu ki luga i a latou. I te aso o te taua tenā ka oko mai, a “te solofanua, te miula, te kamela, mo te asini tagata, mo vaegā manu ‵lata katoa”​—ko fakatusa o meatau a kautau o atufenua—ka pokotia. A meatau konā ka “ma‵keke,” ko sē ga‵lue e pelā eiloa me ne fakapoloka. Ka fakaaoga foki ne Ieova a famai mo “te mala.” Faitalia me se mea tonu io me ikai, ka fakafilemu ne te mala a fakamatakutakuga fakama‵taku. I te aso tenā, “a mata o te tino . . . mo te alelo ka ‵pala” me i tino kolā e faitaua atu ka mafai fua o oso atu e pelā me ne tino ‵kivi kae ko olotou pati fakaitaita ka sē lagona atu. (Saka. 14:6, 7, 12, 15, NW) Ka seai eiloa se vaega o te lalolagi e sao i te fakaseaiga. A kautau kolā e ‵tu i te feitu o Satani ka tokouke ‵ki eiloa. (Faka. 19:19-21) “I te aso tenā, a foitino o tino kolā ne tamate ne te Aliki [Ieova] ka tafola valevale mai i te suā mata o te lalolagi ke oko ki te suā mata.”​—Iele. 25:32, 33.

16. I te kilo atu ki te pili mai o te aso e taua ei te Atua, ne a fesili e ‵tau o mafau‵fau tatou ki ei, kae se a te mea e ‵tau o fai ne tatou?

¹⁶ E aumai faeloa ne taua a logo‵maega, ke oko foki eiloa ki tino kolā e manumalo. Kāti ko sē lava a mea‵kai. Kāti ko ‵galo a kope totino. Kāti ko fanaifo te tulaga o te olaga. Kāti ko sē lasi te saolotoga totino e maua. Kafai e oko mai ki a tatou a tulaga faiga‵ta penā, ka ‵saga atu pefea tatou ki ei? E mata, ka manava‵se tatou? E mata, ka tiakina ne tatou a ‵tou fakatuanaki ona ko tulaga faiga‵ta? E mata, ka tiaki ne tatou a ‵tou fakamoemoega kae ma‵natu aka me ko sē mafai o manumalo tatou i ei? Ko oko eiloa i te tāua ke fakatumau ‵tou fakatuanaki ki te malosi faka‵sao tino o Ieova i te taimi o te fakalavelave lasi kae ke ‵nofo ‵mau i loto i te vanu o puipuiga!​—Faitau te Sapakuka 3:17, 18.

A “VAI O TE OLA KA ‵TAFE ATU”

17, 18. (a) Ne a “vai o te ola”? (e) Se a te mea e sui mai ne te Tai Mate mo te Tai Metitilani? (i) Kafai e kilo atu koe ki te taimi mai mua, se a tau fakaikuga e ‵tau o fai?

¹⁷ Mai tua o Amaketo, ka tumau eiloa te ‵tafe atu o “vai o te ola” mai te nofoaga o te Malo faka-Mesia. A “vai o te ola” konei ko mea kolā e tuku mai ne Ieova e maua ei te ola. Ne fakaaoga eiloa a te Tai Mate mo te Tai Metitilani ke fakasino atu ki tino. E sui mai ne te Tai Mate a latou kolā i loto i te tanuga masani o tino katoa. Ona ko te Tai Metitilani e ‵fonu i mea ola, e fakaata faka‵lei mai i ei a te “vaitino tokouke” o tino kolā e ‵sao atu i Amaketo. (Faitau te Sakalia 14:8, 9; Faka. 7:9-15) Tela la, ka maua eiloa ne potukau e lua konei a mea aoga me ka saoloto latou mai te mate telā ne togi mai ne Atamu, māfai e tumau latou i te inu ki vai ola fakatusa, io me ko “te vaitafe o te vai o te ola.”​—Faka. 22:1, 2.

¹⁸ Mai lalo i te puipuiga a Ieova ka ‵sao atu eiloa tatou i te gataga o te olaga masei tenei kae ulu atu ki loto i te lalolagi fou kae amiotonu a te Atua. Faitalia me takalia‵lia mai ki a tatou a atufenua katoa, ke na fakaiku aka ne tatou ke tumau i te fai mo tino a‵lofa fakamaoni o te Malo o te Atua, kae ‵nofo i loto i te vanu o puipuiga a Ieova ke oko ki te se-gata-mai.